ରାଜନୀତି

ଚାଷୀ ପାଇଁ କେନ୍ଦ୍ର-ରାଜ୍ୟ ଗୋଡ଼ ଟଣାଟଣି

ରାଜ୍ୟରେ ରୋଗପୋକ ଓ ମରୁଡ଼ି ସ୍ଥିତିର ଅନୁଧ୍ୟାନ ପାଇଁ ଦୁଇଦିନିଆ ଓଡ଼ିଶା ଗସ୍ତରେ ଆସିଛନ୍ତି କେନ୍ଦ୍ର କୃଷି ରାଷ୍ଟ୍ରମନ୍ତ୍ରୀ। କେନ୍ଦ୍ର କୃଷି ରାଷ୍ଟ୍ରମନ୍ତ୍ରୀ ଗଜେନ୍ଦ୍ର ସିଂ ଶେଖାୱତ ଓ ବିଶେଷଞ ଟିମ୍‌ଙ୍କ ଓଡ଼ିଶା ଗସ୍ତର ଅବ୍ୟବହିତ ପୂର୍ବରୁ ରାଜ୍ୟ କୃଷିମନ୍ତ୍ରୀ ଡା.ଦାମୋଦର ରାଉତ ଖୁବ୍‌ ବର୍ଷିଛନ୍ତି। ଓଡ଼ିଶା ମାଟିରେ ପାଦ ଦେବା ମାତ୍ରେ କେନ୍ଦ୍ର ମନ୍ତ୍ରୀ ଶେଖାୱତ ଦାମୋଦର ରାଉତଙ୍କ ମନ୍ତବ୍ୟର ଜବାବ ରଖିଛନ୍ତି। ଏହିସବୁ ଜବାବ ସୁଆଲ ମଧ୍ୟରେ ରାଜନୀତି ପାଣିପାଗରେ ଉଷ୍ମତା ଅନୁଭବ ହୋଇଛି। ଶନିବାର ମନ୍ତ୍ରୀ ରାଉତ କହିଥିଲେ ଯେ କୃଷି ଏକ ରାଜ୍ୟ ପ୍ରସଙ୍ଗ। କେନ୍ଦ୍ରମନ୍ତ୍ରୀ କାହିଁକି ଆସୁଛନ୍ତି ମୁଁ ଜାଣେନି। ସେ ଓଡ଼ିଶା ଆସୁଛନ୍ତି ଅଥଚ ଆମକୁ ଜଣାଇ ନାହାନ୍ତି। ରାଜ୍ୟ ପ୍ରସଙ୍ଗରେ କେନ୍ଦ୍ରର ଅଯଥା ହସ୍ତକ୍ଷେପ ସଂଘୀୟ ବ୍ୟବସ୍ଥା ପ୍ରତି ବିରୋଧାଚରଣ କରୁଛି। କେନ୍ଦ୍ର କୃଷିମନ୍ତ୍ରୀଙ୍କୁ କଟାକ୍ଷ କରି ଦାମୋଦର କହିଥିଲେ ଯେ ସେ କାହିଁକି ଆସୁଛନ୍ତି ମୁଁ ଜାଣେନା। ତଥାପି ଭାବୁଛି ବୋଧେ ସେ ତାଙ୍କର ବନ୍ଧୁଘରକୁ ଆସୁଥିବେ।

