ରାଜନୀତି

କଂଗ୍ରେସରେ ସାମିଲ୍ ହେଲେ କହ୍ନୈୟା କୁମାର ଓ ଜିଗ୍ନେଶ ମେୱାନୀ

ସିପିଆଇର ଯୁବ ନେତା ତଥା ଜବାହରଲାଲ୍ ନେହରୁ ୟୁନିଭର୍ସିଟିର ପୂର୍ବତନ ଛାତ୍ର ନେତା କହ୍ନୈୟା କୁମାର ଓ ଗୁଜରାଟ ବିଧାୟକ ଜିଗ୍ନେଶ ମେୱାନୀ ମଙ୍ଗଳବାର କଂଗ୍ରେସରେ ଯୋଗ ଦେଇଛନ୍ତି। ସେମାନେ ଏଠାରେ ଦଳୀୟ ମୁଖ୍ୟାଳୟଠାରେ ପହଞ୍ଚି ଦଳର ପୂର୍ବତନ ସଭାପତି ରାହୁଲ୍ ଗାନ୍ଧିଙ୍କ ଉପସ୍ଥିତିରେ କଂଗ୍ରେସରେ ସାମିଲ୍ ହୋଇଛନ୍ତି। ଏହି କାର୍ଯ୍ୟକ୍ରମରେ ଉପସ୍ଥିତ ଥିବା ଦଳର ପ୍ରମୁଖ ମୁଖପାତ୍ର ରଣଦୀପ ସିଂ କହିଛନ୍ତି ଯେ ଦୁଇ ଯୁବ ନେତା କଂଗ୍ରେସରେ ସାମିଲ୍ ହେବା ନିଶ୍ଚିତ ଭାବେ ଏକ ସ୍ବତନ୍ତ୍ର ମୁହୂର୍ତ୍ତ। ଉଭୟ କହ୍ନୈୟା କୁମାର ଓ ଜିଗ୍ନେଶ ମେୱାନୀ ମୋଦୀ ସରକାର ବିରୋଧରେ ସବୁବେଳେ ସ୍ବର ଉତ୍ତୋଳନ କରିଆସିଛନ୍ତି। କେନ୍ଦ୍ର ସରକାରଙ୍କର କୌଣସି ଖୁଣ ବାଛିବାରେ ଏହି ଦୁଇ ଯୁବ ନେତା ଚାମ୍ପିଅନ୍ ବୋଲି କହିଲେ ଅତ୍ୟୁକ୍ତି ହେବ ନାହିଁ ବୋଲି ସିଂ କହିଛନ୍ତି। ସେହିପରି କଂଗ୍ରେସର ସାଧାରଣ ସମ୍ପାଦକ କେସି ବେନୁଗୋପାଲ ଦେଶବାସୀଙ୍କ ବାକ୍ ସ୍ବାଧୀନତା ପାଇଁ ଲଢ଼େଇ କ୍ଷେତ୍ରରେ କହ୍ନୈୟା କୁମାର ଏକ ପ୍ରମୁକ ନାମ ବୋଲି ମତ ଦେଇଛନ୍ତି। କଂଗ୍ରେସ ହାତ ଧରିବା ପରେ ଏଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ କହ୍ନୈୟା କୁମାର ପ୍ରଥମେ ଶହୀଦ ଭଗତ ସିଂଙ୍କୁ ତାଙ୍କ ଜନ୍ମ ବାର୍ଷିକୀରେ ଶ୍ରଦ୍ଧାଞ୍ଜଳି ଜଣାଇଥିଲେ।

