ରାଜନୀତି

ସିଏଏ ସପକ୍ଷରେ ଦୁଇ କଂଗ୍ରେସ ନେତା: ମନା କରିପାରିବେନି

ଗତ ବର୍ଷ ଡିସେମ୍ବରରେ କେନ୍ଦ୍ର ସରକାର ନାଗରିକତା ସଂଶୋଧନ ଆଇନ (ସିଏଏ) ଲାଗୁ କରିଥିବା ବେଳେ ଏହାକୁ କେରଳ, ପଶ୍ଚିମବଙ୍ଗ ଓ ଓଡ଼ିଶା ସମେତ ଅନେକ ରାଜ୍ୟ ଲାଗୁ କରିବେ ନାହିଁ ବୋଲି ଘୋଷଣା କରିଛନ୍ତି। କେତେକ ରାଜ୍ୟ ସରକାର ବିଧାନସଭାରେ ଏହା ବିରୋଧରେ ବହୁମତ ହାସଲ ମଧ୍ୟ କରିସାରିଛନ୍ତି। କିନ୍ତୁ ଏହା ଅସାମ୍ବିଧାନିକ ଓ ଥରେ ସଂସଦ କୌଣସି ନିୟମ ଲାଗୁ କଲେ, ତାହାକୁ ସମସ୍ତ ରାଜ୍ୟ ଲାଗୁ କରିବା ସକାଶେ ବାଧ୍ୟ ବୋଲି ମତ ଦେଇଛନ୍ତି ବିରୋଧୀ କଂଗ୍ରେସ ଦଳର ଦୁଇ ଜଣ ବରିଷ୍ଠ ସାଂସଦ। କେରଳ ଲିଟରେଚର୍‌ ଫେଷ୍ଟିଭାଲ୍‌ରେ ଯୋଗଦେବା ଅବସରରେ କପିଲ ସିବଲ୍‌ କହିଛନ୍ତି ଯେ କେନ୍ଦ୍ର ସରକାରଙ୍କ ନିଷ୍ପତ୍ତିକୁ କେହି ବି ବିରୋଧ କରିପାରିବେ। ସେହିପରି ସିଏଏକୁ ରାଜ୍ୟମାନଙ୍କର ବିରୋଧ କରିବାର ଅଧିକାର ରହିଛି। ସେମାନେ ମଧ୍ୟ ଏହା ବିରୋଧରେ ବିଧାନସଭାରେ ବହୁମତ ହାସଲ କରିପାରିବେ। କେନ୍ଦ୍ର ସରକାରଙ୍କ ଉପରେ ସିଏଏ ପ୍ରତ୍ୟାହାର କରିବା ସକାଶେ ଚାପ ମଧ୍ୟ ପକାଇପାରିବେ। କିନ୍ତୁ ଥରେ ସଂସଦ କୌଣସି ଆଇନ ଲାଗୁ କଲେ, କୌଣସି ରାଜ୍ୟ ଏହାକୁ ଲାଗୁ କରିବାରୁ ବିରତ ରହିପାରିବେ ନାହିଁ ବୋଲି ଉଭୟ ନେତା କହିଛନ୍ତି।

