ଅପରାଧ

ଇସ୍ରାଏଲୀ ହ୍ୟାକର ଚୋରି କଲା ଭାରତୀୟଙ୍କ ଫୋନ୍ ସଂକ୍ରାନ୍ତ ଗୋପନୀୟ ତଥ୍ୟ

ଇସ୍ରାଏଲୀ ସଂସ୍ଥାର ଗୁଇନ୍ଦାଗିରି। ଭାରତୀୟଙ୍କ ଫୋନ ନମ୍ବର ହ୍ୟାକ୍ କରି ଫୋନ କଲ, ମେସେଜ ଓ ହ୍ୱାଟ୍ସଆପ ମେସେଜ ଆଦି ଗୋପନୀୟ ତଥ୍ୟ ଚୋରି କରିଛି। ଇସ୍ରାଏଲର ଏକ ସଂସ୍ଥା ୩୦୦ରୁ ଅଧିକ ଭାରତୀୟଙ୍କ ଫୋନ ନମ୍ବର ହ୍ୟାକ୍ କରିଛି। ଏଥିରେ ଅଛନ୍ତି ମୋଦୀ ସରକାରରେ ଥିବା ଦୁଇ ଜଣ ମନ୍ତ୍ରୀ, ସୁପ୍ରିମକୋର୍ଟର ଜଣେ ବିଚାରପତି, ବିରୋଧୀ ଦଳର ତିନି ଜଣ ନେତା ଏବଂ ୫୦ରୁ ଅଧିକ ସାମ୍ବାଦିକ, ବ୍ୟବସାୟୀ, ସରକାରୀ ଅଧିକାରୀ, ବୈଜ୍ଞାନିକ, ଆଇନଜୀବୀ ଏବଂ ସାମାଜିକ କାର୍ଯ୍ୟକର୍ତ୍ତା। ‘ଦ ୱାୟାର’ ପକ୍ଷରୁ ଏହି ରିପୋର୍ଟ ପ୍ରକାଶ ପାଇଛି। ଭାରତର କେଉଁ ଏଜେନ୍ସି ପକ୍ଷରୁ ଏହି ଇସ୍ରାଏଲୀ ସଂସ୍ଥା ଏଭଳି ଫୋନ୍ ହ୍ୟାକ୍ କରିଛି, ତାହା ଜଣାପଡ଼ି ନାହିଁ। ତେବେ କେନ୍ଦ୍ର ସରକାର ଏହି ଘଟଣାରେ ସମ୍ପୃକ୍ତ ଥିବା ଅଭିଯୋଗକୁ ଅସ୍ବୀକାର କରିଛନ୍ତି।

