ଖେଳକୁଦ

ଦ୍ରୁତ ବୋଲର ନଟରାଜନଙ୍କୁ ରୋହିତଙ୍କ ପ୍ରଶଂସା

ଅଷ୍ଟ୍ରେଲିଆ ବିପକ୍ଷ ଚଳିତ ୪ର୍ଥ ଟେଷ୍ଟରେ ଭାରତୀୟ ଦଳ ୪ ଜଣ ନୂଆ ବୋଲରଙ୍କ ନେଇ ମ୍ୟାଚ ଖେଳୁଛି। ବିଶେଷକରି ଅଷ୍ଟ୍ରେଲିଆ ପରି ଶକ୍ତିଶାଳୀ ଦଳ ବିପକ୍ଷରେ ବ୍ରିସବେନରେ ଗାବା ପିଚରେ ଅଷ୍ଟ୍ରେଲିଆ ବ୍ୟାଟ୍ସମ୍ୟାନଙ୍କୁ ଅଟକାଇବା ସହଜ ନୁହେଁ, ତାହା ପୂର୍ବରୁ ପ୍ରମାଣିତ ହୋଇଛି। ଯେଉଁଥିପାଇଁ ଭାରତର ବ୍ରିସବେନ ଟେଷ୍ଟ ରେକର୍ଡ ବହୁତ ଖରାପ। ମାତ୍ର ଚଳିତ ଟେଷ୍ଟରେ ୪ ଜଣ ଭାରତୀୟ ନୂଆ ବୋଲରଙ୍କୁ ଅଷ୍ଟ୍ରେଲିଆ ପରି ଶକ୍ତିଶାଳୀ ଦଳକୁ ୪୦୦ ରନ ଭିତରେ ସୀମିତ ରଖିପାରିଥିବାରୁ ରୋହିତ ସେମାନଙ୍କୁ ଉଚ୍ଚ ପ୍ରଶଂସା କରିଛନ୍ତି। ଟି ନଟରାଜନ ଓ ୱାଶିଂଟନ ସୁନ୍ଦର ବ୍ରିସବେନରେ ଟେଷ୍ଟ କ୍ୟାରିଅର ଆରମ୍ଭ କରିଥିଲା ବେଳେ ସିରାଜ ତାଙ୍କ ଟେଷ୍ଟ କ୍ୟାରିଅରର ୩ୟ ମ୍ୟାଚ ଖେଳୁଛନ୍ତି। ନବଦୀପ ସୈନି କ୍ୟାରିଅରର ୨ୟ ଟେଷ୍ଟ ଖେଳୁଥିଲା ବେଳେ ଶାର୍ଦ୍ଦୁଲ ଠାକୁର ୨ୟ ଟେଷ୍ଟ ଖେଳୁଛନ୍ତି। ଆହତଜନିତ ସମସ୍ୟା ପାଇଁ ଫାଷ୍ଟ ଚଏସ ବୋଲର ବୁମରା, ଉମେଶ ଯାଦବ, ମହମ୍ମଦ ଶମୀଙ୍କ ପରି ବୋଲର ସିରିଜ ଅଧାରୁ ବାଦ ପଡ଼ିବା ଏହି ନୂଆ ବୋଲରଙ୍କ ପାଇଁ ସୁଯୋଗ ଆଣି ଦେଇଛି।

