ବାଣିଜ୍ୟ ଓ ଅର୍ଥନୀତି

ଆତ୍ମନିର୍ଭର ଭାରତ ଅଭିଯାନ ପାଇଁ ୨.୬୫ କୋଟି ଟଙ୍କାର

ନୂଆଦିଲ୍ଲୀ: କୋରୋନା ଭୂତାଣୁ ସଂକ୍ରମଣ ରୋକିବା ସକାଶେ ଭାରତରେ ଲକଡାଉନ୍ ଘୋଷଣା କରାଯିବା ଫଳରେ ଦେଶର ଅର୍ଥନୀତି ବ୍ୟାପକ ଭାବେ ପ୍ରଭାବିତ ହୋଇଛି। ବିଦେଶ ସାମଗ୍ରୀ ଉପରେ ଅଧିକ ନିର୍ଭରଶୀଳ ନ ହୋଇ ଭାରତ ସ୍ବାବଲମ୍ବୀ ହେବା ସକାଶେ ପ୍ରଧାନମନ୍ତ୍ରୀ ‘ଆତ୍ମନିର୍ଭର ଭାରତ’ ଅଭିଯାନର ଘୋଷଣା କରିଛନ୍ତି। ଏହି ଅଭିଯାନକୁ ଅଧିକ ସବଳ କରିବା ସକାଶେ ଗୁରୁବାର ଅପରାହ୍ନରେ କେନ୍ଦ୍ର ଅର୍ଥ ମନ୍ତ୍ରୀ ନିର୍ମଳା ସୀତାରମଣ ୩ୟ ପର୍ଯ୍ୟାୟ ଆର୍ଥିକ ପ୍ୟାକେଜ୍ ଘୋଷଣା କରିଛନ୍ତି। ୨ ଲକ୍ଷ ୬୫ ହଜାର ୮୦ କୋଟି ଟଙ୍କାର ଏହି ପ୍ୟାକେଜ୍‌କୁ ଦିୱାଲୀ ଉପହାର ବୋଲି ମଧ୍ୟ କୁହାଯାଇଛି। କେନ୍ଦ୍ର ଅର୍ଥ ମନ୍ତ୍ରୀ ସୀତାରମଣ ଅପରାହ୍ନରେ ଆୟୋଜିତ ସାମ୍ବାଦିକ ସମ୍ମିଳନୀରେ ଏହି ସ୍ବତନ୍ତ୍ର ପ୍ୟାକେଜକୁ ଆତ୍ମନିର୍ଭର ଭାରତ-୩ ବୋଲି ଅଭିହିତ କରିବା ସହ ଏଥିରେ ୧୨ଟି ସ୍ବତନ୍ତ୍ର ପଦକ୍ଷେପ ନେଇ ମଧ୍ୟ ଘୋଷଣା କରାଯାଇଛି। ଅଦ୍ୟାବଧି ଦେଶର କୋରୋନା ମାଡ଼ ସହିଥିବା ଅର୍ଥନୀତିକୁ ସବଳ କରିବା ସକାଶେ ସମୁଦାୟ ୨୯ ଲକ୍ଷ ୮୭ ହଜାର ୬୪୧ କୋଟି ଟଙ୍କାର ପ୍ୟାକେଜ୍ ଘୋଷଣା କରାଯାଇସାରିଛି, ଯାହା ଦେଶର ମୋଟ ଘରୋଇ ଉତ୍ପାଦ (ଜିଡିପି)ର ୧୫ ପ୍ରତିଶତ ବୋଲି କେନ୍ଦ୍ର ଅର୍ଥ ମନ୍ତ୍ରୀ କହିଛନ୍ତି। ଆତ୍ମନିର୍ଭର ଭାରତ ସକାଶେ ପୂର୍ବରୁ ହୋଇସାରିଥିବା ସ୍ବତନ୍ତ୍ର ଆର୍ଥିକ ପ୍ୟାକେଜ୍ ମାଧ୍ୟମରେ ଅର୍ଥନୈତିକ ଅଭିବୃଦ୍ଧି ହାସଲ କରାଯାଇପାରିଛି ଓ ଅନେକଗୁଡ଼ିକ ସକାରାତ୍ମକ ସଙ୍କେତ ମଧ୍ୟ ମିଳିସାରିଛି ବୋଲି ଅର୍ଥ ମନ୍ତ୍ରୀ କହିଛନ୍ତି।