ଦିଲ୍ଲୀରେ ଆପ୍‌କୁ ଝଟ୍‌କା: କଂଗ୍ରେସରେ ମିଶିଲେ ଶାସ୍ତ୍ରୀଙ୍କ ନାତି

ଆସନ୍ତା ଫେବ୍ରୁଆରୀ ୮ ତାରିଖରେ ଦିଲ୍ଲୀ ବିଧାନସଭା ନିର୍ବାଚନ ଅନୁଷ୍ଠିତ ହେବ। ଏହି ନିର୍ବାଚନରେ ବାଜିମାତ୍‌ କରିବା ସକାଶେ ପ୍ରତି ଦଳ ସେମାନଙ୍କ ଲବିକୁ ଜୋର୍‌ଦାର କରିଥିବା ବେଳେ ଇତିମଧ୍ୟରେ ପ୍ରାର୍ଥିପତ୍ର ଦାଖଲ କରିବା ଆରମ୍ଭ କରିଛନ୍ତି। ଶାସକ ଆପ୍‌ ଏଠାରେ ପୁଣିଥରେ ସରକାର ଗଠନ କରିବା ସକାଶେ ଦାବି କରୁଥିବା ବେଳେ ବିରୋଧୀ ବିଜେପି ପୁଣିଥରେ କ୍ଷମତାକୁ ଫେରିବା ସକାଶେ ଆଶା ବାନ୍ଧିଛି। ଅନ୍ୟତମ ବିରୋଧୀ ଦଳ କଂଗ୍ରେସ ମଧ୍ୟ ଆଗାମୀ ନିର୍ବାଚନରେ ନିଜର ସ୍ଥିତିକୁ ସୁଧାରି ନେବା ପାଇଁ ଉଦ୍ୟମ ଚଳାଇଛି। ଶନିବାର ଆପ୍‌କୁ ଝଟ୍‌କା ଲାଗିଛି ଓ କଂଗ୍ରେସ ସାମାନ୍ୟ ଶକ୍ତି ପାଇଛି। କାରଣ ପୂର୍ବତନ ପ୍ରଧାନମନ୍ତ୍ରୀ ଲାଲ ବାହାଦୁର ଶାସ୍ତ୍ରୀଙ୍କ ନାତି ତଥା ଆପ୍‌ ବିଧାୟକ ଆଦର୍ଶ ଶାସ୍ତ୍ରୀ କଂଗ୍ରେସରେ ଯୋଗଦେଇଛନ୍ତି। ଦିଲ୍ଲୀ ପ୍ରଦେଶ କଂଗ୍ରେସ କମିଟି ମୁଖ୍ୟ ସୁଭାଶ ଚୋପ୍ରା ଓ ବରିଷ୍ଠ କଂଗ୍ରେସ ନେତା ପିସି ଚାକୋଙ୍କ ଉପସ୍ଥିତିରେ ଆଦର୍ଶ ହାତ ଧରିଛନ୍ତି।

କଶ୍ମୀର ସମସ୍ୟାର ସମାଧାନ ପୂର୍ବରୁ ଭାରତ ସହ ଆଲୋଚନା

ଗତ ୨୦୧୮ରେ ପାକିସ୍ତାନର ନୂଆ ପ୍ରଧାନମନ୍ତ୍ରୀ ଭାବେ ପୂର୍ବତନ କ୍ରିକେଟର୍‌ ଇମ୍ରାନ୍‌ ଖାନ୍‌ ଶପଥ ନେବା ପରେ ପଡ଼ୋଶୀ ଭାରତ ସହ ଦ୍ବିପାକ୍ଷିକ ଆଲୋଚନା ଉପରେ ସବୁଠାରୁ ଅଧିକ ଗୁରୁତ୍ବ ଦେବେ ବୋଲି କହିଥିଲେ। କିନ୍ତୁ ପରବର୍ତ୍ତୀ ସମୟରେ ଉଭୟ ଦେଶ ମଧ୍ୟରେ କୂଟନୈତିକ ସମ୍ପର୍କ କ୍ରମଶଃ ତିକ୍ତ ହୋଇ ଚାଲିଛି। ବିଶେଷକରି ଗତବର୍ଷ ଅଗଷ୍ଟ ୫ ତାରିଖରେ ଭାରତ ସରକାର ଜମ୍ମୁ-କଶ୍ମୀରଠାରୁ ସ୍ବତନ୍ତ୍ର ରାଜ୍ୟ ପାହ୍ୟା ପ୍ରତ୍ୟାହାର କରିନେବା ପରେ ପାକିସ୍ତାନକୁ ଏହା ବେଶ୍‌ ବାଧିଥିଲା। ଏହି ପ୍ରସଙ୍ଗରେ ଭାରତକୁ ଘେରିବା ସକାଶେ ପାକିସ୍ତାନ ଅନ୍ତର୍ଜାତୀୟ ସ୍ତରରେ ଉଦ୍ୟମ କରିଥିଲେ ହେଁ ଏହା ହାତରେ ସଫଳତା ଲାଗି ନ ଥିଲା। କିନ୍ତୁ ପାକିସ୍ତାନ କଶ୍ମୀର ପ୍ରସଙ୍ଗରେ କଦାପି କୌଣସି ବୁଝାମଣା କରିବ ନାହିଁ ବୋଲି ଜୋର୍‌ ଦେବା ସହ ପ୍ରଥମେ ଏହି ସମସ୍ୟାର ସମାଧାନ ହେବା ଦରକାର ବୋଲି ଜୋର୍‌ ଦେଇଛି। କଶ୍ମୀର ସମସ୍ୟାର ସମାଧାନ ନ ହେବା ପର୍ଯ୍ୟନ୍ତ ଭାରତ ସହ କୌଣସି ପ୍ରକାର ଶାନ୍ତି ଆଲୋଚନା ହେବ ନାହିଁ ବୋଲି ଶୁକ୍ରବାର ପାକିସ୍ତାନର ବୈଦେଶିକ ମନ୍ତ୍ରୀ ଶାହ ମାହମୁଦ୍‌ କୁରୈଶୀ କହିଛନ୍ତି।

