ସ୍ବତନ୍ତ୍ର ପ୍ରସଙ୍ଗ

ଭଦ୍ର ଡ୍ରାଇଭରଙ୍କ ସହର

ବିଶ୍ବ ସ୍ବାସ୍ଥ୍ୟ ସଂଗଠନର ଏକ ପରିସଂଖ୍ୟାନ ଅନୁଯାୟୀ ୨୦୧୬ରେ ଆମ ଦେଶରେ ସଡ଼କ ଦୁର୍ଘଟଣା କାରଣରୁ ୨,୯୯,୦୯୧ ଜଣଙ୍କ ଜୀବନ ଯାଇଥିଲା। ଯାନବାହନ ନିର୍ମାତା ଫୋର୍ଡ ପକ୍ଷରୁ ନିକଟରେ ସଡ଼କ ଦୁର୍ଘଟଣା ସମ୍ପର୍କିତ ବିଭିନ୍ନ ପ୍ରସଙ୍ଗକୁ ନେଇ ଏକ ସର୍ଭେ କରାଯାଇଥିଲା। ଏଥିରେ ଭାରତର ୧୦ ସହରରେ ଗାଡ଼ି ଚଳାଉଥିବା ଡ୍ରାଇଭରମାନଙ୍କ ବ୍ୟବହାରର ଅଧ୍ୟୟନ କରାଯାଇଥିଲା। ଏହି ଅଧ୍ୟୟନରୁ ଜଣାପଡ଼ିଥିଲା କି କୋଲକାତା ଏବଂ ହାଇଦ୍ରାବାଦ ସହରରେ ସବୁଠୁ ସଭ୍ୟ ଭାବରେ ଗାଡ଼ି ଚାଳନା କରାଯାଇଥାଏ। ଦିଲ୍ଲୀ ଏବଂ ମୁମ୍ବାଇରେ ଡ୍ରାଇଭରମାନେ ବେପରୁଆ ଭାବରେ ଗାଡ଼ିଚାଳନା କରୁଥିବା ସଂଖ୍ୟା ଅଧିକ ଥିବା ଏହି ସର୍ଭେରୁ ସାମ୍ନାକୁ ଆସିଛି। ଛୋଟ ସହର ହିସାବରେ ଲୁଧିଆନାର ଲୋକେ ସଡ଼କ ଉପରେ ଅତ୍ୟନ୍ତ ଭଦ୍ରଭାବେ ଗାଡ଼ିଚାଳନା କରୁଥିବା ବେଳେ ଇନ୍ଦୋରର ଡ୍ରାଇଭରମାନେ ସଡ଼କ ଉପରେ ସବୁଠୁ ବେଶୀ ଅସଭ୍ୟ ଆଚରଣ କରିଥାନ୍ତି।

କନ୍ଦାଇବ କୁମ୍ଭ

ପ୍ରୟାଗରାଜରେ ୧୫ ଜାନୁଆରୀ ୨୦୧୯ ଠାରୁ ଆରମ୍ଭ ହେଉଥିବା କୁମ୍ଭମେଳାକୁ ଅନ୍ତର୍ଜାତୀୟ ପରିଚୟ ଦେବାର ପ୍ରସ୍ତୁତି ଜୋର୍‌ସୋରରେ ଚାଲିଛି। ଏହାକୁ ଦୃଷ୍ଟିରେ ରଖି ସରକାର ଡଜନେରୁ ଅଧିକ ଯୋଜନାକୁ ଯୁଦ୍ଧକାଳୀନ ଭାବେ ଆରମ୍ଭ କରିଛନ୍ତି। ମେଳାରେ ଗଙ୍ଗାର ସ୍ବଚ୍ଛ ଜଳରାଶି ପ୍ରବାହକୁ ସରକାର ମୁଖ୍ୟ ଆହ୍ବାନ ଭାବେ ଗ୍ରହଣ କରିଛନ୍ତି। ଗଙ୍ଗାନଦୀକୁ ପ୍ରଦୂଷିତ ଜଳ ନ ଛାଡ଼ି କାରଖାନାଗୁଡ଼ିକ କିଭଳି ଚାଲିବ ତାକୁ ନେଇ ପ୍ରଶ୍ନ ଉଠିଛି। ତିନିମାସ ପାଇଁ କାରଖାନା ବନ୍ଦ କଲେ ଯାଇ ଏଭଳି ସମସ୍ୟାର ସମାଧାନ ହୋଇପାରିବ। କାହିଁକି ନା ଅଧିକାଂଶ କାରଖାନାର ବର୍ଜ୍ୟଜଳ ସିଧା ଗଙ୍ଗାରେ ଆସି ମିଶୁଛି। ଗଙ୍ଗାକୁ ବର୍ଜ୍ୟଜଳ ଛାଡ଼ିବା ବ୍ୟତୀତ ଅନ୍ୟକିଛି ବିକଳ୍ପ ନାହିଁ। ପ୍ରଶାସନ କିନ୍ତୁ ସଫା ସଫା କହିଦେଇଛି ଯେ ମେଳା ଚାଲିଥିବା ସମୟରେ କାରଖାନା ଗୁଡ଼ିକର ବୁନ୍ଦାଏ ବି ପ୍ରଦୂଷିତ ଜଳ ଯେପରି ଗଙ୍ଗାରେ ନ ମିଶେ।

କଣ୍ଢେଇ ଦେଉଛି ଲୁହ

କଣ୍ଢେଇଟିଏ ଶିଶୁ ଓଠରେ ଦେଇଥାଏ ହସ। ହେଲେ ହସ ଭରୁଥିବା କଣ୍ଢେଇ ଦେହରେ ବୋଳି ହୋଇଛି ବିଷ। ହସ ନୁହେଁ, ଏବେ ଅଶ୍ରୁ ଭରୁଛି କଣ୍ଢେଇ। ଖେଳନା ପ୍ରସ୍ତୁତକାରୀ କମ୍ପାନୀଙ୍କ ମଧ୍ୟରେ ପ୍ରମୁଖ ଭାରତୀୟ କମ୍ପାନୀ ଫନ୍‌ସ୍କୁଲ ଇଣ୍ଡିଆ ଲିମିଟେଡର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ କେ.ଜନ ବେବିଙ୍କ ସୂଚନା ଅନୁଯାୟୀ ଭାରତର ସଂଗଠିତ ଖେଳନା ବଜାର ଏବେ ପ୍ରାଥମିକ ପର୍ଯ୍ୟାୟରେ ରହିଛି ଏବଂ କ୍ଷୀପ୍ର ଗତିରେ ଆଗକୁ ବଢ଼ୁଛି। ପ୍ରତିବର୍ଷ ୧୦ରୁ ୧୨ ପ୍ରତିଶତ ହାରରେ ବଢ଼ୁଥିବାର ଆଶା କରାଯାଉଛି। ଏଭଳି ସ୍ଥିତିରେ ଫନ୍‌ସ୍କୁଲ ୩୦୦୦ କୋଟିର ଭାରତୀୟ ଖେଳନା ବଜାରରେ ତା’ର ଉପସ୍ଥିତିକୁ ମଜଭୁତ କରାଇବା ପାଇଁ ଅଂଶୀଦାର ବଢ଼ାଇବା ନିଷ୍ପତ୍ତି ନେଇଛି। ଭାରତୀୟ କମ୍ପାନୀଗୁଡ଼ିକ ସହିତ ଚୀନ ଓ ଫିଲିପାଇନ୍ସର କଣ୍ଢେଇ ନିର୍ମାତାମାନେ ଶସ୍ତା ସୁନ୍ଦର ଓ ଚକମକିଆ କଣ୍ଢେଇମାନ ଭାରତୀୟ ବଜାରରେ ଉପଲବ୍ଧ କରାଉଛନ୍ତି।

୫ ରାଜ୍ୟରେ ନିର୍ବାଚନ ଫଳାଫଳର ଭବିଷ୍ୟବାଣୀ

୫ଟି ରାଜ୍ୟରେ ଅନୁଷ୍ଠିତ ନିର୍ବାଚନ ପରେ ଶୁକ୍ରବାର ଏକ୍‌ଜିଟ ପୋଲ୍‌ ପ୍ରକାଶ ପାଇଛି। ମଧ୍ୟ ପ୍ରଦେଶ, ଛତିଶଗଡ଼, ରାଜସ୍ଥାନ, ତେଲେଙ୍ଗାନା ଓ ମିଜୋରାମ ବିଧାନସଭା ନିର୍ବାଚନ ଫଳ ଡିସେମ୍ବର ୧୧ରେ ପ୍ରକାଶ ପାଇବାକୁ ଥିବା ବେଳେ ଏକ୍‌ଜିଟ ପୋଲ୍‌କୁ ନେଇ ଚର୍ଚ୍ଚା ଜୋର ଧରିଛି। ଏକ୍‌ଜିଟ୍‌ ପୋଲରେ ଛବି ଆଦୌ ସ୍ପଷ୍ଟ ନ ଥିବା ବେଳେ ମୁଖ୍ୟତଃ ଏଥିରେ ରାଜସ୍ଥାନ ଓ ମଧ୍ୟ ପ୍ରଦେଶରେ କଂଗ୍ରେସ ସରକାର ଗଢ଼ୁଥିବା କୁହାଯାଇଛି। ଛତିଶଗଡ଼ରେ ରମଣ ସିଂ ନିଜ ସରକାରକୁ ବଞ୍ଚାଇବାରେ ସଫଳତା ପାଉଥିବା କୁହାଯାଇଛି। ତେଲେଙ୍ଗାନାରେ କଂଗ୍ରେସ-ଟିଡିପି ମେଣ୍ଟ ସେଭଳି କିଛି ଯାଦୁ ଦେଖାଇ ପାରି ନ ଥିବା ମତଦାନ କେନ୍ଦ୍ରରୁ ଫେରୁଥିବା ଭୋଟରମାନେ ସର୍ଭେ ଟିମ୍‌ ଆଗରେ କହିଛନ୍ତି। ଚନ୍ଦ୍ରଶେଖର ରାଓ ନିଜ ଗାଦିକୁ ସୁରକ୍ଷିତ ରଖିପାରୁଥିବା ଏକ୍‌ଜିଟ ପୋଲ୍‌ ଦର୍ଶାଇଛି।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