ସ୍ବତନ୍ତ୍ର ପ୍ରସଙ୍ଗ

ଦୂତୀଙ୍କ ଦବ୍‌ଦବା: ବିଶ୍ବର ୧୦୦ ଉଦୀୟମାନ ପ୍ରତିଭାଙ୍କ

ନିଜର ଦୌଡ଼ ଦକ୍ଷତା ଓ ବ୍ୟକ୍ତିଗତ ସମ୍ପର୍କକୁ ନେଇ ସର୍ବଦା ଚର୍ଚ୍ଚାରେ ରହିଆସିଥିବା ଓଡ଼ିଶାର ଦୌଡ଼ରାଣୀ ଦୂତୀ ଚାନ୍ଦ ଏବେ ଗୋଟିଏ ପରେ ଗୋଟିଏ ସଫଳତା ଏବଂ ପ୍ରଶଂସା ସାଉଁଟିବାରେ ଲାଗିଛନ୍ତି। ଦୂତୀ ଏବେ ଆଉ ଏକ ସଫଳତା ହାସଲ କରି ଓଡ଼ିଶା ତଥା ଦେଶ ପାଇଁ ଗୌରବ ଆଣିଛନ୍ତି। ବିଶ୍ବର ଅନ୍ୟତମ ଶ୍ରେଷ୍ଠ ଆମେରିକାର ଚର୍ଚ୍ଚିତ ‘ଟାଇମ୍‌’ ପତ୍ରିକା ଦ୍ବାରା ପ୍ରକାଶିତ ବିଶ୍ବର ବିଭିନ୍ନ କ୍ଷେତ୍ରରେ ସଫଳତା ହାସଲ କରିଥିବା ୧୦୦ ପ୍ରଭାବଶାଳୀ ଉଦୀୟମାନ ପ୍ରତିଭାଙ୍କ ମଧ୍ୟରେ ସାମିଲ୍‌ ହୋଇଛନ୍ତି ସ୍ପ୍ରିଣ୍ଟ କୁଇନ୍‌ ଦୂତୀ ଚାନ୍ଦ। ଜଣେ କ୍ରୀଡ଼ାବିତ୍‌ ଭାବେ ‘ଟାଇମ୍‌’ ପତ୍ରିକାରେ ସ୍ଥାନିତ ହେବାରେ ଦୂତୀ ହେଉଛନ୍ତି ପ୍ରଥମ ଭାରତୀୟ ମହିଳା। ପ୍ରତ୍ୟେକ ଓଡ଼ିଆଙ୍କ ପାଇଁ ଏହା ନିଶ୍ଚିତ ରୂପେ ଗର୍ବ ଓ ଗୌରବର ବିଷୟ। ଓଡ଼ିଶା ଭଳି ପଛୁଆ ରାଜ୍ୟରୁ ଜଣେ କ୍ରୀଡ଼ାବିତ୍‌ ଭାବେ ବିଶ୍ବ ବିଖ୍ୟାତ ପତ୍ରିକାରେ ସ୍ଥାନ ପାଇବା ହୁଏତ ଅସମ୍ଭବ ହୋଇପାରେ। ମାତ୍ର ଦୂତୀ ତାଙ୍କ ସଂଘର୍ଷମୟ ଜୀବନରେ ଗୋଟିଏ ପରେ ଗୋଟିଏ ସଫଳତାର ପାହାଚ ଚଢ଼ି ଶେଷରେ ଅସମ୍ଭବକୁ ସମ୍ଭବ କରି ଦେଖାଇଛନ୍ତି। ଏଥିସହ ଦେଶ ଓ ରାଜ୍ୟକୁ ଗୌରବାନ୍ବିତ ମଧ୍ୟ କରିଛନ୍ତି।

ପାଞ୍ଚ ମିନିଟ୍‌ ପାଇଁ ଶତ୍ରୁ ହେଲେ ମିତ୍ର

ଭାରତ ଓ ପାକିସ୍ତାନର ସମ୍ପର୍କରେ ତିକ୍ତତା କାହାକୁ ଅଛପା ନାହିଁ। ବିଶେଷକରି ଊରି, ପଠାନକୋଟ୍‌ ଓ ପୁଲ୍‌ୱାମାରେ ଆତଙ୍କୀ ଆକ୍ରମଣ ପରେ ପାକିସ୍ତାନର ବାଲାକୋଟ୍‌ ଉପରେ ଭାରତର ସର୍ଜିକାଲ ଷ୍ଟ୍ରାଇକ୍‌ ଏବଂ ପରବର୍ତ୍ତୀ ସମୟରେ ଜମ୍ମୁ ଓ କଶ୍ମୀରରେ ଧାରା ୩୭୦ ଉଚ୍ଛେଦକୁ ନେଇ ଦୁଇ ପଡ଼ୋଶୀ ରାଷ୍ଟ୍ର ମଧ୍ୟରେ ସମ୍ପର୍କ ଅହି-ନକୁଳ ସଦୃଶ ହୋଇଛି। ଏପରି ସ୍ଥଳେ ଦୁଇ ଦେଶର ରାଷ୍ଟ୍ରନେତା ନିଜ ନିଜ ବୟାନବାଜି ମାଧ୍ୟମରେ ଏହାକୁ ଏକାଧିକ ଥର ପୁଷ୍ଟ କରି ଆସିଛନ୍ତି। ଏହିକ୍ରମରେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ୍‌ ଓ ପଞ୍ଜାବ ମୁଖ୍ୟମନ୍ତ୍ରୀ କ୍ୟାପଟେନ୍‌ ଅମରିନ୍ଦର ସିଂହ ମଧ୍ୟ ପରସ୍ପର ଉପରେ ବେଶ୍‌ ଆରୋପ ପ୍ରତ୍ୟାରୋପ ଲଗାଇଛନ୍ତି। ତେବେ ନିକଟରେ କରତାରପୁର କରିଡର ଉଦ୍‌ଘାଟନୀ ଅବସରରେ ଏହି ଦୁଇ ଶତ୍ରୁ ଦେଶର ନେତାଙ୍କ ମଧ୍ୟରେ ପାଞ୍ଚ ମିନିଟ୍‌ର ସାକ୍ଷାତ ଆଲୋଚନାରେ ଉଭୟଙ୍କ ଭାବର ଆଦାନପ୍ରଦାନ ହୋଇଥିବା ଜଣାପଡ଼ିଛି, ଯାହାକି ଚର୍ଚ୍ଚାକୁ ଖୋରାକ ଯୋଗାଇଛି।

