ଜୁନ ୩୦ ଯାଏ ବଢିଲା ଆଧାର-ପ୍ୟାନ ଲିଙ୍କ ଅବଧି। କୋଭିଡ ସଂକ୍ରମଣକୁ ଆଖି ଆଗରେ ରଖି ମୋଦୀ ସରକାର ଜୁନ ୩୦ ପର୍ଯ୍ୟନ୍ତ ଆଧାର ସହିତ ପାନ୍ କାର୍ଡ ଲିଙ୍କ ଅବଧି ବଢାଇ ଦେଇଛନ୍ତି। ପୂର୍ବରୁ ମାର୍ଚ୍ଚ ୩୧ ତାରିଖ ଏଥିପାଇଁ ଶେଷ ତାରିଖ ଧାର୍ଯ୍ୟ କରାଯାଇଥିଲା। ଯେଉଁମାନେ ମାର୍ଚ୍ଚ ୩୧ପର୍ଯ୍ୟନ୍ତ ଆଧାର-ପାନ ଲିଙ୍କ କରି ନ ଥିଲେ, ସେମାନେ ଆଉ ୩ ମାସ ସମୟ ରିହାତି ପାଇଛନ୍ତି। ଏ ସମୟ ଭିତରେ ସେମାନେ ଉଭୟ କାର୍ଡ ଲିଙ୍କ କରିବା ପାଇଁ ଆହ୍ୱାନ କୁହାଯାଇଛି।
ଏପ୍ରିଲ ୧ରୁ ଅଚଳ ହେବ ନାହିଁ ସ୍ବୟଂକ୍ରିୟ ବିଲ୍ ପୈଠ ବ୍ୟବସ୍ଥା। ସେପ୍ଟେମ୍ବର ୩୦ ପର୍ଯ୍ୟନ୍ତ ବ୍ୟାଙ୍କକୁ ସମୟ ଦେଲା ଆରବିଆଇ। ପୂର୍ବରୁ ଏପ୍ରିଲ୍ ଠାରୁ ମୋବାଇଲ୍ ଫୋନ୍ ବିଲ୍, ୟୁଟିଲିଟି ବିଲ୍, ମିଡିଆ ବିଷୟବସ୍ତୁ ପାଇଁ ସବସ୍କ୍ରିପସନ୍ ଚାର୍ଜ ଏବଂ ବ୍ୟାଙ୍କର ସ୍ବୟଂକ୍ରିୟ ବିଲ୍ ପୈଠ ବ୍ୟବସ୍ଥା (ଅଟୋ-ଡେବିଟ୍) ମାଧ୍ୟମରେ ଓଭର-ଟପ୍ ଷ୍ଟ୍ରିମିଂ ସେବା ପାଇଁ ଆପଣ କରୁଥିବା ମାସିକ ଦେୟ ବାଧାପ୍ରାପ୍ତ ହେବ ବୋଲି କୁହାଯାଉଥିଲା। ଆରବିଆଇ ନୂତନ ନିୟମ ଏପ୍ରିଲ ପହିଲାରୁ ଲାଗୁ କରିବ ବୋଲି କହିବା ସହ ଆଗକୁ ଅବଧି ବଢ଼ାଯିବ ନାହିଁ ବୋଲି ସମସ୍ତ ବ୍ୟାଙ୍କ ଏବଂ କ୍ରେଡିଟ୍ କାର୍ଡ ସେବା ପ୍ରଦାନକାରୀ ସଂସ୍ଥାକୁ କହିଥିଲା। କିନ୍ତୁ ବୁଧବାର ଆରବିଆଇ ସେପ୍ଟେମ୍ବର ୩୦ ପର୍ଯ୍ୟନ୍ତ ବ୍ୟାଙ୍କକୁ ସମୟ ଦେଇଛି। ଅର୍ଥାତ ସେପ୍ଟେମ୍ବର ୩୦ ପର୍ଯ୍ୟନ୍ତ ବ୍ୟାଙ୍କର ସ୍ବୟଂକ୍ରିୟ ବିଲ୍ ପୈଠ ବ୍ୟବସ୍ଥା ଚାଲୁ ରହିବ।
ପୁଣି କମିଛି ସୁନା ଦର। ମଙ୍ଗଳବାର ସୁନା ଦରରେ ସାମାନ୍ୟ ବୃଦ୍ଧି ଘଟିଥିବା ବେଳେ ବୁଧବାର ଏହା ପୁଣି ହ୍ରାସ ହୋଇଛି। ମଲ୍ଟି କମୋଡିଟି ଏକ୍ସଚେଞ୍ଜ (ଏମସିଏକ୍ସ)ରେ ବୁଧବାର ସକାଳେ ସୁନା ଦର ପ୍ରତି ୧୦ ଗ୍ରାମକୁ ୨୫୦ ଟଙ୍କା ହ୍ରାସ ସହ ୪୫,୩୦୦ ଟଙ୍କାରେ କାରବାର ଚାଲିଥିଲା। ସେହିପରି ରୁପା ପ୍ରତି କିଲୋକୁ ୩୯୬ ଟଙ୍କା ହ୍ରାସ ସହ ୬୯,୨୧୬ ଟଙ୍କାରେ କାରବାର ଚାଲିଥିଲା।
