ଖେଳକୁଦ

ସିଡନୀରେ ହିଁ ଖେଳାଯିବ ଭାରତ-ଅଷ୍ଟ୍ରେଲିଆ ୩ୟ ଟେଷ୍ଟ

କ୍ରିକେଟ ଅଷ୍ଟ୍ରେଲିଆ ମଙ୍ଗଳବାର ସ୍ପଷ୍ଟ କରିଛି ଭାରତ-ଅଷ୍ଟ୍ରେଲିଆ ୩ୟ ଟେଷ୍ଟ ସିଡନୀରେ ହିଁ ଖେଳାଯିବ। କୋରୋନା ସଂକ୍ରମଣ ପାଇଁ ୩ୟ ଟେଷ୍ଟ ସିଡନୀରେ ଖେଳାଯିବ ନା ଷ୍ଟାଣ୍ଡବାଇ ଭାବେ ରହିଥିବା ମେଲବର୍ଣ୍ଣରେ ଖେଳାଯିବ ତାହାକୁ ନେଇ ଥିବା ଦ୍ବନ୍ଦ୍ବ ଦୂର ହୋଇଛି। ମେଲବର୍ଣ୍ଣ ନୁହେଁ ସିଡନୀରେ ହିଁ ୩ୟ ଟେଷ୍ଟ ଖେଳାଯିବ ବୋଲି ମଙ୍ଗଳବାର କ୍ରିକେଟ ଅଷ୍ଟ୍ରେଲିଆ ସ୍ପଷ୍ଟ କରିଛି। ସିଡନୀରେ କୋରୋନା ସଂକ୍ରମଣ ରହିଥିବାରୁ ଏଠାରେ ଟେଷ୍ଟ ମ୍ୟାଚ ଖେଳିଲେ ୪ର୍ଥ ଟେଷ୍ଟ ଖେଳିବା ପାଇଁ ବ୍ରିସବେନ ଯିବାରେ ଅସୁବିଧା ରହିଛି। କାରଣ କ୍ବିଇନ୍ସଲାଣ୍ଡ ସରକାର ସବୁ ସୀମା ସିଲ୍ କରି କୋରୋନା ସଂକ୍ରମଣ ରୋକିବାକୁ କଠୋର ନିୟମ କରିଛନ୍ତି। ମାତ୍ର ଏନେଇ ଆଲୋଚନା ପର୍ଯ୍ୟାଲୋଚନା ପରେ କ୍ରିକେଟ ଅଷ୍ଟ୍ରେଲିଆ ମଧ୍ୟବର୍ତ୍ତୀକାଳୀନ ସିଇଓ ନିକ୍ ହକଲି ସବୁ ପ୍ରତିବନ୍ଧକ ଦୂର ହୋଇଥିବା ସ୍ପଷ୍ଟ କରିଛନ୍ତି।

ପାକିସ୍ତାନକୁ ୩୭୩ ରନର ଟାର୍ଗେଟ୍, ପିଛା କରି ଦଳ ୭୧/୩

ମାଉଣ୍ଟ ମାଉଙ୍ଗାନୁଇଠାରେ ପାକିସ୍ତାନ ଓ ନ୍ୟୁଜିଲାଣ୍ଡ୍ ମଧ୍ୟରେ ଜାରି ରହିଥିବା ବକ୍ସିଂ ଡେ’ ଟେଷ୍ଟଟି ପଞ୍ଚମ ଦିନକୁ ଯାଇଛି। ଚତୁର୍ଥ ଦିନରେ ନ୍ୟୁଜିଲାଣ୍ଡ୍ ତା’ର ଦ୍ବିତୀୟ ଇନିଂସ ଆରମ୍ଭ କରି ୧୮୦/୫ରେ ଇନିଂସ ଘୋଷଣା କରିଥିଲା। ଫଳରେ ପାକିସ୍ତାନ ପାଇଁ ୩୭୩ ରନର ଟାର୍ଗେଟ୍ ଧାର୍ଯ୍ୟ ହୋଇଥିଲା। ଏହାର ପିଛା କରି ଦଳ ଚତୁର୍ଥ ଦିନର ଖେଳ ଶେଷ ବେଳକୁ ୭୧ ରନ୍ କରିଥିବା ବେଳେ ୩ ଜଣ ପ୍ରମୁଖ ବ୍ୟାଟ୍ସମ୍ୟାନ୍ ପ୍ୟାଭିଲିଅନ୍ ଫେରିଛନ୍ତି। ପାକିସ୍ତାନର ମଧ୍ୟମକ୍ରମ ବ୍ୟାଟ୍ସମ୍ୟାନ୍ ହାରିସ୍ ସୋହେଲଙ୍କୁ ଆଉଟ୍ କରି ନ୍ୟୁଜିଲାଣ୍ଡର ଭେଟେରାନ୍ ପେସର୍ ଟିମ୍ ସାଉଦି ଟେଷ୍ଟ୍ କ୍ରିକେଟରେ ତାଙ୍କର ୩ ଶହତମ ୱିକେଟ୍ ପୂରଣ କରିଛନ୍ତି। ମଙ୍ଗଳବାର ମ୍ୟାଚର ଚତୁର୍ଥ ଦିନର ଖେଳ ଶେଷ ବେଳକୁ ଆଝାର୍ ଅଲୀ ୩ଟି ଚୌକା ସହ ୩୪ ଓ ଫୱାଦ୍ ଆଲମ୍ ୪ଟି ଚୌକା ସହ ୨୧ ରନ୍ କରି ଅପରାଜିତ ଅଛନ୍ତି। ସେହିପରି ସାଉଦି ୨ଟି ୱିକେଟ୍ ନେଇଥିବା ବେଳେ ଅନ୍ୟତମ ୱିକେଟଟି ଟ୍ରେଣ୍ଟ୍ ବୋଲ୍ଟ ହାସଲ କରିଛନ୍ତି।