ପୋର୍ଟଲାଣ୍ଡରେ ଲଗାତାର ଗୁଳିକାଣ୍ଡ: ୨ ମୃତ, ଦୁଇ ଆହତ

ଆମେରିକାର ପୋର୍ଟଲାଣ୍ଡ୍ ଅନ୍ତର୍ଗତ ଓରେଗୋନଠାରେ ଶନିବାର ଏକାଧିକ ଗୁଳିକାଣ୍ଡ ଘଟଣାରେ ୨ ଜଣଙ୍କର ମୃତ୍ୟୁ ଘଟିଥିବା ବେଳେ ୭ ଜଣ ଆହତ ହୋଇଛନ୍ତି। ସହରର ୪ଟି ଭିନ୍ନ ଭିନ୍ନ ସ୍ଥାନରେ ଏହି ଗୁଳିକାଣ୍ଡ ଘଟିଛି। ଓରେଗୋନ୍‌ଠାରେ ଗତ ୬ ମାସ ହେଲା ଗୁଳିକାଣ୍ଡଓ ଅନ୍ୟାନ୍ୟ ହିଂସାକାଣ୍ଡ ଆଦି ଘଟଣା ବଢ଼ିଚାଲିଛି। ଓରେଗୋନଠାରେ ଗତ ୬ ମାସ ହେଲା ଗୁଳିକାଣ୍ଡ ଘଟଣା ବଢ଼ିଚାଲିଥିବାରୁ ଏହାକୁ ମେୟର ଟେଡ୍ ହ୍ବିଲର୍ ମହାମାରୀ ବୋଲି କହିଛନ୍ତି। ଏହି ଘଟଣା ରୋକିବା ସକାଶେ ଆଗାମୀ ଦିନରେ ପୋଟର୍ଲାଣ୍ଡ୍ ପୋଲିସ୍ ବ୍ୟୁରୋରେ ଅଧିକରୁ ଅଧିକ ଅଧିକାରୀଙ୍କୁ ନିଯୁକ୍ତି ଦିଆଯିବ। ପୋର୍ଟଲାଣ୍ଡ୍ ପୋଲିସ୍ ବ୍ୟୁରୋ ଗତ ବର୍ଷକ ଭିତରେ ୧୨୫ ଜଣ ନୂଆ ଅଧିକାରୀଙ୍କୁ ପାଇଥିଲେ ହେଁ ଆସନ୍ତା ମାସରେ ଅନେକ ଅଧିକାରୀ ଅବସର ନେବେ। ସହରରେ ପୋଲିସ୍ ଅଧିକାରୀମାନେ ନିଷ୍ଠୁରତା ପ୍ରଦର୍ଶନ କରିବା ସହ ରଙ୍ଗଭେଦ ନେଇ ଅନ୍ୟାୟ କରୁଥିବାରୁ ଏହାର ପ୍ରତିବାଦରେ ସ୍ଥାନୀୟ ଲୋକେ ବିରୋଧ ପ୍ରଦର୍ଶନ କରିଆସିଛନ୍ତି। ଗତ ବର୍ଷ ଅଣଶ୍ବେତାଙ୍ଗ ବ୍ୟକ୍ତି ଜର୍ଜ ଫ୍ଲଏଡଙ୍କୁ ମିନିପୋଲିସ୍ ପୋଲିସର ଜଣେ ଅଧିକାରୀ ତାଙ୍କ ବେକକୁ ମାଡ଼ିବସିବା ଫଳରେ ସେ ଅଣନିଃଶ୍ବାସୀ ହୋଇ ପ୍ରାଣ ହରାଇଥିଲେ। ଏହି ଘଟଣା ବିରୋଧରେ ଜନସାଧାରଣଙ୍କ ମଧ୍ୟରେ ଅଦ୍ୟାବଧି ରୋଷ କମି ନ ଥିବା ବେଳେ ଏହି କାରଣରୁ ପୋର୍ଟଲାଣ୍ଡ୍ ସିଟି କମିଶନ୍ ପୋଲିସ୍ ବିଭାଗକୁ ଦିଆଯାଉଥିବା ପାଣ୍ଠି ହ୍ରାସ କରିବା ଗୁଳିକାଣ୍ଡଜନିତ ହିଂସାକାଣ୍ଡ ରୋକିବା ଦାୟିତ୍ବରେ ଥିବା ୟୁନିଟକୁ ମଧ୍ୟ ଭାଙ୍ଗିଦେଇଥିଲେ।

କର୍ଫ୍ୟୁ ନିୟମ ଉଲ୍ଲଙ୍ଘନ: ସିଲ୍ ହେଲା ଅକ୍ଷୟ ପାତ୍ର ଫାଉଣ୍ଡେସନ୍‌ ବିଲ୍ଡିଂ, ୧୦ ଜଣଙ୍କ ନାଁରେ ମାମଲା

