ସୋସାଲ ମିଡିଆରେ ପୋଷ୍ଟିଂ ପାଇଁ ପୋଲିସ କୌଣସି କାର୍ଯ୍ୟାନୁଷ୍ଠାନ ନେଇ ପାରିବ ନାହିଁ ବୋଲି ସ୍ପଷ୍ଟ କରିଛନ୍ତି ସୁପ୍ରିମକୋର୍ଟ। ଜଷ୍ଟିସ ଡି.ୱାଇ.ଚନ୍ଦ୍ରଚୂଡ଼ ଓ ଜଷ୍ଟିସ ଇନ୍ଦିରା ବାନାର୍ଜୀଙ୍କୁ ନେଇ ଗଠିତ ଦୁଇ ଜଣିଆ ଖଣ୍ଡପୀଠ ଦିଲ୍ଲୀର ଜଣେ ମହିଳାଙ୍କ ପିଟିସନ ଆଧାରରେ ଏପରି ନିର୍ଦେଶନାମା ଜାରି କରିଛନ୍ତି। ଏଠାରେ ସୂଚନାଯୋଗ୍ୟ ଯେ ଦିଲ୍ଲୀର ଜଣେ ମହିଳା ସୋସାଲ ମିଡିଆରେ ପୋଷ୍ଟ କରି ବେଙ୍ଗଲ ସରକାରକୁ ଲକଡାଉନ ପାଳନ ଠିକ ଭାବେ କରାଯାଉନି ବୋଲି କହି ସମାଲେଚନା କରିଥିଲେ। ଆଉ ଏହା ପରଠାରୁ ସମ୍ପୃକ୍ତ ମହିଳାଙ୍କ ପାଖକୁ କୋଲକାତା ପୋଲିସ ବାରମ୍ବାର ନୋଟିସ ପଠାଇବା ସହ ବ୍ୟକ୍ତିଗତ ଭାବେ ହାଜର ହୋଇ ପକ୍ଷ ରଖିବାକୁ ନିର୍ଦେଶ ଦେଉଥିଲା। ଆଉ ଏହାକୁ ଚ୍ୟାଲେଞ୍ଜ କରି ସମ୍ପୃକ୍ତ ମହିଳା ସୁପ୍ରିମକୋର୍ଟଙ୍କ ଦ୍ବାରସ୍ଥ ହେବା ପରେ ଦୁଇ ଜଣିଆ ଖଣ୍ଡପୀଠ ଏହାର ଶୁଣାଣି କରି ବେଙ୍ଗଲ ସରକାରଙ୍କୁ ଭର୍ତ୍ସନା କରିଛନ୍ତି।
ଗୁରୁବାର ସୁପ୍ରିମକୋର୍ଟ ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ତ୍ରିଭେନ୍ଦ୍ର ସିଂ ରାୱତଙ୍କ ବିରୋଧରେ ସିବିଆଇ ତଦନ୍ତ ନେଇ ଉତ୍ତରାଖଣ୍ଡ ହାଇକୋର୍ଟ ଦେଇଥିବା ନିର୍ଦେଶ ଉପରେ ରହିତାଦେଶ ଜାରି କରିଛନ୍ତି। ଜଷ୍ଟିସ ଅଶୋକ ଭୂଷଣ, ଜଷ୍ଟିସ ଆର.ଶୁଭାଶିଷ ରେଡ୍ଡୀ ଓ ଜଷ୍ଟିସ ଏମଆର ସାଦଙ୍କୁ ନେଇ ଗଠିତ ଖଣ୍ଡପୀଠ ରହିତାଦେଶ ଦେବା ସହ ପ୍ରତିପକ୍ଷଙ୍କୁ ଜବାବ ଦାଖଲ ପାଇଁ ନୋଟିସ କରିଛନ୍ତି। ଏଠାରେ ସୂଚନାଯୋଗ୍ୟ ଯେ ୨୦୧୬ରେ ଏକ ଖବର କାଗଜ ସଂସ୍ଥାର ମାଲିକ ଉମେଶ କୁମାର ଶର୍ମା ନାମକ ଜଣେ ବ୍ୟକ୍ତି ତ୍ରିଭେନ୍ଦ୍ରଙ୍କ ବ୍ୟାଙ୍କ ଆକାଉଣ୍ଟରେ ବେଆଇନ ଭାବେ ୨୫ ଲକ୍ଷ ଜମା ହୋଇଥିବା ନେଇ ଅଭିଯୋଗ କରିଥିଲେ।
