ଚର୍ଚ୍ଚିତ ଖବର

ଟ୍ରମ୍ପଙ୍କ ବିତଣ୍ଡା ବୟାନ: ଜଳବାୟୁ ପରିବର୍ତ୍ତନ ନେଇ

ୱାଶିଂଟନ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଅନେକ ସମୟରେ ତାଙ୍କ ବୟାନକୁ ନେଇ ଚର୍ଚ୍ଚାକୁ ଆସିଥାଆନ୍ତି। ଏବେ ପୁଣିଥରେ ତାଙ୍କର ଏମିତି ଏକ ବୟାନ ତାଙ୍କ ପୁଣିଥରେ ଚର୍ଚ୍ଚାକୁ ନେଇ ଆସିଛି। ଜଳବାୟୁ ପରିବର୍ତ୍ତନକୁ ନେଇ ଏବେ ସେ ଯେଉଁ ବୟାନ ଦେଇଛନ୍ତି ତାହା ସମସ୍ତଙ୍କ ଦୃଷ୍ଟି ଆକର୍ଷଣ କରିଛି। ସେ କହିଛନ୍ତି ଯେ ଜଳବାୟୁ ପରିବର୍ତ୍ତନକୁ ନେଇ ବୈଜ୍ଞାନିକମାନେ ଯେଉଁ ତଥ୍ୟ ପ୍ରଦାନ କରୁଛନ୍ତି ତାହା ସଠିକ୍ ତଥ୍ୟ ନୁହେଁ। ଏହାପରେ କାଲିଫର୍ଣ୍ଣିଆର ନ୍ୟାଚୁରାଲ ରିସୋର୍ସେସ ସଚିବ ୱାଡେ କ୍ରୋଫୁଟ କହିଛନ୍ତି, ଆମେ ଆପଣଙ୍କ ସହ କାମ କରିବାବୁ ଚାହୁଁଛୁ। କାରଣ ଆମେ ଜାଣିଛୁ ଜଳବାୟୁ ପରିବର୍ତ୍ତନ ଜଙ୍ଗଲ ଉପରେ ଗଭୀର ପ୍ରଭାବ ପକାଇଥାଏ। ଏହାସହ ଆମେ ବୈଜ୍ଞାନିକଙ୍କ ସହ ମଧ୍ୟ କାମ କରିବାକୁ ପ୍ରସ୍ତୁତ ଅଛୁ। ଯଦି ଆମେ ବିଜ୍ଞାନକୁ ମାନୁନେ ତେବେ ଏହା କେବଳ ବାଲିରେ ମୁଣ୍ଡ ଘୋଷାଡିବା ଭଳି କାମ ହେବ। ଆଉ ଆମେ କାଲିଫର୍ଣ୍ଣିଆର ଲୋକଙ୍କୁ ବଞ୍ଚାଇ ପାରିବା ନାହିଁ।

