କୋରୋନା ମହାମାରୀ ପାଇଁ ଏସିଆ କପ କ୍ରିକେଟକୁ ୨୦୨୧ ଜୁନ ପର୍ଯ୍ୟନ୍ତ ସ୍ଥଗିତ କରାଯାଇଛି। ଏସୀୟ କ୍ରିକେଟ ପରିଷଦ ବୈଠକରେ ବିଧିବଦ୍ଧ ଭାବେ ଏସିଆ କପ୍ ସ୍ଥଗିତ ରଖିବା ପାଇଁ ପ୍ରସ୍ଥାବ ପାରିତ ହୋଇଛି। ଆସନ୍ତା ସେପ୍ଟେମ୍ବରରେ ଏସିଆ କପ୍ ଆୟୋଜନ କରିବା ନେଇ ଖେଳସୂଚୀ ସ୍ଥିର ହୋଇଥିଲା। ମାତ୍ର ବର୍ତ୍ତମାନ ସ୍ଥିତିରେ କୋରୋନା ଯେଉଁପରି ଭାବେ କାୟା ମେଲାଇ ଚାଲିଛି, ଏହି ସ୍ଥିତିରେ ଏସିଆ କପ୍ ଆୟୋଜନ ସମ୍ଭବ ନୁହେଁ ବୋଲି ସଦସ୍ୟ ରାଷ୍ଟ୍ରମାନଙ୍କ ମଧ୍ୟରେ ସହମତି ପ୍ରକାଶ ପାଇଛି। ବିମାନ ଯାତ୍ରା କଟକଣା, କ୍ବାରେଣ୍ଟାଇନ ବ୍ୟବସ୍ଥା, କୋରୋନା ସଂକ୍ରମଣ ଆଶଙ୍କା ଏସିଆ କପ ସ୍ଥଗିତ କରିବା ପାଇଁ ଏକପ୍ରକାର ବାଧ୍ୟ କରିଛି ବୋଲି କୁହାଯାଇଛି।
କୋରୋନା ମହାମାରୀ ପାଇଁ ପଡ଼ିଆରୁ ଦୂରେଇ ଯାଇଥିବା କ୍ରିକେଟ ପୁଣି ଥରେ ପ୍ରାୟ ୩ ମାସ ବ୍ୟବଧାନ ପରେ ଆରମ୍ଭ ହୋଇଛି। ବିନା ଦର୍ଶକରେ ୱେଷ୍ଟଇଣ୍ଡିଜ-ଇଂଲଣ୍ଡ ମଧ୍ୟରେ ଟେଷ୍ଟ ମ୍ୟାଚ ଆରମ୍ଭ ହୋଇଛି। ଇଂଲଣ୍ଡ ଗସ୍ତ କରିଥିବା ୱେଷ୍ଟଇଣ୍ଡିଜ ପ୍ରଥମ ଟେଷ୍ଟରେ ପ୍ରଭାବୀ ପ୍ରଦର୍ଶନ ଆରମ୍ଭ କରିଛି। ଦ୍ବିତୀୟ ଦିନ ଖେଳରେ ୱେଷ୍ଟଇଣ୍ଡିଜର ଜେସନ ହୋଲ୍ଡର ଓ ଶେନନ ଗାବ୍ରିଏଲ ଚମତ୍କାର ବୋଲିଂ କରି ଇଂଲଣ୍ଡର ୧୦ଟି ଯାକ ୱିକେଟ ବାଣ୍ଟି ନେଇଛନ୍ତି। ହୋଲ୍ଡରଙ୍କୁ ୬ଟି ୱିକେଟ ମିଳିଥିଲା ବେଳେ ଗାବ୍ରିଏଲଙ୍କୁ ୪ଟି ୱିକେଟ ମିଳିଛି। ଏହି ଦୁଇ ବୋଲରଙ୍କ ପ୍ରଭାବୀ ପ୍ରଦର୍ଶନ ଆଗରେ ସମସ୍ତ ଇଂଲଣ୍ଡ ବ୍ୟାଟ୍ସମ୍ୟାନ ଧରାଶାୟୀ ହୋଇଛନ୍ତି। ଘରୋଇ ଦଳର କେହି ଜଣେ ହେଲେ ବ୍ୟାଟ୍ସମ୍ୟାନ ୫୦ ରନ ଟପି ପାରି ନାହାନ୍ତି। କେବଳ ଅଧିନାୟକ ବେନ୍ ଷ୍ଟୋକ୍ସ କିଛି କ୍ଷଣ ପାଇଁ ପିଚରେ ତିଷ୍ଠି ୪୩ ରନ୍ କରିଥିଲା ବେଳେ ଜୋସ ବଟଲର ୩୫ ଓ ଡମ୍ ବେସ ଅପରାଜିତ ୩୧ ରନ କରିଛନ୍ତି। ଇଂଲଣ୍ଡ ମାତ୍ର ୬୭.୩ ଓଭରରେ ୨୦୪ ରନ୍ କରି ଅଲଆଉଟ ହୋଇଛି।
