ତାଳଚେର ସାର କାରଖାନାରେ ୟୁରିଆ ଉତ୍ପାଦନ ପାଇଁ ସ୍ୱତନ୍ତ୍ର ସବ୍‌ସିଡି ନୀତିକୁ ଅନୁମୋଦନ


ତାଳଚେର ସାର କାରଖାନା (ଫାଇଲ୍‌ ଫଟୋ)
ତାଳଚେର ସାରକାରଖାନା (ଟିଏଫ୍‌ଏଲ୍‌) ଦ୍ୱାରା କୋଇଲା ବାଷ୍ପୀକରଣ (କୋଲ୍‌ ଗ୍ୟାସିଫିକେସନ୍‌) ବ୍ୟବସ୍ଥାରେ ଉତ୍ପାଦିତ ୟୁରିଆ ନିମନ୍ତେ ସ୍ୱତନ୍ତ୍ର ସବ୍‌ସିଡି ନୀତି ପ୍ରବର୍ତ୍ତନ କରିବାକୁ କେନ୍ଦ୍ର ସାର ମନ୍ତ୍ରାଳୟ ଯେଉଁ ପ୍ରସ୍ତାବ ଉପସ୍ଥାପିତ କରିଥିଲା ତାହାକୁ କ୍ୟାବିନେଟ୍ ମଞ୍ଜୁରୀ ମିଳିଛି। ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଅର୍ଥନୈତିକ ବ୍ୟାପାର ସଂକ୍ରାନ୍ତ କ୍ୟାବିନେଟ୍‌ କମିଟି ବୈଠକରେ ଏହି ଅନୁମୋଦନ ପ୍ରଦାନ କରାଯାଇଛି।

ଦେଶରେ ରଣକୌଶଳାତ୍ମକ ଊର୍ଜ୍ଜା ନିରାପତ୍ତା ନୀତି, ୟୁରିଆ ସାର କ୍ଷେତ୍ରରେ ଆତ୍ମନିର୍ଭରଶୀଳତା ଓ ଦେଶରେ ଗଚ୍ଛିତ ଥିବା ବିପୁଳ କୋଇଲା ସମ୍ପଦକୁ ବିଚାରକୁ ନେଇ କେନ୍ଦ୍ର ସରକାର କୋଲ ଗ୍ୟାସିଫିକେସନ୍‌ ବ୍ୟବସ୍ଥାରେ ୟୁରିଆ ଉତ୍ପାଦନ କରିବାକୁ ତାଳଚେର କାରଖାନାକୁ ଅନୁମତି ଦେବାକୁ ନୀତିଗତ ଭାବେ ନିଷ୍ପତ୍ତି ନେଇଥିଲେ। ଏହାଦ୍ୱାରା ଦେଶର ଚାଷୀଙ୍କ ୟୁରିଆ ଆବଶ୍ୟକତା ଅନେକାଂଶରେ ପୂରଣ ହୋଇପାରିବ। ଏହାଦ୍ୱାରା ମଧ୍ୟ ଦେଶର ପୂର୍ବାଞ୍ଚଳରେ ବିକାଶ ପ୍ରକ୍ରିୟା ତ୍ୱରାନ୍ୱିତ ହେବା ସହିତ ପୂର୍ବ ଭାରତକୁ ପଠାଯାଉଥିବା ସାର ପରିବହନ ବାବଦ ସବ୍‌ସିଡି ଯଥେଷ୍ଟ ହ୍ରାସ ପାଇବ। ଏହା ଫଳରେ ସରକାରଙ୍କର ବିପୁଳ ଅର୍ଥ ସଞ୍ଚୟ ହେବ। ଆହୁରି ମଧ୍ୟ ୟୁରିଆ ଆମଦାନୀ ପରିମାଣ ବାର୍ଷିକ ୧୨.୭ଲକ୍ଷ ମେଟ୍ରିକ୍‌ ଟନ୍ ହ୍ରାସ ପାଇବ। ୟୁରିଆ ଆମଦାନୀ କମିବା ଦ୍ୱାରା ସରକାର ବିପୁଳ ବୈଦେଶିକ ବିନିମୟ ମୁଦ୍ରା ସଞ୍ଚୟ କରିପାରିବେ।