ଯୋଗ ଓ ନେଚରୋପ୍ୟାଥି କେନ୍ଦ୍ରୀୟ ଗବେଷଣା ପ୍ରତିଷ୍ଠାନ

ଭୁବନେଶ୍ବର: କେନ୍ଦ୍ରୀୟ ଯୋଗ ଓ ନେଚରୋପ୍ୟାଥି ପ୍ରତିଷ୍ଠାନ ଖୋଲିବା ପାଇଁ କେନ୍ଦ୍ରକୁ ପ୍ରସ୍ତାବ ଦେଇଛି ଓଡ଼ିଶା। ଓଡ଼ିଶାର ପ୍ରସ୍ତାବ ଆଧାରରେ କେନ୍ଦ୍ର ସରକାର ଏଥିପାଇଁ ପାଣ୍ଠି ଯୋଗାଇ ଦେଇଛନ୍ତି। ଯୋଗ ଓ ନେଚରୋପ୍ୟାଥି କେନ୍ଦ୍ରୀୟ ଗବେଷଣା ପରିଷଦ ଆୟୂଷ ମନ୍ତ୍ରାଳୟ ଅଧୀନରେ ଏକ ସ୍ୱୟଂଶାସିତ ସଂସ୍ଥାଭାବେ କାର୍ଯ୍ୟ କରୁଛି। ଓଡ଼ିଶା ସରକାରଙ୍କୁ ଏହି କେନ୍ଦ୍ର ସ୍ଥାପନ ପାଇଁ ଯୋଗାଇ ଦିଆଯାଇଥିବା ୧.୫୮ କୋଟି ଟଙ୍କା ମଧ୍ୟରୁ ୯ ଲକ୍ଷ ଟଙ୍କା ବିନିଯୋଗ ହୋଇଛି। ସମଗ୍ର ଦେଶରେ ଯୋଗ ଓ ନେଚରୋପ୍ୟାଥିକୁ ପ୍ରୋତ୍ସାହିତ କରିବା ସହ ବିଦେଶରେ ଏହାକୁ ପହଞ୍ଚାଇବା ଲକ୍ଷ୍ୟରେ ଏସବୁ କେନ୍ଦ୍ର ପ୍ରତିଷ୍ଠା କରାଯାଉଛି ବୋଲି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଡ. ହର୍ଷବର୍ଦ୍ଧନ କହିଛନ୍ତି କହିଛନ୍ତି।

ଶୁକ୍ର ଗ୍ରହରେ ଜୀବନ ସମ୍ଭବ!

ଓ୍ବାଶିଂଟନ: ଶୁକ୍ର ଗ୍ରହରେ ଜୀବନର ସନ୍ଧାନ ମିଳିଛି। ଏନେଇ ମହାକାଶ ବିଜ୍ଞାନୀ ସୂଚନା ଦେଇଛନ୍ତି। ଏଠାକାର ବାୟୁମଣ୍ଡଳରେ ଫସଫିନ୍‌ ଗ୍ୟାସ୍‌ର ଆସ୍ତରଣ ଥିବା ଜଣାପଡ଼ିଛି। ହୁଏତ ଏଠାକାର ବାୟୁମଣ୍ଡଳରେ ଏଲିଅନ ବାସ କରୁଥାଇ ପାରନ୍ତି ବୋଲି ମହାକାଶ ବିଜ୍ଞାନୀ ଆଶା ପ୍ରକାଶ କରିଛନ୍ତି। ଫସଫିନ୍‌‌ ଗ୍ୟାସ୍‌ର ଅଣୁରେ ଗୋଟିଏ ଫସଫରସ୍‌ ପରମାଣୁ ଏବଂ ୩ଟି ହାଇଡ୍ରୋଜେନ୍‌ ପରମାଣୁ ରହିଥାଏ। ଏଥିରେ ଜୀବନ ତିଷ୍ଠି ରହିବାର ଯଥେଷ୍ଟ ସମ୍ଭାବନା ରହିଛି। ଶୁକ୍ରର ବାୟୁମଣ୍ଡଳରେ ସୂକ୍ଷ୍ମ ଜୀବନ ଭାସି ବୁଲୁଥିବା ଅନୁମାନ କରାଯାଉଛି। ଫସଫିନ୍‌ ଗ୍ୟାସ୍‌ ପେଙ୍ଗୁଇନ୍‌ଙ୍କ ପାକସ୍ଥଳୀରେ ମିଳିଥାଏ। ସେହିପରି କମ୍‌ ଅମ୍ଳଜାନ ଥିବା ସ୍ଥାନରେ ଏହି ଗ୍ୟାସ୍‌ ମିଳିଥାଏ। ମାଇକ୍ରୋ ବ୍ୟାକ୍ଟେରିଆ ଅମ୍ଳଜାନ ଅଭାବରେ ଏହି ଗ୍ୟାସ୍‌ ସୃଷ୍ଟି କରିଥାନ୍ତି। ଶୁକ୍ରର ବାୟୁ ମଣ୍ଡଳରେ ଫସଫିନ୍‌ ଗ୍ୟାସ୍‌ର ପତଳା ଆବରଣ ରହିଛି। ଏହା ଏଠାରେ ଥିବା ଜୀବନକୁ ପ୍ରମାଣିତ କରୁଛି ବୋଲି ମହାକାଶ ବିଜ୍ଞାନୀ ଦାବି କରିଛନ୍ତି।