କଂଗ୍ରେସର ଚେତାବନୀ: ଦିଲ୍ଲୀରେ ଉଠିବ କୁନ୍ଦୁଲି ସ୍ବର

କୁନ୍ଦୁଲି ଗଣଦୁଷ୍କର୍ମ ଘଟଣାରେ ପୀଡ଼ିତାଙ୍କୁ ନ୍ୟାୟ ଓ ଅଭିଯୁକ୍ତଙ୍କୁ ତୁରନ୍ତ ବାନ୍ଧିବା ଦାବି ନେଇ କଂଗ୍ରେସ ପକ୍ଷରୁ ୧୨ ଘଣ୍ଟିଆ କୋରାପୁଟ ଜିଲାରେ ବନ୍ଦ ପାଳନ ହେଲା। ପଟାଙ୍ଗି ଠାରୁ ଦଶମନ୍ତପୁର ବନ୍ଧୁଗାଁ ଠାରୁ ବୈପାରୀଗୁଡ଼ା ଯାଏ ସାରା ଜିଲାରେ ଶାନ୍ତିପୂର୍ଣ୍ଣ ବନ୍ଦପାଳନ ହେଲା। କିନ୍ତ ପୋଲିସକୁ ମିଳିଲାନି ସଫଳତା। ଦୀର୍ଘଦିନ ପରେ ରାଜ୍ୟ ସରକାର ପୀଡ଼ିତାଙ୍କୁ ଉପଯୁକ୍ତ ଚିକିତ୍ସା ଓ ସୁରକ୍ଷା ଯୋଗାଇ ପାରୁ ନାହାନ୍ତି। ପୋଲିସ ଅଭିଯୁକ୍ତଙ୍କୁ ଧରିବା ତ ଦୂର କଥା ସେମାନଙ୍କ ସୁରାକ ଟିକକ ବି ଯୋଗାଡ଼ କରି ପାରିନି। ପୀଡ଼ିତାଙ୍କ ମେଡିକାଲ ରିପୋର୍ଟକୁ ସାର୍ବଜନୀନ କରା ନ ଯାଇ ଚପାଇ ରଖାଯାଇଛି। ମେଡିକାଲରେ ସୁରକ୍ଷା ଦାୟିତ୍ବରେ ଥିବା ଜନୈକା ପଣ୍ଡା ମ୍ୟାଡାମ ଧମକ ଦେଉଛନ୍ତି ବୋଲି ପୀଡ଼ିତା ଜଣକ ଗଣମାଧ୍ୟମ ଆଗରେ ବାରମ୍ବାର ବୟାନ ଦେଲେ ସୁଦ୍ଧା ପୋଲିସ ଏହାକୁ ମାନୁନାହିଁ। ଅକ୍ଟୋବର ୧୦ ତାରିଖ ଠାରୁ ଗଣଦୁର୍ଷ୍କମ ହେଲାଣି। ୨୨ ଦିନ ବିତିଯିବା ପରେ ପୋଲିସର ଦମ୍ଭ ଓ ଟାଣପଣ କୁଆଡ଼େ ଗଲା ବୋଲି ପ୍ରଶ୍ନ ଉଠିଛି। ଏହାକୁ ନେଇ ଗୁରୁବାର କଂଗ୍ରେସ ଅନୁସୂଚିତ ଜାତି ଓ ଜନଜାତି ସେଲ୍‌ ପକ୍ଷରୁ ରାଜଭବନ ସମ୍ମୁଖରେ ଧାରଣା ଦିଆଯାଇଛି। ସେଲ୍‌ର ବରିଷ୍ଠ ନେତା ତଥା ପୂର୍ବତନ ସାଂସଦ ପ୍ରଦୀପ ମାଝୀ କହିଛନ୍ତି ଯେ କୁନ୍ଦୁଲି ଘଟଣା ଯଦି ଦିଲ୍ଲୀରେ ହୋଇଥାନ୍ତା ଏତେବେଳକୁ ଦେଶ ଗର୍ଜନ କରୁଥାଆନ୍ତା। କୁନ୍ଦୁଲି ପୀଡ଼ିତାଙ୍କୁ ସାମାନ୍ୟ ସ୍ବାସ୍ଥ୍ୟସେବା ଓ ସୁରକ୍ଷା ଟିକକ ମିଳୁନି। ସରକାର ତୁରନ୍ତ ଅଭିଯୁକ୍ତଙ୍କୁ ଚିହ୍ନଟ କରି ଗିରଫ କରନ୍ତୁ ଓ ପୀଡ଼ିତାଙ୍କୁ ନ୍ୟାୟ ପ୍ରଦାନ କରନ୍ତୁ। ଏହା ନ ହେଲେ ଆଗାମୀ ଦିନରେ କଂଗ୍ରେସ ପକ୍ଷରୁ ଜନ୍ତରମନ୍ତରଠାରେ ବ୍ୟାପକ ଆନ୍ଦୋଳନ କରାଯିବ ବୋଲି ପ୍ରଦୀପ ଚେତାବନୀ ଦେଇଛନ୍ତି।

