ସ୍ବତନ୍ତ୍ର ପ୍ରସଙ୍ଗ

ରୋଜଗାର ଓ ବୃତ୍ତି ଲୁଚାଉଛନ୍ତି ବିଧାୟକ!

ଦେଶର ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକର ବିଧାୟକମାନେ ସ୍ବତଃପ୍ରବୃତ୍ତ ଭାବେ ସେମାନଙ୍କ ରୋଜଗାର ଓ ପ୍ରଫେସନ କ’ଣ ତାହା ପ୍ରକାଶ କରୁନାହାନ୍ତି। ଅଧିକାଂଶ ଏହାକୁ ଛପାଇ ରଖୁଛନ୍ତି। ଆୟ ଓ ବୃତ୍ତି ସମ୍ପର୍କିତ ତଥ୍ୟ ସଠିକ୍‌ ଭାବେ ସାମ୍ନାକୁ ଆସୁ ନ ଥିବା ବେଳେ ରାଜନୀତିରେ ସେମାନଙ୍କ କଳାଫର୍ଦ୍ଦଗୁଡ଼ିକୁ ସାଧାରଣ ଲୋକେ ପଢ଼ିପାରୁ ନାହାନ୍ତି। ଦେଶରେ ବର୍ତ୍ତମାନ ଥିବା ୪୦୮୬ ଜଣ ବିଧାୟକଙ୍କ ମଧ୍ୟରୁ ୩୧୪୫ ଜଣ ବିଧାୟକଙ୍କ ସ୍ବଘୋଷିତ ଆୟକୁ ନେଇ ଏଡିଆର ଏବଂ ନ୍ୟାସନାଲ ଇଲେକ୍ସନ ୱାଚ୍‌ ନିକଟରେ ଯେଉଁ ବିଶ୍ଳେଷଣ କରଛି, ସେଥିରେ ଆୟ ଦର୍ଶାଇ ନ ଥିବା ୯୪୧ ଜଣ ବିଧାୟକଙ୍କ ତଥ୍ୟକୁ ଯୋଡ଼ାଯାଇ ପାରିନାହିଁ। ସମ୍ପୃକ୍ତ ସଂସ୍ଥା ତା’ର ବିଶ୍ଲେଷଣ ପରେ ଉପସଂହାରରେ ପ୍ରତ୍ୟେକ ବିଧାୟକ ଇନ୍‌କମ ଟାକ୍ସ ରିଟର୍ଣ୍ଣ ଦାଖଲ କରନ୍ତୁ ବା ନ କରନ୍ତୁ କିନ୍ତୁ ଶପଥପାଠ ଜରିଆରେ ଆୟର ଉତ୍ସ ଓ ବୃତ୍ତି ଦର୍ଶାନ୍ତୁ ବୋଲି ଦାବି କରିଛି। ବିଧାୟକମାନଙ୍କୁ ସମ୍ପତ୍ତି ତାଲିକା ଉପସ୍ଥାପନ ପାଇଁ ବର୍ଷ ବର୍ଷ ଧରି କୁହାଯାଉଥିଲେ ହେଁ କେତେକ ଏହାକୁ ଖିଲାପ କରିଚାଲିଛନ୍ତି। ଏଥିସହ ପ୍ରତ୍ୟେକ ରୋଜଗାରର ଉତ୍ସ ଉଲ୍ଲେଖ କରିବା ସାଙ୍ଗକୁ ଉତ୍ସୱାରି ଆୟ ଦର୍ଶାଯିବା ଅପରିହାର୍ଯ୍ୟ ହୋଇପଡ଼ିଛି। ତେବେ ଯାଇ ଭୋଟରମାନେ ସେମାନଙ୍କ ନେତାମାନଙ୍କୁ ସଠିକ୍‌ ଭାବେ ଚିହ୍ନିପାରିବେ।

ଜନ ଜାଗରଣ ଜନ୍ମାଇଲା ‘ଓଡ଼ିଶା ପର୍ବ’

