ଖେଳକୁଦ

ପନ୍ତ୍‌ଙ୍କ ଧୂଆଁଧାର ୯୭, ଶେଷ ଇନିଂସରେ ୧୩୧ ଓଭର୍ ଖେଳି

ଚଳିତ ଭାରତ-ଅଷ୍ଟ୍ରେଲିଆ ଟେଷ୍ଟ୍ ସିରିଜର ୩ୟ ମ୍ୟାଚଟି ସୋମବାର ଡ୍ର’ରେ ଶେଷ ହୋଇଛି। ମ୍ୟାଚର ଶେଷ ଦିନରେ ବିଜୟ ପାଇଁ ଭାରତ ୨୯୯ ରନର ଆବଶ୍ୟକ କରୁଥିବା ବେଳେ ହାତରେ ୮ଟି ୱିକେଟ୍ ବାକି ଥିଲା। ଶେଷ ଦିନରେ ଭାରତ ଆଉ ୩ଟି ୱିକେଟ୍ ହରାଇ ମ୍ୟାଚକୁ ଡ୍ର’ରେ ଶେଷ କରିବାରେ ସକ୍ଷମ ହୋଇଛି। ପ୍ରଥମ ଇନିଂସରେ ଆହତ ହୋଇଥିବା ଋଷଭ ପନ୍ତ୍ ଶେଷ ଦିନରେ ଚମତ୍କାର ବ୍ୟାଟିଂ କରି ୯୭ ରନର ଧୂଆଁଧାର ଇନିଂସ ଖେଳିଥିଲେ। ଏହାଛଡ଼ା ମଧ୍ୟମକ୍ରମ ବ୍ୟାଟ୍ସମ୍ୟାନ୍ ଚେତେଶ୍ବର ପୂଜାରା ୭୭ ରନ୍ କରିଥିବା ବେଳେ ଷଷ୍ଠ ୱିକେଟରେ ପ୍ରଶଂସନୀୟ ବ୍ୟାଟିଂ କରିଥିଲେ ହନୁମା ବିହାରୀ ଓ ରବିଚନ୍ଦ୍ରନ୍ ଅଶ୍ବିନ୍। ଉଭୟ ୨୬୦ରୁ ଊର୍ଦ୍ଧ୍ବ ବଲ୍ ଖେଳିବା ସହ ୮୪ ରନ୍ ଯୋଡ଼ିବା ସହ ସିରିଜରେ ଅଷ୍ଟ୍ରେଲିଆକୁ ଅପରାଜେୟ ଅଗ୍ରଣୀ ନେବାରୁ ବଞ୍ଚିତ କରିଥିଲେ। ଏଥିସହ ବର୍ଡର-ଗାଭାସ୍କର ଟ୍ରଫି ବଜାୟ ରଖିବା ସମ୍ଭାବନା ଏବେ ବି କାଏମ ରହିଛି। ପ୍ରଥମ ଇନିଂସରେ ୧୩୧ ଓ ଦ୍ବିତୀୟ ଇନିଂସରେ ୮୧ ରନ୍ କରିଥିବା ଅଷ୍ଟ୍ରେଲୀୟ ବ୍ୟାଟ୍ସମ୍ୟାନ୍ ଷ୍ଟିଭେନ୍ ସ୍ମିଥ୍ ମ୍ୟାନ୍ ଅଫ୍ ଦ ମ୍ୟାଚ୍ ବିବେଚିତ ହୋଇଛନ୍ତି। ସିରିଜର ଚତୁର୍ଥ ତଥା ଅନ୍ତିମ ଟେଷ୍ଟଟି ଆସନ୍ତା ଜାନୁଆରୀ ୧୫ ତାରିଖଠାରୁ ବ୍ରିସବେନଠାରେ ଖେଳାଯିବ।

