ବାଦ ବିବାଦ

ଚାଷୀଙ୍କୁ ନେଇ ପୁଣି ବିଜେପି-ବିଜେଡି ମୁହାଁମୁହିଁ

ଚାଷୀ ପ୍ରସଙ୍ଗକୁ କେନ୍ଦ୍ରକରି ପୁଣିଥରେ ମୁହାଁମୁହିଁ ହୋଇଛନ୍ତି ବିଜେପି ଓ ବିଜେଡି। ଗତ ଦୁଇଦିନ ତଳେ ରାଜ୍ୟରେ ବଳକା ଉଷୁନା ଚାଉଳକୁ ନେଇ ଉଭୟ ଦଳ ମଧ୍ୟରେ ଆରୋପ ଓ ପ୍ରତ୍ୟାରୋପ ହୋଇଥିବା ବେଳେ ଆଜି ମଧ୍ୟ ପୁଣିଥରେ ସମାନ ପରିସ୍ଥିତି ଉପୁଜିଛି। ଉଭୟ ଦଳ ସାମ୍ବାଦିକ ସମ୍ମିଳନୀ କରି ଚାଷୀ ପ୍ରସଙ୍ଗରେ ଉଭୟ ଉଭୟଙ୍କୁ ଦୋଷାରୋପ କରିଛନ୍ତି। ରାଜ୍ୟ ସରକାରଙ୍କ ଚାଷୀ ବିରୋଧୀ ନୀତି ବିରୋଧରେ ଗୁରୁବାର ସମ୍ବଲପୁର ଆର୍‌ଡିସି ଅଫିସ୍‌ ଘେରାଉ କରିବ ବୋଲି ବିଜେପି ଘୋଷଣା କରିଥିବା ବେଳେ ଏହାର ଜବାବ ରଖିଛି ବିଜେଡି। କେନ୍ଦ୍ରର କୃଷି ଆଇନକୁ ନେଇ ହେଉଥିବା ଦେଶବ୍ୟାପି ବିରୋଧରୁ ନଜର ହଟାଇବା ପାଇଁ ରାଜ୍ୟ ବିଜେପି ଏବେ ଧାନ ସଂଗ୍ରହର ଆଳ ଦେଖାଇ ଆରଡିସି ଅଫିସ୍ ଘେରିବା ନାଟକ କରୁଥିବା ବିଜେଡି କହିଛି।

ସୀମା ବିବାଦ: ସୀମାନ୍ତ ଗ୍ରାମରେ ସ୍ଥିତି ପରଖିବ ଗୃହ କମିଟି

ସୀମା ଲଙ୍ଘୁଛନ୍ତି ପଡ଼ୋଶୀ। ଓଡ଼ିଶା ସମୀକୁ ଲାଗି ରହିଥିବା ରାଜ୍ୟଗୁଡ଼ିକ ମଧ୍ୟରେ ବହୁ ଦିନ ଧରି ସୀମା ବିବାଦ ଲାଗି ରହିଛି। ଆନ୍ଧ୍ର, ଛତିଶଗଡ଼, ପଶ୍ଚିମବଙ୍ଗ ସରକାର ବିଭିନ୍ନ ସମୟରେ ଓଡ଼ିଶାର ସୀମା ଭିତରକୁ ପଶି ସୀମାବର୍ତ୍ତୀ ଗାଁ ଉପରେ କବଜା କରି ପ୍ରଭୁତ୍ବ ଜାରି କରୁଛନ୍ତି। ବିଭିନ୍ନ ପ୍ରକାର ସରକାରୀ ସହାୟତା ଠାରୁ ଆରମ୍ଭ କରି ବିଭିନ୍ନ ପ୍ରକାର ଯୋଜନାର ଲୋଭ ଦେଖାଇ ନିଜ ଆଡ଼କୁ ଆକର୍ଷିତ କରିବାକୁ ଚେଷ୍ଟା କରୁଛନ୍ତି। ଯାହାର ସମାଧାନ କରିବା ପାଇଁ ଓଡ଼ିଶା ସରକାରଙ୍କ ପକ୍ଷରୁ ଆରମ୍ଭ ହୋଇଛି ଉଦ୍ୟମ। ବାଚସ୍ପତି ସୂର୍ଯ୍ୟନାରାୟଣ ପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ପଡ଼ୋଶୀ ରାଜ୍ୟ ସହ ଲାଗି ରହିଥିବା ସୀମା ବିବାଦ ଉପରେ ବିଶାଦ ଆଲୋଚନା ହୋଇଛି। ଏଥିସହ ସୀମାନ୍ତ ଗ୍ରାମ ଗୁଡ଼ିକରେ ବାସ୍ତବ ସମସ୍ୟା ଉପରେ ଅବଗତ ହେବା ପାଇଁ ଗୃହ କମିଟି ସୀମା ବିବାଦ ଥିବା କୋଟିଆ ଗ୍ରାମପୁଞ୍ଜ ସହ ଅନ୍ୟାନ୍ୟ ଅଞ୍ଚଳ ଗସ୍ତ କରିବା ନେଇ ଗୃହ କମିଟି ବୈଠକରେ ନିଷ୍ପତ୍ତି ହୋଇଛି। ଗୃହ କମିଟିର ପରବର୍ତ୍ତୀ ବୈଠକରେ ରାଜସ୍ୱ ଆଇନ, ଗୃହ ଏବଂ ପଞ୍ଚାୟତିରାଜ ବିଭାଗର ସଚିବମାନେ ଯୋଗଦେଇ ସମ୍ପୃକ୍ତ ଅଞ୍ଚଳରେ କିଭଳି ବିକାଶ ପ୍ରକ୍ରିୟାକୁ ତ୍ୱରାନ୍ୱିତ ହୋଇଛି, ସେ ସମ୍ପର୍କରେ ଗୃହ କମିଟିକୁ ଅବଗତ କରିବେ।