ଗତ ମାର୍ଚ୍ଚ ଦ୍ବିତୀୟ ସପ୍ତାହରେ ଘରୋଇ ଅଷ୍ଟ୍ରେଲିଆ ନ୍ୟୁଜିଲାଣ୍ଡ୍ ବିପକ୍ଷରେ ବିଜୟରୁ ଦିନିକିଆ ସିରିଜ୍ ଆରମ୍ଭ କରିଥିଲେ ହେଁ ଏହି ସିରିଜ୍ ପୂରଣ ହୋଇପାରି ନ ଥିଲା। କୋରୋନା ସଂକ୍ରମଣ କାରଣରୁ ଏହି ମ୍ୟାଚଟି ବିନା ଦର୍ଶକରେ ବି ଖେଳାଯାଇଥିଲା। ତେବେ ଏହି ଦିନିକିଆ ପରେ କୋରୋନା ସଂକ୍ରମଣ କାରଣରୁ ନ୍ୟୁଜିଲାଣ୍ଡ୍ ସରକାର ଖେଳାଳିମାନଙ୍କୁ ତୁରନ୍ତ ଫେରିବା ସକାଶେ କହିବା ଫଳରେ ସିରିଜ୍ ବାତିଲ୍ ହୋଇଥିଲା। ଏହା ପୂର୍ବରୁ ମଧ୍ୟ ଦକ୍ଷିଣ ଆଫ୍ରିକାର ଭାରତ ବିପକ୍ଷ ସିରିଜ୍ ଖେଳାଯିବା ସମ୍ଭବପର ହୋଇ ନ ଥିଲା। ସେବେଠାରୁ କୋରୋନା କାରଣରୁ ଲକଡାଉନ୍ ପରିପ୍ରେକ୍ଷୀରେ ଖେଳାଳିମାନେ କେବଳ ଇନଡୋର୍ ଅଭ୍ୟାସ ଜାରି ରଖିଥିଲେ। ତେବେ କ୍ରମଶଃ ସ୍ଥିତିରେ ସୁଧାର ଆସୁଥିବାରୁ ଆଇସିସି ପକ୍ଷରୁ କ୍ରିକେଟ୍ ଆରମ୍ଭ କରାଯିବାର ନିଷ୍ପତ୍ତି ନିଆଗଲା। ଇଂଲଣ୍ଡ ଓ ୱେଷ୍ଟ୍ଇଣ୍ଡିଜ୍ ମଧ୍ୟରେ ଜୁନରେ ଆରମ୍ଭ ହେବାକୁ ଥିବା ତିନି ମ୍ୟାଚ୍ ବିଶିଷ୍ଟ ଟେଷ୍ଟ୍ ସିରିଜକୁ ଏଥିପାଇଁ ଚୟନ କରାଯାଇଥିଲା। ସମ୍ପୂର୍ଣ୍ଣ ଭାବେ ବାୟୋ-ସିକ୍ୟୋର୍ ପରିବେଶରେ ସିରିଜ୍ ଖେଳାଯିବାକୁ ନିଷ୍ପତ୍ତି ହେବା ସହ ସମସ୍ତ ପ୍ରକାର ପ୍ରତିଷେଧକମୂଳକ ବ୍ୟବସ୍ଥା ଅନୁସରଣ ନିଷ୍ପତ୍ତି ହୋଇଥିଲା। ତେବେ ଶେଷରେ ୧୧୭ ଦିନର ବ୍ୟବଧାନ ପରେ କ୍ରିକେଟ୍ ପ୍ରେମୀ ଅନ୍ତର୍ଜାତୀୟ ମ୍ୟାଚ୍ ଦେଖିବାର ସୁଯୋଗ ପାଇଛନ୍ତି। ଏଠାକାର ଦ ରୋଜ ବାଉଲଠାରେ ପ୍ରଥମ ଟେଷ୍ଟ୍ ବୁଧବାର ଆରମ୍ଭ ହୋଇଥିବା ବେଳେ ରିପୋର୍ଟ ଲେଖାଯିବା ପର୍ଯ୍ୟନ୍ତ ଇଂଲଣ୍ଡ ଗୋଟିଏ ୱିକେଟ୍ ହରାଇ ୩୪ ରନ୍ କରିଛି।
ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନି ୩୯ତମ ଜନ୍ମ ଦିବସ ପାଳନ କରିଛନ୍ତି। ଏଥିପାଇଁ ତାଙ୍କ କ୍ରିକେଟ ସାଥୀଙ୍କ ମଧ୍ୟରୁ ଶୁଭେଚ୍ଛାର ସୁଅ ଛୁଟିଛି। ତାଙ୍କୁ କିଏ କେଉଁ ପ୍ରକାରେ ମନେ ପକାଇଛନ୍ତି, ତାହାକୁ ନେଇ ସୋସାଲ ମିଡିଆରେ ଶୁଭେଚ୍ଛା ଛାଇ ଯାଇଛି। ବିସିସିଆଇ ଅଧ୍ୟକ୍ଷ ସୌରଭ ଗାଙ୍ଗୁଲି ତାଙ୍କ ଶୁଭେଚ୍ଛା ବାର୍ତ୍ତାରେ ଲେଖିଛନ୍ତି ଯେ ଜଣେ ଶ୍ରେଷ୍ଠ ଫିନିଶର ଭାବେ ବିଶ୍ବ କ୍ରିକେଟ ତାଙ୍କ ଦକ୍ଷତା ଦେଖି ସାରିଛି। ମାତ୍ର ମୋର ମତ, ଯଦି ତାଙ୍କୁ ବ୍ୟାଟିଂ ଅର୍ଡରରେ ଆହୁରି ଆଗୁଆ ପଠାଯାଇଥାନ୍ତା, ତାହେଲେ ସେ ଆହୁରି ଭୟଙ୍କର ସାବ୍ୟସ୍ତ ହୋଇଥାନ୍ତେ।
ସ୍ପିଲବର୍ଗ: ଚଳିତ ୨୦୨୦ ବର୍ଷର ଫର୍ମୁଲା ୱାନ ସିଜନ୍ ମାର୍ଚ୍ଚରେ ଆରମ୍ଭ ହେବାକୁ ଥିଲେ ହେଁ କୋରୋନା ଭୂତାଣୁ ସଂକ୍ରମଣ କାରଣରୁ ଏହା ପାଖାପାଖି ୪ ମାସ ବିଳମ୍ବିତ ହୋଇଛି। ତେବେ ରବିବାର ଅଷ୍ଟ୍ରିଆନ୍ ଗ୍ରାଁ ପ୍ରି ସହ ୨୦୨୦ ଫର୍ମୁଲା ୱାନ ସିଜନ୍ ଆରମ୍ଭ ହୋଇଛି ଓ ଏଥିରେ ମର୍ସିଡିଜର ଫିନଲାଣ୍ଡ ଚାଳକ ଭାଲଟେରୀ ବୋଟ୍ଟାସ୍ ଚାମ୍ପିଅନ୍ ହୋଇଛନ୍ତି। ରବିବାର ଅନୁଷ୍ଠିତ ହୋଇଥିବା ଚୂଡ଼ାନ୍ତ ରେସରେ ପୋଲ୍ ପୋଜିସନରୁ ଆରମ୍ଭ କରିଥିବା ବୋଟ୍ଟାସ୍ ନିଜ ଦଳୀୟ ସାଥୀ ବ୍ରିଟିଶ୍ ଚାଳକ ଲୁଇସ୍ ହାମିଲଟନଙ୍କୁ ପଛରେ ପକାଇଦେଇଛନ୍ତି। ଫରାରି ଚାଳକ ଚାର୍ଲସ ଲେକ୍ଲର୍କ ଦ୍ବିତୀୟ ସ୍ଥାନରେ ରହିଥିବା ବେଳେ ମ୍ୟାକଲରେନ୍-ରେନଲ୍ଟର ବ୍ରିଟିଶ୍ ଚାଳକ ନୋରିସ୍ ମ୍ୟାକଲରେନ ତୃତୀୟ ସ୍ଥାନରେ ରହି ପ୍ରଥମ ଥର ପାଇଁ ପୋଡିୟମ୍ ଦଖଲ କରିପାରିଛନ୍ତି। ସେ ମଧ୍ୟ ଏ କ୍ଷେତ୍ରରେ ବ୍ରିଟେନର ସର୍ବକନିଷ୍ଠ ଚାଳକ ହୋଇପାରିଛନ୍ତି।
କଲମ୍ବୋ: ଶ୍ରୀଲଙ୍କା କ୍ରିକେଟର୍ କୁଶାଲ୍ ମେଣ୍ଡିସଙ୍କ ଗାଡ଼ି ଚକା ତଳେ ଜଣେ ୬୪ ବର୍ଷୀୟ ବୃଦ୍ଧଙ୍କ ଜୀବନ ଯାଇଛି। ଫଳରେ ଏହି ୨୫ ବର୍ଷୀୟ ୱିକେଟକିପର୍-ବ୍ୟାଟ୍ସମାନଙ୍କୁ ସ୍ଥାନୀୟ ପୋଲିସ୍ ଗିରଫ କରିଛି। ରବିବାର ଭୋର୍ ସମୟରେ ମେଣ୍ଡିସ୍ ହୋରେଥୁଡୁୱାଠାରେ ତାଙ୍କ କାର୍ ଯୋଗେ ଯାଉଥିବା ବେଳେ ଜନୈକ ପଥଚାରୀଙ୍କ ଉପରେ କାର୍ ଚଢ଼ାଇ ଦେଇଥିଲେ। କଲମ୍ବୋ ଉପକଣ୍ଠସ୍ଥ ପାନାଦୁରାଠାରେ ଏହି ଦୁର୍ଘଟଣା ଘଟିଥିବା ବେଳେ ବୃଦ୍ଧ ଜଣକ ସାଇକେଲ୍ ଯୋଗେ ଯାଉଥିଲେ। ଉକ୍ତ ବୃଦ୍ଧ ଜଣକ ସ୍ଥାନୀୟ ଅଞ୍ଚଳର ବାସିନ୍ଦା ବୋଲି ଜଣାପଡ଼ିଛି। ଦୁର୍ଘଟଣା ପରେ ତୁରନ୍ତ ଆହତ ବୃଦ୍ଧଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲେ ହେଁ ସେଠାରେ ତାଙ୍କର ମୃତ୍ୟୁ ହୋଇଥିବା ଜଣାପଡ଼ିଛି। ମେଣ୍ଡିସଙ୍କୁ ଗିରଫ ପରେ କୋର୍ଟରେ ହାଜର କରାଯିବ ବୋଲି ସ୍ଥାନୀୟ ପୋଲିସ୍ ପକ୍ଷରୁ କୁହାଯାଇଛି। ତେବେ ଉଭୟ ମେଣ୍ଡିସ୍ ଓ ଦୁର୍ଘଟଣାରେ ଜୀବନ ହରାଇଥିବା ବୃଦ୍ଧ ନିଶାସକ୍ତ ଥିଲେ କି ନାହିଁ, ତା’ର ଯାଞ୍ଚ୍ ଚାଲିଛି।
ଜୁରିକ୍: ସର୍ବିୟାର ଏକ ନମ୍ବର ଟେନିସ୍ ଖେଳାଳି ନୋଭାକ୍ ଜୋକୋଭିଚ୍ ଆଡ୍ରିଆ ଟୁର୍ ଟୁର୍ଣ୍ଣାମେଣ୍ଟର ଆୟୋଜନ କରି କୋରୋନା ଭୂତାଣୁ ସଂକ୍ରମଣର କେନ୍ଦ୍ରବିନ୍ଦୁ ସାଜିବା ସହ ନିଜେ ସଂକ୍ରମିତଙ୍କ ତାଲିକାରେ ରହିଛନ୍ତି। ତାଙ୍କ ବ୍ୟତୀତ ଏହି ପ୍ରତିଯୋଗିତାରେ ଭାଗ ନେଇଥିବା ଆହୁରି ୩ ଜଣ ଖେଳାଳି ମଧ୍ୟ ପଜିଟିଭ୍ ସାବ୍ୟସ୍ତ ହୋଇଛନ୍ତି। ତେବେ ଏହି ପ୍ରତିଯୋଗିତା ସହ ଜଡ଼ିତ ବ୍ୟକ୍ତିବିଶେଷ ସଂକ୍ରମିତଙ୍କ ସୂଚୀରେ ସାମିଲ୍ ହେବା ଧାରା ବନ୍ଦ ହୋଇନାହିଁ। କାରଣ ଶୁକ୍ରବାର ଜୋକୋଭିଚଙ୍କ କୋଚ୍ ତଥା ପୂର୍ବତନ କ୍ରୋଏସିଆ ଟେନିସ୍ ଖେଳାଳି ଗୋରାନ୍ ଇଭାନିସେଭିଚ୍ କୋରୋନା ପଜିଟିଭ୍ ସାବ୍ୟସ୍ତ ହୋଇଛନ୍ତି। ପୂର୍ବରୁ ତାଙ୍କର ନମୁନା ଦୁଇ ଥର ନେଗେଟିଭ୍ ରହିଥିଲେ ହେଁ ୩ୟ ନମୁନାରେ କୋରୋନା ଭୂତାଣୁ ଠାବ କରାଯାଇଥିବା ଏହି ୪୮ ବର୍ଷୀୟ କୋଚ୍ ଇନଷ୍ଟାଗ୍ରାମ୍ ମାଧ୍ୟମରେ ସୂଚନା ଦେଇଛନ୍ତି।