ଅର୍ଥନୀତିରେ ନୋବେଲ୍ ପାଇଁ ମିଲଗ୍ରୋମ୍ ଓ ୱିଲସନ୍

୨୦୨୦ ବର୍ଷ ପାଇଁ ଅର୍ଥନୀତିରେ ନୋବେଲ୍ ପୁରସ୍କାର ପାଇବା ସକାଶେ ଆମେରିକାର ଷ୍ଟାନଫୋର୍ଡ ୟୁନିଭର୍ସିଟିର ଦୁଇ ଅର୍ଥନୀତିଜ୍ଞ ପଲ୍ ଆର ମିଲଗ୍ରୋମ୍ ଓ ରବର୍ଟ ବି ୱିଲସନ୍ ମନୋନୀତ ହୋଇଛନ୍ତି। ଏହି ଦୁଇ ବିଶିଷ୍ଟ ଅର୍ଥନୀତିକ ଅକ୍ସନ୍ ଥିଓରୀର ବିକାଶ ଓ ନୂଆ ଅକ୍ସନ୍ ଫର୍ମାଟର ଉଦ୍ଭାବନ କରିଥିବାରୁ ସେମାନଙ୍କୁ ଅର୍ଥନୀତି ବିଜ୍ଞାନରେ ୨୦୨୦ ସ୍ବେରିଜେସ୍ ରିକ୍ସବ୍ୟାଙ୍କ୍ ପୁରସ୍କାର ପ୍ରଦାନ ସକାଶେ ମନୋନୀତ କରାଯାଇଛି। ଏହି ପୁରସ୍କାର ବାବଦରେ ଦୁଇ ବିଜେତାଙ୍କୁ ୧୦ ନିୟୁତ ସ୍ବେଡିଶ୍ ନୋନୋର୍ ପ୍ରଦାନ କରାଯିବ। ଏହି ଦୁଇ ଅର୍ଥନୀତିଜ୍ଞ କିପରି ଭାବେ ଅକ୍ସନ୍ ପ୍ରକ୍ରିୟା ହୋଇଥାଏ ତାହା ଉପରେ ଗବେଷଣା କରିଛନ୍ତି। ସେହିପରି ପାରମ୍ପରିକ ତରିକାରେ ବିକ୍ରି ହେବା ଦିଗରେ ସମସ୍ୟାର ସମ୍ମୁଖୀନ ହେଉଥିବା ସାମଗ୍ରୀ ଓ ସେବାର ଉପଯୁକ୍ତ ଅକ୍ସନ୍ ପାଇଁ ମଧ୍ୟ ସେମାନେ ନୂଆ ତରିକା ଉଦ୍ଭାବନ କରିଛନ୍ତି। ଏଥି ମଧ୍ୟରେ ରେଡିଓ ଫ୍ରିକ୍ବେନ୍ସିଜ୍ ଅନ୍ୟତମ। ସେମାନଙ୍କର ଏହି ଉଦ୍ଭାବନ ଦ୍ବାରା ବିଶ୍ବର ବିକ୍ରେତା, କ୍ରେତା ଓ ଟିକସଦାତାମାନେ ଲାଭବାନ ହୋଇପାରିଛନ୍ତି।

