ରାଜ୍ୟ

ସ୍ୱଚ୍ଛ ଭାରତକୁ ‘ଫୋନି’ ଝଟ୍‌କା

ଭୁବନେଶ୍ୱର: ୨୦୧୯ ସୁଦ୍ଧା ଦେଶକୁ ସ୍ବଚ୍ଛ କରିବା ଉଦ୍ଦେଶ୍ୟ ନେଇ ସ୍ବଚ୍ଛ ଭାରତ ଜନ ଆନ୍ଦୋଳନ ଆରମ୍ଭ କରାଯାଇଥିଲା ତା’ ଉପରେ ଫୋନି ମାଡ଼ ହୋଇଛି। ବାତ୍ୟା ‘ଫୋନି’ ମାଡ଼ରେ ସହର ଠାରୁ ଆରମ୍ଭ କରି ଗାଁ ଗହଳରେ ସ୍ୱଚ୍ଛଭାରତ ଯୋଜନାରେ ନିର୍ମାଣ ହୋଇଥିବା ଶୌଚାଳୟ ମଧ୍ୟରୁ ସଂଖ୍ୟାଧିକ ଏବେ ମାଟିରେ ମିଶିଯାଇଛି। ଏଥିଯୋଗୁଁ ଚଳିତବର୍ଷ ଅକ୍ଟୋବର ଦୁଇ ତାରିଖ ମଧ୍ୟରେ ସମସ୍ତଙ୍କୁ ଶୌଚାଳୟ ଯୋଗାଣର ଯେଉଁ ଲକ୍ଷ୍ୟ ରହିଥିଲା ତାହା ପୂରଣ ନେଇ ଆଶଙ୍କା ପ୍ରକାଶ ପାଇଛି। ପ୍ରଭାବିତ ଅଞ୍ଚଳରେ ଭାଙ୍ଗି ଯାଇଥିବା ଶୌଚାଳୟଗୁଡ଼ିକର ତତ୍କାଳ ପୁନରୁଦ୍ଧାର ଓ ନିର୍ମାଣ ଏତେଟା ସହଜ ନୁହେଁ। କାରଣ ଏବେ ବି ବହୁ ଅଞ୍ଚଳକୁ ସଡ଼କ ଓ ବିଜୁଳି ସଂଯୋଗ ହୋଇପାରି ନାହିଁ। ଜାତୀୟ ସ୍ତରରେ ପାଇଖାନା ନିର୍ମାଣ କ୍ଷେତ୍ରରେ ଓଡ଼ିଶା ପଛରେ ଥିବାବେଳେ ଏଭଳି ସ୍ଥିତିରେ କେନ୍ଦ୍ର ସରକାରଙ୍କ ଧାର୍ଯ୍ୟ ସମୟସୀମା ମଧ୍ୟରେ କିଭଳି ଲକ୍ଷ୍ୟ ପୂରଣ କରାଯିବ ତାହା ଏବେ ଚିନ୍ତାର କାରଣ ପାଲଟିଛି।