ସିଡନୀ ଟେଷ୍ଟରେ ଭାରତକୁ ୪୦୭ ଟାର୍ଗେଟ୍, ଉଭୟ

ସିଡନୀଠାରେ ଚାଲିଥିବା ଭାରତ-ଅଷ୍ଟ୍ରେଲିଆ ଟେଷ୍ଟ୍ ସିରିଜର ୩ୟ ମ୍ୟାଚରେ ଭାରତ ଆଗରେ ୪୦୭ ରନର ଟାର୍ଗେଟ୍ ରହିଛି। ଏହି ଟାର୍ଗେଟର ପିଛା କରିବାକୁ ଯାଇ ଭାରତ ଚତୁର୍ଥ ଦିନର ଖେଳ ଶେଷ ସୁଦ୍ଧା ଉଭୟ ଓପନରଙ୍କ ୱିକେଟ୍ ହରାଇ ୯୮ ରନ୍ କରିଛି। ପୂର୍ବରୁ ଅଷ୍ଟ୍ରେଲିଆ ତା’ର ଦ୍ବିତୀୟ ଇନିଂସକୁ ୩୧୨/୬ରେ ଘୋଷଣା କରିବା ଫଳରେ ଭାରତକୁ ଏହି ବିଶାଳ ଟାର୍ଗେଟ୍ ମିଳିଛି। ଭାରତର ଦୁଇ ଓପନର ପ୍ରଥମ ୱିକେଟ୍ ପାଇଁ ୭୧ ରନ୍ ଯୋଡ଼ିଥିଲେ। ଶୁବମାନ୍ ଗିଲ୍ ବ୍ୟକ୍ତିଗତ ଭାବେ ୪ଟି ଚୌକା ସହ ୩୧ ରନ୍ କରିଥିବା ବେଳେ ଜୋଶ୍ ହେଜଲଉଡଙ୍କ ବଲରେ ୱିକେଟକିପର୍ ତଥା ଅଧିନାୟକ ଟିମ୍ ପେନଙ୍କ ହାତରେ କ୍ୟାଚ୍ ଆଉଟ୍ ହୋଇଥିଲେ। ପରେ ରୋହିତ ଶର୍ମା ବିଦେଶ ମାଟିରେ ପ୍ରଥମ ଟେଷ୍ଟ୍ ଅର୍ଦ୍ଧଶତକ ପୂରଣ କରିଥିଲେ। କିନ୍ତୁ ଏହାପରେ ସେ ବେଶୀ ସମୟ ପିଚରେ ତିଷ୍ଠି ପାରି ନ ଥିଲେ। ସେ ପ୍ରଥମ ଇନିଂସର ସଫଳ ପେସର୍ ପ୍ୟାଟ୍ କମିନ୍ସଙ୍କ ବଲକୁ ପୁଲ୍ କରିବାକୁ ଯାଇ ସ୍କୋୟାର୍ ଲେଗ୍ ବାଉଣ୍ଡାରୀରେ ମିଚେଲ୍ ଷ୍ଟାର୍କଙ୍କୁ କ୍ୟାଚ୍ ଦେଇଥିଲେ। ୯୨ ରନ୍ ମଧ୍ୟରେ ଦଳ ଦୁଇ ଓପନରଙ୍କ ୱିକେଟ୍ ହରାଇଥିଲା। ଏହାପରେ ରବିବାର ଆଉ କୌଣସି ୱିକେଟ୍ ପଡ଼ିବାକୁ ଦେଇ ନ ଥିଲେ ଅଧିନାୟକ ଅଜିଙ୍କ୍ୟ ରାହାଣେ ଓ ଚେତେଶ୍ବର ପୂଜାରା। ଷ୍ଟମ୍ପ୍ସ ଅପସାରଣ ବେଳକୁ ଉଭୟ ଦଳୀୟ ସ୍କୋରକୁ ୯୮ରେ ପହଞ୍ଚାଇସାରିଥିଲେ।

ଶେଷ ଟେଷ୍ଟରୁ ଜାଡେଜା ଆଉଟ୍, ଭାରତର ପିଛା ଛାଡ଼ୁନି ଆହତ

ଚଳିତ ସିଡନୀ ଟେଷ୍ଟର ତୃତୀୟ ଦିନର ବ୍ୟାଟିଂରେ ଭାରତ ପ୍ରଥମ ଇନିଂସ ଭିତ୍ତିରେ ପଛୁଆ ରହିବା ସହ ଦଳର ଦୁଇ ଜଣ ବ୍ୟାଟ୍ସମ୍ୟାନ୍ ଆହତ ହୋଇଛନ୍ତି। ବ୍ୟାଟିଂ ବେଳେ ଓ୍ୱିକେଟକିପର୍-ବ୍ୟାଟ୍ସମ୍ୟାନ୍ ଋଷଭ ପନ୍ତ୍ କହୁଣୀରେ ଆଘାତ ପାଇଥିବା ବେଳେ ଅଲରାଉଣ୍ଡର୍ ରବୀନ୍ଦ୍ର ଜାଡେଜା ତାଙ୍କ ବାମ ହାତ ବୃଦ୍ଧାଙ୍ଗୁଳିରେ ଆଘାତ ପାଇଛନ୍ତି। ଭାରତର ପ୍ରଥମ ଇନିଂସ୍‌ରେ ପ୍ୟାଟ୍ କମିନ୍ସଙ୍କ ଏକ ବାଉନ୍ସର୍ ପନ୍ତଙ୍କ କହୁଣିରେ ବାଜିଥିଲା। ଯନ୍ତ୍ରଣାରେ ସେ ଛଟପଟ ହେଉଥିବା ବେଳେ ତାଙ୍କ ନିକଟରେ ଫିଜିଓ ପହଞ୍ଚିଥିଲେ। ପନ୍ତ୍ ପେନ୍ କିଲିଙ୍ଗ୍ ସ୍ପ୍ରେ ଲଗାଇବା ସହ ଏଲ୍‌ବୋ ବ୍ୟାଣ୍ଡେଜ୍ ବାନ୍ଧି ବ୍ୟାଟିଂ ପିଚକୁ ଫେରିଥିଲେ। କିନ୍ତୁ ସେ ବେଶୀ ସମୟ ତିଷ୍ଠି ପାରି ନ ଥିଲେ ଓ ଜୋଶ୍ ହେଜଲଉଡଙ୍କ ବଲରେ ଆଉଟ୍ ହୋଇ ପ୍ୟାଭିଲିଅନ୍ ଫେରିଥିଲେ। ତେବେ ଦଳକୁ ସବୁଠାରୁ ବଡ଼ ଝଟ୍‌କା ଲାଗିଛି ଓ ଦଳର ପ୍ରମୁଖ ଅଲ୍‌ରାଉଣ୍ଡର୍ ଜାଡେଜା ଆଉଟ୍ ହୋଇଯାଇଛନ୍ତି। ଅଷ୍ଟ୍ରେଲୀୟ ପେସର୍ ମିଚେଲ୍ ଷ୍ଟାର୍କଙ୍କ ଏକ ବାଉନ୍ସର ଜାଡେଜାଙ୍କ ବୃଦ୍ଧାଙ୍ଗୁଳିରେ ଲାଗିଥିଲା ସେ ମଧ୍ୟ ପେନ୍ କିଲିଙ୍ଗ୍ ସ୍ପ୍ରେ ଲଗାଇବା ସହ ବ୍ୟାଣ୍ଡେଜ୍ ବାନ୍ଧି ବ୍ୟାଟିଂ ଜାରି ରଖିଥିଲେ।