ଆଇଏସ୍ଏଲ୍-୭: ନେଭିଲେଙ୍କ ଷ୍ଟପେଜ୍ ଟାଇମ୍ ଗୋଲରେ

ଚଳିତ ଆଇଏସ୍ଏଲର ସପ୍ତମ ସଂସ୍କରଣରେ ଶୁକ୍ରବାର ସ୍ଥାନୀୟ ତିଲକ ମୈଦାନ ଠାରେ ୫୯ତମ ମ୍ୟାଚ୍ ଖେଳାଯାଇଛି। ଏଥିରେ ଏସସି ଇଷ୍ଟ୍ ବେଙ୍ଗଲ୍ ସହ କେରଳ ବ୍ଲାଷ୍ଟର୍ସର ମୁକାବିଲା ହୋଇଥିଲା। ଏହି ମ୍ୟାଚରେ ଉଭୟ ଦଳ ଗୋଟିଏ ଲେଖାଏଁ ଗୋଲ୍ କରିଥିଲେ। ଫଳରେ ଉଭୟ ଦଳକୁ ଗୋଟିଏ ଲେଖାଏଁ ପଏଣ୍ଟ ମିଳିଛି। ମ୍ୟାଚର ପ୍ରଥମାର୍ଦ୍ଧରେ କୌଣସି ଗୋଲ୍ ହୋଇ ନ ଥିବା ବେଳେ ଦ୍ବିତୀୟାର୍ଦ୍ଧରେ ୬୪ତମ ମିନିଟରେ ଅଷ୍ଟ୍ରେଲୀୟ ଫୁଟବଲର୍ ଜୋର୍ଡାନ ମରେ କେରଳ ବ୍ଲାଷ୍ଟର୍ସକୁ ୧-୦ ଗୋଲରେ ଅଗ୍ରଣୀ କରାଇଥିଲେ। ନର୍ଦ୍ଧାରିତ ସମୟ ଶେଷ ସୁଦ୍ଧା କେରଳ ତା’ରଏହି ଅଗ୍ରଣୀକୁ ବଜାୟ ରଖିବା ସହ ଷ୍ଟପେଜ୍ ଟାଇମର ଶେଷ ମିନିଟ୍ ପର୍ଯ୍ୟନ୍ତ ମଧ୍ୟ ଏହାକୁ କାଏମ ରଖିଥିଲା। ଶେଷ ମିନିଟ୍ ଅର୍ଥାତ୍ ୯୦+୫ ମିନିଟରେ ଅନ୍ୟତମ ଅଷ୍ଟ୍ରେଲୀୟ ଖେଳାଳି ସ୍କଟ୍ ନେଭିଲେ ଗୋଲ୍ ଦେବା ଫଳରେ ଇଷ୍ଟ୍ ବେଙ୍ଗଲ୍ ସଂସ୍କରଣରେ ପଞ୍ଚମ ମ୍ୟାଚ୍ ଡ୍ର’ ରଖିବାରେ ସଫଳ ରହିଥିଲା। ଉଭୟ କେରଳ ଓ ଇଷ୍ଟ୍ ବେଙ୍ଗଲ ଶୁକ୍ରବାର ଏଠାରେ ସଂସ୍କରଣରେ ସେମାନଙ୍କ ଏକାଦଶ ମ୍ୟାଚ୍ ଖେଳିଥିଲେ। ଏହି ମ୍ୟାଚ୍ ପରେ କେରଳ ୨ଟି ବିଜୟ, ୪ଟି ଡ୍ର’ ଓ ୫ଟି ପରାଜୟ ସହ ସମୁଦାୟ ୧୦ ପଏଣ୍ଟ ପାଇ ପଏଣ୍ଟ ଟେବଲରେ ଦଶମ ସ୍ଥାନରେ ରହିଛି। ଅନ୍ୟପକ୍ଷରେ ଇଷ୍ଟ୍ ବେଙ୍ଗଲ୍ ଆଜି ପର୍ଯ୍ୟନ୍ତ ୧୧ଟି ମ୍ୟାଚରୁ ୨ଟି ବିଜୟ, ୫ଟି ପରାଜୟ ଓ ୪ଟି ଡ୍ର’ ସହ ସମୁଦାୟ ୧୧ ପଏଣ୍ଟ ପାଇ ଟେବଲରେ କେରଳ ଠାରୁ ଗୋଟିଏ ସ୍ଥାନ ଉପରେ ଅର୍ଥାତ୍ ନବମରେ ରହିଛି।

ଗାଲ୍ ଟେଷ୍ଟ: ରୁଟଙ୍କ ରେକର୍ଡ ଦ୍ବିଶତକ, ପ୍ରଥମ ଇନିଂସରେ

ଚଳିତ ଶ୍ରୀଲଙ୍କା ବିପକ୍ଷ ଟେଷ୍ଟ୍ ସିରିଜର ପ୍ରଥମ ମ୍ୟାଚରେ ଭ୍ରମଣକାରୀ ଇଂଲଣ୍ଡ ଦଳ ପ୍ରଥମ ଇନିଂସରେ ୪୨୧ ରନ୍‌ର ବଡ଼ ସ୍କୋର୍ କରିଛି। ଦଳର ବୋଲରମାନେ ଶ୍ରୀଲଙ୍କାର ପ୍ରଥମ ଇନିଂସକୁ ମାତ୍ର ୧୩୫ ରନରେ ସୀମିତ ରଖିବା ପରେ ଇଂଲିଶ୍ ବ୍ୟାଟ୍ସମ୍ୟାନ୍‌ମାନେ ଘରୋଇ ଦଳର ବୋଲରଙ୍କ ଉଚିତ ମୁକାବିଲା କରି ୩ୟ ଦିନର ଖେଳ ଶେଷ ସୁଦ୍ଧା ଦଳର ସ୍ଥିତିକୁ ବେଶ୍ ଦୃଢ଼ କରିପାରିଛନ୍ତି। ବିଶେଷକରି ଅଧିନାୟକ ଜୋ ରୁଟ୍ ଦ୍ବିତୀୟ ଦିନର ଖେଳ ଶେଷ ବେଳକୁ ତାଙ୍କର ୧୮ତମ ଟେଷ୍ଟ୍ ଶତକ ପୂରଣ କରିସାରିଥିବା ବେଳେ ଶନିବାର ଦ୍ବିଶତକୀୟ ଇନିଂସ ଖେଳିବାରେ ସକ୍ଷମ ହୋଇଛନ୍ତି। ଶ୍ରୀଲଙ୍କା ପକ୍ଷରୁ ଦିଲରୁୱନ୍ ପରେରା ୪ଟି, ଲାସିଥ୍ ଏମ୍ବୁଲଦେନିୟା ୩ଟି ଓ ଆସିଥା ଫର୍ଣ୍ଣାଣ୍ଡୋ ୨ଟି ୱିକେଟ୍ ନେଇଛନ୍ତି। ପ୍ରଥମ ଇନିଂସ ଭିତ୍ତିରେ ୨୮୬ ରନରେ ପଛୁଆ ଥିବା ଶ୍ରୀଲଙ୍କା ୩ୟ ଦିନର ଖେଳରେ ୨ଟି ୱିକେଟ୍ ହରାଇ ୧୫୬ ରନ୍ କରିଛି। ଓପନର କୁସାଲ୍ ପରେରା ଓ ଲାହିରୁ ଥିରିମାନେ ୧୦୧ ରନ୍ ଯୋଡ଼ିବା ପରେ କୁସାଲ୍ ୫ଟି ଚୌକା ଓ ଗୋଟିଏ ଛକା ସହ ୬୨ ରନ୍ କରି ଆଉଟ୍ ହୋଇଛନ୍ତି। ଏହାଛଡ଼ା କୁସାଲ୍ ମେଣ୍ଡିସ୍ ମାତ୍ର ୧୫ ରନରେଆଉଟ୍ ହୋଇଥିବା ବେଳେ ଦିନର ଖେଳ ଶେଷ ବେଳକୁ ଥିରିମାନେଙ୍କ ସହ ନାଇଟ୍ ୱାଚମ୍ୟାନ୍ ଭାବେ ପଡ଼ିଆକୁ ଓହ୍ଲାଇଥିବା ଏମ୍ବୁଲଦେନିୟା ଶୂନରେ ଅପରାଜିତ ଅଛନ୍ତି। ଅନ୍ୟପକ୍ଷରେ ଥିରିମାନେ ୬ଟି ଚୌକା ସହ ୭୬ ରନ୍ କରି ଅପରାଜିତ ଅଛନ୍ତି। ଇଂଲଣ୍ଡ ପକ୍ଷରୁ ସାମ୍ କୁରାନ୍ ଓ ଜ୍ୟାକ୍ ଲିଚ୍ ଗୋଟିଏ ଲେଖାଏଁ ୱିକେଟ୍ ନେଇଛନ୍ତି।