ଗତ ମଙ୍ଗଳବାର କେନ୍ଦ୍ର ସ୍ବରାଷ୍ଟ୍ର ମନ୍ତ୍ରାଳୟ ପକ୍ଷରୁ ନୂତନ ଭାବେ ଗଠିତ ଜମ୍ମୁ-କଶ୍ମୀର ଓ ଲଦାଖ୍ କେନ୍ଦ୍ରଶାସିତ ଅଞ୍ଚଳ ପାଇଁ ଭୂମି ଆଇନରେ ଆମୂଳଚୂଳ ପରିବର୍ତ୍ତନ କରିଛନ୍ତି। ଏହି ପରିବର୍ତ୍ତନ ପରେ ଭାରତର କୌଣସି ସ୍ଥାନର ବାସିନ୍ଦା ଏହି ଦୁଇ କେନ୍ଦ୍ରଶାସିତ ଅଞ୍ଚଳରେ ଜମି କିଣିପାରିବେ। ତେବେ ଏପରି ଆଇନକୁ ସର୍ବଦଳୀୟ ହୁରିୟତ୍ କନଫରେନ୍ସ (ଏପିଏଚ୍ସି) ପକ୍ଷରୁ ତୀବ୍ର ବିରୋଧ କରାଯିବା ସହ ଆସନ୍ତା ୩୧ ତାରିଖରେ ଜମ୍ମୁ-କଶ୍ମୀର ବନ୍ଦ ପାଇଁ ଡାକରା ଦିଆଯାଇଛି। ଏପିଏଚ୍ସି ପକ୍ଷରୁ ଜାରି ଏକ ବିଜ୍ଞପ୍ତିରେ କୁହାଯାଇଛି ଯେ ନଜରବନ୍ଦୀ ଥିବା ଏହି ସଂଗଠନର ଅଧ୍ୟକ୍ଷ ମୀରେଓ୍ୱଜ୍ ଉମର୍ ଫାରୁକ୍ ଓ ବରିଷ୍ଠ ନେତା ଅବଦୁଲ୍ ଗନୀ ଭଟ୍ଟ, ବିଲାଲ୍ ଗନୀ ଲୋନି ଓ ମସରୁର୍ ଅବବାସ୍ ଅନସାରୀ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରାଳୟ ପକ୍ଷରୁ ଜାରି କରାଯାଇଥିବା ନୂଆ ଆଇନ ସମ୍ପୂର୍ଣ୍ଣ ଭାବେ ଜନବିରୋଧୀ ବୋଲି ମତ ଦେଇଛନ୍ତି। କେନ୍ଦ୍ର ସରକାର ନିୟମିତ ବ୍ୟବଧାନରେ ଆଇନ ସଂଶୋଧନ କରି ଜମ୍ମୁ-କଶ୍ମୀର ଜନସାଧାରଣଙ୍କ ପୀଡ଼ା ବଢ଼ାଇ ଚାଲିଛନ୍ତି। ଏହା ଏହି ଉପତ୍ୟକାର ଜନସାଧାରଣଙ୍କୁ ଉଜେିତ କରିଆସିଛି। ସେମାନଙ୍କ ପ୍ରତି ହେଉଥିବା ଏପରି ମାନସିକ ନିର୍ଯାତନା ପ୍ରତିବାଦରେ ଆସନ୍ତା ୩୧ ତାରିଖରେ ଏହି କେନ୍ଦ୍ରଶାସିତ ଅଞ୍ଚଳର ଜନସାଧାରଣ ଏହା ବିରୋଧରେ ସେମାନଙ୍କ ଅସନ୍ତୋଷ ଜାହିର୍ କରିବେ ବୋଲି ଏହି ବିଜ୍ଞପ୍ତିରେ କୁହାଯାଇଛି।
ମଙ୍ଗଳବାର ସୁପ୍ରିମକୋର୍ଟ ହାଥରସ ମାମଲାର ବିଚାର କରି କହିଛନ୍ତି ଯେ ସିବିଆଇ ତଦନ୍ତ ଜାରି ରହିବ। ମାତ୍ର ଆହ୍ଲାବାଦ ହାଇକୋର୍ଟ ଏହି ମାମଲାର ତଦାରଖ କରିବେ। ଅର୍ଥାତ ଆହ୍ଲାବାଦ ହାଇକୋର୍ଟଙ୍କ ତତ୍ତ୍ବାବଧନରେ ସିବିଆଇ ଏହି ଗୁରୁତ୍ବପୂର୍ଣ୍ଣ ମାମଲାର ତଦନ୍ତ କରିବ ବୋଲି ସର୍ବୋଚ୍ଚ କୋର୍ଟ ସ୍ପଷ୍ଟ କରିଛନ୍ତି। ଏନେଇ ସୁପ୍ରିମକୋର୍ଟରେ ଏକାଧିକ ଜନସ୍ବାର୍ଥ ମାମଲା ରୁଜୁ ହୋଇଥିଲା ବେଳେ କୋର୍ଟ ଏହାର ଶୁଣାଣି କରି ଗତ ୧୫ ତାରିଖରେ ରାୟକୁ ସଂରକ୍ଷିତ ରଖିଥଲା ବେଳେ ମଙ୍ଗଳବାର ଏନେଇ ସ୍ପଷ୍ଟ ମତ ରଖିଛନ୍ତି।
