ରାଜ୍ୟ

ମାଟ୍ରିକ୍‌ ଛାତ୍ରଛାତ୍ରୀଙ୍କୁ ମାଗଣାରେ ମିଳିବ ‘ଶିକ୍ଷା ଦର୍ପଣ’
୨୩ ଜିଲ୍ଲାରୁ ୧୪୩ ଆକ୍ରାନ୍ତ ଚିହ୍ନଟ, କଟକରେ କୋରୋନା

ଭୁବନେଶ୍ବର: ଗତକାଲି କୋରୋନାର ଦୈନିକ ସଂକ୍ରମଣ ଦେଢଶହ ଉପରେ ରହିବା ପରେ ଆଜି ପୁଣି କମିଛି। ଏଥିସହ ଗତକାଲି ରାଜ୍ୟରେ କୋରୋନା ମୃତ୍ୟୁ ହୋଇ ନ ଥିବା ବେଳେ ଆଜି ଜଣକର ମୃତ୍ୟୁ ହୋଇଛି। ମୃତକ ଜଣକ କଟକ ଜିଲ୍ଲାର ବୋଲି ସ୍ବାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି। ଫଳରେ ଆଜିର ମୃତକଙ୍କୁ ମିଶାଇ ରାଜ୍ୟରେ ମୋଟ କୋରୋନା ମୃତ୍ୟୁ ୧୯୦୩ ହୋଇଛି। ଗତ ୨୪ ଘଣ୍ଟା ଭିତରେ ରାଜ୍ୟର ୨୩ ଜିଲ୍ଲା ଏବଂ ଷ୍ଟେଟ୍‌ ପୁଲ୍‌ରୁ ୧୪୩ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି। ଚିହ୍ନଟ ହୋଇଥିବା ଆକ୍ରାନ୍ତଙ୍କ ମଧ୍ୟରୁ ୮୪ ଜଣ କ୍ୱାରେଣ୍ଟାଇନ୍‌ ସେଣ୍ଟର୍‌ରୁ ଚିହ୍ନଟ ହୋଇଥିବାବେଳେ ୫୯ ଲୋକାଲ କେସ୍‌ ଥିବା ଜଣାଯାଇଛି। ତେବେ ଆଜି ସର୍ବାଧିକ କୋରୋନା ରୋଗୀ ପୁରୀ ଜିଲ୍ଲାରୁ ଚିହ୍ନଟ ହୋଇଛନ୍ତି। ଜିଲ୍ଲାରୁ ୨୩ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି। ଦ୍ବିତୀୟ ସର୍ବାଧିକ ଜିଲ୍ଲା ଭାବେ ସୁନ୍ଦରଗଡ଼ରୁ ୧୭ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି। ସେହିପରି ୧୮ଟି ଜିଲ୍ଲାରୁ ଦୈନିକ ସଂକ୍ରମଣ ୧୦ ତଳେ ରହିଥିବାବେଳେ ଭଦ୍ରକ, ଢେଙ୍କାନାଳ, କନ୍ଧମାଳ, ମାଲକାନଗିରି, ନବରଙ୍ଗପୁର, ନୟାଗଡ଼, ରାୟଗଡ଼ା ଜିଲ୍ଲାରେ ଜଣେ ବି ଆକ୍ରାନ୍ତ ଚିହ୍ନଟ ହୋଇ ନାହାନ୍ତି। ସେହିପରି ଗତ ୨୪ ଘଣ୍ଟାରେ ରାଜ୍ୟରୁ ୨୭୦ ଜଣ ସୁସ୍ଥ ହୋଇଥିବା ବେଳେ ମୋଟ ସକ୍ରିୟ ମାମଲା ଏବେ ୨ ହଜାର ତଳକୁ ଖସିଛି।