ଅଷ୍ଟ୍ରେଲିଆନ୍ ଓପନ୍: କ୍ବାରେଣ୍ଟାଇନରେ ୪୭ ଖେଳାଳି, ୩

ଆସନ୍ତା ଫେବ୍ରୁଆରୀ ୮ରୁ ଆରମ୍ଭ ହେବ ଚଳିତ ସିଜନର ପ୍ରଥମ ଗ୍ରାଣ୍ଡସ୍ଲାମ୍ ଟୁର୍ଣ୍ଣାମେଣ୍ଟ୍ ଅଷ୍ଟ୍ରେଲିଆନ୍ ଓପନ୍। ଏଥିରେ ଭାଗ ନେବା ସକାଶେ ଖେଳାଳି ଓ ସପୋର୍ଟ ଷ୍ଟାଫମାନଙ୍କ ଆଗମନ ପ୍ରକ୍ରିୟା ଆରମ୍ଭ ହୋଇଥିବା ବେଳେ ଶନିବାର ଆୟୋଜକଙ୍କୁ ଜବରଦସ୍ତ ଝଟକା ଲାଗିଛି। କାରଣ ମେଲବର୍ଣ୍ଣରେ ପହଞ୍ଚିଥିବା ଖେଳାଳି ଓ ସପୋର୍ଟ ଷ୍ଟାଫଙ୍କ ମଧ୍ୟରୁ ୩ ଜଣଙ୍କ ନମୁନା କୋଭିଡ୍ ପଜିଟିଭ୍ ରହିଥିବା ଜଣାପଡ଼ିଛି। ଏହିସବୁ ଖେଳାଳି ଓ ସପୋର୍ଟ ଷ୍ଟାଫଙ୍କୁ ଲସ୍ ଏଞ୍ଜେଲ୍ସ ଓ ଅବୁ ଧାବୀରୁ ଅଣାଯାଇଥିଲା। ଅଷ୍ଟ୍ରେଲିଆନ୍ ଓପନ୍ ଆୟୋଜନ କରୁଥିବା ଟେନିସ୍ ଅଷ୍ଟ୍ରେଲିଆ (ଟିଏ) ପକ୍ଷରୁ ୧୫ଟି ଚାର୍ଟର ଫ୍ଲାଇଟର ବନ୍ଦୋବସ୍ତ କରାଯାଇଛି। ଏହି ବିମାନଗୁଡ଼ିକରେ ବିଭିନ୍ନ ଦେଶରୁ ପ୍ରାୟ ୧୨ ଶହ ଖେଳାଳି, କୋଚ୍ ଓ ଅଫିସିଆଲଙ୍କୁ ମେଲବର୍ଣ୍ଣକୁ ଅଣାଯିବାର ବନ୍ଦୋବସ୍ତ କରାଯାଇଛି। ତେବେ ଲସ୍ ଏଞ୍ଜେଲସରୁ ଆସିଥିବା ଗୋଟିଏ ବିମାନର ଜଣେ କ୍ରିଉ ମେମ୍ବରଙ୍କ ନମୁନା ପଜିଟିଭ୍ ଥିବା ଜଣାପଡ଼ିଛି। ଆହୁରି ମଧ୍ୟ ଅଷ୍ଟ୍ରେଲିଆନ୍ ଓପନ୍ ଆୟୋଜନ ପାଇଁ କାର୍ଯ୍ୟ କରୁଥିବା ଜଣେ ଷ୍ଟାଫ ମଧ୍ୟ କୋରୋନା ଭୂତାଣୁ ଦ୍ବାରା ସଂକ୍ରମିତ ହୋଇଛନ୍ତି। ସେହିପରି ଲସ୍ ଏଞ୍ଜେଲସରୁ ଆସିଥିବା ୨୪ ଜଣ ଖେଳାଳିଙ୍କୁ ମେଲବର୍ଣ୍ଣର ଏକ ହୋଟେଲ୍ ରୁମ୍ ଭିତରେ ସେଲ୍ଫ ଆଇସୋଲେସନରେ ରଖାଯାଇଥିବା ଜଣାପଡ଼ିଛି।