ମହଙ୍ଗା ପଡ଼ିପାରେ ଦାମଙ୍କ ବାଘୁଣୀ-ମିରିଗ ଉପାଖ୍ୟାନ

ବିଜେଡିର ବରିଷ୍ଠ ନେତା ଦାମବାବୁଙ୍କ ତୁଣ୍ଡରେ ବାଡ଼ିବତା ନାହିଁ। କେତେବେଳେ କ’ଣ ଯେ କାହାକୁ କହୁଛନ୍ତି ତାର କିଛି ଠିକ୍‌ଠିକଣା ନାର୍ହି। ଏକଦା ବିଜେଡିର ଶଙ୍ଖ ଚିହ୍ନକୁ ଦେଖି ଚିହିଁକି ଉଠୁଥିଲେ ଦାମ। କହୁଥିଲେ ଏହା ଶଙ୍ଖ ନୁହେଁ, ଗେଣ୍ଡା। ପରବର୍ତ୍ତୀ ସମୟରେ ବର୍ଷ ବର୍ଷ ଧରି ଦାମବାବୁ ଗେଣ୍ଡାକୁ ଶଙ୍ଖ ବୋଲି ମାନି ଆସିଥିବା ସମସ୍ତେ ଜାଣନ୍ତି। ନିକଟରେ ଦାମବାବୁ ଯାଜପୁର ଜିଲାର ବିଞ୍ଝାରପୁର ଯାଇଥିଲେ। ବିଞ୍ଝାରପୁର ସମାବେଶ ବିଜେଡି ପାଇଁ ରାଜନୈତିକ ଦୃଷ୍ଟିକୋଣରୁ ଗୁରୁତ୍ବପୂର୍ଣ୍ଣ ଥିଲା। ପ୍ରମିଳାଙ୍କ ଗଡ଼ରେ ଅମିତ ଶାହ ଏକ ବଡ଼ଧରଣର ସମାବେଶ କରିଥିଲେ। ଏହାପରେ ପରେ କେତେକ ରାଜନୈତିକ ହତ୍ୟାକାଣ୍ଡ ପ୍ରମିଳାଙ୍କୁ ବିବାଦର ଘେର ଭିତରକୁ ଟାଣି ଆଣିଥିଲା। ବିଜେପିର ଅଭିବୃଦ୍ଧି ପ୍ରମିଳାଙ୍କ ପାଇଁ ବିପଦ ସୃଷ୍ଟି କରିବ ବୋଲି ଆଶଙ୍କା କରାଯାଉଥିଲା।

ବିଜେପି ବିରୋଧରେ ରଣହୁଙ୍କାର ଫଳପ୍ରଦ ହେବ ତ!

ଗୁଜରାଟରେ ନରେନ୍ଦ୍ର ମୋଦିଙ୍କୁ ବିରୋଧ କରି ଆମ ଆଦମୀ ପାର୍ଟି ତା’ର ପରିଣାମ ଭୋଗ କରିସାରିଥିଲେ ହେଁ କଂଗ୍ରେସ ଉପାଧ୍ୟକ୍ଷ ରାହୁଳ ଗାନ୍ଧି ସେ ପରିଣାମକୁ ଚିନ୍ତା ନ କରି ମୋଦିଙ୍କୁ ପ୍ରଚଣ୍ଡ ପ୍ରହାର କରିଚାଲିଛନ୍ତି। କେବେ ରାହୁଳ ବିଜେପି ଅଧ୍ୟକ୍ଷ ଅମିତ ଶାହଙ୍କୁ ଟାର୍ଗେଟ କରୁଛନ୍ତି ତ କେବେ ପ୍ରଧାନମନ୍ତ୍ରୀ ମୋଦିଙ୍କ ଉପରେ ବର୍ଷୁଛନ୍ତି। ନିକଟରେ ସରକାର ଲାଗୁ କରିଥିବା ସାମଗ୍ରୀ ଓ ସେବା କର (ଜିଏସ୍‌ଟି) ସାଧାରଣ ଲୋକଙ୍କ ପାଇଁ ଅନିଷ୍ଟକାରୀ ବୋଲି କହିଛନ୍ତି ରାହୁଳ। ସତୁରି ଦଶକର ଶ୍ରେଷ୍ଠ ଲୋକପ୍ରିୟ ହିନ୍ଦୀ ସିନେମା ‘ଶୋଲେ’ର ଖଳନାୟକ ଗବର ସିଂହ ସହ ଏହାକୁ ତୁଳନା କରି ସେ ଜିଏସ୍‌ଟିର ଅର୍ଥ ଗବର ସିଂହ ଟ୍ୟାକ୍ସ ବୋଲି ଆକ୍ଷେପ କରିଛନ୍ତି। ଗୁଜରାଟବାସୀ ରାହୁଳଙ୍କ ନିର୍ବାଚନୀ ଭାଷଣରେ ପ୍ରଭାବିତ ହେଉଛନ୍ତି କି ନାହିଁ ସମୟ ଆସିଲେ ଜଣାଯିବ। କିନ୍ତୁ ରାହୁଳ ଶତ୍ରୁର ଶତ୍ରୁ ମିତ୍ର ନ୍ୟାୟରେ ବିଭିନ୍ନ ରାଜନୈତିକ ଦଳର ମୋଦି ବିରୋଧୀ ଓ ବିଜେପି ବିରୋଧୀ ମାନଙ୍କୁ ଏକାଠି କରି ନୂଆ ଚାଲ ଖେଳିଛନ୍ତି। ଗୁଜରାଟରେ ହାର୍ଦ୍ଦିକ ପଟେଲ ଏବଂ ଅଳ୍ପେଶ ଠାକୋର ଏକା ସାଙ୍ଗରେ ଦେଖିବାକୁ ମିଳୁଛନ୍ତି। ଏ ଦୁହେଁ ଏବେ ବିଜେପି ବିରୋଧରେ ଅଭିଯାନ ଚଳାଇଛନ୍ତି।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