ଚେହେରାରେ ଲାଜୁଆ ହସ, ହାତରେ କଠିନ ପରିଶ୍ରମ କରିବାର ସଂକଳ୍ପ ଏବଂ ଅଭାବ ଅସୁବିଧାରେ ବି ଖୁସି ରହିବାର ସ୍ବଭାବ... ଏହା ହିଁ ସାଧାରଣ ଓଡ଼ିଆଙ୍କ ପରିଚୟ। ନିଜ ପ୍ରତିଭା ଓ କଳା କାରିଗରି ପାଇଁ ଖ୍ୟାତ ଓଡ଼ିଆମାନେ ଏବେ ଜୀବନ ଜୀବିକା ଅନ୍ବେଷଣରେ ନଗର ଓ ମହାନଗରରେ କାର୍ଯ୍ୟରତ। କଠିନ ପରିଶ୍ରମ କରିଚାଲିଥିବା ଏହି ଓଡ଼ିଆମାନେ କିନ୍ତୁ ସବୁବେଳେ ପରଦା ଆଢ଼ୁଆଳରେ ରହିବାକୁ ପସନ୍ଦ କରନ୍ତି। କପଡ଼ା ଓ ହୀରା ପଲିସିଂ ପାଇଁ ଜଣାଶୁଣା ଗୁଜରାଟର ହୀରକ ସହର ସୁରତ ଆଜି ଓଡ଼ିଆମାନଙ୍କ ପ୍ରତିଭା ଓ ପରିଶ୍ରମ ଲାଗି ଢେର ପ୍ରଗତି କରିପାରିଛି। ତଥାପି କାହା ସହ ଶତ୍ରୁତା କି କାହା ବିରୋଧରେ ଅଭିଯୋଗ ନାହିଁ ଏହି ପ୍ରବାସୀ ଓଡ଼ିଆମାନଙ୍କର। ନିଜସ୍ବ କ୍ଷେତ୍ରରେ ମନ ଲଗାଇ କାମ କରି ପରିବାର ପ୍ରତିପୋଷଣ କରିବା ଏମାନଙ୍କ ଜୀବନର ମୂଳମନ୍ତ୍ର ପାଲଟିଛି।

ଓଡ଼ିଶା ବାସ୍ନାରେ ମହକିବ ସୁରତ

ଉତ୍କର୍ଷ କଳାର ରାଜ୍ୟ ଓଡ଼ିଶା। ଏହାର ଗୌରବମୟ ଇତିହାସ ସମୃଦ୍ଧ କଳା, ସଂସ୍କୃତି ଓ ପରମ୍ପରାର ଖ୍ୟାତି ଦେଶ ତଥା ବିଦେଶରେ ରହିଛି। ସର୍ବୋପରି କୋଟି କୋଟି ଓଡ଼ିଆଙ୍କ ପ୍ରାଣ ପ୍ରତିଷ୍ଠାତା ଶ୍ରୀଜଗନ୍ନାଥଙ୍କ ମହିମା ସାରା ବିଶ୍ବରେ ବିଦିତ। ଏବେ ଛୋଟ ଓଡ଼ିଶଶ ବୋଲାଉଥିବା ସୁରତ ବି କହିବ ଜୟ ଜଗନ୍ନାଥ। କପଡ଼ା ଓ ହୀରା ପଲିସିଂ ପାଇଁ ଖ୍ୟାତି ଅର୍ଜନ କରିଥିବା ଗୁଜରାଟ ଏହି ସହରରେ ପ୍ରାୟ ୧୪ ଲକ୍ଷରୁ ଊର୍ଦ୍ଧ୍ବ ଓଡ଼ିଆ ରହୁଛନ୍ତି। ସେମାନଙ୍କ ମଧ୍ୟରେ ଓଡ଼ିଆ ପଣର ଭାବ ଉଦ୍ରେକ କରିବା ପାଇଁ ସେପ୍ଟେମ୍ବର ୨ ଓ ୩ରେ ସୁରତର ଅନ୍ତର୍ଜାତୀୟ ପ୍ରଦର୍ଶନୀ ଓ ସମ୍ମିଳନୀ କେନ୍ଦ୍ର ସରସାନାଠାରେ ଆୟୋଜିତ ହେବାକୁ ଯାଉଛି ‘ଓଡ଼ିଶା ପର୍ବ’। ନୂଆଦିଲ୍ଲୀସ୍ଥିତ ଅଗ୍ରଣୀ ଅଣଲାଭଦାୟକ ସଂସ୍ଥା ଓଡ଼ିଆ ସମାଜ ଏହି ଆୟୋଜନର ଗୁରୁଦାୟିତ୍ବ ବହନ କରିଛି।

ଓଡ଼ିଶାର ଅସଜଡ଼ା ଶିକ୍ଷାକୁ ସଜାଡ଼ିବ କିଏ?

