ରାଜନୀତି

ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଲେ କ୍ୟାପଟେନ୍ ଅମରିନ୍ଦର ସିଂ

ପଞ୍ଜାବର ମୁଖ୍ୟମନ୍ତ୍ରୀ ପଦରୁ ବରିଷ୍ଠ କଂଗ୍ରେସ ନେତା ତଥା କ୍ୟାପଟେନ୍ ଅମରିନ୍ଦର ସିଂ ଇସ୍ତଫା ଦେଇଛନ୍ତି। କଂଗ୍ରେସ ସଂସଦୀୟ ଦଳ (ସିଏଲପି) ବୈଠକ ଆରମ୍ଭ ହେବାର କେଇ ଘଣ୍ଟା ପୂର୍ବରୁ କ୍ୟାପଟେନ୍ ଅମରିନ୍ଦର ଗଭର୍ଣ୍ଣର୍ ବନୱାରିଲାଲ୍ ପୁରୋହିତଙ୍କୁ ଭେଟି ଇସ୍ତଫାପତ୍ର ପ୍ରଦାନ କରିଥିଲେ। ଏଥିସହ ମୁଖ୍ୟମନ୍ତ୍ରୀ କ୍ୟାପଟେନ୍ ଅମରିନ୍ଦର ଗଣମାଧ୍ୟମକୁ କହିଛନ୍ତି ଯେ ସେ ଅପମାନିତ ଅନୁଭବ କରିବାରୁ ମୁଖ୍ୟମନ୍ତ୍ରୀ ପଦ ଛାଡ଼ିଛନ୍ତି। ଗତ ୫୨ ବର୍ଷର ରାଜନୀତି ଜୀବନରେ ପୂର୍ବରୁ କଦାପି ଏତେଟା ଅପମାନିତ ଅନୁଭବ କରି ନ ଥିଲି। ନିଜର ସମର୍ଥକଙ୍କ ସହ ଆଲୋଚନା କରିବା ପରେ ଭବିଷ୍ୟତ କାର୍ଯ୍ୟପନ୍ଥା ସ୍ଥିର କରିବେ ବୋଲି କ୍ୟାପଟେନ୍ ଅମରିନ୍ଦର କହିଛନ୍ତି। ଶନିବାର ଅପରାହ୍ନରେ କ୍ୟାପଟେନ୍ ଅମରିନ୍ଦର ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିବା ବେଳେ ପୂର୍ବାହ୍ନରେ କଂଗ୍ରେସ ହାଇକମାଣ୍ଡ୍ ସୋନିଆ ଗାନ୍ଧି ତାଙ୍କୁ ଏପରି ନିଷ୍ପତ୍ତି ନେବାକୁ କହିଥିବା ଆଲୋଚନା ହେଉଛି। ଜଣେ ନୂଆ ନେତାଙ୍କୁ ନିର୍ବାଚନ କରିବା ଦିଗରେ ଏହା ସୁବିଧା ହେବ ବୋଲି ସୋନିଆ କହିଥିଲେ ହେଁ କ୍ୟାପଟେନ୍ ଅମରିନ୍ଦର ପଦ ଛାଡ଼ିବାକୁ ରାଜି ହୋଇ ନ ଥିଲେ। ଯଦି ତାଙ୍କ ଉପରେ ଅଧିକ ଚାପ ପଡ଼େ, ତା’ହେଲେ ସେ ଦଳରୁ ଇସ୍ତଫା ଦେବାକୁ ପସନ୍ଦ କରିବେ ବୋଲି କହିଥିବା ଏକ ନିର୍ଦ୍ଦିଷ୍ଟ ସୂତ୍ରରୁ ଜଣାପଡ଼ିଛି। ପଞ୍ଜାବରେ ଆସନ୍ତା ବର୍ଷ ବିଧାନସଭା ନିର୍ବାଚନ ହେବାକୁ ଥିବାରୁ କଂଗ୍ରେସ ଏଥିସକାଶେ ପ୍ରସ୍ତୁତି ପାଇଁ କ୍ୟାପଟେନ୍ ଅମରିନ୍ଦରଙ୍କୁ ମୁଖ୍ୟମନ୍ତ୍ରୀ ପଦ ଛାଡ଼ିବାକୁ କହିଥିଲା।