ଦିଲ୍ଲୀ ବିଧାନସଭା ନିର୍ବାଚନ: ୫୭ ବିଜେପି ପ୍ରାର୍ଥୀଙ୍କ ନାମ

ଆସନ୍ତା ମାସରେ ହେବାକୁ ଥିବା ଦିଲ୍ଲୀ ବିଧାନସଭା ନିର୍ବାଚନ ସକାଶେ ଶୁକ୍ରବାର ବିଜେପି ପକ୍ଷରୁ ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣା କରାଯାଇଛି। ୭୦ ଆସନ ମଧ୍ୟରୁ ଦଳ ପକ୍ଷରୁ ୫୭ଟି ଆସନ ସକାଶେ ପ୍ରାର୍ଥୀ ଘୋଷଣା କରାଯାଇଥିବା ବେଳେ ଆପ୍‌ର ବହିଷ୍କୃତ ନେତା କପିଲ ମିଶ୍ରାଙ୍କୁ ଦଳ ମଡେଲ୍‌ ଟାଉନ୍‌ରୁ ପ୍ରାର୍ଥୀ କରିଛି। ସେହିପରି ରବି ନେଗିଙ୍କୁ ପଟପଡଗଞ୍ଜରୁ ପ୍ରାର୍ଥୀ କରାଯାଇଥିବା ବେଳେ ତାଙ୍କର ଏହି ନିର୍ବାଚନମଣ୍ଡଳୀରେ ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ସହ ଲଢ଼େଇ ହେବ। ସେହିପରି ଦଳ ପକ୍ଷରୁ ବଦରପୁରରେ ରାମବୀର ସିଂହଙ୍କୁ ପ୍ରାର୍ଥୀ କରାଯାଇଥିବା ଜଣାପଡ଼ିଛି। ତେବେ ବିଜେପି ଆପ୍‌ ମୁଖ୍ୟ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ୍‌ଙ୍କ ନୂଆଦିଲ୍ଲୀ ନିର୍ବାଚନମଣ୍ଡଳୀ ପାଇଁ କୌଣସି ପ୍ରାର୍ଥୀଙ୍କ ନାମ ଘୋଷଣା କରାଯାଇନାହିଁ।