ଦୁଲୁକିଲା କଟକ: ପସରା ମେଲିଲା ଐତିହାସିକ ବାଲିଯାତ୍ରା

କଟକ: ମଙ୍ଗଳବାରଠାରୁ ଆରମ୍ଭ ହୋଇଛି ଉତ୍କଳର ପ୍ରାଚୀନ ନୌବାଣିଜ୍ୟ ପରମ୍ପରାର ସ୍ମୃତି, ଐତିହ୍ୟ ଓ ପରମ୍ପରାର ପ୍ରତୀକ କଟକ ବାଲିଯାତ୍ରା। ଚଳିତ ବର୍ଷଠାରୁ ଓଡ଼ିଶାର ସର୍ବପ୍ରାଚୀନ ତଥା ସର୍ବବୃହତ୍‌ ମୁକ୍ତାକାଶ ବାଣିଜ୍ୟିକ ସାଂସ୍କୃତିକ ମହାକୁମ୍ଭକୁ ରାଜ୍ୟସ୍ତରୀୟ ମହୋତ୍ସବ ଭାବେ ପାଳନ କରାଯାଉଛି। ଆଜିଠାରୁ ୧୯ ତାରିଖ ପର୍ଯ୍ୟନ୍ତ ମହାନଦୀର ବିସ୍ତୀର୍ଣ୍ଣ ବାଲୁକା ଶଯ୍ୟାରେ ଚାଲିବ ଏହି ପ୍ରସିଦ୍ଧ ଉତ୍ସବ। ବାଲିଯାତ୍ରା ପାଇଁ ୮ ଦିନ ଦୁଲୁକିବ କଟକ ସହର। ଏଥିପାଇଁ ଚଳଚଞ୍ଚଳ ହୋଇଉଠିଛି କଟକ ସହର। ବାଲିଯାତ୍ରାକୁ ରାଜ୍ୟସ୍ତରୀୟ ମହୋତ୍ସବର ମାନ୍ୟତା ମିଳିଥିବାରୁ ଏଥର ବାଲିଯାତ୍ରାକୁ ନୂଆ ଢଙ୍ଗରେ ଆୟୋଜନ କରିବାକୁ ପଦକ୍ଷେପ ନେଇଛି ଜିଲ୍ଲା ପ୍ରଶାସନ। ମେଳାରୁ ବିଭିନ୍ନ ଘରୋଇ ଉପକରଣ କିଣିବା ସହ ଦୋଳି ଓ ଖାଦ୍ୟର ମଜା ନେବା ପାଇଁ ଲୋକଙ୍କ ଭିଡ଼ ଜମିବ। ପ୍ରଥମ ଥର ପାଇଁ ପଥ ଉତ୍ସବ ସହ ବୋଟିଂର ମଜା ନେବେ ଦର୍ଶକ। ଏଥିସହ ପ୍ରତିଦିନ ସନ୍ଧ୍ୟାକୁ ରଙ୍ଗୀନ୍‌ କରିବା ପାଇଁ ଆୟୋଜନ କରାଯାଇଛି ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ। ଏଥିସହ ‘ମାରିଟାଇମ୍‌ ଜୋନ୍‌’, ‘ଆମ ବାଲିଯାତ୍ରା’ଆପ୍‌, ‘ମୋ କଟକ ବାଲିଯାତ୍ରା ରିକ୍ସା’, ‘ମୋ ସାଇକେଲ୍‌’, ‘ତାରକସି ପ୍ୟାଭିଲିୟନ୍‌’, ‘ପଥୋତ୍ସବ’, ‘ବୋଟିଂ’ ଆଦି ନୂଆ ବିଭବ ଯୋଡ଼ି ହୋଇଛି ଚଳିତ ବର୍ଷ ବାଲିଯାତ୍ରାରେ। ଏଥରର ଐତିହାସିକ ବାଲିଯାତ୍ରାକୁ ବାଚସ୍ପତି ଡକ୍ଟର ସୂର୍ଯ୍ୟନାରାୟଣ ପାତ୍ର ଉଦ୍‌ଘାଟନ କରିଥିବା ବେଳେ ଇଣ୍ଡୋନେସିଆ ରାଷ୍ଟ୍ରଦୂତ ସିଦ୍ଧାର୍ଥୋ ରେଜା ସୂର୍ଯ୍ୟୋଦିପୁର ଅତିଥି ଭାବେ ଯୋଗଦେଇଛନ୍ତି। ରାଜ୍ୟ ଓ ରାଜ୍ୟ ବାହାରୁ ଆସିଥିବା ଶହ ଶହ ସଂଖ୍ୟାରେ ବ୍ୟବସାୟୀ ନିଜର ପସରା ମେଲାଇ ସାରିଲେଣି। ଏଥର ପ୍ରାୟ ୧୫ ଶହ ଷ୍ଟଲ୍‌ ପଡ଼ିଥିବା ଜଣାପଡ଼ିଛି।

