ଅପରାଧ

ଦୁର୍ଦ୍ଦିନରେ ବି ଦୁର୍ନୀତି: ଦିଲ୍ଲୀରୁ ଜବତ ହେଲା ଶହେରୁ ଊର୍ଦ୍ଧ୍ବ ଅକ୍ସିଜେନ୍ କନସଣ୍ଟ୍ରେଟର

ଦେଶରେ କୋଭିଡ୍ ଭୂତାଣୁ ତା’ର ଦ୍ବିତୀୟ ଲହରୀରେ ବ୍ୟାପକ ରୂପ ଧାରଣ କରିଛି। ଦୈନିକ ରେକର୍ଡ ଅନୁପାତରେ ସଂକ୍ରମିତଙ୍କୁ ଚିହ୍ନଟ କରାଯାଉଥିବା ବେଳେ ମୃତକଙ୍କ ସଂଖ୍ୟା ମଧ୍ୟ ତାଳ ଦେଇ ବଢ଼ିଚାଲିଛି। ଫଳସ୍ବରୂପ ଦେଶରେ ସ୍ବାସ୍ଥ୍ୟ ଭିତ୍ତିଭୂମି ଉପରେ ଜବରଦସ୍ତ ପ୍ରଭାବ ପଡ଼ିଛି। ଦେଶର ଏକାଧିକ ହସ୍ପିଟାଲରେ ବେଡ୍ ନ ଥିବା ବେଳେ ଅକ୍ସିଜେନର ଘୋର ଅଭାବ କାରଣରୁ ଶହ ଶହ ଲୋକ ଅକ୍ସିଜେନ୍ ନ ପାଇ ପ୍ରାଣ ହରାଇଚାଲିଛନ୍ତି। ଏପରି ସ୍ଥିତିରେ ଦିଲ୍ଲୀରେ ଅକ୍ସିଜେନର ବେଆଇନ କାରବାର ଚାଲୁ ରହିଛି। ଅର୍ଥାତ୍ ଦୁର୍ଦ୍ଦିନରେ ଲାଭଖୋର ମନୋବୃତ୍ତି ସମ୍ପନ୍ନ ବ୍ୟବସାୟୀମାନେ ଏହାର ଫାଇଦା ନେବାକୁ ଉଦ୍ୟମ କରୁଛନ୍ତି। ସେମାନଙ୍କ ଆଗରେ କୌଣସି କୋଭିଡ୍ ସଂକ୍ରମିତ ରୋଗୀର ଜୀବନ ବଡ଼ ନୁହେଁ, ବରଂ ଜୀବନ ଆଗରେ ଟଙ୍କା କେଇଟା ବେଶ୍ ପ୍ରାଥମିକତା ରଖେ ବୋଲି ପ୍ରମାଣିତ ହୋଇଛି। ଗୁରୁବାର ରାଜଧାନୀ ଦିଲ୍ଲୀର ଲୋଦୀ କଲୋନୀରୁ ପୋଲିସ୍ ଏକ ରେସ୍ତୋରାଁରୁ ବ୍ୟାପକ ମାତ୍ରାରେ ଅକ୍ସିଜେନ୍ ସିଲିଣ୍ଡର୍ ଜବତ କରିଥିଲା। ଶୁକ୍ରବାର ମଧ୍ୟ ବିଭିନ୍ନ ସ୍ଥାନରେ ଚଢ଼ାଉ କରାଯାଇଥିବା ବେଳେ ଖାନ୍ ମାର୍କେଟର ଜଣାଶୁଣା ଖାନ୍ ଚାଚା ଦୋକାନା ଉପରେ ଚଢ଼ାଉ କରାଯାଇଥିଲା। ଏହି ଚଢ଼ାଉ ବେଳେ ସେଠାରେ ଶହେରୁ ଊର୍ଦ୍ଧ୍ବ ଅକ୍ସିଜେନ୍ କନସଣ୍ଟ୍ରେଟର୍ ଜବତ କରାଯାଇଛି। ଶୁକ୍ରବାର ସକାଳେ ଟାଉନ୍ ହଲ୍ ରେସ୍ତୋରାଁ ଓ ବାର ଉପରେ ପୋଲିସ୍ ପକ୍ଷରୁ ଚଢ଼ାଉ କରାଯାଇ ୯ଟି ଅକ୍ସିଜେନ୍ କନସଣ୍ଟ୍ରେଟର୍ ଜବତ କରାଯାଇଥିଲା।