ସରକାର-ଚାଷୀ ଦଶମ ପର୍ୟ୍ୟାୟ ଆଲୋଚନା ବିଫଳ, ପୁଣି ୨୨ରେ ଆଲୋଚନା

ଦୁଇ ମାସ ଧରି ଆନ୍ଦୋଳନରତ କୃଷକ ସଂଗଠନ ଓ କେନ୍ଦ୍ର ସରକାରଙ୍କ ମଧ୍ୟରେ ବୁଧବାର ଦଶମ ପର୍ୟ୍ୟାୟ ବୈଠକ ପୂର୍ବପରି ବିଫଳତାର ସହିତ ଶେଷ ହୋଇଛି। ବୈଠକରେ ଦୁଇ ପକ୍ଷ ନିଜ ନିଜ ଜିଦରେ ଅଟଳ ରହିବାରୁ କୌଣସି ସମାଧାନ ରାସ୍ତା ବାହାରିପାରି ନାହିଁ। ସରକାରଙ୍କ ପକ୍ଷରୁ ଆଇନରେ କେତେକ ସଂଶୋଧନ ପାଇଁ ପ୍ରସ୍ତାବ ଦିଆଯାଇଥିଲେ ମଧ୍ୟ ଏହାକୁ ଅଗ୍ରାହ୍ୟ କରି କୃଷକ ନେତାମାନେ ନୂଆ କୃଷି ଆଇନର ପ୍ରତ୍ୟାହାର ପାଇଁ ଅଡ଼ି ବସିଥିଲେ। ସବୁଠୁ ଗୁରୁତ୍ବପୂର୍ଣ୍ଣ ହେଉଛି; ଚାଷୀଙ୍କୁ ଆନ୍ଦୋଳନରୁ ହଟାଇବା ପାଇଁ ବର୍ଷେ ବା ଦେଢ଼ ବର୍ଷ ପର୍ୟ୍ୟନ୍ତ ଆଇନର କାର୍ୟ୍ୟକାରିତାକୁ ସ୍ଥଗିତ ରଖିବା ପାଇଁ ପ୍ରସ୍ତାବ ସରକାର ଦେଇଥିଲେ। ଏ ସମ୍ପର୍କରେ ସୁପ୍ରିମକୋର୍ଟରେ ସତ୍ୟପାଠ ଦାଖଲ କରାଯିବ ବୋଲି ସରକାର କହିଥିଲେ। ଏତଦ୍‌ବ୍ୟତୀତ ଆଇନ ଉପରେ ବିଚାରବିମର୍ଶ ପାଇଁ ଏକ ସାନି ସ୍ବତନ୍ତ୍ର କମିଟି ଗଠନ କରିବାକୁ ସରକାର କହିଥିଲେ। କିନ୍ତୁ କୃଷକ ନେତାମାନେ ଏହାକୁ ଗ୍ରହଣ କରି ନ ଥିଲେ। ଏହା ଉପରେ ପରବର୍ତ୍ତୀ ସମୟରେ ବିଚାର କରାଯିବ ବୋଲି ସେମାନେ କହିବାରୁ ପୁନର୍ବାର ଆଲୋଚନା ପାଇଁ ଆସନ୍ତା ୨୨ ତାରିଖ ଧାର୍ୟ୍ୟ କରାଯାଇଛି।

ସୁପ୍ରିମ୍‌କୋର୍ଟରେ ଆତ୍ମଘୋଷିତ ଆଧ୍ୟାତ୍ମିକ ଗୁରୁଙ୍କ ଆଶ୍ରମ ବିରୋଧରେ କାର୍ଯ୍ୟାନୁଷ୍ଠାନ ଯାଚିକା ଖାରଜ