ବକ୍ସିଂ ଡେ’ ଟେଷ୍ଟ୍‌ରେ ଭାରତର ବାଜିମାତ୍: ୮ ୱିକେଟରେ ଜିତି

ଚଳିତ ଅଷ୍ଟ୍ରେଲିଆ ବିପକ୍ଷ ଟେଷ୍ଟ୍ ସିରିଜ୍‌କୁ ବରାବର କରିଛି ଭାରତ। ଗତ ଶନିବାରଠାରୁ ଏଠାରେ ଆରମ୍ଭ ହୋଇଥିବା ସିରିଜର ଦ୍ବିତୀୟ ମ୍ୟାଚରେ ଭାରତ ଘରୋଇ ଅଷ୍ଟ୍ରେଲିଆ ବିପକ୍ଷରେ ପ୍ରତିଟି ବିଭାଗରେ ଉନ୍ନତ ପ୍ରଦର୍ଶନ ପୂର୍ବକ ୮ ୱିକେଟରେ ବିଜୟ ହାସଲ କରି ସିରିଜକୁ ପ୍ରତ୍ୟାବର୍ତ୍ତନ କରିଛି। ବିଶେଷକରି ଆଡିଲେଡ ଟେଷ୍ଟରେ ଭାରତ ଟେଷ୍ଟ୍ ଇତିହାସରେ ସର୍ବନିମ୍ନ ସ୍କୋର୍ କରି ବିଭିନ୍ନ ମହଲରୁ ସମାଲୋଚିତ ହୋଇଥିବା ବେଳେ ମଙ୍ଗଳବାର ଦ୍ବିତୀୟ ସେସନରେ ବିଜୟ ଲକ୍ଷ୍ୟରେ ପହଞ୍ଚି ନିଜର ସମାଲୋଚକମାନଙ୍କୁ ଦଳ ଚୁପ୍ କରାଇପାରିଛି। ପ୍ରଥମ ଇନିଂସରେ ୧୩୧ ରନର ଅଗ୍ରଣୀ ନେବା ପରେ ଭାରତ ଅଷ୍ଟ୍ରେଲିଆର ଦ୍ବିତୀୟ ଇନିଂସକୁ ୨୦୦ ରନରେ ସୀମିତ ରଖିଥିଲା। ପରେ ବିଜୟ ପାଇଁ ଆବଶ୍ୟକ ୭୦ ରନ୍ ଦୁଇଟି ୱିକେଟ୍ ହରାଇ ହାସଲ କରି ଦଳ ସିରିଜକୁ ପ୍ରତ୍ୟାବର୍ତ୍ତନ କରିଛି। ପ୍ରଥମ ଇନିଂସରେ ୧୧୨ ରନର ଦମଦାର ଇନିଂସ ଖେଳିଥିବା ଅଧିନାୟକ ଅଜିଙ୍କ୍ୟ ରାହାଣେ ଦ୍ବିତୀୟ ଇନିଂସରେ ବି ୨୭ ରନ୍ କରି ଅପରାଜିତ ରହିଥିବା ବେଳେ ତାଙ୍କୁ ପ୍ଲେୟର୍ ଅଫ୍ ଦ ମ୍ୟାଚ୍ ବିବେଚିତ କରାଯାଇଛି। ରାହାଣେଙ୍କ ସହ ଓପନର ଶୁବମାନ ଗିଲ୍ ୩୫ ରନ୍ କରି ଅପରାଜିତ ଥିବା ବେଳେ ଅନ୍ୟତମ ଓପନର ମୟଙ୍କ ଅଗରୱାଲ୍ ୫ ଓ ଚେତେଶ୍ବର ପୂଜାରା ୩ ରନ୍ କରି ଆଉଟ୍ ହୋଇଥିଲେ। ଏଥିସହ ବିଦେଶ ମାଟିରେ ଭାରତ ସର୍ବାଧିକ ୪ଟି ଟେଷ୍ଟ୍ ମେଲବର୍ଣ୍ଣରେ ଜିତିପାରିଛି। ଏହାଛଡ଼ା ଦଳ କ୍ବିନ୍ସ ପାର୍କ ଓଭାଲ୍, ସାବିନା ପାର୍କ ଓ କଲମ୍ବୋରେ ମଧ୍ୟ ୩ଟି ଲେଖାଏଁ ଟେଷ୍ଟ୍ ଜିତିସାରିଛି।

ଏକାଦଶ ବ୍ୟାଟ୍ସମ୍ୟାନ୍ ଭାବେ ୧୯୯ ରନରେ ଆଉଟ୍ ହେଲେ

ଚଳିତ ଶ୍ରୀଲଙ୍କା ବିପକ୍ଷ ପ୍ରଥମ ଟେଷ୍ଟରେ ଘରୋଇ ଦକ୍ଷିଣ ଆଫ୍ରିକା ନିଜର ସ୍ଥିତିକୁ ବେଶ୍ ମଜଭୁତ କରିପାରିଛି। ଦ୍ବିତୀୟ ଦିନରେ ଶ୍ରୀଲଙ୍କା ତା’ର ପ୍ରଥମ ଇନିଂସ ୩୯୬ରେ ଶେଷ କରିବା ପରେ ଦକ୍ଷିଣ ଆଫ୍ରିକା ୪ ୱିକେଟ୍ ବିନିମୟରେ ୩୧୭ ରନ୍ କରିଥିଲା। ୩ୟ ଦିନରେ ଦଳ ତା’ର ବ୍ୟାଟିଂ ଜାରି ରଖିବା ସହ ୬୨୧ ରନର ବିଶାଳ ସ୍କୋର୍ କରିଛି। ଦଳର ଏହି ବଡ଼ ସ୍କୋରରେ ପୂର୍ବତନ ଅଧିନାୟକ ତଥା ମଧ୍ୟମକ୍ରମ ବ୍ୟାଟ୍ସମ୍ୟାନ୍ ଫାଫ୍ ଡୁପ୍ଲେସିଙ୍କ ୧୯୯ ରନର ଇନିଂସ ପ୍ରମୁଖ ଭୂମିକା ନେଇଛି। ତାଙ୍କ ବ୍ୟତୀତ ୪ ଜଣ ବ୍ୟାଟ୍ସମ୍ୟାନ୍ ଅର୍ଦ୍ଧଶତକ ମଧ୍ୟ କରିଛନ୍ତି। ଦୁଇ ଓପନର ଡିନ୍ ଏଲଗାର ୯୫ ଓ ଆଇଡେନ୍ ମାର୍କରାମ୍ ୬୮ ରନ୍ କରିଥିବା ବେଳେ ମଧ୍ୟମକ୍ରମରେ ଟେମ୍ବା ବାଭୁମା ୭୧ ଓ କେଶବ ମହାରାଜ ୭୩ ରନ୍ କରିଛନ୍ତି। ତେବେ ନିଜ କ୍ୟାରିଅରରେ ପ୍ରଥମ ଟେଷ୍ଟ୍ ଦ୍ବିଶତକ ନିକଟତର ହୋଇଥିଲେ ହେଁ ଶେଷରେ ଡୁପ୍ଲେସି ଏଥିରୁ ବଞ୍ଚିତ ହୋଇଛନ୍ତି। ସେ ୧୯୯ ରନରେ ଆଉଟ୍ ହେବା ଫଳରେ ବିଶ୍ବରେ ଏକାଦଶ କ୍ରିକେଟର ଭାବେ ଏପରି ଦୁର୍ଭାଗ୍ୟଜନକ ସ୍ଥିତିରେ ପ୍ୟାଭିଲିଅନ୍ ଫେରିଛନ୍ତି। ଅବଶ୍ୟ ଟେଷ୍ଟ୍ କ୍ରିକେଟରେ ଏହା ତାଙ୍କର ସର୍ବଶ୍ରେଷ୍ଠ ପ୍ରଦର୍ଶନ। ପୂର୍ବରୁ ୧୩୭ ତାଙ୍କର ଟେଷ୍ଟ୍ କ୍ରିକେଟରେ ସର୍ବଶ୍ରେଷ୍ଠ ଇନିଂସ ଥିଲା। ଡୁପ୍ଲେସିଙ୍କ ଏହି ମାରାଥନ ଇନିଂସରେ ୨୪ଟି ଚୌକା ରହିଥିଲା।