ପଞ୍ଜାବ ପ୍ରଦେଶ କଂଗ୍ରେସ କମିଟିରୁ ଇସ୍ତଫା ଦେଲେ ସିଦ୍ଧୁ, ଦଳ ସହ ରହିବେ

ପଞ୍ଜାବ କଂଗ୍ରେସରେ ଗତ କିଛିଦିନ ହେଲା ଚାଲିଥିବା ଡ୍ରାମା ମଙ୍ଗଳବାର ଏକ ନୂଆ ମୋଡ଼ ନେଇଛି। ପୂର୍ବତନ କ୍ରିକେଟର ତଥା କଂଗ୍ରେସର ଅନ୍ୟତମ ବରିଷ୍ଠ ନେତା ନବଜୋତ ସିଂ ସିଦ୍ଧୁଙ୍କର ମୁଖ୍ୟମନ୍ତ୍ରୀ କ୍ୟାପଟେନ୍ ଅମରିନ୍ଦର ସିଂଙ୍କ ସହ ଜାରି ରହିଥିବା ବିବାଦରେ ନବଜୋତଙ୍କୁ ରାଜ୍ୟ ପିସିସି ସଭାପତି ଭାବେ ହାଇକମାଣ୍ଡ୍ ନିଯୁକ୍ତି ଦେଇଥିଲେ। ପରେ ହାଇକମାଣ୍ଡଙ୍କ ନିର୍ଦେଶ କ୍ରମେ ହିଁ କ୍ୟାପଟେନ୍ ଅମରିନ୍ଦର ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ। ପରବର୍ତ୍ତୀ ସମୟରେ ସିଦ୍ଧୁଙ୍କ ଅନୁଗତ ବୋଲାଉଥିବା ଚରନଜିତ୍ ସିଂ ଚନ୍ନି ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ। ନିକଟରେ ତାଙ୍କ ମନ୍ତ୍ରିମଣ୍ଡଳର ୧୫ ଜଣ ସଦସ୍ୟ ମଧ୍ୟ ଶପଥ ପାଠ କରିଥିଲେ। ତେବେ ଏପରି ସ୍ଥିତିରେ ମଙ୍ଗଳବାର ଅଚାନକ ସିଦ୍ଧୁ ତାଙ୍କ ପିପିସିସି ମୁଖ୍ୟ ପଦରୁ ଇସ୍ତଫା ଦେଇଛନ୍ତି। ଅବଶ୍ୟ ସେ ଦଳ ସହ ରହି ସାମାନ୍ୟ କର୍ମୀ ପରି କାର୍ଯ୍ୟ କରିବେ ବୋଲି କହିଛନ୍ତି। ଟ୍ବିଟର୍ ମାଧ୍ୟମରେ ସିଦ୍ଧୁ ଇସ୍ତଫା ଦେଇଥିବା କଥା ଘୋଷଣା କରିଛନ୍ତି। କଂଗ୍ରେସ ସଭାନେତ୍ରୀ ସୋନିଆ ଗାନ୍ଧିଙ୍କୁ ନିଜର ଇସ୍ତଫା ନେଇ ଲେଖିଥିବା ଚିଠି ମଧ୍ୟ ସୋସାଲ୍ ମିଡିଆରେ ସିଦ୍ଧୁ ପୋଷ୍ଟ୍ କରିଛନ୍ତି। ଉକ୍ତ ଚିଠିରେ ସେ ଉଲ୍ଲେଖ କରିଛନ୍ତି ଯେ ଯେଉଁ ବ୍ୟକ୍ତିବିଶେଷ ବୁଝାମଣା କରେ, ସେବେଠାରୁ ତା’ର ଚରିତ୍ରର ଅବକ୍ଷୟ ଘଟେ। ସେ କଦାପି ପଞ୍ଜାବର ଭବିଷ୍ୟତ ଓ ପଞ୍ଜାବର ବିକାଶ ପାଇଁ କଂଗ୍ରେସର ରହିଥିବା ଏଜେଣ୍ଡା ସହ ବୁଝାମଣା କରିପାରିବେ ନାହିଁ। ତେଣୁ ସେ ପିପିସିସି ସଭାପତି ପଦରୁ ଇସ୍ତଫା ଦେଉଛନ୍ତି। ଅବଶ୍ୟ କଂଗ୍ରେସର କର୍ମୀ ଭାବେ ସେ କାର୍ଯ୍ୟ କରିବା ଜାରି ରଖିବେ ବୋଲି ସିଦ୍ଧୁ ଉକ୍ତ ଚିଠିରେ ଦର୍ଶାଇଛନ୍ତି।