ଆତ୍ମଘୋଷିତ ଆଧ୍ୟାତ୍ମିକ ଗୁରୁମାନଙ୍କ ଦ୍ୱାରା ପରିଚାଳିତ ଆଶ୍ରମଗୁଡ଼ିକ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସୁପ୍ରିମ୍‌କୋର୍ଟ ବୁଧବାର ମନା କରିଦେଇଛନ୍ତି। ଆତ୍ମଘୋଷିତ ଆଧ୍ୟାତ୍ମିକ ଗୁରୁମାନଙ୍କ ଆଶ୍ରମଗୁଡ଼ିକରେ ମହିଳା ଭକ୍ତ ତଥା ଅନ୍ତେବାସୀଙ୍କୁ ବନ୍ଦୀ କରି ରଖା ଯାଉଥିବା ଅଭିଯୋଗ କରି ଏହା ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଆବେଦନ କରି ସୁପ୍ରିମ୍‌କୋର୍ଟରେ ଏକ ଯାଚିକା ଆଗତ ହୋଇଥିଲା। ସୁପ୍ରିମ୍‌କୋର୍ଟର ପ୍ରଧାନ ବିଚାରପତି ଜଷ୍ଟିସ୍‌ ଏସ୍‌ ଏ ବବଡେଙ୍କ ଅଧ୍ୟକ୍ଷତାରେ ଗଠିତ ଏକ ଖଣ୍ଡପୀଠ ବୁଧବାର ଏହି ଯାଚିକାର ଶୁଣାଣି କାଳରେ କହିଛନ୍ତି ଯେ କୋର୍ଟ ଏଭଳି ଯାଚିକାର ଶୁଣାଣି କରିପାରିବ ନାହିଁ। କୋର୍ଟଙ୍କ ଏପରି ମନ୍ତବ୍ୟ ପରେ ଆବେଦନକାରୀ ଆଗତ କରିଥିବା ଯାଚିକାକୁ ପ୍ରତ୍ୟାହାର କରି ନେଇଛନ୍ତି। ମାମଲାର ଶୁଣାଣି କରୁଥିବା ଖଣ୍ଡପୀଠ କହଥିଲେ ଏପରି ଯାଚିକା ଶୁଣାଣି ପାଇଁ ତାଲିକା ମଧ୍ୟକୁ କିପରି ଆସିଲା? ଯାଚିକାକୁ ଶୁଣିବା ପରେ ତାଲିକା ପ୍ରସ୍ତୁତ ହୋଇଛି କି ନାହିଁ ଆମେ ଜାଣିନାହୁଁ।

ଅଶାନ୍ତ ବାଣୀବିହାର: କୁଳପତିଙ୍କ ଅଫିସ୍ ଘେରିଲେ ଛାତ୍ର

ଅଶାନ୍ତ ହୋଇ ପଡ଼ିଛି ଉତ୍କଳ ବିଶ୍ବବିଦ୍ୟାଳୟ କ୍ୟାମ୍ପସ୍‌। କ୍ୟାଣ୍ଟିନ୍‌ରେ ଦିଆଯାଉଥିବା ନିମ୍ନମାନର ଖାଦ୍ୟକୁ ନେଇ ଦୁଇ ଛାତ୍ର ଗୋଷ୍ଠୀ ମୁହାଁମୁହିଁ ହୋଇଛନ୍ତି। ଗତକାଲି ରାତିରେ ଏହି ଗୋଷ୍ଠୀ ସଂଘର୍ଷ ହୋଇଥିବାବେଳେ ଆଜି କୁଳପତିଙ୍କ ଅଫିସ୍ ଘେରାଉ କରିଛନ୍ତି କେତେକ ଛାତ୍ର। ଗତକାଲି ହୋଇଥିବା ଗଣ୍ଡଗୋଳ ଘଟଣାରେ କାର୍ଯ୍ୟାନୁଷ୍ଠାନ ଦାବିରେ ଉତ୍ତ୍ୟକ୍ତ ଛାତ୍ରମାନେ କୁଳପତିଙ୍କ କାର୍ଯ୍ୟାଳୟ ଘେରାଉ କରିଛନ୍ତି। ଅନ୍ୟପକ୍ଷରେ କ୍ୟାମ୍ପସ୍‌ରେ ଶାନ୍ତି ଫେରାଇବା ନେଇ ପୋଲିସ୍‌ କମିଶନରଙ୍କୁ ଭେଟିଛନ୍ତି କୁଳପତି। ପରିସ୍ଥିତି ନେଇ ପୋଲିସ୍‌ କମିଶନରଙ୍କୁ ଅବଗତ କରାଇଛନ୍ତି। ଏହାସହ କ୍ୟାମ୍ପସରେ ଶାନ୍ତି ଫେରାଇ ଆଣିବା ନେଇ ସୌଜନ୍ୟମୂଳକ ଆଲୋଚନା ହୋଇଥିବା କୁଳପତି ସବିତା ଆଚାର୍ଯ୍ୟ କହିଛନ୍ତି। ଚାପା ଉତ୍ତେଜନା ଲାଗି ରହିଥିବାରୁ ବାଣୀବିହାରରେ ୨ ପ୍ଲାଟୁନ ପୋଲିସ୍‌ ଫୋର୍ସ ମୁତୟନ କରାଯାଇଛି।