ବ୍ରିସବେନ୍ ଟେଷ୍ଟ: ପ୍ରଥମ ଇନିଂସରେ ଅଷ୍ଟ୍ରେଲିଆ ୩୬୯, ଜବାବର

ଚଳିତ ଭାରତ-ଅଷ୍ଟ୍ରେଲିଆ ଟେଷ୍ଟ୍ ସିରିଜର ଶେଷ ମ୍ୟାଚଟି ଶୁକ୍ରବାରଠାରୁ ଏଠାରେ ଆରମ୍ଭ ହୋଇଥିବା ବେଳେ ପ୍ରଥମ ଦିନରେ ଅଷ୍ଟ୍ରେଲିଆ ୫ ଓ୍ବିକେଟ୍ ହରାଇ ୨୭୫ ରନ୍ କରିଥିଲା। ଦ୍ବିତୀୟ ଦିନରେ ଘରୋଇ ଦଳ ତା’ର ପ୍ରଥମ ଇନିଂସରେ ୧୧୫.୨ ଓଭର୍ ଖେଳି ୩୬୯ ରନ୍ କରିଛି। ପ୍ରଥମ ଦିନରେ ମାର୍ନସ୍ ଲାବୁଶେନ୍ ଶତକ କରିବା ପରେ ଦ୍ବିତୀୟ ଦିନରେ ଅଧିନାୟକ ଟିମ୍ ପେନ୍ ଅର୍ଦ୍ଧଶତକୀୟ ଇନିଂସ ଖେଳିଛନ୍ତି। ଏହାଛଡ଼ା କାମେରନ୍ ଗ୍ରୀନ୍ ୪୭ ରନ୍ କରିଥିଲେ। ଶେଷ ଭାଗରେ ଅଷ୍ଟ୍ରେଲିଆର ନିମ୍ନକ୍ରମ ବ୍ୟାଟ୍ସମ୍ୟାନଙ୍କ ମଧ୍ୟରେ ମିଚେଲ୍ ଷ୍ଟାର୍କ ୨୦, ଶହେତମ ମ୍ୟାଚ୍ ଖେଳୁଥିବା ନାଥନ୍ ଲିଅନ୍ ୨୪ ଓ ଜୋଶ୍ ହେଜଲଉଡ୍ ୧୧ ରନ୍ କରିଥିଲେ। ଭାରତ ପକ୍ଷରୁ ଡେବ୍ୟୁଟାଣ୍ଟ୍ ପେସର୍ ଟି. ନଟରାଜନ୍, ଶାର୍ଦ୍ଦୁଲ୍ ଠାକୁର ଓ ଅନ୍ୟତମ ନବାଗତ ବୋଲର୍ ଡାହାଣହାତୀ ସ୍ପିନର୍ ୱାଶିଂଟନ୍ ସୁନ୍ଦର ୩ଟି ଲେଖାଏଁ ୱିକେଟ୍ ନେଇଥିବା ବେଳେ ଅନ୍ୟତମ ୱିକେଟଟି ମହମ୍ମଦ ସିରାଜଙ୍କୁ ମିଳିଛି। ଜବାବରେ ଦ୍ବିତୀୟ ଦିନର ଖେଳ ଶେଷ ସୁଦ୍ଧା ଭାରତ ୨୬ ଓଭରରେ ଦୁଇ ଓପନରଙ୍କ ୱିକେଟ୍ ହରାଇ ୬୨ ରନ୍ କରିଛି। ଦ୍ବିତୀୟ ଦିନର ଖେଳରେ ଚା’ପାନ ବିରତି ପରେ ବର୍ଷା କାରଣରୁ ଆଉ କୌଣସି ଖେଳ ସମ୍ଭବପର ହୋଇ ନ ଥିଲା। ତେଣୁ ଦ୍ବିତୀୟ ଦିନରେ ମାତ୍ର ୫୪.୨ ଓଭରର ଖେଳ ସମ୍ଭବପର ହୋଇପାରିଛି।

ମହିଳା ଟି-୨୦ରେ ସୋଫିଙ୍କ ନାମରେ ଦ୍ରୁତତମ ଶତକ

ୱେଲିଂଟନ୍: ନ୍ୟୁଜିଲାଣ୍ଡ ମହିଳା କ୍ରିକେଟ୍ ଟିମ୍ ଅଧିନାୟିକା ସୋଫି ଡିଭାଇନ୍ ମହିଳା ଟି-୨୦ କ୍ରିକେଟ୍‌ରେ ଦ୍ରୁତତମ ଶତକଧାରୀ ହେବାର ଗୌରବ ଲାଭ କରିଛନ୍ତି। ସେ ଗୁରୁବାର ସୁପର୍ ସ୍ମାଶ୍ ଟୁର୍ଣ୍ଣାମେଣ୍ଟ୍‌ରେ ଏହି କୀର୍ତ୍ତିମାନ ସ୍ଥାପନ କରିଛନ୍ତି। ସୋଫି ମାତ୍ର ୩୬ଟି ବଲ୍‌ରେ ଶତକ ହାସଲ କରି ୱେଣ୍ଡଇଣ୍ଡିଜର ଡିଏଣ୍ଡ୍ରା ଡଟ୍ଟିନଙ୍କୁ ପଛରେ ପକାଇ ଦେଇଛନ୍ତି। ଡଟ୍ଟିନ୍ ମାତ୍ର ୩୮ଟି ବଲରେ ଶତକ ପୂରଣ କରିଥିଲେ ୩୧ ବର୍ଷୀୟା ସୋଫି ତାଙ୍କର ଏହି ଧୂଆଁଧାର ଇନିଂସରେ ୯ଟି ଚୌକା ଓ ୮ ଛକା ସହାୟତାରେ ସମୁଦାୟ ୧୦୮ ରନ୍ କରିଥିଲେ। ଏହି ଶତକୀୟ ଇନିଂସ୍ ବଳରେ ହିଁ ୱେଲିଂଟନ୍ ବ୍ଲେଜ୍ ଓଟାଗୋ ସ୍ପାର୍କକୁ ବୃହତ୍ ୧୦ ଓ୍ୱିକେଟ୍‌ରେ ପରାସ୍ତ କରିଥିଲା। ୧୨୯ ରନ୍‌ର ବିଜୟ ଲକ୍ଷ୍ୟକୁ ୱେଲିଂଟନ୍ ବ୍ଲେଜ୍ ମାତ୍ର ୮.୪ ଓଭରରେ ହାସଲ କରିନେଇଥିଲା।

