ଅପରାଧ

ଆଇପିଏଲ୍‌ ବେଟିଂ: ୬ ଗିରଫ

ଆଇପିଏଲ୍‌ ବେଟିଂ ବେଳେ ପୋଲିସ୍‌ର ଚଢ଼ାଉ। ଆସିକା ପାଟପୁର ଥାନା ଅଞ୍ଚଳରେ ଏକ ବଡ଼ ଧରଣର ଆଇପିଏଲ ବେଟିଂକୁ ପଣ୍ଡ କରିଛି ପୋଲିସ୍‌। ଗଞ୍ଜାମ ଜିଲ୍ଲା ପାଟପୁର ଥାନା ଅଞ୍ଚଳରେ ଆଇପିଏଲ୍‌ ବେଟିଂରେ ସମ୍ପୃକ୍ତ ଥିବା ୬ ଅଭିଯୁକ୍ତଙ୍କୁ ପୋଲିସ୍‌ ରବିବାର ଗିରଫ କରି କୋର୍ଟ ଚାଲାଣ କରିଛି। ସେମାନେ ହେଲେ ଦିଗପହଣ୍ଡି ଥାନା ଫାସିଗୁଡ଼ା ଗ୍ରାମର ରମେଶ ଚନ୍ଦ୍ର ନାୟକ, ମଳାଭଞ୍ଜା ଗ୍ରାମର ଯୋଗୀ ବେହେରା, ପାଟପୁର ଥାନା ପୋଡ଼ାମାରି ଗ୍ରାମର କାଳୀଚରଣ ସାହୁ, ଶିବ ଶଙ୍କର ମହାନ୍ତି, ଧରମପୁର ଗ୍ରାମର ବିଜୟ କୁମାର ପ୍ରଧାନ ଏବଂ ଏ.ବାବୁଲା ଦୋରା। ଅଭିଯୁକ୍ତମାନଙ୍କର ଜାମିନ୍‌ ନାମଞ୍ଜୁର ହେବାରୁ ସେମାନଙ୍କୁ ଜେଲ୍‌କୁ ପଠାଇ ଦିଆଯାଇଛି। ଅଭିଯୁକ୍ତଙ୍କଠାରୁ ୮ଟି ମୋବାଇଲ ଫୋନ୍‌ ସମେତ ୧ ଲକ୍ଷ ୬୦ ହଜାର ୫୦୦ ଟଙ୍କା ଜବତ କରାଯାଇଛି।

ଅପହରଣ ପରେ ୬ ବର୍ଷର ଶିଶୁ ଗୁରତର ଅବସ୍ଥାରେ ଜଙ୍ଗଲରୁ ଉଦ୍ଧାର

ସମ୍ବଲପୁର ଜିଲ୍ଲାର ମହୁଲପାଲି ଥାନା ସୀମାନ୍ତ ସୁନ୍ଦରଗଡ଼ ଜିଲ୍ଲା ଗୁରୁଣ୍ଡିଆ ଥାନା ଅନ୍ତର୍ଗତ ସୋଲ ଗ୍ରାମରେ ଏକ ଅଭାବନୀୟ ଘଟଣା ଘଟିଛି। ସ୍ୱର୍ଗତ ଦିଲୀପ ଦର୍କାଙ୍କ ୬ ବର୍ଷ ପୁଅ ସୁଗମ ଦର୍କାଙ୍କୁ ଶନିବାର କେହି ଦୁର୍ବୃତ୍ତ ଅପହରଣ କରି ପ୍ରାଣାନ୍ତକ ଆକ୍ରମଣ କରିଛି। ଗୁରୁତର ଅବସ୍ଥାରେ ତାକୁ ନିକଟସ୍ଥ ଏକ ଜଙ୍ଗଲରୁ ଉଦ୍ଧାର କରାଯାଇଛି। ପରିବାର ଲୋକେ ରାତି ସାରା ଖୋଜାଖୋଜି କରି ସୁଗମର କୌଣସି ଖୋଜଖବର ନ ପାଇ ଗୁରୁଣ୍ଡିଆ ଥାନାରେ ଲିଖିତ ଅଭିଯୋଗ କରିଥିଲେ। ରବିବାର ଦିନ ତମାମ ଗୁରୁଣ୍ଡିଆ ପୋଲିସ ଓ ଗ୍ରାମବାସୀ ମିଶି ମିଳିତ ଭାବେ ଖୋଜିବାରୁ ଅପରାହ୍‌ଣରେ ସୁଗମକୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଥିଲା। ସେଠାରୁ ତାକୁ ଚିକିତ୍ସା ପାଇଁ ପ୍ରଥମେ କୁଚିଣ୍ଡା ମେଡିକାଲକୁ ନିଆଯାଇଥିଲା। ଅବସ୍ଥା ସଂକଟାପନ୍ନ ଥିବାରୁ ତାକୁ ବୁର୍ଲା ସ୍ଥାନାନ୍ତର କରିଥିବା ଜଣାଯାଇଛି। ଏନେଇ ଗୁରୁଣ୍ଡିଆ ପୋଲିସ ଏକ ମାମଲା ରୁଜୁ କରି ତଦନ୍ତ ଜାରି ରଖିଛି।