୬ ଏନସିପି ନେତାଙ୍କ ବିରୋଧରେ ବିଜେପି ନେତା ଆଣିଲେ ଧମକ ଅଭିଯୋଗ

ମହାରାଷ୍ଟ୍ର ଏନସିପିର ୬ ଜଣ ନେତାଙ୍କ ବିରୋଧରେ ବିଜେପିର ଜନୈକ ନେତା ଧମକ ଅଭିଯୋଗ ଆଣିଛନ୍ତି। ମହାରାଷ୍ଟ୍ର ମନ୍ତ୍ରିମଣ୍ଡଳର ଅନ୍ୟତମ ସଦସ୍ୟ ଧନଞ୍ଜୟ ମୁଣ୍ଡେଙ୍କ ବିରୋଧରେ ଜନୈକା ମହିଳା ଦୁଷ୍କର୍ମ ଅଭିଯୋଗ ଆଣିଥିବା ବେଳେ ଏହି ପ୍ରସଙ୍ଗରେ ସେ ମୁହଁ ଖୋଲିବାରୁ ତାଙ୍କୁ ଏନସିପି ନେତାମାନେ ଧମକ ଦେଇଥିବା ବିଜେପି ସାଂସଦ କିରିଟ୍ ସୋମୈୟା ଅଭିଯୋଗ କରିଛନ୍ତି। ସୋମବାର ସୋମୈୟା ଟ୍ବିଟ୍ କରି ଏପରି ଅଭିଯୋଗ ଆଣିଛନ୍ତି। ଆଗାମୀ ଦିନରେ ସେ ପୁଣିଥରେ ମୁଣ୍ଡେଙ୍କ ବିରୋଧରେ କୌଣସି ପ୍ରକାର ମନ୍ତବ୍ୟ ଦେଲେ, ତାଙ୍କୁ ସେମାନେ ଗୁଳି କରିଦେବେ ବୋଲି ଧମକ ଦେଇଥିବା ସୋମୈୟା କହିଛନ୍ତି। ସେ କହିଛନ୍ତି ଯେ ଏନସିପିର ୬ ଜଣ ନେତା ତାଙ୍କୁ ଏପରି ଧମକ ଦେଇଛନ୍ତି। ଅବଶ୍ୟ ସେ କୌଣସି ପ୍ରକାର ଧମକକୁ ଆଦୌ ଭୟ କରନ୍ତି ନାହିଁ। ମୁଣ୍ଡେଙ୍କ ବିରୋଧରେ ଗୁରୁତର ଅଭିଯୋଗ ଆସିଥିବାରୁ ତାଙ୍କୁ ନିଶ୍ଚିତ ଭାବେ ଇସ୍ତଫା ଦେବାକୁ ପଡ଼ିବ ବୋଲି ସୋମୈୟା କହିଛନ୍ତି। ପୂର୍ବରୁ ଏହି ବିଜେପି ନେତା ଜଣକ ନିର୍ବାଚନ କମିଶନଙ୍କୁ ଏକ ଚିଠି ଲେଖିଥିଲେ, ଯେଉଁଥିରେ ମୁଣ୍ଡେ ନିର୍ବାଚନ ବେଳେ ଦାଖଲ କରିଥିବା ସତ୍ୟପାଠରେ ତାଙ୍କ ପୁତ୍ର ଓ କନ୍ୟାଙ୍କ ସମ୍ପର୍କରେ ସୂଚନା ଦେଇ ନ ଥିବା ଅଭିଯୋଗ ଆଣିଥିଲେ।

ଔରଙ୍ଗାବାଦର ନାମ ପରିବର୍ତ୍ତନକୁ ନେଇ କଂଗ୍ରେସ-ଶିବସେନା ମୁହାଁମୁହିଁ

ମହାରାଷ୍ଟ୍ରରେ ଶିବସେନା ଓ କଂଗ୍ରେସ ମିଳିତ ଭାବେ ମହ ବିକାଶ ଆଘାଡୀ ସରକାର ଚଳାଉଥିଲା ବେଳେ ଔରଙ୍ଗାବାଦ ସହରର ନାମ ପରିବର୍ତ୍ତନକୁ ନେଇ ସାମ୍ନାସାମ୍ନି ହୋଇଛନ୍ତି। ଔରଙ୍ଗାବାଦ ନାମକରଣ ଧର୍ମ ନିରପେକ୍ଷ ନୁହେଁ ବୋଲି ଶିବସେନା ପକ୍ଷରୁ ମୁଖପାତ୍ର ସାମନା ଜରିଆରେ କୁହାଯାଇଛି। ସେହିପରି ଏହା ଜଣେ ନିଷ୍ଠୁର ଓ ଧର୍ମାନ୍ଧ ଶାସକଙ୍କ ନାଁ ଅନୁସାରେ କରାଯାଇଥିଲା ବୋଲି ସାମନାର ସମ୍ପାଦକୀୟରେ ଶିବସେନାର ବରିଷ୍ଠ ନେତା ତଥା ମୁଖପାତ୍ର ସଞ୍ଜୟ ରାଉତ ଲେଖିଛନ୍ତି। ଯାହାକୁ ନେଇ ଶିବସେନା ଓ କଂଗ୍ରେସ ନେତାଙ୍କ ମଧ୍ୟ ତୁ ତୁ ମେଁ ମେଁ ସାମ୍ନାକୁ ଆସିଛି। କଂଗ୍ରେସ ଏହାର ଜବାବ ଦେଇ କହିଛି, ଯେତେବେଳେ ରାଜ୍ୟରେ ବିଜେପି-ଶିବେସନା ମିଳିତ ଭାବେ ଶାସନ କରୁଥିଲେ ନାମକରଣ ନେଇ କାହିଁକି ନିଷ୍ପତ୍ତି ନେଲେ ନାହିଁ।