ନିକଟରେ ଏଠାକାର ଏକ ଭିତ୍ତିଭୂମି ବିକାଶ ସହ ଜଡ଼ିତ କମ୍ପାନୀ ଆଇଜେଏମ୍ ଇଣ୍ଡିଆ ରାସ୍ତା ବିଛାଇବାରେ ରେକର୍ଡ ସଫଳତା ହାସଲ କରିଛି। ମାଲେସିଆର ଆଇଜେଏମ୍ କନଷ୍ଟ୍ରକସନ୍ ବେରହାଡ୍ର ଏହି ସହଯୋଗୀ କମ୍ପାନୀ ମାତ୍ର ୧୭ ଘଣ୍ଟା ୪୫ ମିନିଟ୍ ସମୟରେ ୨୫.୫୪ ଲେନ୍ କିମି ଦୈର୍ଘ୍ୟତାବିଶିଷ୍ଟ ରାସ୍ତା ବିଛାଇପାରିଛି। ଏହି ଜାତୀୟ ରାଜପଥଟି ୪ଥାକିଆ ହୋଇଥିବାରୁ ଏହାର ଦୁଇ ପଟରେ ସର୍ବମୋଟ ୨୫.୫୪ କିମି ରାସ୍ତା ନିର୍ମାଣ କରାଯିବା ଅର୍ଥ କମ୍ପାନୀ ସମୁଦାୟ ୧୨.୭୭ କିମି ରାସ୍ତା ନିର୍ମାଣ କରିପାରିଛି। ଏହି ରାସ୍ତା ଚାରିଥାକିଆ ୧୩ ନମ୍ବର ଜାତୀୟ ରାଜପଥର ସୋଲାପୁର-ବିଜାପୁର ସେକ୍ସନରେ ବିଛାଯାଇଥିବା କମ୍ପାନୀ ପକ୍ଷରୁ କୁହାଯାଇଛି। ପ୍ରଥମ ଥର ପାଇଁ ଭାରତୀୟ ରାଜପଥ ଇତିହାସରେ ଏତେ କମ୍ ସମୟ ମଧ୍ୟରେ ଦୀର୍ଘ ରାସ୍ତା ବିଛାଯାଇଥିବାରୁ ବର୍ତ୍ତମାନ କମ୍ପାନୀ ନିଜର ଏହି ସଫଳତାକୁ ଲିମକା ବୁକ୍ ଅଫ୍ ରେକର୍ଡ୍ସରେ ସାମିଲ୍ କରିବା ସକାଶେ ଉଦ୍ୟମ ଚଳାଇଛି। ଏହି ରେକର୍ଡ ସଫଳତା ସଂକ୍ରାନ୍ତରେ ଆଇଜେଏମ୍ଆଇଆଇର ସଂପୃକ୍ତ ପ୍ରୋଜେକ୍ଟର ଟିମ୍ ଲିଡର୍ ଏମ. ଭେଙ୍କଟେଶ୍ବର ରାଓ କହିଛନ୍ତି ଯେ ଏହି ରାସ୍ତା ନିର୍ମାଣ କାର୍ଯ୍ୟରେ ଆମକୁ ଅନେକ କିଛି ବାଧାବିଘ୍ନର ସମ୍ମୁଖୀନ ହେବାକୁ ପଡ଼ିଥିଲା। ଉଭୟ ଲଜିଷ୍ଟିକାଲ୍ ଓ ଟେକନିକାଲ୍ ସମସ୍ୟା ଆମ ପାଇଁ ଅନେକ ସମସ୍ୟା ସୃଷ୍ଟି କରିଥିଲା ବୋଲି ରାଓ କହିଛନ୍ତି।