ଗାଭାସ୍କରଙ୍କ ସମାଲୋଚନା: ଟିମ ଇଣ୍ଡିଆରେ ଭିନ୍ନ ଖେଳାଳିଙ୍କ

ପୂର୍ବତନ ଅଧିନାୟକ ତଥା ଭାଷ୍ୟକାର ସୁନୀଲ ଗାଭାସ୍କର ଭାରତୀୟ କ୍ରିକେଟର ଦଳର ପରିଚାଳନାଗତ ତ୍ରୁଟିକୁ ନେଇ ସ୍ପୋର୍ଟ୍ସଷ୍ଟାରରେ ଏକ ସ୍ତମ୍ଭ ଲେଖିଛନ୍ତି, ଯାହାକୁ ନେଇ ଚର୍ଚ୍ଚା ଜୋର ଧରିଛି। ଏଥିରେ ଗାଭାସ୍କର ଖେଳାଳିଙ୍କ ନାଁ ନେଇ କିପରି ଭାବେ ଦଳରେ ଭିନ୍ନ ଖେଳାଳିଙ୍କ ପାଇଁ ଭିନ୍ନ ଭିନ୍ନ ନିୟମ ଆପଣାଯାଇଛି, ତାହା ଉଲ୍ଲେଖ କରି ସମାଲୋଚନା କରିଛନ୍ତି। ରବିଚନ୍ଦ୍ରନ ଅଶ୍ବିନ ଓ ଟି ନଟରାଜନଙ୍କ ପରି ଖେଳାଳିଙ୍କ ପାଇଁ କିପରି ପାତର ଅନ୍ତର ନୀତି ଗ୍ରହଣ କରାଯାଇଛି, ତାହା ଉପରେ ଗାଭାସ୍କର ମତ ରଖିଛନ୍ତି। ଗାଭାସ୍କର ସ୍ପିନର ରବିଚନ୍ଦ୍ରନ ଅଶ୍ବିନଙ୍କ ଉଦାହରଣ ରଖି କହିଛନ୍ତି ଯେ ଏହି ବୋଲର ଜଣକ ଟେଷ୍ଟ କ୍ରିକେଟରେ ୩୫୦ରୁ ଅଧିକ ୱିକେଟ ନେଇ ସାରିଛନ୍ତି। ତେଣୁ ଦଳ ଏପରି ଜଣେ ବୋଲରଙ୍କ ପାଖରେ କୃତଜ୍ଞ ରହିବାର ଆବଶ୍ୟକତା ରହିଛି। ତାଙ୍କର ବୋଲିଂ ଦକ୍ଷତାକୁ ନେଇ କେହି ପ୍ରଶ୍ନ କରିପାରିବେ ନାହିଁ। ପୁଣି ଟେଷ୍ଟ ମ୍ୟାଚରେ ସେ ୪ଟି ଶତକ ମଧ୍ୟ ସ୍କୋର କରିଛନ୍ତି। ଏସବୁ ସତ୍ତ୍ବେ ଯେତେବେଳେ କୌଣସି ଏକ ଟେଷ୍ଟରେ ସେ ଅଧିକ ୱିକେଟ ନ ପାଆନ୍ତି, ତାଙ୍କୁ ପରବର୍ତ୍ତୀ ଟେଷ୍ଟରୁ ବାଦ ଦିଆଯାଉଛି। ମାତ୍ର ଦଳରେ ଜଣେ ବ୍ୟାଟ୍ସମ୍ୟାନ ଗୋଟିଏ ମ୍ୟାଚରେ ରନ ସ୍କୋର କରିବାରେ ବିଫଳ ହେଲେ ବି ତାଙ୍କୁ ବାରମ୍ବାର ଆହୁରି ସୁଯୋଗ ମିଳିବାର ନଜିର ରହିଛି। ଏହା କି ପ୍ରକାର ନିୟମ ବୋଲି ଗାଭାସ୍କର ପ୍ରଶ୍ନ କରିଛନ୍ତି।