ପ୍ରତୀକ୍ଷାରେ ପ୍ରତୀକ୍ଷା: ଓଡ଼ିଆ ଝିଅ ‘ମିସ୍‌ ଇଣ୍ଡିଆ

ଭୁବନେଶ୍ବର: ଜାତୀୟ ସ୍ତରୀୟ ସୁନ୍ଦରୀ ପ୍ରତିଯୋଗିତାରେ ଆଉ ଜଣେ ଓଡ଼ିଆ ଝିଅଙ୍କ କମାଲ୍‌। ବିଭିନ୍ନ କ୍ଷେତ୍ରରେ ଜଣକ ପରେ ଜଣେ ଓଡ଼ିଆ ଝିଅ ଓଡ଼ିଶା ପାଇଁ ଗୌରବ ସାଉଁଟୁଥିବା ବେଳେ ଏହି କ୍ରମରେ ଏବେ ଯୋଡ଼ି ହୋଇଯାଇଛନ୍ତି ସମ୍ବଲପୁରର ଝିଅ ପ୍ରତୀକ୍ଷା ମିଶ୍ର। ‘ମିସ୍‌ ଇଣ୍ଡିଆ ଇଣ୍ଟର୍‌ନ୍ୟାସ୍‌ନାଲ୍‌’ ସୁନ୍ଦରୀ ପ୍ରତିଯୋଗିତାର ଗ୍ରାଣ୍ଡ୍‌ ଫିନାଲେରେ ସାମିଲ୍‌ ହୋଇ ଟାଇଟଲ୍‌ ଅପେକ୍ଷାରେ ରହିଥିବା ପ୍ରତୀକ୍ଷା ପୁଣିଥରେ ଓଡ଼ିଶା ପାଇଁ ସୁନାମ ଅର୍ଜିଛନ୍ତି। ଆସନ୍ତା ୧୮ରେ ଇଣ୍ଡିଆନ୍‌ ଫ୍ୟାଶନ୍‌ ଫିଏଷ୍ଟା (ଆଇଏଫ୍‌ଏଫ୍‌) ପକ୍ଷରୁ ଇଣ୍ଡୋନେସିଆର୍ ଜାକର୍ତ୍ତାରେ ଅନୁଷ୍ଠିତ ହେବାକୁ ଯାଉଥିବା ‘ମିସ୍‌ ଇଣ୍ଡିଆ ଇଣ୍ଟର୍‌ନ୍ୟାସ୍‌ନାଲ୍‌’ ଫାଇନାଲିଷ୍ଟ୍‌ ହୋଇପାରିଛନ୍ତି ପ୍ରତୀକ୍ଷା। ଏହି ପ୍ରତିଯୋଗିତାର ଭିନ୍ନ ଭିନ୍ନ ରାଉଣ୍ଡ୍‌ରେ ସଫଳତା ସହ ଉତ୍ତୀର୍ଣ୍ଣ ହୋଇ ସେ ଟପ୍ ୨୫ରେ ନିଜର ସ୍ଥାନ ପକ୍କା କରିସାରିଛନ୍ତି। ଏବେ ଏହାର ଗ୍ରାଣ୍ଡ୍‌ ଫିନାଲେ ପାଇଁ ସେ ଏବେ ଜାକର୍ତ୍ତା ଯାତ୍ରା କରିଛନ୍ତି। ସମ୍ବଲପୁର ବୁଢ଼ାରଜାସ୍ଥିତ ଶାନ୍ତିନଗରରେ ରହୁଥିବା ପ୍ରଶାନ୍ତ ମିଶ୍ରଙ୍କ ଝିଅ ପ୍ରତୀକ୍ଷାଙ୍କର ଏହି କୃତିତ୍ବ ପାଇଁ ସବୁଆଡ଼ୁ ଶୁଭେଚ୍ଛାର ଛୁଟିଛି ଓ ଫିନାଲେରେ ତାଙ୍କ ସଫଳତା କାମନା କରାଯାଇଛି।