ବ୍ରିସବେନରେ ସୁନ୍ଦର ଓ ନଟରାଜନଙ୍କ ଡେବ୍ୟୁ: ଲାବୁଶେନଙ୍କ

ବ୍ରିସବେନ୍: ଚଳିତ ଭାରତ-ଅଷ୍ଟ୍ରେଲିଆ ଟେଷ୍ଟ୍ ସିରିଜର ଚୂଡ଼ାନ୍ତ ଟେଷ୍ଟ୍ ଶୁକ୍ରବାରଠାରୁ ଏଠାକାର ଗାବା ଗ୍ରାଉଣ୍ଡରେ ଆରମ୍ଭ ହୋଇଛି। ସିରିଜଟି ଅଦ୍ୟାବଧି ୧-୧ରେ ବରାବର ଥିବା ବେଳେ ୩ୟ ମ୍ୟାଚଟି ସିଡନୀଠାରେ ଡ୍ର’ ରହିଥିଲା। ଫଳରେ ଉଭୟ ଦଳ ବର୍ଡର-ଗାଭାସ୍କର ଟ୍ରଫିରେ ବାଜିମାତ୍ କରିବା ସକାଶେ ପଡ଼ିଆକୁ ଓହ୍ଲାଇଛନ୍ତି। ପ୍ରଥମ ଦିନରେ ଘରୋଇ ଦଳ ପ୍ରଥମେ ବ୍ୟାଟିଂ କରି ୫ ୱିକେଟ୍ ବିନିମୟରେ ୨୭୪ ରନ୍ କରିଛି। ପ୍ରତିପକ୍ଷ ଭାରତ ଏହି ସିରିଜ୍‌ରେ ଘରୋଇ ଦଳର ଶକ୍ତିଶାଳୀ ବୋଲିଂ ଓ ବ୍ୟାଟିଂ ଲାଇନର ମୁକାବିଲା କରିବା ବ୍ୟତୀତ ଆଘାତଜନିତ ସମସ୍ୟା ସହ ଯୁଝିଆସିଛି। ତେଣୁ ଶେଷ ଟେଷ୍ଟରେ ଦୁଇ ଜଣ ବୋଲର୍ ସ୍ପିନର୍ ୱାଶିଂଟନ୍ ସୁନ୍ଦର ଓ ପେସର୍ ଟି. ନଟରାଜନ୍ ସେମାନଙ୍କ ଟେଷ୍ଟ୍ କ୍ୟାରିୟର୍ ଆରମ୍ଭ କରିଛନ୍ତି। ପୂର୍ବ ମ୍ୟାଚରେ ଖେଳିଥିବା ହନୁମା ବିହାରୀ, ରବିଚନ୍ଦ୍ରନ୍ ଅଶ୍ବିନ୍, ରବୀନ୍ଦ୍ର ଜାଡେଜା ଓ ଜସପ୍ରୀତ୍ ବୁମରା ଅସୁସ୍ଥ ହୋଇଥିବାରୁ ସେମାନଙ୍କ ସ୍ଥାନରେ ସୁନ୍ଦର ଓ ନଟରାଜନଙ୍କ ବ୍ୟତୀତ ମୟଙ୍କ ଅଗରୱାଲ୍ ଓ ଶାର୍ଦ୍ଦୁଲ୍ ଠାକୁର ଚୂଡ଼ାନ୍ତ ଏକାଦଶରେ ସ୍ଥାନ ପାଇଛନ୍ତି। ସେହିପରି ଘରୋଇ ଦଳରେ ଓପନର ୱିଲ୍ ପୁକୋସ୍କିଙ୍କ ସ୍ଥାନରେ ମାର୍କସ୍ ହାରିସ୍ ସାମିଲ୍ ହୋଇଛନ୍ତି। ପ୍ରଥମ ଦିନରେ ମଧ୍ୟକ୍ରମ ବ୍ୟାଟ୍ସମ୍ୟାନ୍ ମାର୍ନସ୍ ଲାବୁଶେନ୍ ଶତକ କରିବା ଫଳରେ ଅଷ୍ଟ୍ରେଲିଆ ନିଜର ସ୍ଥିତିକୁ ବେଶ୍ ସୁଦୃଢ଼ କରିପାରିଛି। ସେହିପରି ଭାରତ ପକ୍ଷରୁ ନଟରାଜନ୍ ସର୍ବାଧିକ ୨ଟି ୱିକେଟ୍ ନେଇଛନ୍ତି।