ସଚିବ ଚଳାଉଛନ୍ତି ରାଜ୍ୟ, ମନ୍ତ୍ରୀଙ୍କ ଭୂମିକା କେବଳ ପାରମ୍ପରିକ

କଂଗ୍ରେସର ବରିଷ୍ଠ ନେତା ତଥା ମଧ୍ୟ ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଏବଂ ରାଜ୍ୟସଭା ସଦସ୍ୟ ଦିଗ୍‌ବିଜୟ ସିଂ କେନ୍ଦ୍ର ସରକାରଙ୍କର ଆର୍ଥିକ ପରିଚାଳନା ନୀତି ଏବଂ ଜାତୀୟ ନାଗରିକ ଆଇନ, ଏନ୍ଆର୍‌ସି ଏବଂ ଏନ୍‌ସିଆରକୁ କଟୁ ସମାଲୋଚନା କରିଛନ୍ତି। ଏଥିସହ ରାଜ୍ୟରେ ଚାଲିଥିବା ମୁଖ୍ୟମନ୍ତ୍ରୀଙ୍କ ଅମଲା ଶାସନକୁ ମଧ୍ୟ ଟାର୍ଗେଟ୍‌ କରିବାକୁ ପଛାଇ ନାହାନ୍ତି। ଏଠି ମୁଖ୍ୟମନ୍ତ୍ରୀ ନୁହଁନ୍ତି ଜଣେ ପ୍ରଶାସକ ରାଜ୍ୟ ଚଳାଉଛନ୍ତି ବୋଲି ସେ କହିଛନ୍ତି। ରାଜ୍ୟର ନବୀନ ସରକାର ଓ କେନ୍ଦ୍ରର ବିଜେପି ସରକାର ଜନବିରୋଧି ତଥା ଦେଶ ଓ ସମ୍ବିଧାନ ନିଷ୍ପତ୍ତିକୁ ଅନ୍ଧ ଭାବରେ ସହାୟତା ପ୍ରଦାନ କରି ଚାଲିଛି। ଗୋଟେ ପରେ ଗୋଟେ ବିଲ୍‌କୁ ପାସ୍‌ କରିବାରେ ନବୀନ ବାବୁ ସମସ୍ତ ସହଯୋଗ ପ୍ରଦାନ କରୁଛନ୍ତି। ଦୀଲ୍ଲିରେ ବହୁ ବିଜେଡ଼ି ଦଳର ସାଂସଦମାନଙ୍କ ସହିତ ଆଲୋଚନା କଲାବେଳେ ସେମାନେ କିଭଳି ଭାବରେ ସେମାନେ ତଥା ମନ୍ତ୍ରୀ ତଥା ଦଳର ବରିଷ୍ଠ ନେତାମନେ ନବୀନ ବାବୁଙ୍କ ଭେଟି ପାରନ୍ତି ନାହିଁ ବୋଲି ବାରମ୍ବାର କହିଛନ୍ତି। କିନ୍ତୁ କିଭଳି ଭାବରେ ଜଣେ ପ୍ରଶାସକ ଭାବରେ ୫ଟି ସଚିବ ହୋଇଛନ୍ତି ଏବଂ ସକାଳୁ ରାତି ପର୍ଯ୍ୟନ୍ତ ଏକା ନବୀନ ବାବୁଙ୍କୁ ଭେଟିପାରନ୍ତି ତାହା ମଧ୍ୟ ପ୍ରକାଶ କରିଛନ୍ତି।