ଆୟୁଷ୍ମାନ୍ ଭାରତ ଡିଜିଟାଲ୍ ମିଶନର ଶୁଭାରମ୍ଭ, କେନ୍ଦ୍ରୀୟ ଯୋଜନାର ପ୍ରଶଂସା କଲେ ମୋଦୀ

ସୋମବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କେନ୍ଦ୍ର ସରକାରଙ୍କ ଦ୍ବାରା ଲାଗୁ ହୋଇଥିବା ଅନେକ ଜନକଲ୍ୟାଣ ଯୋଜନାର ଉଚ୍ଚ ପ୍ରଶଂସା କରିଛନ୍ତି। ଏଥିସହ ମୋଦୀ ଆୟୁଷ୍ମାନ୍ ଭାରତ ଡିଜିଟାଲ୍ ମିଶନର ମଧ୍ୟ ଶୁଭାରମ୍ଭ କରିଛନ୍ତି। କୋରୋନା ସଂକ୍ରମଣ ରୋକିବା ଦିଗରେ କେନ୍ଦ୍ର ସରକାରଙ୍କ ପକ୍ଷରୁ ଜାରି କରାଯାଇଥିବା ‘କୋୱିନ୍’ ଆପର ଉପଯୋଗିତାକୁ ପ୍ରଧାନମନ୍ତ୍ରୀ ମୋଦୀ ଉଚ୍ଚ ପ୍ରଶଂସା କରିବା ସହ ଏହି ଆପ୍ ମାଧ୍ୟମରେ ସାଧାରଣ ଲୋକେ ଟିକାକରଣ ପାଇଁ ପଞ୍ଜିକରଣ କରିବା ସହ ପ୍ରମାଣପତ୍ର ଆଦି ହାସଲ କରିପାରିଛନ୍ତି। ତେଣୁ ଏହା କୋଭିଡ୍ ସମୟରେ ଜନସାଧାରଣଙ୍କ କାର୍ଯ୍ୟରେ ଲାଗିଥିବା ସବୁଠାରୁ ବଡ଼ ଯୋଜନା ବୋଲି ପ୍ରଧାନମନ୍ତ୍ରୀ ମୋଦୀ କହିଛନ୍ତି। ଆୟୁଷ୍ମାନ୍ ଭାରତ ଡିଜିଟାଲ୍ ମିଶନର ଶୁଭାରମ୍ଭ ଅବସରରେ ଆୟୋଜିତ କାର୍ଯ୍ୟକ୍ରମରେ ଅଭିଭାଷଣ ଦେବାକୁ ଯାଇ ମୋଦୀ କହିଛନ୍ତି ଯେ ରାସନଠାରୁ ଆରମ୍ଭ କରି ପ୍ରଶାସନ ପର୍ଯ୍ୟନ୍ତ ସବୁଠି ୟୁପିଆଇ ପହଞ୍ଚିପାରିଛି। ଏହା କୌଣସି ସାଧାରଣ ଲୋକ ନିକଟରେ ମଧ୍ୟ ପହଞ୍ଚିବାରେ ସକ୍ଷମ ହୋଇଛି। ଦେଶରେ ୧୩୫ କୋଟି ଜନତାଙ୍କ ମଧ୍ୟରୁ ୧୧୮ କୋଟି ଲୋକଙ୍କ ପାଖରେ ମୋବାଇଲ୍ ରହିଥିବା ବେଳେ ୮୦ କୋଟି ଲୋକ ଇଣ୍ଟରନେଟର ବ୍ୟବହାର କରୁଛନ୍ତି। ତା’ଛଡ଼ା ଦେଶର ୪୩ କୋଟି ମହିଳା ବ୍ୟାଙ୍କରେ ଜନଧନ ଆକାଉଣ୍ଟ୍ ଖୋଲି ସ୍ବାବଲମ୍ବୀ ହୋଇପାରିଛନ୍ତି। ତେଣୁ ଭାରତ ବ୍ୟତୀତ ବିଶ୍ବର ଅନ୍ୟ କୌଣସି ରାଷ୍ଟ୍ରରେ ଏତେ ବଡ଼ ପରିମାଣର ଡିଜିଟାଲ୍ ଭିତ୍ତିଭୂମି ଉପଲବ୍ଧ ନ ଥିବ ବୋଲି ମୋଦୀ କହିଛନ୍ତି।

