ନୂଆଦିଲ୍ଲୀ: ପ୍ରଥମ ପର୍ଯ୍ୟାୟ ଚତୁଃରାଷ୍ଟ୍ରୀୟ ମାଲବାର ନୌସମରାଭ୍ୟାସ ଆସନ୍ତା ନଭେମ୍ବର ୩ ତାରିଖରୁ ଆରମ୍ଭ ହେବାକୁ ଯାଉଛି। ବଙ୍ଗୋପସାଗରର ବିଶାଖାପାଟଣା ଉପକୂଳରେ ଭାରତ, ଆମେରିକା, ଜାପାନ ଓ ଅଷ୍ଟ୍ରେଲିଆ ମିଳିତ ଭାବେ ନୌସମରାଭ୍ୟାସ କରିବେ। ଅଷ୍ଟ୍ରେଲିଆ ପ୍ରଥମ ଥର ପାଇଁ ଏହି ନୌସମରାଭ୍ୟାସରେ ସାମିଲ ହୋଇଛି। ବିଶ୍ବର ୪ ପ୍ରମୁଖ ଗଣତାନ୍ତ୍ରିକ ରାଷ୍ଟ୍ର ଏହି ମିଳିତ ସମରାଭ୍ୟାସ ଜରିଆରେ ପ୍ରଶାନ୍ତ ମହାସାଗରୀୟ ଉପକୂଳରେ ଚୀନର ଆଧିପତ୍ୟ ବିସ୍ତାରକୁ ପ୍ରତିହତ କରିବା ପାଇଁ ଯେ ଉଦ୍ଦିଷ୍ଟ, ଏହା ଅଛପା ନାହିଁ। ପୂର୍ବରୁ ଚୀନ ଏହି ମିଳିତ ସମରାଭ୍ୟାସ ଆଞ୍ଚଳିକ ସ୍ଥିରତାକୁ ବିପନ୍ନ କରିବ ବୋଲି କହି ପ୍ରତିବାଦ କରିଥିଲେ ବି ଏହି ୪ ପ୍ରମୁଖ ରାଷ୍ଟ୍ର ଏହାକୁ ଗୁରୁତ୍ବ ନ ଦେଇ ମିଳିତ ସମରାଭ୍ୟାସ ଆରମ୍ଭ କରିବାକୁ ଯାଉଛନ୍ତି। ଏହି ମେଗା ୱାର ଗେମ୍ସକୁ ‘କ୍ବାଡ’ ବୋଲି କୁହାଯାଉଛି।
ଅବୁ ଧାବୀ: ଟି-୨୦ ଫର୍ମାଟରେ ସବୁଠାରୁ ବିଧ୍ବଂସୀ ବ୍ୟାଟ୍ସମ୍ୟାନ ଭାବେ ପରିଚିତ କାରିବିୟାନ ବ୍ୟାଟ୍ସମ୍ୟାନ କ୍ରିସ ଗେଲ ଏକ ବିରଳ ରେକର୍ଡର ଅଧିକାରୀ ହୋଇଛନ୍ତି। କ୍ରିକେଟର ଏହି ସଂକ୍ଷିପ୍ତ ଫର୍ମାଟରେ ଗେଲ ବିଶ୍ବର ପ୍ରଥମ ବ୍ୟାଟ୍ସମ୍ୟାନ ଭାବେ ୧ ହଜାର ଛକା ମାରିବାର ରେକର୍ଡ ପ୍ରତିଷ୍ଠା କରିଛନ୍ତି। ରାଜସ୍ଥାନ ରୟାଲ୍ସ ବିପକ୍ଷ ମ୍ୟାଚ ପୂର୍ବରୁ ଗେଲ ୯୯୩ଟି ଛକା ମାରିଥିଲେ। ମାତ୍ର ଶୁକ୍ରବାର ଖେଳାଯାଇଥିବା ମ୍ୟାଚରେ ଗେଲ ପଞ୍ଜାବ ପାଇଁ ଖେଳି ୯୯ ରନ କରିଥିଲା ବେଳେ ଏହା ଭିତରେ ୮ଟି ଛକା ଓ ୬ଟି ଚୌକା ରହିଛି। ଫଳରେ ଗେଲଙ୍କ ଟି-୨୦ କ୍ୟାରିଅର ଛକା ସଂଖ୍ୟା ୧ ହଜାର ୧ରେ ପହଞ୍ଚିଛି। ଗେଲ ଟି-୨୦ ଫର୍ମାଟରେ ୪୦୯ଟି ମ୍ୟାଚ ଖେଳି ଏହି ରେକର୍ଡ କରିଛନ୍ତି।