ଓଡ଼ିଶା ବିଶ୍ୱର ୧ ନମ୍ବର ଆର୍ଥିକ ସମୃଦ୍ଧ ଭୂଭାଗ ହେବା ପାଇଁ

ଶୁକ୍ରବାର ‘ସମ୍ବାଦ’ ପକ୍ଷରୁ ବ୍ରାଣ୍ଡସ୍ ଅଫ୍ ଓଡ଼ିଶା ପ୍ରାଇଡ୍ ଅଫ୍ ଇଣ୍ଡିଆ ସମ୍ବାଦ କର୍ପୋରେଟ୍ ଏକ୍ସଲେନ୍ସ ଆୱାର୍ଡସ୍ ୨୦୨୦ର ପୁରସ୍କାର ବିତରଣ ସମାରୋହ ହୋଟେଲ୍ ମେ’ ଫେୟାର କନ୍‌ଭେନ୍‌ସନ୍‌ ହଲ୍‌ରେ ଅନୁଷ୍ଠିତ ହୋଇଯାଇଛି। ଦୁଇଟି ଅଧିବେଶରେ ହୋଇଥିବା ଏହି ସମାରୋହର ପ୍ରଥମ ଅଧିବେଶନକୁ କେନ୍ଦ୍ର ପେଟ୍ରୋଲିୟମ୍, ପ୍ରାକୃତିକ ଗ୍ୟାସ୍ ଓ ଇସ୍ପାତ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଉଦ୍‌ଘାଟନ କରିଥିବା ବେଳେ ଦ୍ବିତୀୟ ଅଧିବେଶନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗଦେଇଥିଲେ। ଏହି ଅବସରରେ ଧର୍ମେନ୍ଦ୍ର କହିଛନ୍ତି, ଭାରତ ତଥା ଓଡ଼ିଶାରେ ବିଶାଳ ବେଳାଭୂମି, ରତ୍ନଗର୍ଭା ସମୁଦ୍ର, ବିଶାଳ ଜଙ୍ଗଲ ସମ୍ପଦ, ଅମାପ ଖଣିଜ ସମ୍ପଦ ରହିଛି। ଭୁବନେଶ୍ୱର ସହରରେ ଅନେକ ସରକାରୀ ଓ ବେସରକାରୀ ଜାତୀୟ ସ୍ତରର ଶିକ୍ଷାନୁଷ୍ଠାନ ଅଛି। ଏହାର ଲାଭ ଉଠାଇବା ପାଇଁ ଏକ ଇକୋ ସିଷ୍ଟମ୍ ସୃଷ୍ଟି କରିବାର ଆବଶ୍ୟକତା ରହିଛି। ପ୍ରଗତି ଶୀର୍ଷରେ ପହଞ୍ଚିବା ପାଇଁ ଓଡ଼ିଶାରେ ସବୁ ଉପାଦାନ ଭରି ରହିଛି। ବିଶାଳ ଜଙ୍ଗଲ ସମ୍ପଦ, ଅମାପ ଖଣିଜ ସମ୍ପଦ ଏହା ସହ ବୁଦ୍ଧିମାନ ଓ ପରିଶ୍ରମୀ ମାନବ ସମ୍ବଳ ଓଡ଼ିଶାର ଅନନ୍ୟ ପରିଚୟ। ଅପାର ସମ୍ଭାବନାର ରାଜ୍ୟ ଓଡ଼ିଶାକୁ ବିଶ୍ୱର ୧ ନମ୍ବର ଆର୍ଥିକ ସମୃଦ୍ଧ ଭୂଭାଗ ହେବା ପାଇଁ ଯୋଗ୍ୟ ବୋଲି ଧର୍ମେନ୍ଦ୍ର କହିଛନ୍ତି।

ମିଶୁସ୍ତିନ୍‌ ରୁଷିଆର ନୂଆ ପ୍ରଧାନମନ୍ତ୍ରୀ, ୩୮୩ ସାଂସଦଙ୍କ

ଦେଶର ସମ୍ବିଧାନରେ ଆମୂଳଚୂଳ ପରିବର୍ତ୍ତନ ପାଇଁ ରୁଷିଆର ରାଷ୍ଟ୍ରପତି ଭ୍ଲାଦିମିର୍‌ ପୁଟିନ୍‌ ପ୍ରସ୍ତାବ ଦେବା ପରେ ଗୁରୁବାର ପ୍ରଧାନମନ୍ତ୍ରୀ ପଦରୁ ଦିମିତ୍ରୀ ମେଦ୍‌ଭେଦେଭ୍‌ ଇସ୍ତଫା ଦେଇଥିଲେ। ଏଥିସହ ପୁଟିନ୍‌ଙ୍କ ନିଷ୍ପତ୍ତି କ୍ରମେ ରୁଷିଆ ସଂସଦ ଭାଙ୍ଗିଥିବା ବେଳେ ସରକାର ଇସ୍ତଫା ଦେଇଛନ୍ତି। ଏଥିସହ ସଂସଦରେ ବହୁମତ ଆଧାରରେ ଦେଶର ପରବର୍ତ୍ତୀ ପ୍ରଧାନମନ୍ତ୍ରୀ ଭାବେ ମିଖାଇଲ୍‌ ମିଶୁସ୍ତିନ୍‌ଙ୍କୁ ଦାୟିତ୍ବ ଦିଆଯାଇଛି। ସଂସଦରେ ୩୮୩ ଜଣ ସାଂସଦ ମିଶୁସ୍ତିନ୍‌ଙ୍କ ସପକ୍ଷରେ ମତଦାନ କରିଥିବା ବେଳେ ଜଣେ ବି ସାଂସଦ ତାଙ୍କୁ ବିରୋଧ କରିନାହାନ୍ତି। କିନ୍ତୁ ୪୧ ଜଣ ସାଂସଦ ଭୋଟ୍‌ ବେଳେ ସଂସଦରେ ଉପସ୍ଥିତ ରହିବାକୁ ଉଚିତ ମଣି ନ ଥିଲେ। ଉକ୍ତ ୪୧ ଜଣଯାକ ସାଂସଦ ରୁଷିଆର କମ୍ୟୁନିଷ୍ଟ ପାର୍ଟିର ସାଂସଦ ବୋଲି ଜଣାପଡ଼ିଛି। ଗୁରୁବାର ସନ୍ଧ୍ୟାରେ ପୁଟିନ୍‌ ରାଷ୍ଟ୍ରପତି ଭାବେ ମିଶୁସ୍ତିନ୍‌ଙ୍କ ନିଯୁକ୍ତିରେ ଚୂଡ଼ାନ୍ତ ମୋହର ଲଗାଇଥିଲେ।