କୋଭିଡରେ କୁଖ୍ୟାତ ଅଣ୍ଡରୱାର୍ଲ୍ଡ ଡନ୍ ଛୋଟା ରାଜନର ମୃତ୍ୟୁ!

କୁଖ୍ୟାତ ଅଣ୍ଡରୱାର୍ଲ୍ଡ ଡନ୍ ଛୋଟା ରାଜନ ଓରଫ୍ ରାଜେନ୍ଦ୍ର ନିକାଲଜେର ମୃତ୍ୟୁ ହୋଇଛି। ବର୍ତ୍ତମାନ ଦେଶରେ କୋଭିଡ୍ ସଂକ୍ରମଣ କାରଣରୁ ଦୈନିକ ହଜାର ହଜାର ଲୋକଙ୍କ ଜୀବନ ଯାଉଥିବା ବେଳେ ଶୁକ୍ରବାର ରାଜନ୍ ମଧ୍ୟ ଏହି ଭୂତାଣୁର ଶିକାର ହୋଇଥିବା ଗଣମାଧ୍ୟମ ରିପୋର୍ଟରେ ପ୍ରକାଶ ପାଇଛି। ଗତ ୨୪ ତାରିଖରେ ରାଜନ୍‌କୁ ଦିଲ୍ଲୀସ୍ଥିତ ଏମ୍ସରେ ଭର୍ତ୍ତି କରାଯାଇଥିଲା। କୋଭିଡ୍ ସଂକ୍ରମଣ କାରଣରୁ କ୍ରମଶଃ ତା’ର ସ୍ଥିତି ବିଗିଡ଼ିବାରେ ଲାଗିଥିଲା। ଶେଷରେ ଶୁକ୍ରବପାର ଅପରାହ୍ନରେ ତା’ର ମୃତ୍ୟୁ ହୋଇଯାଇଥିବା ଏମ୍ସ ପକ୍ଷରୁ କୁହାଯାଇଛି। ଅବଶ୍ୟ ଏନେଇ ତିହାର ଜେଲ୍ ଡିଜିପିଙ୍କ ପକ୍ଷରୁ ବିଧିବଦ୍ଧ ଭାବେ କୌଣସି ଘୋଷଣା କରାଯାଇନାହିଁ। କିନ୍ତୁ ଏକ ଗଣମାଧ୍ୟମରେ ପ୍ରକାଶିତ ରିପୋର୍ଟ ସତ୍ୟ ବୋଲି ଏମ୍ସ କର୍ତ୍ତ୍‌ପକ୍ଷ କହିଛନ୍ତି। ସେହିପରି ନ୍ୟୁଜ୍ ଏଜେନ୍ସି ଏଏନ୍ଆଇ ତା’ର ରିପୋର୍ଟରେ ରାଜନ୍ ଏବେ ବି ଜୀବିତ ଅଛି ଓ ଏମ୍ସ କର୍ତ୍ତ୍‌ପକ୍ଷ ମଧ୍ୟ ଏହାକୁ ସ୍ବୀକାର କରିଥିବା ଦାବି କରିଛି। ୬୧ ବର୍ଷୀୟ ରାଜନ୍ ଦିଲ୍ଲୀ ସବୁଠାରୁ ଅଧିକ ସୁରକ୍ଷା ବଳୟ ଭିତରେ ଥିବା ତିହାର ଜେଲରେ ତା’ର କାଟିଆସୁଥିଲା। ଏପରିକି ସୁରକ୍ଷା କାରଣରୁ ରାଜନକୁ ଉକ୍ତ ଜେଲର ଅନ୍ୟ କୌଣସି ଅନ୍ତେବାସୀଙ୍କ ସହ ଭେଟ ମଧ୍ୟ କରିବାର ସୁଯୋଗ ମିଳୁ ନ ଥିଲା। ଉକ୍ତ ଜେଲର କେତେକ ଅଧିକାରୀ କୋରୋନା ସଂକ୍ରମିତ ଭାବେ ଚିହ୍ନଟ ହୋଇଥିବାରୁ ସେମାନଙ୍କ ସଂସ୍ପର୍ଶରେ ଆସି ରାଜନ୍ ମଧ୍ୟ କୋଭିଡ୍ ଭୂତାଣୁ ଦ୍ବାରା ଆକ୍ରାନ୍ତ ହୋଇଥିବା ଅନୁମାନ କରାଯାଉଛି।