ଅବୁ ଧାବୀ: ଚଳିତ ଆଇପିଏଲର ୫୦ତମ ମ୍ୟାଚରେ ରାଜସ୍ଥାନ ରୟାଲ୍ସ ୭ ୱିକେଟରେ କିଙ୍ଗସ ଏକାଦଶ ପଞ୍ଜାବକୁ ପରାସ୍ତ କରିଛି। ଫଳରେ ପଞ୍ଜାବ ଏହି ମ୍ୟାଚ ଜିତି ପ୍ଲେ ଅଫ ସକାଶେ ସିଧସାଳଖ ଯୋଗ୍ୟତା ନେଇ ଥିବା ସୁଯୋଗ ହାତଛଡ଼ା କରିଛି। ଅନ୍ୟପକ୍ଷରେ ପ୍ଲେ-ଅଫ ଆଶା ଉଜ୍ଜୀବିତ ସକାଶେ ରାଜସ୍ଥାନ ଏହି ମ୍ୟାଚରେ ନିଶ୍ଚିତ ବିଜୟ ଦରକାର କରୁଥିଲା ବେଳେ ତାହା ପୂରଣ କରିଛି। ବର୍ତ୍ତମାନ ସ୍ଥିତିରେ ଗୋଟିଏ ଲେଖାଏଁ ଲିଗ ମ୍ୟାଚ ବାକି ଥାଇ କୋଲକାତା, ରାଜସ୍ଥାନ ଓ ପଞ୍ଜାବ ପ୍ରତେକ ୧୨ ପଏଣ୍ଟ ଲେଖାଏଁ ପାଇଥିବାରୁ ଏମାନଙ୍କ ମଧ୍ୟରୁ କିଏ ପ୍ଲେ ଅଫ ପାଇଁ ଯୋଗ୍ୟତା ହାସଲ କରିବ, ତାହା ଶେଷ ଲିଗ ମ୍ୟାଚ ପରେ ସ୍ପଷ୍ଟ ହେବ। ଟେବଲ ଟପ୍ପର ମୁମ୍ବାଇ ୧୬ ପଏଣ୍ଟ ପାଇ ପ୍ଲେ ଅଫ ଯୋଗ୍ୟତା ନିଶ୍ଚିତ କରିଥିଲା ବେଳେ ନମ୍ବର ୨ ଉପରେ ଉଭୟ ବାଙ୍ଗାଲୋର ଓ ଦିଲ୍ଲୀ କ୍ୟାପିଟାଲ୍ସ ନଜର ରଖିଛନ୍ତି।
ଇସ୍ତାନବୁଲ: ତୁର୍କୀ ଓ ଗ୍ରୀସରେ ବଡ଼ ଧରଣର ଭୂକମ୍ପ ଓ ସୁନାମୀ ଅନୁଭୂତ ହୋଇଛି। ରିକ୍ଟର ସ୍କେଲରେ ଭୂକମ୍ପର ତୀବ୍ରତା ୭ ବୋଲି କୁହାଯାଉଛି। ଫଳରେ ଦୁଇ ଦେଶରେ ଅନେକଗୁଡ଼ିଏ ପୁରୁଣା କୋଠାବାଡ଼ି ଭାଙ୍ଗିବା ସହ ୧୪ ଜଣଙ୍କ ପ୍ରାଣହାନି ହୋଇଥିଲା ବେଳେ ଶତାଧିକ ଲୋକ ଆହତ ହୋଇଛନ୍ତି। ପ୍ରାରମ୍ଭିକ ସୂଚନାନୁସାରେ ତୁର୍କୀରେ ୧୨ ଜଣଙ୍କର ଗ୍ରୀସରେ ୨ ଜଣଙ୍କର ମୃତ୍ୟୁ ଘଟିଛି। ଗ୍ରୀସରେ ଭୂକମ୍ପ ପ୍ରଭାବରେ ସୁନାମୀ ଆସି ଅନେକ କ୍ଷୟକ୍ଷତି କରିଛି। ମାତ୍ର ରିପୋର୍ଟ ଲେଖାଯିବା ପର୍ଯନ୍ତ ଭୂକମ୍ପ ଓ ସୁନାମୀ ପାଇଁ ୨ ଦେଶରେ କେତେ ଜୀବନହାନି କ୍ଷ କ୍ଷତି ହୋଇଛି, ତାହା ଜଣାପଡ଼ି ନାହିଁ। ତୁର୍କୀ ପ୍ରାକୃତିକ ବିପର୍ଯ୍ୟୟ ବିଭାଗ ପକ୍ଷରୁ ଏହି ବିବୃତି ଦିଆଯାଇଛି। ମାତ୍ର ମୃତାହତ ସଂଖ୍ୟା ଆଗକୁ ବଢ଼ିବ ବୋଲି ମଧ୍ୟ ଆଶଙ୍କା କରାଯାଇଛି। ଭଗ୍ନସ୍ତୁପ ଭିତରେ ଫସି ରହିଥିବା ଲୋକଙ୍କୁ ଯୁଦ୍ଧକାଳୀନ ଭତ୍ତିରେ ଉଦ୍ଧାର କରି ମେଡିକାଲ ପହଞ୍ଚାଇବା କାର୍ଯ୍ୟ ଜାରି ରହିଛି। ଦେଶର ସେନାବାହିନୀ ଠାରୁ ଆରମ୍ଭ କରି ସାଧାରଣ ଲୋକେ ମଧ୍ୟ ଉଦ୍ଧାର କାର୍ଯ୍ୟରେ ଲାଗି ପଡ଼ିଛନ୍ତି। ୨୫ରୁ ୩୦ ସେକେଣ୍ଡର ଏହି ଭୂକମ୍ପରେ ଗ୍ରୀସବାସୀ ଭୟଭୀତ ହୋଇଯାଇଛନ୍ତି।