ଜଳୁଛି କାଲିଫର୍ଣ୍ଣିଆ ଜଙ୍ଗଲ: ମଲେଣି ୩୫, ସହସ୍ରାଧିକ ଘର

ଓରେଗୋନ୍: କାଲିଫର୍ଣ୍ଣିଆରୁ ୱାଶିଂଟନ୍ ପର୍ଯ୍ୟନ୍ତ ଲମ୍ବିଥିବା ଜଙ୍ଗଲରେ ସାମ୍ପ୍ରତିକ ସମୟରେ ନିଆଁ ଲାଗିଯାଇଥିବାରୁ ଏହା ହୁତୁହୁତୁ ହୋଇ ଜଳିଚାଲିଛି। ଦକ୍ଷିଣ ଓରେଗୋନଠାରେ ପ୍ରଚଣ୍ଡ ଶବ୍ଦ କରି ଅଗ୍ନିକାଣ୍ଡ ଘଟିବା ଫଳରେ ଡଜନେରୁ ଊର୍ଦ୍ଧ୍ବ ଲୋକ ନିଖୋଜ ହୋଇଯାଇଛି। ଏହି ଭୟାବହ ଅଗ୍ନିକାଣ୍ଡରେ ଇତି ମଧ୍ୟରେ ୩୫ ଜଣ ଲୋକ ମୃତ୍ୟୁବରଣ କରିଛନ୍ତି। ପଶ୍ଚିମତଟ ଉପକୂଳବର୍ତ୍ତୀ ଅଞ୍ଚଳରେ ଏହି ଅଗ୍ନିକାଣ୍ଡ ଭୟଙ୍କର ରୂପ ନେଇଥିବା ବେଳେ ଆଖପାଖ ଅଞ୍ଚଳରେ ପରିସ୍ଥିତି ଦୁର୍ବିସହ ହୋଇପଡ଼ିଛି। ଶହ ଶହ ସଂଖ୍ୟାରେ ଚାରିଚକିଆ ଯାନ ପୋଡ଼ି ପାଉଁଶ ହୋଇଯାଇଛି। ବ୍ୟାପକ ପରିମାଣର ଜଙ୍ଗଲରେ ନିଆଁ ଲାଗିଥିବାରୁ ଆଖପାଖ ସିଆଟଲ, ସାନ୍ ଫ୍ରାନସିସ୍କୋ ଓ ପୋର୍ଟଲାଣ୍ଡ୍, ଓରେଗୋନ୍ ଆଦି ଅଞ୍ଚଳର ପରିବେଶ ସମ୍ପୂର୍ଣ୍ଣ ଭାବେ ପ୍ରଦୂଷିତ ହୋଇଯାଇଛି। ଉକ୍ତ ଅଞ୍ଚଳ ବିଶ୍ବର ସବୁଠାରୁ ପ୍ରଦୂଷଣ ବୋଲି କୁହାଯାଇଛି। ଏହି ଅଗ୍ନିକାଣ୍ଡକୁ ନିୟନ୍ତ୍ରଣ କରିବା ସକାଶେ ଲାଗିପଡ଼ିଥିବା ଅଗ୍ନିଶମ ବାହିନୀକୁ ଯଥେଷ୍ଟ ପରିଶ୍ରମ କରିବାକୁ ପଡ଼ିଛି। କେତେକ ସ୍ଥାନରେ ଏହି ଅଗ୍ନିକାଣ୍ଡର ମାତ୍ରା ଯଥେଷ୍ଟ ଭାବେ କମିଯାଇଛି।

