ବାଦ ବିବାଦ

୧୯ ବର୍ଷ ପରେ ଗୋଧ୍ରା ଟ୍ରେନ୍ ପୋଡ଼ି ମାମଲାର ଅନ୍ୟତମ ମୁଖ୍ୟ ଅଭିଯୁକ୍ତ ଗିରଫ

ଗତ ୨୦୦୨ ମସିହାରେ ଗୁଜରାଟର ଗୋଧ୍ରା ଦଙ୍ଗାରେ ପାଖାପାଖି ୬୦ ଜଣ କରସେବକଙ୍କୁ ଟ୍ରେନ୍ ଭିତରେ ଜାଳିପୋଡ଼ି ଭସ୍ମ କରିଦିଆଯାଇଥିଲା। ଏହି ନରସଂହାର ମାମଲାରେ ଗତ ୧୯ ବର୍ଷ ମଧ୍ୟରେ ଅନେକଙ୍କୁ ଦଣ୍ଡାଦେଶ ହୋଇଥିବା ବେଳେ ଅନେକ ଅଭିଯୁକ୍ତ ମଧ୍ୟ ବିନା ପ୍ରମାଣରେ ଖସିଯାଇଛନ୍ତି। ତେବେ ମୁଖ୍ୟ ଅଭିଯୁକ୍ତ କୁହାଯାଉଥିବା ରଫିକ୍ ଭଟୁକ୍ ପାଖାପାଖି ଦୁଇ ଦଶନ୍ଧି ଧରି ପୋଲିସ୍ ଆଖିରେ ଧୂଳି ଦେଇ ଘୂରି ବୁଲୁଥିବା ବେଳେ ଶେଷରେ ପୋଲିସ୍ ପଞ୍ଝାରେ ପଡ଼ିଛି। ଗତ ଶୁକ୍ରବାର ରଫିକ୍‌ଙ୍କୁ ଗୋଧ୍ରାରୁ ହିଁ ଗିରଫ କରାଯାଇଛି। ଘଟଣାରେ ଫେରାର୍ ହେବା ପରେ ରଫିକ୍ ଦୀର୍ଘ ଦିନ ଧରି ରାଜ୍ୟ ବାହାରେ ରହିଆସିଥିଲା। ତେବେ ନିକଟରେ ସେ ଗୋଧ୍ରା ଫେରିବା ସହ ଫଳ ବେପାର କରି ଜୀବିକା ନିର୍ବାହ କରୁଥିବା ବେଳେ ଶେଷରେ ପୋଲିସ୍ ତାକୁ କାବୁ କରିଛି। ସ୍ଥାନୀୟ ପଞ୍ଚମହଲ ପୋଲିସ୍ ଓ ଗୋଧ୍ରା ଟାଉନ୍ ପୋଲିସର ଏକ ମିଳିତ ଟିମ୍ ତାଙ୍କ ସିଗ୍ନାଲ୍ ଫଲିଆ ଅଞ୍ଚଳସ୍ଥିତ ଘରେ ଚଢ଼ାଉ କରି ରଫିକଙ୍କୁ ଗିରଫ କରିଛି।