ରୋହିଣୀ କୋର୍ଟ ଶୁଟଆଉଟ୍ ମାମଲାରେ ୨ ଗିରଫ, ଟିଲୁ ନିର୍ଦେଶରେ ହୋଇଥିଲା ଗୁଳିକାଣ୍ଡ

ଗତ ଶୁକ୍ରବାର ସ୍ଥାନୀୟ ରୋହିଣୀ କୋର୍ଟ ପରିସରରେ ହୋଇଥିବା ଗୁଳିକାଣ୍ଡ ଘଟଣାରେ ରବିବାର ଦୁଇ ଜଣଙ୍କୁ ଗିରଫ କରାଯାଇଛି। ଦିଲ୍ଲୀ ପୋଲିସ୍ ଏହି ଗିରଫଦାରୀ କରିଥିବା ବେଳେ ଶୁକ୍ରବାର ଶୁଟଆଉଟ୍ ମାମଲାରେ ଗ୍ୟାଙ୍ଗଷ୍ଟର୍ ଜିତେନ୍ଦର ଗୋଗୀ ନିହତ ହୋଇଥିଲା। ଗିରଫ ହୋଇଥିବା ଦୁଇ ଅଭିଯୁକ୍ତ ହେଲେ ଉମଙ୍ଗ ଯାଦବ ଓ ବିନୟ। ବର୍ତ୍ତମାନ ଦିଲ୍ଲୀର ମାଣ୍ଡୋଲି ଜେଲରେ କଏଦୀ ଭାବେ ରହିଥିବା ଗ୍ୟାଙ୍ଗଷ୍ଟର୍ ଟିଲୁ ତାଜପୁରିଆ ଜେଲ୍ ଭିତରୁ ବିନୟକୁ ବିରୋଧୀ ଗୋଷ୍ଠୀର ସଦସ୍ୟ ଗୋଗୀକୁ ହତ୍ୟା କରିବା ସକାଶେ ଦାୟିତ୍ବ ଦେଇଥିଲା। ଅନ୍ୟପକ୍ଷରେ ଉମଙ୍ଗ ଯାଦବ ଜଣେ ଏଲଏଲବି ଡ୍ରପଆଉଟ୍ ହୋଇଥିବା ବେଳେ ସେ ଘଟଣା ଦିନ ଆଇନଜୀବୀ ପୋଷାକ ପିନ୍ଧି ରୋହିଣୀ କୋର୍ଟରେ ହାଜର ହୋଇଥିଲା। ତା’ ମାଧ୍ୟମରେ ଅନ୍ୟ ଦୁଇ ଜଣ ଶୁଟର୍ କୋର୍ଟରେ ପହଞ୍ଚିଥିଲେ। ଏନକାଉଣ୍ଟର୍ ପରେ ଅଭିଯୁକ୍ତ ବିନୟ ଅନ୍ୟ ଦୁଇ ଶୁଟରଙ୍କ ପୋଷାକ ଓ ମୋବାଇଲ୍ ଫୋନ୍ ନେଇ କୋର୍ଟ ପରିସର ବାହାରକୁ ଚାଲିଯାଇଥିଲା। ତେବେ ବିନୟକୁ ଗିରଫ କରିବା ସହ ଦିଲ୍ଲୀ ପୋଲିସ୍ ଉକ୍ତ ସମସ୍ତ ପୋଷାକ ଓ ମୋବାଇଲ୍ ଫୋନକୁ ଜବତ କରିଛି। ଏହି ମାମଲାର ତଦନ୍ତ କରୁଥିବା ସିବିଆଇକୁ ଦୁଇ ଗିରଫ ଅଭିଯୁକ୍ତଙ୍କୁ ତୁରନ୍ତ ହସ୍ତାନ୍ତର କରାଯିବ ବୋଲି ଦିଲ୍ଲୀ ପୋଲିସ୍ ପକ୍ଷରୁ ସୂଚନା ଦିଆଯାଇଛି।