ଆଣ୍ଡି ମରେ କୋରୋନା ପଜିଟିଭ୍, ଅଷ୍ଟ୍ରେଲିଆନ୍ ଓପନରୁ ବାଦ୍

ବ୍ରିଟେନ୍‌ର ଏକ ନମ୍ବର ଖେଳାଳି ତଥା ବିଶ୍ବର ଅନ୍ୟତମ ଟପ୍ ସିଡେ୍ ଟେନିସ୍ ତାରକା ଆଣ୍ଡି ମରେ ଗୁରୁବାର କୋରୋନା ପଜିଟିଭ୍ ସାବ୍ୟସ୍ତ ହୋଇଛନ୍ତି। ଫଳରେ ଆସନ୍ତା ମାସ ୮ ତାରିଖରୁ ଆରମ୍ଭ ହେଉଥିବା ବର୍ଷର ପ୍ରଥମ ଗ୍ରାଣ୍ଡସ୍ଲାମ୍ ଟୁର୍ଣ୍ଣାମେଣ୍ଟ୍ ଅଷ୍ଟ୍ରେଲିଆନ୍ ଓପନ୍‌ରୁ ବାଦ୍ ପଡ଼ିବାର ଆଶଙ୍କା ଦେଖାଦେଇଛି। ପଜିଟିଭ୍ ଭାବେ ଚିହ୍ନଟ ହେବା ପରେ ମରେ ସରେଠାରେ ସେଲ୍ଫ-ଆଇସୋଲେସନରେ ଥିବା ଜଣାପଡ଼ିଛି। ଅଷ୍ଟ୍ରେଲିଆନ୍ ଓପନରେ ଭାଗ ନେବା ସକାଶେ ମରେ ଚଳିତ ସପ୍ତାହରେ ସ୍ବତନ୍ତ୍ର ଚାର୍ଟର୍ ପ୍ଲେନ୍‌ ଯୋଗେ ମେଲବର୍ଣ୍ଣ ଅଭିମୁଖେ ଯାତ୍ରା କରିବାର ଥିଲା। କିନ୍ତୁ ବର୍ତ୍ତମାନ ତାଙ୍କୁ ସମ୍ପୂର୍ଣ୍ଣ ଭାବେ ସୁସ୍ଥତା ଲାଭ କରିବା ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ିବ। ତେବେ ନିର୍ଦ୍ଧାରିତ ସମୟ ପୂର୍ବରୁ ମରେ ସୁସ୍ଥତା ଲାଭ କରିପାରିବେ କି ନାହିଁ, ସେଥିନେଇ ଯଥେଷ୍ଟ ସଂଶୟ ରହିଥିବାରୁ ସିଜନ୍ ଆରମ୍ଭ ଟୁର୍ଣ୍ଣାମେଣ୍ଟରେ ଭାଗ ନେଇ ନ ପାରିବାର ଆଶଙ୍କା ବଢ଼ିଯାଇଛି। ଏହି ଟୁର୍ଣ୍ଣାମେଣ୍ଟଟି ସାଧାରଣତଃ ଜାନୁଆରୀ ୩ୟ ସପ୍ତାହରେ ଆରମ୍ଭ ହୋଇଥାଏ। କିନ୍ତୁ କୋରୋନା ସଂକ୍ରମଣ କାରଣରୁ ଚଳିତ ବର୍ଷ ଏହାକୁ ତିନି ସପ୍ତାହ ବିଳମ୍ବରେ ଆରମ୍ଭ କରିବାକୁ ଆୟୋଜକ ନିଷ୍ପତ୍ତି ନେଇଛନ୍ତି।