କୃଷି ଆଇନକୁ ନେଇ ଚାଷୀ-ସରକାର ତୁ ତୁ ମେଁ ମେଁ ଜାରି

କୃଷି ଆଇନକୁ ନେଇ ଚାଷୀ ସଂଗଠନ ଓ ସରକାରଙ୍କ ମଧ୍ୟରେ ତୁ ତୁ ମେଁ ମେଁ ଜାରି ରହିଛି। କେହି କାହା ଜିଦରୁ ଓହରିବାକୁ ରାଜି ନ ଥିଲା ବେଳେ ଆସନ୍ତା ୧୯ରେ ଦୁଇ ପକ୍ଷଙ୍କ ମଧ୍ୟରେ ଦଶମ ପର୍ଯ୍ୟାୟ ଆଲୋଚନା ହେବାକୁ ଯାଉଛି। ମାତ୍ର ଆଲୋଚନାରୁ ସୁଫଳ ମିଳିବା ଆଶା କ୍ଷୀଣ ରହିଛି। କାରଣ ସରକାର ଓ ଚାଷୀ ସଂଗଠନ ସେମାନଙ୍କ ଜିଦରୁ ଓହରୁ ନାହାନ୍ତି। ଏଥିସହ ଉଭୟ ପକ୍ଷଙ୍କ ମଧ୍ୟରେ ବୟାନବାଜି ମଧ୍ୟ ଜାରି ରହିଛି। କୃଷି ମନ୍ତ୍ରୀ ନରେନ୍ଦ୍ର ସିଂ ତୋମର ଚାଷୀ ସଂଗଠନକୁ ପୁଣି ଥରେ ଖୋଲା ମନ ନେଇ କ୍ଲଜ ବାଇ କ୍ଲଜ ଆଲୋଚନା କରିବା ପାଇଁ ଆଗେଇ ଆସିବା ସକାଶେ ନିବେଦନ କରିଛନ୍ତି। ଅନ୍ୟପକ୍ଷରେ ଚାଷୀ ସଂଗଠନ ସେମାନଙ୍କର ପୁରୁଣା ଦାବି ଏମଏସପି ପାଇଁ ଲିଗାଲ ଗ୍ୟାରେଣ୍ଟି ଓ ପ୍ରଣୟନ ହୋଇଥିବା ୩ କୃଷି ଆଇନ ପ୍ରତ୍ୟାହାର ଦାବିରୁ ନ ଓହରିବା ଆସନ୍ତା ୧୯ ତାରିଖ ଆଲୋଚନାରୁ ସୁଫଳ ମିଳିବା ସମ୍ଭାବନାକୁ କ୍ଷୀଣ କରିଛି।

ସାଧାରଣତନ୍ତ୍ର ଦିବସରେ ଟ୍ରାକ୍ଟର ରାଲି ଜିଦରେ ଚାଷୀ ସଂଗଠନ ଅଟଳ

ଜାନୁଆରୀ ୨୬ ସାଧାରଣତନ୍ତ୍ର ଦିବସରେ ଟ୍ରାକ୍ଟର ରାଲି କରିବା ନେଇ ଚାଷୀ ସଂଗଠନ ପକ୍ଷରୁ ଯେଉଁ ଘୋଷଣା କରାଯାଇଛି, ତାହାକୁ ନେଇ ସରକାର ଓ ଚାଷୀ ସଂଗଠନ ମଧ୍ୟରେ ମୁକାବିଲା ମନୋଭାବ ବଢ଼ିବାରେ ଲାଗିଛି। ସିଂଘୁ ସୀମାରେ ରବିବାର ଚାଷୀ ସଂଗଠନ ପକ୍ଷରୁ ସାମ୍ବାଦିକ ସମ୍ମିଳନୀ କରି ସାଧାରଣତନ୍ତ୍ର ଦିବସରେ ଟ୍ରାକ୍ଟର ରାଲି କରାଯିବ ବୋଲି ପୁଣି ଥରେ ସ୍ପଷ୍ଟ କରାଯାଇଛି। ଚାଷୀ ସଂଗଠନ ନେତା ଯୋଗେନ୍ଦ୍ର ଯାଦବ କହିଛନ୍ତି ଯେ ଦିଲ୍ଲୀର ଆଉଟର ରିଙ୍ଗରୋଡରେ ଚାଷୀ ସଂଗଠନ ପକ୍ଷରୁ ଟ୍ରାକ୍ଟରରେ ଜାତୀୟ ପତାକା ଲଗାଇ ପରେଡ କରାଯିବ। ଜାତୀୟ ସ୍ତରରେ ସରକାରଙ୍କ ପକ୍ଷରୁ ହେଉଥିବା ସାଧାରଣତନ୍ତ୍ର ଦିବସ ପରେଡରେ କୌଣସି ପ୍ରକାର ବାଧା ଦିଆଯିବ ନାହିଁ। ଚାଷୀ ସଂଗଠନ ଶୃଙ୍ଖଳାର ସହ ଟ୍ରାକ୍ଟର ରାଲି କରି ପ୍ରତିବାଦ କରିବେ ବୋଲି ଯୋଗେନ୍ଦ୍ର ଯାଦବ କହିଛନ୍ତି।

