ଚର୍ଚ୍ଚିତ ଖବର

କୋରୋନା ନେଇ ଗୁଜବ ପ୍ରଚାର କଲେ ହେବ ଦେଶଦ୍ରୋହ ମାମଲା

ଭୁବନେଶ୍ବର: ରାଜ୍ୟରେ କୋରୋନା ନେଇ ଗୁଜବ ପ୍ରଚାର କରୁଥିବା ବ୍ୟକ୍ତିବିଶେଷଙ୍କୁ ସାବଧାନ କରିଛନ୍ତି ରାଜ୍ୟ ସରକାର। ଯଦି କେହି ଗୁଜବ ପ୍ରଚାର କରନ୍ତି, ତେବେ ଏହାକୁ ସରକାର ରାଷ୍ଟ୍ରଦ୍ରୋହ ଭଳି ଅପରାଧ ବିବେଚନା କରିବା ସହ ତଦନୁସାରେ ଦଣ୍ଡିତ କରବେ। ରାଜ୍ୟ ସରକାର ରାଜ୍ୟବାସୀଙ୍କୁ ନିରାପଦରେ ରଖିବାକୁ ଚାହୁଁଥିବା ବେଳେ ଗୁଜବ ପ୍ରଚାର ଏକ ନିନ୍ଦନୀୟ କାର୍ଯ୍ୟ। ଏପରି କାର୍ଯ୍ୟରେ ଲିପ୍ତ ବ୍ୟକ୍ତିଙ୍କୁ କଠୋର ଦଣ୍ଡରେ ଦଣ୍ଡିତ କରାଯିବ ବୋଲି ଚେତାବନୀ ଦେଇଛନ୍ତି ରାଜ୍ୟ ସରକାର। ଦେଶ, ସମାଜ ଏବଂ ରାଜ୍ୟ ଏବେ କଠିନ ପରିସ୍ଥିତି ଦେଇ ଗତି କରୁଛି। ଆଗାମୀ ଦିନରେ କୋରୋନା ସହ ଲଢ଼ିବା ପାଇଁ ପ୍ରତିଟି ବୁନ୍ଦା ସାହସ, ଶକ୍ତି ବଜାୟ ରଖିବାକୁ ପଡ଼ିବ। ହେଲେ କିଛି ଦାୟିତ୍ୱହୀନ ବ୍ୟକ୍ତି ଗୁଜବ ସୃଷ୍ଟି କରିବାରେ ଲାଗିଥିବା ଦେଖାଯାଉଛି। ବୁଧବାର କରାଯାଇଥିବା ଏକ ଗୁଜବ ଅନୁସାରେ ରାଜ୍ୟରେ ୧୫ ଜଣ ପଜିଟିଭ୍‌ ଚିହ୍ନଟ ହୋଇଛନ୍ତି। ଏହା ଏକ ଗୁଜବ, ନିନ୍ଦନୀୟ ଘଟଣା, ରାଷ୍ଟ୍ରଦ୍ରୋହୀ କାର୍ଯ୍ୟ। କୌଣସି ବ୍ୟକ୍ତି ଏଭଳି କାମ କରିବାର ଦୃଷ୍ଟାନ୍ତ ମିଳିଲେ ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୂଚନା ଦେଇଛନ୍ତି ବାଗ୍‌ଚୀ।