ତାଇୱାନକୁ ସହାୟତାର ହାତ ବଢ଼ାଇଛି ଭାରତ। ପାରମ୍ପରିକ ଔଷଧ କ୍ଷେତ୍ରରେ ସହଯୋଗ ବୃଦ୍ଧି ନିମନ୍ତେ ଭାରତ ତାଇଓ୍ଵାନ୍ର 'ନ୍ୟାସ୍ନାଲ୍ ରିସର୍ଚ୍ଚ ଇନ୍ଷ୍ଟିଚ୍ୟୁଟ୍ ଅଫ୍ ଚାଇନିଜ୍ ମେଡିସିନ୍'କୁ (ଏନ୍ଆର୍ଆଇସିଏମ୍) ୫ ଲକ୍ଷ ୭୦ ହଜାର ନିୟୁତ ତାଇଓ୍ଵାନ୍ ଡଲାର୍ ଅନୁଦାନ ଦେଇଛି। ପ୍ରଥମ ଥର ଲାଗି ଭାରତ ସରକାର ତାଇଓ୍ଵାନର ଏକ ସରକାରୀ ପ୍ରତିଷ୍ଠାନକୁ ଆର୍ଥିକ ଅନୁଦାନ ଦେଇଥିବା ଏକ ରିପୋର୍ଟରୁ ଜଣାପଡ଼ିଛି। 'ଏନ୍ଆର୍ଆଇସିଏମ୍' ହେଉଛି ତାଇଓ୍ଵାନ୍ ସ୍ୱାସ୍ଥ୍ୟ ଓ କଲ୍ୟାଣ ବିଭାଗ ଅଧୀନସ୍ଥ ଏକ ସଂସ୍ଥାନ।
ଆଜି ସୁନାର ଦର ହ୍ରାସ ପାଇଥିବା ବେଳେ ରୁପାର ଦରରେ ବୃଦ୍ଧି ଘଟିଛି। ସୁନାର ମୂଲ୍ୟ ୧୦ ଗ୍ରାମ ପ୍ରତି ୨୦୦ ଟଙ୍କା ଶସ୍ତା ହୋଇଥିବାବେଳେ ରୁପାର କିଲୋ ପ୍ରତି ମୂଲ୍ୟରେ ୧,୦୦୦ ଟଙ୍କା ବୃଦ୍ଧି ଘଟିଛି। ଇଣ୍ଡିଆ ବୁଲିଅନ୍ ଏବଂ ଜୁଏଲର୍ସ ଆସୋସିଏସନ୍ ଲିମିଟେଡ୍ (ଆଇବିଜେଏ) ଅନୁଯାୟୀ, ସୁନା ମୂଲ୍ୟ ପ୍ରତି ୧୦ ଗ୍ରାମରେ ୨୦୦ ଟଙ୍କାରୁ ଅଧିକ ହ୍ରାସ ପାଇଛି। ଫେବ୍ରୁଆରୀ ୧୨ରେ ସୁନାର ଦର ୧୦ ଗ୍ରାମ ପ୍ରତି ୪୭,୫୨୮ ଟଙ୍କା ରହିଥିବା ବେଳେ ଫେବ୍ରୁଆରୀ ୧୫ରେ ଏହା ୪୭,୩୩୨ ଟଙ୍କାକୁ ହ୍ରାସ ପାଇଛି। ଆଇବିଜେର ତଥ୍ୟ ଅନୁଯାୟୀ ୨୨ କ୍ୟାରେଟ୍ ସୁନା ଦର ୧ ଗ୍ରାମ ପିଛା ୪,୫୭୨ ଟଙ୍କା ଏବଂ ୧୮ କ୍ୟାରେଟ୍ ସୁନା ୧ ଗ୍ରାମ ପିଛା ୩,୭୮୭ ଟଙ୍କା ରହିଛି।
ଯଦି କେହି ଗାଡ଼ିରେ ଫାସଟ୍ୟାଗ୍ ଲଗାଇ ନ ଥାନ୍ତି ତାହେଲେ ଫେବ୍ରୁୟାରୀ ୧୫ ଓ ୧୬ ମଧ୍ୟରାତ୍ରରୁ ଟୋଲ ଫି ବାବଦରେ ଦୁଇଗୁଣା ଅର୍ଥ ଦେବେ। ଏନେଇ କେନ୍ଦ୍ର ସଡ଼କ ପରିବହନ ମନ୍ତ୍ରାଳୟ ପକ୍ଷରୁ କଡ଼ା ନିର୍ଦେଶନାମା ଜାରି ହୋଇଛି। ଜାତୀୟ ରାଜପଥରେ ଥିବା ସମସ୍ତ ଟୋଲ ପ୍ଲାଜା ଲେନ ଫାସଟ୍ୟାଗ୍ କରାଯାଇଛି। ତେଣୁ ଯେ କୌଣସି ଗାଡ଼ି ସେହି ଲେନ ଦେଇ ଅତିକ୍ରମ କଲେ ବି ଅନଲାଇନ ଜରିଆରେ ଟୋଲ୍ ଫି କଟିବ। ଆଉ ଯଦି କେହି ଗାଡ଼ିରେ ଏନେଇ ଫାସଟ୍ୟାଗ୍ ଲଗାଇ ନ ଥାନ୍ତି ବା କାହାର ଫାସଟ୍ୟାଗ୍ କାମ କରୁ ନ ଥିବ, ତାହେଲେ ସେମାନଙ୍କୁ ଧାର୍ଯ୍ୟ ଟୋଲ ଫି’ର ଦୁଇଗୁଣା ଅର୍ଥ ଦେଇ ଟୋଲ ପ୍ଲାଜା ଅତିକ୍ରମ କରିବାକୁ ପଡ଼ିବ ବୋଲି କୁହାଯାଇଛି।