ବ୍ୟାଟିଂ ବେଳେ ଋଷଭ ପନ୍ତ ଆହତ: ୱିକେଟ କିପିଂ କଲେ

ତୃତୀୟ ଟେଷ୍ଟରେ ଭାରତୀୟ ଦଳକୁ ଶକ୍ତ ଝଟକା ଲାଗିଛି। ପ୍ରଥମ ଇନିଂସରେ ଦଳ ପଛୁଆ ରହିଥିଲା ବେଳେ ବ୍ୟାଟିଂ ବେଳେ ଦୁଇଜଣ ବ୍ୟାଟ୍ସମ୍ୟାନ ଆହତ ହୋଇଛନ୍ତି। ୱିକେଟ କିପର ଋଷଭ ପନ୍ତ ୬୭ଟି ବଲରୁ ବେଶ ଭଲ ବ୍ୟାଟିଂ ଜରିଆରେ ୩୬ ରନରେ ବ୍ୟାଟିଂ କରୁଥିଲା ବେଳେ ପ୍ୟାଟ୍ଟ କମିନ୍ସଙ୍କ ଏକ ଶଟ ବଲକୁ ପୁଲ କରିବାକୁ ଯାଇ ବାମ ହାତରେ ଆଘାତ ପାଇଥିଲେ। ଯନ୍ତ୍ରଣା ହେବାରୁ ସେ ଆଉ ବ୍ୟାଟିଂ କରି ନପାରି ଫେରି ଯାଇଥିଲେ। ଏହାପରେ ସେ ପୁଣି ଥରେ ବ୍ୟାଟିଂ ପାଇଁ ଆସିଥିଲେ ବି ଜୋସ ହେଜଲଉଡଙ୍କ ବୋଲିଂରେ କଟ ବିହାଇଣ୍ଡ ହୋଇ ଫେରିଥିଲେ। ମାତ୍ର ଏଠାରେ ଉଲ୍ଲେଖଯୋଗ୍ୟ ଯେ ଆଇସିସିର ନିୟମ ଅନୁସାରେ ପନ୍ତଙ୍କୁ ଚଳିତ ୩ୟ ଟେଷ୍ଟର ଅବଶିଷ୍ଟ ଖେଳରୁ ବାଦ ଦିଆଯାଇ ଋଦ୍ଧିମାନ ସାହାଙ୍କୁ ଚୂଡ଼ାନ୍ତ ଏକାଦଶରେ ସାମିଲ କରାଯାଇଛି। ଆହତ ପନ୍ତଙ୍କ ସ୍କାନ ଚାଲିଥିବା ନେଇ ବିସିସିଆଇ ଟ୍ବିଟ କରିବା ପରେ ଋଦ୍ଧିମାନଙ୍କୁ ଚୂଡ଼ାନ୍ତ ଏକାଦଶରେ ଗ୍ରହଣ ପାଇଁ ଆଇସିସି ଅନମୁତି ଦେଇଛି।