ଭାରତ ବଜାରରେ ମାରୁତି ସୁଜୁକି ଅଲ୍ଟୋକୁ ୨୦ ବର୍ଷ ପୂରିଲା,

ଭାରତର ଜଣାଶୁଣା ଚାରିଚକିଆ ଯାନ ନିର୍ମାଣକାରୀ କମ୍ପାନୀ ମାରୁତି ସୁଜୁକିର ଅଲ୍ଟୋ ମଡେଲ୍ ଇତିମଧ୍ୟରେ ଭାରତୀୟ ବଜାରରେ ୨୦ ବର୍ଷ ପୂରଣ କରିଛି। ପାଖାପାଖି ଦୁଇ ଦଶନ୍ଧି ତଳେ ଏହି ମଡେଲ୍ ଭାରତୀୟ ବଜାରରେ ପ୍ରବେଶ କରିଥିବା ବେଳେ ଇତିମଧ୍ୟରେ ୪୦ ଲକ୍ଷ ଲୋକଙ୍କ ପାଖରେ ପହଞ୍ଚିପାରିଛି। ୨୦୦୦ ମସିହାରେ ସର୍ବପ୍ରଥମେ ଭାରତୀୟଙ୍କ ନିକଟରେ ମାରୁତି ସୁଜୁକି ତା’ର ଅଲ୍ଟୋ ମଡେଲ୍ ପହଞ୍ଚାଇଥିଲା। ଏହି ମଡେଲ୍ ଗତ ୨୦ ବର୍ଷ ଭିତରେ ଭାରତୀୟଙ୍କ ପ୍ରମୁଖ ପସନ୍ଦ ରହିଆସିଥିବା ବେଳେ ଏହା ପ୍ରଥମ ଥର ଗାଡ଼ି ବ୍ୟବହାର କରୁଥିବା ଗ୍ରାହକମାନେ ଏହାକୁ ଅଧିକ ପସନ୍ଦ କରୁଥିବା ପରିଲକ୍ଷିତ ହୋଇଆସିଛି। ଏହି କାରଣରୁ ଗତ ୧୬ ବର୍ଷ ଧରି ଅଲ୍ଟୋ ଭାରତର ସର୍ବାଧିକ ବିକ୍ରି ହେଉଥିବା ଚାରିଚକିଆ ଯାନର ମର୍ଯ୍ୟାଦା ପାଇଆସିଛି। ସେହିପରି ଗତ ୨୦ ବର୍ଷ ମଧ୍ୟରେ ଏହି ମଡେଲରେ ଏକାଧିକ ବାର ପରିବର୍ତ୍ତନ କରାଯିବା ସହ ଏହାର ଆଧୁନିକୀକରଣ ମଧ୍ୟ କରାଯାଇ ସାରିଛି। ଫଳସ୍ବରୂପ କ୍ରମଶଃ ଏହି ମଡେଲରେ ପାରମ୍ପରିକ ସୁବିଧା ସହ ଅତ୍ୟାଧୁନିକ ଫିଚର୍ ମଧ୍ୟ ଉପଲବ୍ଦ ହୋଇପାରିଛି।

‘ସ୍ୱାମିତ୍ୱ ଯୋଜନା’ର ଶୁଭାରମ୍ଭ, ୨୦୨୪ ସୁଦ୍ଧା ସମଗ୍ର

ଲୋକନାୟକ ଜୟପ୍ରକାଶ ନାରାୟଣ ଓ ନାନାଜୀ ଦେଶମୁଖଙ୍କ ଜୟନ୍ତୀ ଅବସରରେ ରବିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ‘ସ୍ୱାମିତ୍ୱ ଯୋଜନା’ର ଶୁଭାରମ୍ଭ କରିଛନ୍ତି। ଭିଡିଓ କନଫରେନ୍ସିଂ ଜରିଆରେ ଏହି ଯୋଜନାର ଉଦ୍‌ଘାଟନ ଅବସରରେ ମୋଦି କହିଛନ୍ତି, ଦେଶରେ ଇତିମଧ୍ୟରେ ୨ କୋଟି ଲୋକଙ୍କୁ ପକ୍କା ଘର ଯୋଗାଇ ଦିଆଯାଇସାରିଛି। ଏବେ ଆପଣଙ୍କ ପାଖରେ ଗୋଟିଏ ଅଧିକାର ରହିଛି, ଗୋଟିଏ ଆଇନଗତ ଦସ୍ତାବିଜ୍ ମଧ୍ୟ ରହିଛି ଯେ ଆପଣଙ୍କ ଘର କେବଳ ଆପଣଙ୍କର ହୋଇ ରହିବ। ଏହି ଯୋଜନା ଦେଶର ଗ୍ରାମାଞ୍ଚଳଗୁଡ଼ିକରେ ଐତିହାସିକ ପରିବର୍ତ୍ତନ ଆଣିପାରିବ ବୋଲି ମୋଦି କହିଛନ୍ତି। ଏଥିସହ ଅଦ୍ୟାବଧି ଦେଶର ଯେଉଁ ଏକ ଲକ୍ଷ ଲୋକଙ୍କୁ ନିଜ ଘରର ସ୍ୱାମିତ୍ୱ ପତ୍ର ବା ପ୍ରପର୍ଟି କାର୍ଡ ମିଳିଛି ସେମାନଙ୍କୁ ପ୍ରଧାନମନ୍ତ୍ରୀ ଅଭିନନ୍ଦନ ଜଣାଇଛନ୍ତି। ଏହି ଅବସରରେ ମୋଦି ଲୋକନାୟକ ଜୟପ୍ରକାଶ ନାରାୟଣ ଓ ନାନାଜୀ ଦେଶମୁଖଙ୍କ ସ୍ମୃତିଚାରଣ କରିଛନ୍ତି। ଗ୍ରାମ୍ୟାଞ୍ଚଳରେ ଥିବା ଘର ମାଲିକଙ୍କୁ ତାଙ୍କ ଅଧିକାର ସମ୍ବନ୍ଧୀୟ ସମ୍ପତ୍ତି କାର୍ଡ ଯୋଗାଇଦେଇ ରେକର୍ଡଭୁକ୍ତ କରିବା ଏହି ଯୋଜନାର ମୂଳ ଉଦ୍ଦେଶ୍ୟ ହୋଇଥିବା ବେଳେ ଏହା ଅଧୀନରେ ପ୍ରାୟ ୬.୬୨ ଲକ୍ଷ ଗ୍ରାମକୁ ରଖାଯିବ ଓ ଆସନ୍ତା ୨୦୨୪ ମଧ୍ୟରେ ଏହା ସାରା ଦେଶରେ ଲାଗୁ ହେବ ବୋଲି ସୂଚନା ମିଳିଛି।