କେରଳର କୋଚି ଠାରେ ରବିବାର ରାଷ୍ଟ୍ର ଉଦ୍ଦେଶ୍ୟରେ ସମର୍ପିତ ପେଟ୍ରୋକେମିକାଲ୍ସ ପ୍ରକଳ୍ପ ସମେତ ଏକବିଂଶ ଶତାବ୍ଦୀର ଏକାଧିକ ଭିତ୍ତିଭୂମି ପ୍ରକଳ୍ପଗୁଡ଼ିକ କେରଳ ତଥା ଦକ୍ଷିଣ ଭାରତର ସାମଗ୍ରିକ ଶିଳ୍ପ ଏବଂ ଅର୍ଥନୀତି ବିକାଶକୁ ତ୍ୱରାନ୍ୱିତ କରିବ ବୋଲି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ସେହିପରି ଲୋକାର୍ପିତ ହୋଇଯାଇଥିବା ଭାରତ ପେଟ୍ରୋଲିୟମ୍ କର୍ପୋରେସନ୍ ଲିମିଟେଡ଼ (ବିପିସିଏଲ)ର ୬ ହଜାର କୋଟି ଟଙ୍କା ବ୍ୟୟରେ ନିର୍ମିତ କୋଚି ବିଶୋଧନାଗାରର ଅତ୍ୟାଧୁନିକ ପ୍ରୋପିଲିନ୍ ଡେରିଭେଟିଭ ପେଟ୍ରୋକେମିକାଲ ପ୍ରୋଜେକ୍ଟ (ପିଡ଼ିପିପି) ପ୍ଲାଣ୍ଟ୍ରେ ବିଦେଶରୁ ଆମଦାନି ହେଉଥିବା ସର୍ବୋତ୍କୃଷ୍ଟ ମାନର ପେଟ୍ରୋକେମିକାଲ ଉତ୍ପାଦ ଉତ୍ପାଦନ କରାଯିବ ବୋଲି କହିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ।
ଗତକାଲି ସୁନା, ରୁପା ଦର ହ୍ରାସ ପାଇଥିବା ବେଳେ ଆଜି ବି ସୁନା ଦରରେ ହ୍ରାସ ଘଟିଛି। ଯଦିଓ ଏକାଧିକ ଦ୍ରବ୍ୟ ବିନିମୟ (ଏମସିଏକ୍ସ)ରେ ଆଜି ସୁନା ଓ ରୁପା ଦରରେ ବୃଦ୍ଧି ଦେଖିବାକୁ ମିଳିଛି. ହେଲେ ଦେଶର ସର୍ରାଫା ବଜାରରେ ସୁନା ଦରରେ ହ୍ରାସ ଦେଖିବାକୁ ମିଳିଛି। ଏଠାରେ ଆମେ ଆପଣଙ୍କୁ କହି ରଖୁଛୁ ଯେ, ଚଳିତ ବଜେଟ୍ରେ କଷ୍ଟମ ଡ୍ୟୁଟି ହ୍ରାସ ଘୋଷଣା ପରେ ଲଗାତର ୫ ଦିନ ଧରି ସୁନା ଦରରେ ହ୍ରାସ ଦେଖିବାକୁ ମିଳିଛି।