ରୋହିଣୀ କୋର୍ଟ ପରିସରରେ ଗ୍ୟାଙ୍ଗୱାର୍: ଗ୍ୟାଙ୍ଗଷ୍ଟର୍ ଗୋଗୀ ସମେତ ୩ ମୃତ

ସ୍ଥାନୀୟ ରୋହିଣୀ କୋର୍ଟ ପରିସରରେ ଶୁକ୍ରବାର ଦୁଇ ଗ୍ୟାଙ୍ଗଷ୍ଟର୍ ଗୋଷ୍ଠୀ ମଧ୍ୟରେ ଗୁଳି ବିନିମୟ ହେବା ଫଳରେ ୩ ଜଣଙ୍କର ମୃତ୍ୟୁ ଘଟିଛି। ଏହାଛଡ଼ା ଏହି ଗୁଳିକାଣ୍ଡ ଘଟଣାରେ ଜଣେ ଆଇନଜୀବୀ ମଧ୍ୟ ଆହତ ହୋଇଥିବା ଜଣାପଡ଼ିଛି। ଏହି ଗୁଳିକାଣ୍ଡ ଟିଲୁ ତାଜପୁରିଆ ଗ୍ୟାଙ୍ଗ୍ ଓ ଗ୍ୟାଙ୍ଗଷ୍ଟର୍ ଜିତେନ୍ଦ୍ର ଓରଫ୍ ଗୋଗି ଗ୍ୟାଙ୍ଗ୍ ମଧ୍ୟରେ ହୋଇଥିବା ଅନୁମାନ କରାଯାଉଛି। ସହରରେ ଏହି ଦୁଇଟି ଗ୍ୟାଙ୍ଗ୍ ମଧ୍ୟରେ ପୂର୍ବରୁ ମଧ୍ୟ ଶତ୍ରୁତା ରହିଆସିଛି। ଉଭୟ ଜିତେନ୍ଦ୍ର ଗୋଗି ଓ ଟିଲୁ ତାଜପୁରିଆ କଲେଜରେ ପାଠ ପଢ଼ୁଥିବା ସମୟରୁ ପରସ୍ପର ବିରୋଧରେ ଲଢ଼େଇ କରିଆସୁଥିବା ବେଳେ ଏବେ ବି ଦୁଇ ଗ୍ୟାଙ୍ଗ୍ ମଧ୍ୟରେ ଅହିନକୂଳ ସମ୍ପର୍କ ଜାରି ରହିଛି। ଉଭୟଙ୍କ ମଧ୍ୟରେ ୨୦୧୦ ପୂର୍ବରୁ ବନ୍ଧୁତ ରହିଥିଲା। କିନ୍ତୁ ଦିଲ୍ଲୀ ଉପକଣ୍ଠସ୍ଥ ଏକ କଲେଜର ଷ୍ଟୁଡେଣ୍ଟ୍ ୟୁନିଅନ୍ ନିର୍ବାଚନକୁ ନେଇ ଉଭୟ ପରସ୍ପରର ବିରୋଧୀ ହୋଇଥିଲେ, ଯାହାକି ପରେ ଗ୍ୟାଙ୍ଗ୍ ୱାରର ରୂପ ନେଇଆସିଛି। ଗତ ୨୦୧୮ରେ ଗୋଗି ଓ ଟିଲୁ ଗ୍ୟାଙ୍ଗ୍ ମଧ୍ୟରେ ବୁରାରିଠାରେ ଗୁଳିବିନିମୟ ହୋଇଥିଲା, ଯେଉଁଥିରେ ୩ ଜଣ ଲୋକଙ୍କର ମୃତ୍ୟୁ ଘଟିଥିଲା ଓ ୫ ଜଣ ଆହତ ହୋଇଥିଲେ। ଅଦ୍ୟାବଧି ଉଭୟ ଗୋଷ୍ଠୀ ମଧ୍ୟରେ ଗୁଳିକାଣ୍ଡ ଘଟିଥିବା ବେଳେ ଏଥିରେ ଅତି କମରେ ଉଭୟ ପକ୍ଷର ଶହେ ଜଣ ଲୋକ ମୃତ୍ୟୁବରଣ କରିସାରିଛନ୍ତି।