ଦିଲ୍ଲୀରେ ସ୍ବାସ୍ଥ୍ୟକର୍ମୀଙ୍କ ପାଇଁ ୧ କୋଟିର ବୀମା, ୪ ଡାକ୍ତର

ନୂଆଦିଲ୍ଲୀ: କୋରୋନା ପରି ଘାତକ ଭୂତାଣୁ ସହ ସମଗ୍ର ବିଶ୍ବ ଲଢ଼େଇ କରୁଥିବା ବେଳେ ଏଥିରେ ସ୍ବାସ୍ଥକର୍ମୀମାନଙ୍କର ସବୁଠାରୁ ବଡ଼ ଭୂମିକା ରହିଛି। ଡାକ୍ତର ଓ ନର୍ସ ଏବଂ ଅନାନ ସ୍ବାସ୍ଥ୍ୟକର୍ମୀମାନେ ସେମାନଙ୍କ ଜୀବନକୁ ବାଜି ଲଗାଇ କୋରୋନା ଆକ୍ରାନ୍ତଙ୍କ ଚିକିତ୍ସା କରୁଛନ୍ତି। ଚିକିତ୍ସା କରିବା ବେଳେ ସମସ୍ତ ପ୍ରକାର ପ୍ରତିଷେଧକମୂଳକ ବବସ୍ଥା ଗ୍ରହଣ କରିବା ସତ୍ତ୍ବେ ଡାକ୍ତର ଓ ନର୍ସମାନଙ୍କ ମଧ୍ୟରୁ କେହି ବି ଏହି ଭୂତାଣୁ ସଂକ୍ରମିତ ହେବାର ଏକାଧିକ ଉଦାହରଣ ରହିଛି। ଦିଲ୍ଲୀରେ ବୁଧବାର ସୁଦ୍ଧା ୪ ଜଣ ଡାକ୍ତର କୋରୋନା ପଜିଟିଭ୍ ରହିଥିବା ଜଣାପଡ଼ିଛି। ତେଣୁ ସ୍ବାସ୍ଥ୍ୟକର୍ମୀଙ୍କ ସକାଶେ ଦିଲ୍ଲୀ ସରକାର ମୋଟା ଅଙ୍କର ବୀମା ଘୋଷଣା କରିଛନ୍ତି। କୋରୋନା ଭୂତାଣୁ ସଂକ୍ରମିତ ହୋଇ କୌଣସି ସ୍ବାସ୍ଥ୍ୟକର୍ମୀ ଜୀବନ ହରାଇଲେ, ସେମାନଙ୍କ ପରିବାରକୁ ୧ କୋଟି ଟଙ୍କାର କ୍ଷତିପୂରଣ ପ୍ରଦାନ କରାଯିବ ବୋଲି ଦିଲ୍ଲୀ ମୁଖମନ୍ତ୍ରୀ ଅରବିନ୍ଦ କେଜରିୱାଲ୍ ଘୋଷଣା କରିଛନ୍ତି। କୋରୋନା ଆକ୍ରାନ୍ତଙ୍କ ଚିକିତ୍ସା ବେଳେ କୌଣସି ଡାକ୍ତର କିମ୍ବା ନର୍ସ କିମ୍ବା ଅନାନ ସ୍ବାସ୍ଥ୍ୟକର୍ମୀ ଜୀବନ ହରାଇଲେ, ସେମାନଙ୍କ ପରିବାରକୁ ଦିଲ୍ଲୀ ସରକାରଙ୍କ ପକ୍ଷରୁ ୧ କୋଟି ଟଙ୍କା ଦିଆଯିବ ବୋଲି ବୁଧବାର ଅପରାହ୍ନରେ ଏଠାରେ ଆୟୋଜିତ ସମୀକ୍ଷା ବୈଠକରେ କେଜରିୱାଲ୍ ଘୋଷଣା କରିଛନ୍ତି।