ଇସଲାମାବାଦ: ଗତ ବର୍ଷ ଫେବ୍ରୁଆରୀ ୧୪ ତାରିଖରେ ଜମ୍ମୁ-କଶ୍ମୀରର ପୁଲୱାମା ଜିଲ୍ଲାରେ ଘଟିଥିବା ଆତଙ୍କବାଦୀ ଆକ୍ରମଣରେ ସିଆରପିଏଫ୍ର ୪୦ ଜଣ ଯବାନ ଶହୀଦ ହୋଇଥିଲେ। ଏହି ଘଟଣା ସହ ପାକିସ୍ତାନୀ ଆତଙ୍କୀ ସଂଗଠନ ଲସ୍କର-ଏ-ତୋଇବାର ଭୂମିକା ରହିଥିବା ସ୍ପଷ୍ଟ ହେବା ପରେ ଭାରତୀୟ ବାୟୁସେନା ପକ୍ଷରୁ ଏହାର ସପ୍ତାହକ ପରେ ପ୍ରତିଶୋଧ ମୂଳକ ପଦକ୍ଷେପ ନିଆଯାଇଥିଲା। ତେବେ ପୁଲୱାମା ଆତଙ୍କବାଦୀ ଘଟଣାକୁ ପାକିସ୍ତାନର ଇମ୍ରାନ୍ ଖାନ୍ ସରକାରଙ୍କ ସବୁଠାରୁ ବଡ଼ ସଫଳତା ବୋଲି ମନ୍ତ୍ରୀ ଫୱାଦ୍ ଚୌଧୁରୀ ଗୁରୁବାର ସଂସଦରେ ଘୋଷଣା କରିଥିଲେ। ପାକିସ୍ତାନ ଭାରତ ମାଟିରେ ପ୍ରବେଶ କରି ଯବାନଙ୍କୁ ହତ୍ୟା କରିବାର ସଫଳତାରେ ବେଶ୍ ଗଦ୍ ଗଦ୍ ହୋଇପଡ଼ିଥିବା ମନ୍ତ୍ରୀ ଫୱାଦ୍ ଦିନକ ପରେ ଏହି ମାମଲାରେ ଛେପ ଢୋକିଛନ୍ତି। ତାଙ୍କ ମତାମତକୁ ଭିନ୍ନ ରୂପ ଦିଆଯାଇଛି ବୋଲି ଫୱାଦ୍ ସଫେଇ ଦେଇ କହିଛନ୍ତି। ଫୱାଦଙ୍କ ମନ୍ତବ୍ୟ ପରେ ଏହାକୁ ନେଇ ସଂସଦରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। ତେବେ ନିଜର ମତାମତରୁ ଓହରିଯିବା ସହ ପାକିସ୍ତାନ ଭାରତ ସହ ଉତ୍ତମ ସମ୍ପର୍କ ସ୍ଥାପନ ସହ ବିଭିନ୍ନ କ୍ଷେତ୍ରରେ ରହିଥିବା ସମ୍ପର୍କକୁ ଅଧିକ ମଜଭୁତ କରିବା ସପକ୍ଷରେ ରହିଛି ବୋଲି କହିଛନ୍ତି।
ବେଜିଂ: ଚୀନ ଗୋଟିଏ ପଟେ ଭାରତ ସହ ଶାନ୍ତି କଥାବାର୍ତ୍ତା କରୁଥିବା ବେଳେ ଅନ୍ୟପଟେ ଲଦାଖ ସୀମାରେ ସେନାକୁ ମଜଭୁତ କରିବାରେ ଲାଗିଛି। ଆଗକୁ ପ୍ରବଳ ଥଣ୍ଡାକୁ ଲକ୍ଷ୍ୟ କରି ଚୀନର ଜିନପିଙ୍ଗ ସରକାର ଏବେ ଲଦାଖ ଓ ସେହିଭଳି ହାଇ ଆଲଟିଚ୍ୟୁଡ ଅଞ୍ଚଳରେ ଥିବା ସେନା ପାଇଁ ସ୍ୱତନ୍ତ୍ର ଉପକରଣ ଯଥା ଜୋତା, ପୋଷାକ, ଟେଣ୍ଟ ଆଦି ଯୋଗାଇ ଦେଇଥିବା ଜଣାପଡିଛି। ଏହା ମିଳିବା ପରେ ଚୀନ ସେନା କେବଳ ଯେ ଥଣ୍ଡା ଦାଉରୁ ରକ୍ଷା ପାଇବେ ତା'ନୁହେଁ ବରଂ ଯୁଦ୍ଧ ପାଇଁ ମଧ୍ୟ ପ୍ରସ୍ତୁତ ହୋଇ ପାରିବେ ବୋଲି କୁହାଯାଉଛି।