ଗତ ଗୁରୁବାର ଚଳଚ୍ଚିତ୍ର ନିର୍ମାତା ମହେଶ ଭଟ୍ଟଙ୍କ ଉପରେ ଅସଦାଚରଣର ଅଭିଯୋଗ ଆଣି ଏକ ଭିଡିଓ ଶେୟାର କରିଥିଲେ ଅଭିନେତ୍ରୀ ଲୁଭିନା ଲୋଧ। ଏହା ବିରୋଧରେ ୧କୋଟି ଟଙ୍କା କ୍ଷତିପୂରଣ ଦାବି କରି ମାନହାନି ମକଦ୍ଦମା ଦାୟର କରିଛନ୍ତି ମହେଶ ଭଟ୍ଟ। ଏଥି ସହ ତାଙ୍କ ବିରୋଧରେ କୌଣସି ଘୃଣ୍ୟ, ମିଥ୍ୟା, ନିନ୍ଦନୀୟ ଏବଂ ଅପମାନଜନକ ଅଭିଯୋଗ ନ କରିବାକୁ ଆଦେଶ ଦେବା ପାଇଁ ବମ୍ବେ ହାଇକୋର୍ଟରେ ଆବେଦନ କରିଛନ୍ତି ମହେଶ ଭଟ୍ଟ।
ସୁଶାନ୍ତ ସିଂ ରାଜପୁତ ମୃତ୍ୟୁ ଘଟଣାରେ ଅଭିନେତ୍ରୀ କଙ୍ଗନା ରାନାୱତ ଦେଇଥିବା ବିବୃତ୍ତି ଉପରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଦଶହରା ରାଲିରେ କହିଛନ୍ତି ଯେ ହିମାଚଳ ପ୍ରଦେଶରେ ବହୁଳ ପରିମାଣରେ ଗଂଜେଇ ଚାଷ କରାଯାଉଛି। ଉଦ୍ଧବ ଯଦିଓ ସିଧାସଳଖ କଙ୍ଗନାଙ୍କ ନାଁ ନେଇ ନ ଥିଲେ। କିନ୍ତୁ କହିଥିଲେ ଯେ ଯେଉଁମାନେ ମହାରାଷ୍ଟ୍ରକୁ ଗଂଜେଇ ବେପାରର ପେଣ୍ଠସ୍ଥଳୀ କହି ବଦନାମ କରିବାକୁ ଚେଷ୍ଟା କରୁଛନ୍ତି, ସେମାନେ ଜାଣିନାହାନ୍ତି ଯେ ସେମାନଙ୍କ ରାଜ୍ୟ ହିଁ ଏହାର ମୁଖ୍ୟ ପେଣ୍ଠସ୍ଥଳୀ। ମୁମ୍ବାଇ ପୋଲିସକୁ ସମର୍ଥନ କରି ସେ କହିଛନ୍ତି ଯେ ଯେଉଁମାନେ ନ୍ୟାୟ ପାଇଁ ଲୁହ ଝରାଉଥିଲେ ସେମାନେ ଏବେ କେଉଁଠି। ସେ କହିଛନ୍ତି, ଗଂଜେଇ ନୁହେଁ ଆମ ଘରେ ଆମେ ତୁଳସୀ ଗଛ ଲଗାଉ।
ପ୍ରେସିଡେନସିଆଲ ଡିବେଟରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଭାରତରେ ଗନ୍ଧ ପବନ ମନ୍ତବ୍ୟକୁ ନେଇ ଜୋରଦାର ଚର୍ଚ୍ଚା। ଏହା ଦେଶର ପ୍ରବାସୀ ଭାରତୀୟଙ୍କ ମଧ୍ୟର ତୀବ୍ର ପ୍ରତିକ୍ରିୟା ସୃଷ୍ଟି କରିଥିଲା ବେଳେ ଆଉ କେତେକ ଏହାକୁ ସକାରାତ୍ମକ ଭାବେ ନେଇ ଏଥିରେ ସୁଧାର ଆଣିବା ପାଇଁ କାର୍ଯ୍ୟ କରାଯିବା ଉପରେ ମଧ୍ୟ ଗୁରୁତ୍ବାରୋପ କରିଛନ୍ତି। ଏଠାରେ ସୂଚନାଯୋଗ୍ୟ ଯେ ଟ୍ରମ୍ପ ପ୍ରେସିଡେନସିଆଲ ଡିବେଟରେ କହିଥିଲେ ଯେ ‘ଚୀନ ଆଡେ ଦେଖନ୍ତୁ , ଏହା କେତେ ଦୁର୍ଗନ୍ଧମୟ, ରୁଷିଆ ଓ ଭାରତ ଉପରେ ମଧ୍ୟ ନଜର ପକାନ୍ତୁ- ଏଠାରେ ଗନ୍ଧ ପବନ ପ୍ରବାହିତ’। ଭାରତ ସହ ବନ୍ଧୁତାକୁ ଆଳ କରି ଟ୍ରମ୍ପ ରାଷ୍ଟ୍ରପତି ନିର୍ବାଚନ ବିଜୟୀ ହେବା ନେଇ ଆଶା ରଖିଥିଲା ବେଳେ ଭାରତ ସମ୍ପର୍କରେ ତାଙ୍କର ଏପରି ମନ୍ତବ୍ୟ କେଉଁଠି ନା କେଉଁଠି ଅଡୁଆ ପରିସ୍ଥିତି ସଷ୍ଟି କରିଛି। ଆସନ୍ତା ସପ୍ତାହରେ ଆମେରିକାର ବୈଦେଶିକ ଓ ପ୍ରତିରକ୍ଷା ସଚିବ ଭାରତ ଗସ୍ତରେ ଆସି ସାମରିକ ଚୁକ୍ତି କରିବା ପାଇଁ କାର୍ଯ୍ୟକ୍ରମ ଚୂଡ଼ାନ୍ତ ହୋଇଥିଲା ବେଳେ ଟ୍ରମ୍ପଙ୍କ ଏପରି ମନ୍ତବ୍ୟକୁ ନେଇ ଅନେକ ସମାଲୋଚନା ପ୍ରକାଶ ପାଉଛି।
ପ୍ରଥମ ଥର ପାଇଁ ଭାରତ ଇତିହାସରେ ଏକ ଗଣମାଧ୍ୟମ ସଂସ୍ଥାର ସମସ୍ତ କର୍ମଚାରୀଙ୍କ ବିରୋଧରେ ପୋଲିସ ଥାନାରେ ଏତଲା କରିଛି। ସୂଚନାନୁସାରେ ମୁମ୍ବାଇ ପୋଲିସ ରିପବ୍ଲିକ ଟିଭିର ୧ ହଜାର କର୍ମଚାରୀଙ୍କ ବିରୋଧରେ ମୁମ୍ବାଇ ପୋଲିସ ଏତଲା କରିଛି। ମହାନଗରୀ ପୋଲିସ ମଧ୍ୟରେ ଅସନ୍ତୋଷ ସୃଷ୍ଟି କରିବା ଅଭିଯୋଗରେ ଏନଏମ ଯୋଶୀ ମାର୍ଗ ପୋଲିସ ଷ୍ଟେସନରେ ଆଇପିସିର ବିଭିନ୍ନ ଧାରାରେ ଏହି ଏତଲା କରାଯାଇଛି। ଏହି ଏତଲାରେ ସ୍ପେଶାଲ ବ୍ରାଞ୍ଚ ୧ର ଏସଆଇ ଶଶିକାନ୍ତ ପାୱାର ରିପବ୍ଲିକ ଟିଭିର ଡେପୁଟି ଏଡିଟର ସାଗରିକା ମିତ୍ର, ଉପସ୍ଥାପିକା ଶିବାନୀ ଗୁପ୍ତା, ଡେପୁଟି ଏଡିଟର ଶାୱନ ସେନ୍, କାର୍ଯ୍ୟନିର୍ବାହୀ ଏଡିଟର ନିରଞ୍ଜନ ନାରାୟଣସ୍ବାମୀଙ୍କ ସମେତ ଅନ୍ୟ ଏଡିଟୋରିଆଲ ଷ୍ଟାଫ ଓ ନ୍ୟୁଜରୁମ ଇନଚାର୍ଜଙ୍କ ନାଁରେ ଏତଲା କରାଯାଇଛି। ରିପବ୍ଲିକ ଟିଭି କୌଣସି ଏକ ରିପୋର୍ଟ ପ୍ରସାରଣ କରି ମୁମ୍ବାଇ ପୋଲିସ ମଧ୍ୟରେ ଅସନ୍ତୋଷ ସୃଷ୍ଟି କରିବାକୁ ପ୍ରୟାସ କରିବା ଅଭିଯୋଗରେ ଏହି ଏତଲା ହୋଇଛି।