ଏସ୍‌ସିଓ ପାଇଁ ଇମ୍ରାନଙ୍କୁ ନିମନ୍ତ୍ରଣ କରିବ ଭାରତ

ଭାରତ ଓ ପାକିସ୍ତାନ ମଧ୍ୟରେ ସମ୍ପର୍କ ବେଳକୁ ବେଳ ଅଧିକ ତିକ୍ତ ହୋଇ ଚାଲିଥିଲା ବେଳେ ଆସନ୍ତା ସଂଘାଇ କୋପରେସନ୍‌ ଅର୍ଗାନାଇଜେସନ (ଏସ୍‌ସିଓ) ବୈଠକ ପାଇଁ ଭାରତ ସରକାର ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ନିମନ୍ତ୍ରଣ କରିବେ ବୋଲି ଜଣାପଡ଼ିଛି। ପ୍ରଥମ ଥର ପାଇଁ ଭାରତ ଏହି ଏସ୍‌ସିଓ ଆୟୋଜନ କରିବା ପାଇଁ ଯାଉଥିଲା ବେଳେ ଭାରତ ସରକାର ତିକ୍ତତା ସତ୍ତ୍ବେ ଇମ୍ରାନଙ୍କୁ ନିମନ୍ତ୍ରଣ କରିବେ ବୋଲି ଜଣାପଡ଼ିଛି। ବୈଦେଶିକ ବିଭାଗ ମୁଖପାତ୍ର ରବୀଶ କୁମାର କହିଛନ୍ତି ଯେ ଏହି ଏସ୍‌ସିଓର ସଦସ୍ୟ ରାଷ୍ଟ୍ରମାନଙ୍କୁ ନେଇ ହେଉଥିବା ବୈଠକରେ ରାଷ୍ଟ୍ରମୁଖ୍ୟ ଯୋଗ ଦେବାର ବ୍ୟବସ୍ଥା ରହିଛି। ମାତ୍ର ବେଳେ ବେଳେ ସଦସ୍ୟ ରାଷ୍ଟ୍ର ସେମାନଙ୍କ ପ୍ରତିନିଧି ଭାବେ ରାଷ୍ଟ୍ରମୁଖ୍ୟଙ୍କ ସ୍ଥାନରେ ବୈଦେଶିକ ମନ୍ତ୍ରୀଙ୍କୁ ପଠାଇଥାନ୍ତି। ଭାରତ ସର୍ବଦା ଏସ୍‌ସିଓ ବୈଠକକୁ ବୈଦେଶିକ ମନ୍ତ୍ରୀମାନଙ୍କୁ ପଠାଇ ଆସିଛି।