ମହନ୍ତ ନରେନ୍ଦ୍ର ଗିରିଙ୍କ ମୃତ୍ୟୁ ମାମଲାର ତଦନ୍ତ ଦାୟିତ୍ବ ନେଲା ସିବିଆଇ

ଭାରତୀୟ ଅଖାଡ଼ା ପରିଷଦର ମୁଖ୍ୟ ମହନ୍ତ ନରେନ୍ଦ୍ର ଗିରି ଗତ ସୋମବାର ଆତ୍ମହତ୍ୟା କରିଥିବା ବେଳେ ଏହି ମାମଲାରେ ତାଙ୍କର ପ୍ରମୁଖ ଶିଷ୍ୟ କୁହାଯାଉଥିବା ଆନନ୍ଦ ଗିରିଙ୍କ ସହ ଏକାଧିକ ଗିରଫଦାରୀ ହୋଇଛି। ତେବେ ଇତିମଧ୍ୟରେ ଉତ୍ତର ପ୍ରଦେଶ ପୋଲିସଠାରୁ ତଦନ୍ତ ଦାୟିତ୍ବ ସିବିଆଇକୁ ହସ୍ତାନ୍ତର କରାଯାଇଛି। ମହନ୍ତ ନରେନ୍ଦ୍ର ଗିରି ଏକ ୧୨ ପ୍‌ଷ୍ଠା ବିଶିଷ୍ଟ ସୁଇସାଇଡାଲ୍ ନୋଟ୍ ଛାଡ଼ି ଯାଇଥିବା ବେଳେ ତାଙ୍କ ମୃତ୍ୟୁ ପାଇଁ ସେ ସମ୍ପୂର୍ଣ୍ଣ ଭାବେ ଆନନ୍ଦ ଗିରିଙ୍କ ଦ୍ବାରା ଭାଇରାଲ୍ କରାଯାଇଥିବା ତାଙ୍କର ଏକ ଆପତ୍ତିଜନକ ଫଟୋ କାରଣ ବୋଲି ଦର୍ଶାଇଛନ୍ତି। ତେବେ ତଦନ୍ତକୁ ଅଧିକ ତ୍ବରାନ୍ବିତ କରିବା ସକାଶେ ଗୁରୁବାର ଉତ୍ତର ପ୍ରଦେଶର ସରକାର ସିବିଆଇ ତଦନ୍ତ ପାଇଁ ସୁପାରିସ କରିଥିଲେ। ଶୁକ୍ରବାର ଏହି ମାମଲାର ତଦନ୍ତ ଦାୟିତ୍ବ ପାଇବା ପରେ ତୁରନ୍ତ ସିବିଆଇ ତା’ର ପଦକ୍ଷେପ ନେବା ଆରମ୍ଭ କରିବାକୁ ଯାଇ ଗୋଟିଏ ଟିମ୍‌ ଗଠନ କରିଛି। ଏଥିସହ ନରେନ୍ଦ୍ର ଗିରିଙ୍କ ମୃତ୍ୟୁ ଘଟଣାରେ ମାମଲା ମଧ୍ୟ ରୁଜୁ କରିଛି। ରିପୋର୍ଟ ଲେଖାଯିବା ପର୍ଯ୍ୟନ୍ତ ସିବିଆଇର ତଦନ୍ତକାରୀ ଟିମ୍‌ରେ ଥିବା ସଦସ୍ୟମାନେ ଦିଲ୍ଲୀରୁ ପ୍ରୟାଗରାଜ ଅଭିମୁଖେ ଯାତ୍ରା କରିଛନ୍ତି। ସେମାନେ ସେଠାରେ ପହଞ୍ଚି ସ୍ଥାନୀୟ ପୋଲିସଠାରୁ ନରେନ୍ଦ୍ର ଗିରିଙ୍କ ମୃତ୍ୟୁ ସହ ଜଡ଼ିତ ସମସ୍ତ ଦସ୍ତାବିଜ ସଂଗ୍ରହ କରିବେ। ସିବିଆଇ ନରେନ୍ଦ୍ର ଗିରିଙ୍କ ମୃତ୍ୟୁ ଘଟଣାର ଅସଲ କାରଣ ଜାଣିବା ପାଇଁ ଏକ ୬ ଜଣିଆ ଟିମ ଗଠନ କରିଥିବା ଜଣାପଡ଼ିଛି।