ବଲାଙ୍ଗିର ଜିଲ୍ଲା ପାଟଣାଗଡ଼ ପାର୍ସଲ ବୋମା ବିସ୍ଫୋରଣର ମୁଖ୍ୟ ଅଭିଯୁକ୍ତ ପୁଞ୍ଜିଲାଲ ମେହେରଙ୍କୁ ବଲାଙ୍ଗିର ଜେଲରେ ମାଡ ହୋଇଥିବା ଓ ତାଙ୍କୁ ପରିଶ୍ରା ପିଇବା ପାଇଁ ବାଧ୍ୟ କରା ଯାଇଥିବା ନେଇ ଓକିଲଙ୍କ ପକ୍ଷରୁ ପାଟଣାଗଡ଼ ଏଡିଜେ କୋର୍ଟରେ ଏକ ପିଟିସନ ଦେଇଥିବା ଜଣାପଡିଛି। ତେବେ ପୁଞ୍ଜିଲାଲ ମେହେରକୁ ବଲାଙ୍ଗିର ଜେଲରେ ମାଡ ହୋଇଥିବା ସମ୍ପର୍କରେ ସୂଚନା ପାଇଥିବା ନେଇ ଓକିଲ ତିର୍ଥ ସାହୁ ପିଟିସନ ଦେଇଥିବା ନେଇ ଜଣାପଡିଛି। ଉକ୍ତ ପିଟିସନରେ ଗତ ୨୧ ତାରିଖରେ ପୁଞ୍ଜିଲାଲ ମେହେରଙ୍କୁ ଜେଲରେ ଜେଲ ଅଧିକ୍ଷକ, ଜେଲର, ଜାମଦାର ଓ ଅନ୍ତେବାସୀମାନେ ପୁଞ୍ଜିଲାଲକୁ ଉଲଗ୍ନ କରି ମାଡ ମାରିଥିଲେ । ଏହା ପରେ ପୁଣି ୨୩ ତାରିଖରେ ପୁଞ୍ଜିଲାଲ ମେହେରକୁ ଜେଲ ଅଧିକ୍ଷକ, ଜେଲର ଓ ଅନ୍ତେବାସୀମାନଙ୍କ ମଧ୍ୟରୁ ଜଣେ ଅନ୍ତେବାସୀ ପୁଞ୍ଜିଲାଲ ମେହେରଙ୍କ ମୁହଁରେ ପରିଶ୍ରା କରିବା ସହିତ ତାଙ୍କୁ ପରିଶ୍ରା ପିଇବା ପାଇଁ ବାଧ୍ୟ କରା ଯାଇଥିବା ନେଇ ପିଟିସନରେ ଉଲ୍ଲେଖ କରିଥିବା ଜଣାପଡିଛି ।
ବାଲେଶ୍ୱର ଉପନିର୍ବାଚନ ଲାଗି ପ୍ରଚାର କରୁଥିବା ବେଳେ ଦେଇଥିବା ନିଜର ମନ୍ତବ୍ୟ ପାଇଁ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ଦୁଃଖ ପ୍ରକାଶ କରିଛନ୍ତି। ସେ ନିଜର ଟୁଇଟରରେ ଲେଖିଛନ୍ତି ଯେ ତାଙ୍କର ମନ୍ତବ୍ୟ ପାଇଁ ଗଭୀର ଦୁଃଖିତ। ଦିବଙ୍ଗତ ବିଧାୟକ ମଦନ ମୋହନ ଦତ୍ତଙ୍କ ପାଇଁ ତାଙ୍କର ଯଥେଷ୍ଟ ସମ୍ମାନ ରହିଛି। ମାନସ ତାଙ୍କର ପୁଅ ଭଳି ଏବଂ ଯଦି ତାଙ୍କ ମନ୍ତବ୍ୟ ମାନସଙ୍କୁ ଆଘାତ ଦେଇଥାଏ, ତେବେ ସେଥିଲାଗି ସେ ଗଭୀର ଦୁଃଖିତ। ମଦନ ମୋହନ ଦତ୍ତଙ୍କ ସହ ତାଙ୍କର ବନ୍ଧୁତା ଥିଲା ବୋଲି ବି ସେ କହିଛନ୍ତି।