ଗାଙ୍ଗୁଲିଙ୍କୁ ଭେଟିଲେ ଅନୁରାଗ ଓ ଜୟ, ଆଉ ଏକ ଆଞ୍ଜିଓପ୍ଲାଷ୍ଟି

ବିସିସିଆଇ ସଭାପତି ସୌରଭ ଗାଙ୍ଗୁଲିଙ୍କ ସ୍ବାସ୍ଥ୍ୟାବସ୍ଥା ସ୍ଥିର ରହିଛି। ସୋମବାରଉଡଲାଣ୍ଡସ ମଲ୍ଟି ସ୍ପେଶାଲିଟି ହସ୍ପିଟାଲ ଯାଇ ତାଙ୍କୁ ସାକ୍ଷାତ କରିଛନ୍ତି ପୂର୍ବତନ ବିସିସିଆଇ ସଭାପତି ତଥା କେନ୍ଦ୍ର ଅର୍ଥ ରାଷ୍ଟ୍ର ମନ୍ତ୍ରୀ ଅନୁରାଗ ଠାକୁର। ବୋର୍ଡ ସମ୍ପାଦକ ଜୟ ଶାହ ମଧ୍ୟ ହସ୍ପିଟାଲ ଯାଇ ଗାଙ୍ଗୁଲିଙ୍କ ସହ ସ୍ବାସ୍ଥ୍ୟବସ୍ଥା ନେଇ ଆଲୋଚନା କରିଛନ୍ତି। ମେଡିକାଲ ସିଇଓ ଡାକ୍ତର ରୂପାଲି ବସୁଙ୍କ ସୂଚନାନୁସାରେ ଏକ ୯ ଜଣିଆ ଡାକ୍ତରୀ ଦଳ ତାଙ୍କୁ ସ୍ବାସ୍ଥ୍ୟ ଯାଞ୍ଚ କରୁଛନ୍ତି। ଆମେରିକାର ବିଶେଷଜ୍ଞଙ୍କ ସହ ମଧ୍ୟ ଏନେଇ ଆଲୋଚନା କରାଯାଇଛି। ଜଣାଶୁଣା ହୃଦରୋଗ ବିଶେଷଜ୍ଞ ଡାକ୍ତର ଦେବୀ ଶେଟ୍ଟୀ ଓ ଡାକ୍ତର ଆରକେ ପଣ୍ଡା ଆମେରିକାର ହୃଦରୋଗ ବିଶେଷଜ୍ଞଙ୍କ ସହ ଆଲୋଚନା କରି ଗାଙ୍ଗୁଲିଙ୍କ ସ୍ବାସ୍ଥ୍ୟାବସ୍ଥା ଉପରେ ତୀକ୍ଷଣ ନଜର ରଖିଛନ୍ତି।

ସିଡନୀରେ ଟିମ ଇଣ୍ଡିଆ, ବ୍ରିସବେନରେ ବି ଖେଳିବେ ମ୍ୟାଚ

ଆସନ୍ତା ୭ରୁ ଆରମ୍ଭ ହେବାକୁ ଯାଉଥିବା ୩ୟ ଟେଷ୍ଟ ପାଇଁ ଭାରତୀୟ ଦଳ ସୋମବାର ସିଡନୀରେ ପହଞ୍ଚିଛି। ସିଡନୀ ଟେଷ୍ଟ ପାଇଁ ଥିବା ସବୁ ପ୍ରୋଟୋକଲ ମାନି ଭାରତୀୟ ଦଳ ଏକାଠି ସିଡନୀରେ ପହଞ୍ଚିଛନ୍ତି। ସିଡନୀରେ ରହିବା ବେଳେ ଭାରତୀୟ ଖେଳାଳିଙ୍କୁ କେଉଁସବୁ ପ୍ରୋଟୋକଲ ମାନିବାକୁ ପଡ଼ିବ ତାହା ଜଣାଇ ଦିଆଯାଇଛି। ଏଥିସହ ଭାରତୀୟ ଦଳ ବ୍ରିସବେନରେ ଖେଳିବା ନେଇ ଯେଉଁ ବିବାଦୀୟ ପରିସ୍ଥିତି ସୃଷ୍ଟି ହୋଇଥିଲା ତାହା ଦୂର ହୋଇଛି ବୋଲି କୁହାଯାଇଛି। ବିସିସିଆଇ ପକ୍ଷରୁ ବ୍ରିସବେନରେ ମ୍ୟାଚ ଖେଳିବା ପାଇଁ ଯେଉଁସବୁ କଟକଣା ଧାର୍ଯ୍ୟ ହୋଇଛି, ତାହାକୁ ନେଇ କୌଣସି ପ୍ରତିବାଦ କରାଯାଇନି ବୋଲି କ୍ରିକେଟ ଅଷ୍ଟ୍ରେଲିଆ ପକ୍ଷରୁ କୁହାଯାଇଛି। ତେଣୁ ବ୍ରିସବେନ ଟେଷ୍ଟ ହେବା ନେଇ ଥିବା ଦ୍ବନ୍ଦ୍ବ ଦୂର ହୋଇଛି ବୋଲି କୁହାଯାଇଛି।