ବିଦେଶରୁ ଦାନ ଗ୍ରହଣ କରିବ ପିଏମ୍ କେୟାର୍ସ ଫଣ୍ଡ୍

ନୂଆଦିଲ୍ଲୀ: କୋଭିଡ୍-୧୯ ବିରୋଧରେ ଚାଲିଥିବା ଯୁଦ୍ଧରେ ଆର୍ଥିକ ସହାୟତା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପିଏମ୍ କେୟାର୍ସ ଫଣ୍ଡ ଗଠନ କରିଥିବା ବେଳେ ଦେଶର ସେଲିବ୍ରିଟି ଓ ପ୍ରମୁଖ ସଂଗଠନମାନେ ସେମାନଙ୍କ ଅବଦାନ ଜାରି ରଖିଛନ୍ତି। ତେବେ ଏହି ଫଣ୍ଡକୁ ବିଦେଶରୁ କେହି ଦାନ ଦେବାକୁ ଚାହିଁଲେ, ତାହା ମଧ୍ୟ ଗ୍ରହଣ କରାଯିବ ବୋଲି ଜଣାପଡ଼ିଛି। ଏକ ନିର୍ଦ୍ଦିଷ୍ଟ ଗଣମାଧ୍ୟମରେ ପ୍ରସାରିତ ରିପୋର୍ଟ ଅନୁସାରେ, ନିକଟରେ ପ୍ରଧାନମନ୍ତ୍ରୀ ମୋଦି ବିଶ୍ବର ପ୍ରମୁଖ ୧୦ ରାଷ୍ଟ୍ରମୁଖ୍ୟଙ୍କ ସହ ଭିଡିଓ କନଫରେନ୍ସିଂ ମାଧ୍ୟମରେ ଆଲୋଚନା କରିଛନ୍ତି। କୋଭିଡ୍-୧୯ ବିରୋଧରେ କିପରି ଠୋସ୍ ଲଢ଼େଇ ହୋଇପାରିବ, ତାହା ଉପରେ ମୋଦି ଆଲୋଚନା କରିବା ସହ ସମସ୍ତେ ଗୋଟିଏ ଦିଗରେ ଆଗେଇ ଯିବା ଉପରେ ଗୁରୁତ୍ବାରୋପ କରିଥିବା ଏହି ରିପୋର୍ଟରେ କୁହାଯାଇଛି। ବର୍ତ୍ତମାନ ସମଗ୍ର ବିଶ୍ବକୁ କୋରୋନା ପରି ମହାମାରୀ ଆକ୍ରାନ୍ତ କରିଥିବାରୁ ପିଏମ୍ କେୟାର୍ସ ଫଣ୍ଡରେ ଯେତେ ଅଧିକ ଦାନ ପହଞ୍ଚିପାରିବ, ତାହା ସୁନିଶ୍ଚିତ କରାଯିବା ଉପରେ ଗୁରୁତ୍ବ ଦିଆଯାଉଛି। ତେଣୁ ବିଦେଶରୁ କୌଣସି ପ୍ରକାର ସହାୟତାକୁ ବି ଗ୍ରହଣ କରାଯିବ ବୋଲି ମଧ୍ୟ କୁହାଯାଇଛି।

ଦିଲ୍ଲୀରେ ଦ୍ବାଦଶ ଶ୍ରେଣୀ ଛାତ୍ରଛାତ୍ରୀଙ୍କ ପାଇଁ ଅନଲାଇନ

ନୂଆଦିଲ୍ଲୀ: ଦିଲ୍ଲୀରେ ଦ୍ବାଦଶ ଶ୍ରେଣୀ ଛାତ୍ରଛାତ୍ରୀଙ୍କ ପାଇଁ ଅନଲାଇନ୍ ପାଠପଢ଼ା ଆରମ୍ଭ ହେବ ବୋଲି କହିଛନ୍ତି ଶିକ୍ଷା ମନ୍ତ୍ରୀ ମନୀଷ ସିସୋଦିଆ। ସୋମବାର ସେ ଏଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ପ୍ରଥମରୁ ଅଷ୍ଟମ ଶ୍ରେଣୀ ଯାଏଁ ସମସ୍ତ ଛାତ୍ରଛାତ୍ରୀଙ୍କୁ ପରବର୍ତ୍ତୀ କ୍ଲାସକୁ ପ୍ରମୋସନ୍ ଦିଆଯିବ ବୋଲି ସିସୋଦିଆ କହିଛନ୍ତି। କରୋନା ଭୂତାଣୁ ମାଡ଼ି ଚାଲିଥିବାରୁ ଏହି କେନ୍ଦ୍ରଶାସିତ ଅଞ୍ଚଳ ପରିସରରେ ଥିବା ସ୍କୁଲଗୁଡ଼ିକରେ ଏହି କ୍ଲାସର ପିଲାମାନେ ପରୀକ୍ଷା ଦେଇପାରିନାହାନ୍ତି। ତେଣୁ ସେମାନଙ୍କୁ ଉପର କ୍ଲାସକୁ ପ୍ରମୋସନ ଦିଆଯାଇଥିବା ସିସୋଦିଆ କହିଛନ୍ତି। ଏହାଛଡ଼ା ପ୍ରଥମରୁ ଅଷ୍ଟମ ଶ୍ରେଣୀର ଛାତ୍ରଛାତ୍ରୀଙ୍କ ନିକଟକୁ ପ୍ରତିଦିନ ଗୋଟିଏ ଲେଖାଏଁ ପ୍ରୋଜେକ୍ଟ ସେମାନଙ୍କ ଅଭିଭାବକଙ୍କ ଫୋନକୁ ପଠାଯିବ ବୋଲି ମଧ୍ୟ ସିସୋଦିଆ କହିଛନ୍ତି। ସେହିପରି ଦ୍ବାଦଶ ଶ୍ରେଣୀର ଛାତ୍ରଛାତ୍ରୀଙ୍କ ସକାଶେ ଦୁଇଟି ବିଷୟରେ ଅନଲାଇନ କ୍ଲାସ୍ ଆରମ୍ଭ ହେବ ବୋଲି ମଧ୍ୟ ଶିକ୍ଷା ମନ୍ତ୍ରୀ କହିଛନ୍ତି।

