ବାଣିଜ୍ୟ ଓ ଅର୍ଥନୀତି

ଡାଲି ଜାତୀୟ ଶସ୍ୟ ସଂଗ୍ରହ ନିମନ୍ତେ ଚାଷୀଙ୍କ ପଞ୍ଜୀକରଣ
ବୀମା ନବୀକରଣ ପାଇଁ ଉପଭୋକ୍ତାଙ୍କୁ ଅତିରିକ୍ତ ମହଲତ

ବର୍ତ୍ତମାନ ସମୟରେ କୋରୋନା ଭୂତାଣୁଜନିତ ବିଭୀଷିକା ଜାରି ରହିଥିବା ବେଳେ ଜୀବନ ବୀମା କମ୍ପାନୀମାନଙ୍କୁ ସେମାନଙ୍କ ଉପଭୋକ୍ତାଙ୍କୁ ଅତିରିକ୍ତ ମହଲତ ଦେବା ସକାଶେ ବୀମା ନିୟାମକ ଉନ୍ନୟନ ପ୍ରାଧିକରଣ (ଆଇଆର୍‌ଡିଏ) ପକ୍ଷରୁ ନିର୍ଦେଶ ଦିଆଯାଇଛି। କମ୍ପାନୀମାନେ ଅତି କମ୍‌ରେ ନିଜ ନିଜର ଉପଭୋକ୍ତାଙ୍କୁ ୩୦ ଦିନର ମହଲତ ଦେବାକୁ ଏହି ନିର୍ଦେଶନାମାରେ କୁହାଯାଇଛି। କୋରୋନା ଭୂତାଣୁ ତା’ର କାୟା କ୍ରମଶଃ ବୃଦ୍ଧି କରିଚାଲିଥିବାରୁ ଏହାକୁ ନିୟନ୍ତ୍ରଣ କରିବା ସକାଶେ କେନ୍ଦ୍ର ଓ ରାଜ୍ୟ ସରକାର କଠୋର ପଦକ୍ଷେପ ନେଇଛନ୍ତି। ଏହି ପଦକ୍ଷେପ ସ୍ବରୂପ ଅଧିକାଂଶ ରାଜ୍ୟରେ ଏବେ ଲକ୍‌ଡାଉନ୍‌ ଘୋଷଣା କରାଯାଇସାରିଛି। ତେଣୁ ଉପଭୋକ୍ତାମାନଙ୍କୁ ଏପରି ପରିସ୍ଥିତିରେ ଜୀବନ ବୀମା କମ୍ପାନୀମାନେ ସାମାନ୍ୟ ଆଶ୍ବସ୍ତି ଦେବାର ଆବଶ୍ୟକତା ରହିଛି ବୋଲି ଆଇଆର୍‌ଡିଏ ପକ୍ଷରୁ କୁହାଯାଇଛି। ବିଶେଷକରି ସ୍ବାସ୍ଥ୍ୟ ବୀମା ଉପଭୋକ୍ତାଙ୍କୁ ସେମାନଙ୍କ ପଲିସି ନବୀକରଣ ପାଇଁ ଏହି ମହଲତ ଦେବା ସକାଶେ କୁହାଯାଇଛି।