ବିଜେପିକୁ ଝଟକା: ଟିଏମସିରେ ଯୋଗଦେଲେ ବାବୁଲ୍

ବିଜେପି ପକ୍ଷରୁ କେନ୍ଦ୍ରରେ ଦୁଇ ଦୁଇ ଥର ମନ୍ତ୍ରୀ ହେବାର ସୁଯୋଗ ପାଇଥିବା ସୁନାମଧନ୍ୟ ଗାୟକ ବାବୁଲ୍ ସୁପ୍ରିୟୋ ଶେଷରେ ଦଳ ବଦଳାଇଛନ୍ତି। ପଶ୍ଚିମବଙ୍ଗରେ ଗତ ବିଧାନସଭା ପରେ ଟିଏମସିର କ୍ଷମତା ବଢ଼ିଚାଲିଥିବା ବେଳେ ବିଜେପି ଲୋକପ୍ରିୟତା ହ୍ରାସ ପାଉଥିବା ଲକ୍ଷ୍ୟ କରି ନିଜର ରାଜନୈତିକ କ୍ୟାରିୟରକୁ ବଞ୍ଚାଇବା ସକାଶେ ବାବୁଲ୍ ବିରୋଧୀ ଟିଏମସିରେ ଯୋଗ ଦେଇଛନ୍ତି। ଶନିବାର ଏଆଇଟିସି ଟ୍ବିଟର୍ ହ୍ୟାଣ୍ଡଲରେ ଟିଏମସି ପକ୍ଷରୁ ସୂଚନା ଦିଆଯାଇଛି ଯେ ଦଳର ଜାତୀୟ ସାଧାରଣ ସମ୍ପାଦକ ଅଭିଷେକ ବାନାର୍ଜୀ ଓ ରାଜ୍ୟସଭା ସାଂସଦ ଡେରେକ୍ ଓ’ବ୍ରାଏନଙ୍କ ଉପସ୍ଥିତିରେ ପୂର୍ବତନ କେନ୍ଦ୍ର ମନ୍ତ୍ରୀ ତଥା ବର୍ତ୍ତମାନର ଆସନସୋଲ୍ ସାଂସଦ ବାବୁଲ୍ ସୁପ୍ରିୟୋ ଟିଏମସି ପରିବାରରେ ସାମିଲ୍ ହୋଇଛନ୍ତି। ଦଳ ତାଙ୍କୁ ସ୍ବାଗତ କରୁଛି ବୋଲି ଉକ୍ତ ଟ୍ବିଟରରେ ଦର୍ଶାଇଛନ୍ତି। ବାବୁଲ୍ ଆସନସୋଲରୁ ଦୁଇ ଥର ସାଂସଦ ଭାବେ ନିର୍ବାଚିତ ହୋଇଛନ୍ତି। ଉଭୟ ଥର ବିଜେପି ଟିକେଟରେ ସେ ଲୋକସଭା ଯାଇଛନ୍ତି। ତାଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କ କ୍ୟାବିନେଟରେ ସୂଚନା ଓ ପ୍ରସାରଣ ମନ୍ତ୍ରାଳୟ ଦାୟିତ୍ବ ମଧ୍ୟ ଦେଇଥିଲେ। କିନ୍ତୁ ନିକଟରେ ମନ୍ତ୍ରିମଣ୍ଡଳରେ କେତେକ ପରିବର୍ତ୍ତନ କରାଯିବା ପରେ ବାବୁଲଙ୍କୁ ମନ୍ତ୍ରିମଣ୍ଡଳରୁ ବାଦ୍ ଦିଆଯାଇଥିଲା।