ଏସ୍‌ଏସ୍‌ଜିଙ୍କୁ ଆର୍ଥିକ ସଶକ୍ତ କରିବ ଏମ୍‌ଏସ୍‌ଏମ୍‌ଇ

ଭୁବନେଶ୍ୱର: ଏମ୍‌ଏସ୍‌ଏମ୍‌ଇ ଜରିଆରେ ରାଜ୍ୟରେ କର୍ମସଂସ୍ଥାନ ସୃଷ୍ଟି ଓ ଅର୍ଥନୀତିକୁ ସୁଦୃଢ଼ କରିବା ନିମନ୍ତେ ଏଣିକି ମହିଳା ସ୍ୱୟଂ ସହାୟିକା ଗୋଷ୍ଠୀ (ଏସ୍‌ଏସ୍‌ଜି)ଗୁଡ଼ିକୁ ସାମିଲ କରାଯିବା ପାଇଁ ଏମ୍‌ଏସ୍‌ଏମ୍‌ଇ ବିଭାଗ ଓ ମିଶନ ଶକ୍ତି ମଧ୍ୟରେ ଏକ ବୁଝାମଣାପତ୍ର ସ୍ୱାକ୍ଷରିତ ହୋଇଛି। ଏହି ବୁଝାମଣାପତ୍ରରେ ଏମ୍‌ଏସ୍‌ଏମ୍‌ଇ ବିଭାଗ ପ୍ରମୁଖ ସଚିବ ସତ୍ୟବ୍ରତ ସାହୁ ଓ ମିଶନ ଶକ୍ତିର କମିଶନର ତଥା ନିର୍ଦେଶିକା ସୁଜାତା କାର୍ତିକେୟନ୍ ସ୍ୱାକ୍ଷର କରିଛନ୍ତି। ଏହି ବୁଝାମଣା ଅନୁଯାୟୀ ସ୍ୱୟଂ ସହାୟକ ଗୋଷ୍ଠୀର ସଦସ୍ୟମାନଙ୍କ ମଧ୍ୟରେ ଔଦ୍ୟୋଗିକ ପ୍ରୋତ୍ସାହନ ଜରିଆରେ ପୋଷଣୀୟ ଜୀବିକା ସୃଷ୍ଟି କରାଯିବ, ଯାହା ରାଜ୍ୟର ସ୍ଥାନୀୟ ଅର୍ଥନୀତିକୁ ସୁଦୃଢ଼ କରିବ। ଅର୍ଥନୈତିକ ଅଭିବୃଦ୍ଧି ସକାଶେ ଔଦ୍ୟୋଗିକ ବିକାଶ ଅପରିହାର୍ଯ୍ୟ ହୋଇଥିବା ହେତୁ ଏହି ପ୍ରୟାସ ଫଳବତୀ ହେବାର ଲକ୍ଷ୍ୟ ରଖାଯାଇଛି। ତା’ଛଡ଼ା ମହିଳାମାନଙ୍କୁ ସଶକ୍ତିକରଣ ମାଧ୍ୟମରେ ସର୍ବାଙ୍ଗୀନ ବିକାଶ ସାଧନ ଉଭୟ ବିଭାଗର ପ୍ରାଥମିକତା ରହିଥିବା ହେତୁ ଏ ଦିଗରେ ଏହି ବୁଝାମଣା ବେଶ୍ ସୁହାଇବ ବୋଲି ଆଶା ରଖାଯାଇଛି।

ଜଙ୍ଗଲ ବିଭାଗର ଦୁଇ ଅଧିକାରୀଙ୍କୁ ବାଧ୍ୟତାମୂଳକ ଅବସର

ଭୁବନେଶ୍ୱର: ଦୁର୍ନୀତି, ଆୟ ବହିର୍ଭୂତ ସମ୍ପତ୍ତି ଠୁଳ, କର୍ତ୍ତବ୍ୟରେ ଅବହେଳା କାରଣରୁ ବାଲେଶ୍ୱର ବନ୍ୟପ୍ରାଣୀ ଡିଭିଜନ ଅନ୍ତର୍ଗତ କୁଲଡ଼ିହା ବନ୍ୟପ୍ରାଣୀ ରେଞ୍ଜ୍‌ର ସହକାରୀ ବନ ସଂରକ୍ଷକ (ଏସିଏଫ୍‌) ଲକ୍ଷ୍ମଣ ପ୍ରଧାନ ଓ ସୁନ୍ଦରଗଡ଼ ବିଶ୍ରା ରେଞ୍ଜର୍‌ ଫରେଷ୍ଟର୍‌ ଭରତ କୁମାର ଘଡ଼େଇଙ୍କୁ ବାଧ୍ୟତାମୂଳକ ଅବସର ଦିଆଯାଇଛି। ଏସିଏଫ୍‌ ଲକ୍ଷ୍ମଣ ପ୍ରଧାନଙ୍କ ବିରୋଧରେ ଦୁର୍ନୀତି ଅଭିଯୋଗରେ ଲୋକପାଳଙ୍କ ନିକଟରେ ଏକ ମାମଲା ଦାଏର ହୋଇଥିଲା। ଏହାପରେ ତାଙ୍କୁ ଚାକିରିରୁ ନିଲମ୍ବନ କରାଯାଇଥିଲା। ଭିଜିଲାନ୍ସ ତାଙ୍କ ବିରୋଧରେ କର୍ତ୍ତବ୍ୟରେ ଅବହେଳା, ଆୟ ବହିର୍ଭୂତ ସମ୍ପତ୍ତି ଠୁଳ ଯୋଗୁ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଆରମ୍ଭ କରିଥିଲା। ଅନ୍ୟପକ୍ଷରେ କୁଲଡ଼ିହା ବନ୍ୟପ୍ରାଣୀ ରେଞ୍ଜ ଦାୟିତ୍ୱରେ ଥିବାବେଳେ ସ୍ଥାନୀୟ ଜଙ୍ଗଲରେ ଗୋଟିଏ ମୃତ ଓ ଗଳିତ ପୁରୁଷ ହସ୍ତୀ ମିଳିଥିଲା, ଯାହାର ଦୁଇଟି ଦାନ୍ତକୁ କାଟି ନିଆଯାଇଥିଲା। ଏସବୁ କାରଣରୁ ତାଙ୍କୁ ବାଧ୍ୟତାମୂଳକ ଅବସର ଦିଆଯାଇଥିବା ଜଣାପଡ଼ିଛି।