ଆଜି ପବିତ୍ର କାର୍ତ୍ତିକ ପୂର୍ଣ୍ଣିମା: ଆ କା ମା ବୈ... ସାଙ୍ଗକୁ

ଭୁବନେଶ୍ବର: ଆଜି ହେଉଛି କାର୍ତ୍ତିକ ମାସ ଶୁକ୍ଳପକ୍ଷର ପବିତ୍ର ପୂର୍ଣ୍ଣିମା ତିଥି। ଏହି ଦିନଟି କାର୍ତ୍ତିକ ପୂର୍ଣ୍ଣିମା, ରାସ ପୂର୍ଣ୍ଣିମା ନାମରେ ପରିଚିତ ହୋଇଥିବା ବେଳେ ଏହା ତ୍ରିପୁରାରୀ ପୂର୍ଣ୍ଣିମା ବା ଦେବ ଦୀପାବଳି ନାମରେ ମଧ୍ୟ ଜଣାଯାଏ। ଏହି ଦିବସଟିକୁ ସାରା ଦେଶରେ ହିନ୍ଦୁ, ଶିଖ୍‌ ଓ ଜୈନ୍‌ମାନେ ମହା ଆଡ଼ମ୍ବରରେ ପାଳନ କରିଥାନ୍ତି। ବିଶେଷକରି ଓଡ଼ିଶାରେ ଏହି ଦିବସଟିକୁ ନିଆରା ଢଙ୍ଗରେ ପାଳନ କରାଯାଉଛି। ଓଡ଼ିଶାର ଆଚାର ବିଚାର, ଚାଲିଚଳଣି ତଥା ଧର୍ମୀୟ ଭାବନା ସହିତ ଏହି ପର୍ବ ଓତଃପ୍ରୋତ ଭାବେ ଜଡ଼ିତ। ଗୌରବମୟ ଉତ୍କଳର ପ୍ରାଚୀନ ଇତିହାସ ସହିତ ଏହା ଏତେ ନିବିଡ଼ ଭାବରେ ସମ୍ପୃକ୍ତ ଯେ ଏହି ଦିବସର ଗୁରୁତ୍ୱକୁ ବାଦ ଦେଲେ ଖ୍ରୀଷ୍ଟପୂର୍ବୀୟ କାଳରେ ଓଡ଼ିଶାରେ ନୌବାଣିଜ୍ୟ ସମ୍ପର୍କରେ ଚିନ୍ତା ବି କରାଯାଇ ପାରେ ନାହିଁ। ଅତଏବ ଧର୍ମଗତ ତଥା ଐତିହାସିକ ଉଭୟ ଦୃଷ୍ଟିକୋଣରୁ ଏହାର ମୂଲ୍ୟବୋଧ ଅତୀବ ବୈଶିଷ୍ଟ୍ୟରେ ପରିପୂର୍ଣ୍ଣ। ବିଶ୍ୱଜନନୀ କରୁଣାମୟୀ ମା’ ଦୁର୍ଗାଙ୍କ ଶାରଦୀୟ ବନ୍ଦନା ପରେ ପରେ ଚନ୍ଦ୍ର ଏବଂ ମା କାଳୀଙ୍କ ଆରାଧନା ଅତ୍ୟନ୍ତ ଆଡ଼ମ୍ବର ସହକାରେ ସମାହିତ ହୁଏ। ଦେବ ସେନାପତି ଚିର କୁମାର କାର୍ତ୍ତିକେୟଙ୍କ ଆରାଧନା ଏହି ମାସରେ ଅତ୍ୟନ୍ତ ଉତ୍ସାହର ସହିତ ସମ୍ପାଦିତ ହୁଏ ଓଡ଼ିଶାର ପୁରପଲ୍ଲୀରେ। ଏଥିସହ ମହାଦେବ ଓ ବିଷ୍ଣୁଙ୍କୁ ପୂଜା କରାଯାଇଥାଏ। ତେବେ ଓଡ଼ିଶାରେ ଏଥି ସହିତ ଆଉ ଏକ ସ୍ବତନ୍ତ୍ର ଉତ୍ସବ ପାଳିତ ହୁଏ ଯାହା ବୋଇତ ବନ୍ଦାଣ ନାମରେ ଖ୍ୟାତ। ଏହାପଛରେ ରହିଛି ପ୍ରାୟ ଅଢ଼େଇ ହଜାର ବର୍ଷର ଗୌରବପୂର୍ଣ୍ଣ ଐତିହ୍ୟ ଏବଂ ଅନେକ ଲୋକକଥା।

ଅତିଥି ଦେବୋ ଭବଃ: ପର୍ଯ୍ୟଟକଙ୍କ ପାଇଁ ସଜେଇ ହୋଇଛି

ଅତିଥିଙ୍କୁ ଭବଃ ସ୍ବାଗତ ସମ୍ବର୍ଦ୍ଧନା ଓ ଆଦର ସହକାରେ ସେମାନଙ୍କ ଯତ୍ନ ନେବା ହେଉଛି ଭାରତର ମହନୀୟ ପରମ୍ପରା। ଏ ଦିଗରେ ଓଡ଼ିଶା ମଧ୍ୟ ପଛରେ ପଡ଼ିନି। ଦେଶର ପର୍ଯ୍ୟଟନ ମାନଚିତ୍ରରେ ଓଡ଼ିଶାର ଏକ ସ୍ବତନ୍ତ୍ର ସ୍ଥାନ ରହିଛି। ପ୍ରାକୃତିକ ସୌନ୍ଦର୍ଯ୍ୟରେ ଭରପୂର ଓଡ଼ିଶାର ମନୋରମ ପରିବେଶ ଓ ବିରଳ କଳାକୃତି ସବୁବେଳେ ପର୍ଯ୍ୟଟକଙ୍କୁ ନିଜ ଆଡ଼କୁ ଆକର୍ଷିତ କରିଥାଏ। ଏହି କ୍ରମରେ ପର୍ଯ୍ୟଟକଙ୍କୁ ପାଛୋଟି ନେବାପାଇଁ ପ୍ରସ୍ତୁତ ହେଉଛି ମୁଦୁଲିଗାଡ଼ିଆ। ଘଞ୍ଚ ଜଙ୍ଗଲରେ ପରିବେଷ୍ଟିତ ଏହି ଗାଁଟିର ପାଖରେ ରହିଛି ବିଶାଳକାୟ ସାତକୋଶିଆ ଗଣ୍ଡ ଏବଂ ବନ୍ୟ ଜୀବଜନ୍ତୁଙ୍କ ଆଶ୍ରୟସ୍ଥଳୀ ଭାବେ ପରିଚିତ ସାତକୋଶିଆ ଅଭୟାରଣ୍ୟ। ଏହି ଆକର୍ଷକ ପରିବେଶରେ ରଙ୍ଗବେରଙ୍ଗରେ ସଜେଇ ହୋଇଥିବା ଜଙ୍ଗଲୀ ଗାଁଟି ଓଡ଼ିଶା ପର୍ଯ୍ୟଟନର ଏକ ସୁନ୍ଦର ନମୁନା ପ୍ରସ୍ତୁତ କରିପାରିଛି।