ଉତ୍ପାଦର ବ୍ରାଣ୍ଡିଂ ବ୍ୟୟ ନୁହେଁ, ଏକ ନିବେଶ

ବିଜ୍ଞାପନ ଓ ଲୋକ ସମ୍ପର୍କ କ୍ଷେତ୍ରରେ ରାଜ୍ୟର ଅଗ୍ରଣୀ ଏଜେନ୍ସି ‘ସଙ୍କେତ କମ୍ୟୁନିକେସନ୍ସ’ ପକ୍ଷରୁ ଏମଏସଏମଇ କ୍ଷେତ୍ରରେ ବ୍ରାଣ୍ଡିଂର ଆହ୍ବାନକୁ କିଭଳି ସାମ୍ନା କରାଯାଇ ପାରିବ, ସେ ସମ୍ପର୍କିତ ‘ଏମଏସଏମଇ କ୍ଷେତ୍ରରେ ବ୍ରାଣ୍ଡିଂ ଆହ୍ବାନର ମୁକାବିଲା’ ଶୀର୍ଷକ ଏକ ୱେବିନାର ଶନିବାର ଅପରାହ୍ନରେ ଆୟୋଜିତ ହୋଇଯାଇଛି। ସଙ୍କେତର ପରିଚାଳନା ନିର୍ଦେଶକ ଶୁଭାଶିଷ ତ୍ରିପାଠୀ ଅଂଶଗ୍ରହଣକାରୀଙ୍କୁ ସ୍ବାଗତ କରିବା ସହିତ ସଙ୍କେତର ତିନି ଦଶନ୍ଧିର ବ୍ୟବସାୟିକ ଅଭିଜ୍ଞତା ରାଜ୍ୟର ଏମଏସଏମଇ କ୍ଷେତ୍ରକୁ କିଭଳି ସହାୟ ଓ ସମ୍‌ଦ୍ଧ କରିପାରିବ, ସେ ଦିଗରେ ପ୍ରୟାସ କରାଯାଉଛି ବୋଲି ସୂଚିତ କରାଇଥିଲେ। ସଙ୍କେତର କାର୍ଯ୍ୟନିର୍ବାହୀ ଅଧିକାରୀ ଶ୍ରୀକାନ୍ତ ରଥ ୱେବିନାରକୁ ସଂଚାଳନ କରିବା ସହିତ ଏହି ୱେବିନାର ଆୟୋଜନ କରିବାର ଲକ୍ଷ୍ୟ ଓ ଆଭିମୁଖ୍ୟ ଉପସ୍ଥାପନା କରିଥିଲେ। ରଥ କହିଲେ ଯେ ନୂତନ ପ୍ରଯୁକ୍ତି ବିଦ୍ୟା ବିଶ୍ବ ବଜାରକୁ ଏକ ନୂଆ ରୂପ ଦେଇଛି। ଉତ୍ପାଦ ଗୁଡ଼ିକ ପରସ୍ପର ସହ ପ୍ରତିଦ୍ବନ୍ଦ୍ବିତା ଭିତରେ ଆଗକୁ ବଢ଼ୁଥିବା ବେଳେ ଏହାର ବ୍ରାଣ୍ଡିଂ ଏକ ସ୍ବତନ୍ତ୍ର ଭୂମିକା ନେଉଛି। ରାଷ୍ଟ୍ରୀୟ କ୍ଷୁଦ୍ରଶିଳ୍ପ ନିଗମ ଲିମିଟେଡର ପ୍ରାକ୍ତନ ଅଧ୍ୟକ୍ଷ ତଥା ପରିଚାଳନା ନିର୍ଦେଶକ ରବୀନ୍ଦ୍ର ନାଥ ବ୍ୟବସାୟର ଭିନ୍ନତା ଓ ଗ୍ରାହକଙ୍କ ନିକଟରେ ଗ୍ରହଣୀୟତା କ୍ଷେତ୍ରରେ ବ୍ରାଣ୍ଡିଂ ଏକ ପ୍ରମୁଖ ଭୂମିକା ନିର୍ବାହ କରୁଥିବା ସୂଚିତ କରାଇଥିଲେ।