ଅଷ୍ଟ୍ରେଲିଆର ଘାତକ ବୋଲିଂରେ ଭାରତ ଘାଇଲା: ପିଙ୍କ୍ ବଲ୍

ଚଳିତ ପିଙ୍କ୍ ବଲ୍ ଟେଷ୍ଟର ଦ୍ବିତୀୟ ଦିନରେ ଭାରତୀୟ ବୋଲରମାନେ ଘରୋଇ ଅଷ୍ଟ୍ରେଲିଆର ପ୍ରଥମ ଇନିଂସକୁ ୧୯୧ ରନରେ ସୀମିତ ରଖିଥିଲେ। ଏହାପରେ ଦ୍ବିତୀୟ ଦିନର ଖେଳ ଶେଷ ସୁଦ୍ଧା ଭାରତ ସର୍ବମୋଟ ୬୨ ରନରେ ଆଗୁଆ ଥିବାରୁ ଦଳ ଅଷ୍ଟ୍ରେଲିଆର ପିଙ୍କ୍ ବଲ୍ ଅଭିଯାନରେ ବ୍ରେକ୍ ଲଗାଇବ ବୋଲି ପ୍ରଶଂସକମାନଙ୍କ ମନରେ ଭାବନା ଜାଗ୍ରତ ହୋଇଥିଲା। କିନ୍ତୁ ଯେଉଁ ଦର୍ଶକମାନେ ୩ୟ ଦିନର ଖେଳକୁ ସାମାନ୍ୟ ବିଳମ୍ବରେ ଦେଖିଥିବେ, ସେମାନେ ନିଜ ଆଖିକୁ ବିଶ୍ବାସ କରିପାରି ନ ଥିବେ। କାରଣ ଭାରତୀୟ କ୍ରିକେଟପ୍ରେମୀ ଭାରତର ସଫଳତା ଆଶା କରିବାର ୨୪ ଘଣ୍ଟା ନ ପୂରୁଣୁ ଟିମ୍ ଇଣ୍ଡିଆ ବ୍ୟାଟ୍ସମ୍ୟାନମାନେ ଅଷ୍ଟ୍ରେଲିଆ ମାଟିରେ କେତେ ଦୁର୍ବଳ, ତାହା ସ୍ପଷ୍ଟ ହୋଇସାରିଥିଲା। ୩ୟ ଦିନର ଖେଳ ଶନିବାର ଆରମ୍ଭ ହେବା ପରେ ଭାରତ ୯/୧ରୁ ଆଗକୁ ବଢ଼ିବାକୁ ଉଦ୍ୟମ କରିଥିଲେ ହେଁ ଅଷ୍ଟ୍ରେଲୀୟ ପେସରମାନେ ସେମାନଙ୍କ ପାଦରେ ବେଡ଼ି ପକାଇଦେଇଥିଲେ। ସ୍ଥିତି ଏପରି ହୋଇଥିଲା ଯେ ଦଳୀୟ ସ୍କୋର୍ ୧୫ରେ ଥିବା ବେଳେ ୪ ଜଣ ବ୍ୟାଟ୍ସମ୍ୟାନ୍ ସ୍କୋରକୁ ଡିଷ୍ଟର୍ବ ନ କରି ପ୍ୟାଭିଲିଅନ୍ ଫେରିଥିଲେ। ପରେ ୧୯ ରନ ବେଳକୁ ଆଉ ଜଣେ ବ୍ୟାଟ୍ସମ୍ୟାନ୍ ଧରାଶାୟୀ ହୋଇଥିଲେ। ଶେଷରେ ଟିମ୍ ଇଣ୍ଡିଆର ଦ୍ବିତୀୟ ଇନିଂସ ୩୬ ରନରେ ହିଁ ସୀମିତ ରହିଥିଲା। ଦଳ ୯ଟି ୱିକେଟ୍ ହରାଇଥିବା ବେଳେ ୧୧ଶ ବ୍ୟାଟ୍ସମ୍ୟାନ୍ ମହମ୍ମଦ ଶମୀ ଆହତ ହେବାରୁ ଭାରତର ଦ୍ବିତୀୟ ଇନିଂସ ଶେଷ ହୋଇଥିଲା ଓ ଭାରତ ଟେଷ୍ଟ୍ କ୍ରିକେଟରେ ତା’ର ସର୍ବନିମ୍ନ ସ୍କୋର୍ କରିଥିଲା।

ଆଇଏସ୍ଏଲ୍-୭: ଅନିକେତଙ୍କ ଗୋଲ୍‌ରେ ନର୍ଥଇଷ୍ଟର ପ୍ରଥମ

ଚଳିତ ଆଇଏସ୍ଏଲ୍-୭ରେ ଶୁକ୍ରବାର ସ୍ଥାନୀୟ ତିଲକ ମୈଦାନଠାରେ ଜାମସେଦପୁର ଏଫସି (ଜେଏଫସି) ଓ ନର୍ଥଇଷ୍ଟ୍ ୟୁନାଇଟେଡ୍ ଏଫସି ମଧ୍ୟରେ ଏକ ମ୍ୟାଚ୍ ଖେଳାଯାଇଥିବା ବେଳେ ଏଥିରେ ଜେଏଫସି ଟିମ୍ ବିଜୟୀ ହୋଇଛି। ଏଥିସହ ଅଦ୍ୟାବଧି ପରାଜୟ ବରଣ କରି ନ ଥିବା ନର୍ଥଇଷ୍ଟ୍ ପ୍ରଥମ ପରାଜୟ ଲଭିଛି। ଜେଏଫସି ଓ୍ୱିଙ୍ଗର୍ ଅନିକେତ ଯାଦବ ଦ୍ୱିତୀୟାର୍ଦ୍ଧରେ ଦେଇଥିବା ଏକମାତ୍ର ଗୋଲ୍ ଦେଇଥିଲେ ଓ ଏହା ବଳରେ ଦଳ ଦ୍ୱିତୀୟ ବିଜୟ ହାସଲ କରିଛି। ଏଥିସହ ଦଳ ସମୁଦାୟ ୧୦ ପଏଣ୍ଟ୍‌ ପାଇ ପଏଣ୍ଟ୍‌ ଟେବୁଲ୍‌ର ପଞ୍ଚମ ସ୍ଥାନକୁ ଉନ୍ନୀତ ହୋଇଛି। ଅନ୍ୟପକ୍ଷରେ ସପ୍ତମ ମ୍ୟାଚ୍ ପରେ ନର୍ଥଇଷ୍ଟ୍ ଗୋଟିଏ ପରାଜୟ, ୨ଟି ବିଜୟ ଓ ୪ଟି ଡ୍ର’ ସହ ସର୍ବମୋଟ ୧୦ ପଏଣ୍ଟ୍‌ ପାଇ ଟେବୁଲରେ ଚତୁର୍ଥ ସ୍ଥାନରେ ରହିଛି। ଏହା ହିରୋ ଆଇଏସ୍ଏଲ୍‌ର ଏହି ୫ ଶହତମ ମ୍ୟାଚ୍ ହୋଇଥିବା ବେଳେ ଏଥିରେ ଅନିକେତଙ୍କ ଗୋଲ୍ ହିଁ ଉଭୟ ଦଳ ମଧ୍ୟରେ ଏକମାତ୍ର ପାର୍ଥକ୍ୟ ଥିଲା। ସେହିପରି ଜେଏଫସିର ଗୋଲକିପର୍ ଟିପି ରେହନିଶ୍ ଏକ ପେନାଲ୍ଟି କିକକୁ ବଞ୍ଚାଇ ନର୍ଥଇଷ୍ଟ୍ ବିପକ୍ଷରେ ଦଳର ବିଜୟ ଧାରା ଜାରି ରଖିବାରେ ସହାୟକ ହୋଇଛନ୍ତି।

ମାଞ୍ଚେଷ୍ଟର୍‌ରେ ସାମିଲ୍ ହେଲେ ରୁନିଙ୍କ ପୁଅ, ପିନ୍ଧିବେ ପିତାଙ୍କ

ଇଂଲିଶ୍ ଫୁଟବଲ୍ କ୍ଳବ୍ ମାଞ୍ଚେଷ୍ଟର୍ ୟୁନାଇଟେଡ୍ ପକ୍ଷରୁ ଏକଦା ଖେଳୁଥିବା ଇଂଲଣ୍ଡ ଫୁଟବଲ୍ ଦଳର ପୂର୍ବତନ ଅଧିନାୟକ ୱେନ୍ ରୁନିଙ୍କ ସକାଶେ ଗୁରୁବାର ଏକ ସୁଖଦ ମୁହୂର୍ତ୍ତ ଆସିଛି। ନିଜ କ୍ଷେତ୍ରରେ ନିଜର ସନ୍ତାନ ପ୍ରତିଷ୍ଠା ଅର୍ଜନର ପାଦଦେଶରେ ପହଞ୍ଚିଲେ। ସବୁ ପିତାଙ୍କ ପରି ରୁନି ମଧ୍ୟ ଖୁସି ହୋଇଛନ୍ତି। କାରଣ ତାଙ୍କ ପୁତ୍ର କାଇ ପ୍ରଖ୍ୟାତ ଇଂଲିଶ୍ ଫୁଟବଲ୍ କ୍ଲବ୍ ମାଞ୍ଚେଷ୍ଟର୍ ୟୁନାଇଟେଡ୍ ସହ ଚୁକ୍ତିବଦ୍ଧ ହୋଇଛନ୍ତି। ଅଧିକନ୍ତୁ କାଇ ପିତାଙ୍କ ପରି ୧୦ ନମ୍ବର ଜର୍ସି ପରିଧାନ କରିବାର ସୁଯୋଗ ପାଇବେ। ଏକଦା ଯେଉଁ ଜର୍ସିରେ ରୁନି ପ୍ରଶଂସକଙ୍କ ପାଇଁ ବିଶେଷ ମୁହୂର୍ତ୍ତ ଆଣିପାରିଥିଲେ, ଏବେ ତାଙ୍କ ପୁଅ ସମାନ ଜର୍ସିରେ ସମାନ ସଫଳତା ପାଇବା ନେଇ ଆଶାବାଦୀ ଅଛନ୍ତି। ଗତ ୨୦୦୪ରୁ ୨୦୧୭ ପର୍ଯ୍ୟନ୍ତ ପାଖାପାଖି ୧୪ ବର୍ଷ ଧରି ମାଞ୍ଚେଷ୍ଟର୍ ପକ୍ଷରୁ ଖେଳିଥିବା ରୁନି ଗୁରୁବାର ସୋସାଲ୍ ମିଡିଆରେ ଏକ ଫଟୋ ଅପଲୋଡ୍ କରିଛନ୍ତି।

ପେନ୍‌ଙ୍କ ଅଧିନାୟକ ଇନିଂସ: ଅଷ୍ଟ୍ରେଲିଆ ୧୯୧, ଭାରତ ୬୨

ଚଳିତ ଦିବାରାତ୍ର ଟେଷ୍ଟର ପ୍ରଥମ ଦିନରେ ଭାରତ ୬ ୱିକେଟରେ ୨୩୩ ରନରେ ଶେଷ କରିଥିବା ବେଳେ ଇନିଂସ ୨୪୪ରେ ସୀମିତ ରହିଛି। ଏହାର ଜବାବରେ ଅଷ୍ଟ୍ରେଲିଆ ଅଧିନାୟକ ଟିମ୍ ପେନ୍‌ଙ୍କ ୭୩ ରନର ବଳିଷ୍ଠ ଇନିଂସ ସହାୟତାରେ ୧୯୧ ରନରେ ଅଲଆଉଟ୍ ହୋଇଯାଇଛି। ଭାରତୀୟ ବୋଲରମାନେ ପ୍ରଭାବଶାଳୀ ପ୍ରଦର୍ଶନ କରିବା ଫଳରେ ଦଳକୁ ପ୍ରଥମ ଇନିଂସ ଭିତ୍ତିରେ ୫୩ ରନର ଅଗ୍ରଣୀ ମିଳିଛି। ଶୁକ୍ରବାର ଶେଷ ଭାଗରେ ଭାରତ ତା’ର ଦ୍ବିତୀୟ ଇନିଂସ ଆରମ୍ଭ କରି ୯ ରନ୍ ମଧ୍ୟରେ ଓପନର ପ୍‌ଥ୍ବୀ ଶ’ଙ୍କ ୱିକେଟ୍ ହରାଇଛି। ଫଳସ୍ବରୂପ ଭାରତ ଦ୍ବିତୀୟ ଦିନର ଖେଳ ଶେଷ ସୁଦ୍ଧା ସମୁଦାୟ ୬୨ ରନରେ ଆଗୁଆ ରହିଛି। ଭାରତ ପକ୍ଷରୁ ଭେଟେରାନ୍ ସ୍ପିନର୍ ରବିଚନ୍ଦ୍ରନ୍ ଅଶ୍ବିନ୍ ୪ଟି, ଉମେଶ ଯାଦବ ୩ଟି ଓ ଜସପ୍ରୀତ୍ ବୁମରା ୨ଟି ୱିକେଟ୍ ନେଇଛନ୍ତି। ଅନ୍ୟପକ୍ଷରେ ଅଷ୍ଟ୍ରେଲିଆ ପକ୍ଷରୁ ଦ୍ବିତୀୟ ଭାରତୀୟ ଇନିଂସର ଏକମାତ୍ର ୱିକେଟଟି ପେସର୍ ପ୍ୟାଟ୍ କମିନ୍ସ ନେଇଛନ୍ତି।