ଡୋମ୍ବିୱଲୀ ନାବାଳିକା ଗଣଦୁଷ୍କର୍ମ ମାମଲାରେ ୨୬ ଗିରଫ

ଡୋମ୍ବିୱଲୀ ନାବାଳିକା ଗଣଦୁର୍ଷ୍କମ ମାମଲାରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ଜଣେ ୧୫ ବର୍ଷିୟା ନାବାଳିକାକୁ ୨୯ ଜଣ ଗଣଦୁଷ୍କର୍ମ କରିଛନ୍ତି। ଏମାନଙ୍କ ଭିତରୁ ୨୬ ଜଣ ଅଭିଯୁକ୍ତଙ୍କୁ ପୋଲିସ ଧରିବାରେ ସମର୍ଥ ହୋଇଥିଲା ବେଳେ ଆଉ ୩ ଜଣଙ୍କୁ ଧରିବା ପାଇଁ ଜୋରଦାର ପ୍ରୟାସ ଚାଲିଛି। ଅତିରିକ୍ତ ପୋଲିସ ଏସପି ଦତ୍ତ କାରଲାଙ୍କ ସୂଚନାନୁସାରେ ୨୪ ଜଣଙ୍କୁ ଏହି ଗଣଦୁଷ୍କର୍ମ ମାମଲାରେ ପୋଲିସ ଗିରଫ କରିଛି। ଆଉ ୨ ଜଣ ନାବାଳକ ଅଭିଯୁକ୍ତ ଧରାପଡ଼ିଛନ୍ତି। ଏଥିରେ ମୁଖ୍ୟ ଅଭିଯୁକ୍ତ ଭାବେ ନାବାଳିକାଙ୍କ ସାଙ୍ଗ ଚିହ୍ନଟ ହୋଇଛନ୍ତି। ଗତ ଜାନୁଆରୀ ମାସରେ ନାବାଳିକାଙ୍କ ସାଙ୍ଗ ତାଙ୍କୁ ପ୍ରଥମେ ଦୁର୍ଷ୍କମ କରିବା ସହ ଏହାର ଭିଡିଓ ଚିତ୍ର ଉତ୍ତୋଳନ କରିଥିଲା। ଆଉ ଏହି ଭିଡିଓଟି ନାବାଳିକା ଜଣକ ପାଇଁ ପରବର୍ତ୍ତୀ ସମୟରେ କାଳ ହୋଇଥିଲା।

ଦୁଇ ଅଧିକାରୀଙ୍କଠାରୁ ୫ କୋଟିର ଆୟ ବହିର୍ଭୂତ ସମ୍ପତ୍ତି ଠାବ

ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ପୂର୍ବ ନେସ୍କୋ ଏବଂ ବର୍ତ୍ତମାନର ଟାଟା ପାୱାର ନର୍ଦନ ଓଡ଼ିଶା ଡିଷ୍ଟ୍ରିବ୍ୟୁସନ ଲିମିଟେଡ୍‌ (ଟିପିଏନ୍‌ଓଡିଏଲ୍‌) ବିଭାଗ ଏମ୍‌ଆର୍‌ଟି ଏସ୍‌ଡିଓ ମହେଶ୍ୱର ସେଠୀଙ୍କ ଘରେ ଭିଜିଲାନ୍ସ ବିଭାଗ ପକ୍ଷରୁ ଚଢ଼ାଉ ଜାରି ରହିଛି। ମହେଶ୍ବର ସେଠୀଙ୍କ ଘର ସମେତ ୫ଟି ସ୍ଥାନରେ ଭିଜିଲାନ୍ସ ପକ୍ଷରୁ ଚଢ଼ଉ କରାଯାଇଥିଲା। ଚଢ଼ାଉ ପରେ ତାଙ୍କଠାରୁ ଅଢ଼େଇ କୋଟିର ସମ୍ପତ୍ତି ଠାବ ହୋଇଛି। ସେହିପରି ଓଡ଼ିଶା ନିର୍ମାଣ ନିଗମ ଲିମିଟେଡ୍ (ଓସିସିଏଲ୍)ର ବରିଷ୍ଠ ପ୍ରବନ୍ଧକ ରଞ୍ଜନ କୁମାର ଡାଙ୍ଗଙ୍କ ବାସଭବନରେ ଭିଜିଲାନ୍ସ ଚଢ଼ଉ ହୋଇଛି। ଆୟ ବହିର୍ଭୁତ ସମ୍ପତ୍ତି ଠୁଳ ଅଭିଯୋଗରେ ସୋମବାର ଭିଜିଲାନ୍ସ ବିଭାଗ ପକ୍ଷରୁ ଡାଙ୍ଗଙ୍କ ସମ୍ବଲପୁରସ୍ଥିତ ଚୈତନ୍ୟ ନଗରସ୍ଥିତ ନିଜ ବାସଭବନ, କୁଞ୍ଜେଲପଡାସ୍ଥିତ ଶ୍ବଶୁରଘର ଓ ତାଙ୍କ କାର୍ଯ୍ୟାଳୟରେ ଆଦି ଏକକାଳୀନ ୩ଟି ସ୍ଥାନରେ ଚଢ଼ଉ କରାଯାଇଥିଲା। ତାଙ୍କ ଠାରୁ ମଧ୍ୟ ଦୁଇ କୋଟିରୁ ଊର୍ଦ୍ଧ୍ବ ଆୟ ବହିର୍ଭୂତ ସମ୍ପତ୍ତି ଠାବ ହୋଇଛି। ଉଭୟ ଅଧିକାରୀଙ୍କ ଠାରୁ ମୋଟ ୫ କୋଟି ଟଙ୍କାର ସମ୍ପତ୍ତି ଠାବ ହୋଇଛି।