ମୟୂରଭଞ୍ଜ ଜିଲ୍ଲାର କପ୍ତିପଦା ଥାନା ପୋଡ଼ାଡିହା ପଞ୍ଚାୟତର ନଛିପୁର ଗ୍ରାମରେ ଘଟିଛି ଏକ ଅଭାବନୀୟ ଘଟଣା। ଶିକାରୀ ସନ୍ଦେହରେ ଜଣେ ଯୁବକଙ୍କୁ ପିଟିପିଟି ହତ୍ୟା କରିଥିବା ନେଇ ଅଭିଯୋଗ ହୋଇଛି। ବନ ବିଭାଗ କର୍ମଚାରୀମାନେ ଏଭଳି କାଣ୍ଡ ଘଟାଇଥିବା ଅଭିଯୋଗ କରି ମୃତକଙ୍କ ପରିବାର ଲୋକେ ପୋଡ଼ାଡିହା ରେଞ୍ଜ କାର୍ଯ୍ୟାଳୟ ସମ୍ମୁଖରେ ମୃତଦେହ ରଖି ଧାରଣାରେ ବସିଛନ୍ତି।
ଟିଆରପି୍ ସ୍କାମ୍ ଉଠିବା ଦିନଠାରୁ ଏହି ପ୍ରସଙ୍ଗ ଚର୍ଚ୍ଚାରେ ରହିଆସିଛି। ମୁମ୍ବାଇ ପୋଲିସ୍ କମିଶନର ପରମବୀର୍ ସିଂ ପକ୍ଷପାତିତା କରି ରିପବ୍ଲିକ୍ ମିଡିଆ ନେଟ୍ୱାର୍କ ନାଁରେ ମିଛ ଅଭିଯୋଗ ଆଣିବା ପରେ ମାମଲା ହାଇକୋର୍ଟ ପର୍ଯ୍ୟନ୍ତ ଗଲାଣି। ସୋମବାର ରିପବ୍ଲିକ୍ ମିଡିଆ ନେଟ୍ୱାର୍କ ମୁମ୍ବାଇସ୍ଥିତ କଂଗ୍ରେସ ମୁଖ୍ୟାଳୟରେ ଏକ ଷ୍ଟିଙ୍ଗ୍ ଅପରେସନ୍ କରି ରିପବ୍ଲିକ୍ ମିଡିଆ ନେଟ୍ୱାର୍କକୁ ଫସାଇବା ପାଇଁ ମହାରାଷ୍ଟ୍ର ସରକାର ଏକ ଟିମ୍ ଗଠନ ପୂର୍ବକ ସୁଚିନ୍ତିତ ଷଡ଼ଯନ୍ତ୍ର କରୁଥିବାର ଖୁଲାସା କରିଥିଲା। ଏବେ ବୁଧବାର ପୁଣିଥରେ ରିପବ୍ଲିକ୍ ଦ୍ବିତୀୟ ଷ୍ଟିଙ୍ଗ୍ ଅପରେସନ୍ରେ ଏଭଳି ଆଉ ଏକ ମହାଷଡ଼ଯନ୍ତ୍ରର ମହାଖୁଲାସା କରିଛି। ଏଥିରେ ରିପବ୍ଲିକ୍ ମିଡିଆ ନେଟ୍ୱାର୍କର ମୁଖ୍ୟ ସମ୍ପାଦକ ଅର୍ଣ୍ଣବ ଗୋସ୍ବାମୀ ଓ ତାଙ୍କ ସଂସ୍ଥାକୁ ଫସାଇବା ପାଇଁ ବିପଦଜନକ ରାଜନୈତିକ ଷଡ଼ଯନ୍ତ୍ର ହେଉଥିବାର ସ୍ପଷ୍ଟ ସୂଚନା ମିଳିଛି। ପୂର୍ବତନ କେନ୍ଦ୍ରମନ୍ତ୍ରୀ ଓ ବର୍ତ୍ତମାନ ମହାରାଷ୍ଟ୍ରର କ୍ୟାବିନେଟ୍ ମନ୍ତ୍ରୀ ତଥା ଶରଦ ପାୱାରଙ୍କ ଦଳ ଏନ୍ସିପିର ବରିଷ୍ଠ ନେତା ନୱାବ ମଲ୍ଲିକ କ୍ୟାମେରା ସମ୍ମୁଖରେ ଏହା ସ୍ବୀକାର କରିବା ସହ ମହାରାଷ୍ଟ୍ର ସରକାରର ବିଷୋଦ୍ଗାର କରିଛନ୍ତି। ଏପରିକି ଏହାର ପ୍ରଭାବ ଏତେ ଭୟଙ୍କର ହୋଇପାରେ ଯେ ଅର୍ଣ୍ଣବ ଆତ୍ମହତ୍ୟା କରିବାକୁ ମଧ୍ୟ ବାଧ୍ୟ ହୋଇପାରନ୍ତି ବୋଲି ସେ ଚେତାବନୀ ଦେଇଛନ୍ତି।
