ଅପରାଧ

ଲୁଟ୍‌ ମାମଲାରେ ଜେଲ୍‌ ଗଲେ ପୂର୍ବତନ ବିଧାୟକ: ୨ ଯବାନ ନିଲମ୍ବିତ

ପୂର୍ବତନ ବିଜେଡି ବିଧାୟକ ଦେବେନ୍ଦ୍ର କହଁର ଗିରଫ। ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ଅଞ୍ଚଳର ଜଣେ ପଥଚାରୀଙ୍କ ଠାରୁ ୩୦ ହଜାର ଟଙ୍କା ଲୁଟ୍‌ ଏବଂ ମାରଧର ଅଭିଯୋଗରେ ଫୁଲବାଣୀ ଟାଉନ ଥାନା ପୋଲିସ୍‌ ତାଙ୍କୁ ଗିରଫ କରିଛି। ଫୁଲବାଣୀସ୍ଥିତ ଏଫ୍‌ସିଆଇ ଛକରୁ ବିଧାୟକଙ୍କୁ ଗିରଫ କରିଛି ପୋଲିସ୍‌। ଏଥିସହ ଏହି ମାମଲାରେ ୨ ଜଣ ଆଇଆରବିଏନ୍‌ ଯବାନଙ୍କୁ ନିଲମ୍ବିତ କରିଛନ୍ତି କନ୍ଧମାଳ ଏସ୍‌ପି। ମାମଲାରେ ସମ୍ପୃକ୍ତ ଥାଇ ଫେରାର୍‌ ଥିବା ଡେପୁଟି ସୁବେଦାର ଶିବବ୍ରତ ବେହେର ଏବଂ ଗିରଫ ହୋଇଥିବା ହାବିଲଦାର ଶ୍ରୀନିବାସ କହଁରଙ୍କୁ କାର୍ଯ୍ୟରୁ ନିଲମ୍ବନ କରାଯାଇଛି। ଏହି ଘଟଣାରେ ଫେରାର୍‌ ଥିବା ଅନ୍ୟମାନଙ୍କୁ ଗିରଫ କରିବା ପାଇଁ ପୋଲିସ୍‌ ଚେଷ୍ଟା କରୁଥିବା ଆଇଆଇସି ସୁଶାନ୍ତ କୁମାର ସେଠୀ କହିଛନ୍ତି।

ଟୁଲ୍‌କିଟ୍‌ ମାମଲା: ଦିଶା ରବିଙ୍କୁ ମିଳିଲା ଜାମିନ
ଅଞ୍ଜନା ମିଶ୍ର ଗଣଦୁଷ୍କର୍ମ ମାମଲା: ୨୨ ବର୍ଷ ପରେ ମୁଖ୍ୟ ଅଭିଯୁକ୍ତ ଗିରଫ

୧୯୯୯ ମସିହାର ବହୁ ଚର୍ଚ୍ଚିତ ଅଞ୍ଜନା ମିଶ୍ର ଗଣଦୁଷ୍କର୍ମ ମାମଲାର ମୁଖ୍ୟ ଅଭିଯୁକ୍ତକୁ ଧରିଛି କମିଶନରେଟ୍‌ ପୋଲିସ୍‌। ଦୀର୍ଘ ୨୨ ବର୍ଷ ପରେ ପୁଣେରୁ ବିବନ ବିଶ୍ବାଳକୁ ଧରିବାରେ ସଫଳ ହୋଇଛି କମିଶନରେଟ୍‌ ପୋଲିସ୍‌ର ୪ ଜଣିଆ ଟିମ୍‌। ନିଜର ନାଁ ଓ ପରିଚୟ ବଦଳାଇ ଦୀର୍ଘ ବର୍ଷ ଧରି ସେଠାରେ ରହୁଥିବା ବେଳେ ପୋଲିସ୍‌ ତାକୁ ଠାବ କରିବାରେ ସଫଳ ହୋଇଥିବା ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ପୋଲିସ୍‌ କମିଶନର ସୁଧାଂଶୁ ଷଡ଼ଙ୍ଗୀ। ପୂର୍ବରୁ ଏହି ମାମଲାରେ ୨ ଜଣ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡାଦେଶ ପାଇଁ କୋର୍ଟ ନିର୍ଦେଶ ଦେଇଥିଲେ। ମାତ୍ର ମୁଖ୍ୟ ଅଭିଯୁକ୍ତ ବିବନ ବିଶ୍ବାଳ ଘଟଣା ପରଠାରୁ ଫେରାର୍‌ ଥିଲା। ଅନ୍ୟପକ୍ଷରେ ଏହି ଘଟଣା ସେତେବେଳେ ଏତେ ସମ୍ବେଦନଶୀଳ ଥିଲା ଯେ ଯେତେବେଳର ମୁଖ୍ୟମନ୍ତ୍ରୀ ଥିବା ଜାନକୀ ବଲ୍ଲଭ ପଟ୍ଟନାୟକ ନିଜ ପଦରୁ ଇସ୍ତଫା ଦେଇଥିଲେ।