ୱାଶିଂଟନ: ନଭେମ୍ବର ୩ ତାରିଖ ଆମେରିକୀୟ ରାଷ୍ଟ୍ରପତି ନିର୍ବାଚନ ନିମନ୍ତେ ଚାଲିଥିବା ରାଲି ବା ପ୍ରଚାର ଶୋଭାଯାତ୍ରା ଓ ସାଧାରଣସଭାରେ ଏଥର ସ୍ଲୋଗାନ ହେଉଛି - 'ଗେଟ୍ ଆଉଟ୍ ଟୁ ଭୋଟ୍' (ଭୋଟ୍ ଦେବାକୁ ବାହାରନ୍ତୁ)। ସେ ଟ୍ରମ୍ପ ହୁଅନ୍ତୁ କି ତାଙ୍କ ପ୍ରତିଦ୍ବନ୍ଦ୍ବୀ ବିଡେନ, ସମସ୍ତେ ଏହି ସାଧାରଣ 'ସ୍ଲୋଗାନ୍କୁ' ଭିତ୍ତିକରି ପ୍ରଚାର ଚଳାଇଛନ୍ତି। ବୁଧବାର ଆରିଜୋନାର ବୁଲହେଡ ସହରରେ ଆୟୋଜିତ ଏକ ନିର୍ବାଚନୀ ରାଲିରେ ଟ୍ରମ୍ପ କହିଲେ, ଯାହା ବି କରନ୍ତୁ ଭୋଟ୍ ଦେବା ଲାଗି ଆପଣମାନଙ୍କୁ ବାହାରିବାକୁ ପଡ଼ିବ। ସେହିଭଳି ଏ ସପ୍ତାହରେ ୱିସ୍କନ୍ସିନ୍ରେ ଅନ୍ୟ ଏକ ନିର୍ବାଚନୀ ରାଲିରେ ରାଷ୍ଟ୍ରପତି ଟ୍ରମ୍ପ କହିଲେ, ବାହାରି ଆସି ଭୋଟ୍ ଦିଅନ୍ତୁ। ସାଙ୍ଗସାଥୀମାନଙ୍କୁ, ପରିବାରକୁ, ପଡ଼ୋଶୀଙ୍କୁ ମଧ୍ୟ ସାଙ୍ଗରେ ଆଣନ୍ତୁ। ବୋଧହୁଏ ଏହା ହେଉଛି ଆମ୍ଭମାନଙ୍କ ପାଇଁ ସବୁଠୁ ଗୁରୁତ୍ବପୂର୍ଣ୍ଣ ନିର୍ବାଚନ ବୋଲି ମଧ୍ୟ ଟ୍ରମ୍ପ କହିଛନ୍ତି।
ନ୍ୟୁୟର୍କ: ଆମେରିକା ଉପରାଷ୍ଟ୍ରପତି ନିର୍ବାଚନ ପାଇଁ ମଇଦାନକୁ ଓହ୍ଲାଇଛନ୍ତି ଆଉ ଜଣେ ଭାରତୀୟ ବଂଶୋଦ୍ଭବ। ସେ ହେଉଛନ୍ତି ସୁନୀଲ ଫ୍ରିମ୍ୟାନ। ପାର୍ଟି ଫର ସୋସିଆଲିଜମ୍ ଆଣ୍ଡ ଲିବରେସନରୁ ସେ ଟିକେଟ ପାଇଛନ୍ତି। ସୁନୀଲଙ୍କ ମା' ଫ୍ଲୋରା ନଭିତା ଭାରତ ଜନ୍ମିତ। ଦେଶ ବିଭାଜନ ବେଳେ ସେ ବାରାଣସୀରେ ଶିକ୍ଷକତା କରୁଥିଲେ। ଲକ୍ଷ୍ନୌ ଓ ନୂଆଦିଲ୍ଲୀରେ ସେ ଉଚ୍ଚଶିକ୍ଷା ଲାଭ କରିଥିଲେ।
ନାଣ୍ଟେସ୍: ଫ୍ରାନ୍ସର ନାଣ୍ଟେସ୍ଠାରେ ଗତ ବୁଧବାରଠାରୁ ଆଲେକ୍ସିସ୍ ଭାଷ୍ଟାଇନ୍ ଇଣ୍ଟରନ୍ୟାସନାଲ ବକ୍ସିଂ ଟୁର୍ଣ୍ଣାମେଣ୍ଟ୍ ଆରମ୍ଭ ହୋଇଥିବା ବେଳେ ଏଥିରେ ଭାରତର ବକ୍ସର୍ମାନେ ରିଙ୍ଗ୍କୁ ପ୍ରତ୍ୟାବର୍ତ୍ତନ କରିଛନ୍ତି। ପାଖାପାଖି ୮ ମାସ ତଳେ ଅଲିମ୍ପିକ୍ସ ସକାଶେ ଭାରତୀୟ ବକ୍ସରଙ୍କ ପ୍ରସ୍ତୁତିକୁ କୋରୋନା ବିଶ୍ବ ମହାମାରୀ କାରଣରୁ ପ୍ରତିହତ ହୋଇଥିଲା। କୋଭିଡ୍ ପରବର୍ତ୍ତୀ ପରିସ୍ଥିତିରେ ବୁଧବାର ପ୍ରଥମ ଥର ପାଇଁ ଭାରତୀୟ ବକ୍ସର୍ମାନେ ଅନ୍ତର୍ଜାତୀୟ ବକ୍ସିଂ ପ୍ରତିଯୋଗିତାରେ ଅଂଶଗ୍ରହଣ କରିଛନ୍ତି। ସେହିପରି ପ୍ରତିଯୋଗିତାର ପ୍ରଥମ ବାଉଟରେ ୭ ଜଣ ଭାରତୀୟ ବିଜୟ ସହ ଆଗକୁ ବଢ଼ିଥିବା ବେଳେ ସେମାନଙ୍କ ମଧ୍ୟରେ ୩ ଜଣ ଟୋକିଓ ଅଲିମ୍ପିକ୍ସ ପାଇଁ ଯୋଗ୍ୟତା ମଧ୍ୟ ପାଇସାରିଛନ୍ତି। ଅବଶ୍ୟ ୟୁରୋପୀୟ ଦେଶଗୁଡ଼ିକରେ କୋଭିଡ୍ ସଂକ୍ରମଣ ପୁଣିଥରେ ଆରମ୍ଭ ହୋଇଥିବାରୁ ଫ୍ରାନ୍ସରେ ପୁନର୍ବାର ଲକଡାଉନ୍ ଘୋଷଣା ହେବ। ଶନିବାର ପ୍ରତିଯୋଗିତା ଶେଷ ହେବା ପରେ ଫ୍ରାନ୍ସ ସରକାର ଲକଡାଉନ୍ ଲାଗୁ କରିବେ। ଏନେଇ ଭାରତୀୟ ବକ୍ସିଂ ମହାସଂଘ (ବିଏଫ୍ଆଇ) ପକ୍ଷରୁ ମଧ୍ୟ ସୂଚନା ଦିଆଯାଇଛି। ଲକଡାଉନର ପ୍ରଭାବ ଏହି ଅନ୍ତର୍ଜାତୀୟ ବକ୍ସିଂ ଟୁର୍ଣ୍ଣାମେଣ୍ଟ୍ ଉପରେ ପଡ଼ିବ ନାହିଁ ଓ ପ୍ରତିଯୋଗିତା ଶେଷ ହେବା ମାତ୍ରେ ଭାରତୀୟ ପ୍ରତିଯୋଗୀମାନେ ସ୍ବଦେଶ ପ୍ରତ୍ୟାବର୍ତ୍ତନ କରିବେ ବୋଲି ବିଏଫ୍ଆଇ ପକ୍ଷରୁ କୁହାଯାଇଛି।
ୱାଶିଂଟନ୍: ସମଗ୍ର ବିଶ୍ବରେ କୋରୋନା ସଂକ୍ରମିତଙ୍କ ସଂଖ୍ୟା ଶୁକ୍ରବାର ପୂର୍ବାହ୍ନ ସୁଦ୍ଧା ୪ କୋଟି ୫୪ ଲକ୍ଷ ୪୬ ହଜାର ୯୧୦ରେ ପହଞ୍ଚିଥିବା ବେଳେ ଇତିମଧ୍ୟରେ ୧୧ ଲକ୍ଷ ୮୬ ହଜାର ୩୮୫ ଜଣଙ୍କର ମୃତ୍ୟୁ ହୋଇସାରିଛି। ଏହାଛଡ଼ା ୩ କୋଟି ୨୯ ଲକ୍ଷ ୯୫ ହଜାର ୩୪୧ ଜଣ ସଂକ୍ରମିତ ହସ୍ପିଟାଲରୁ ଡିସଚାର୍ଜ ଅବା ସୁସ୍ଥତା ଲାଭ କରିସାରିଥିବା ଜଣାପଡ଼ିଛି। ତେବେ ସର୍ବାଧିକ ପ୍ରଭାବିତ ଦେଶ ଆମେରିକାରେ ଗୁରୁବାର ଦିନକ ଭିତରେ ରେକର୍ଡ ୯୦ ହଜାରରୁ ଊର୍ଦ୍ଧ୍ବ ସଂକ୍ରମିତଙ୍କୁ ଚିହ୍ନଟ କରାଯାଇଛି। ପୂର୍ବରୁ ଗୋଟିଏ ଦିନରେ କଦାପି ଏତେ ସଂଖ୍ୟକ ସଂକ୍ରମିତ ଚିହ୍ନଟ ହୋଇ ନ ଥିଲେ। ଗତ ୨୪ ଘଣ୍ଟାରେ ଦେଶରେ ୯୧ ହଜାର ୨୯୫ ଜଣ ନୂଆ ସଂକ୍ରମିତଙ୍କୁ ଠାବ କରାଯିବା ଫଳରେ ଆମେରିକାରେ ସର୍ବମୋଟ ସଂଖ୍ୟା ୮.୯୪ ନିୟୁତକୁ ଟପିଯାଇଛି। ଅଧିକନ୍ତୁ ଏଠାରେ ଆଜି ପର୍ଯ୍ୟନ୍ତ ୨ ଲକ୍ଷ ୩୪ ହଜାର ୧୭୭ ଜଣ ସଂକ୍ରମିତଙ୍କର ମୃତ୍ୟୁ ହୋଇସାରିଛି। ସେହିପରି ମୋଟ ମୃତ୍ୟୁ ମାମଲାରେ ଦ୍ବିତୀୟ ସ୍ଥାନରେ ଥିବା ବ୍ରାଜିଲରେ ଗତ ୨୪ ଘଣ୍ଟାରେ ୫୧୩ ଜଣଙ୍କର ମୃତ୍ୟୁ ଘଟିଛି। ଏଠାରେ ଆଜି ପର୍ଯ୍ୟନ୍ତ ୧ ଲକ୍ଷ ୫୮ ହଜାର ୯୬୯ ଜଣଙ୍କର ମୃତ୍ୟୁ ହୋଇସାରିଥିବା ବେଳେ ୫.୫ ନିୟୁତରୁ ଊର୍ଦ୍ଧ୍ବ ସଂକ୍ରମିତ ହୋଇଛନ୍ତି। ଗତ ୨୪ ଘଣ୍ଟାରେ ଏଠାରେ ୨୬ ହଜାର ୧୦୬ ଜଣ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି।
ଇସଲାମାବାଦ: ଜମ୍ମୁ-କଶ୍ମୀର ପୁଲୱାମା ଆକ୍ରମଣକୁ ପାକିସ୍ତାନର ଏକ ବଡ଼ ସଫଳତା କହି ମାନିଛନ୍ତି ଦେଶର ମନ୍ତ୍ରୀ ଫୱାଦ ଚୌଧୁରୀ। ଇମ୍ରାନ ଖାନଙ୍କ ମନ୍ତ୍ରିମଣ୍ଡଳରେ କ୍ୟାବିନେଟ ମନ୍ତ୍ରୀ ଭାବେ କାମ କରୁଥିବା ଫୱାଦ ଚୌଧୁରୀ ଏହା ପୁଣି ଦେଶର ନ୍ୟାସନାଲ ଆସେମ୍ବଲିରେ କହିଛନ୍ତି। ଦେଶର ତମାମ ବିରୋଧୀଦଳ ଇମ୍ରାନ ହଟାଓ ଅଭିଯାନକୁ ଜୋରଦାର କରିଥିଲା ବେଳେ ସରକାରଙ୍କ ବାହାବା କଥା କହିବାକୁ ଯାଇ ଫୱାଦ ପୁଲୱାମା ସଫଳତା କଥା କହି ନିଜ ଗୋଡ଼ରେ କୁରାଢ଼ି ମାରିଛନ୍ତି। କାରଣ ଭାରତ ସରକାର ପୁଲୱାମା ଆକ୍ରମଣ ପଛରେ ପାକିସ୍ତାନର ହାତ ରହିଛି ବୋଲି ଅନ୍ତର୍ଜାତୀୟ ରାଷ୍ଟ୍ର ସମୂହକୁ ଅବଗତ କରାଇ ଆସୁଥିଲା ବେଳେ ପାକିସ୍ତାନ ସରକାର ଏହାର ପ୍ରମାଣ ଦେବାକୁ କହି ଭାରତୀୟ ଆରୋପକୁ ପ୍ରତ୍ୟାଖ୍ୟାନ କରି ଆସୁଥିଲେ। ହେଲେ ଦେଶର ଜଣେ କ୍ୟାବିନେଟ ନ୍ୟାସନାଲ ଆସେମ୍ବଲିରେ ଏହା କହିବା ପରେ ପାକିସ୍ତାନର ଅସଲ ଚେହେରା ପଦାକୁ ଆସିଛି।
ନୂଆଦିଲ୍ଲୀ: ଭାରତ-ଆମେରିକା ଟୁ ପ୍ଲସ ଟୁ ଆଲୋଚନାକୁ ନେଇ ପାକିସ୍ତାନ ବୈଦେଶିକ ମନ୍ତ୍ରାଳୟ ସମାଲୋଚନା କରିବା ପରେ ଭାରତ ସରକାର ଏହାର ଜବାବ ଦେଇଛନ୍ତି। ଭାରତୀୟ ବୈଦେଶିକ ମନ୍ତ୍ରାଳୟ ପକ୍ଷରୁ ଜାରି ହୋଇଥିବା ବିବୃତିରେ କୁହାଯାଇଛି ଯେ ମିଳିତ ଜାତିସଂଘ ଦ୍ବାରା ବିଶ୍ବ ଆତଙ୍କବାଦୀ ଘୋଷିତ ଅପରାଧୀଙ୍କ ଆଡ୍ଡାସ୍ଥଳୀ ହେଉଛି ପାକିସ୍ତାନ। ଏବେ ବି ଏହି ଆତଙ୍କବାଦୀମାନଙ୍କୁ ପାକିସ୍ତାନ ନିଜ ମାଟିରେ ସ୍ଥାନ ଦେଇଛି। ଆତଙ୍କବାଦୀଙ୍କୁ ଆଶ୍ରୟ ଦେଇଥିବା ଏକ ଦେଶ ନିଜକୁ ଆତଙ୍କବାଦ ଦ୍ବାରା ପ୍ରଭାବିତ ବୋଲି କହିବାର କୌଣସି ଯଥାର୍ଥତା ନାହିଁ ବୋଲି ବୈଦେଶିକ ମନ୍ତ୍ରାଳୟ ପକ୍ଷରୁ ଜାରି ହୋଇଥିବା ବିବୃତିରେ କୁହାଯାଇଛି।
ଦୁବାଇ: ଆଇପିଏଲର ୪୯ତମ ମ୍ୟାଚରେ ଚେନ୍ନାଇ ସୁପରକିଙ୍ଗସ ଅଲରାଉଣ୍ଡର ରବୀନ୍ଦ୍ର ଜାଡେଜାଙ୍କ ବିସ୍ଫୋରକ ୩୧ ରନ ବଳରେ କୋଲାକାତା ନାଇଟ ରାଇଡର୍ସକୁ ୬ ୱିକେଟରେ ପରାସ୍ତ କରିଛି। ଶେଷ ଦୁଇ ଓଭରରେ ଜାଡେଜା ବିସ୍ଫୋରକ ବ୍ୟାଟିଂ ଜରିଆରେ ମାତ୍ର ୧୧ଟି ବଲରୁ ୩ଟି ଛକା ଓ ୨ଟି ଚୌକା ଜରିଆରେ ଅପରାଜିତ ୩୧ ରନ କରି ଦଳକୁ ୪ ୱିକେଟରେ ୧୭୮ ରନରେ ପହଞ୍ଚାଇ ଶେଷ ବଲରେ ବିଜୟୀ କରାଇଥିଲେ। ପ୍ଲେ-ଅଫରୁ ବାଦ ପଡ଼ିଥିବା ଚେନ୍ନାଇ ପକ୍ଷରୁ ଋତୁରାଜ ଗାଏକ୍ବାଡ ୫୩ଟି ବଲରୁ ସର୍ବାଧିକ ୭୨ ରନ କରି ଦଳକୁ ବିଜୟ ପଥେ ବାଟ କଢ଼ାଇବାରେ ଉଲ୍ଲେଖନୀୟ ଭୂମିକା ଗ୍ରହଣ କରିଥିଲେ। ଅମ୍ବାତି ରାୟୁଡୁ ୩୮ ରନ କରିଥିଲା ବେଳେ ଅଧିନାୟକ ଧୋନି ମାତ୍ର ୧ ରନ କରି ବରୁଣ ଚକ୍ରବର୍ତ୍ତୀଙ୍କ ବଲରେ ବୋଲ୍ଡ ହୋଇଥିଲେ। ଦାୟିତ୍ୱବାନ ବ୍ୟାଟିଂ ପାଇଁ ଗାଏକ୍ବାର୍ଡ ମ୍ୟାନ ଅଫ ଦ ମ୍ୟାଚ ହୋଇଛନ୍ତି।
ଲଣ୍ଡନ: ଦକ୍ଷିଣ ପଶ୍ଚିମ ସ୍ପେନରେ ମୋଟ ସଂକ୍ରମିତଙ୍କ ମଧ୍ୟରୁ ୮୦ ପ୍ରତିଶତଙ୍କଠାରେ ଭିଟାମିନ୍-ଡି’ର ଅଭାବ ଥିବା ଜଣାପଡ଼ିଛି। ଲଣ୍ଡନରେ ଏକ ଗବେଷଣାରୁ ଏହା ସ୍ପଷ୍ଟ ହୋଇଛି। ଏଠାକାର ଏକ ହସ୍ପିଟାଲରେ ୨୦୦ କୋରୋନା ସଂକ୍ରମିତଙ୍କୁ ନେଇ ଏହି ଗବେଷଣା କରାଯାଇଥିବା ବେଳେ ସେମାନଙ୍କ ମଧ୍ୟରୁ ୮୦ ପ୍ରତିଶତ ସଂକ୍ରମିତଙ୍କ ଶରୀରରେ ଭିଟାମିନ୍-ଡି’ ଅଭାବ ଥିବା ପରିଲକ୍ଷିତ ହୋଇଛି ବୋଲି ଉକ୍ତ ଗବେଷଣାଗାରର ବୈଜ୍ଞାନିକମାନେ କହିଛନ୍ତି। କିନ୍ତୁ ଏହି ଗବେଷଣାରେ ସାମିଲ୍ ଥିବା ବୈଜ୍ଞାନିକମାନେ ସେମାନଙ୍କ ଗବେଷଣାରେ ଭିଟାମିନ୍-ଡି’ର ଅଭାବ ପରିପ୍ରେକ୍ଷୀରେ କୋରୋନା ସଂକ୍ରମିତଙ୍କ ଶରୀରରେ କେଉଁ ପ୍ରକାର ପ୍ରଭାବ ପଡ଼ୁଛି, ସେନେଇ କୌଣସି ନିଷ୍କର୍ଷରେ ପହଞ୍ଚି ନ ଥିବା ଜଣାପଡ଼ିଛି। ଏହି ବୈଜ୍ଞାନିକମାନଙ୍କ ଉପରୋକ୍ତ ଗବେଷଣା ସମ୍ପର୍କରେ କ୍ଲିନିକାଲ୍ ଏଣ୍ଡୋକ୍ରାଇନୋଲୋଜି ଏଣ୍ଡ୍ ମେଟାବୋଲିଜମ୍ରେ ତଥ୍ୟ ପ୍ରକାଶ ପାଇଛି। ସେହିପରି ବୈଜ୍ଞାନିକମାନେ ସେମାନଙ୍କ ଗବେଷଣାରେ ମହିଳାଙ୍କ ତୁଳନାରେ ପୁରୁଷ ସଂକ୍ରମିତଙ୍କ ଶରୀରରେ ଭିଟାମିନ୍-ଡି’ ସ୍ତର ଅପେକ୍ଷାକୃତ କମ୍ ରହିଥିବା ଜାଣିବାକୁ ପାଇଛନ୍ତି। ଏହି ଗବେଷଣାଟି ଏଠାକାର ହସ୍ପିଟାଲ୍ ୟୁନିଭର୍ସିଟାରିଓ ମାର୍କସ୍ ଡି’ ଭାଲଡେସିଲାଠାରେ ହୋଇଛି।
ଇସଲାମାବାଦ: ଭାରତର ବାଲାକୋଟ ଆକ୍ରମଣ ଓ ୱିଙ୍ଗ କମାଣ୍ଡର ଅଭିନନ୍ଦନ ବର୍ତମାନ ପାକିସ୍ତାନ ସେନାବାହିନୀ ହାତରେ ଧରାପଡ଼ିବାର ଘଟଣାବଳୀର ଦିନର କଥାକୁ ନେଇ ଗର୍ଜିଛନ୍ତି ପିଏମଏଲ-ଏନ୍ ସାଂସଦ ଅୟେଜ ସିଦ୍ଦିକି। ତାହା ପୁଣି ପାକିସ୍ତାନ ନ୍ୟାସନାଲ ଆସେମ୍ବଲିରେ। ଯାହାକୁ ନେଇ ପୁଣି ଥରେ ସେହିଦିନର ତିକ୍ତ ଅନୁଭୂତିକୁ ମନେ ପାକାଇଇ ଦୁଇ ଦେଶରେ ଚର୍ଚ୍ଚା ଆରମ୍ଭ ହୋଇଛି। ପାକିସ୍ତାନରେ ଇମ୍ରାନ ହଟାଓ ଅଭିଯାନ ଜୋର ଧରିଥିଲା ବେଳେ ଇମ୍ରାନ ସରକାରର ଦୋଷ ଦୁର୍ବଳତା ବଖାଣିବା ବେଳେ ନ୍ୟାସନାଲ ଅସେମ୍ବଲିରେ ବିରୋଧୀ ସାଂସଦ ସିଦ୍ଦିକି କହିଥିଲେ ଯେ ୨୦୧୯ ଫେବ୍ରୁଆରୀର ସେହି ଘଡ଼ିସନ୍ଧି ମୁହୂର୍ତ୍ତରେ ଯଦି ଭାରତୀୟ ୱିଙ୍ଗ କମାଣ୍ଡର ଅଭିନନ୍ଦନ ବର୍ତମାନଙ୍କୁ ମୁକ୍ତ କରିବାରେ ବିଳମ୍ବ କରାଯାଇଥାନ୍ତା, ତାହେଲେ ହିନ୍ଦୁସ୍ତାନ ସେହିଦିନ ରାତି ୯ଟାରେ ପାକିସ୍ତାନ ଆକ୍ରମଣ କରିଥାନ୍ତା। ସେ ଏହା କହୁ ନାହାନ୍ତି, ଏହା ପାକିସ୍ତାନ ବୈଦେଶିକ ମନ୍ତ୍ରୀ ଶାହ ମେହମୁଦ କୁରେଶୀ କହିଥିଲେ ବୋଲି କହିଛନ୍ତି। ସେହିଦିନର ଘଟଣାବଳୀ ବର୍ଣ୍ଣନା କରି ସିଦ୍ଦିକି ନ୍ୟାସନାଲ ଆସେମ୍ବଲିରେ କହିଥିଲେ ଯେ ଭାରତୀୟ ୱିଙ୍ଗ କମାଣ୍ଡର ଡଗଫାଇଟରେ ତାଙ୍କ ମିଗ ବିମାନ ହରାଇବା ପରେ ପାକିସ୍ତାନ ହାତରେ ଧରା ପଡ଼ିଥିଲେ।
ଅଧିକ ଦେଖନ୍ତୁ