ଆଦିବାସୀ ପଡ଼ିଆକୁ ଫେରିଲା ମେଳା: ୨୬ରୁ ଆରମ୍ଭ

ଭୁବନେଶ୍ବର: ତିନି ବର୍ଷ ପରେ ପୁଣିଥରେ ୟୁନିଟ୍‌-୧ ସ୍ଥିତ ଆଦିବାସୀ ପଡ଼ିଆକୁ ଫେରିଛି ଆଦିବାସୀ ମେଳା। ଜାନୁଆରୀ ୨୬ ତାରିଖରୁ ଆଦିବାସୀ ପଡ଼ିଆରେ ଆରମ୍ଭ ହେବ ଆଦିବାସୀ ମେଳା। କୋରୋନା ମହାମାରୀ ଯୋଗୁ ଷ୍ଟଲ୍‌ ସଂଖ୍ୟା ହ୍ରାସ ସହିତ ପ୍ରଦର୍ଶନୀ ପଡ଼ିଆ ବଦଳରେ ଆଦିବାସୀ ପଡ଼ିଆରେ ଏହା କରିବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି। ଅନୁସୂଚିତ ଜାତି ଓ ଜନଜାତି ବିଭାଗ ଦ୍ୱାରା ଆୟୋଜିତ ହେବାକୁ ଥିବା ଏହି ମେଳା ଫେବ୍ରୁଆରୀ ୯ ତାରିଖ ପର୍ଯ୍ୟନ୍ତ ଚାଲିବ। ଏହି ପରିପ୍ରେକ୍ଷୀରେ ବୁଧବାର ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ଲୋକସେବା ଭବନ ଠାରେ ସୋସାଲ୍‌ ମିଡିଆ ପ୍ଲାଟ୍‌ଫର୍ମର ଉଦ୍‌ଘାଟନ କରିଛନ୍ତି। ତେବେ କୋରୋନା ମହାମାରୀ ଯୋଗୁ ଏ ବର୍ଷ ମେଳାକୁ ଯିବା ପାଇଁ ଅନ୍‌ଲାଇନ ରେଜିଷ୍ଟ୍ରେସନ୍‌ ବ୍ୟବସ୍ଥା କରାଯିବ। ଏହି ରେଜିଷ୍ଟ୍ରେସନ୍‌ ପ୍ରକ୍ରିୟା ଜାନୁଆରୀ ୨୩ରୁ ଆରମ୍ଭ ହେବ ବୋଲି ଜଣାପଡ଼ିଛି। ତେବେ ଏହା ବାଧ୍ୟତାମୂଳକ ନୁହେଁ ବୋଲି ମଧ୍ୟ କୁହାଯାଇଛି।