ଅଷ୍ଟ୍ରେଲିଆରେ ଯୌନ ନିର୍ଯାତନା ମାମଲାରେ ଗିରଫ ହୋଇଥିଲେ ଆନନ୍ଦ ଗିରି

ଗତ ସୋମବାର ସନ୍ଧ୍ୟାରେ ଅଖିଳ ଭାରତୀୟ ଅଡ଼ାଡ଼ା ପରିଷଦର ମୁଖ୍ୟ ମହନ୍ତ ନରେନ୍ଦ୍ର ଗିରି ଆତ୍ମହତ୍ୟା କରିଥିବା ବେଳେ ଏହି ମାମଲାରେ ତାଙ୍କ ଶିଷ୍ୟ ଆନନ୍ଦ ଗିରିଙ୍କୁ ଗିରଫ କରାଯାଇଛି। ନରେନ୍ଦ୍ର ଗିରି ଛାଡ଼ିଯାଇଥିବା ସୁଇସାଇଡାଲ୍ ନୋଟରେ ତାଙ୍କର ଆତ୍ମହତ୍ୟା ପାଇଁ ସେ ଆନନ୍ଦଙ୍କୁ ଦାୟୀ କରିଛନ୍ତି। ଆନନ୍ଦ ତାଙ୍କର ଏକ ଫଟୋକୁ କଦର୍ଯ୍ୟ କରି ସୋସାଲ୍ ମିଡିଆରେ ଭାଇରାଲ୍ କରିବା ଫଳରେ ସେ ସମାଜ ଚକ୍ଷୁରେ ବେଶ୍ ଲଜ୍ଜିତ ହୋଇ ଶେଷରେ ଆତ୍ମହତ୍ୟା କରି ଚରମ ନିଷ୍ପତ୍ତି ନେଇଥିବା ମହନ୍ତ ନରେନ୍ଦ୍ର ଗିରି ଛାଡ଼ିଯାଇଥିବା ୧୨ ପୃଷ୍ଠା ସମ୍ବଳିତ ସୁଇସାଇଡାଲ୍ ନୋଟରେ ଉଲ୍ଲେଖ କରିଛନ୍ତି। ତେବେ ଆନନ୍ଦ ନିଜକୁ ଉତ୍ତର ପ୍ରଦେଶର ବଡେ ହନୁମାନ ମନ୍ଦିରର ମହନ୍ତ ବୋଲାଉଥିବା ବେଳେ ତାଙ୍କ ନାମରେ ପୂର୍ବରୁ ବହୁ ସାଂଘାତିକ ମାମଲା ମଧ୍ୟ ଥିବା ତଦନ୍ତ ବେଳେ ପଦାକୁ ଆସିଛି। ଅଖାଡ଼ା ଓ ମଠରେ ଦିନକୁ ଦିନ ଆନନ୍ଦଙ୍କର ମହତ୍ତ୍ବ ଓ ପ୍ରଭାବ ବଢ଼ିବା ଫଳରେ ସେ କ୍ରମଶଃ ଇଂଲିଶ୍ ଶିଖିଥିଲେ। ବିଦେଶରେ ପ୍ରଚାର କରିବା ଦିଗରେ ସଫଳତା ପାଇବା ସକାଶେ ସେ ଇଂରାଜୀ ଶିଖିଥିଲେ। ସେ ମଧ୍ୟ ଧାର୍ମିକ ପ୍ରଚାର କାର୍ଯ୍ୟରେ ଅଷ୍ଟ୍ରେଲିଆ ଯାଇଥିଲେ। କିନ୍ତୁ ଗତ ୨୦୧୯ରେ ସେ ସେଠାରେ ଗିରଫ ହୋଇଥିଲେ। ଦୁଇ ଜଣ ମହିଳାଙ୍କୁ ଯୌନ ନିର୍ଯାତନା ଦେଇଥିବା ଅଭିଯୋଗରେ ସେଠାକାର ପୋଲିସ୍ ଆନନ୍ଦଙ୍କୁ ଗିରଫ କରିଥିଲା।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ

୩୨ତମ ଅଲିମ୍ପିକ୍ସ ଉଦଯାପିତ: ଟୋକିଓକୁ
ଟୋକିଓ: ୧୭ ଦିନ ଧରି ଚାଲିଥିବା କ୍ରୀଡ଼ା ମହାକୁମ୍ଭ ଅଲିମ୍ପିକ୍ସର ୩୨ତମ ସଂସ୍କରଣରେ ରବିବାର ପୂର୍ଣ୍ଣଚଛେଦ ପଡ଼ିଛି। ଗତ ୨୦୨୦ରେ ସଂସ୍କରଣଟି ଆୟୋଜିତ ହେବାକୁ ଥିଲେ ହେଁ କୋରୋନା ମହାମାରୀ କାରଣରୁ ଏହାକୁ ବର୍ଷେ ଘୁଞ୍ଚାଇ ଦିଆଯାଇଥିଲା। ଜାପାନରେ ଗତ ୨୩ ତାରିଖରେ ସଂସ୍କରଣ ଆରମ୍ଭ ପୂର୍ବରୁ ରାଜଧାନୀ ଟୋକିଓରେ ଏମର୍ଜେନସି ଜାରି ହେବା ସତ୍ତ୍ବେ ଆୟୋଜକଙ୍କ ଦୃଢ଼ ଇଛାଶକ୍ତି ଓ ଅଂଶୀଦାର ଦେଶର ସହଯୋଗ ବଳରେ ଅନତର୍ଜାତୀୟ ଅଲିମ୍ପିକ୍ସ କମିଟି (ଆଇଓସି) ଓ ଟୋକିଓ ୨୦୨୦ ସୁଚାରୁ ରୂପେ ଶେଷ କରିଛନ୍ତି। ସଂସ୍କରଣଟି ରବିବାର ଉଦଯାପିତ ହୋଇଥିବା ବେଳେ ବିନା ଦର୍ଶକରେ ଆୟୋଜିତ ହୋଇଥିଲେ ମଧ୍ୟ ବିଶ୍ବବ୍ୟାପୀ ଦର୍ଶକ ଏହାକୁ ମନଭରି ଉପଭୋଗ କରିଛନ୍ତି। ଆକର୍ଷଣୀୟ ଉଦଘାଟନୀ ଉତ୍ସବ ସହ ଆରମ୍ଭ ହୋଇଥିବା ଅଲିମ୍ପିକ୍ସର ୩୨ତମ ସଂସ୍କରଣଟି ରଙ୍ଗିନ ଆଲୋକମାଳା ସହ ରଙ୍ଗବେରଙ୍ଗର ଆତସବାଜି ସହ ଶେଷ ହୋଇଛି। ଆତସବାଜିରେ ଟୋକିଓ ଆକାଶ ପ୍ରଜ୍ଜ୍ବଳିତ ହେବା ସହ ଅଲିମ୍ପିକ୍ ରିଙ୍ଗଗୁଡ଼ିକର ଚିତ୍ର ପ୍ରତିଫଳିତ ହୋଇଥିଲା, ଯାହାକି ବେଶ୍ ଉପଭୋଗ୍ୟ ଥିଲା। ଏଥିସହ ଜାପାନ ରାଜଧାନୀରେ ଅଲିମ୍ପିକ୍ସ ଇଭେଣ୍ଟ ଉପରେ ପରଦା ଟଣାଯାଇଛି ଓ ପରବର୍ତ୍ତୀ ସଂସ୍କରଣର ଆୟୋଜକ ପ୍ୟାରିସକୁ ପତାକା ହସ୍ତାନ୍ତର କରାଯାଇଛି। ଏହି ପତାକା ହସ୍ତାନ୍ତର ସହ କୌଣସି ପ୍ରକାର ବାଧାବିଘ୍ନ ଅଲିମ୍ପିକ୍ସ ପରି କ୍ରୀଡ଼ା ମହାକୁମ୍ଭ ଆୟୋଜନରେ ବାଧକ ହୋଇପାରିବ ନାହିଁ, ଏପରି ଏକ ବାର୍ତ୍ତା ମଧ୍ୟ ଦିଆଯାଇଛି। ତା’ଛଡ଼ା ଘାତକ କୋରୋନାରେ ମୃତ୍ୟୁବରଣ କରିଥିବା ସଂକ୍ରମିତଙ୍କୁ ମଧ୍ୟ ସ୍ମରଣ କରାଯାଇଥିଲା। ଉଦଯାପନୀ ଉତ୍ସବରେ ଭାରତର ଧ୍ବଜାବାହକ ଦାୟିତ୍ବ ବ୍ରୋଞ୍ଜପଦକ ଜିତିଥିବା ପୁରୁଷ ରେସଲର୍ ବଜରଙ୍ଗ ପୁନିଆ ଶ୍ରେଷ୍ଠ ପ୍ରଦର୍ଶନକାରୀ ପ୍ରତିଯୋଗୀଙ୍କ ନେତୃତ୍ବ ନେଇଥିଲେ।
ପ୍ରମୋଦ ଡେଇଁପଡ଼ି ମୋତେ କୁଣ୍ଢାଇବେ ବୋଲି ଭାବି ନ
ନୂଆଦିଲ୍ଲୀ: ଭାରତୀୟ ବ୍ୟାଡ୍‌ମିଣ୍ଟନ୍ ଇତିହାସରେ ଏହା ଏକ ଅବିସ୍ମରଣୀୟ ଦୃଶ୍ୟ । ଟୋକିଓ ପାରାଲିମ୍ପିକ୍ସର ପୁରୁଷ ଏସ୍‌ଏଲ୍‌୩ ବ୍ୟାଡ୍‌ମିଣ୍ଟନ ଇଭେଣ୍ଟର ଫାଇନାଲ ମ୍ୟାଚ୍ ଜିତି ସ୍ବର୍ଣ୍ଣ ପଦକ ହାସଲ କରିବା ପରେ ଓଡ଼ିଆ ବ୍ୟାଡ୍‌ମିଣ୍ଟନ ଖେଳାଳି ପ୍ରମୋଦ ଭଗତ ଉତ୍ସବମୁଖର ନ ହୋଇ ସିଧା ଭାରତୀୟ ଦଳର ପ୍ରଶିକ୍ଷକ ଗୌରବ ଖାନ୍ନାଙ୍କ ପାଖକୁ ଦୌଡ଼ିଯାଇ ତାଙ୍କୁ ଆଲିଙ୍ଗନ କରିଥିଲେ। ପ୍ରମୋଦ ଏତେ ଖୁସି ହୋଇ ଯାଇଥିଲେ ଯେ ଗୌରବଙ୍କୁ ସେ ଆଲିଙ୍ଗନ କରି ଝୁଲି ପଡ଼ିଥିଲେ। ଗୌରବ କହିଛନ୍ତି ଯେ ଏହା ଅପ୍ରତ୍ୟାଶିତ ଥିଲା ଏବଂ ପ୍ରମୋଦ ଏପରି କରିବେ ବୋଲି ସେ ଆଦୌ ଆଶା କରି ନ ଥିଲେ। ପ୍ରମୋଦଙ୍କ ଏପରି ଆଚରଣ ତାଙ୍କୁ ବହୁତ ଖୁସି ଦେଇଥିଲା ବୋଲି ଭାରତୀୟ ଜାତୀୟ ବ୍ୟାଡ୍‌ମିଣ୍ଟନ ପ୍ରଶିକ୍ଷକ ଗୌରବ କହିଛନ୍ତି।