ସିନ୍ଧ ପ୍ରଦେଶରେ ଆନ୍ଦୋଳନ, ପ୍ଲାକାର୍ଡରେ ମୋଦିଙ୍କ ସହ ବିଶ୍ବ ନେତାଙ୍କ ଫଟୋ

ପାକିସ୍ତାନର ସିନ୍ଧ୍ ପ୍ରଦେଶରେ ରବିବାର ସ୍ବତନ୍ତ୍ର ପ୍ରଦେଶ ଗଠନ ଦାବି ନେଇ ଆନ୍ଦୋଳନକାରୀମାନେ ରାସ୍ତାକୁ ଓହ୍ଲାଇଥିବା ବେଳେ ସେମାନେ ଧରିଥିବା ପ୍ଲାକାର୍ଡଗୁଡ଼ିକରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ବିଶ୍ବର ପ୍ରମୁଖ ନେତାମାନଙ୍କର ଫଟୋ ଥିବା ଦେଖିବାକୁ ମିଳିଛି। ଏଠାକାର ଏକ ନିର୍ଦ୍ଦିଷ୍ଟ ଗୋଷ୍ଠୀ ସ୍ବତନ୍ତ୍ର ସିନ୍ଧୁଦେଶ ଗଠନ ପାଇଁ ଆନ୍ଦୋଳନ କରିଆସୁଥିବା ବେଳେ ସୋମବାର ଏହି ଆନ୍ଦୋଳନର ସମର୍ଥନକାରୀ ଜିଏମ୍ ସୟଦଙ୍କ ଜନ୍ମତିଥିରେ ଏହି ଆନ୍ଦୋଳନ ଚାଲିଛି। ଉକ୍ତ ଆନ୍ଦୋଳନରେ ସ୍ଥାନ ପାଇଥିବା ମୋଦିଙ୍କ ଫଟୋରେ ସିନ୍ଧ ପ୍ରଦେଶକୁ ପାକିସ୍ତାନଠାରୁ ଭିନ୍ନ କରି ସ୍ବତନ୍ତ୍ର ଦେଶରେ ପରିଣତ କରିବା ଦିଗରେ ପ୍ରଧାନମନ୍ତ୍ରୀ ମୋଦି ସହଯୋଗ କରିବାକୁ ସେମାନେ ଦାବି କରୁଥିବା ଉକ୍ତ ପ୍ଲାକାର୍ଡରେ ଥିବା ଲେଖାରୁ ସ୍ପଷ୍ଟ ହୋଇଛି। ଉକ୍ତ ରାଲିରେ ପ୍ରଧାନମନ୍ତ୍ରୀ ମୋଦିଙ୍କ ବ୍ୟତୀତ ଆହୁରି ମଧ୍ୟ ଅନେକ ବିଶ୍ବସ୍ତରୀୟ ନେତାଙ୍କ ଫଟୋ ଦେଖିବାକୁ ମିଳିଛି। ସେମାନଙ୍କ ମଧ୍ୟରେ ଆମେରିକାର ନବନିର୍ବାଚିତ ରାଷ୍ଟ୍ରପତି ଜୋ ବିଡେନ୍, ଆଫଗାନିସ୍ତାନ ରାଷ୍ଟ୍ରପତି ଅଶରଫ୍ ଗନୀ, ବାଂଲାଦେଶ ପ୍ରଧାନମନ୍ତ୍ରୀ ଶେଖ୍ ହସୀନା, ଫ୍ରାନ୍ସର ଏମାନୁଏଲ୍ ମାକ୍ରୋନ୍, ସାଉଦି ଆରବ ରାଜା ମହମ୍ମଦ ବିନ୍ ସଲମାନ୍, ରୁଷିଆ ରାଷ୍ଟ୍ରପତି ଭ୍ଲାଦିମୀର୍ ପୁଟିନ୍, ଜର୍ମାନ୍ ଚାନସେଲର୍ ଆଞ୍ଜେଲା ମର୍କେଲ, ଯୁକ୍ତରାଜ୍ୟ ମହାସଚିବ ଆଣ୍ଟୋନିଓ ଗୁଟେରେସ୍ ଓ ବ୍ରିଟିଶ୍ ପ୍ରଧାନମନ୍ତ୍ରୀ ବୋରିସ୍ ଜନ୍‌ସନ୍ ପ୍ରମୁଖ।