ନିକୋ ପାର୍କର ନବକଳେବର ଆଣିବ ୧୦୦ କୋଟିର

ଭୁବନେଶ୍ବରର ଛାତି ଉପରେ ଗଢ଼ିଉଠିଥିଲା ଏକ ସୁନ୍ଦର ସୁରମ୍ୟ ପ୍ରମୋଦ ଉଦ୍ୟାନ। ଏହାର ନାଁ ଥିଲା ନିକୋ ପାର୍କ। ଭୁବନେଶ୍ବର ଓ ବହିରାଗତ ପର୍ଯ୍ୟଟକଙ୍କ ପାଇଁ ଦିନେ ଏହି ପାର୍କ ଥିଲା ଏକ ପ୍ରମୁଖ ଆକର୍ଷଣ। କିନ୍ତୁ ଏହି ପାର୍କକୁ ମାଟିଗଦାରେ ପରିଣତ କରିଦେଇଗଲା ଫନି ମହାବାତ୍ୟା। ତା’ ପରଠାରୁ ଏହି ପାର୍କ କେବଳ ଯେ ଶ୍ରୀହୀନ ହୋଇଛି ତାହା ନୁହେଁ, ପର୍ଯ୍ୟଟକଙ୍କ ପାଇଁ ସବୁଦିନ ଲାଗି ବନ୍ଦ ହୋଇ ପଡ଼ିଛି। ମିଳିତ ଉଦ୍ୟୋଗରେ ଥିବା ଏହି ପାର୍କର ୫୧ ପ୍ରତିଶତ ଅଂଶଧନ ସନ୍‌ଟେକ୍‌ ସିଟି ପ୍ରାଇଭେଟ ଲିମିଟେଡର ଥିବାବେଳେ ବିଡିଏ ହାତରେ ରହିଛି ୪୯ ପ୍ରତିଶତ ଅଂଶଧନ। ଘରୋଇ ସଂସ୍ଥା ପାର୍କକୁ ଚଳାଇବାକୁ ଚାହୁଁ ନାହିଁ। ବିଡିଏକୁ ପୂରା ହସ୍ତାନ୍ତର କରି ତା’ର ପ୍ରାପ୍ୟ ନେବାକୁ ଚାହୁଁଛି। ହେଲେ ବିଡିଏ ଘରୋଇ ସଂସ୍ଥା ହାତରୁ ପାର୍କ ନେବାକୁ ଏ ପର୍ଯ୍ୟନ୍ତ ପ୍ରକ୍ରିୟା ଆରମ୍ଭ କରିନି। ଏହି ପାର୍କରେ ପ୍ରାୟ ୩୨ ଜଣ କର୍ମଚାରୀଙ୍କୁ ୬ ମାସ ହେଲା ଦରମା ମିଳିନି। ରାଜଧାନୀରେ ଦରମା ନ ପାଇ ଦୁର୍ବିସହ ଜୀବନ ବିତାଉଥିବା ଏହି କର୍ମଚାରୀମାନେ ଏବେ ବାରଦୁଆର ଶୁଣ୍ଢିପିଣ୍ଡା ହେଉଥିବା ବେଳେ ସନ୍‌ଟେକ ସିଟି ପ୍ରା: ଲିମିଟେଡ ତା’ର ଦାୟିତ୍ବରୁ ସମ୍ପୂର୍ଣ୍ଣ ଓହରି ଯାଇଛି।