ଟିଆରପି ସ୍କାମକୁ ନେଇ ସିବିଆଇ ତଦନ୍ତ ଆରମ୍ଭ କରିଥିଲା ବେଳେ ମହାରାଷ୍ଟ୍ର ସରକାର ଏନେଇ ସାଧାରଣ ସମ୍ମତି ପ୍ରତ୍ୟାହାର କରିନେଇଛନ୍ତି। ଅର୍ଥାତ ମହାରାଷ୍ଟ୍ରରେ ଟିଆରପି ସ୍କାମର ତଦନ୍ତ କରିବା ପାଇଁ ସିବିଆଇକୁ ଅନୁମତି ମିଳିବ ନାହିଁ ବୋଲି ରାଜ୍ୟ ସରକାର ନିଜ ପକ୍ଷରୁ ଘୋଷଣା କରିଛନ୍ତି। ଏଠାରେ ସୂଚନାଯୋଗ୍ୟ ଯେ ଉତ୍ତର ପ୍ରଦେଶରେ ମଧ୍ୟ ଟିଆରପିକୁ ନେଇ ସମାନ ଅଭିଯୋଗ ଆସିବା ପରେ ସେଠାକାର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ତତକ୍ଷଣାତ ସିବିଆଇ ତଦନ୍ତ ପାଇଁ ନିର୍ଦେଶ ଦେଇଥିଲେ। ସିବିଆଇ ମଧ୍ୟ ଏହି ମାମଲାରେ ଏତଲା କରି ତଦନ୍ତ ଆରମ୍ଭ କରିଥିଲା। ଯେହେତୁ ଉତ୍ତର ପ୍ରଦେଶ ଓ ମହାରାଷ୍ଟ୍ରରେ ଟିଆରପି ବଢ଼ାଇବାକୁ ନେଇ ମାମଲା ସମାନ, ସେହି ଦୃଷ୍ଟିରୁ ସିବିଆଇ ଉଭୟ ମାମଲାର ଏକକାଳୀନ ତଦନ୍ତ କରିବାର ସମ୍ଭାବନା ଦେଖା ଦେଇଥିଲା। ମାତ୍ର ମହାରାଷ୍ଟ୍ର ସରକାର ସିବିଆଇ ତଦନ୍ତ ନେଇ ଥିବା ସାଧାରଣ ସମ୍ମତି ପ୍ରତ୍ୟାହାର କରି ଏହା ଉପରେ ରୋକ ଲଗାଇଛନ୍ତି। ପରୋକ୍ଷରେ ମୁମ୍ବାଇ ପୋଲିସ ହିଁ ପୂର୍ବପରି ତଦନ୍ତ କରିବ ବୋଲି ରାଜ୍ୟ ସରକାର ସ୍ପଷ୍ଟ କରିଛନ୍ତି।
ମଧ୍ୟ ପ୍ରଦେଶ ପୂର୍ବତନ ମୁଖ୍ୟମନ୍ତ୍ରୀ କମଲନାଥଙ୍କୁ ତାଙ୍କର ଆପତ୍ତିଜନକ ‘ଆଇଟମ୍’ ମନ୍ତବ୍ୟ ପାଇଁ ନିର୍ବାଚନ କମିଶନ ବୁଧବାର ନୋଟିସ କରିଛନ୍ତି। ନୋଟିସ୍ ପାଇବାର ୪୮ ଘଣ୍ଟା ଭିତରେ ମଧ୍ୟ ଜବାବ ରଖିବା ପାଇଁ ନିର୍ବାଚନ କମିଶନ ନିର୍ଦେଶ ଦେଇଛନ୍ତି। ଗ୍ବାଲିୟର ଜିଲ୍ଲାର ଦାବ୍ରା ବିଧାନସଭା କ୍ଷେତ୍ର ପାଇଁ ହେଉଥିବା ଉପନିର୍ବାଚନ ପ୍ରଚାର