ଯୋଗୀଙ୍କ ନିର୍ବାଚନୀ ଥୋପ: ମନ୍ତ୍ରିମଣ୍ଡଳରେ ଜିତିନଙ୍କ ସମେତ ୭ ନୂଆ ମନ୍ତ୍ରୀ ସାମିଲ

୨୦୨୨ ବିଧାନସଭା ନିର୍ବାଚନକୁ ଦେଖି ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ତାଙ୍କ ମନ୍ତ୍ରିପରିଷଦର ସମ୍ପ୍ରସାରଣ କରିଛନ୍ତି। ଜଣେ ବ୍ରାହ୍ମଣ, ୩ ଓବିସି, ୨ ହରିଜନ ଓ ଜଣେ ଆଦିବାସୀ ବର୍ଗର ସଦସ୍ୟଙ୍କୁ ନେଇ ଯୋଗୀ ତାଙ୍କ ମନ୍ତ୍ରିପରିଷଦକୁ ସମ୍ପ୍ରସାରିତ କରିଛନ୍ତି। କଂଗ୍ରେସରୁ ବିଜେପିରେ ସାମିଲ୍ ହୋଇଥିବା ଜିତିନ ପ୍ରସାଦ ବ୍ରାହ୍ମଣ ନେତା ଭାବେ ମନ୍ତ୍ରିପରିଷଦରେ ସ୍ଥାନ ପାଇଛନ୍ତି। ୭ ନୂଆ ମନ୍ତ୍ରୀଙ୍କ ମଧ୍ୟରେ ସେ ଏକମାତ୍ର ସଦସ୍ୟ ଭାବେ କ୍ୟାବିନେଟ ପାହ୍ୟା ହାସଲ କରିଥିଲା ବେଳେ ଅନ୍ୟମାନଙ୍କୁ ରାଷ୍ଟ୍ରମନ୍ତ୍ରୀ ଭାବେ ଦାୟିତ୍ବ ଦିଆଯାଇଛି। ପଲଟୁ ରାମ, ଛତ୍ରପାଲ୍ ସିଂହ ଗଙ୍ଗୱାର, ସଂଗୀତା ବଲୱନ୍ତ ବିନ୍ଦ, ଧର୍ମବୀର ପ୍ରଜାପତି, ସଞ୍ଜୀବ କୁମାର ଗୌର ଓ ଦିନେଶ ଖଟିକ ରାଷ୍ଟ୍ରମନ୍ତ୍ରୀ ଭାବେ ଶପଥ ନେଇଛନ୍ତି। ରାଜ୍ୟପାଳ ଆନନ୍ଦୀବେନ ପଟେଲ ରାଜଭବନରେ ଆୟୋଜିତ ସମାରୋହରେ ୭ ନୂଆ ମନ୍ତ୍ରୀଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି।