ରଥଯାତ୍ରା ବେଳେ କର୍ଫ୍ୟୁ ନିୟମ ଉଲ୍ଲଂଘନ ନେଇ କାର୍ଯ୍ୟାନୁଷ୍ଠାନ ନେଇଛି ଜିଲ୍ଲା ପ୍ରଶାସନ। ରଥଯାତ୍ରା ସମୟରେ ସୁରକ୍ଷା ବ୍ୟବସ୍ଥାରେ ଯେଭଳି କୌଣସି ତ୍ରୁଟି ନ ହୁଏ ସେଥିପାଇଁ ଛାତ ଉପରେ ଛିଡ଼ା ହୋଇ ଦର୍ଶନ ଉପରେ କଟକଣା ଲାଗୁ କରାଯାଇଥିଲା। କିନ୍ତୁ ଏହି ସମୟରେ କେତେକ ଲଜ୍‌ ଏବଂ ପୁରୀ ବଡ଼ଦାଣ୍ଡରେ ଥିବା ଅକ୍ଷୟ ପାତ୍ର ଫାଉଣ୍ଡେସନ୍‌ ବିଲ୍ଡିଂରେ ଇସ୍କନ୍‌ ଭକ୍ତ ଓ ଲୋକମାନେ ରହି ରଥଯାତ୍ରା ଦେଖିବା ସହ ଫଟୋ ଉଠାଉଥିବାର ଅଭିଯୋଗ ହେବାପରେ ଏହାକୁ ଗୁରୁତର ସହ ନେଇଛି ପ୍ରଶାସନ। ଅକ୍ଷୟ ପାତ୍ର ଫାଉଣ୍ଡେସନ ବିଲ୍ଡିଂକୁ ସିଲ୍ କରିଛି ଜିଲ୍ଲା ପ୍ରଶାସନ। ଏଥି ସହିତ ପ୍ରଶାସନ ପକ୍ଷରୁ ଜାରି କରାଯାଇଥିବା ଏସ୍‌ଓପିକୁ ଅବମାନନା କରି ରଥ କର୍ଡନ ମଧ୍ୟକୁ ପ୍ରବେଶ କରିଥିବାରୁ ୧୦ ଜଣଙ୍କ ନାଁରେ ମାମଲା ରୁଜୁ କରାଯାଇଥିବା ପୁରୀ ଏସ୍‌ପି ସୂଚନା ଦେଇଛନ୍ତି। ସମାନ ଅଭିଯୋଗ କ୍ରମେ ଗତକାଲି ମଧ୍ୟ ପୁରୀର ଏକ ଲଜ୍‌କୁ ସିଲ୍ କରିଥିଲା ପ୍ରଶାସନ।

ସୌମ୍ୟରଞ୍ଜନଙ୍କ ମୃତ୍ୟୁ ଘଟଣା: ପତ୍ନୀ ସମେତ ୩ ଜଣଙ୍କ ନାଁରେ ହତ୍ୟା ମାମଲା ରୁଜୁ

ଗଜପତି ଜିଲ୍ଲା ପାରଳାଖେମୁଣ୍ଡି ସହକାରୀ ବନ ସଂରକ୍ଷକ (ଏସି୍‌ଏଫ୍‌) ସୌମ୍ୟରଞ୍ଜନ ମହାପାତ୍ରଙ୍କ ସନ୍ଦେହଜନକ ମୃତ୍ୟୁ ଘଟଣାରେ ଆସିଛି ନୂଆ ମୋଡ଼। ସୋମବାର ବିଳମ୍ବିତ ରାତିରେ ସରକାରୀ ବାସଭବନରେ ପତ୍ନୀଙ୍କ ସହ ଥିବାବେଳେ ନିଆଁରେ ପୋଡ଼ି ଆଖି ବୁଝିଥିଲେ ସୌମ୍ୟରଞ୍ଜନ। ସୌମ୍ୟରଞ୍ଜନ ମୃତ୍ୟୁ ପଛରେ ବୋହୂ ବିଦ୍ୟାର ହାତ ଥିବା ଅଭିଯୋଗ କରିଛନ୍ତି ବାପା ଅଭିରାମ ମହାପାତ୍ର। ସହିପରି ଡିଏଫ୍‌ଓଙ୍କ ସହିତ ବିଦ୍ୟାଙ୍କର ଅନୈତିକ ସମ୍ପର୍କ ଥିବା ମଧ୍ୟ ଅଭିଯୋଗ ଆସିଛି। ମୃତ ସୌମ୍ୟରଞ୍ଜନଙ୍କ ବାପାଙ୍କ ଅଭିଯୋଗ ପରେ ୩ ଜଣଙ୍କ ବିରୋଧରେ ହତ୍ୟା ମାମଲା ରୁଜୁ କରିଛି ପାରଳାଖେମୁଣ୍ଡି ପୋଲିସ୍‌। ମୃତ ସୌମ୍ୟରଞ୍ଜନଙ୍କ ପତ୍ନୀ ବିଦ୍ୟା ଭାରତୀ, ଡିଏଫ୍‌ଓ ସଂଗ୍ରାମ ବେହେରା ଓ ରୋଷେୟାଙ୍କ ନାଁରେ ହତ୍ୟା ମାମଲା ରୁଜୁ ହୋଇଛି। ଏହି ୩ ଜଣଙ୍କ ବିରୋଧରେ ୩୦୨, ୧୨୦ ବି ଦଫାରେ ପୋଲିସ ମାମଲା ରୁଜୁ କରିଛି।