ଭିଡ଼ କମାଇବାକୁ ପ୍ଲାଟ୍‌ଫର୍ମ ଟିକେଟ୍‌ ଦର ବଢ଼ାଇଲା ରେଳବାଇ

କୋରୋନା ଭାଇରସ୍‌ର ବ୍ୟାପକତା ପରିପ୍ରେକ୍ଷୀରେ ଭାରତୀୟ ରେଳବାଇ ପକ୍ଷରୁ ମଙ୍ଗଳବାର ପ୍ଲାଟ୍‌ଫର୍ମ ଟିକେଟ୍‌ର ଦାମ୍‌କୁ ୫୦ ଟଙ୍କାକୁ ବଢ଼ାଇ ଦିଆଯାଇଛି। ପୂର୍ବରୁ ଏହି ଦର ୧୦ ଟଙ୍କା ଥିଲା। ତେବେ କୋରୋନା ଭାଇରସ୍‌ ଉଦ୍‌ବେଗଜନକ ଭାବେ ବ୍ୟାପୁଥିବାରୁ ବିଭିନ୍ନ ଷ୍ଟେସନ୍‌ରେ ଅଯଥା ଭିଡ଼ କମାଇବା ଲକ୍ଷ୍ୟ ନେଇ ରେଳବାଇ ପକ୍ଷରୁ ଏପରି ପଦକ୍ଷେପ ନିଆଯାଇଛି। ଦେଶର ୨୫୦ଟି ଷ୍ଟେସନ୍‌ରେ ଏହି ନୂଆ ଦର ଲାଗୁ ହେବା ନେଇ ରେଳ ମନ୍ତ୍ରାଳୟ ପକ୍ଷରୁ କୁହାଯାଇଛି। ପଶ୍ଚିମତଟ ରେଳବାଇ ପକ୍ଷରୁ ମୁମ୍ବାଇ, ଭଡୋଦରା, ଅହମଦାବାଦ, ରତ୍‌ଲାମ୍‌, ରାଜକୋଟ, ଭାବନଗର ପରି ୬ଟି ଡିଭିଜନ୍‌ରେ ଏହି ଟିକେଟ୍‌ ଦର ବୃଦ୍ଧି କରାଯାଇଛି ବୋଲି କୁହାଯାଇଛି। କିନ୍ତୁ ଏହି ଦର ବୃଦ୍ଧି ସ୍ଥାୟୀ ନୁହେଁ, ସାମୟିକ ଏବଂ ଷ୍ଟେସନ୍‌ରେ କେବଳ ଭିଡ଼ ନିୟନ୍ତ୍ରଣ କରିବା ସକାଶେ ଏକ ପଦକ୍ଷେପ ବୋଲି ଜନୈକ ଅଧିକାରୀ କହିଛନ୍ତି।

ଖୋଲା ରହିବ ନିତି ଦିନିଆ ସାମଗ୍ରୀ ବିକୁଥିବା ଶପିଂ ମଲ୍‌

କୋରୋନା ମହାମାରୀକୁ ମୁକାବିଲା ଲାଗି ତତ୍ପର ହୋଇଛି କମିଶନରେଟ୍‌ ପୋଲିସ୍‌। ଟ୍ବିଟ୍‌ ସିଟି କଟକ ଓ ଭୁବନେଶ୍ବରରେ ସମସ୍ତ ଶପିଂ ମଲ୍‌ରେ କଟକଣା ଲଗାଯାଇଛି। ଆସନ୍ତା ୩୧ ତାରିଖ ପର୍ଯ୍ୟନ୍ତ ବନ୍ଦ ରହିବ ଶପିଂ ମଲ୍‌। ଲୋକଙ୍କ ଅତ୍ୟାବଶ୍ୟକ ଚାହିଦା ପୂରଣ କରିବାକୁ ଖୋଲା ଥିବା ଶପିଂ ମଲ୍‌ ପାଇଁ ଗାଇଡ୍‌ ଲାଇନ୍‌ ଜାରି କରିଛି। ଏସମସ୍ତ ନିୟମ ଆଜିଠୁ କାର୍ଯ୍ୟକାରୀ ହୋଇଛି। ନିତି ଦିନିଆ ସାମଗ୍ରୀ ବିକୁଥିବା ଶପିଂ ମଲ୍‌ ଖୋଲା ରହିବ। ପରିବା, ଫଳ, କ୍ଷୀର, ଗ୍ରୋସରୀ, ମେଡିସିନ୍‌ ଏବଂ ନିତି ଦିନିଆ ସାମଗ୍ରୀ ବିକ୍ରି କରୁଥିବା ମଲ୍‌ଗୁଡ଼ିକ ଏହି ନିୟମରୁ ବାଦ୍‌ ପଡି଼ବେ। ସେମାନେ ପୂର୍ବ ଭଳି ମଲ୍‌ ଖୋଲା ରଖି ଲୋକଙ୍କୁ ଅତ୍ୟାବଶ୍ୟକୀୟ ସାମଗ୍ରୀ ଯୋଗାଇ ଦେବେ। ସେହି ମଲ୍‌ ଗୁଡ଼ିକ କେବଳ ଅତ୍ୟାବଶ୍ୟକ ଜିନିଷ ଗୁଡ଼ିକର ବିଲିଂ କରିବେ। ଉକ୍ତ ମଲ୍‌ରେ ଥିବା ଅନ୍ୟ ଡ୍ରେସ୍‌ କପଡ଼ା ଓ ଅନ୍ୟ ସାମଗ୍ରୀ ବିକି ପାରିବେ ନାହିଁ।

ଅର୍ଥନୀତି ଉପରେ କୋରୋନା ମାଡ଼: ଜି-୨୦ ବିତ୍ତ କମିଟି

ଚୀନ୍‌ରୁ ବ୍ୟାପିବା ଆରମ୍ଭ ହୋଇଥିବା ଘାତକ କୋରେନା ଭାଇରସ୍‌ର ପ୍ରଭାବ ବିଭିନ୍ନ ଦେଶର ଅର୍ଥନୀତି ଉପରେ ପଡ଼ିଛି। ଫଳସ୍ବରୂପ ଷ୍ଟକ୍‌ ବଜାରରେ ନିବେଶକମାନଙ୍କୁ ବ୍ୟାପକ କ୍ଷତି ସହିବାକୁ ପଡ଼ୁଛି। ପ୍ରଭାବିତ ଦେଶମାନଙ୍କର ଆର୍ଥିକ ସ୍ଥିତି କ୍ରମଶଃ ଦୁର୍ବଳ ହେଉଥିବାରୁ ଏହା ଅଣାୟତ୍ତ ପରିସ୍ଥିତିରେ ପହଞ୍ଚିବା ପୂର୍ବରୁ ଏନେଇ ଜି-୨୦ ସଦସ୍ୟ ଦେଶମାନେ ଆଲୋଚନା କରିବାର ଆବଶ୍ୟକତା ରହିଛି। ତେଣୁ ଜି-୨୦ ଦେଶର ଅର୍ଥନୀତି ବିଭାଗ ମୁଖ୍ୟମାନଙ୍କ ମଧ୍ୟରେ ଆଲୋଚନା କରାଯିବା ଜରୁରୀ ବୋଲି ମତ ଦେଇଛନ୍ତି ଅଷ୍ଟ୍ରେଲୀୟ ପ୍ରଧାନମନ୍ତ୍ରୀ ସ୍କଟ୍‌ ମୋରିସନ୍‌। ପୂର୍ବରୁ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏପରି ବୈଠକ ସପକ୍ଷରେ ମତ ଦେଇଥିବା ବେଳେ ରବିବାର ମୋରିସନ୍‌ ତାଙ୍କୁ ସମର୍ଥନ କରିଛନ୍ତି। ଏଥିସହ ମୋରିସନ୍‌ ଯୁକ୍ତରାଜ୍ୟ ପ୍ରଧାନମନ୍ତ୍ରୀ ବୋରିସ୍‌ ଜନ୍‌ସନ୍‌ଙ୍କ ସହ ମଧ୍ୟ ଆଲୋଚନା କରିଛନ୍ତି ଓ ଉଭୟ ବିଭିନ୍ନ ଦେଶର ଅର୍ଥ ବିଭାଗ ମୁଖ୍ୟମାନେ ବୈଠକରେ ମିଳିତ ହେବାର ଆବଶ୍ୟକତା ଉପରେ ଜୋର୍‌ ଦେଇଛନ୍ତି।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