ଏସବିଆଇର ପାର୍ବଣ ଅଫର୍: ଋଣ ମଞ୍ଜୁରୀ ବାବଦ ପ୍ରୋସେସିଂ

ଦେଶର ସର୍ବବୃହତ୍ ଋଣ ପ୍ରଦାନକାରୀ ବ୍ୟାଙ୍କିଙ୍ଗ୍ ପ୍ରତିଷ୍ଠାନ ଭାରତୀୟ ଷ୍ଟେଟ୍ ବ୍ୟାଙ୍କ୍ (ଏସବିଆଇ) ରବିବାର ତା’ର ଗ୍ରାହକମାନଙ୍କୁ ଏକ ଖୁସି ଖବର ଦେଇଛି। ବିଶେଷକରି ଏହି ବ୍ୟାଙ୍କରୁ ଋଣ ନେବାକୁ ଚାହୁଁଥିବା ଗ୍ରାହକମାନଙ୍କ ସକାଶେ ବର୍ତ୍ତମାନ ସମୟ ହିଁ ଉପଯୁକ୍ତ ବୋଲି କୁହାଯାଇପାରେ। କାରଣ ଏସବିଆଇ ଏହାର ଗ୍ରାହକମାନଙ୍କ ସକାଶେ ପାର୍ବଣ ଅଫରର ଘୋଷଣା କରିଛି। ଏହି ଅଫର୍ ଅନୁସାରେ, କୌଣସି ପ୍ରକାର ଋଣ ନେବାକୁ ଚାହୁଁଥିବା ଗ୍ରାହକମାନଙ୍କୁ ଏବେ ପ୍ରୋସେସିଂ ବାବଦରେ କିଛି ବି ଖର୍ଚ୍ଚ କରିବାକୁ ପଡ଼ିବ ନାହିଁ। ଏହି ସୁବିଧା ଗୃହ, ଗାଡ଼ି, ସୁନା ଓ ବ୍ୟକ୍ତିଗତ ଋଣ ଉପରେ ଉପଲବ୍ଧ ରହିବ। ତା’ଛଡ଼ା ଏହା କେବଳ ଏସବିଆଇ ୟୋନୋ ଆପ୍ ବ୍ୟବହାର କରୁଥିବା ଗ୍ରାହକମାନଙ୍କୁ ମିଳିପାରିବ ବୋଲି ବ୍ୟାଙ୍କ୍ ପକ୍ଷରୁ କୁହାଯାଇଛି। ସେହିପରି ଚାରିଚକିଆ ଯାନ କିଣିବାକୁ ଚାହୁଁଥିବା ଗ୍ରାହକମାନଙ୍କୁ କୌଣସି ପ୍ରକାର ଡାଉନ୍ ପେମେଣ୍ଟ୍ କରିବାର ମଧ୍ୟ ଆବଶ୍ୟକତା ନାହିଁ। ଅର୍ଥାତ୍ ଏସବିଆଇରୁ ଚାରିଚକିଆ ଯାନ ମୂଲ୍ୟ ଶତପ୍ରତିଶତ ଋଣ ଆକାରରେ ମିଳିପାରିବ। ଏହାଛଡ଼ା ସୁନା ବନ୍ଧକ ରଖି ଋଣ ନେଉଥିବା ଗ୍ରାହକମାନଙ୍କୁ ଏହି ଋଣ ପରିଶୋଧରେ ମଧ୍ୟ ରିହାତି ମିଳିପାରିବ ବୋଲି ବ୍ୟାଙ୍କ୍ ପକ୍ଷରୁ କୁହାଯାଇଛି। ଏହାଛଡ଼ା ନୂଆ ଘର କିଣିବାକୁ ଚାହୁଁଥିବା କିମ୍ବା ଋଣ କରି ଘର ତିଆରି କରିବାକୁ ଚାହୁଁଥିବା ଗ୍ରାହକମାନଙ୍କୁ ପ୍ରୋସେସିଂ ଫି’ ବାବଦରେ ଗୋଟିଏ ଟଙ୍କା ବି ଖର୍ଚ୍ଚ କରିବାକୁ ପଡ଼ିବ ନାହିଁ।