ଆଇଏସଆଇ ଏଜେଣ୍ଟ୍ ଗିରଫ, ସମ୍ବେଦନଶୀଳ ତଥ୍ୟ ଓ ମାନଚିତ୍ର ଜବତ

ରାଜସ୍ଥାନର ପୋଖରାନରୁ ଜଣେ ବ୍ୟକ୍ତିକୁ ଗିରଫ କରାଯାଇଛି। ଉକ୍ତ ବ୍ୟକ୍ତି ଜଣକ ବିରୋଧରେ ଅଫିସିଆଲ୍ ସିକ୍ରେଟ୍ସ ଆକ୍ଟ ଲାଗୁ କରାଯାଇଛି। ଉକ୍ତ ବ୍ୟକ୍ତି ଜଣକର ନାମ ହବିବୁର ରହମାନ୍ ବୋଲି ଜଣାପଡ଼ିଥିବା ବେଳେ ସେ ଭାରତୀୟ ପ୍ରତିରକ୍ଷା ପ୍ରତିଷ୍ଠାନ ସହ ଜଡ଼ିତ ବିଭିନ୍ନ ପ୍ରକାର ଗୋପନୀୟ ତଥ୍ୟ ପାକିସ୍ତାନକୁ ଯୋଗାଇଆସୁଥିବା ନେଇ ଅଭିଯୋଗ ରହିଛି। ଏହାଛଡ଼ା ସେ ଭାରତୀୟ ସ୍ଥଳସେନାର ବିଭିନ୍ନ ସମ୍ବେଦନଶୀଳ ତଥ୍ୟ ଯୋଗାଇବା ସହ ଭାରତର ମାନଚିତ୍ର ବି ଯୋଗାଇ ଆସୁଥିବା ଅଭିଯୋଗରେ ହବିବୁରକୁ ଗିରଫ କରାଯାଇଛି। ହବିବୁର୍ ପାକିସ୍ତାନର ଗୁଇନ୍ଦା ସଂସ୍ଥା ଆଇଏସଆଇ ସମ୍ପର୍କରେ ରହିବା ସହ ପାକିସ୍ତାନରୁ ମଧ୍ୟ ଏକାଧିକ ବାର ଫେରିଥିବା ନେଇ ସୂଚନା ରହିଥିବା ଦିଲ୍ଲୀ ପୋଲିସର କ୍ରାଇମ୍ ବ୍ରାଞ୍ଚ୍ ପକ୍ଷରୁ କୁହାଯାଇଛି। ହବିବୁରକୁ ଗିରଫ କରାଯିବା ପରେ ତାକୁ କ୍ରାଇମ୍ ବ୍ରାଞ୍ଚ୍ ପକ୍ଷରୁ ପଚରାଉଚରା ଚାଲିଛି। ହବିବୁରଠାରୁ ମଧ୍ୟ ସମ୍ବେଦନଶୀଳ ଦସ୍ତାବିଜ୍ ଓ ମାନଚିତ୍ର ଜବତ କରାଯାଇଛି। ଏଥିସହ ସ୍ଥଳସେନାର ଜଣେ ଯବାନ ହବିବୁରକୁ ତଥ୍ୟ ଯୋଗାଇବାରେ ସହଯୋଗ କରିଥିବା ପଚରାଉଚରା ବେଳେ ଜଣାପଡ଼ିଥିବା କ୍ରାଇମ୍ ବ୍ରାଞ୍ଚ୍ ପକ୍ଷରୁ କୁହାଯାଇଛି। ଏହି ସ୍ଥଳସେନା ଯବାନ ଜଣକ ପରମଜିତ୍ କୌର୍ ଓ ସେ ଆଗ୍ରାରେ କାର୍ଯ୍ୟ କରୁଥଇବା ଜଣାପଡ଼ିଛି।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