ଗଣ୍ଡଗୋଳରେ ରେସଲରଙ୍କ ମୃତ୍ୟୁ: ସୁଶୀଲ କୁମାରଙ୍କ ବିରୋଧରେ ମାମଲା

ଜଣେ ଜୁନିୟର୍ ନ୍ୟାସନାଲ ଚାମ୍ପିଅନ୍ ରେସଲରଙ୍କ ହତ୍ୟା ମାମଲାରେ ଜଡ଼ିତ ଥିବା ଅଭିଯୋଗରେ ଦୁଇ ଥରର ଅଲିମ୍ପିକ୍ ପଦକ ବିଜେତା ରେସଲର୍ ସୁଶୀଲ କୁମାରଙ୍କୁ ପଚରାଉଚରା କରିବା ପାଇଁ ଦିଲ୍ଲୀ ପୋଲିସ ବିଭିନ୍ନ ସ୍ଥାନରେ ଚଢାଉ କରିଛି। ମିଳିଥିବା ସୂଚନାନୁସାରେ, ମଙ୍ଗଳବାର ବିଳମ୍ବିତ ରାତିରେ ନର୍ଥ ଦିଲ୍ଲୀର ଛତ୍ରଶାଳ ଷ୍ଟାଡିୟମ୍ ପରିସରରେ ଦୁଇ ଗୋଷ୍ଠୀଙ୍କ ମଧ୍ୟରେ ସଂଘର୍ଷ ଘଟିବା ଫଳରେ ଏଥିରେ ଜଣେ ଜୁନିୟର୍ ନ୍ୟାସନାଲ୍ ଚାମ୍ପିଅନ୍ ରେସଲରଙ୍କ ମୃତ୍ୟୁ ଘଟିଥିଲା। ଦିଲ୍ଲୀ ନର୍ଥ-ୱେଷ୍ଟ ଆଡିସନାଲ୍ ଡିସିପି ଡ. ଗୁରଇକବାଲ୍ ସିଂହ ସିଦ୍ଧୁ କହିଛନ୍ତି ଯେ ଏହି ହତ୍ୟା ମାମଲାରେ ଜଡ଼ିତ ଥିବା ଅଭିଯୋଗର ତଦନ୍ତ ପାଇଁ ଏକ ଟିମ୍ ସୁଶୀଲ କୁମାରଙ୍କ ଘରକୁ ଯାଇଥିଲେ ହେଁ ସେଠାରେ ତାଙ୍କୁ ଠାବ କରାଯାଇପାରିନାହିଁ। ଅଭିଯୁକ୍ତଙ୍କୁ ଧରିବା ପାଇଁ ଏକାଧିକ ପୋଲିସ ଟିମ୍ ଗଠନ କରାଯାଇଛି ବୋଲି ସେ କହିଛନ୍ତି।