ଷ୍ଟାଚ୍ୟୁ ଅଫ୍ ୟୁନିଟି ଯାତ୍ରା ପାଇଁ ସୁବନ୍ଦୋବସ୍ତ: ୮ ଟ୍ରେନ୍‌ର ଶୁଭାରମ୍ଭ କଲେ ମୋଦି

ଗୁଜରାଟ ରାଜଧାନୀ ଅହମଦାବାଦଠାରେ ବିଶ୍ବର ସବୁଠାରୁ ଉଚ୍ଚ ପ୍ରତିମୂର୍ତ୍ତି ସ୍ଥାପନ କରାଯାଇଥିବା ବେଳେ ଏହାକୁ ଏକ ପର୍ଯ୍ୟଟନସ୍ଥଳୀରେ ପରିଣତ କରିବା ଉପରେ ଗୁରୁତ୍ବାରୋପ କରାଯାଇଆସିଛି। ଏହି ଷ୍ଟାଚ୍ୟୁ ଅଫ୍ ୟୁନିଟିରେ ପହଞ୍ଚିବା ସକାଶେ ଚାହୁଁଥିବା ପର୍ଯ୍ୟଟକମାନଙ୍କ ପାଇଁ ରବିବାର ୮ଟି ଯାତ୍ରୀବାହୀ ଟ୍ରେନ ଚଳାଚଳର ଶୁଭାରମ୍ଭ କରାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭିଡିଓ କନଫରେନ୍ସିଂ ମାଧ୍ୟମରେ ଏହି ଯାତ୍ରୀବାହୀ ଟ୍ରେନଗୁଡ଼ିକର ଚଳାଚଳ ଆରମ୍ଭ କରିଥିବା ବେଳେ କେବଡିୟାକୁ ଦେଶର ବିଭିନ୍ନ ସ୍ଥାନରୁ ଏହି ଟ୍ରେନଗୁଡ଼ିକ ଚଳାଚଳ କରିବ। ଏହି ଟ୍ରେନ୍ ଚଳାଚଳର ଶୁଭାରମ୍ଭ କାର୍ଯ୍ୟକ୍ରମରେ ଗୁଜରାଟ ମୁଖ୍ୟମନ୍ତ୍ରୀ ବିଜୟ ରୂପାନୀ ଓ କେନ୍ଦ୍ର ରେଳବାଇ ମନ୍ତ୍ରୀ ପୀୟୂଷ ଗୋୟଲ୍ ମଧ୍ୟ ଉପସ୍ଥିତ ଥିଲେ। ଏହି ଅବସରରେ ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ କେବଡିୟାକୁ ଯୋଗାଯୋଗ ବ୍ୟବସ୍ଥାର ଉନ୍ନତି ଦ୍ବାରା ସେଠାରେ ବସବାସ କରୁଥିବା ଜନଜାତି ସମ୍ପ୍ରଦାୟର ଜୀବନ ଧାରଣ ଶୈଳୀରେ ପରିବର୍ତ୍ତନ ଆସିପାରିବ। ତା’ଛଡ଼ା ଷ୍ଟାଚ୍ୟୁ ଅଫ୍ ୟୁନିଟିରେ ପହଞ୍ଚି ବିଶ୍ବର ସର୍ବୋଚ୍ଚ ପ୍ରତିମୂର୍ତ୍ତି ଦେଖିବାକୁ ଚାହୁଁଥିବା ପର୍ଯ୍ୟଟକମାନେ ମଧ୍ୟ ଏବେ ବେଶ୍ ସହଜରେ ଏଠାରେ ପହଞ୍ଚିପାରିବେ। ଏହାଦ୍ବାରା ନିଯୁକ୍ତି ସମ୍ଭାବନା ସହ ଆତ୍ମନିଯୁକ୍ତି ସୁଯୋଗ ମଧ୍ୟ ସୃଷ୍ଟି ହୋଇପାରିବ ବୋଲି ପ୍ରଧାନମନ୍ତ୍ରୀ କହିଛନ୍ତି।

ଏସ୍ଏଫଜେ ମାମଲାରେ ଚାଷୀନେତା ଓ ଅଭିନେତାଙ୍କ ସମେତ ୪୦ ଜଣଙ୍କୁ ଏନଆଇଏର ସମନ୍

ଖଲିସ୍ତାନ ମୁଭମେଣ୍ଟକୁ ସମର୍ଥନ କରୁଥିବା ବିଦେଶୀ ସଂଗଠନ ଶିଖ୍‌ସ ଫର୍ ଜଷ୍ଟିସ୍ (ଏସଏଫଜେ) ସଂଗଠନ ବିରୋଧରେ ଦାଖଲ ଏକ ମାମଲାରେ ଜାତୀୟ ତଦନ୍ତକାରୀ ସଂସ୍ଥା (ଏନଆଇଏ) ପକ୍ଷରୁ ଜଣେ ଚାଷୀ ନେତା ଓ ଜଣେ ପଞ୍ଜାବୀ ଅଭିନେତାଙ୍କ ସମେତ ସମୁଦାୟ ୪୦ ଜଣଙ୍କୁ ପଚରାଉଚରା କରିବା ସକାଶେ ସମନ୍ କରାଯାଇଛି। ଚାଷୀ ନେତା ଜଣକ ବଲଦେବ ସିଂ ସିର୍ସା ହୋଇଥିବା ବେଳେ ପଞ୍ଜାବୀ ଅଭିନେତା ଜଣକ ଦୀପ ସିଦ୍ଧୁ ବୋଲି ଜଣାପଡ଼ିଛି। ସେମାନଙ୍କୁ ହାଜର ହେବା ସକାଶେ ଗତ ୧୫ ତାରିଖରେ ସମନ୍ କରାଯାଇଥିବା ବେଳେ ସେମାନଙ୍କୁ ଜାନୁଆରୀ ୧୮ରୁ ୨୧ ତାରିଖ ମଧ୍ୟରେ ଏନଆଇଏର ଦିଲ୍ଲୀ ମୁଖ୍ୟାଳୟରେ ହାଜର ହେବାକୁ କୁହାଯାଇଛି। ସେମାନଙ୍କ ବିରୋଧରେ ଆଇପିସିର ଏକାଧିକ ଧାରାରେ ୪୦/୨୦୨୦ ନମ୍ବରରେ ମାମଲା ରୁଜୁ କରାଯାଇଥିବା ବେଳେ ଉକ୍ତ ମାମଲା ପରିପ୍ରେକ୍ଷୀରେ ହାଜର ହେବାକୁ କୁହାଯାଇଥିବା ଜଣାପଡ଼ିଛି। ସମନ୍ ପାଇଥିବା ଅନ୍ୟାନ୍ୟ ବ୍ୟକ୍ତିଙ୍କ ମଧ୍ୟରେ ଟିଭି ସାମ୍ବାଦିକ, କେବଲ୍ ଅପରେଟର୍, ଟୁରିଷ୍ଟ ବସ୍ ମାଲିକ, ମିଷ୍ଟାନ୍ନ ବ୍ୟବସାୟୀ ଓ ବ୍ୟବସାୟୀ ମଧ୍ୟ ସାମିଲ୍ ଅଛନ୍ତି। ସାମ୍ପ୍ରତିକ ସମୟରେ ଚାଷୀ ଆନ୍ଦୋଳନରେ ପୂର୍ଣ୍ଣଚ୍ଛେଦ ପକାଇବା ସକାଶେ କେନ୍ଦ୍ର ସରକାରଙ୍କ ସହ ଚାଲିଥିବା ଆଲୋଚନାରେ ସିର୍ସା ଅନ୍ୟତମ ଚାଷୀନେତା ଭାବେ ଅଂଶଗ୍ରହଣ କରିସାରିଛନ୍ତି।