ରେସଲିଂ ବିଶ୍ବକପରେ ଅଂଶୁ ମଲିକ ଜିତିଲେ ରୌପ୍ୟ

ଏଠାରେ ଚାଲିଥିବା ରେସଲିଂ ଇଣ୍ଡିଭିଜୁଆଲ୍ ବିଶ୍ବକପରେ ଭାରତର ମହିଳା ଯୁବ ପ୍ରତିଯୋଗୀ ଅଂଶୁ ମଲିକ ରୌପ୍ୟ ପଦକ ହାସଲ କରିଛନ୍ତି। ସେ ୫୭ କିଗ୍ରା ଓଜନ ବର୍ଗରେ ଏହି ପଦକଟି ହାସଲ କରିଥିବା ବେଳେ ଏହା ସିନିୟର୍ ଲେବଲରେ ତାଙ୍କର ୩ୟ ପଦକ। ସେ ଗତ ବୁଧବାର ଗୋଲ୍ଡ ମେଡାଲ୍ ବାଉଟରେ ମୋଲଡୋଭାର ଆନାସ୍ତାସିଆ ନିଚିତାଙ୍କଠାରୁ ୧-୫ରେ ପରାସ୍ତ ହୋଇଥିଲେ। ପୂର୍ବରୁ ଚଳିତ ବର୍ଷ ପ୍ରାରମ୍ଭରେ ନୂଆଦିଲ୍ଲୀଠାରେ ଅନୁଷ୍ଠିତ ଏସିଆନ୍ ଚାମ୍ପିଅନଶିପରେ ଅଂଶୁ ବ୍ରୋଞ୍ଜ୍ ପଦକ ପାଇଥିଲେ। ଏହାଛଡ଼ା ଗତ ଜାନୁଆରୀରେ ସେ ରୋମରେ ଅନୁଷ୍ଠିତ ମାଟିଓ ପେଲିକୋନ ଇଭେଣ୍ଟରେ ମଧ୍ୟ ରୌପ୍ୟ ପଦକ ପାଇଥିଲେ। ଚଳିତ ଇଣ୍ଡିଭିଜୁଆଲ୍ ବିଶ୍ବକପରେ ଅଂଶୁ ତାଙ୍କର ପ୍ରଥମ ମୁକାବିଲାରେ ଆଜରବୈଜାନ ପ୍ରତିଦ୍ବନ୍ଦ୍ବୀ ଆଲୟୋନା କୋଲେସନିକଙ୍କୁ ୪-୨ରେ ପରାସ୍ତ କରିଥିଲେ। ଏହାପରେ ସେ କ୍ବାର୍ଟର୍ ଫାଇନାଲ୍ ରାଉଣ୍ଡରେ ଜର୍ମାନୀର ଲୌରା ମର୍ଟନ୍ସଙ୍କୁ ୩-୧ରେ ପରାସ୍ତ କରିଥିଲେ। ତା’ଛଡ଼ା ସେମିଫାଇନାଲରେ ସେ ରୁଷିଆର ଭେରୋନିକା ଚୁମିକୋଭାଙ୍କୁ ପରାସ୍ତ କରି ସ୍ବର୍ଣ୍ଣପଦକ ପାଇଁ ଦାବିଦାରୀ ପେସ୍ କରିଥିଲେ। କିନ୍ତୁ ଫାଇନାଲରେ ସେ ବିଜୟୀ ହୋଇ ନ ପାରିବାରୁ ରନର୍ସଅପରେ ସନ୍ତୁଷ୍ଟ ହୋଇଛନ୍ତି।

ପିଙ୍କ୍ ବଲ୍ ଟେଷ୍ଟରେ କୋହଲିଙ୍କ ଅର୍ଦ୍ଧଶତକ: ଭାରତ ୨୩୩/୬

ଗୁରୁବାରଠାରୁ ଭାରତର ସାମ୍ପ୍ରତିକ ଅଷ୍ଟ୍ରେଲିଆ ଗସ୍ତରେ ଟେଷ୍ଟ୍ ସିରିଜ୍ ଆରମ୍ଭ ହୋଇଛି। ଏହି ୪ ମ୍ୟାଚ ବିଶିଷ୍ଟ ସିରିଜର ପ୍ରଥମ ମ୍ୟାଚଟି ଏଠାରେ ପିଙ୍କ୍ ବଲରେ ଖେଳାଯାଉଥିବା ବେଳେ ଅଷ୍ଟ୍ରେଲିଆ ମାଟିରେ ପ୍ରଥମ ପିଙ୍କ୍ ବଲ୍ ଟେଷ୍ଟର ସ୍ବାଦ ଚାଖିଛି ଭାରତ। ତେବେ ପ୍ରଥମ ଦିନର ଖେଳ ଶେଷ ସୁଦ୍ଧା ଭାରତ ୬ ୱିକେଟ୍ ହରାଇ ୨୩୩ ରନ୍ କରିଛି। ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିବା ଭାରତ ପକ୍ଷରୁ ଅଧିନାୟକ ବିରାଟ କୋହଲି ଅର୍ଦ୍ଧଶତକ କରିଥିବା ବେଳେ ଅନ୍ୟ ୫ ଜଣ ଅଗ୍ରଭାଗ ବ୍ୟାଟ୍ସମ୍ୟାନ୍ କେହି ବି ଅର୍ଦ୍ଧଶତକ ପୂରଣ କରିପାରିନାହାନ୍ତି। ଏପରିକି ଓପନର ପୃଥ୍ବୀ ଶ’ ଖାତା ବି ଖୋଲିପାରିନାହାନ୍ତି। ଅଭ୍ୟାସ ମ୍ୟାଚରେ ଭଲ ଖେଳିଥିବା ସତ୍ତ୍ବେ ଶୁବମାନ ଗିଲଙ୍କ ପରିବର୍ତ୍ତେ ଟିମ୍ ଇଣ୍ଡିଆ ମ୍ୟାନେଜମେଣ୍ଟ୍ ପୃଥ୍ବୀଙ୍କୁ ଚୂଡ଼ାନ୍ତ ଏକାଦଶରେ ରଖିଥିଲେ ହେଁ ସେ ଅଧିନାୟକ କୋହଲି ଓ ମୁଖ୍ୟ କୋଚ୍ ରବି ଶାସ୍ତ୍ରୀଙ୍କୁ ନିରାଶ କରିଛନ୍ତି। ୩ୟ ନମ୍ବରରେ ବ୍ୟାଟିଂ କରିବାକୁ ଆସିଥିବା ଚେତେଶ୍ବର ପୂଜାରା ଓ ଉପଅଧିନାୟକ ଅଜିଙ୍କ୍ୟ ରାହାଣେ ଯଥାକ୍ରମେ ୪୩ ଓ ୪୨ ରନ୍ କରିଥିଲେ। ପ୍ରଥମ ଦିନର ଖେଳ ଶେଷ ସୁଦ୍ଧା ଭାରତ ୬ ୱିକେଟ୍ ହରାଇ ୨୩୩ ରନ୍ କରିଥିବା ବେଳେ ଋଦ୍ଧିମାନ୍ ସାହା ୯ ଓ ରବିଚନ୍ଦ୍ରନ୍ ଅଶ୍ବିନ୍ ୧୫ ରନ୍ କରି ଅପରାଜିତ ଅଛନ୍ତି।