ପରାକ୍ରମୀ ପୁନିତ୍: ୧୭ ଛକା ସହ ଗେଲଙ୍କ ରେକର୍ଡର ସମକକ୍ଷ

ଚଳିତ ସୟଦ୍ ମୁସ୍ତାକ୍ ଅଲୀ ଟି-୨୦ ଲିଗ୍‌ରେ ବୁଧବାର ପରାକ୍ରମ ଦେଖାଇଛନ୍ତି ମେଘାଳୟ ଟିମ୍‌ର ଅଧିନାୟକ ପୁନିତ୍ ବିଷ୍ଟ୍। ଏହି ୩୪ ବର୍ଷୀୟ ବ୍ୟାଟ୍ସମ୍ୟାନ୍ ଜଣକ ମାତ୍ର ୫୧ ବଲରେ ୧୪୬ ରନ୍‌ର ବିଧ୍ବଂସୀ ଇନିଂସ ଖେଳି ଭାରତର ଦ୍ବିତୀୟ ସର୍ବଶ୍ରେଷ୍ଠ ଟି-୨୦ ବ୍ୟାଟ୍ସମ୍ୟାନ୍ ହୋଇଛନ୍ତି। ପୂର୍ବରୁ କେବଳ ଶ୍ରେୟସ୍ ଆୟର୍ ଟି-୨୦ କ୍ରିକେଟରେ ୧୪୭ ରନ୍ କରିଛନ୍ତି। ସେ ମଧ୍ୟ ଏହି ସ୍କୋର୍ ସୟଦ୍ ମୁସ୍ତାକ୍ ଅଲୀ ଟି-୨୦ ଟୁର୍ଣ୍ଣାମେଣ୍ଟରେ ହିଁ କରିଛନ୍ତି। ଏଥିସହ ପୁନିତ୍ ଭାରତୀୟ ବ୍ୟାଟ୍ସମ୍ୟାନଙ୍କ ମଧ୍ୟରେ ଲୋକେଶ ରାହୁଲଙ୍କୁ ଅତିକ୍ରମ କରିଛନ୍ତି। ରାହୁଲ୍ ଗତ ବର୍ଷ ୟୁଏଇରେ ଖେଳାଯାଇଥିବା ଆଇପିଏଲରେ କିଙ୍ଗସ ଏକାଦଶ ପଞ୍ଜାବ ପକ୍ଷରୁ ଖେଳୁଥିବା ବେଳେ ୧୩୨ ରନ୍ କରିଥିଲେ। କିନ୍ତୁ ପୁନିତ ତାଙ୍କର ଛକା ଓ ଚୌକାଭରା ଇନିଂସ ସହାୟତାରେ ତାଙ୍କୁ ଟପିଯାଇଛନ୍ତି। ଏହାଛଡ଼ା ୧୭ଟି ଛକା ମାରି ସେ ୟୁନିଭର୍ସାଲ୍ ବସ୍ ଭାବେ ପରିଚିତ ଟି-୨୦ କ୍ରିକେଟର ସବୁଠାରୁ ଦୁର୍ଦ୍ଧର୍ଷ ବ୍ୟାଟ୍ସମ୍ୟାନ୍ ବୋଲାଉଥିବା ୱେଷ୍ଟଇଣ୍ଡିଜର କ୍ରିସ୍ ଗେଲଙ୍କ ରେକର୍ଡ ସମକକ୍ଷ ହୋଇଛନ୍ତି। ଗେଲ୍ ଗତ ୨୦୧୩ ଆଇପିଏଲ୍ ସଂସ୍କରଣରେ ପୁଣେ ୱାରିଅର୍ସ ବିପକ୍ଷରେ ୧୭୫ ରନର ଦମଦାର ଇନିଂସ ଅବସରରେ ୧୭ଟି ଛକା ଲଗାଇଥିଲେ। ପ୍ଲେଟ୍ ଗ୍ରୁପରେ ସାମିଲ୍ ଥିବା ମେଘାଳୟ ପୁନିତଙ୍କ ଜବରଦସ୍ତ ଇନିଂସକୁ ଆଧାର କରି ୧୩୦ ରନରେ ମିଜୋରାମକୁ ପରାସ୍ତ କରିଛି।

ବ୍ରିସବେନରେ ହୋଟେଲ ସମସ୍ୟା, ବିସିସିଆଇର ହସ୍ତକ୍ଷେପ
ସାଇନା ଓ ପ୍ରଣୟଙ୍କ ରିପୋର୍ଟ ପଜିଟିଭ, ପୁଣି ନେଗେଟିଭ

ଥାଇଲ୍ୟାଣ୍ଡ ଓପନ ଖେଳିବାକୁ ଯାଇଥିବା ଭାରତୀୟ ଶଟଲର ସାଇନା ନେହ୍ବାଲ, ଏଚଏସ ପ୍ରଣୟ ଓ ପାରୁପଲ୍ଲୀ କଶ୍ୟପଙ୍କୁ ମଙ୍ଗଳବାର ହଟହଟ୍ଟା ହେବାକୁ ପଡ଼ିଛି। ସେମାନଙ୍କୁ କୋରୋନା ପଜିଟିଭ ଦର୍ଶାଇ ପ୍ରତିଯୋଗିତାରୁ ବାଦ ଦିଆଯିବାର କେଇ ଘଣ୍ଟା ପରେ ପୁଣି ରିପୋର୍ଟ ନେଗେଟିଭ ଦର୍ଶାଇ ମ୍ୟାଚ ଖେଳିବାକୁ ଅନୁମତି ଦିଆଯାଇଛି। ସାଇନା ଓ ପ୍ରଣୟଙ୍କ ମଙ୍ଗଳବାର ସନ୍ଧ୍ୟା ରିପୋର୍ଟ ନେଗେଟିଭ ହୋଇଥିବା ଟୁର୍ଣ୍ଣାମେଣ୍ଟ ଆୟୋଜକ ପ୍ରକାଶ କରିବା ସହ ବୁଧବାର ଏହି ଦୁଇ ଖେଳାଳି ସେମାନଙ୍କ ପ୍ରଥମ ରାଉଣ୍ଡ ମ୍ୟାଚ ଖେଳିବେ ବୋଲି ସ୍ପଷ୍ଟ କରାଯାଇଛି। ଏନେଇ ଆୟୋଜକଙ୍କ ପକ୍ଷରୁ ଭାରତୀୟ ଟିମ ମ୍ୟାନେଜମେଣ୍ଟକୁ ଜଣାଇ ଦିଆଯାଇଛି। ମାତ୍ର କଶ୍ୟପଙ୍କ ଦ୍ବିତୀୟ ଟେଷ୍ଟ ରିପୋର୍ଟ ଆସି ନ ଥିବାରୁ ତାଙ୍କର ଭାଗ ନେବା ନେଇ ସନ୍ଦେହ ଦେଖାଦେଇଛି।