ପ୍ରାଣଘାତୀ ଫାଇଜର୍: ନରୱେରେ ନେଲା ୨୩ ଜୀବନ, ଅନେକ ଅସୁସ୍ଥ

ନିକଟ ଅତୀତରେ କୋରୋନା ଭୂତାଣୁକୁ ମାତ୍ ଦେବା ସକାଶେ ସଂଖ୍ୟାଧିକ ଟିକାର ଉପଯୋଗ ଆରମ୍ଭ ହୋଇସାରିଥିବା ବେଳେ ସର୍ବପ୍ରଥମ ଟିକା ଭାବେ ଫାଇଜର୍ ବ୍ୟବହାର କରାଯାଇଥିଲା। ଆମେରିକାର ଜଣାଶୁଣା ଔଷଧ ପ୍ରସ୍ତୁତକାରୀ କମ୍ପାନୀ ଫାଇଜର୍ ଓ ଜର୍ମାନୀର ବାୟୋଏନଟେକ୍ ପକ୍ଷରୁ ମିଳିତ ଭାବେ ଏହି ଟିକା ତିଆରି କରାଯାଇଥିବା ବେଳେ ସର୍ବପ୍ରଥମେ ଯୁକ୍ତରାଜ୍ୟ ଏହାର ଜରୁରୀକାଳୀନ ଉପଯୋଗ ପାଇଁ ଅନୁମତି ଦେଇଥିଲା। ପରେ ସାଉଦି ଆରବ, କାନାଡା ଓ ବାହରିନ୍ ଆଦି ଦେଶରେ ମଧ୍ୟ ଏହି ଟିକାର ଜରୁରୀକାଳୀନ ଉପଯୋଗ ପାଇଁ ଅନୁମତି ଦିଆଯାଇଥିଲା। ତେବେ ନରୱେରେ ଏହି ଟିକା ପ୍ରାଣଘାତୀ ସାବ୍ୟସ୍ତ ହୋଇଛି। ଏହି ଟିକା ନେଇ ଘାତକ କୋରୋନା ଭୂତାଣୁକୁ ମାତ୍ ଦେବାକୁ ଲକ୍ଷ୍ୟ ରଖିଥିବା ହିତାଧିକାରୀମାନେ ପ୍ରାଣ ହରାଇଛନ୍ତି। ଏକ ରିପୋର୍ଟ ଅନୁସାରେ, ନିକଟରେ ଫାଇଜର୍ ଟିକା ନେଇଥିବା ଲୋକଙ୍କ ମଧ୍ୟରୁ ୨୩ ଜଣ ବୟସ୍କ ବ୍ୟକ୍ତିଙ୍କର ମୃତ୍ୟୁ ଘଟିଛି। ଏହାଛଡ଼ା ଆହୁରି ଅନେକ ଲୋକ ଅସୁସ୍ଥ ମଧ୍ୟ ହୋଇପଡ଼ିଥିବା ‘ଦ ବ୍ଲୁମବର୍ଗ’ରେ ପ୍ରକାଶିତ ଏକ ରିପୋର୍ଟରୁ ଜଣାପଡ଼ିଛି। ଏହି ଟିକା ନେଇଥିବା ଲୋକମାନଙ୍କ ମଧ୍ୟରୁ ୮୦ ବର୍ଷରୁ ଊର୍ଦ୍ଧ୍ବ ହିତାଧିକାରୀଙ୍କଠାରେ ନାନାଦି ସମସ୍ୟା ଦେଖାଦେଇଛି ବୋଲି ଡାକ୍ତରମାନେ କହିବା ସହ ୨୩ ଜଣ ବୟସ୍କ ବ୍ୟକ୍ତି ମୃତ୍ୟୁବରଣ କରିବା ଘଟଣାର ତଦନ୍ତ ଆରମ୍ଭ ହୋଇଥିବା ଜଣାପଡ଼ିଛି।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