ସେପ୍ଟେମ୍ବର ୨୪କୁ ଘୁଞ୍ଚିଲା ୟୁଜିସି-ନେଟ୍ ପରୀକ୍ଷା

ନୂଆଦିଲ୍ଲୀ: ୟୁଜିସି-ନେଟ୍ ପରୀକ୍ଷାକୁ ସୋମବାର ସ୍ଥଗିତ ଘୋଷଣା କରାଯିବା ସହ ଆସନ୍ତା ୨୪ ତାରିଖରୁ ଆରମ୍ଭ ହେବ ବୋଲି ସ୍ଥିର କରାଯାଇଛି। ଶିକ୍ଷା ମନ୍ତ୍ରାଳୟ ପକ୍ଷରୁ ଜାରି ହୋଇଥିବା ନିର୍ଦେଶାବଳୀରେ କୁହାଯାଇଛି ଯେ ଇଣ୍ଡିଆନ କାଉନସିଲ ଅଫ ରିସର୍ଚ୍ଚ (ଆଇସିଏଆର) ପରୀକ୍ଷା ପାଇଁ ୟୁଜିସି-ନେଟ ପରୀକ୍ଷାକୁ ଘୁଞ୍ଚାଇ ଦିଆଯାଇଛି। ପୂର୍ବରୁ ୟୁଜିସି-ନେଟ ପରୀକ୍ଷାକୁ ସେପ୍ଟେମ୍ବର ୧୬ରୁ ୨୫ ଭିତରେ କରିବା ପାଇଁ ପରୀକ୍ଷା ସୂଚୀ ପ୍ରକାଶ ପାଇଥିଲା। ମାତ୍ର କେତେକ ପରୀକ୍ଷାର୍ଥୀ ଏହି ପରୀକ୍ଷା ସୂଚୀକୁ ନେଇ ନିରାଶ ପ୍ରକଟ କରି ଶିକ୍ଷା ମନ୍ତ୍ରାଳୟକୁ ଜଣାଇଥିଲେ। କାରଣ ସେମାନଙ୍କ ଭିତରୁ ଅନେକ ଆଇସିଏଆର ପରୀକ୍ଷା ଦେଉଥିବାରୁ ଗୋଟିଏ ସମୟରେ କିପରି ଦୁଇଟି ପରୀକ୍ଷା ଦେବେ ସେଥିନେଇ ପ୍ରଶ୍ନ କରିଥିଲେ।