ପୁଣି ଥରେ ୟୁଏନ୍‌ଏସ୍‌ସିରେ ହଟହଟା ହେଲେ ପାକିସ୍ତାନ-ଚୀନ

ପୁଣି ଥରେ ମିଳିତ ଜାତିସଂଘ ସୁରକ୍ଷା ପରିଷଦ (ୟୁଏନ୍‌ଏସ୍‌ସି)ରେ ପାକିସ୍ତାନ-ଚୀନକୁ ହଟହଟା ହେବାକୁ ପଡ଼ିଛି। କଶ୍ମୀର ପ୍ରସଙ୍ଗ ଉଠାଇବା ପାଇଁ ଚୀନ ପୁଣି ଥରେ ଉଦ୍ୟମ କରି ନିରାଶ ହୋଇଛି। ଚିର ବନ୍ଧୁ ପାକିସ୍ତାନ ପ୍ରରୋଚନାରେ ଚୀନ ପୁଣି ଥରେ ୟୁଏନ୍‌ଏସ୍‌ସିରେ କଶ୍ମୀର ପ୍ରସଙ୍ଗ ଉଠାଇଥିଲା। ମାତ୍ର ଅନ୍ୟ ସଦସ୍ୟ ରାଷ୍ଟ୍ରମାନେ ଏହି ପ୍ରସଙ୍ଗ କୌଣସି ପ୍ରକାର ଅଣଆନୁଷ୍ଠାନିକ ଆଲୋଚନା ପାଇଁ ସିଧାସଳଖ ଅଗ୍ରାହ୍ୟ କରି ଦେଇଥିଲେ। ସଦସ୍ୟ ରାଷ୍ଟ୍ରଙ୍କ ଯୁକ୍ତି ଥିଲା ଯେ ଏହା ଏକ ଗ୍ଲୋବାଲ ଫୋରମ୍‌। ତେଣୁ ଯେଉଁ ପ୍ରସଙ୍ଗ ଉପରେ ବହୁ ସଦସ୍ୟ ରାଷ୍ଟ୍ରଙ୍କ ସ୍ବାର୍ଥ ରହିଛି ଓ ବା ସମସ୍ୟା ରହିଛି, ତାହା କେବଳ ୟୁଏନ୍‌ଏସ୍‌ସିରେ ଆଲୋଚନା ହୋଇପାରିବ। କଶ୍ମୀର ସମ୍ପୂର୍ଣ୍ଣ ଭାବେ ଏକ ଦ୍ବିପାକ୍ଷିକ ପ୍ରସଙ୍ଗ ହୋଇଥିବାରୁ ଏହା ଉପରେ ଅଣଆନୁଷ୍ଠାନିକ ଆଲୋଚନା ହେବାର କୌଣସି ଅର୍ଥ ନାହିଁ ବୋଲି ସେମାନେ ରୋକ୍‌ଠୋକ୍‌ ଜଣାଇଥିବା ଜଣାପଡ଼ିଛି।

ପାକିସ୍ତାନକୁ ବ୍ରିଟେନ ଦେଲା ଚେତାବନୀ

ପାକିସ୍ତାନ ଆତଙ୍କବାଦୀଙ୍କୁ ସହାୟତା ଜାରି ରଖିଥିବା ନେଇ ବ୍ରିଟେନ୍‌ ପକ୍ଷରୁ ଗୁରୁବାର ପାକିସ୍ତାନକୁ ଚେତାବନୀ ଦିଆଯାଇଛି। ଆତଙ୍କବାଦ ବିରୋଧରେ ପାକିସ୍ତାନ ଆବଶ୍ୟକ ପଦକ୍ଷେପ ଗ୍ରହଣ ନ କଲେ ଅଗାମୀ ଦିନରେ ଫାଇନାନ୍ସିଆଲ ଆକ୍ସନ୍‌ ଟାସ୍କ୍‌ ଫୋର୍ସ(ଏଫ୍‌ଏଟିଏଫ୍‌) ପକ୍ଷରୁ କଡ଼ା କଟକଣା ଜାରି କରାଯିବ ବୋଲି ଦକ୍ଷିଣ ଏସିଆ ପାଇଁ ବ୍ରିଟେନ୍‌ ବୈଦେଶିକ ଓ ରାଜ୍ୟଗୋଷ୍ଠୀ ବିଭାଗ ନିର୍ଦେଶକ ଗାରେଥ୍‌ ବେଲେ ସୂଚନା ଦେଇଛନ୍ତି। ପାକିସ୍ତାନ ବିରୋଧରେ ଏ ସମ୍ପର୍କିତ ସମସ୍ତ ତଥ୍ୟ ଏଫ୍‌ଏଟିଏଫ୍‌ ବୈଠକରେ ଉପସ୍ଥାପନ କରାଯିବ। ଆତଙ୍କବାଦୀ ସଂଗଠନ ପାକିସ୍ତାନରେ ରହି କାର୍ଯ୍ୟ କରୁଥିବା ପ୍ରମାଣିତ ହୋଇଛି। ଏହାଯୋଗୁ ଦକ୍ଷିଣ ଏସିଆ ଅଞ୍ଚଳରେ ଗୁରୁତର ସମସ୍ୟା ସୃଷ୍ଟି ହେଉଥିବା ଗାରେଥ୍‌ କହିଛନ୍ତି।