୯୦ ପ୍ରତିଶତ ଲୋକଙ୍କ ପାଇଁ ବିପଦ ସାଜିଛନ୍ତି ଲକ୍‌ଡାଉନ୍‌

ଭୁବନେଶ୍ବର: କୋରୋନା ମୁକାବିଲା ପାଇଁ ରାଜ୍ୟ ସରକାର ଲକ୍‌ ଡାଉନ୍‌ ଘୋଷଣା କରିଥିବା ବେଳେ ଘରୁ କାହାରିକୁ ନ ବାହାରିବା ପାଇଁ ସମସ୍ତଙ୍କୁ ପରାମର୍ଶ ଦେଉଛନ୍ତି। ଆବଶ୍ୟକତା ନ ଥିଲେ କେହି ଘରୁ ଗୋଡ଼ କାଢ଼ନ୍ତୁ ନାହିଁ ବୋଲି ସରକାର ବାରମ୍ବାର ନିବେଦନ କରୁଛନ୍ତି। ହେଲେ ତଥାପି କିଛି ଲୋକ ବିଭିନ୍ନ ବାହାନା କରି ଘରୁ ବାହାରୁଛନ୍ତି, ବଜାର ହାଟରେ ଘେରାଏ ବୁଲି ଆସୁଛନ୍ତି। ଅନେକ ଲୋକ ବିନା କାମରେ ଛକରୁ ବୁଲି ଆସୁଥିବା କିମ୍ବା ମେଡିସିନ୍‌ ନେବା ବାହାନା କରି ସାଙ୍ଗ ମାନଙ୍କୁ ଦେଖା କରିବା ପାଇଁ ଯାଉଥିବା ଅଭିଯୋଗ ହୋଇଛି। ଆଉ ସେହି ଅମାନିଆ ଲୋକଙ୍କ ସଂଖ୍ୟା ହେଉଛି ୧୦ ପ୍ରତିଶତ। ଏହି ୧୦ ପ୍ରତିଶତ ଲୋକ ଏବେ ୯୦ ପ୍ରତିଶତ ଲୋକଙ୍କ ପାଇଁ ବିପଦ ସାଜିଛନ୍ତି। ତେଣୁ ଏହି ୧୦ ପ୍ରତିଶତଙ୍କୁ ସାବାଡ଼ କରିବାକୁ ମୁଖ୍ୟମନ୍ତ୍ରୀ ପୋଲିସ୍‌କୁ କହିଛନ୍ତି। ଏନେଇ ସୂଚନା ଦେଇଛନ୍ତି କୋଭିଡ୍‌-୧୯ର ମୁଖ୍ୟ ମୁଖପାତ୍ର ସୁବ୍ରତ୍‌ ବାଗ୍‌ଚୀ।