ମ୍ୟାକଗିଲଙ୍କୁ ଅପହରଣ: ପ୍ରେମିକାଙ୍କ ଭାଇ ସମେତ ୪ ଗିରଫ

ଗତ ମାସରେ ପୂର୍ବତନ ଅଷ୍ଟ୍ରେଲୀୟ ଲେଗ୍ ସ୍ପିନର୍ ଷ୍ଟୁଆର୍ଟ ମ୍ୟାକଗିଲଙ୍କୁ ତାଙ୍କ ଘରୋଇ ସହର ସିଡନୀରୁ ଅପହରଣ କରିନିଆଯାଇଥିଲା। ଅବଶ୍ୟ ଅପହର୍ତ୍ତାମାନେ ତାଙ୍କୁ କିଛି ଘଣ୍ଟା ପରେ ଛାଡ଼ିଦେଇଥିଲେ। କିନ୍ତୁ ଏହି ମାମଲାରେ ପୋଲିସ୍ ବିଭିନ୍ନ ସ୍ଥାନରେ ଚଢ଼ାଉ କରି ୪ ଜଣ ଅଭିଯୁକ୍ତଙ୍କୁ ଗିରଫ କରିଛି। ସେମାନଙ୍କ ମଧ୍ୟରେ ମ୍ୟାକଗିଲଙ୍କ ପ୍ରେମିକାଙ୍କ ୪୬ ବର୍ଷୀୟ ଭାଇ ସାମିଲ୍ ଥିବା ଜଣାପଡ଼ିଛି। ଘଟଣାଟି ଗତ ୧୪ ତାରିଖରେ ଘଟିଥିଲେ ହେଁ ମ୍ୟାକଗିଲ୍ ମାନସିକ ଭାବେ ଚାପଗ୍ରସ୍ତ ହୋଇଥିବାରୁ ଦୀର୍ଘ ୬ ଦିନ ପରେ ଅର୍ଥାତ୍ ଗତ ଏପ୍ରିଲ୍ ୨୦ ତାରିଖରେ ପୋଲିସରେ ଅଭିଯୋଗ ଦାଏର୍ କରିଥିଲେ। ମ୍ୟାକଗିଲ୍ ଘଟଣା ଦିନ ରାତି ୮ଟା ବେଳେ ତାଙ୍କ ବାନ୍ଧବୀ ମାରିଆ ଓ’ମିଘେରଙ୍କ ଭାଇ ମାରିନୋ ସୋଟିତୋପୋଲୋସଙ୍କ ସହ ଯୁକ୍ତିତର୍କ କରିଥିଲେ। ମାରିନୋ ନ୍ୟୁଟ୍ରାଲ୍ ବେ’ସ୍ଥିତ ଆରିଷ୍ଟୋଟଲ୍ସ ରେସ୍ତୋରାଁର ମାଲିକ ଥିବା ବେଳେ ମ୍ୟାକଗିଲ୍ ସେଠାରେ ମ୍ୟାନେଜର୍ ଭାବେ କାର୍ଯ୍ୟ କରୁଥିଲେ। ଏହି ଅପହରଣ ପଛରେ ତାଙ୍କର ହାତ ଥିବା ସନ୍ଦେହ କରି ପୋଲିସ୍ ତାଙ୍କୁ ଗିରଫ କରିଛି।