ପଞ୍ଚଦଶ ବିଧାନସଭା ଭଙ୍ଗ କରିବାକୁ ସୁପାରିସ କଲା ରାଜ୍ୟ

ଭୁବନେଶ୍ବର: ପଞ୍ଚଦଶ ବିଧାନସଭାକୁ ଭଙ୍ଗ କରିବାକୁ ସୁପାରିସ କରିଛି ରାଜ୍ୟ କ୍ୟାବିନେଟ୍‌। ଶନିବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅଧ୍ୟକ୍ଷତାରେ ବସିଥିବା ଏହି କ୍ୟାବିନେଟ୍‌ ବୈଠକରେ ଏହି ନିଷ୍ପତ୍ତି ନିଆଯାଇଛି। ରାଜ୍ୟପାଳଙ୍କ ନିକଟକୁ କ୍ୟାବିନେଟ୍‌ ନିଷ୍ପତ୍ତି ପ୍ରସ୍ତାବ ପଠାଯାଇଛି। କ୍ୟାବିନେଟ୍ ବୈଠକ ପରେ ମୁଖ୍ୟ ସଚିବ ଆଦିତ୍ୟ ପ୍ରସାଦ ପାଢ଼ୀ ଗଣମାଧ୍ୟମକୁ ଏହି ସୂଚନା ଦେଇଛନ୍ତି। ପଞ୍ଚଦଶ ବିଧାନସଭାର ଶେଷ କ୍ୟାବିନେଟ୍‌ ଥିବାରୁ ଉପସ୍ଥିତ କ୍ୟାବିନେଟ୍‌ ମନ୍ତ୍ରୀମାନେ ଭାବବିହ୍ବଳ ହୋଇପଡ଼ିଥିଲେ। ନିର୍ବାଚନ ଫଳାଫଳ ମେ’ ୨୩ ବାହାରିବାକୁ ଥିବାରୁ କାହାର ଭାଗ୍ୟରେ ହାତୀ ସୁନା କଳସ ଢ଼ାଳିବ ତାଙ୍କୁ ନେଇ ମନ୍ତ୍ରୀମାନଙ୍କ ଭିତରେ ଏବେ ବି ଉତ୍କଣ୍ଠା ରହିଛି। ସରକାର ପୁଣି କ୍ଷମତାକୁ ଫେରିବ କି ନାହିଁ, ଯଦି କ୍ଷମତାକୁ ଫେରିବେ ତେବେ କ୍ୟାବିନେଟ୍‌ ମନ୍ତ୍ରୀ ହେବାର ସୁଯୋଗ କାହାକୁ ମିଳିବ ଏଭଳି ବିଭିନ୍ନ ପ୍ରଶ୍ନ ମନକୁ ଆନ୍ଦୋଳନ କରିଛି।

କର୍ତ୍ତବ୍ୟରେ ଅବହେଳା ପାଇଁ ୪ ଡାକ୍ତର ନିଲମ୍ବିତ

ଭୁବନେଶ୍ବର: ଶନିବାର ବଦଳିଛନ୍ତି ପୁରୀ ସିଡିଏମ୍‌ଓ। ପୁରୀ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ରାମଚନ୍ଦ୍ର ରାଉତଙ୍କୁ ରାଜ୍ୟ ସରକାର ଶନିବାର ତାଙ୍କ ପଦରୁ ହଟାଇ ଦେଇଛନ୍ତି। ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡା. ଅମରେନ୍ଦ୍ର ନାଥ ମହାନ୍ତିଙ୍କୁ ପୁରୀର ନୂତନ ସିଡିଏମ୍‍ଓ ଭାବେ ନିଯୁକ୍ତି ଦେଇଛନ୍ତି ରାଜ୍ୟ ସରକାର। ଏଥିସହ ବାତ୍ୟା ‘ଫୋନି’ ବେଳେ କର୍ତ୍ତବ୍ୟରେ ଅବହେଳା ଅଭିଯୋଗରେ ପୁରୀ ଜିଲ୍ଲାର ୪ ଜଣ ଡାକ୍ତରଙ୍କୁ ରାଜ୍ୟ ସରକାର ନିଲମ୍ବନ କରିଛନ୍ତି। ନିଲମ୍ବିତ ଡାକ୍ତରଙ୍କ ମଧ୍ୟରେ ଚିଲିକା-ନୂଆପଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଡାକ୍ତର ଜାହାନା ପରବିନ୍ ଓ ଡାକ୍ତର ଜାକେଶ୍ ସାମନ୍ତରାୟ, ବ୍ରହ୍ମଗିରି ପ୍ରାଥମିକ ସ୍ବାସ୍ଥ୍ୟକେନ୍ଦ୍ର (ନୂତନ)ର ଡାକ୍ତର ବାପୁଜୀ ନାୟକ, ରେବଣା ନୂଆଗାଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଡାକ୍ତର ଜସ୍ମିନ୍ ନୀଳିମା ପଣ୍ଡା।