ଏସ୍‌ସିଓ ସମ୍ମିଳନୀରେ ଆଫଗାନିସ୍ତାନ ପ୍ରସଙ୍ଗ ଉଠାଇଲେ

ଶୁକ୍ରବାର ଦୁସାନବେଠାରେ ଅନୁଷ୍ଠିତ ଶାଙ୍ଘାଇ କର୍ପୋରେସନ ଅର୍ଗାନାଇଜେସନ (ଏସସିଓ) ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଫଗାନିସ୍ତାନ ପ୍ରସଙ୍ଗ ଉଠାଇଛନ୍ତି। ଭିଡିଓ କନଫରେନ୍ସିଂ ଜରିଆରେ ଆୟୋଜିତ ଏହି ସମ୍ମିଳନୀରେ ପ୍ରଧାନମନ୍ତ୍ରୀ ମୋଦୀ କଠୋରତାବାଦ ସବୁଠାରୁ ବଡ଼ ଚ୍ୟାଲେଞ୍ଜ ହେବାକୁ ଯାଉଛି ବୋଲି କହିଛନ୍ତି। ଏହାର ଉଦାହରଣ ଦେବାକୁ ଯାଇ ଆଫଗାନିସ୍ତାନରେ ଚାଲିଥିବା କାଣ୍ଡ ସମ୍ପର୍କରେ ପରୋକ୍ଷରେ ସୂଚନା ଦେଇଛନ୍ତି। ଇରାନର ସଦସ୍ୟତାକୁ ସ୍ବାଗତ କରି ମୋଦୀ କହିଛନ୍ତି ଯେ ଏସସିଓ ବିଂଶତମ ବର୍ଷ ପୂର୍ତ୍ତି ପାଳନ ଅବସରରେ ଖୁସିର କଥା ଯେ ଆମ ସହ ନୂଆ ବନ୍ଧୁ ରାଷ୍ଟ୍ର ଯୋଡ଼ି ହେଉଛନ୍ତି। ଇରାନର ନୂଆ ସଦସ୍ୟତାକୁ ସ୍ୱାଗତ କରୁଛି ଓ ଆମ ପାର୍ଟନର ଇଜିପ୍ଟ,, କତାର ଓ ସାଉଦି ଆରବକୁ ମଧ୍ୟ ସ୍ୱାଗତ କରୁଛି ବୋଲି ମୋଦୀ ତାଙ୍କ ଅଭିଭାଷଣରେ କହିଛନ୍ତି।

କୋରୋନା ଟିକାକରଣ ବିନା ଜାତିସଂଘ ବୈଠକରେ ଯୋଗଦେବେ ବ୍ରାଜିଲ୍‌ର ରାଷ୍ଟ୍ରପତି!

ଏ ପର୍ଯ୍ୟନ୍ତ କୋରୋନା ଟିକା ନେଇ ନ ଥିବା ବ୍ରାଜିଲ୍‌ର ରା‌ଷ୍ଟ୍ରପତି ଜୈର ବୋଲ୍‌ସୋନାରୋ ଆଗାମୀ ସପ୍ତାହରେ ନ୍ୟୁୟର୍କରେ ହେବାକୁ ଥିବା ଜାତିସଂଘ କନ୍‌କ୍ଲେଭ୍‌ରେ ଯୋଗଦେବେ ବୋଲି ଗୁରୁବାର କହିଛନ୍ତି। କିନ୍ତୁ ଯେ କୌଣସି କାର୍ଯ୍ୟକ୍ରମରେ ଯୋଗ ଦେବା ପାଇଁ ‘ଟିକାକରଣ ପ୍ରମାଣ’ ଆବଶ୍ୟକ ବୋଲି ନ୍ୟୁୟର୍କର ସରକାରୀ କର୍ତ୍ତୃପକ୍ଷମାନେ ନିକଟ ଅତୀତରେ ଘୋଷଣା କରିଛନ୍ତି। ରାଷ୍ଟ୍ରପତି ବୋଲ୍‌ସୋନାରୋ କହିଛନ୍ତି, ଆଗାମୀ ସପ୍ତାହରେ ମୁଁ ୟୁ‌ଏନ୍‌ ଜେନେରାଲ୍‌ ଆସେମ୍ବ୍ଲି (ୟୁଏନ୍‌ଜିଏ)ରେ ଥିବି। ମଙ୍ଗଳବାର ସେଠାରେ ମୁଁ ଉଦ୍‌ଘାଟନୀ ଭାଷଣ ଦେବି। ମୋ’ ଭାଷଣ ବିବାଦରହିତ, ଖୁବ୍‌ ନିରପେକ୍ଷ ଏବଂ ଆମ ସ୍ବାର୍ଥଗତ ସମସ୍ୟା ଉପରେ ଆଲୋକପାତ କରିବ। ମହାମାରୀ କୋରୋନା ପ୍ରତି ବ୍ରାଜିଲ୍‌ର ଆଭିମୁଖ୍ୟ, ବ୍ରାଜିଲ୍‌ର କୃଷିଜାତ ବ୍ୟବସାୟ ଏବଂ ଶକ୍ତି ସଂକ୍ରାନ୍ତରେ ମଧ୍ୟ ସେ ଆଲୋଚନା କରିବେ ବୋଲି କହିଛନ୍ତି।