ପଥରରେ ପତ୍ନୀ ମୁଣ୍ଡକୁ ଛେଚି ସ୍ବାମୀ ଗିରଫ

ଉଦୟଗିରି ଥାନା ଅନ୍ତର୍ଗତ ବାଡେନାଜୁ ଗ୍ରାମର ପ୍ରଭାସିନି ସାହୁ ୨୧ ବର୍ଷ ୨୦୧୮ ମସିହାରେ କଳିଙ୍ଗା ଡିଏଭି ଗ୍ରାମର କେଶବ ଚନ୍ଦ୍ର ସାହୁ ୨୮ ବର୍ଷଙ୍କୁ ବିବାହ କରିଥିଲେ। ବିବାହର କିଛି ଦିନ ସଂସାର ସୁରୁଖୁରରେ ଚାଲିଲା ପରେ କେଶବ ମଦ ପିଇ ପ୍ରଭାସିନିକୁ ପିଟାପିଟି କରିବାରୁ ପ୍ରଭାସିନି ତାଙ୍କ ବାପ ଘରକୁ ଚାଲିଯାଇଥିଲେ। ଗତକାଲି କେଶବ ପ୍ରଭାସିନିଙ୍କ ଘରକୁ ଯାଇ ବୁଝାସୁଝି କରି ମଦ ପିଇବି ନାହିଁ କହିବାରୁ ପ୍ରଭାସିନି କେଶବ ସହିତ ଶାଶୁ ଘରକୁ ଫେରିଥିଲେ। ହେଲେ ଶାଶୁ ଘରକୁ ସିର୍କୀ ଦେଇ ଯିବା ରାସ୍ତାରେ କେଶବ ପ୍ରଭାସିନିକୁ ବଣକୁ ଆମ୍ବ ତୋଳିଯିବାକୁ କହିଥିଲେ। ପ୍ରଭାସିନୀ ନ ଯିବାରୁ କେଶବ ଉତ୍ତ୍ୟକ୍ତ ହୋଇ ଏକ ପଥରରେ ପ୍ରଭାସିନୀର ମୁଣ୍ଡକୁ ଛେଚି ଦେଇଥିଲେ। ପ୍ରଭାସିନୀର ଏତଲାକୁ ଭିତିକରି ଜି.ଉଦୟଗିରି ଥାନା କେସ୍ ନଂ ୩୯/୨୧ ଧାରା ୩୨୩,୪୯୮(ଏ), ୩୦୭ରେ ଏକ ମାମଲା ରୁଜୁ କରି ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରାଯାଇଥିବା ଜଣାପଡିଛି।

ଅମାନିଆଙ୍କଠାରୁ ଆଦାୟ ହୋଇଛି ୫.୬୬ କୋଟି ଜରିମାନା, ୪୧୮ ଗିରଫ

ରାଜ୍ୟରେ ଦିନକୁ ଦିନ କୋରୋନା ମହାମାରୀ ବେକାବୁ ହୋଇଚାଲିଥିବା ବେଳେ ଜନସାଧାରଣଙ୍କ ମଧ୍ୟରେ ଏବେ ବି ସଚେତନତାର ଘୋର ଅଭାବ ରହିଥିବା ପରିଲକ୍ଷିତ ହୋଇଆସିଛି। ରାଜ୍ୟ ସରକାର ଜନସାଧାରଣଙ୍କୁ ବାରମ୍ବାର ସଚେତନ କରିବା ସହ ସମସ୍ତ ପ୍ରକାର କୋଭିଡ୍ ନିୟମ ମାନି ଏହି ଅଜଣା ଶତ୍ରୁ ବିରୋଧରେ ଚାଲିଥିବା ଯୁଦ୍ଧରେ ଆମେ ବିଜୟୀ ହେବା ବୋଲି ବାରମ୍ବାର ନିବେଦନ କରିଆସିଛନ୍ତି। କିନ୍ତୁ ଏହା ସତ୍ତ୍ବେ ବି ଅନେକ ଲୋକ ମାସ୍କ ନ ପିନ୍ଧି ଓ ସାମାଜିକ ଦୂରତା ନିୟମ ନ ମାନି ଜୋରିମାନା ପଇଠ କରିଛନ୍ତି। ଏ ସଂକ୍ରାନ୍ତରେ ରାଜ୍ୟ ପୋଲିସ୍ ଡିଜି ଅଭୟ ଗୁରୁବାର ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି। ତାଙ୍କ ସୂଚନାନୁସାରେ, କୋଭିଡ୍ ନିୟମ ନ ମାନି ଅମାନିଆମାନେ ୫.୬୬ କୋଟି ଟଙ୍କା ଜରିମାନା ପଇଠ କରିଛନ୍ତି। କେବଳ ମାସ୍କ ନ ପିନ୍ଧିଥିବାରୁ ଲୋକଙ୍କଠାରୁ ୫ କୋଟି ୨୪ ଲକ୍ଷ ଟଙ୍କା ଆଦାୟ କରାଯାଇଛି। ଆହୁରି କୋଭିଡ଼ ନିୟମ ଭାଙ୍ଗି ୪୧୮ ଜଣ ଗିରଫ ହୋଇଥିବା ବେଳେ ୧୮ ହଜାର ଗାଡ଼ିକୁ ଜବତ କରାଯାଇଛି। କୋଭିଡ୍ ମହମାରୀ ସମୟରେ ଦୁଃସ୍ଥିତି ମଧ୍ୟ ଦେଇ ଗତି କରୁଥିବା ଜନସାଧାରଣଙ୍କ ବିରୋଧରେ କୌଣସି ପ୍ରକାର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଆଦୌ ଭଲ ଲାଗୁନାହିଁ। କିନ୍ତୁ ସମସ୍ତଙ୍କ ସୁରକ୍ଷା ପାଇଁ ଆମେ ବାଧ୍ୟ ହୋଇ ଏପରି ପଦକ୍ଷେପ ନେଉଛୁ ବୋଲି ଶ୍ରୀ ଅଭୟ କହିବା ସହ ସମସ୍ତ ଜନସାଧାରଣଙ୍କୁ କଡ଼ାକଡ଼ି ଭାବେ କୋଭିଡ୍ ନିୟମ ପାଳନ ପାଇଁ ପୁଣିଥରେ ନିବେଦନ କରିଛନ୍ତି।

୧୯୯୩ ମୁମ୍ବାଇ ବିସ୍ଫୋରଣ ଅଭିଯୁକ୍ତ ଛୋଟା ରାଜନ ନିର୍ଦ୍ଦୋଷରେ ଖଲାସ

ବହୁଚର୍ଚ୍ଚିତ ୧୯୯୩ ମୁମ୍ବାଇ ବିସ୍ଫୋରଣ ଘଟଣା ସହ ଜଡ଼ିତ ହନିଫ କଡାଓ୍ୱାଲା ନାମକ ଜଣେ ଚଳଚ୍ଚିତ୍ର ପ୍ରଯୋଜକଙ୍କୁ ହତ୍ୟା କରିଥିବା ମାମଲାରେ ସ୍ଥାନୀୟ ଏକ ସ୍ବତନ୍ତ୍ର ଅଦାଲତ କୁଖ୍ୟାତ ଗ୍ୟାଙ୍ଗଷ୍ଟର ଛୋଟା ରାଜନକୁ ନିର୍ଦ୍ଦୋଷରେ ଖଲାସ କରିଛନ୍ତି। ହନିଫ ହତ୍ୟା ମାମଲାରେ ଛୋଟା ରାଜନ ସଂପୃକ୍ତ ବୋଲି ଦର୍ଶାଇ ସିବିଆଇ ଗତ ୨୦୧୯ ମସିହା ଜୁନ୍ ମାସରେ ଚାର୍ଜଶିଟ୍ ଦାଖଲ କରିଥିଲା ଅପର ପକ୍ଷରେ ସାମ୍ବାଦିକ ଜ୍ୟୋତିର୍ମୟ ଦେ’ଙ୍କୁ ହତ୍ୟା ମାମଲାରେ ଦୋଷୀ ସାବ୍ୟସ୍ତ ହୋଇ ଛୋଟା ରାଜନ ବର୍ତ୍ତମାନ ଆଜୀବନ କାରାଦଣ୍ଡାଦେଶ କାଟୁଛି। ସେହିପରି ମୁମ୍ବାଇ ବୋମା ବିସ୍ଫୋରଣ ମାମଲାର ଅନ୍ୟତମ ଅଭଯୁକ୍ତ ଜଗନ୍ନାଥ ଜୈସ୍ବାଲଙ୍କୁ ମଧ୍ୟ ଏହି ହତ୍ୟାକାଣ୍ଡ ମାମଲାରେ କୋର୍ଟ ନିର୍ଦୋଷରେ ଖଲାସ କରିଛନ୍ତି।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