ମୁମ୍ବାଇ ହୋଟେଲରୁ ମିଳିଲା ଦାଦ୍ରା ଲୋକସଭା ସାଂସଦଙ୍କ ମୃତଦେହ

ସୋମବାର ମୁମ୍ବାଇର ଏକ ହୋଟେଲରୁ ଜଣେ ସାଂସଦଙ୍କ ମୃତଦେହ ଉଦ୍ଧାର କରାଯାଇଛି। ଏହି ସାଂସଦ ଜଣକ ହେଉଛନ୍ତି ମୋହନ ସଞ୍ଜିଭାଇ ଡେଲକର ଓ ସେ କେନ୍ଦ୍ରଶାସିତ ଅଞ୍ଚଳ ଦାଦ୍ରା ଓ ନଗର ହାବେଳୀରୁ ୭ ଥର ଲୋକସଭାକୁ ନିର୍ବାଚିତ ହୋଇଥିଲେ। ୫୮ ବର୍ଷୀୟ ଏହି ସ୍ବାଧୀନ ସାଂସଦ ଜଣକଙ୍କ ମୃତଦେହ ଦକ୍ଷିଣ ମୁମ୍ବାଇର ମେରାଇନ୍ ଡ୍ରାଇଭର୍ ଅଞ୍ଚଳରେ ସମୁଦ୍ରକୂଳରେ ଥିବା ହୋଟେଲ୍ ସି ଗ୍ରୀନ୍‌ରୁ ଉଦ୍ଧାର କରାଯାଇଛି ବୋଲି ସ୍ଥାନୀୟ ପୋଲିସ୍ ପକ୍ଷରୁ ସୂଚନା ଦିଆଯାଇଛି। ତେବେ ଡେଲକର ଆତ୍ମହତ୍ୟା କରିଛନ୍ତି ବୋଲି ପୋଲିସ୍ କହିଛି। କାରଣ ତାଙ୍କ ମୃତଦେହ ନିକଟରୁ ଏକ ସୁଇସାଇଡାଲ୍ ନୋଟ୍ ଜବତ କରାଯାଇଛି। ଉକ୍ତ ସୁଇସାଇଡାଲ୍ ନୋଟ୍‌ଟି ଗୁଜରାଟୀ ଭାଷାରେ ଲେଖାଥିବା ବେଳେ ପୋଲିସ୍ ତାଙ୍କ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଛି। ଏହି ଘଟଣାରେ ପୋଲିସ୍ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ବେଳେ ବ୍ୟବଚ୍ଛେଦ ରିପୋର୍ଟ ଆସିବା ପରେ ହିଁ ଡେଲକରଙ୍କ ମୃତ୍ୟୁର କାରଣ ସ୍ପଷ୍ଟ ହେବ ବୋଲି କୁହାଯାଇଛି।