ଟିମ୍ ଇଣ୍ଡିଆର ପୂର୍ବତନ ଅଲରାଉଣ୍ଡର୍ ତଥା ନବେ ଦଶକରେ ଦଳର ଅବିଚ୍ଛେଦ୍ୟ ଅଙ୍ଗ ଭାବେ ବିବେଚିତ ହୋଇଥିବା ରବିନ୍ ସିଂହ ଗୁରୁବାର ଲକଡାଉନ୍ ନିୟମ ଭାଙ୍ଗି ଦଣ୍ଡିତ ହୋଇଛନ୍ତି। ୫୬ ବର୍ଷୀୟ ଏହି ପୂର୍ବତନ ତାମିଲନାଡ଼ୁ ଖେଳାଳି ଗୁରୁବାର ତାଙ୍କ କାର୍ ଯୋଗେ ପନିପରିବା କିଣିବାକୁ ଯାଇଥିବା ବେଳେ ପୋଲିସ୍ ତାଙ୍କ ଉପରେ ୫ ଶହ ଟଙ୍କା ଜରିମାନା କଷିବା ସହ ତାଙ୍କ କାର୍କୁ ଜବତ କରିଛି। ତାମିଲନାଡ଼ୁ ଭାରତର ସର୍ବାଧିକ କୋରୋନା ପ୍ରଭାବିତ ରାଜ୍ୟ ମଧ୍ୟରେ ଅନ୍ୟତମ ଥିବା ବେଳେ କୋରୋନା ଭୂତାଣୁ ସଂକ୍ରମଣ ରୋକିବା ସକାଶେ ଚେନ୍ନାଇ ଓ ଏହାର ଆଖପାଖର ୩ଟି ଜିଲ୍ଲାରେ ଜୁନ୍ ୧୯ରୁ ୩୦ ତାରିଖ ପର୍ଯ୍ୟନ୍ତ କଡ଼ା କଟକଣା ଜାରି ରହିଛି।
ୱାଶିଂଟନ୍: ଚଳିତ ବର୍ଷ ଆସନ୍ତା ସେପ୍ଟେମ୍ବରରେ ଆମେରିକାର ୟାଙ୍କଟନଠାରେ ହେବାକୁ ଥିବା ୱାର୍ଲ୍ଡ ଆର୍ଚେରୀ ଫିଲ୍ଡ ଚାମ୍ପିଅନଶିପକୁ ୨୦୨୨କୁ ଘୁଞ୍ଚାଇ ଦିଆଯାଇଛି। ସାମ୍ପ୍ରତିକ ସମୟରେ ବିଶ୍ବରେ କୋରୋନା ଭୂତାଣୁ ସଂକ୍ରମଣ କାରଣରୁ କୌଣସି ପ୍ରକାର ପ୍ରତିଯୋଗିତା ଆୟୋଜିତ ହେଉନାହିଁ। ଆଗାମୀ ସେପ୍ଟେମ୍ବର ବେଳକୁ କୋରୋନାଜନିତ ସ୍ଥିତିରେ ବିଶେଷ କିଛି ପରିବର୍ତ୍ତନ ଘଟିବାର ଆଶା ନ ଥିବାରୁ ୱାର୍ଲ୍ଡ ଆର୍ଚେରୀ (ଡବ୍ଲ୍ୟୁଏ) ଓ ୟାଙ୍କଟନ୍ ଆୟୋଜକ କମିଟି ମିଳିତ ଭାବେ ଏହାକୁ ଆସନ୍ତା ୨୦୨୨ରେ ଆୟୋଜିତ କରିବା ସକାଶେ ନିଷ୍ପତ୍ତି ନେଇଛନ୍ତି।
ଏବେ ଲକଡାଉନ କଟକଣାରୁ କ୍ରୀଡ଼ାକୁ ବାଦ ଦିଆଯାଇଛି। ତେଣୁ ବର୍ତ୍ତମାନ କ୍ରିକେଟପଡ଼ିଆରେ ଗହଳି ଚହଳି ଆରମ୍ଭ ହୋଇଛି। ପ୍ରାୟ ୨ ମାସ ହେଲା ଘର ଭିତରେ ବନ୍ଦ ରହିଥିବା ଖେଳାଳିମାନେ ଆଉଟଡୋର ଅଭ୍ୟାସ ପାଇଁ ପଦାକୁ ଆସିବା ଆରମ୍ଭ କରିଛନ୍ତି। ଏହାରି ଭିତରେ ଦେଶରେ ସବୁଠାରୁ ଲୋକପ୍ରିୟ କୀଡ଼ା କ୍ରିକେଟକୁ ନେଇ ମଧ୍ୟ ଚର୍ଚ୍ଚା ଆରମ୍ଭ ହୋଇଛି। ପରବର୍ତ୍ତୀ ସିରିଜରେ କେଉଁ ଖେଳାଳିମାନେ ଦଳରେ ସ୍ଥାନ ପାଇବେ ଓ କେଉଁମାନେ ଚୂଡ଼ାନ୍ତ ଏକାଦଶ ବାହାରେ ରହିବେ, ତାହାକୁ ନେଇ ଆଲୋଚନା ପର୍ଯ୍ୟାଲୋଚନା କିଛି ନୂଆ ନୁହେଁ। ବିଶେଷକରି ଭାରତୀୟ ଦଳର ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନିଙ୍କୁ ନେଇ ପୁଣି ଥରେ ଚର୍ଚ୍ଚା ଆରମ୍ଭ ହୋଇଛି।
କ୍ରିକେଟରେ କିଏ ଶ୍ରେଷ୍ଠ, ତାହାର ତୁଳନାତ୍ମକ ବିଶ୍ଲେଷଣ ଏତେ ସହଜ କଥା ନୁହେଁ। କିଏ ଶ୍ରେଷ୍ଠ ଚୟନ କରିବା ଏକ କଷ୍ଟକର ଓ ବିବାଦୀୟ ପ୍ରସଙ୍ଗ। ତଥାପି ଏହାରି ଭିତରେ କେହି କେହି ଏପରି ତୁଳନାତ୍ମକ ମନ୍ତବ୍ୟ ଦେବା ନଜରକୁ ଆସିଥାଏ। ଠିକ ଏହିପରି ଭାବେ କ୍ରିକେଟରରୁ ସାଂସଦ ହୋଇଥିବା ଗୌତମ ଗାମ୍ଭୀର ଏକ ତୁଳନାତ୍ମକ ବିଶ୍ଲେଷଣ ଜରିଆରେ ସଚିନ ତେନ୍ଦୁଲକରଙ୍କୁ ବିରାଟ କୋହଲିଙ୍କ ଠାରୁ ଆଗରେ ରଖିଛନ୍ତି। ତାଙ୍କ କହିବା କଥା ହେଲା ସଚିନ ଯେଉଁପରି ଦୀର୍ଘ ବର୍ଷ ଧରି କ୍ରିକେଟ ପଡ଼ିଆରେ ତିଷ୍ଠି ରହିଲେ ଓ ତାଙ୍କ ସମୟର କ୍ରିକେଟ ନିୟମରେ ସଫଳତା ପାଇଲେ ତାହା ବର୍ତ୍ତମାନର ସ୍ଥିତି ଠାରୁ ନିଆରା। ତେଣୁ ତାଙ୍କ ବିଚାରରେ ବର୍ତ୍ତମାନର ଶ୍ରେଷ୍ଠ ବ୍ୟାଟ୍ସମାନ କୋହଲିଙ୍କ ଠାରୁ ସଚିନ ଆଗରେ।
ଦକ୍ଷିଣ ଆଫ୍ରିକା ଦଳର ବାମହାତୀ ସ୍ପିନର୍ କେଶବ ମହାରାଜ ଦେଶ ପକ୍ଷରୁ ତିନିଟିଯାକ ଫର୍ମାଟରେ ନେତୃତ୍ବ ନେବା ସହ ଆଗାମୀ ଦିନରେ ଦେଶ ପାଇଁ ପ୍ରଥମ ବିଶ୍ବକପ୍ ଜିତିବା ପାଇଁ ବି ଲକ୍ଷ୍ୟ ରଖିଛନ୍ତି ବୋଲି କହିଛନ୍ତି। ବର୍ତ୍ତମାନ ଦକ୍ଷିଣ ଆଫ୍ରିକା ଟେଷ୍ଟ୍ ଦଳର ନେତୃତ୍ବ କାହାକୁ ଦିଆଯିବ, ସେନେଇ କ୍ରିକେଟ୍ ସାଉଥ୍ ଆଫ୍ରିକା (ସିଏସଏ) କୌଣସି ନିଷ୍ପତ୍ତି ନେଇ ନ ଥିବା ବେଳେ ଏହି ଦାୟିତ୍ବ ମହାରାଜଙ୍କୁ ମିଳିବାର ସମ୍ଭାବନା ରହିଛି। ଚଳିତ ସିଜନରେ ମହାରାଜ ଡଲଫିନ୍ସ ଦଳର ନେତୃତ୍ବ ନେଇଥିବା ବେଳେ ତାଙ୍କ ଦଳ ୱାନଡେ କପରେ ଚାମ୍ପିଅନ୍ ଘୋଷିତ ହୋଇଛି। ସିଏସ୍ଏ ପକ୍ଷରୁ ଆାୟୋଜିତ ହେଉଥିବା ଏହି ଟୁର୍ଣ୍ଣାମେଣ୍ଟ୍ କରୋନା ଭୂତାଣୁ ସଂକ୍ରମଣ କାରଣରୁ ଅଧାରୁ ବାତିଲ୍ ହୋଇଥିବାରୁ ଉନ୍ନତ ପ୍ରଦର୍ଶନ ଆଧାରରେ ଡଲଫିନ୍ସ ଟାଇଟଲ୍ ଜିତିଛି।