ଟେଷ୍ଟ ଟିମରେ ରୋହିତ ଉପଅଧିନାୟକ, ନଟରାଜନ ସାମିଲ

ସିନିଅର ଓପନର ରୋହିତ ଶର୍ମାଙ୍କୁ ଅଷ୍ଟ୍ରେଲିଆ ବିପକ୍ଷରେ ଖେଳାଯିବାକୁ ଥିବା ପରବର୍ତ୍ତୀ ଦୁଇ ଟେଷ୍ଟ ପାଇଁ ଉପଅଧିନାୟକ ଦାୟିତ୍ବ ଦିଆଯାଇଛି। ବିରାଟ କୋହଲି ପିତୃତ୍ବ ଛୁଟିରେ ସ୍ବଦେଶ ଫେରିବା ପରେ ଦ୍ବିତୀୟ ଟେଷ୍ଟ ଆରମ୍ଭରେ ଅଧିନାୟକ ଦାୟିତ୍ବ ପାଇଥିବା ଅଜିଙ୍କ୍ୟ ରାହାଣେଙ୍କ ଡେପୁଟି ଭାବେ ଚେତେଶ୍ବର ପୂଜାରାଙ୍କୁ ଚୟନ କରାଯାଇଥିଲା। ମାତ୍ର ଦିନିକିଆରେ କୋହଲିଙ୍କ ଡେପୁଟି ଭାବେ ଦାୟିତ୍ବ ତୁଲାଉଥିବା ରୋହିତଙ୍କୁ ପ୍ରଥମ ଥର ପାଇଁ ଟେଷ୍ଟ ଟିମର ଉପଅଧିନାୟକ ଦାୟିତ୍ବ ପ୍ରଦାନ କରାଯାଇଛି। ବିସିସିଆଇ ପକ୍ଷରୁ ସ୍ପଷ୍ଟ କରାଯାଇଛି ଯେ କୋହଲିଙ୍କ ପ୍ରତ୍ୟାବର୍ତ୍ତନ ପର୍ଯ୍ୟନ୍ତ ରାହାଣେ ଟେଷ୍ଟ ଟିମର ଅଧିନାୟକ ଓ ରୋହିତ ଉପଅଧିନାୟକ ଭାବେ କାର୍ଯ୍ୟ କରିବେ। କୋହଲି ଫେରିବା ପରେ ରାହାଣେ ଉପଅଧିନାୟକ ପଦକୁ ଫେରିବେ।

୧୯୮୧ ୱାକଆଉଟ ପେଡ଼ି ଖୋଲିଲେ ଗାଭାସ୍କର

୧୯୮୧ରେ ମେଲବର୍ଣ୍ଣ ଟେଷ୍ଟର ୱାକଆଉଟ ଘଟଣା ସମ୍ପର୍କରେ ପୂର୍ବତନ ଅଧିନାୟକ ତଥା ଭାଷ୍ୟକାର ସୁନୀଲ ଗାଭାସ୍କର ପୁଣି ଥରେ ମୁହଁ ଖୋଲିଛନ୍ତି। ଗାଭାସ୍କର କହିଛନ୍ତି ଯେ ସେ ତାଙ୍କ ଏଲବିଡବ୍ଲୁ ନିଷ୍ପତ୍ତି ପାଇଁ ନୁହେଁ, ଅଷ୍ଟ୍ରେଲୀୟ ଖେଳାଳିଙ୍କ ‘ଗେଟ ଲଷ୍ଟ’ ମନ୍ତବ୍ୟ ପାଇଁ ୱାକଆଉଟ କରିବାକୁ ନିଷ୍ପତ୍ତି ନେଇଥିଲେ। ଏଠାରେ ସୂଚନାଯୋଗ୍ୟ ଯେ ୧୯୮୧ ମେଲବର୍ଣ୍ଣ ଟେଷ୍ଟରେ ଗାଭାସ୍କର ୭୦ ରନ କରି ଅନ୍ୟତମ ଓପନର ଚେତନ ଚୌହ୍ବାନଙ୍କ ସହ ବ୍ୟାଟିଂ ଜାରି ରଖିଥିଲା ବେଳେ ଡେନିସ ଲିଳିଙ୍କ ଇନ କଟର ଡେଲିଭରିରେ ବିଟ୍ ହୋଇଥିଲେ। ଆଉ କ୍ୟାରିୟରର ୩ୟ ଟେଷ୍ଟ ଅମ୍ପାୟରିଂ କରୁଥିବା ରେକ୍ସ ହ୍ବାଇଟହେଡ ତାଙ୍କୁ ଏଲବଡବ୍ଲୁ ଆଉଟ ଘୋଷଣା କରିଥିଲେ। ଯାହାକୁ ନେଇ ଗାଭାସ୍କର ଅସନ୍ତୋଷ ପ୍ରକାଶ କରିଥିଲେ। କାରଣ ବଲ ତାଙ୍କ ପ୍ୟାଡରେ ବାଜିବା ପୂର୍ବରୁ ବ୍ୟାଟର ଇନସାଇଡ ଏଜ୍ ନେଇଥିଲା। ତେଣୁ ଅମ୍ପାୟରଙ୍କ ଏହି ନିଷ୍ପତ୍ତିରେ ଅସନ୍ତୋଷ ପ୍ରକାଶ କରି ଗାଭାସ୍କର ଦୀର୍ଘ ସମୟ ପିଚରେ ଛିଡା ହୋଇ ରହିଥିଲେ।