ଅନ୍ତର୍ଜାତୀୟ କ୍ରିକେଟରୁ ଆମୀରଙ୍କ ଅବସର, ପିସିବି

ପାକିସ୍ତାନର ଜଣେ ପ୍ରତିଭାବାନ ପେସର୍ ଭାବେ ପରିଚିତ ମହମ୍ମଦ ଆମୀର୍ ତାଙ୍କ ଅନ୍ତର୍ଜାତୀୟ କ୍ୟାରିଅରରେ ସମସ୍ତଙ୍କୁ ଚମକାଇ ଦେବା ଭଳି ପ୍ରଦର୍ଶନ କରିଥିଲେ। କିନ୍ତୁ ଗତ ୨୦୧୦ରେ ଦୁଇ ଜଣ ପାକିସ୍ତାନୀ ସାଥୀ ଖେଳାଳିଙ୍କ ସହ ମିଶି ଆମୀର୍ ଲର୍ଡ୍ସ ଟେଷ୍ଟରେ ମ୍ୟାଚ୍ ଫିକ୍ସିଂରେ ଜଡ଼ିତ ଥିବା ଜଣାପଡ଼ିବା ପରେ ତାଙ୍କୁ ସାମୟିକ ଜେଲ୍ ହେବା ସହ ୫ ବର୍ଷ ପାଇଁ ବାସନ୍ଦ କରାଯାଇଥିଲା। ବାସନ୍ଦାଦେଶ ପୂରଣ କରିବା ପରେ ବି ଅନ୍ତର୍ଜାତୀୟ କ୍ରିକେଟରେ ନିଜକୁ ପ୍ରତିଷ୍ଠା କରିପାରିଥିବା ଆମୀର୍ ପୂର୍ବରୁ ସୀମିତ ଓଭର୍ କ୍ରିକେଟରେ ଅଧିକ ଫୋକସ୍ କରିବା ସକାଶେ ଟେଷ୍ଟ୍ କ୍ରିକେଟ୍ ଛାଡ଼ିଥିଲେ। ତେବେ ଗୁରୁବାର ସେ ଅନ୍ତର୍ଜାତୀୟ କ୍ରିକେଟକୁ ଗୁଡବାଏ କରିଦେଇଛନ୍ତି। ଏହି ବାମହାତୀ ପେସର୍ ଜଣକ ଆଉ କୌଣସି ଅନ୍ତର୍ଜାତୀୟ ମ୍ୟାଚ ଖେଳିବେ ନାହିଁ ବୋଲି ଗୁରୁବାର ସୋସାଲ୍ ମିଡିଆ ମାଧ୍ୟମରେ ଘୋଷଣା କରିଛନ୍ତି। ତେବେ ମାତ୍ର ୨୮ ବର୍ଷ ବୟସରେ ଅନ୍ତର୍ଜାତୀୟ କ୍ରିକେଟକୁ ଆମୀର୍ ଅଲବିଦା କହିବା ପଛରେ ପିସିବି କର୍ମକର୍ତ୍ତା ଓ ଦଳୀୟ ମ୍ୟାନେଜମେଣ୍ଟ୍ ସହ ତାଙ୍କର ତିକ୍ତତା ମୁଖ୍ୟ କାରଣ ବୋଲି କୁହାଯାଉଛି। ଏ ସଂକ୍ରାନ୍ତରେ ପିସିବି ମୁଖ୍ୟ କାର୍ଯ୍ୟନିର୍ବାହୀ ୱାସିମ୍ ଖାନ୍ କହିଛନ୍ତି ଯେ ଯଥେଷ୍ଟ କମ୍ ବୟସର ହୋଇଥିଲେ ମଧ୍ୟ ଆମୀର୍ ଅନ୍ତର୍ଜାତୀୟ କ୍ରିକେଟ୍ ଛାଡ଼ିବେ ବୋଲି ଶୁଣିବା ପରେ ସେ ତାଙ୍କ ସହ ବ୍ୟକ୍ତିଗତ ଭାବେ ଆଲୋଚନା କରିଥିଲେ। କିନ୍ତୁ ସେ ତାଙ୍କ ନିଷ୍ପତ୍ତି ବଦଳାଇବେ ନାହିଁ ଓ ଆଗାମୀ ଦିନରେ କୌଣସି ଅନ୍ତର୍ଜାତୀୟ ମ୍ୟାଚରେ ତାଙ୍କୁ ଚୟନ ନ କରିବା ସକାଶେ ଆମୀର୍ କହିଥିବା ଓ୍ବାସିମ୍ କହିଛନ୍ତି। ଆମୀରଙ୍କ ଏପରି ନିଷ୍ପତ୍ତିକୁ ପିସିବି ସମ୍ମାନ ଦେଉଛି ବୋଲି ୱାସିମ୍ କହିବା ସହ ତାଙ୍କର ଅବସର ଜୀବନ ସୁଖଦ ହେଉ ବୋଲି କାମନା କରିଛନ୍ତି।