ପାକିସ୍ତାନ ମହିଳା କ୍ରିକେଟ୍ ଟିମ୍ର ପୂର୍ବତନ ଅଧିନାୟିକା ତଥା ଅଫ୍ସ୍ପିନର୍ ସାନା ମୀର୍ ଶନିବାର ତାଙ୍କ ଅନ୍ତର୍ଜାତୀୟ କ୍ୟାରିଅର୍ରେ ପୂର୍ଣ୍ଣଚ୍ଛେଦ ଟାଣିଛନ୍ତି। ଏଥିସହ ଏହି ୩୪ ବର୍ଷୀୟା ଖେଳାଳିଙ୍କ ୧୫ ବର୍ଷର ଲମ୍ବା ଅନ୍ତର୍ଜାତୀୟ କ୍ୟାରିଅର୍ ଶେଷ ହୋଇଛି। ସାନା ତାଙ୍କ ଅନ୍ତର୍ଜାତୀୟ କ୍ୟାରିଅର୍ରେ୨୬ଟି ଦିନିକିଆ ଖେଳିଥିବା ବେଳେ ସେଥି ମଧ୍ୟରୁ ୧୩୭ଟିରେ ସେ ଦଳର ନେତୃତ୍ୱ ନେଇଥିଲେ। ଗତ ୨୦୦୯ରୁ ୨୦୧୭ ପର୍ଯ୍ୟନ୍ତ ସେ ପାକିସ୍ତାନ ଦଳର ଅଧିନାୟିକା ରହିଥିଲେ।
କୋରୋନା ଭୂତାଣୁ ସଂକ୍ରମଣ କାରଣରୁ ସମସ୍ତ ପ୍ରକାର କ୍ରୀଡ଼ା ପ୍ରତିଯୋଗିତା ବାତିଲ୍ ହୋଇସାରିଥିବା ବେଳେ ଖେଳାଳିମାନେ କେବେ ପଡ଼ିଆକୁ ଫେରିବେ, ସେଥିନେଇ ଏବେ କୌଣସି ପ୍ରକାର ଭବିଷ୍ୟବାଣୀ କରିବା କଷ୍ଟସାଧ୍ୟ ବ୍ୟାପାର। କିନ୍ତୁ ବେଶୀଦିନ କ୍ରୀଡ଼ା ଇଭେଣ୍ଟ୍ ବାତିଲ୍ ରହିଲେ, ଏହା ଉପରେ ନିର୍ଭରଶୀଳ ଥିବା ଖେଳାଳି ଓ ବୋର୍ଡ ପାଇଁ ସେମାନଙ୍କ ସ୍ଥିତି ବଜାୟ ରଖିବା ଦୁରୂହ ବ୍ୟାପାର ହୋଇପଡ଼ିବ। ଏପରି ସ୍ଥିତିରେ କ୍ରିକେଟ୍ ପରି ଲୋକପ୍ରିୟ ଖେଳ ବି ବିନା ଦର୍ଶକରେ ଜାରି ରହିବା ସପକ୍ଷରେ କେତେକ ଖେଳାଳି ଓ ବିଶେଷଜ୍ଞ ମତ ବାଢ଼ିଛନ୍ତି। ସାମାଜିକ ଦୂରତା ନିୟମ ବଜାୟ ରଖି ଫାଙ୍କା ଷ୍ଟାଡିୟମ୍ରେ ମ୍ୟାଚ୍ର ଆୟୋଜନ କରି ପୁନର୍ବାର ସ୍ଥିତି ସ୍ବାଭାବିକ କରିବା ସକାଶେ ସେମାନେ ମତ ଦେଉଛନ୍ତି। ଷ୍ଟାଡିୟମ୍ରେ ପ୍ରତ୍ୟକ୍ଷ ଭାବେ ନ ହେଲେ ମଧ୍ୟ ଦର୍ଶକମାନେ ମ୍ୟାଚ୍ର ମଜା ଟିଭି ପରଦାରେ ବି ଉଠାଇପାରିବେ ବୋଲି ସେମାନଙ୍କ ମତ। କିନ୍ତୁ ଭାରତର ମହାନ୍ କ୍ରିକେଟର୍ ତଥା ମାଷ୍ଟରବ୍ଲାଷ୍ଟର୍ ଭାବେ ପରିଚିତ ସଚିନ୍ ତେନ୍ଦୁଲକର ଏପରି ଏକ ପ୍ରସ୍ତାବ ସହ ଆଦୌ ଏକମତ ହୋଇ ପାରିନାହାନ୍ତି। ତାଙ୍କ କହିବା କଥା ଯେ ଖାଲି ଷ୍ଟାଡିୟମ୍ କୌଣସି ଖେଳାଳି ପାଇଁ ନିଶ୍ଚିତ ଭାବେ ଏକ ବିଡ଼ମ୍ବିତ ଦୃଶ୍ୟ। ଏହାଦ୍ୱାରା ଖେଳାଳିମାନେ ଆଦୌ ପ୍ରୋତ୍ସାହିତ ହୋଇପାରିବେ ନାହିଁ। ସେମାନଙ୍କ ମନୋବଳ ବଢ଼ାଇବା ସକାଶେ ଦର୍ଶକଙ୍କ ଅନୁପସ୍ଥିତି ମ୍ୟାଚ୍ରେ ରୋମାଞ୍ଚ ମଧ୍ୟ ନଷ୍ଟ କରିବ। ମ୍ୟାଚ୍ର ଅଧିକାଂଶ ସମୟରେ ଖେଳାଳିମାନେ ଦର୍ଶକଙ୍କ ପାଇଁ ଭଲ ପ୍ରଦର୍ଶନ କରିବା ସକାଶେ ଆଗଭର ହୋଇଥାନ୍ତି। ଯଦି ଜଣେ ବ୍ୟାଟ୍ସମ୍ୟାନ୍ ଭଲ ଶଟ୍ଟିଏ ମାରେ, ତା’ହେଲେ ଦର୍ଶକଙ୍କ କରତାଳି ତାକୁ ଆହୁରି ଅଧିକ ଭଲ ପ୍ରଦର୍ଶନ କରିବାକୁ ପ୍ରୋତ୍ସାହିତ କରିଥାଏ।
ସାମ୍ପ୍ରତିକ ସମୟରେ କୋଭିଡ୍-୧୯ ଭୂତାଣୁ ସମସ୍ତ ପ୍ରକାର କାର୍ଯ୍ୟକ୍ରମରେ ରୋକ ଲଗାଇଥିବା ବେଳେ ପ୍ରମୁଖ ଟୁର୍ଣ୍ଣାମେଣ୍ଟ୍ ଭାବେ ଆଇପିଏଲର ଆୟୋଜନ ଉପରେ ଯଥେଷ୍ଟ ସଂଶୟ ରହିଛି। ଏହି ପ୍ରତିଯୋଗିତା ଗତ ମାର୍ଚ୍ଚ ୨୯ରେ ଆରମ୍ଭ ହେବାକୁ ଥିଲେ ହେଁ ବିସିସିଆଇ ଏହାକୁ ଏପ୍ରିଲ୍ ୧୫ରେ ଆରମ୍ଭ କରିବା ନେଇ ଯୋଜନା କରିଥିଲା। କିନ୍ତୁ ଅଦ୍ୟାବଧି ଏହି ଲୋକପ୍ରିୟ କ୍ରିକେଟ୍ ଲିଗ୍ ଆରମ୍ଭ ହୋଇପାରିନାହିଁ। ତେବେ କୋଭିଡ୍-୧୯ ଯେ କେବଳ କ୍ରୀଡ଼ା ଇଭେଣ୍ଟକୁ ପ୍ରଭାବିତ କରିଛି ତା’ ନୁହେଁ, ଏହା କ୍ରିକେଟରଙ୍କ ବିବାହ କାର୍ଯ୍ୟକ୍ରମକୁ ମଧ୍ୟ ଘୁଞ୍ଚାଇବା ପାଇଁ ବାଧ୍ୟ କରିଛି। ନିକଟରେ ବିଦର୍ଭ କ୍ରିକେଟ୍ ଦଳର ତିନି ଜଣ ପ୍ରମୁଖ ସଦସ୍ୟ ଅଲ୍ରାଉଣ୍ଡର୍ ଆଦିତ୍ୟ ସରବତେ, ୱିକେଟ୍କିପର୍-ବ୍ୟାଟ୍ସମାନ୍ ଅକ୍ଷୟ ୱାଦକର୍ ଓ ପେସର୍ ରଜନୀଶ ଗୁର୍ବାନୀ ସେମାନଙ୍କ ବିବାହ କାର୍ଯ୍ୟକ୍ରମକୁ ଘୁଞ୍ଚାଇ ଦେଇଛନ୍ତି।
ଅଧିକ ଦେଖନ୍ତୁ