ରାଜ୍ୟରେ ଶହ ଶହ ଶିକ୍ଷକ ପଦବୀ ଖାଲି। ଖାଲି ପଦବୀ ରଖି ସରକାର ଅର୍ଥ ସଞ୍ଚୟ କରୁଥିବାରୁ ଶିକ୍ଷା ବ୍ୟବସ୍ଥାରେ ଚରମ ଦୁର୍ଯୋଗର ସମୟ ଉପନୀତ ହୋଇଛି। ଗୋଟିଏ ପଟେ ଗୁଣାତ୍ମକ ଶିକ୍ଷା ନ ପାଇ ପିଲାମାନେ ଭବିଷ୍ୟତ ଜୀବନରେ ନିଜ ପାଇଁ ଓ ପରିବାର ପାଇଁ ବୋଝ ହେଉଥିବା ବେଳେ ଅନ୍ୟପଟେ ସରକାର କୁମ୍ଭକର୍ଣ୍ଣ ନିଦ୍ରାରେ। ଏହି ବିଷମ ସ୍ଥିତିର ସକାରାତ୍ମକ ପ୍ରତିକାର ପାଇଁ ଶାସନ ବ୍ୟବସ୍ଥା ଆଦୌ ଚିନ୍ତିତ ନୁହେଁ। ପ୍ରାଥମିକ ସ୍ତରରୁ ବିଶ୍ବବିଦ୍ୟାଳୟ ସ୍ତର ପର୍ଯ୍ୟନ୍ତ ଶିକ୍ଷକଙ୍କ ଅଭାବ ଗୁରୁତର ସମସ୍ୟା ସୃଷ୍ଟି କରିଛି। ଏହା ସହିତ ଯୋଡ଼ିହୋଇ ଯାଇଛି ଦୁର୍ବଳ ଭିତ୍ତିଭୂମି। କେଉଁଠି ବିଦ୍ୟାଳୟରେ ପାଚେରି ନ ଥିବାରୁ ମଧ୍ୟାହ୍ନ ଭୋଜନ ସ୍ଥଳ ଯାଏ ବୁଲା ଗୋରୁ ଓ କୁକୁର ପଶିଆସୁଛନ୍ତି ତ କେଉଁଠି ଜଳର ବ୍ୟବସ୍ଥା ନ ଥିବାରୁ ପିଲାମାନେ ପାଖ ନାଳ ଓ ଜଳାଶୟକୁ ଯାଉଛନ୍ତି। କେଉଁଠି ଶୌଚାଳୟରେ ତାଲା ପକାଇ ଶିକ୍ଷକମାନେ ବ୍ୟବହାର କରୁଛନ୍ତି ତ କେଉଁଠି ଜଣେ ଶିକ୍ଷକଙ୍କୁ ନେଇ ଚାଲିଛି ପାଞ୍ଚଟି କ୍ଲାସ।

ଅଲ୍‌ବିଦା ବାଜପେୟୀ: ପଞ୍ଚଭୂତରେ ବିଲୀନ ହେଲେ ଅଟଳ

ମହାନ ଜନନାୟକ, ପ୍ରଖ୍ୟାତ କବି, ବିଚକ୍ଷଣ ବାଗ୍ମୀ ଭାରତରତ୍ନ ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ପାର୍ଥିବ ଶରୀର ପଞ୍ଚମହାଭୂତରେ ବିଲୀନ ହୋଇଯାଇଛି। ବେଦପାଠ ଓ ତୋପ ସଲାମୀ ମଧ୍ୟରେ ଦେଶ ନିଜର ପ୍ରିୟ ରାଜନେତାଙ୍କୁ ଅଲ୍‌ବିଦା ଜଣାଇଛି। ତାଙ୍କ ପାଳିତା କନ୍ୟା ନମିତା ଅଟଳଙ୍କୁ ମୁଖାଗ୍ନି ଦେଇଛନ୍ତି। ଲକ୍ଷାଧିକ ଜନଗଣଙ୍କ ଗହଣରେ ଭାରତବର୍ଷର ରାଷ୍ଟ୍ରପତି, ଉପରାଷ୍ଟ୍ରପତି, ପ୍ରଧାନମନ୍ତ୍ରୀଙ୍କ ସମେତ ବହୁ ରାଜନୈତିକ ନେତାଙ୍କ ଉପସ୍ଥିତିରେ ଅଟଳଜୀଙ୍କ ଶେଷକୃତ୍ୟ ସମ୍ପନ୍ନ ହୋଇଛି। ସ୍ମୃତିସ୍ଥଳରେ ଅଶ୍ରୁସଜ୍ଜଳ ଶ୍ରଦ୍ଧାଞ୍ଜଳି ଦେଇ ଶ୍ରଦ୍ଧାସୁମନ ବାଢ଼ିଛନ୍ତି ଦେଶ ବିଦେଶର ବହୁ ମାନ୍ୟଗଣ୍ୟ ଅତିଥି ଓ ସାଧାରଣ ଜନତା। ଘଟିଛି ଅଟଳ ଯୁଗର ଅବସାନ। ତାଙ୍କ ପାର୍ଥିବ ଶରୀର ପଞ୍ଚମହାଭୂତରେ ମିଶିଯାଇଛି ସତ, ହେଲେ ତାଙ୍କର ବିଚାର, ସିଦ୍ଧାନ୍ତ ଓ ନୈତିକ ମୂଲ୍ୟବୋଧ ସର୍ବଦା ଦେଶବାସୀଙ୍କୁ ମାର୍ଗ ଦର୍ଶନ ଦେଇଚାଲିବ।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ


କରେନ୍ସି କନଭର୍ଟର

ଜନମତ

ଶ୍ରୀମନ୍ଦିରରେ ସେବାୟତଙ୍କ ମନମୁଖୀ କାର୍ଯ୍ୟକଳାପ ଓ ପ୍ରଶାସନର ପରିଚାଳନାଗତ ତ୍ରୁଟିକୁ ରୋକିବା ଲାଗି ସୁପ୍ରିମକୋର୍ଟ ଯେଉଁ ପଦକ୍ଷେପ ନେଇଛନ୍ତି, ସେଥିରେ ଆପଣ ଏକମତ ତ ?