ଆଜିଠାରୁ ମାଟ୍ରିକ ସପ୍ଲିମେଣ୍ଟାରୀ ପରୀକ୍ଷା ଆରମ୍ଭ

କଟକ: ମାଧ୍ୟମିକ ଶିକ୍ଷା ପରିଷଦ (ବୋର୍ଡ) ଦ୍ୱାରା ପରିଚାଳିତ ଚଳିତ ବର୍ଷର ମାଟ୍ରିକ୍ ସପ୍ଲିମେଣ୍ଟାରୀ ଓ ରାଜ୍ୟ ମୁକ୍ତ ବିଦ୍ୟାଳୟ ସାର୍ଟିଫିକେଟ୍‌ ପରୀକ୍ଷା ଆଜିଠାରୁ ଆରମ୍ଭ ହେଉଛି। ଏହା ୨୪ ତାରିଖ ପର୍ଯ୍ୟନ୍ତ ଚାଲିବ। ଉଭୟ ପରୀକ୍ଷାରେ ମୋଟ ୩୫,୫୮୮ ଜଣ ପରୀକ୍ଷାର୍ଥୀ ୨୪୧ଟି କେନ୍ଦ୍ରରେ ପରୀକ୍ଷା ଦେବେ। ସପ୍ଲିମେଣ୍ଟାରୀରେ ୨୨,୬୪୯ ଜଣ ପରୀକ୍ଷାର୍ଥୀଙ୍କ ପାଇଁ ୧୫୩ଟି କେନ୍ଦ୍ର ଓ ରାଜ୍ୟ ମୁକ୍ତ ବିଦ୍ୟାଳୟ ପରୀକ୍ଷାରେ ୧୨୯୩୯ ଜଣ ପରୀକ୍ଷାର୍ଥୀଙ୍କ ପାଇଁ ୮୮ଟି କେନ୍ଦ୍ର ହୋଇଛି। ଖାତା ମୂଲ୍ୟାୟନ ପାଇଁ ସପ୍ଲିମେଣ୍ଟାରୀରେ ୧୩ଟି ଓ ରାଜ୍ୟ ମୁକ୍ତ ବିଦ୍ୟାଳୟରେ ୭ଟି କେନ୍ଦ୍ର ହୋଇଛି। ସମସ୍ତ କେନ୍ଦ୍ର ପରିଚାଳକମାନେ କୋଭିଡ୍‍ ଗାଇଡ୍‍ ଲାଇନ୍‍ ପାଳନ କରିବା ପାଇଁ କଡ଼ା ନିର୍ଦେଶ ଦିଆଯାଇଛି। ଏଥିସହ ଶୃଙ୍ଖଳିତ ପରୀକ୍ଷା ପରିଚାଳନା ନିମନ୍ତେ ଜିଲାପାଳମାନେ ସହଯୋଗ ଯୋଗାଇ ଦେବା ଓ ପୁଲିସ ପ୍ରଶାସନ ପକ୍ଷରୁ ସୁରକ୍ଷା ବ୍ୟବସ୍ଥା ପ୍ରଦାନ କରିବାକୁ ଅନୁରୋଧ କରାଯାଇଛି।

୫ ଲୋକସଭା ସାଂସଦ କୋରୋନା ପଜିଟିଭ୍, ସର୍ବଦଳୀୟ

ନୂଆଦିଲ୍ଲୀ: ଲୋକସଭାର ଆଗାମୀ ମୌସୁମୀ ଅଧିବେଶନ ସୋମବାର ଆରମ୍ଭ ହେବାକୁ ଥିବା ବେଳେ ଏହା ପୂର୍ବରୁ ସମସ୍ତ ସାଂସଦମାନଙ୍କର କୋଭିଡ୍ ଟେଷ୍ଟ୍ କରାଯାଇଛି। ଏହି ଟେଷ୍ଟ ରିପୋର୍ଟରେ ୫ ଜଣ ଲୋକସଭା ସାଂସଦଙ୍କ ନମୁନା ପଜିଟିଭ୍ ଆସିଛି। ଅଦ୍ୟାବଧି ସମସ୍ତ ସାଂସଦଙ୍କ ନମୁନା ପରୀକ୍ଷା ରିପୋର୍ଟ ସାର୍ବଜନୀନ ହୋଇନାହିଁ। ସଂସଦର ମୌସୁମୀ ଅଧିବେଶନରେ ଭାଗ ନେବାକୁ ଥିବା ଉଭୟ ସଦନର ସମସ୍ତ ସାଂସଦମାନଙ୍କ ପାଇଁ କୋଭିଡ୍ ଟେଷ୍ଟକୁ ବାଧ୍ୟତାମୂଳକ କରାଯାଇଛି। ସାଂସଦମାନଙ୍କୁ ମୌସୁମୀ ଅଧିବେଶନ ଆରମ୍ଭ ହେବାର ୭୨ ଘଣ୍ଟା ପୂର୍ବରୁ ସେମାନଙ୍କ ନମୁନା ପାର୍ଲାମେଣ୍ଟ୍ ହାଉସ୍ ପରିସର ଅବା କେନ୍ଦ୍ର ସରକାରଙ୍କ କୌଣସି ସ୍ବୀକୃତିପ୍ରାପ୍ତ ହସ୍ପିଟାଲ ବା ଲାବୋରେଟୋରୀରେ ପରୀକ୍ଷା କରାଇନେବା ସକାଶେ କୁହାଯାଇଥିଲା। ରବିବାର ଉପରାଷ୍ଟ୍ରପତି ତଥା ରାଜ୍ୟସଭା ଅଧ୍ୟକ୍ଷ ଏମ. ଭେଙ୍କୈୟାନାଇଡୁଙ୍କର ମଧ୍ୟ ନମୁନା ପରୀକ୍ଷା କରାଯାଇଛି ବୋଲି ତାଙ୍କ ସଚିବାଳୟ ପକ୍ଷରୁ ସୂଚନା ଦିଆଯାଇଛି। ସେହିପରି ସଂସଦ ଅଧିବେଶନ ପୂର୍ବରୁ ଆୟୋଜିତ ହେଉଥିବା ସର୍ବଦଳୀୟ ବୈଠକକୁ ମଧ୍ୟ ବାତିଲ୍ କରିଦିଆଯାଇଛି। କୋରୋନା ଭୂତାଣୁ ସଂକ୍ରମଣ ପରିପ୍ରେକ୍ଷୀରେ ସଂସଦୀୟ ବ୍ୟାପାର ମନ୍ତ୍ରାଳୟ ପକ୍ଷରୁ ଏପରି ନିଷ୍ପତ୍ତି ନିଆଯାଇଛି।