ପବିତ୍ର ପଞ୍ଚକ: ପାପ ଧୋଇବାର ପ୍ରକୃଷ୍ଟ ସମୟ

ଓଡ଼ିଶା ପର୍ବପର୍ବାଣୀର ରାଜ୍ୟ। ଏଠି ବାର ମାସରେ ତେରପର୍ବ ପାଳନ କରାଯାଏ। ପ୍ରତ୍ୟେକ ପର୍ବପର୍ବାଣୀର ଏକ ନିଜସ୍ୱ ସ୍ୱତନ୍ତ୍ରତା ରହିଛି। ଉତ୍କଳୀୟ ପର୍ବପର୍ବାଣୀ ସାଧାରଣତଃ ଧର୍ମ ଓ ପୌରାଣିକ ଉପାଖ୍ୟାନର ଭିତ୍ତି ଉପରେ ପ୍ରତିଷ୍ଠିତ। ପର୍ବପର୍ବାଣୀଗୁଡ଼ିକରେ ଜନଜୀବନର ସଂସ୍କୃତି, ଜାତୀୟତା ବୋଧ ଓ ଧର୍ମଧାରଣା ଆଦି ସଂଶ୍ଳିଷ୍ଟ। ଉତ୍କଳୀୟ ପର୍ବପର୍ବାଣୀ ମହାଭାରତୀୟ ସ୍ରୋତରୁ ଭିନ୍ନ ନୁହେଁ। ବିଶେଷତଃ ପର୍ବପର୍ବାଣୀ, ଓଷାବ୍ରତ ଓ ଯାନିଯାତ୍ରାଗୁଡ଼ିକ ତିଥି, ବାର, ନକ୍ଷତ୍ର, କୃଷିକର୍ମ, ଦେବଦେବୀ, ଶାସ୍ତ୍ରୀୟ କାହାଣୀ, ଲୋକକଥା, ଆନନ୍ଦ ମହୋତ୍ସବ ପାଇଁ ପାଳିତ ହୋଇଥାଏ। ଉତ୍କଳୀୟ ପର୍ବପର୍ବାଣୀଗୁଡ଼ିକୁ ଚାରୋଟି ମୁଖ୍ୟ ଭାଗରେ ବିଭକ୍ତ କରାଯାଇ ପାରେ। ଯଥା ଶାସ୍ତ୍ରୀୟ, ଲୌକିକ, ଆଞ୍ଚଳିକ ଓ କୃଷି ଭିତ୍ତିକ। ତେବେ ସବୁ ପର୍ବ ପର୍ବାଣୀ ଓ ବତ୍ରଠାରୁ ଭିନ୍ନ ହେଉଛି କାର୍ତ୍ତିକ ବ୍ରତ। କୁହାଯାଏ,କାର୍ତ୍ତିକ ପରି ମାସ ନାହିଁ, ସତ୍ୟ ଯୁଗ ପରି ଯୁଗ ନାହିଁ, ବେଦ ସଦୃଶ ଶାସ୍ତ୍ର ନାହିଁ ଏବଂ ଗଙ୍ଗା ପରି ତୀର୍ଥ ନାହିଁ। କାର୍ତ୍ତିକ ମାସ ଭଗବାନ ବିଷ୍ଣୁଙ୍କର ଅତିପ୍ରିୟ ମାସ। ତନ୍ମଧ୍ୟରୁ ଶେଷ ପାଞ୍ଚଦିନ ଅର୍ଥାତ୍ କାର୍ତ୍ତିକ ଶୁକ୍ଳ ଏକାଦଶୀ ଠାରୁ ପୂର୍ଣ୍ଣମୀ ପର୍ଯ୍ୟନ୍ତ ଅତୀବ ପବିତ୍ର ଦିବସ ପଞ୍ଚକ ଭାବେ ଗଣାଯାଏ। ଏହି ପାଞ୍ଚଦିନକୁ ଭୀଷ୍ମ ପଞ୍ଚକ, ବକ ପଞ୍ଚକ, ମହାପଞ୍ଚକ ବୋଲି ମଧ୍ୟ କୁହାଯାଏ।

ଖଳନାୟକ ୯୯୬ ଉଜାଡ଼ୁଛି ପାରିବାରିକ ସମ୍ପର୍କ

ଅଫିସରେ କାମ ଏବଂ କାମ ସହ ଜଡ଼ିତ ଚାପକୁ ନେଇ ଆପଣ ନିଜର ପରିବାରକୁ ସମୟ ଦେଇପାରୁ ନାହାନ୍ତି କି? ଯଦି ହଁ ତେବେ ଆପଣ ଏ କ୍ଷେତ୍ରରେ ଏକାକୀ ନୁହେଁ। ୬୪ ପ୍ରତିଶତ ଭାରତୀୟ ନିଜ ପରିବାରକୁ କାମର ଚାପ ଯୋଗୁଁ ସମୟ ଦେଇପାରୁ ନାହାନ୍ତି। ଏହି ତଥ୍ୟ ନିକଟରେ କରାଯାଇଥିବା ଏକ ସର୍ଭେରୁ ଆସିଛି। ସର୍ବେକ୍ଷଣର ନିଷ୍କର୍ଷରୁ ଜଣାପଡ଼ିଛି ଯେ ଏହାଦ୍ବାରା ବ୍ୟକ୍ତିର ମାନସିକ ଚାପ ବଢ଼ିବା ସାଙ୍ଗକୁ ପାରିବାରିକ କଳହର ମଧ୍ୟ ସୂତ୍ରପାତ ହେଉଛି। କେବଳ ଅଫିସ ଦାୟିତ୍ବକୁ ମୁଣ୍ଡାଇ ବାକି ସବୁ ଦାୟିତ୍ବକୁ ଭୁଲିଗଲେ ଚଳିବନି। ହୁଏତ ଅର୍ଥ ରୋଜଗାର ଓ ଅନ୍ୟାନ୍ୟ ପାରିପାର୍ଶ୍ବିକ ଚାପରେ ଜଣେ ବ୍ୟକ୍ତି ଏହି ଢାଞ୍ଚାରେ ନିଜକୁ ପକଳାଇ ଦେଇପାରେ। କିନ୍ତୁ ତା’ର ପରିବାରର ଅନ୍ୟ ସଦସ୍ୟମାନେ ଏଥିସହ ସବୁବେଳେ ଖାପଖୁଆଇ ଚଳିବାକୁ ବାଧ୍ୟ ନୁହନ୍ତି। ଏବେ ଏହା ହିଁ ଅଶାନ୍ତିର ମୂଳ କାରଣ ପାଲଟିଛି। ଏହାଛଡ଼ା ସ୍ବାସ୍ଥ୍ୟାବସ୍ଥାକୁ ମଧ୍ୟ ପ୍ରଭାବିତ କରୁଛି ଏହି କାର୍ଯ୍ୟଶୈଳୀ। ଏହା ପଛର ମୁଖ୍ୟ ଖଳନାୟକ ଚୀନରେ ପ୍ରଚଳିତ ୯୯୬ ୱାର୍କ କଲଚର ବୋଲି ଜଣାପଡ଼ିଛି। ଏଥିରୁ ଶୀଘ୍ର ମୁକୁଳିବାର ଉପାୟ କରା ନ ଗଲେ ଭବିଷ୍ୟତରେ ଅନେକ ପରିବାର ଯେ ଉଜୁଡ଼ିଯିବ, ଏଥିରେ ସନ୍ଦେହ ନାହିଁ।