ମୋଦୀଙ୍କ ଜାତିସଂଘ ଭାଷଣକୁ ଆଫ୍ରିକୀୟ ଓ ଦକ୍ଷିଣ ଆମେରିକୀୟ ରାଷ୍ଟ୍ରଙ୍କ ଉଚ୍ଚ ପ୍ରଶଂସା

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭ୍ୟାକ୍ସିନ ଡିପ୍ଲୋମାସି ନେଇ ମିଳିତ ଜାତିସଂଘ ସାଧାରଣ ପରିଷଦ ବୈଠକରେ ରଖିଥିବା ଅଭିଭାଷଣକୁ ଆଫ୍ରିକୀୟ ଓ ଦକ୍ଷିଣ ଆମେରିକୀୟ ରାଷ୍ଟ୍ର ଉଚ୍ଚ ପ୍ରଶଂସା କରିଛନ୍ତି। ବିଶେଷକରି ମୋଦୀ ଗ୍ଲୋବାଲ ଫାର୍ମଗୁଡ଼ିକୁ ଭାରତରେ ଆସି ଟିକା ଉତ୍ପାଦନ କରିବା ପାଇଁ କରିଥିବା ଅପିଲ ସେମାନଙ୍କୁ ବେଶି ପ୍ରଭାବିତ କରିଛି। କାରଣ ସେମାନେ ଜାଣିଛନ୍ତି ଯେ ବାହାର ଦେଶର ଟିକା ରପ୍ତାନୀ ଉପରେ ସେମାନଙ୍କ ଦେଶରେ ଟିକାକରଣ ଆଗେଇବା ନିର୍ଭର କରୁଛି। କୋରୋନା ମହାମାରୀରୁ ରକ୍ଷା ପାଇବାକୁ ହେଲେ ଟିକାକରଣ ସବୁଠାରୁ ବଡ଼ ମାଧ୍ୟମ ହୋଇଥିଲା ବେଳେ ସେମାନଙ୍କ ପାଖରେ ଟିକା ଉତ୍ପାଦନ କରିବା ପାଇଁ ସେପରି ଭିତ୍ତିଭୂମି କିମ୍ବା ବିଶେଷଜ୍ଞ ନାହାନ୍ତି। ତେଣୁ ପ୍ରଧାନମନ୍ତ୍ରୀ ମୋଦୀ ବିଶ୍ବ ଟିକାକରଣ ନେଇ ଯେଉଁ ଆଭିମୁଖ୍ୟ ଗ୍ରହଣ କରିଛନ୍ତି, ତାହାକୁ ଆଫ୍ରିକୀୟ ଓ ଦକ୍ଷିଣ ଆମେରିକୀୟ ରାଷ୍ଟ୍ର ବେଶ୍ ଗରୁତର ସହ ନେଇଛନ୍ତି।

ପଞ୍ଜାବରେ ନୂଆ ମନ୍ତ୍ରିମଣ୍ଡଳର ଶପଥ ଗ୍ରହଣ: କ୍ୟାବିନେଟରେ ୧୫ ମନ୍ତ୍ରୀ

ପଞ୍ଜାବର ମୁଖ୍ୟମନ୍ତ୍ରୀ ପଦରୁ କ୍ୟାପଟେନ୍ ଅମରିନ୍ଦର ସିଂ ଇସ୍ତଫା ଦେବା ପରେ ତାଙ୍କ ସ୍ଥାନରେ ଚରନଜିତ୍ ସିଂ ଚନ୍ନି ମୁଖ୍ୟମନ୍ତ୍ରୀ ଭାବେ ମନୋନୀତ ହୋଇଛନ୍ତି। ରବିବାର ଚନ୍ନି ତାଙ୍କ ମନ୍ତ୍ରିମଣ୍ଡଳରେ ୧୫ ଜଣ ମନ୍ତ୍ରୀଙ୍କୁ ସାମିଲ୍ କରିଥିବା ବେଳେ ସେମାନଙ୍କ ମଧ୍ୟରେ ୭ ଜଣ ପ୍ରଥମ ଥର ପାଇଁ ମନ୍ତ୍ରୀପଦ ପାଇଛନ୍ତି। ରାଜଭବନଠାରେ ଚନ୍ନି ରାଜ୍ୟପାଳ ବନୱାରିଲାଲ୍ ପୁରୋହିତଙ୍କୁ ଗତ ଶନିବାର ଭେଟି ମନ୍ତ୍ରୀମାନଙ୍କର ଏକ ତାଲିକା ପ୍ରଦାନ କରିଥିଲେ। ଏହା ପୂର୍ବରୁ କଂଗ୍ରେସ ହାଇକମାଣ୍ଡଙ୍କ ସହ ଦିଲ୍ଲୀରେ ଆଲୋଚନା କରି ମନ୍ତ୍ରିମଣ୍ଡଳର ସଦସ୍ୟଙ୍କ ନାମ ତାଲିକା ଚୂଡ଼ାନ୍ତ କରିଥିଲେ। ବିଧାୟକ ତ୍ରିପ୍ତ ସିଂ ବାଜୱା, ଅରୁଣା ଚୌଧୁରୀ, ସୁଖବିନ୍ଦର ସରକାରିଆ ଓ ରାଣା ଗୁରଜିତ୍ ସିଂ କ୍ୟାବିନେଟ୍ ମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି। ଏହାଛଡ଼ା କଂଗ୍ରେସ ବିଧାୟକ ବ୍ରହ୍ମ ମହିନ୍ଦ୍ର ଓ ମନପ୍ରୀତ୍ ସିଂ ବାଦଲ ମଧ୍ୟ କ୍ୟାବିନେଟ୍ ମନ୍ତ୍ରୀ ଭାବେ ରାଜ୍ୟପାଳଙ୍କ ଦ୍ବାରା ପଦ ଓ ଗୋପନୀୟତାର ଶପଥ ଗ୍ରହଣ କରିଛନ୍ତି। ଅନ୍ୟପକ୍ଷରେ ମନ୍ତ୍ରିମଣ୍ଡଳୀରୁ ଇସ୍ତଫା ଦେଇଥିବା କଂଗ୍ରେସ ବିଧାୟକ କୁଲଜିତ୍ ସିଂ ନାଗ୍ରା ରାଜଭବନଠାରେ ଏହି ଶପଥ ପାଠ ଉତ୍ସବରେ ଉପସ୍ଥିତ ଥିଲେ। କେନ୍ଦ୍ର ସରକାରଙ୍କ ତିନି କଳା କୃଷି ଆଇନକୁ ବିରୋଧ କରି ସେ ମନ୍ତ୍ରିମଣ୍ଡଳରୁ ଇସ୍ତଫା ଦେଇଛନ୍ତି ଓ ଯେ ପର୍ଯ୍ୟନ୍ତ କେନ୍ଦ୍ର ସରକାର ଦେଶର ଚାଷୀମାନଙ୍କ ସ୍ବାର୍ଥରକ୍ଷା ସକାଶେ ଉକ୍ତ ତିନି ଆଇନ ପ୍ରତ୍ୟାହାର ନ କରିଛନ୍ତି, ସେ ପର୍ଯ୍ୟନ୍ତ ସେ କ୍ୟାବିନେଟରେ ସାମିଲ୍ ହେବେ ନାହିଁ ବୋଲି ସାମ୍ବାଦିକମାନଙ୍କୁ ନାଗ୍ରା କହିଛନ୍ତି।