ବିଶ୍ବର ସ୍ଥିତାବସ୍ଥାକୁ ବିଗାଡ଼ୁଛନ୍ତି ଚୀନ ଓ ରୁଷ: ବ୍ରିଟେନର ଗୁଇନ୍ଦା

ଲଣ୍ଡନ: ସାମ୍ପ୍ରତିକ ବିଶ୍ବ ସ୍ଥିତାବସ୍ଥାକୁ ଚାଲେଞ୍ଜ୍ କରୁଥିବା ଦୁଇ ମୁଖ୍ୟ ପ୍ରତିଦ୍ବନ୍ଦ୍ବୀ ଚୀନ ଓ ରୁଷ ବୋଲି ରବିବାର ବ୍ରିଟେନ୍‌ର ଡିଫେନ୍ସ୍‌ ଇଣ୍ଟେଲିଜେନ୍ସର ମୁଖ୍ୟ କହିଛନ୍ତି। ପ୍ରତ୍ୟକ୍ଷ ବିବାଦକୁ ପ୍ରୋତ୍ସାହିତ ନ କରି ଦୁଇ ଦେଶ ଯୁଦ୍ଧ ଓ ଶାନ୍ତି ସମୟରେ ମଧ୍ୟ ଅନ୍ୟ ରାଷ୍ଟ୍ରମାନଙ୍କ ପ୍ରତି କ୍ଷତିକାରକ କାର୍ଯ୍ୟକଳାପରେ ଲିପ୍ତ ରହୁଛନ୍ତି। ଗଣମାଧ୍ୟମକୁ ସୂଚନା ଦେବା ବେଳେ ଡିଫେନ୍ସ୍‌ ଇଣ୍ଟେଲିଜେନ୍ସର ମୁଖ୍ୟ ଜେନେରାଲ୍ ଜିମ୍ ହକେନ୍‌ହଲ୍‌ କହିଛନ୍ତି, ଇଂଲଣ୍ଡର ପ୍ରତିଦ୍ବନ୍ଦ୍ବୀମାନେ ଅତି ଉନ୍ନତ ସାମରିକ ବଳ ଯୋଗେ ଆର୍ଟିଫିସିଆଲ୍ ଇଣ୍ଟେଲିଜେନ୍ସ୍‌ ଏବଂ ମେସିନ୍ ଲର୍ଣ୍ଣିଂ ଭଳି ଉନ୍ନତ ବୈଷୟିକ ଜ୍ଞାନକୌଶଳର ପରିଚାଳନା ନିମନ୍ତେ ନୂଆ ନୂଆ ଉପାୟମାନ ବିକଶିତ କରୁଛନ୍ତି।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