ଶୁକ୍ରବାର ପୂର୍ବାହ୍ନରେ ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ) ପ୍ରମୁଖ ପଲିସି ରେଟ୍ ଅପରିବର୍ତ୍ତିତ ରଖିଛି। ଏଥିରେ ରେପୋ ରେଟ୍ ଓ ରିଭର୍ସ ରେପୋ ରେଟ୍ ଅନ୍ୟତମ ହୋଇଥିବାବେଳେ ଏହା ଯଥାକ୍ରମେ ୪ ଓ ୩.୩୫ ପ୍ରତିଶତରେ ଅପରିବର୍ତ୍ତିତ ରହିଛି। ଶୁକ୍ରବାର ଆରବିଆଇ ପକ୍ଷରୁ ପାକ୍ଷିକ ମୁଦ୍ରାନୀତି କମିଟି (ଏମପିସି) ରିଭ୍ୟୁ ବୈଠକରେ ହୋଇଥିବା ନିଷ୍ପତ୍ତି ସମ୍ପର୍କରେ ଅବଗତ କରାଇବା ସମୟରେ ଆରବିଆଇ ଗଭର୍ଣ୍ଣର୍ ଶକ୍ତିକାନ୍ତ ଦାସ କହିଛନ୍ତି ଯେ ଦେଶର ଅର୍ଥନୀତି କୋରୋନା ସଂକ୍ରମଣଜନିତ ସ୍ଥିତିରୁ କ୍ରମଶଃ ଉପରକୁ ଉଠିବାରେ ଲାଗିଛି। ଅର୍ଥନୈତିକ ଅଭିବ୍ଦ୍ଧି କ୍ଷେତ୍ରରେ ଆଶାଜନକ ଉନ୍ନତି ପରିଲକ୍ଷିତ ହେୁଥିବା ବେଳେ ଏଫଡିଆଇ ଓ ଏଫପିଆଇ ପୁଞ୍ଜି ନିବେଶ ମଧ୍ୟ ବଢ଼ିଚାଲିଛି। ଅର୍ଥନୀତିର ବିଭିନ୍ନ କ୍ଷେତ୍ରରେ କ୍ରମଶଃ ସୁଧାର ଆସିବାରେ ଲାଗିଛି। ବିଶେଷକରି ଶକ୍ତି କ୍ଷେତ୍ରରେ ଚାହିଦା ଆଶାନୁପାତରେ ବଢ଼ିଚାଲିଛି। ସେହିପରି କୋରୋନା ସଂକ୍ରମଣଜନିତ ଲକଡାଉନ୍ ଦ୍ବାରା ପ୍ରଭାବିତ ହୋଇଥିବା ଅର୍ଥନୀତିରେ କ୍ରମଶଃ ସୁଧାର ହେଉଛି। ମାଲ୍ ପରିବହନ ସହ ଜନସାଧାରଣଙ୍କ ଚଳପ୍ରଚଳ ମଧ୍ୟ ବଢ଼ିଚାଲିଛି ଓ ଅର୍ଥନୀତି ପୁଣିଥରେ ଚଳଚଞ୍ଚଳ ହୋଇପଡ଼ିଛି ବୋଲି ଦାସ କହିଛନ୍ତି।
ନୂଆଦିଲ୍ଲୀ ଠାରେ ବୁଧବାର ଖଦି ହମାରା ମନ୍ତ୍ର ଫାଉଣ୍ଡେସନ୍ ଦ୍ୱାରା ଆୟୋଜିତ ‘କଳା ଭାରତ ଆତ୍ମନିର୍ଭର ଅଭିଯାନ’ର ସ୍ୱତନ୍ତ୍ର କାର୍ଯ୍ୟକ୍ରମରେ ଯୋଗଦେଇ ଏହି ଅଭିଯାନ କାର୍ଯ୍ୟକ୍ରମକୁ ଦେଶର ସବୁ ରାଜ୍ୟର ରାଜଧାନୀ ପର୍ଯ୍ୟନ୍ତ ପହଞ୍ଚାଇବା ନେଇ ପରାମର୍ଶ ଦେଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ଭାରତର ସମୃଦ୍ଧ ସଂସ୍କୃତି ଏବଂ ସୃଜନଶୀଳ କଳା ଦକ୍ଷତା ଏବଂ ବିଶ୍ୱ ବଜାରରେ ଭାରତ ପାଇଁ ଥିବା ସମ୍ଭାବନା ଉପରେ ବିସ୍ତୃତ ଆଲୋଚନା କରିବା ଅବସରରେ ଧର୍ମେନ୍ଦ୍ର କହିଛନ୍ତି , ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସ୍ଥାନୀୟ ସାମଗ୍ରୀକୁ ପ୍ରୋତ୍ସାହନ ଦେବା ଦିଗରେ ଭୋକାଲ୍ ଫର୍ ଲୋକାଲ୍ ଅଭିଯାନ ଆରମ୍ଭ କରିଛନ୍ତି। ଏହି ପରିପ୍ରେକ୍ଷୀରେ କଳା ଭାରତ ଆତ୍ମନିର୍ଭର ଅଭିଯାନକୁ ଦେଶର ସମସ୍ତ ରାଜ୍ୟ, ସବୁ ରାଜଧାନୀ ପର୍ଯ୍ୟନ୍ତ ପହଞ୍ଚାଯାଇ ପାରିଲେ ହିଁ ଲୋକମାନଙ୍କର ସ୍ଥାନୀୟ କଳା ଏବଂ କୌଶଳ ପ୍ରତି ଆଗ୍ରହ ଆସିବ ବୋଲି କହିଛନ୍ତି।
ବିଶ୍ବର ପ୍ରମୁଖ ଇ-କମର୍ସ କମ୍ପାନୀ ଆମାଜନ୍ ଡଟ୍ କମ୍ର ସିଇଓ ଜେଫ୍ ବେଜୋସ୍ ଏହି ପଦ ଛାଡ଼ିବାକୁ ନିଷ୍ପତ୍ତି ନେଇଛନ୍ତି। ଚଳିତ ବର୍ଷ ୩ୟ କ୍ବାର୍ଟରରେ ସେ ସିଇଓ ପଦ ଛାଡ଼ିବେ ଓ ତାଙ୍କ ସ୍ଥାନରେ ଆଣ୍ଡି ଜେସି ସିଇଓ ଭାବେ କାର୍ଯ୍ୟ କରିବେ ବୋଲି ବେଜୋସ୍ ଘୋଷଣା କରିଛନ୍ତି। ବର୍ତ୍ତମାନ ସମୟରେ ଜେସି ଆମାଜନର ସବୁଠାରୁ ଲାଭଦାୟକ ସଂସ୍ଥା ଆମାଜନ୍ ୱେବ୍ ସର୍ଭିସେସର ମୁଖ୍ୟ ଭାବେ କାର୍ଯ୍ୟ କରୁଛନ୍ତି। ସିଇଓ ପଦ ଛାଡ଼ିବା ନେଇ ବେଜୋସ୍ ଇମେଲ୍ ମାଧ୍ୟମରେ ତାଙ୍କର ସମସ୍ତ କର୍ମଚାରୀଙ୍କୁ ଅବଗତ କରାଇଛନ୍ତି। ସେ ଚଳିତ ବର୍ଷର ୩ୟ କ୍ବାର୍ଟରରୁ କମ୍ପାନୀର କାର୍ଯ୍ୟନିର୍ବାହୀ ଅଧ୍ୟକ୍ଷ ଭାବେ କାର୍ଯ୍ୟ କରିବେ। ତେବେ ସିଇଓ ପଦ ଛାଡ଼ିବା ପରେ ବି ସର୍ବାଧିକ ଶେୟାର୍ ଥିବାରୁ ବେଜୋସ୍ଙ୍କର କମ୍ପାନୀ ଉପରେ ସମ୍ପୂର୍ଣ୍ଣ ନିୟନ୍ତ୍ରଣ ରହିବ। ତେବେ ସିଇଓ ପଦ ଛାଡ଼ିବା ପରେ ବେଜୋସ୍ ସମାଜ ମଙ୍ଗଳ କାର୍ଯ୍ୟରେ ଅଧିକ ସମୟ ନିୟୋଜିତ କରିବେ। ତାଙ୍କ ଦ୍ବାରା ପ୍ରତିଷ୍ଠିତ ଡେ ୱାନ୍ ଫଣ୍ଡ୍ ଓ ବେଜୋସ୍ ଆର୍ଥ ଫଣ୍ଡ୍ ପାଇଁ ଅଧିକ ସମୟ ଦେବା ସହ ୫୭ ବର୍ଷୀୟ ବେଜୋସ୍ ମହାକାଶ ଗବେଷଣା କ୍ଷେତ୍ରରେ କାର୍ଯ୍ୟ କରୁଥିବା ତାଙ୍କ ସଂସ୍ଥା ବ୍ଲୁ ଓରିଜିନ୍ ଓ ଗଣମାଧ୍ୟମ କ୍ଷେତ୍ରରେ ସକ୍ରିୟ ଥିବା ଦ ୱାଶିଂଟନ୍ ପୋଷ୍ଟ୍ ପାଇଁ ଅଧିକ ସମୟ ଦେବାକୁ ମଧ୍ୟ ନିଷ୍ପତ୍ତି ନେଇଛନ୍ତି। ବିଶ୍ବର ଏହି ଅନ୍ୟତମ ବିତ୍ତଶାଳୀ ବ୍ୟକ୍ତି ଆମାଜନ୍ ସିଇଓ ପଦବୀ ଛାଡ଼ିବା ନେଇ ଘୋଷଣା କରିବା ପରେ ପ୍ରମୁଖ ବ୍ୟକ୍ତିବିଶେଷ ଓ ବିଭିନ୍ନ ଟେକ୍ କମ୍ପାନୀ ସିଇଓମାନେ ସୋସାଲ୍ ମିଡିଆ ମାଧ୍ୟମରେ ବେଜୋସଙ୍କୁ ତାଙ୍କର ପରବର୍ତ୍ତୀ କାର୍ଯ୍ୟ ପାଇଁ ଶୁଭେଚ୍ଛା ଜଣାଇଛନ୍ତି। ତା’ଛଡ଼ା ସେମାନେ ନୂଆ ସିଇଓ ଜେସିଙ୍କୁ ମଧ୍ୟ ଅଭିନନ୍ଦନ ଦେଇଛନ୍ତି।
ଗତ ସପ୍ତାହରେ ଷ୍ଟକ୍ ମାର୍କେଟରେ ପ୍ରଥମ ଥର ପାଇଁ ସେନ୍ସେକ୍ସ ୫୦ ହଜାର ପଏଣ୍ଟ୍ ଅତିକ୍ରମ କରି ରେକର୍ଡ ଉଚ୍ଚତାରେ ପହଞ୍ଚିଥିଲା। କିନ୍ତୁ କେନ୍ଦ୍ର ଅର୍ଥ ମନ୍ତ୍ରୀ ନିର୍ମଳା ସୀତାରମଣ ୨୦୨୧-୨୨ ଆର୍ଥିକ ବର୍ଷ ପାଇଁ ପୂର୍ଣ୍ଣାଙ୍ଗ ବଜେଟ୍ ଉପସ୍ଥାପନ କରିବା ଖବର ପ୍ରଚାରିତ ହେବା ପରେ ନିବେଶକଙ୍କ ମଧ୍ୟରେ ପୁଞ୍ଜି ଲଗାଣକୁ ନେଇ ଭୟଭାବ ଜାତ ହୋଇଥିଲା। ତେଣୁ ବ୍ୟାପକ ମାତ୍ରାରେ କିଣାବିକା ହେବା ପରିବର୍ତ୍ତେ ନିବେଶକମାନେ କେବଳ ବିକ୍ରି ଉପରେ ଗୁରୁତ୍ବ ଦେଇଥିଲେ। ତେଣୁ ବିଏସ୍ଇ ସେନ୍ସେକ୍ସ ପାଖାପାଖି ୪୬ ହଜାର ପଏଣ୍ଟକୁ ଖସିଆସିଥିଲା। କିନ୍ତୁ ଗତ ସୋମବାର ସଂସଦରେ ପୂର୍ଣ୍ଣାଙ୍ଗ ବଜେଟ୍ ଆଗତ ହେବା ପରେ ପରେ ଦଲାଲ୍ ଷ୍ଟ୍ରୀଟ୍ରେ ନିବେଶକଙ୍କ ପାଇଁ ଅର୍ଥ ରୋଜଗାର କରିବା ସକାଶେ ଏକ ପ୍ରକୃଷ୍ଟ ପରିବେଶ ସ୍ଷ୍ଟି ହୋଇଥିଲା। ସୋମବାର ବିଏସଇ ସେନ୍ସେକ୍ସରେ ୨୩ ଶହ ଉପରେ ପଏଣ୍ଟ୍ ବଢ଼ିବା ଫଳରେ ଅପରାହ୍ନ ସାଢ଼େ ୩ଟା ବେଳେ ବଜାର ବନ୍ଦ ହେବା ବେଳକୁ ଏହା ୪୮ ହଜାର ୬୦୦.୬୧ରେ ପହଞ୍ଚିଯାଇଥିଲା। ମଙ୍ଗଳବାର ଏହି ଧାରା ଜାରି ରହିବା ସହ ପାଖାପାଖି ଅଢ଼େଇ ପ୍ରତିଶତ ବୃଦ୍ଧି ପରିଲକ୍ଷିତ ହୋଇଛି। ତେଣୁ ସପ୍ତାହେ ନ ପୂରୁଣୁ ପୁଣିଥରେ ସେନ୍ସେକ୍ସ ୫୦ ହଜାର ପଏଣ୍ଟ୍ ଅତିକ୍ରମ କରିଛି। ସେହିପରି ଏନଏସଇ ନିଫ୍ଟି ମଧ୍ୟ ସାଢ଼େ ୧୪ ହଜାର ପଏଣ୍ଟ୍ ସୀମାକୁ ଅତିକ୍ରମ କରିଛି।