କୋରୋନା ମୁକାବିଲା ପାଇଁ ଆଉ ହଜାରେ କୋଟି ଦେବ ଟାଟା
ମୋଦିଙ୍କୁ ରାହୁଲଙ୍କ ଚିଠି: ଅଚାନକ ଲକଡାଉନ ଗରିବଙ୍କୁ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶରେ ୨୧ ଦିନ ପାଇଁ ଲକଡାଉନ୍ ଘୋଷଣା କରିବା ଫଳରେ ସବୁକିଛି ଠପ୍ ହୋଇଯାଇଛି। ଏହା ଦିନମଜୁରିଆ ଓ ଗରିବ ଶ୍ରେଣୀର ଲୋକଙ୍କ ମଧ୍ୟରେ ଭୟର ବାତାବରଣ ଖେଳାଇ ଦେଇଛି। ନିଜର ନିଜର ବେଉସା ହରାଇ ଶ୍ରମିକମାନେ ଆଜି ଘରମୁହାଁ ହେଉଛନ୍ତି, ଯାହାକି ଲକଡାଉନର ଅସଲ ଉଦ୍ଦେଶ୍ୟକୁ ପ୍ରଭାବିତ କରିଛି। ତେଣୁ ଅନ୍ୟ ପ୍ରଭାବିତ ଦେଶମାନଙ୍କରେ ଯେପରି ପଦକ୍ଷେପ ନିଆଯାଇଛି, ଭାରତରେ ମଧ୍ୟ ସେପରି ପଦକ୍ଷେପ ନେବାକୁ ପ୍ରଧାନମନ୍ତ୍ରୀ ମୋଦିଙ୍କୁ ଅନୁରୋଧ କରିଛନ୍ତି କଂଗ୍ରେସ ଦଳର ପୂର୍ବତନ ସଭାପତି ରାହୁଲ୍ ଗାନ୍ଧି। ସେ ରବିବାର ପ୍ରଧାନମନ୍ତ୍ରୀଙ୍କୁ ଏକ ଚିଠି ଲେଖି ଗରିବ ଶ୍ରେଣୀର ଲୋକ ତଥା ଦିନମଜୁରିଆଙ୍କ ହିନସ୍ତା ଉପରେ ଦୁଃଖ ପ୍ରକାଶ କରିବା ସହ ଲକଡାଉନର ବିକଳ୍ପ ଖୋଜିବାକୁ ନିବେଦନ କରିଛନ୍ତି।

ବାହାରେ ଫସିଥିବା ଓଡ଼ିଆଙ୍କ ପାଇଁ ନୋଡାଲ୍‌ ଅଫିସର୍‌ ନିଯୁକ୍ତ

ଭୁବନେଶ୍ୱର: ମହାମାରୀ କୋରୋନାକୁ ପ୍ରତିହତ କରିବା ପାଇଁ ସମଗ୍ର ଦେଶରେ ଲକ୍‌ ଡାଉନ୍‌ ଜାରି ରହିଛି। ଏହି ଲକ୍‌ଡାଉନ୍‌ ସମୟରେ ବିଭିନ୍ନ ରାଜ୍ୟରେ ଶତାଧିକ ଓଡ଼ିଆ ଫସି ରହିଛନ୍ତି। ବିଭିନ୍ନ ସ୍ଥାନରେ ଦୟନୀୟ ଅବସ୍ଥାରେ ଥିବା ଏହି ଓଡ଼ିଆମାନେ ଓଡ଼ିଶା ଫେରି ଆସିବାକୁ ଚାହୁଁଥିବା ଜଣାପଡ଼ିଛି। ସେଠାରୁ ସେମାନଙ୍କୁ ଉଦ୍ଧାର କରିବା ପାଇଁ ଭିଡିଓ ମାଧ୍ୟମରେ ସରକାରଙ୍କୁ ଅନୁରୋଧ କରିବା ପରେ ତତ୍ପରତା ଦେଖାଇଛନ୍ତି ରାଜ୍ୟ ସରକାର। ଫସି ରହିଥିବା ଏହି ଓଡ଼ିଆମାନଙ୍କ ପାଇଁ ରାଜ୍ୟ ସରକାର ଶନିବାର ଦିନ ୨ଟି ହେଲପ୍‌ଲାଇନ୍‌ ନମ୍ବର ଜାରି କରିବା ସହ ସେମାନଙ୍କୁ ସହାଯ୍ୟ ଓ ସହଯୋଗ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବ୍ୟକ୍ତିଗତ ଭାବେ ଚିଠି ଲେଖି ଅନ୍ୟରାଜ୍ୟର ମୁଖ୍ୟମନ୍ତ୍ରୀ ତଥା ଓଡ଼ିଆ ସଂଗଠନମାନଙ୍କୁ ଅନୁରୋଧ କରିଛନ୍ତି। ଏହାପରେ ରବିବାର ବାହାର ରାଜ୍ୟରେ ଥିବା ଓଡ଼ିଆ ଲୋକଙ୍କ ସମସ୍ୟାର ସମାଧାନ ପାଇଁ ରାଜ୍ୟ ସରକାର ନୋଡାଲ୍‌ ଅଫିସର ନିଯୁକ୍ତ କରିଛନ୍ତି।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