ପୃଥ୍ବୀ ଶୂନ, ମୟଙ୍କ ୧୭: ଭାରତ ଡିନର ସୁଦ୍ଧା ୪୧/୨

ଭାରତ-ଅଷ୍ଟ୍ରେଲିଆ ପ୍ରଥମ ଟେଷ୍ଟ ଆଡିଲେଡରେ ଦିବାରାତ୍ର ଭାବେ ଆରମ୍ଭ ହୋଇଛି। ଟସ୍ ଜିଣି ଭାରତ ବ୍ୟାଟିଂ ନେଇଥିଲା ବେଳେ ଡିନର ସୁଦ୍ଧା ଭାରତ ୨ ଓପନରଙ୍କ ୱିକେଟ ହରାଇ କେବଳ ୪୧ ରନ କରିଛି। ପିଙ୍କ ବଲରେ ଦୁଇ ଭାରତୀୟ ଓପନର ବିଫଳ ହୋଇଛନ୍ତି। ପ୍ରଥମ ଓଭରର ଦ୍ବିତୀୟ ବଲରେ ଓପନର ପୃଥ୍ବୀ ଶ’ ଖାତା ଖୋଲିବା ପୂର୍ବରୁ ମିଚେଲ ଷ୍ଟାର୍କଙ୍କ ଦ୍ବାରା ବୋଲ୍ଡ ହୋଇଛନ୍ତି। ଫଳରେ ତାଙ୍କ ଫର୍ମକୁ ନେଇ ଲାଗି ରହିଥିବା ଦ୍ବନ୍ଦ୍ବ ପାଇଁ ଭାରତୀୟ ଦଳର ଅଡୁଆ ବଢ଼ି ଯାଇଛି। ପ୍ରଥମ ପସନ୍ଦର ଓପନର ଭାବେ ଖେଳୁଥିବା ମୟଙ୍କ ଅଗ୍ରୱାଲ ମଧ୍ୟ ପ୍ରଥମ ସେସନ ଖେଳରେ ପ୍ୟାଭିଲିୟନ ଫେରିଛନ୍ତି। ଉନବିଂଶ ଓଭର ପର୍ଯ୍ୟନ୍ତ ୱିକେଟ ବଞ୍ଚାଇଥିବା ମୟଙ୍କ ପ୍ୟାଟ୍ଟ କମିନ୍ସଙ୍କ ବୋଲିଂରେ ଆଉଟ ହୋଇଛନ୍ତି। ମୟଙ୍କ ୪୦ଟି ବଲ ଖେଳି ୨ଟି ଚୌକା ଜରିଆରେ ୧୭ ରନ କରି ଆଉଟ ହୋଇଛନ୍ତି।

କୋହଲି-ଅନୁଷ୍କାଙ୍କ ସନ୍ତାନ ସୂଚନା ବର୍ଷର ଶ୍ରେଷ୍ଠ ଟ୍ବିଟ୍

ଚଳିତ ବର୍ଷ ଅଗଷ୍ଟରେ ଭାରତୀୟ କ୍ରିକେଟ୍ ଦଳର ଅଧିନାୟକ ବିରାଟ କୋହଲି ଓ ତାଙ୍କ ଅଭିନେତ୍ରୀ ପତ୍ନୀ ଅନୁଷ୍କା ଶର୍ମା ଖୁବଶୀଘ୍ର ପରିବାରରେ ୩ୟ ଅତିଥିଙ୍କୁ ସ୍ବାଗତ କରିବାକୁ ଯାଉଛନ୍ତି ବୋଲି ଟ୍ବିଟର୍ ମାଧ୍ୟମରେ ସୂଚନା ଦେଇଥିଲେ। ୨୦୧୭ ଶେଷ ଭାଗରେ ଏହି ଦୁଇ ତାରକା ପରସ୍ପର ସହ ବିବାହ ବନ୍ଧନରେ ଆବଦ୍ଧ ହେବା ପରେ ଏହା ସେମାନଙ୍କ ବୈବାହିକ ଜୀବନର ସବୁଠାରୁ ସୁଖଦ ମୁହୂର୍ତ୍ତ ରହିଥିଲା। ତେବେ ସେମାନଙ୍କ ଏହି ସୂଚନା କୋଟି କୋଟି ସୋସାଲ୍ ମିଡିଆ ଫଲୋୟର୍ସଙ୍କ ପାଇଁ ମଧ୍ୟ ଆହୁରି ଅଧିକ ଖୁସି ଦେଇଥିବା ଜଣାପଡ଼ିଛି। କାରଣ ଏହି ଟ୍ବିଟ୍‌ଟି ୨୦୨୦ ବର୍ଷର ସବୁଠାରୁ ଅଧିକ ଲୋକ ପସନ୍ଦ (ଲାଇକ୍) କରିଛନ୍ତି। କୋହଲି ଓ ଅନୁଷ୍କାଙ୍କୁ ତାଙ୍କ ପ୍ରଶଂସକମାନେ ବେଶ୍ ମୋଟା ଆକାରରେ ଶୁଭେଚ୍ଛା ଦେଇଛନ୍ତି। ଉଭୟ କୋହଲି ଓ ଅନୁଷ୍କା ନିଜ ନିଜ କ୍ଷେତ୍ରରେ ବେଶ୍ ସଫଳତା ହାସଲ କରିଥିବାରୁ ସେମାନଙ୍କର କୋଟି କୋଟି ପ୍ରଶଂସକ ଅଛନ୍ତି। ସେମାନେ ଏହି ସୁଖୀ ଦମ୍ପତିଙ୍କ ଏପରି ସୁଖଦ ସମୟର ସାଥୀ ହେବା ସହ ନୂଆ ଅତିଥି ଆଗମନ ସେମାନଙ୍କ ଜୀବନରେ ଆହୁରି ସୁଖଦ ମୁହୂର୍ତ୍ତ ଆଣିଦେଉ ବୋଲି ପ୍ରଶଂସକମାନେ ଟ୍ବିଟ୍ କରିଥିଲେ।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