ବ୍ରିସବେନରେ ଖେଳିବେନି ସିଡନୀ ହିରୋ ହନୁମା, ଜାଡେଜା ବି

ସିଡନୀ: ଆସନ୍ତା ୧୫ ତାରିଖରୁ ଭାରତ-ଅଷ୍ଟ୍ରେଲିଆ ସିରିଜ ନିର୍ଣ୍ଣାୟକ ମୁକାବିଲାରୁ ବାଦ ପଡ଼ିଛନ୍ତି ସିଡନୀ ମ୍ୟାଚ ହିରୋ ହନୁମା ବିହାରୀ। ଅନ୍ତିମ ଦିନ ତମାମ ପିଚରେ ରହି ଅଷ୍ଟ୍ରେଲିଆର ଶାଣିତ ବୋଲିଂକୁ ସାମ୍ନା କରି ୱିକେଟ ବଞ୍ଚାଇଥିବା ହନୁମା ମାଂସପେଶୀରେ ଯନ୍ତ୍ରଣା ଅନୁଭବ କରୁଛନ୍ତି। ଦିନ ତମାମ ବ୍ୟାଟି କରିବା ବେଳେ ସେ ୧୬୧ଟି ବଲର ସାମ୍ନା କରି ମାତ୍ର ୨୩ ରନ କରି ଭାରତକୁ ନିଶ୍ଚିତ ପରାଜୟରୁ ରକ୍ଷା କରିବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ଅନେକ କ୍ରିକେଟ ବିଶାରଦ ହନୁମାଙ୍କ ଚମତ୍କାର ଇନିଂସକୁ ତାରିଫ କରିଛନ୍ତି। ହନୁମାଙ୍କ ୨୩ ରନ କୌଣସି ଗୁଣରେ ଶତକୀୟ ଇନିଂସ ଠାରୁ ବି କମ ନୁହେଁ ବୋଲି କହିଛନ୍ତି। ବେଳେ ବେଳେ ବ୍ୟାଟ୍ସମ୍ୟାନ ଶତକ କଲେ ବି ଦଳକୁ ପରାଜୟରୁ ରକ୍ଷା କରିପାରନ୍ତି ନାହିଁ। ମାତ୍ର ହନୁମା ଯେପରି ଭାବେ ଆହତ ସତ୍ତ୍ବେ ଖେଳୁଆଡ ମନୋଭାବର ପରିଚୟ ଦେଇ ଲଢ଼େଇ କଲେ, ତାହା ତାଙ୍କ ପାଇଁ ସ୍ମରଣୀୟ ହେବାକୁ ଯାଉଛି। ସ୍ପିନର ରବିଚନ୍ଦ୍ରନ ଅଶ୍ବିନ ମଧ୍ୟ ବ୍ୟାଟିଂ ବେଳେ ଯେପରି ପ୍ରତିଜ୍ଞାବଦ୍ଧତା ଦେଖାଇଲେ ସେଥିପ୍ରତି ମଧ୍ୟ ପ୍ରଶଂସା ଅଜାଡ଼ି ହୋଇପଡ଼ିଛି।

ପୁଣି ସ୍ମିଥଙ୍କ ଅଣଖେଳୁଆଡ ମନୋଭାବ, ପନ୍ତଙ୍କ ଗାର୍ଡ ମାର୍କ

ଭାରତ-ଅଷ୍ଟ୍ରେଲିଆ ୩ୟ ଟେଷ୍ଟ ଡ୍ର’ରେ ଶେଷ ହୋଇଥିଲା ବେଳେ ଅନେକ ବିବାଦ ଛିଡ଼ା କରିଛି। ଅଷ୍ଟ୍ରେଲିଆ ଦର୍ଶକ ଭାରତୀୟ ଖେଳାଳିଙ୍କ ପ୍ରତି ଜାତିଆଣ ଆରୋପ ଲଗାଇବାକୁ ନେଇ ମାମଲା ଆଇସିସି କୋର୍ଟକୁ ଯାଇଛି। ଏହାରି ଭିତରେ ଦୁଇ ଦଳ ମଧ୍ୟରେ ଅନ୍ତିମ ଦିନର ରୋମାଞ୍ଚକର ମୁକାବିଲା ଜାରି ରହିଥିଲା ବେଳେ ଭାରତୀୟ ଦଳର ଯୁବ ୱିକେଟ କିପର ଋଷଭ ପନ୍ତ ଧୂଆଁଧାର ବ୍ୟାଟିଂ ପ୍ରଦର୍ଶନ କରି ଅଷ୍ଟ୍ରେଲିଆ ହାତରୁ ମ୍ୟାଚ ଛଡ଼ାଇ ଆଣିବାକୁ ପ୍ରଶଂସନୀୟ ଉଦ୍ୟମ କରିଥିଲେ। ନିକଟ ଅତୀତରେ କୌଣସି ଜଣେ ଭାରତୀୟ ବ୍ୟାଟ୍ସମ୍ୟାନ ବିଦେଶୀ ପିଚରେ ଏପରି ପ୍ରଦର୍ଶନ କରିବା ଉଲ୍ଲେଖନୀୟ ଘଟଣା ଥିଲା। ଏହିପରି ସ୍ଥିତିରେ ମ୍ୟାଚ ବିଜୟ ନେଇ ମାନସିକ ସ୍ତରରେ ଧରି ନେଇଥିବା ଅଷ୍ଟ୍ରେଲିଆ ଖେଳାଳି ପନ୍ତଙ୍କୁ ଆଉଟ କରି ବିପଦ ଦୂର କରିବା ପାଇଁ ସବୁ ରଣନୀତି ଆପଣାଇ ବିଫଳ ହେବା ପରେ ଅଣଖେଳୁଆଡ ଆଚରଣର ଆଶ୍ରୟ ନେଇଥିଲେ। ଆଉ ଏହାର ନେତୃତ୍ବ ନେଇଥିଲେ ଅତୀତରେ ବଲ ଟାମ୍ପରିଂ ପାଇଁ ବାସନ୍ଦ ହୋଇଥିବା ଷ୍ଟିଭ ସ୍ମିଥ।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