କରିବା ଅବସରରେ କମଲନାଥ ନିଜ ଦଳର ପ୍ରାର୍ଥୀଙ୍କ ସପକ୍ଷରେ ଭୋଟ ମାଗିବା ବେଳେ ମନ୍ତ୍ରୀ ଇମର୍ତ୍ତି ଦେବୀଙ୍କୁ ଟାର୍ଗେଟ କରି ଏପରି ମନ୍ତବ୍ୟ ଦେବାକୁ ନେଇ ଜାତୀୟ ଗଣମାଧ୍ୟମରେ ସମାଲୋଚନା ପ୍ରକାଶ ପାଇଛି। କଂଗ୍ରେସର ପୂବର୍ତନ ଅଧ୍ୟକ୍ଷ ରାହୁଲ ଗାନ୍ଧି ମଧ୍ୟ କମଲନାଥଙ୍କ ମନ୍ତବ୍ୟକୁ ନାପସନ୍ଦ କରି ବିବୃତି ରଖି ସାରିଛନ୍ତି।
ପାକିସ୍ତାନର କେତେକ ଗଣମାଧ୍ୟମ ରିପୋର୍ଟ ଅନୁସାରେ, ପାକିସ୍ତାନରେ ଏବେ ଗୃହଯୁଦ୍ଧ ପରିସ୍ଥିତି ସୃଷ୍ଟି ହୋଇଛି। ସିନ୍ଧ୍ ପୋଲିସ୍ ଓ ସେନା ମଧ୍ୟରେ ସଂଘର୍ଷ ହେବା ଫଳରେ କରାଚୀ ପୋଲିସ୍ର ୧୦ ଜଣ କର୍ମଚାରୀ ନିହତ ହୋଇଛନ୍ତି। ବିତାଡ଼ିତ ପ୍ରଧାନମନ୍ତ୍ରୀ ନୱାଜ୍ ଶରିଫ୍ଙ୍କ ଜ୍ବାଇଁ ସଫଦର୍ ଅୱନ୍ଙ୍କୁ ଗିରଫ କରିବା ସକାଶେ କରାଚୀ ପୋଲିସ୍ ଉପରେ ଚାପ ପ୍ରୟୋଗ ଉଦ୍ଦେଶ୍ୟରେ ସିନ୍ଧ୍ ପୋଲିସ୍ ମୁଖ୍ୟଙ୍କୁ ସେନା ଅପହରଣ କରିବା ନେଇ ପ୍ରଚାର ହେବା ପରେ ଏହି ମାମଲାର ତଦନ୍ତ ପାଇଁ ନିର୍ଦେଶ ଦିଆଯାଇଛି। ପାକିସ୍ତାନ ସେନା ମୁଖ୍ୟ ଜେନେରାଲ୍ କମର୍ ଜାଭେଦ୍ ବାଜୱା ଗତ ମଙ୍ଗଳବାର ଏହି ଘଟଣାର ତଦନ୍ତ ନିର୍ଦେଶ ଦେଇଛନ୍ତି। ଏକ ଇଂରାଜୀ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁସାରେ, ପାକିସ୍ତାନର ଅର୍ଥନୈତିକ ରାଜଧାନୀ ଭାବେ ପରିଚିତ କରାଚିରେ ପୋଲିସ୍ ଓ ସେନା ମଧ୍ୟରେ ସଂଘର୍ଷ ହୋଇଛି। ଫଳସ୍ବରୂପ ପାକିସ୍ତାନରେ ଗୃହଯୁଦ୍ଧ ପରିସ୍ଥିତି ଉପୁଜିଥିବା ଉକ୍ତ ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି। ପାକିସ୍ତାନର ମିଡିଆ ୱିଙ୍ଗ୍ ପକ୍ଷରୁ ଜାରି ଏକ ବିବୃତିରେ ଜେନେରାଲ୍ ବାଜୱା ତଦନ୍ତ ପାଇଁ ନିର୍ଦେଶ ଦେଇଥିବା ସୂଚନା ଦିଆଯାଇଛି। କିନ୍ତୁ ଉକ୍ତ ବିବୃତିରେ ଘଟଣା ସମ୍ପର୍କରେ ସବିଶେଷ ବିବରଣୀ ଦିଆଯାଇନାହିଁ।
ଅଧିକ ଦେଖନ୍ତୁ