ତାଳଚେର ସାର ପ୍ରକଳ୍ପ ମଧ୍ୟ ‘ମେକ୍ ଇନ୍ ଇଣ୍ଡିଆ’ ଓ ଆତ୍ମନିର୍ଭର ଭାରତ କାର୍ଯ୍ୟକ୍ରମକୁ ପ୍ରୋତ୍ସହିତ କରିବ। ଏହାଦ୍ୱାରା ପୂର୍ବ ଭାରତର ସଡକ, ରେଳପଥ, ଜଳଯୋଗାଣ ବ୍ୟବସ୍ଥା ଭଳି ଭିତ୍ତିଭୂମି କ୍ଷେତ୍ର ଲାଭବାନ ହେବ ଏବଂ ଅନେକ ଅନୁସାରୀ ଶିଳ୍ପ ସଂସ୍ଥା ଗଢ଼ି ଉଠିବ। ଏହି ପ୍ରକଳ୍ପ ମଧ୍ୟ ତାଳଚେରର ପାଶ୍ୱବର୍ତ୍ତୀ ଅଞ୍ଚଳରେ ନୂଆ ଉଦ୍ୟୋଗ ଓ ବ୍ୟାପାର ବଣିଜକୁ ପ୍ରୋତ୍ସାହିତ କରିବ। କୋଲ୍‌ ଗ୍ୟାସିଫିକେସନ୍‌ ପ୍ଳାଣ୍ଟଗୁଡ଼ିକ ବ୍ୟବସାୟ ରଣନୀତି ଦୃଷ୍ଟିରୁ ଗୁରୁତ୍ୱପୂର୍ଣ୍ଣ। କୋଇଲା ମୂଲ୍ୟ ପ୍ରାୟତଃ ସ୍ଥିର ରହୁଥିବାରୁ ଏବଂ ଏହା ଦେଶରେ ପ୍ରଚୁର ପରିମାଣରେ ମିଳୁଥିବାରୁ ଏହାର ସଦ୍‌ବିନିଯୋଗ ଲୋଡ଼ା। ତାଳଚେର ପ୍ଲାଣ୍ଟ୍‌ ୟୁରିଆ ଉତ୍ପାଦନ ପାଇଁ ଆବଶ୍ୟକ ପଡ଼ୁଥିବା ପ୍ରାକୃତିକ ଗ୍ୟାସ୍‌ ଆମଦାନୀକୁ ଯଥେଷ୍ଟ କମାଇବ। ଏଠାରୁ ଉତ୍ପାଦିତ କୋଲ୍‌ ଗ୍ୟାସ୍‌ର ଆବଶ୍ୟକତା ଅନେକାଂଶରେ ପୂରଣ କରିବ। ଏହା ଫଳରେ ଭାରତର ଏଲଏନ୍‌ଜି (ପ୍ରାକୃତିକ ଗ୍ୟାସ୍‌) ଆମଦାନୀଜନିତ ବ୍ୟୟ ଯଥେଷ୍ଟ କମିବ। ତାଳଚେର ସାର କାରଖାନାରେ ଯେଉଁ କୋଇଲା ବାଷ୍ପୀକରଣ ଟେକ୍ନୋଲୋଜି ବ୍ୟବହାର କରାଯାଇଛି ତାହା ସ୍ପଳ୍ପ ଓ ପ୍ରଦୂଷଣ ମୁକ୍ତ। ଏଥିରେ ଯେଉଁ ଦୂଷିତ ଏମ୍‌ଓଏକ୍ସ, ଏନ୍‌ଓଏକ୍ସ ଏବଂ ଅନ୍ୟାନ୍ୟ କଣିକା ନିର୍ଗତ ହେଉଚି ତାହାର ପରିମାଣ ନଗନ୍ୟ। ପୁରୁଣା କୋଇଲା ଦହନ ପ୍ରକ୍ରିୟାରେ ପ୍ରଦୂଷଣ ଅଧକ ହେଉଥିଲା।

ରାଷ୍ଟ୍ରୀୟ କେମିକାଲ୍ସ ଓ ଫର୍ଟିଲାଇଜର, ଗେଲ୍‌ ଇଣ୍ଡିଆ ଲିମିଟେଡ୍‌, କୋଲ୍‌ ଇଣ୍ଡିଆ ଲିମିଟେଡ ଓ ଭାରତୀୟ ସାର ନିଗମ ଆଦି ଚାରିଟି ରାଷ୍ଟ୍ରାୟତ୍ତ ଉଦ୍ୟୋଗର ମିଳିତ ସହଯୋଗରେ ତାଳଚେର ଫର୍ଟିଲାଇଜର ଲିମିଟେଡ ଗଠିତ। ୨୦୧୫ ନଭେମ୍ବର ୧୩ରେ ଏହି ଯୌଥ ଉଦ୍ୟୋଗଟି ଗଠିତ ହୋଇଥିଲା। ପୂର୍ବରୁ ତାଳଚେର ସାର କାରଖାନା ଭାରତୀୟ ସାର ନିଗମ ଅଧୀନରେ କାର୍ଯ୍ୟ କରୁଥିଲା। ସେହି ପୁରୁଣା ୟୁନିଟ୍ ବଦଳରେ ତାଳଚେରରେ ଏକ ନୂଆ କୋଲ ଗ୍ୟାସିଫିକେସନ୍‌ ୟୁରିଆ ପ୍ଲାଣ୍ଟ ପ୍ରତିଷ୍ଠା କରାଯାଇଛି। ଏହି କାରଖାନାରେ ବାର୍ଷିକ ୟୁରିଆ ଉତ୍ପାଦନ କ୍ଷମତା ୧୨.୭ଲକ୍ଷ ମେଟ୍ରିକ ଟନ୍। ଏହି ୟୁରିଆ ପ୍ରକଳ୍ପର ମୋଟ ନିର୍ମାଣ ଖର୍ଚ୍ଚ ୧୩୨୭୭.୨୧କୋଟି ଟଙ୍କା ରଖାଯାଇଛି। ଏଥିରେ ଅନୁମାନିକ କମ୍ ବେଶୀ ଖର୍ଚ୍ଚ ପରିମାଣ ୧୦ ପ୍ରତିଶତ ଧାର୍ଯ୍ୟ ହୋଇଛି।

Post Comment




  
Captcha
Cannot Read? Click Here to generate a new one.


ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