ବୟସ ୮୦, ନିଶା ପେଣ୍ଟିଂ: ମିଲାନ୍‌ ଓ ପ୍ୟାରିସ୍‌ରେ ବି ଚାହିଦା

ମଧ୍ୟ ପ୍ରଦେଶର ଝୁଡ଼ିଆ ବେଗ୍‌। ବୟସ ୮୦। ଆଦିବାସୀ ପରିବାରରେ ଅତି ଦୟନୀୟ ସ୍ଥିତିରେ ତାଙ୍କ ଜୀବନ ବତିଛି। ସ୍ବାମୀ ମଧ୍ୟ ପ୍ରାୟ ୪୦ ବର୍ଷ ତଙ୍କ ହାତ ଛାଡ଼ି ଆରପାରିକୁ ଚାଲିଯାଇଛନ୍ତି। ପରିବାର ସଦସ୍ୟଙ୍କ ପାଖରେ ବଣ ଜଙ୍ଗଲ ଘେରା ଘେରା ରହୁଥିବା ବୃଦ୍ଧା ଝୁଡ଼ିଆ କିନ୍ତୁ ପରିଣତ ବୟସରେ ପ୍ରଶଂସା ସାଉଁଟିବାରେ ସଫଳ ହୋଇଛନ୍ତି। ଦିନେ ଯେଉଁ ଗାଁକୁ ସରକାରୀ ବାବୁମାନଙ୍କର ପାଦ ପଡ଼ୁ ନ ଥିଲା, ସେଠାରେ ଏବେ ପହଞ୍ଚିଛନ୍ତି ବିଦେଶରୁ ଆସିଥବା ନାମକରା ସଂସ୍ଥା। ଝୁଡ଼ିଆ ୮୦ ବର୍ଷ ବୟସରେ ବି ଯେଉଁ ପ୍ରକାର ପେଣ୍ଟିଂ କରୁଛନ୍ତି, ତାହା ଦେଖି ସମସ୍ତଙ୍କ ଆଖି ଖୋସି ହୋଇ ଯାଉଛି। ତାଙ୍କର ସୁନ୍ଦର ପେଣ୍ଟିଂକୁ ଇଟାଲୀର ମିଲାନ୍‌ ଓ ଫ୍ରାନ୍ସର ପ୍ୟାରିସରେ ଅନୁଷ୍ଠିତ ପେଣ୍ଟିଂ ପ୍ରତିଯୋଗିତାରେ ପ୍ରଶଂସାପତ୍ର ମିଳିଛି। ତାଙ୍କ ହାତ ତିଆରି ପେଣ୍ଟିଂ ପାଖରେ ବହୁ ସଂଖ୍ୟାରେ ପର୍ଯ୍ୟଟକ ଅଟକି ଯାଉଛନ୍ତି। ଏହା କ’ଣ ଝୁଡ଼ିଆଙ୍କ ଈଶ୍ବରଦତ୍ତ ପ୍ରତିଭା ନା ଆଉ କିଛି ତାହା ଜାଣିବା ପାଇଁ ମଧ୍ୟ ଅନେକ ବେସରକାରୀ ସଂସ୍ଥା ଉଦ୍ୟମ ଆରମ୍ଭ କରିଛନ୍ତି। ଝୁଡ଼ିଆଙ୍କର ଏହି ବିଚକ୍ଷଣ ପ୍ରତିଭା ବାବଦରେ ଭାରତୀୟ ଗଣମାଧ୍ୟମରେ ମଧ୍ୟ ରିପୋର୍ଟ ପ୍ରକାଶ ପାଇବାରେ ଲାଗିଛି।