ତୈଳ କମ୍ପାନୀ କର୍ମଚାରୀ ଅପହରଣ ଘଟଣା: ଆସାମ ଓ ଅରୁଣାଚଳ ସରକାରଙ୍କୁ ସପ୍ତାହେ ସମୟ

ଆସନ୍ତା ଏକ ସପ୍ତାହ ମଧ୍ୟରେ ୨୦ କୋଟି ଟଙ୍କା ନ ଦେଲେ ଅପହୃତ ହୋଇଥିବା ଏକ ତୈଳ କମ୍ପାନୀର ଦୁଇ ଜଣ କର୍ମଚାରୀଙ୍କୁ ନିଶ୍ଚିତ ଭାବେ ହତ୍ୟା କରାଯିବ ବୋଲି ଧମକ ଦେଇଛି ଉଲଫା ଆତଙ୍କବାଦୀ ସଂଗଠନ। ଏନେଇ ଉଲଫା ପକ୍ଷରୁ ଆସାମ ଓ ଅରୁଣାଚଳ ପ୍ରଦେଶ ସରକାରଙ୍କୁ ଏହି ଚେତାବନୀ ଦିଆଯାଇଛି। ଅରୁଣାଚଳ ପ୍ରଦେଶର ଚାଙ୍ଗଲାଙ୍ଗ ଠାରେ ଥିବା ତୈଳ କମ୍ପାନୀ କ୍ବିପୋ ଅଏଲ ଏଣ୍ଡ୍ ଗ୍ୟାସ ଇନଫ୍ରାଷ୍ଟ୍ରକଚରର କୁମ୍ଛାଇକା ହାଇଡ୍ରୋକାର୍ବନ ଡ୍ରିଲିଂ ସାଇଟରେ କାର୍ଯ୍ୟ କରୁଥିବା ୨ ଜଣ କର୍ମଚାରୀଙ୍କୁ ଉଲଫାର ଆତଙ୍କବାଦୀମାନେ ଗତ ବର୍ଷ ଡିସେମ୍ବର ୨୧ ତାରିଖରେ ଅପହରଣ କରିନେଇଥିଲେ। ଆସାମ ନିବାସୀ ପ୍ରଣବ ଗୋଗୋଇ ଏହି କମ୍ପାନୀରେ ସୁପରିଣ୍ଟେଣ୍ଡେଣ୍ଟ ଭାବେ କାର୍ଯ୍ୟ କରୁଥିବା ବେଳେ ବିହାର ବାସିନ୍ଦା ରାମ କୁମାର ରେଡିଓ ଅପରେଟର ଦାୟିତ୍ବ ତୁଲାଉଥିଲେ।

୮୭ ଟଙ୍କାରେ ରାଜମହଲ ବିକିବାରୁ ରାଜକୁମାରଙ୍କ ନାଁରେ ମାମଲା କଲେ ରାଜା

ଜର୍ମାନୀର ଜଣେ ରାଜା ଓ ରାଜକୁମାରଙ୍କ ମଧ୍ୟରେ ମନ ଫଟାଫଟି ଏତେମାତ୍ରାରେ ବଢ଼ିଗଲା ଯେ ରାଜା ନିଜ ପୁତ୍ରଙ୍କ ନାଁରେ ମାମଲା ରୁଜୁ କରିବାକୁ ପଛାଇ ନାହାନ୍ତି। ଦେଶର ଜଣେ ରାଜକୁମାର ୧୩୫ କୋଠରି ବିଶିଷ୍ଟ ରାଜମହଲକୁ ମାତ୍ର ୮୭ ଟଙ୍କାରେ ବିକି ଦେବାରୁ ରାଜା ତାଙ୍କ ନିଜ ପୁଅ ନାଁରେ କେସ୍‌ କରିଛନ୍ତି। ହାନୋଭରର ରାଜା ଏର୍ନଷ୍ଟ ଅଗଷ୍ଟ ନିଜର ୬୬ ବର୍ଷ ପୁରାତନ 'ମ୍ୟାରିନବର୍ଗ' ମହଲକୁ ୨୦୦୦ ମସିହାରେ ରାଜକୁମାର ଅଗଷ୍ଟ ଜୁନିଅରଙ୍କୁ ହସ୍ତାନ୍ତର କରିଥିଲେ। ଅଗଷ୍ଟ ଜୁନିଅର ୨୦୧୮ରେ ଏହି ମହଲକୁ ବିକ୍ରି କରିବା ପାଇଁ ଘୋଷଣା କରିଥିଲେ। ବର୍ତ୍ତମାନ ଏହି ମହଲକୁ ସେ ମାତ୍ର ୮୭ ଟଙ୍କାରେ ବିକ୍ରି କରି ଦେଇଛନ୍ତି। ସେ କହିଛନ୍ତି, ଏହି ମହଲରର ମରାମତି ପାଇଁ ୨୩ ମିଲିୟନ ପାଉଣ୍ଡର ଆବଶ୍ୟକ, ଯାହା ତାଙ୍କ ନିକଟରେ ନାହିଁ। ତେଣୁ ସେ ଏହାକୁ ବିକିବାକୁ ବାଧ୍ୟ ହେଲେ।

ଦିଶାଙ୍କ ଜାମିନକୁ ଦିଲ୍ଲୀ ପୋଲିସର ବିରୋଧ: ଟୁଲକିଟ୍ ଅନ୍ତର୍ଜାତୀୟ ଷଡ଼ଯନ୍ତ୍ରର ଅଂଶବିଶେଷ

ସ୍ବିଡେନର ଯୁବ ପରିବେଶବିତ୍ ଗ୍ରେଟା ଥନବର୍ଗଙ୍କ ଦ୍ବାରା ଶେୟାର କରାଯାଇଥିବା ଟୁଲକିଟ୍ ମାମଲାରେ ବେଙ୍ଗାଲୁରୁରୁ ପରିବେଶବିତ୍ ଦିଶା ରବିଙ୍କୁ ଗିରଫ କରାଯାଇଥିବା ବେଳେ ତାଙ୍କ ଜାମିନ୍ ଆବେଦନକୁ ଦିଲ୍ଲୀ ପୋଲିସ୍ ପକ୍ଷରୁ ବିରୋଧ କରାଯାଇଛି। ଭାରତକୁ ଅନ୍ତର୍ଜାତୀୟ ସ୍ତରରେ ବଦନାମ କରିବା ସକାଶେ ଟୁଲକିଟ୍ ମାମଲା ମାଧ୍ୟମରେ ଷଡ଼ଯନ୍ତ୍ର କରାଯାଇଛି ବୋଲି ଦିଲ୍ଲୀ ପୋଲିସ୍ ଅଭିଯୋଗ କରିବା ସହ ଦିଶା ଏହାର ଏକ ଅଂଶବିଶେଷ ବୋଲି କୁହାଯାଇଛି। ଅନ୍ୟପକ୍ଷରେ ଦିଶାଙ୍କ ପକ୍ଷରୁ ମାମଲା ପରିଚାଳନା କରୁଥିବା ଓକିଲ ସିଦ୍ଧାର୍ଥ ଅଗରୱାଲ୍ ଶନିବାର ଦିଲ୍ଲୀ କୋର୍ଟରେ ଏହି ମାମଲାର ବିଚାର ବେଳେ ଦେଶରେ ହଜାର ହଜାର ସଂଖ୍ୟାରେ ଚାଷୀ ଆନ୍ଦୋଳନ କରୁଥିବା ବେଳେ ସେମାନଙ୍କ ଆନ୍ଦୋଳନର ପ୍ରଚାରା କରିବା ଯଦି ଦେଶଦ୍ରୋହ ହୁଏ, ତା’ହେଲେ ସେ ଜେଲରେ ରହିବାକୁ ପସନ୍ଦ କରିବେ ବୋଲି କହିଛନ୍ତି। ସେହିପରି ୨୨ ବର୍ଷୀୟା ଦିଶାଙ୍କ ଜାମିନ୍ ଆବେଦନର ଶୁଣାଣି ସ୍ଥାନୀୟ ପଟିଆଲା ହାଉସ୍ କୋର୍ଟରେ ଜାରି ରହିଥିବା ବେଳେ ଦିଲ୍ଲୀ ପୋଲିସ୍ ପକ୍ଷରୁ ପ୍ରତିନିଧିତ୍ବ କରୁଥିବା ଆଇନଜୀବୀ ଟୁଲକିଟ୍ ମାମଲାରେ ଦେଶକୁ ବଦନାମ କରିବା ସକାଶେ ଷଡ଼ଯନ୍ତ୍ର ହୋଇଥିବା ଅଧିକ ତଦନ୍ତ ପରେ ଜଣାପଡ଼ିବ ବୋଲି କହିଛନ୍ତି। ସେ କହିଛନ୍ତି ଯେ ଦିଶା ଅପରାଧିକ କାର୍ଯ୍ୟକଳାପ ସହ ଜଡ଼ିତ ଅଛନ୍ତି ବୋଲି ନିଜେ ବି ଜାଣିଛନ୍ତି। ସେ ଖାଲି ପୋଲିସ୍ ନିକଟରେ ଏହାକୁ ସ୍ବୀକାର କରିବା ବାକି ରହିଛି ବୋଲି ପୋଲିସ୍ ପକ୍ଷରୁ କୋର୍ଟରେ କୁହଯାଇଛି।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