ଚାଷୀଙ୍କୁ ନେଇ ପୁଣି ବିଜେପି-ବିଜେଡି ମୁହାଁମୁହିଁ

ଭୁବନେଶ୍ୱର: ଚାଷୀ ପ୍ରସଙ୍ଗକୁ କେନ୍ଦ୍ରକରି ପୁଣିଥରେ ମୁହାଁମୁହିଁ ହୋଇଛନ୍ତି ବିଜେପି ଓ ବିଜେଡି। ଗତ ଦୁଇଦିନ ତଳେ ରାଜ୍ୟରେ ବଳକା ଉଷୁନା ଚାଉଳକୁ ନେଇ ଉଭୟ ଦଳ ମଧ୍ୟରେ ଆରୋପ ଓ ପ୍ରତ୍ୟାରୋପ ହୋଇଥିବା ବେଳେ ଆଜି ମଧ୍ୟ ପୁଣିଥରେ ସମାନ ପରିସ୍ଥିତି ଉପୁଜିଛି। ଉଭୟ ଦଳ ସାମ୍ବାଦିକ ସମ୍ମିଳନୀ କରି ଚାଷୀ ପ୍ରସଙ୍ଗରେ ଉଭୟ ଉଭୟଙ୍କୁ ଦୋଷାରୋପ କରିଛନ୍ତି। ରାଜ୍ୟ ସରକାରଙ୍କ ଚାଷୀ ବିରୋଧୀ ନୀତି ବିରୋଧରେ ଗୁରୁବାର ସମ୍ବଲପୁର ଆର୍‌ଡିସି ଅଫିସ୍‌ ଘେରାଉ କରିବ ବୋଲି ବିଜେପି ଘୋଷଣା କରିଥିବା ବେଳେ ଏହାର ଜବାବ ରଖିଛି ବିଜେଡି। କେନ୍ଦ୍ରର କୃଷି ଆଇନକୁ ନେଇ ହେଉଥିବା ଦେଶବ୍ୟାପି ବିରୋଧରୁ ନଜର ହଟାଇବା ପାଇଁ ରାଜ୍ୟ ବିଜେପି ଏବେ ଧାନ ସଂଗ୍ରହର ଆଳ ଦେଖାଇ ଆରଡିସି ଅଫିସ୍ ଘେରିବା ନାଟକ କରୁଥିବା ବିଜେଡି କହିଛି।

ଆରମ୍ଭ ହେଲା ଜାତୀୟ ହସ୍ତତନ୍ତ ମେଳା
ରାଜ୍ୟରେ ଶାସନ କରୁଛି ହୃଦୟହୀନ ସରକାର: ପ୍ରଦୀପ

ଭୁବନେଶ୍ୱର: ବରଗଡ଼ ଜିଲ୍ଲା ପାଇକମାଲ ବ୍ଲକ୍‌ ମାଣ୍ଡୋସିଲ୍‌ ଗ୍ରାମର ୫୨ ବର୍ଷର ଚାଷୀ ଦିବ୍ୟ କୁମାର ସାହୁ ହୃଦ୍‌ଘାତରେ ମୁତ୍ୟୁବରଣ କରିଛନ୍ତି। ଦିବ୍ୟ ସରକାରଙ୍କ ଠାରୁ ଟୋକନ୍‌ ପାଇବା ପରେ ଶହେ କ୍ବିଣ୍ଟାଲ୍‌ ଧାନ ମାଣ୍ଡୋସିଲ୍‌ ମଣ୍ଡିରେ ବିକ୍ରି ପାଇଁ ଜମା ଦେଇଥିଲେ। ମାଣ୍ଡୋସିଲ୍‌ ମଣ୍ଡିରେ ପାଖାପାଖି ୬୦ ହଜାର ଧାନବସ୍ତା ପଡ଼ି ରହିଥିବାବେଳେ ମିଲର୍ସମାନେ ଧାନ ଉଠାଉ ନ ଥିବାରୁ ବାରମ୍ବାର ମଣ୍ଡିକୁ ଦୌଡ଼ି ଦୌଡ଼ି ସାହୁ ହତାଶ ହୋଇଯାଇଥିଲେ। ଶେଷରେ ବୁଧବାର ଚାଷୀ ଦିବ୍ୟ କୁମାର ସାହୁଙ୍କ ହୃଦ୍‌ଘାତରେ ମୃତ୍ୟୁ ହୋଇଛି। ସାହୁଙ୍କ ଶ୍ରଦ୍ଧାଞ୍ଜଳି ସଭାରେ ଯୋଗଦେଇ ଏଥିପାଇଁ ରାଜ୍ୟ ସରକାରଙ୍କୁ ଦୋଷାରୋପ କରିଛନ୍ତି ବିଜେପି ନେତା ପ୍ରଦୀପ ପୁରୋହିତ। ରାଜ୍ୟ ସରକାରଙ୍କ ଅପାରଗତା କାରଣରୁ ଆଉ ଜଣେ ଚାଷୀ ଆଜି ମୃତ୍ୟୁବରଣ କଲେ ବୋଲି କହିବା ସହ ରାଜ୍ୟରେ ଏକ ହୃଦୟହୀନ ସରକାର ଶାସନ କରୁଛି ବୋଲି କହିଛନ୍ତି ପ୍ରଦୀପ।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