ଏଠି ଘରଭଡ଼ା ସମ୍ପୂର୍ଣ୍ଣ ମାଗଣା, ସାଥୀରେ ବି କ୍ୟାଶ୍‌ ବୋନସ୍‌

ବର୍ତ୍ତମାନ ସମୟରେ ମଣିଷ ପାଇଁ ସବୁଠାରୁ ବଡ଼ ଆବଶ୍ୟକତା ହେଉଛି ମୁଣ୍ଡ ଉପରେ ଛାତଟିଏ। ଖାଦ୍ୟ, ପୋଷାକ ଓ ବାସଘର ମଣିଷର ସବୁଠାରୁ ବଡ଼ ଆବଶ୍ୟକତା ଥିବା ବେଳେ ବର୍ତ୍ତମାନର ମହରଗ ଦୁନିଆରେ ଘରଟିଏ ମିଳିବା ସବୁଠାରୁ ବଡ଼ କଷ୍ଟକର ବ୍ୟାପାର। ବିଶେଷକରି ସହରାଞ୍ଚଳରେ ଏହି ସମସ୍ୟା ଅଧିକ ଗୁରୁତର ରୂପ ଧାରଣ କରିବାରେ ଲାଗିଛି। ଘର ଖଣ୍ଡିଏ ଭଡ଼ାରେ ପାଇବା ପାଇଁ କେତେ ଯେ ହଇରାଣ ହରକତ ହେବାକୁ ପଡ଼ୁଛି, ତାହା ଅଙ୍ଗେ ନିଭାଇଥିବା ଲୋକଠାରୁ କେହି ଅଧିକ ବୁଝିପାରିବେ ନାହିଁ। ତେବେ ସାମ୍ପ୍ରତିକ ସମୟର ମହଙ୍ଗା ଯୁଗରେ ଏପରି ଏକ ଜାଗା ରହିଛି, ଯେଉଁଠି ଭଡ଼ାରେ ନେବା ସକାଶେ ଘର ବେଶ୍‌ ସହଜରେ ମିଳିଯାଏ। ଅଧିକନ୍ତୁ ଏଥିପାଇଁ କୌଣସି ଅର୍ଥ ଦେବାକୁ ପଡ଼େ ନାହିଁ। ବରଂ ଘରେ ଭଡ଼ାରେ ରହିବା ସକାଶେ ଆର୍ଥିକ ପ୍ରୋତ୍ସାହନ ଯୋଗାଇ ଦିଆଯାଏ। କିନ୍ତୁ ଘର ଭଡ଼ା ନେବାକୁ ଚାହୁଁଥିବା ଲୋକକୁ ଗୋଟିଏ ସର୍ତ୍ତ ପୂରଣ କରିବାକୁ ପଡ଼ିବ। ଏପରି ଏକ ଖବର ବୋଧହୁଏ ଆପଣଙ୍କ ପାଇଁ ହଜମ କରିବା ସହଜ ହେବନାହିଁ। କିନ୍ତୁ ଏଥିରେ ସାମାନ୍ୟତମ ମିଥ୍ୟା ନାହିଁ ଓ ଏହା ନିରାଟ ସତ୍ୟ।

ରକ୍ତକୁ ଲାତ: ସମ୍ପତ୍ତି ପାଇଁ ୯୦ ବର୍ଷୀୟା ମା’ଙ୍କୁ କରିଦେଲେ

ଜନନୀ ଜନ୍ମଭୂମିଶ୍ଚ ସ୍ବର୍ଗାଦପି ଗରିୟସୀ। ଅର୍ଥାତ୍‌ ମା’ ହେଉଛନ୍ତି ସ୍ବର୍ଗଠାରୁ ବଡ଼। କିନ୍ତୁ ଆଜିର ସ୍ବାର୍ଥପର ଦୁନିଆରେ ପୁଅ ପାଇଁ ମା’ ସ୍ବର୍ଗ ନୁହେଁ, ବରଂ ଏକ ବୋଝ ପାଲଟିଛି। ପୁଅଟିଏ ପାଇବା ପାଇଁ ମା’ କେତେ ଯେ ଦିଅଁଦେବତାଙ୍କ ପାଖରେ ମୁଣ୍ଡ ପିଟେ, ତା’ର କୌଣସି ହିସାବ ନାହିଁ। ପୁଅଟିଏ ଜନ୍ମହେଲେ ବୃଦ୍ଧାବସ୍ଥାରେ ବାପା-ମା’ଙ୍କ ଆଶାବାଡ଼ି ହେବ। ମଲା ପରେ ମୁହଁରେ ମୁଖାଗ୍ନି ଦେବ। ଏଭଳି ଅନେକ ଆଶାରେ ପୁଅଟିଏ ପାଇଁ ସମସ୍ତେ ବ୍ୟାକୁଳ ହୋଇଥାନ୍ତି। ମାତ୍ର ପରିଣତ ବୟସରେ ତାକୁ ଯେ ଅନ୍ଧ ଲଉଡ଼ି ଅନ୍ଧାରରେ ଛାଡ଼ିଦେବ , ଏ କଥା କାହିଁକି ବା କିଏ ଭାବିବ। ନିଜ ଜନ୍ମକଲା ପୁଅ କେତେ ନିଷ୍ଠୁର ପାଲଟିପାରେ, ତା’ର ଏକ ସଦ୍ୟତମ ଉହାହରଣ ଦେଖିବାକୁ ମିଳିଛି ଭଦ୍ରକ ଜିଲ୍ଲା ଚାନ୍ଦବାଲି ଅଞ୍ଚଳରେ। ବୟସ ଶେଷ ସୋପାନରେ। ଆଖିକୁ ଭଲଭାବେ ଦେଖାଯାଉନି କି କାନକୁ ଠିକ୍‌ଭାବେ ଶୁଣାଯାଉନି। ଉଠିବାକୁ ଅଣ୍ଟାରେ ଜୁ ମଧ୍ୟ ନାହିଁ। ଏଭଳି ଅବସ୍ଥାରେ ମା’କୁ ବୋଝ ଭାବି ଚାନ୍ଦବାଲି ବସ୍‌ଷ୍ଟାଣ୍ଡ ନିକଟରେ ଥିବା ଆହାର କେନ୍ଦ୍ର ବାରଣ୍ଡାରେ ଛାଡ଼ି ଦେଇ ଚାଲି ଯାଇଛି ପୁଅ। ନିଜ ରକ୍ତ ଧୋକା ଦେବା ପରେ ବୁଢ଼ୀ ମା’ର ସମ୍ଭଳ କହିଲେ ଖଣ୍ଡେ ବାଡ଼ି ଆଉ କେଇ ଟୋପା ଲୁହ।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