ଭାରତ ସରକାରଙ୍କୁ ଝଟକା: ଭୋଡାଫୋନ୍ ସପକ୍ଷରେ

ଭାରତର ଅନ୍ୟତମ ପ୍ରମୁଖ ଦୂରସଞ୍ଚାର କମ୍ପାନୀ ଭୋଡାଫୋନ୍ ଗ୍ରୁପ୍ ନେଦରଲାଣ୍ଡର ଦ ହେଗସ୍ଥିତ ଟ୍ରିବ୍ୟୁନାଲରେ ଚାଲିଥିବା ଏକ ଅନ୍ତର୍ଜାତୀୟ ଆର୍ବିଟ୍ରେସନ୍ ମାମଲାରେ ବିଜୟୀ ହୋଇଛି। ଭାରତ ସରକାର ୨୦ ହଜାର କୋଟି ଟଙ୍କାର ଟିକସ ପଇଠ ପାଇଁ ଏହି ମାମଲା ରୁଜୁ କରିଥିବା ବେଳେ ଶୁକ୍ରବାର ଏହାର ରାୟ ଆସିଛି। ଭାରତ ଓ ନେଦରଲ୍ୟାଣ୍ଡ୍ସ ମଧ୍ୟରେ ସ୍ବାକ୍ଷରିତ ଚୁକ୍ତି ଅନୁସାରେ, ଭାରତ ସରକାରଙ୍କ ପକ୍ଷରୁ ଭୋଡାଫୋନ୍ ଉପରେ ଯେଉଁ ଟିକସ ଲଗାଯାଇଛି ଓ ଏହା ଉପରେ ଯେଉଁ ସୁଧ ଓ ଜୋରିମାନା ଲାଗୁ କରାଯାଇଛି, ତାହା ଏହି ପୁଞ୍ଜିନିବେଶ ସଂକ୍ରାନ୍ତ ଚୁକ୍ତିର ସମ୍ପୂର୍ଣ୍ଣ ଉଲ୍ଲଙ୍ଘନ କରୁଛି। ସେହିପରି ଭାରତ ସରକାର ଭୋଡାଫୋନ୍‌ଠାରୁ କୌଣସି ପ୍ରକାର କ୍ଷତିପୂରଣ ଆଶା ନ କରି ବରଂ କମ୍ପାନୀକୁ ଆଇନଗତ ଲଢ଼େଇ ସକାଶେ ଖର୍ଚ୍ଚ ବାବଦରେ ୫.୪୭ ନିୟୁତ ଡଲାର୍ ଅର୍ଥାତ୍ ୪୦ କୋଟି ଟଙ୍କା କ୍ଷତିପୂରଣ ଭାବେ ପ୍ରଦାନ କରିବାକୁ ଟ୍ରିବ୍ୟୁନାଲ୍ ନିର୍ଦେଶ ଦେଇଛନ୍ତି। ତେବେ ଏହି ରାୟ ଉପରେ ଉଭୟ ଭୋଡାଫୋନ୍ ଓ ଅର୍ଥ ମନ୍ତ୍ରାଳୟ ପକ୍ଷରୁ କୌଣସି ପ୍ରକାର ପ୍ରତିକ୍ରିୟା ପ୍ରକାଶ ପାଇନାହିଁ।