ଚାଷୀଙ୍କ ଭାରତ ବନ୍ଦ ଡାକରାକୁ କଂଗ୍ରେସ, ଆପ୍ ଓ ଆରଜେଡିର ସମର୍ଥନ

ସଂଯୁକ୍ତ କିଷାନ ମୋର୍ଚ୍ଚା ପକ୍ଷରୁ ଆସନ୍ତା ୨୭ ତାରିଖରେ ଭାରତ ବନ୍ଦ ଡାକରା ଦିଆଯାଇଛି। ମୋର୍ଚ୍ଚା ପକ୍ଷରୁ ସମଗ୍ର ଦେଶରେ ୨୭ ତାରିଖ ସକାଳ ୬ଟାରୁ ଅପରାହ୍ନ ୪ଟା ଯାଏ ବନ୍ଦ ପାଳନ କରାଯିବାକୁ ଘୋଷଣା ହୋଇଛି। କେନ୍ଦ୍ରର ୩ ନୂଆ କୃଷି ଆଇନ ବିରୋଧରେ ଦୀର୍ଘ ୧୧ମାସ ହେଲା ଆନ୍ଦୋଳନ କରୁଥିବା ସଂଯୁକ୍ତ କିଷାନ ମୋର୍ଚ୍ଚା ଏହି ୩ ଆଇନକୁ ସମ୍ପୂର୍ଣ୍ଣ ରଦ୍ଦ କରିବା ଦାବିରେ ଅଟଳ ରହିଥିଲା ବେଳେ ଏଯାବତ କେନ୍ଦ୍ର ସରକାର ଚାଷୀଙ୍କ ଦାବି ପୂରଣ କରିବା ନେଇ କୌଣସି ପ୍ରତିଶ୍ରୁତି ଦେଇ ନାହାନ୍ତି। ଚାଷୀଙ୍କ ଏହି ବନ୍ଦ ଡାକରାକୁ ବିଭିନ୍ନ ଶ୍ରମିକ ସଂଗଠନ ସହ ରାଜନୈତିକ ଦଳଗୁଡ଼ିକ ସମର୍ଥନ ଘୋଷଣା କରିଛନ୍ତି। କଂଗ୍ରେସ ସମେତ ଦିଲ୍ଲୀରେ କ୍ଷମତାସୀନ ଆପ, ଟିଡିପି ଓ ଲାଲୁଙ୍କ ଆରଜେଡି ସମର୍ଥନ କରିଛନ୍ତି। ସେମାନେ ମଧ୍ୟ ଚାଷୀଙ୍କ ବନ୍ଦ ଡାକରାକୁ ସଫଳ କରିବେ ବୋଲି କହିଛନ୍ତି।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ

୩୨ତମ ଅଲିମ୍ପିକ୍ସ ଉଦଯାପିତ: ଟୋକିଓକୁ
ଟୋକିଓ: ୧୭ ଦିନ ଧରି ଚାଲିଥିବା କ୍ରୀଡ଼ା ମହାକୁମ୍ଭ ଅଲିମ୍ପିକ୍ସର ୩୨ତମ ସଂସ୍କରଣରେ ରବିବାର ପୂର୍ଣ୍ଣଚଛେଦ ପଡ଼ିଛି। ଗତ ୨୦୨୦ରେ ସଂସ୍କରଣଟି ଆୟୋଜିତ ହେବାକୁ ଥିଲେ ହେଁ କୋରୋନା ମହାମାରୀ କାରଣରୁ ଏହାକୁ ବର୍ଷେ ଘୁଞ୍ଚାଇ ଦିଆଯାଇଥିଲା। ଜାପାନରେ ଗତ ୨୩ ତାରିଖରେ ସଂସ୍କରଣ ଆରମ୍ଭ ପୂର୍ବରୁ ରାଜଧାନୀ ଟୋକିଓରେ ଏମର୍ଜେନସି ଜାରି ହେବା ସତ୍ତ୍ବେ ଆୟୋଜକଙ୍କ ଦୃଢ଼ ଇଛାଶକ୍ତି ଓ ଅଂଶୀଦାର ଦେଶର ସହଯୋଗ ବଳରେ ଅନତର୍ଜାତୀୟ ଅଲିମ୍ପିକ୍ସ କମିଟି (ଆଇଓସି) ଓ ଟୋକିଓ ୨୦୨୦ ସୁଚାରୁ ରୂପେ ଶେଷ କରିଛନ୍ତି। ସଂସ୍କରଣଟି ରବିବାର ଉଦଯାପିତ ହୋଇଥିବା ବେଳେ ବିନା ଦର୍ଶକରେ ଆୟୋଜିତ ହୋଇଥିଲେ ମଧ୍ୟ ବିଶ୍ବବ୍ୟାପୀ ଦର୍ଶକ ଏହାକୁ ମନଭରି ଉପଭୋଗ କରିଛନ୍ତି। ଆକର୍ଷଣୀୟ ଉଦଘାଟନୀ ଉତ୍ସବ ସହ ଆରମ୍ଭ ହୋଇଥିବା ଅଲିମ୍ପିକ୍ସର ୩୨ତମ ସଂସ୍କରଣଟି ରଙ୍ଗିନ ଆଲୋକମାଳା ସହ ରଙ୍ଗବେରଙ୍ଗର ଆତସବାଜି ସହ ଶେଷ ହୋଇଛି। ଆତସବାଜିରେ ଟୋକିଓ ଆକାଶ ପ୍ରଜ୍ଜ୍ବଳିତ ହେବା ସହ ଅଲିମ୍ପିକ୍ ରିଙ୍ଗଗୁଡ଼ିକର ଚିତ୍ର ପ୍ରତିଫଳିତ ହୋଇଥିଲା, ଯାହାକି ବେଶ୍ ଉପଭୋଗ୍ୟ ଥିଲା। ଏଥିସହ ଜାପାନ ରାଜଧାନୀରେ ଅଲିମ୍ପିକ୍ସ ଇଭେଣ୍ଟ ଉପରେ ପରଦା ଟଣାଯାଇଛି ଓ ପରବର୍ତ୍ତୀ ସଂସ୍କରଣର ଆୟୋଜକ ପ୍ୟାରିସକୁ ପତାକା ହସ୍ତାନ୍ତର କରାଯାଇଛି। ଏହି ପତାକା ହସ୍ତାନ୍ତର ସହ କୌଣସି ପ୍ରକାର ବାଧାବିଘ୍ନ ଅଲିମ୍ପିକ୍ସ ପରି କ୍ରୀଡ଼ା ମହାକୁମ୍ଭ ଆୟୋଜନରେ ବାଧକ ହୋଇପାରିବ ନାହିଁ, ଏପରି ଏକ ବାର୍ତ୍ତା ମଧ୍ୟ ଦିଆଯାଇଛି। ତା’ଛଡ଼ା ଘାତକ କୋରୋନାରେ ମୃତ୍ୟୁବରଣ କରିଥିବା ସଂକ୍ରମିତଙ୍କୁ ମଧ୍ୟ ସ୍ମରଣ କରାଯାଇଥିଲା। ଉଦଯାପନୀ ଉତ୍ସବରେ ଭାରତର ଧ୍ବଜାବାହକ ଦାୟିତ୍ବ ବ୍ରୋଞ୍ଜପଦକ ଜିତିଥିବା ପୁରୁଷ ରେସଲର୍ ବଜରଙ୍ଗ ପୁନିଆ ଶ୍ରେଷ୍ଠ ପ୍ରଦର୍ଶନକାରୀ ପ୍ରତିଯୋଗୀଙ୍କ ନେତୃତ୍ବ ନେଇଥିଲେ।
ପ୍ରମୋଦ ଡେଇଁପଡ଼ି ମୋତେ କୁଣ୍ଢାଇବେ ବୋଲି ଭାବି ନ
ନୂଆଦିଲ୍ଲୀ: ଭାରତୀୟ ବ୍ୟାଡ୍‌ମିଣ୍ଟନ୍ ଇତିହାସରେ ଏହା ଏକ ଅବିସ୍ମରଣୀୟ ଦୃଶ୍ୟ । ଟୋକିଓ ପାରାଲିମ୍ପିକ୍ସର ପୁରୁଷ ଏସ୍‌ଏଲ୍‌୩ ବ୍ୟାଡ୍‌ମିଣ୍ଟନ ଇଭେଣ୍ଟର ଫାଇନାଲ ମ୍ୟାଚ୍ ଜିତି ସ୍ବର୍ଣ୍ଣ ପଦକ ହାସଲ କରିବା ପରେ ଓଡ଼ିଆ ବ୍ୟାଡ୍‌ମିଣ୍ଟନ ଖେଳାଳି ପ୍ରମୋଦ ଭଗତ ଉତ୍ସବମୁଖର ନ ହୋଇ ସିଧା ଭାରତୀୟ ଦଳର ପ୍ରଶିକ୍ଷକ ଗୌରବ ଖାନ୍ନାଙ୍କ ପାଖକୁ ଦୌଡ଼ିଯାଇ ତାଙ୍କୁ ଆଲିଙ୍ଗନ କରିଥିଲେ। ପ୍ରମୋଦ ଏତେ ଖୁସି ହୋଇ ଯାଇଥିଲେ ଯେ ଗୌରବଙ୍କୁ ସେ ଆଲିଙ୍ଗନ କରି ଝୁଲି ପଡ଼ିଥିଲେ। ଗୌରବ କହିଛନ୍ତି ଯେ ଏହା ଅପ୍ରତ୍ୟାଶିତ ଥିଲା ଏବଂ ପ୍ରମୋଦ ଏପରି କରିବେ ବୋଲି ସେ ଆଦୌ ଆଶା କରି ନ ଥିଲେ। ପ୍ରମୋଦଙ୍କ ଏପରି ଆଚରଣ ତାଙ୍କୁ ବହୁତ ଖୁସି ଦେଇଥିଲା ବୋଲି ଭାରତୀୟ ଜାତୀୟ ବ୍ୟାଡ୍‌ମିଣ୍ଟନ ପ୍ରଶିକ୍ଷକ ଗୌରବ କହିଛନ୍ତି।