ବିହାରରେ ନୀତିଶ ଏନ୍‌ଡିଏର ମୁଖ୍ୟମନ୍ତ୍ରୀ ପ୍ରାର୍ଥୀ: ଶାହ

ବିହାର ବିଧାନସଭା ନିର୍ବାଚନରେ ମୁଖ୍ୟମନ୍ତ୍ରୀ ନୀତିଶ କୁମାର ହିଁ ଏନ୍‌ଡିଏରେ ମୁଖ୍ୟମନ୍ତ୍ରୀ ପ୍ରାର୍ଥୀ ହେବେ। ଜେଡି(ୟୁ) ନେତା ନୀତିଶଙ୍କ ସହ କୌଣସି ପ୍ରକାର ମତ ପାର୍ଥକ୍ୟ ନାହିଁ। ବିରୋଧୀ ଦଳମାନଙ୍କ ମଧ୍ୟରେ ରହିଥିବା ଏପରି ଏକ ଧାରଣାକୁ ଶେଷ କରିବା ସକାଶେ ଆଗାମୀ ବିଧାନସଭା ପାଇଁ ନୀତିଶଙ୍କ ନେତୃତ୍ବରେ ହିଁ ନିର୍ବାଚନ ଲଢ଼ାଯିବ ବୋଲି କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ୍‌ ଶାହ କହିଛନ୍ତି। ନାଗରିକତା ସଂଶୋଧନ ଆଇନ (ସିଏଏ) ସପକ୍ଷରେ ପ୍ରଚାର କରିବା ସକାଶେ ଗୁରୁବାର କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ସ୍ଥାନୀୟ ଘରୌନା ପୋଖର୍‌ ଗ୍ରାଉଣ୍ଡ୍‌ରେ ଏକ ରାଲିରେ ଯୋଗଦେଇ ଉପରୋକ୍ତ ମତ ଦେଇଛନ୍ତି। ସେ କହିଛନ୍ତି ଯେ ରାଷ୍ଟ୍ରୀୟ ଜନତା ଦଳ (ଆର୍‌ଜେଡି) ଓ କଂଗ୍ରେସ ବିଗତ ଦିଗରେ ବିହାରରେ ଜଙ୍ଗଲ ରାଜ ସୃଷ୍ଟି କରିଥିଲେ। କିନ୍ତୁ ୨୦୦୫ରୁ ଆଜି ପର୍ଯ୍ୟନ୍ତ ନୀତିଶଙ୍କ ଶାସନ ଅମଳରେ ବିହାରରେ ଜନତା ରାଜ ଚାଲିଆସିଛି। ନୀତିଶଙ୍କ ସହ ଏନ୍‌ଡିଏର ସମ୍ପର୍କ ବେଶ୍‌ ମଜଭୁତ ରହିଛି ଓ ଏହା କଦାପି ଭାଙ୍ଗିପାରିବ ନାହିଁ। ଏପରି ଗୁଜବ ପ୍ରଚାର କରି ବିରୋଧୀଦଳମାନେ ଯେଉଁ ସ୍ବପ୍ନ ଦେଖୁଛନ୍ତି, ତାହା କଦାପି ବାସ୍ତବରେ ପରିଣତ ହେବ ନାହିଁ ବୋଲି ଶାହ କହିଛନ୍ତି।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