କୃଷି ବିଲ୍ ନେଇ ବିରୋଧୀଙ୍କ ଉପରେ ବର୍ଷିଲେ ମୋଦି: ଶଙ୍କା

ଦେଶର କୃଷକମାନଙ୍କୁ ଆର୍ଥିକ ଭାବେ ସଶକ୍ତ କରିବା ସକାଶେ ଏନଡିଏ ସରକାର ସବୁବେଳେ ଉଦ୍ୟମ କରିଆସିଛି। ଏଥିପାଇଁ ବିଭିନ୍ନ ପ୍ରକାର ବୈପ୍ଳବିକ ସଂସ୍କାର ମଧ୍ୟ କାର୍ଯ୍ୟକାରୀ କରାଯାଇଛି। ବର୍ତ୍ତମାନ ସମୟରେ ଏନଡିଏ ସରକାର ସଂସଦରେ ସଫଳତା ପୂର୍ବକ ମଞ୍ଜୁରୀ ଦେଇପାରିଥିବା କୃଷି ସଂଶୋଧନ ବିଲ୍ ଦେଶର କ୍ଷୁଦ୍ର ଓ ନାମମାତ୍ର ଚାଷୀମାନଙ୍କୁ ବିଶେଷ ଫାଇଦା ଦେବ। ଦେଶର କୃଷକମାନଙ୍କୁ ସ୍ବାବଲମ୍ବୀ କରିବା ଦିଗରେ ବିଜେପି ନେତ୍‌ତ୍ବାଧୀନ ଏନଡିଏ ହିଁ ସବୁଠାରୁ ଅଧିକ ପଦକ୍ଷେପ ନେଇଛି। ଏହି ସରକାର ଅମଳରେ ଚାଷୀଙ୍କ ସକାଶେ ସର୍ବନିମ୍ନ ସହାୟକ ମୂଲ୍ୟ (ଏମଏସପି)କୁ ସବୁଠାରୁ ଅଧିକ ବଢ଼ାଯାଇଛି। ସେହିପରି ଦେଶର ପ୍ରତିଟି କୃଷକକୁ ବ୍ୟାଙ୍କ ସହ ଜଡ଼ିତ କରାଇବାରେ ଏନଡିଏ ସରକାର ସବୁଠାରୁ ଅଧିକ ସଫଳତା ପାଇଛି। ପ୍ରଧାନମନ୍ତ୍ରୀ କିଷାନ୍ ସମ୍ମାନ ନିଧି ଯୋଜନାରେ ୧୦ କୋଟି କୃଷକଙ୍କ ଆକାଉଣ୍ଟକୁ ୧ ଲକ୍ଷ କୋଟି ଟଙ୍କା ଟ୍ରାନ୍ସଫର୍ କରାଯାଇପାରିଛି। ତା’ଛଡ଼ା ପ୍ରତିଟି କୃଷକଙ୍କ ନିକଟରେ କିସାନ୍ କ୍ରେଡିଟ୍ କାର୍ଡ ପହଞ୍ଚାଇବା ପାଇଁ ଉଦ୍ୟମ ଚାଲିଛି। ଏହାଦ୍ବାରା କୃଷକମାନେ ବେଶ୍ ସହଜରେ ଋଣ ହାସଲ କରିପାରିବେ ବୋଲି ଦୀନଦୟାଲ୍ ଉପାଧ୍ୟାୟ ଗ୍ରାମୀଣ କୌଶଳ ଯୋଜନାର ପ୍ରତିଷ୍ଠା ଦିବସ ଅବସରରେ ମୋଦି କହିଛନ୍ତି।

ଏଲଇଡି ଆମଦାନି ନେଇ ସରକାରଙ୍କ କଡ଼ା ଆଭିମୁଖ୍ୟ

କେନ୍ଦ୍ର ସରକାର ଚୀନ୍ ସାମଗ୍ରୀର ଆମଦାନିକୁ ନିରୁତ୍ସାହିତ କରିବା ସକାଶେ ଲଗାତର ପଦକ୍ଷେପମାନ ନେଇଚାଲିଛନ୍ତି। ଏହି କ୍ରମରେ ଶୁକ୍ରବାର କେନ୍ଦ୍ର ସରକାର ଚୀନରୁ ଆମଦାନି ହେଉଥିବା ଏଲଇଡିର ମାନ ଯାଞ୍ଚ୍ ପାଇଁ ନିର୍ଦେଶ ଦେଇଛନ୍ତି। ଚୀନ୍ ସହ ଅନ୍ୟାନ୍ୟ ଦେଶରୁ ଭାରତକୁ ଆମଦାନୀ ହେଉଥିବା ଏଲଇଡି ଉତ୍ପାଦର କଡ଼ାକଡ଼ି ମାନ ଯାଞ୍ଚ୍ ପାଇଁ ନିର୍ଦେଶ ଦିଆଯାଇଥିବାରୁ ଚୀନ୍ ଉତ୍ପାଦନ ବିରୋଧରେ ଭାରତର ଏହା ଆଉ ଏକ ଠୋସ୍ ପଦକ୍ଷେପ ବୋଲି କୁହାଯାଉଛି। ଏ ସଂକ୍ରାନ୍ତରେ ଶୁକ୍ରବାର ବୈଦେଶିକ ବ୍ୟାପାର ମହାନିର୍ଦେଶାଳୟ (ଡିଜିଏଫଟି) ପକ୍ଷରୁ ଏକ ବିଜ୍ଞପ୍ତି ଜାରି କରାଯାଇଛି। ଏହି ବିଜ୍ଞପ୍ତିରେ କୁହାଯାଇଛି ଯେ କୌଣସି ଏଲଇଡି ଉତ୍ପାଦ ଆମଦାନି ପୂର୍ବରୁ ଏହାର ନମୁନାର କଡ଼ା ଯାଞ୍ଚ୍ କରାଯିବ। ମାନ ପରୀକ୍ଷା ସକାଶେ ଏହି ନମୁନାକୁ ଭାରତୀୟ ମାନକ ବ୍ୟୁରୋ (ବିଆଇଏସ୍) ସ୍ବୀକୃତିପ୍ରାପ୍ତ ଲାବୋରେଟୋରୀକୁ ପଠାଯିବା ବାଧ୍ୟତାମୂଳକ। ବୈଦ୍ୟୁତିକ ଓ ଆଇଟି ଉତ୍ପାଦ (ବାଧ୍ୟତାମୂଳକ ପଞ୍ଜୀକରଣ) ନିର୍ଦେଶନାମା, ୨୦୧୨ ଅନୁସାରେ ଏହି ମାନ ଯାଞ୍ଚ୍ କରାଯିବ ବୋଲି ଜାରି ବିଜ୍ଞପ୍ତିରେ ଡିଜିଏଫଟି ପକ୍ଷରୁ କୁହାଯାଇଛି। ସେହିପରି ଦେଶର ପ୍ରମୁଖ ବନ୍ଦର କାଣ୍ଡଲା, ପାରାଦୀପ, କୋଚି ଓ ମୁମ୍ବାଇ ଆଦି ଦେଇ ଭାରତକୁ ଆମଦାନୀ ହେଉଥିବା ଏଲ୍ଇଡି ଉତ୍ପାଦନର ମାନ ଯାଞ୍ଚ୍ ପାଇଁ ମଧ୍ୟ ବାଣିଜ୍ୟ ମନ୍ତ୍ରାଳୟ ଅଧୀନସ୍ଥ ବିଆଇଏସ୍ ପକ୍ଷରୁ ନିର୍ଦେଶ ଦିଆଯାଇଛି।