ଟେଷ୍ଟ ମାନ୍ୟତା: ରାହାଣେ ଷଷ୍ଠ, ଅଶ୍ବିନ ସପ୍ତମ, କୋହଲି

ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ପକ୍ଷରୁ ଗୁରୁବାର ଟେଷ୍ଟ ମାନ୍ୟତା ପ୍ରକାଶ ପାଇଛି। ୨୦୨୦ ବର୍ଷ ଶେଷରେ କେଉଁ ଖେଳାଳିଙ୍କ ମାନ୍ୟତା କ’ଣ ରହିଛି, ତାହା ତାଲିକାରେ ଦର୍ଶାଯାଇଛି। ଭାରତୀୟ ଦଳର ଅଧିନାୟକ ବିରାଟ କୋହଲି ବ୍ୟାଟିଂ ମାନ୍ୟତାରେ ପୂର୍ବପରି ଦ୍ବିତୀୟ ସ୍ଥାନରେ ରହିଥିଲା ବେଳେ ନ୍ୟୁଜିଲାଣ୍ଡର କେନ ୱଲିୟମସନ ତାଙ୍କର ଶୀର୍ଷ ମାନ୍ୟତା ବଜାୟ ରଖି କ୍ୟାଲେଣ୍ଡର ବର୍ଷ ଶେଷ କରିଛନ୍ତି। ଅଷ୍ଟ୍ରେଲିଆର ଷ୍ଟିଭ ସ୍ମିଥ ମେଲବର୍ଣ୍ଣ ଟେଷ୍ଟରେ ଖରାପ ପ୍ରଦର୍ଶନ ପାଇଁ ପୂର୍ବପରି ୩ୟ ସ୍ଥାନରେ ରହି ବର୍ଷ ଶେଷ କରିଛନ୍ତି। ଟେଷ୍ଟ ବ୍ୟାଟିଂ ମାନ୍ୟତାରେ ସବୁଠୁ ବେଶି ଫାଇଦା ପାଇଛନ୍ତି ଭାରତୀୟ ଦଳର କାମଚଳା ଅଧିନାୟକ ଅଜିଙ୍କ୍ୟ ରାହାଣେ। ରାହାଣେ ମେଲବର୍ଣ୍ଣ ଟେଷ୍ଟରେ ତାଙ୍କ ଶତକୀୟ ଇନିଂସ ପାଇଁ ୫ଟି ସ୍ଥାନ ଉପରକୁ ଉଠି ଟପ ଟେନର ଷଷ୍ଠ ସ୍ଥାନକୁ ଉନ୍ନୀତ ହୋଇଛନ୍ତି। ଗତବର୍ଷ ଅକ୍ଟୋବରରେ ରାହାଣେ ତାଙ୍କ କ୍ୟାରିଅର ବେଷ୍ଟ ମାନ୍ୟତା ପଞ୍ଚମ ସ୍ଥାନ ଠାରୁ ଗୋଟିଏ ସ୍ଥାନ ପଛରେ ରହିଛନ୍ତି। ଚେତେଶ୍ବର ପୂଜାରା ମାନ୍ୟତାରେ ଦଶମ ସ୍ଥାନକୁ ଖସି ଯାଇଛନ୍ତି। ଆଉ କୌଣସି ଭାରତୀୟ ବ୍ୟାଟ୍ସମ୍ୟାନ ଟେଷ୍ଟ ମାନ୍ୟତାର ଟପ ଟେନରେ ନାହାନ୍ତି। ଅନ୍ୟପକ୍ଷରେ ଅଷ୍ଟ୍ରେଲିଆ ଦଳର ମାରନସ ଲାବୁସେନ ୪ର୍ଥ ସ୍ଥାନରେ ରହିଥିଲା ବେଳେ ପାକିସ୍ତାନର ବାବର ଆଜମ ପଞ୍ଚମ ସ୍ଥାନରେ ରହିଛନ୍ତି।

ଅଭ୍ୟାସ ଆରମ୍ଭ କଲେ ରୋହିତ: ଉମେଶ ଆଉଟ,

ମେଲବର୍ଣ୍ଣ: ଭାରତୀୟ ଦଳ ସହ ଯୋଗ ଦେଇଥିବା ରୋହିତ ଶର୍ମା ଦୀର୍ଘ ଦିନର ବ୍ୟବଧାନ ପରେ ଗୁରୁବାର ନେଟ୍ସକୁ ଓହ୍ଲାଇଛନ୍ତି। ପଡ଼ିଆରେ ବେଶ କିଛି ସମୟ ଧରି ସେ ଫିଲ୍ଡିଂ ଅଭ୍ୟାସ କରିଥିବା ଦେଖିବାକୁ ମିଳିଛି। ଦିନକ ପୂର୍ବରୁ ସେ କ୍ବାରେଣ୍ଟାଇନ ଶେଷ କରି ମେଲବର୍ଣ୍ଣରେ ଦଳ ସହ ଯୋଗ ଦେଇଥିଲେ। ଆସନ୍ତା ୭ ତାରିଖରୁ ସିଡନୀରେ ଆରମ୍ଭ ହେବାକୁ ଥିବା ୩ୟ ଟେଷ୍ଟରେ ରୋହିତ ନବାଗତ ଶୁବମନ ଗିଲଙ୍କ ସହ ଇନିଂସ ଓପନ କରିବା ଏକପ୍ରକାର ନିଶ୍ଚିତ ହୋଇ ସାରିଛି। ଫର୍ମ ପାଇଁ ସଂଘର୍ଷ କରୁଥିବା ମୟଙ୍କ ଅଗ୍ରୱାଲଙ୍କୁ ଚୂଡ଼ାନ୍ତ ଏକାଦଶରେ ସ୍ଥାନ ମିଳିବାର କୌଣସି ସମ୍ଭାବନା ନାହିଁ। ଏହିପରି ସ୍ଥିତିରେ ରୋହିତଙ୍କ ଉପରେ ଓପନିଂର ଦାୟିତ୍ବ ନ୍ୟସ୍ତ ହୋଇଥିଲା ବେଳେ ସେ ପୂରା ଦମରେ ଅଭ୍ୟାସ କରି ଆସ୍ଥାଭାଜନ ହେବା ପାଇଁ ଉଦ୍ୟମକୁ ଜୋରଦାର କରିଛନ୍ତି।

ଆଉ ନାହାନ୍ତି ମାଇକେଲ କିଣ୍ଡୋ: ମୁଖ୍ୟମନ୍ତ୍ରୀ କହିଲେ ‘ଟ୍ରାଇବାଲ ଆଇକନ’
ମେଲବର୍ଣ୍ଣରେ ରୋହିତ: ଟିମରେ ୩ ପରିବର୍ତ୍ତନ ସମ୍ଭାବନା

ଷ୍ଟାର ବ୍ୟାଟ୍ସମ୍ୟାନ ରୋହିତ ଶର୍ମା ସିଡନୀରେ ୧୪ ଦିନିଆ କ୍ବାରେଣ୍ଟାଇନ ଶେଷ କରି ମେଲବର୍ଣ୍ଣ ପହଞ୍ଚିଛନ୍ତି। ସେଠାରେ ତାଙ୍କୁ ସାଥୀ ଖେଳାଳିମାନେ ସ୍ବାଗତ କରିଛନ୍ତି। ମୁଖ୍ୟ କୋଚ ରବି ଶାସ୍ତ୍ରୀ ମଧ୍ୟ ରୋହିତଙ୍କୁ ଆଗମନକୁ ନେଇ ଖୁସି ପ୍ରକାଶ କରିବା ସହ ତାଙ୍କ ବାବଦରେ ଟ୍ବିଟ୍ କରିଛନ୍ତି। କ୍ବାରେଣ୍ଟାଇନ କିପରି ରହିଲା ବୋଲି ଶାସ୍ତ୍ରୀଙ୍କ ପ୍ରଶ୍ନରେ ରୋହିତ କହିଛନ୍ତି ଯେ ମୋତେ ୟଙ୍ଗର ଫିଲ୍ ହେଉଛି। ଏଥିସହ ରୋହିତ ଦଳର କେତେକ ଖେଳାଳିଙ୍କ ସହ ଗ୍ରୀଟିଙ୍ଗ୍ସ ପ୍ରଦାନ କରିଥିବା ଦେଖିବାକୁ ମିଳିଛି। ଗତ ଆଇପିଏଲରେ ରୋହିତ ମୁମ୍ବାଇ ଇଣ୍ଡିଆନ୍ସକୁ ଚାମ୍ପିଅନ କରାଇବା ଅବସରରେ ଆହତ ହୋଇଥିଲେ। ଫଳରେ ସେ ଅଷ୍ଟ୍ରେଲିଆ ଗସ୍ତରେ ଦିନିକିଆ, ଟି-୨୦ ସମେତ ପ୍ରଥମ ୨ଟି ଟେଷ୍ଟ ଖେଳିପାରି ନ ଥିଲେ। ଯଦିଓ ସେ ପ୍ରଥମ ଟେଷ୍ଟ ଆରମ୍ଭ ପୂର୍ବରୁ ଅଷ୍ଟ୍ରେଲିଆରେ ପହଞ୍ଚିଥିଲେ ତଥାପି କ୍ବାରେଣ୍ଟାଇନ କଟକଣା ପାଇଁ ଦଳ ସହ ସାମିଲ ହୋଇପାରି ନ ଥିଲେ।