ଉଠା ଦୋକାନୀଙ୍କ ପାଇଁ ସ୍ବତନ୍ତ୍ର ପ୍ୟାକେଜ୍‌ ଘୋଷଣା

ଭୁବନେଶ୍ବର: ବାତ୍ୟା ‘ଫୋନି’ କ୍ଷତିଗ୍ରସ୍ତ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସହାୟତା ଘୋଷଣା କରିଛନ୍ତି। ବିଷେଶ କରି ଉଠା ଦୋକାନୀ, କୁକୁଡ଼ା ପାଳକ ଓ ନଡ଼ିଆ ଚାଷୀଙ୍କ ପାଇଁ ମୁଖ୍ୟମନ୍ତ୍ରୀ ଏହି ସ୍ବତନ୍ତ୍ର ପ୍ୟାକେଜ୍‌ ଘୋଷଣା କରିଛନ୍ତି। ରାଜ୍ୟର ୧୧ଟି ପୌର ସଂସ୍ଥାର ଉଠା ଦୋକାନୀଙ୍କୁ ୧୦ ହଜାର ଟଙ୍କା ଲେଖାଁଏ ସହାୟତା ପ୍ରଦାନ କରାଯିବ। ପ୍ରାୟ ୩୦ ହଜାର ଉଠା ଦୋକାନୀଙ୍କୁ ସହାୟତା ଦିଆଯିବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି। ପୁରୀ ଓ ଖୋର୍ଦ୍ଧା ଜିଲ୍ଲାରେ ବାତ୍ୟା କ୍ଷତିଗ୍ରସ୍ତ ପରିବାରକୁ ସରକାର ୨ ହଜାର ଟଙ୍କା ଲେଖାଏଁ ସହାୟତା ପ୍ରଦାନ କରିଥିଲେ। ତେବେ ପୁରୀରେ ସର୍ବାଧିକ କ୍ଷତି ହୋଇଥିବାରୁ ଏବଂ ଏପର୍ଯ୍ୟନ୍ତ ବିଦ୍ୟୁତ୍‌ ପୁନରୁଦ୍ଧାର କାର୍ଯ୍ୟ ସମ୍ପୂର୍ଣ୍ଣ ହୋଇପାରି ନ ଥିବାରୁ ଜିଲ୍ଲାର କ୍ଷତିଗ୍ରସ୍ତମାନଙ୍କୁ ସରକାର ଅତିରିକ୍ତ ସହାୟତା ପ୍ରଦାନ କରିବେ। କ୍ଷତିଗ୍ରସ୍ତ ପରିବାରକୁ ଅଧିକ ୧ ହଜାର ଟଙ୍କାର ସହାୟତା ପ୍ରଦାନ କରିବା ପ୍ରସ୍ତାବରେ କ୍ୟାବିନେଟ୍‌ ମୋହର ବାଜିଛି। ତୁରନ୍ତ ଏହି ସହାୟତା ପ୍ରଦାନ କରାଯିବ ବୋଲି ସୂଚନା ଦିଆଯାଇଛି।

ରାଜ୍ୟ କ୍ୟାବିନେଟ୍‌ରେ ବାତ୍ୟା ପରବର୍ତ୍ତୀ ଉଦ୍ଧାର କାର୍ଯ୍ୟ ପାଇଁ

ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଶେଷ ହୋଇଛି ପଞ୍ଚଦଶ ବିଧାନସଭାର ଶେଷ କ୍ୟାବିନେଟ୍‌ ବୈଠକ। ଏହି ବୈଠକରେ ବିଧାନସଭା ଭଙ୍ଗ ପାଇଁ ସୁପାରସ କରାଯିବା ସହ ବାତ୍ୟା ‘ଫୋନି’ର କ୍ଷୟକ୍ଷତି ନେଇ ଆଲୋଚନା କରାଯାଇଛି। ‘ଫୋନି’ରେ ମୋଟ ୧୪ଟି ଜିଲ୍ଲାର ୧୫୯ଟି ବ୍ଲକ୍‌ ଓ ୫୧ଟି ସହରାଞ୍ଚଳର ୧.୬୫କୋଟି ଲୋକ ପ୍ରଭାବିତ ହୋଇଛନ୍ତି। ପ୍ରାଥମିକ ଆକଳନ ଅନୁସାରେ ବାତ୍ୟାରେ ମୋଟ ୧୨,୯୪୩.୯୧ କୋଟି ଟଙ୍କାର କ୍ଷୟକ୍ଷତି ହୋଇଛି। ଏଥିରେ ସରକାରୀ ଓ ଘରୋଇ ସମ୍ପତ୍ତି ବାବଦରେ ୬୧୭୬ କୋଟି ଟଙ୍କା ଏବଂ ରିଲିଫ ଓ ପୁନରୁଦ୍ଧାର ବାବଦରେ ୬୭୬୭.୬୫ କୋଟି ଟଙ୍କାର ଆବଶ୍ୟକତା ଥିବା ରାଜ୍ୟ କ୍ୟାବିନେଟ୍‌କୁ ଅବଗତ କରାଯାଇଥିଲା ବୋଲି ମୁଖ୍ୟ ସଚିବ ଆଦିତ୍ୟ ପ୍ରସାଦ ପାଢ଼ୀ କହିଛନ୍ତି। ବାତ୍ୟା ପରବର୍ତ୍ତୀ ଉଦ୍ଧାର କାର୍ଯ୍ୟ ଲାଗି କ୍ୟାବିନେଟ୍‌ରେ ଅର୍ଥ ରାଶି ମଞ୍ଜୁର ହୋଇଛି।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ


କରେନ୍ସି କନଭର୍ଟର

ନୋବେଲ ଡିନର୍
ନୋବେଲ ପୁରସ୍କାର ଭଳି ନୋବେଲ ଡିନରର ମର୍ଯ୍ୟାଦା ଅତି ଗୁରୁତ୍ୱପୂର୍ଣ୍ଣ। ନୋବେଲ ପୁରସ୍କାର ପ୍ରଦାନ ପରେ ପ୍ରତି ବର୍ଷ ଡିସେମ୍ବର ୧୦ ତାରିଖରେ ଷ୍ଟକହୋମ୍ ସିଟିର ବ୍ଳୁ ହଲ୍‌ରେ ଏହି ରାତ୍ରିଭୋଜନର ଆୟୋଜନ କରାଯାଏ। ଏଥିରେ ସ୍ବିଡେନର ରାଜ ପରିବାର, ପ୍ରଧାନମନ୍ତ୍ରୀ, ପଦସ୍ଥ ସରକାରୀ ବ୍ୟକ୍ତି, ନୋବେଲ ବିଜେତା ଏବଂ ଅତିଥି ଉପସ୍ଥିତ ରହନ୍ତି। ପ୍ରତ୍ୟେକ ନୋବେଲ ବିଜେତା ଏଠାକୁ ୧୬ ଜଣ ଅତିଥିଙ୍କୁ ସାଥିରେ ଆଣି ପାରିବେ। ଏହି ଭୋଜନର ସମୟ ସୀମା ୪ ଘଣ୍ଟା। ଏଥିରେ ନୋବେଲ ବିଜେତାମାନେ ସଂକ୍ଷିପ୍ତ ବକ୍ତବ୍ୟ ପ୍ରଦାନ କରନ୍ତି। ଚାରି ଦିନ ଆଗରୁ ୪୦ ଜଣ ରୋଷେୟା ୨୦୦ ବ୍ୟକ୍ତିଙ୍କ ସହାୟତାରେ ଭୋଜନ ପ୍ରସ୍ତୁତିରେ ଲାଗିଯାଆନ୍ତି। ୬୦ଟି ଟେବୁଲରେ ଥିବା ୭୦୦୦ ଥାଳି, ୫୦୦୦ ଗ୍ଳାସ୍ ଏବଂ ୧୦,୦୦୦ ରୁପା ବାସନରେ ଖାଦ୍ୟ ପରଷା ଯାଏ। ଏହି ଡିନରର ମୂଲ୍ୟ ୪ କୋଟି ଟଙ୍କା। ୧୯୭୯ ମସିହାର ନୋବେଲ ଶାନ୍ତି ବିଜେତା ମଦର ଟେରେସାଙ୍କ ଅନୁରୋଧ କ୍ରମେ ସେହି ବର୍ଷ ଏହି ଭୋଜନ ବାତିଲ୍‌ କରାଯାଇ ସେହି ଅର୍ଥ ତାଙ୍କୁ ପ୍ରଦାନ କରାଯାଇଥିଲା।

ଜନମତ

ଶ୍ରୀମନ୍ଦିରରେ ଭକ୍ତଙ୍କ ଦର୍ଶନକୁ ଶୃଙ୍ଖଳିତ ଓ ବ୍ୟବସ୍ଥିତ କରିବା ନିମନ୍ତେ ସୁପ୍ରିମ୍‌କୋର୍ଟଙ୍କ ନିର୍ଦେଶ କ୍ରମେ ଆରମ୍ଭ ହୋଇଥିବା ଧାଡ଼ି ଦର୍ଶନ ବ୍ୟବସ୍ଥା ସହ ଆପଣ ଏକମତ ତ ?