ଏସବିଆଇ ଜମାକାରୀଙ୍କୁ ଝଟକା: ସ୍ଥାୟୀ ଜମା ଉପରେ କମିଲା

ଦେଶର ସର୍ବବୃହତ୍ ଋଣ ପ୍ରଦାନକାରୀ ବ୍ୟାଙ୍କ୍ ଭାରତୀୟ ଷ୍ଟେଟ୍ ବ୍ୟାଙ୍କ (ଏସବିଆଇ)ରେ ଆପଣ ସ୍ଥାୟୀ ଜମା (ଏଫଡି) କରିବାକୁ ଚାହୁଁଛନ୍ତି କି? ତା’ହେଲେ ଆପଣଙ୍କ ପାଇଁ ଏହି ଖବରଟି ବେଶ୍ ପ୍ରଯୁଜ୍ୟ। କାରଣ ଏସବିଆଇ ପକ୍ଷରୁ କେତେକ ନିର୍ଦ୍ଦିଷ୍ଟ ସମୟ ସୀମାର ସ୍ଥାୟୀ ଜମା ଉପରେ ଲାଗୁ ହେଉଥିବା ସୁଧ ହାରକୁ ହ୍ରାସ କରାଯାଇଛି। ସେପ୍ଟେମ୍ବର ୧୦ ତାରିଖଠାରୁ ପିଛିଲା ଭାବେ ଲାଗୁ ହୋଇଥିବା ଏହି ପୂର୍ବରୁ ଚଳିତ ବର୍ଷ ମେ’ ୨୭ ଓ ମେ’ ୧୨ ତାରିଖରେ ଦୁଇ ଥର ବ୍ୟାଙ୍କ୍ ପକ୍ଷରୁ ସ୍ଥାୟୀ ଜମା ଉପରେ ସୁଧ ହାରକୁ ହ୍ରାସ କରାଯାଇଥିଲା। ପରିବର୍ତ୍ତିତ ସୁଧ ହାର ନୂଆ ଜମା ଓ ନବୀକରଣ ହେବାକୁ ଥିବା ଜମା ଉପରେ ଲାଗୁ ହେବ ବୋଲି ବ୍ୟାଙ୍କ୍ ପକ୍ଷରୁ କୁହାଯାଇଛି। ବ୍ୟାଙ୍କ୍ ୱେବସାଇଟରେ ଉପଲବ୍ଧ ତଥ୍ୟ ଅନୁସାରେ, ୨ କୋଟିରୁ କମ୍ ପରିମାଣର ସ୍ଥାୟୀ ଜମା ଉପରେ ସୁଧ ହାରକୁ ହ୍ରାସ କରାଯାଇଛି।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