ନୂଆଦିଲ୍ଲୀ/ଭୁବନେଶ୍ୱର: ବିଶ୍ୱବ୍ୟାପୀ ଦୃଶ୍ୟପଟ୍ଟକୁ ନଜରରେ ରଖି ମୋଦି ସରକାର ନୀତି ଏବଂ କ୍ରିୟାନ୍ୱୟନ ସ୍ତରରେ ସୁଯୋଗର ଲାଭ ଉଠାଇ ରିସ୍କିଲିଂ ଏବଂ ଅପ୍ ସ୍ଲିଲିଂ ଇକୋସିଷ୍ଟମ୍କୁ ସୁଦୃଢ଼ କରି ଅଧିକରୁ ଅଧିକ ମାନବସମ୍ବଳ ସୃଷ୍ଟି କରିବା ଉପରେ ପ୍ରଧାନ୍ୟ ଦେଉଛନ୍ତି। ଗୁରୁବାର ୱାର୍ଲଡ୍ ଇକୋନୋମିକ୍ ଫୋରମ ପକ୍ଷରୁ ଆୟୋଜିତ ‘ଡାଭୋସ୍ ଏଜେଣ୍ଡା’ର ଆଲୋଚନାଚକ୍ର କାର୍ଯ୍ୟକ୍ରମରେ ଭିଡ଼ିଓ କନଫରେନ୍ସିଂରେ ସାମିଲ୍ ହୋଇ ଏହା କହିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ।
ଡାଭୋସରେ ଅନୁଷ୍ଠିତ ବିଶ୍ବ ଅର୍ଥନୀତି ଫୋରମରେ ପ୍ରଧାନମନ୍ତ୍ରୀ ମୋଦି ଆତ୍ମନିର୍ଭର ଅଭିଯାନ ଜରିଆରେ ସଶକ୍ତ ଭାରତ ନିର୍ମାଣ ନେଇ ମତ ରଖିଛନ୍ତି। ଭିଡିଓ କନଫରେନ୍ସିଂ ଜରିଆରେ ପ୍ରଧାନମନ୍ତ୍ରୀ ବିଭିନ୍ନ ସମସ୍ୟାର ସମାଧାନ ନେଇ ଭାରତର ବଳିଷ୍ଠ ଉଦ୍ୟମ ଓ ଏହାର ସଫଳତା ସମ୍ପର୍କରେ ସବିଶେଷ ତଥ୍ୟ ଉପସ୍ଥାପନ କରିଛନ୍ତି। ବିଶେଷକରି କୋଭିଡ-୧୯ ମହାମାରୀ ସମୟରେ ଭାରତ କିପରି ଭାବେ ଟିକା ପ୍ରସ୍ତୁତ କରିବା ସହ ଅନ୍ୟାନ୍ୟ ଦେଶକୁ ପଠାଇ ମହାମାରୀ ଲଢ଼େଇରେ ନିଜକୁ ସାମିଲ କରିଛି, ତାହା କହିଛନ୍ତି। ୧୨ ଦିନ ତଳେ ଦେଶରେ କୋରୋନା ଟିକାକରଣ ଆରମ୍ଭ ହୋଇଥିଲା ବେଳେ ଆମେ ଏହି ସମୟ ମଧ୍ୟରେ୨୫ ଲକ୍ଷ ସ୍ବାସ୍ଥ୍ୟକର୍ମୀଙ୍କୁ ପ୍ରଥମ ଦଫାରେ ଟିକା ଦେଇ ସାରିଛୁ ବୋଲି କହିଛନ୍ତି। ଦ୍ବିତୀୟ ପର୍ଯ୍ୟାୟ ଟିକାକରଣରେ ୩୦ କୋଟି ଲୋକଙ୍କୁ ଟିକା ଦେବା ପାଇଁ ଲକ୍ଷ୍ୟ ଧାର୍ଯ୍ୟ କରିଛୁ। ଯେଉଁମାନଙ୍କର ବୟସ ୫୦ରୁ ଊର୍ଦ୍ଧ୍ବ କିମ୍ବା ଯେଉଁମାନଙ୍କର ବହୁବିଧ ରୋଗବ୍ୟାଧି ରହିଛି ସେମାନଙ୍କୁ ଟିକା ଦିଆଯିବ ବୋଲି କହିଛନ୍ତି।
ଅଧିକ ଦେଖନ୍ତୁ