ଇନଜୁରୀ ଟାଇମ ଗୋଲରେ ଗୋଆ ବିଜୟୀ, ପରାଜୟ

ଚଳିତ ଆଇଏସ୍ଏଳ-୭ର ୨୦୨୦ ବର୍ଷ ପାଇଁ ମ୍ୟାଚ୍ ଶେଷ ହୋଇଛି। ସ୍ଥାନୀୟ ତିଲକ ମୈଦାନଠାରେ ବର୍ଷର ଶେଷ ମ୍ୟାଚ ଅର୍ଥାତ୍ ସଂସ୍କରଣର ୪୩ତମ ମ୍ୟାଚ୍‌ଟି ଏଫସି ଗୋଆ ଓ ହାଇଦ୍ରାବାଦ ଏଫସି ମଧ୍ୟରେ ଖେଳାଯାଇଛି। ଏଥିରେ ୨-୧ ଗୋଲରେ ବିଜୟୀ ହୋଇଛି ଏଫସି ଗୋଆ। ନିର୍ଦ୍ଧାରିତ ସମୟ ଶେଷ ସୁଦ୍ଧା ଉଭୟ ଦଳ ଗୋଟିଏ ଲେଖାଏଁ ଗୋଲ୍ ଦେଇଥିଲେ ହେଁ ଇନଜୁରୀ ଟାଇମ୍ ଗୋଲରେ ପୂର୍ଣ୍ଣ ପାଏଣ୍ଟ୍ ହାତେଇବାରେ ଏଫସି ଗୋଆ ସକ୍ଷମ ହୋଇଥିଲା। ନବମ ମ୍ୟାଚରେ ଦଳ ତା’ର ଚତୁର୍ଥ ବିଜୟ ସହ ସର୍ବମୋଟ ୧୪ ପଏଣ୍ଟ୍ ସହ ଟେବୁଲରେ ୩ୟ ସ୍ଥାନକୁ ଉନ୍ନୀତ ହୋଇଛି। ଅନ୍ୟପକ୍ଷରେ ହାଇଦ୍ରାବାଦ ତା’ର ଅଷ୍ଟମ ମ୍ୟାଚ୍ ଶେଷ ସୁଦ୍ଧା ୯ ପଏଣ୍ଟ୍ ପାଇ ଟେବୁଲରେ ଅଷ୍ଟମ ସ୍ଥାନରେ ରହିଛି। ଏଥିସହ ଦଳ କ୍ରମାଗତ ୩ୟ ପରାଜୟ ବରଣ କରିଛି। ତେବେ ଦଳର ପରାଜୟ ପାଇଁ ହାଇଦ୍ରାବାଦ ଏଫସି ମୁଖ୍ୟ କୋଚ୍ ମାନୁଏଲ୍ ମାର୍କ୍ବେଜ୍ ନିଜକୁ ଦାୟୀ କରିଛନ୍ତି। ସେ କହିଛନ୍ତି ଯେ ଏହି ମ୍ୟାଚଟି ଦଳ କେବଳ ତାଙ୍କ ଭୁଲ୍ ପାଇଁ ହିଁ ହାରିଲା। ମ୍ୟାଚରେ ହାଇଦ୍ରାବାଦ ସ୍ଥିତି ସମ୍ପୂର୍ଣ୍ଣ ପଏଣ୍ଟ୍ ଅର୍ଜନ କରିବା ଭଳି ଥିଲା। ମ୍ୟାଚଟି ସମ୍ପୂର୍ଣ୍ଣ ଭାବେ ଦଳ ନିୟନ୍ତ୍ରଣରେ ଥିଲା। କିନ୍ତୁ ଶେଷ ମୁହୂର୍ତ୍ତରେ ଦଳ ନିୟନ୍ତ୍ରଣ ହରାଇବା ଫଳରେ ଏଫସି ଗୋଆର ପଲା ଭାରୀ ହୋଇଥିଲା। ଶେଷ ମୁହୂର୍ତ୍ତରେ ଡବଲ୍ ଗୋଲ୍ ଦେଇ ଗୋଆ ଆମଠାରୁ ମ୍ୟାଚ୍ ଛଡ଼ାଇନେଲା ବୋଲି ମାର୍କ୍ବେଜ୍ କହିଛନ୍ତି।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