ଶପଥ ନେଲେ ଭୂପେନ୍ଦ୍ରଙ୍କ ନୂଆ ଟିମ୍: ରୂପାନୀଙ୍କ ମନ୍ତ୍ରିମଣ୍ଡଳର
ବୈଜୟନ୍ତ ପଣ୍ଡା ଏନସିସି କମିଟିର ନୂଆ ଚେୟାରମ୍ୟାନ, ଧୋନି ଓ ମହିନ୍ଦ୍ରା ବି ସାମିଲ
ଆଜି ଏସସିଓ ବୈଠକ: ଇମ୍ରାନଙ୍କ ସାମ୍ନାରେ ଆତଙ୍କବାଦ ପ୍ରସଙ୍ଗ ଉଠାଇବେ ମୋଦୀ
ବାଇଡେନ୍‌ ଭୁଲିଗଲେ ଅଷ୍ଟ୍ରେଲୀୟ ପ୍ରଧାନମନ୍ତ୍ରୀଙ୍କ ନାଁ

ଆମେରିକୀୟ ରାଷ୍ଟ୍ରପତି ଜୋ ବାଇଡେନ୍‌ ଦେଉଥିଲେ ଅଷ୍ଟ୍ରେଲୀୟ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ, କିନ୍ତୁ ଲଜ୍ଜାବୋଧ ଅନୁଭବ କଲେ ଅଷ୍ଟ୍ରେଲୀୟ। କାରଣ ଅଷ୍ଟ୍ରେଲିଆ ଗୁରୁତ୍ବପୂର୍ଣ୍ଣ ତଥା ନୂତନ ସାମରିକ ମେଣ୍ଟରେ ଯୋଗ ଦେଇଥିବାରୁ ଗୁରୁବାର ଆମେରିକୀୟ ରାଷ୍ଟ୍ରପତି ବାଇଡେନ୍‌ ଧନ୍ୟବାଦ ଦେବା ବେଳେ ଅଷ୍ଟ୍ରେଲୀୟ ପ୍ରଧାନମନ୍ତ୍ରୀଙ୍କ ନାଁ ଭୁଲିଯାଇଥିଲେ। ସମ୍ଭବତଃ, ଅଷ୍ଟ୍ରେଲୀୟ ପ୍ରଧାନମନ୍ତ୍ରୀ ସ୍କଟ୍‌ ମୋରିସନ୍‌ଙ୍କ ନାଁ ମନେ ନ ପଡ଼ିବାରୁ ବାଇଡେନ୍‌ ତାଙ୍କୁ ‘ଦ୍ୟାଟ୍‌ ଫେଲୋ ଡାଉନ୍‌ ଅଣ୍ଡର୍‌’ ଅର୍ଥାତ୍ ‘ଅଷ୍ଟ୍ରେଲୀୟ ବନ୍ଧୁ’ ଭାବେ ସମ୍ବୋଧନ କରିଥିଲେ। ସୂଚନାଯୋଗ୍ୟ, ଅଷ୍ଟ୍ରେଲିଆ ଏବଂ ନ୍ୟୁଜିଲାଣ୍ଡ ଭଳି କେତେକ ଦେଶକୁ ଇଂରାଜୀ ଭାଷାରେ ‘ଡାଉନ୍‌ ଅଣ୍ଡର୍‌’ କୁ‌ହାଯାଏ।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ

୩୨ତମ ଅଲିମ୍ପିକ୍ସ ଉଦଯାପିତ: ଟୋକିଓକୁ
ଟୋକିଓ: ୧୭ ଦିନ ଧରି ଚାଲିଥିବା କ୍ରୀଡ଼ା ମହାକୁମ୍ଭ ଅଲିମ୍ପିକ୍ସର ୩୨ତମ ସଂସ୍କରଣରେ ରବିବାର ପୂର୍ଣ୍ଣଚଛେଦ ପଡ଼ିଛି। ଗତ ୨୦୨୦ରେ ସଂସ୍କରଣଟି ଆୟୋଜିତ ହେବାକୁ ଥିଲେ ହେଁ କୋରୋନା ମହାମାରୀ କାରଣରୁ ଏହାକୁ ବର୍ଷେ ଘୁଞ୍ଚାଇ ଦିଆଯାଇଥିଲା। ଜାପାନରେ ଗତ ୨୩ ତାରିଖରେ ସଂସ୍କରଣ ଆରମ୍ଭ ପୂର୍ବରୁ ରାଜଧାନୀ ଟୋକିଓରେ ଏମର୍ଜେନସି ଜାରି ହେବା ସତ୍ତ୍ବେ ଆୟୋଜକଙ୍କ ଦୃଢ଼ ଇଛାଶକ୍ତି ଓ ଅଂଶୀଦାର ଦେଶର ସହଯୋଗ ବଳରେ ଅନତର୍ଜାତୀୟ ଅଲିମ୍ପିକ୍ସ କମିଟି (ଆଇଓସି) ଓ ଟୋକିଓ ୨୦୨୦ ସୁଚାରୁ ରୂପେ ଶେଷ କରିଛନ୍ତି। ସଂସ୍କରଣଟି ରବିବାର ଉଦଯାପିତ ହୋଇଥିବା ବେଳେ ବିନା ଦର୍ଶକରେ ଆୟୋଜିତ ହୋଇଥିଲେ ମଧ୍ୟ ବିଶ୍ବବ୍ୟାପୀ ଦର୍ଶକ ଏହାକୁ ମନଭରି ଉପଭୋଗ କରିଛନ୍ତି। ଆକର୍ଷଣୀୟ ଉଦଘାଟନୀ ଉତ୍ସବ ସହ ଆରମ୍ଭ ହୋଇଥିବା ଅଲିମ୍ପିକ୍ସର ୩୨ତମ ସଂସ୍କରଣଟି ରଙ୍ଗିନ ଆଲୋକମାଳା ସହ ରଙ୍ଗବେରଙ୍ଗର ଆତସବାଜି ସହ ଶେଷ ହୋଇଛି। ଆତସବାଜିରେ ଟୋକିଓ ଆକାଶ ପ୍ରଜ୍ଜ୍ବଳିତ ହେବା ସହ ଅଲିମ୍ପିକ୍ ରିଙ୍ଗଗୁଡ଼ିକର ଚିତ୍ର ପ୍ରତିଫଳିତ ହୋଇଥିଲା, ଯାହାକି ବେଶ୍ ଉପଭୋଗ୍ୟ ଥିଲା। ଏଥିସହ ଜାପାନ ରାଜଧାନୀରେ ଅଲିମ୍ପିକ୍ସ ଇଭେଣ୍ଟ ଉପରେ ପରଦା ଟଣାଯାଇଛି ଓ ପରବର୍ତ୍ତୀ ସଂସ୍କରଣର ଆୟୋଜକ ପ୍ୟାରିସକୁ ପତାକା ହସ୍ତାନ୍ତର କରାଯାଇଛି। ଏହି ପତାକା ହସ୍ତାନ୍ତର ସହ କୌଣସି ପ୍ରକାର ବାଧାବିଘ୍ନ ଅଲିମ୍ପିକ୍ସ ପରି କ୍ରୀଡ଼ା ମହାକୁମ୍ଭ ଆୟୋଜନରେ ବାଧକ ହୋଇପାରିବ ନାହିଁ, ଏପରି ଏକ ବାର୍ତ୍ତା ମଧ୍ୟ ଦିଆଯାଇଛି। ତା’ଛଡ଼ା ଘାତକ କୋରୋନାରେ ମୃତ୍ୟୁବରଣ କରିଥିବା ସଂକ୍ରମିତଙ୍କୁ ମଧ୍ୟ ସ୍ମରଣ କରାଯାଇଥିଲା। ଉଦଯାପନୀ ଉତ୍ସବରେ ଭାରତର ଧ୍ବଜାବାହକ ଦାୟିତ୍ବ ବ୍ରୋଞ୍ଜପଦକ ଜିତିଥିବା ପୁରୁଷ ରେସଲର୍ ବଜରଙ୍ଗ ପୁନିଆ ଶ୍ରେଷ୍ଠ ପ୍ରଦର୍ଶନକାରୀ ପ୍ରତିଯୋଗୀଙ୍କ ନେତୃତ୍ବ ନେଇଥିଲେ।