ଦିଶା ରବି ଗିରଫ ମାମଲାରେ ଦିଲ୍ଲୀ ପୋଲିସକୁ ମହିଳା କମିଶନଙ୍କ ନୋଟିସ୍

ସ୍ବିଡେନର ଯୁବ ପରିବେଶବିତ୍ ଗ୍ରେଟା ଠନବର୍ଗଙ୍କ ସହ ଜଡ଼ିତ ଟୁଲକିଟ୍ ମାମଲାରେ ଗତ ରବିବାର ଦିଲ୍ଲୀ ପୋଲିସ୍ ଦିଶା ରବି ନାମ୍ନୀ ପରିବେଶବିତଙ୍କୁ ବେଙ୍ଗାଳୁରୁରୁ ଗିରଫ କରିଥିଲା। ଉକ୍ତ ଦିନ ଅପରାହ୍ନରେ ତାଙ୍କୁ ସ୍ଥାନୀୟ ପଟିଆଲା ହାଉସ୍ କୋର୍ଟରେ ମଧ୍ୟ ହାଜର କରାଯାଇଥିଲା ଓ କୋର୍ଟ ପୋଲିସର ସ୍ପେଶାଲ୍ ସେଲର ୫ ଦିନ ପାଇଁ ରିମାଣ୍ଡ୍‌କୁ ମଧ୍ୟ ମଞ୍ଜୁରୀ ଦେଇଥିଲେ। ତେବେ ଦିଶାଙ୍କୁ ଗିରଫ କରିବା ପରେ ଏହି ପ୍ରସଙ୍ଗରେ ଦିଲ୍ଲୀ ପୋଲିସକୁ ଜାତୀୟ ମହିଳା କମିଶନ୍ (ଏନସିଡବ୍ଲ୍ୟୁ)ଙ୍କ ଆକ୍ରୋଶର ଶିକାର ହେବାକୁ ପଡ଼ିଛି। କାରଣ ଏହି ମାମଲାରେ ମଙ୍ଗଳବାର ଏନସିଡବ୍ଲ୍ୟୁ ପକ୍ଷରୁ ଦିଲ୍ଲୀ ପୋଲିସକୁ ନୋଟିସ୍ କରାଯାଇଛି। ମହିଳା କମିଶନ୍ ଦିଲ୍ଲୀ ପୋଲିସର ଡେପୁଟି କମିଶନର ଓ ସାଇବର୍ କ୍ରାଇମ୍ ସେଲକୁ ନୋଟିସ୍ କରିଛନ୍ତି। ଦିଶାଙ୍କୁ ତାଙ୍କ ବେଙ୍ଗାଲୁରୁର ସୋଲାଦେବନାହାଲି ଅଞ୍ଚଳସ୍ଥିତ ବାସଭବନରୁ ଗିରଫ କରାଯିବା ବେଳେ ଆବଶ୍ୟକ ନିୟମ ଅନୁସରଣ କରାଯାଇନାହିଁ ବୋଲି ମହିଳା କମିଶନ୍ ଅଭିଯୋଗ କରିଛନ୍ତି। ଏଥିସକାଶେ ଦିଲ୍ଲୀ ପୋଲିସ୍‌କୁ ଦିଶାଙ୍କୁ ଗିରଫ କରାଯିବା ନେଇ ଦାଖଲ ହୋଇଥିବା ମାମଲାର ଏକ କପି ଦାଖଲ କରିବାକୁ ନିର୍ଦେଶ ଦିଆଯାଇଛି।

ମହିଳାଙ୍କୁ ସଂସଦରେ ଦୁଷ୍କର୍ମ ପ୍ରସଙ୍ଗରେ କ୍ଷମା ମାଗିଲେ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ

ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ସ୍କଟ୍ ମୋରିସନ୍ ମଙ୍ଗଳବାର କ୍ଷମା ପ୍ରାର୍ଥନା କରିଛନ୍ତି। ନିକଟରେ ଜନୈକା ମହିଳା କର୍ମଚାରୀ ତାଙ୍କୁ ସଂସଦ ଭିତରେ ତାଙ୍କର ଜଣେ ସହଯୋଗୀ ଦୁଷ୍କର୍ମ କରିଥିବା ନେଇ ଅଭିଯୋଗ କରିବା ପରେ ଏହି ମାମଲାରେ ମୋରିସନ୍ କ୍ଷମା ମାଗିଛନ୍ତି। ଏଥିସହ ଦେଶରେ ମହିଳା କର୍ମଚାରୀଙ୍କ ସକାଶେ କର୍ମସଂସ୍ଥାନଗୁଡ଼ିକ କିପରି ଅଧିକ ସୁରକ୍ଷିତ ହୋଇପାରିବ, ସେନେଇ ପ୍ରଧାନମନ୍ତ୍ରୀ ପଦକ୍ଷେପ ନେବା ସହ ଉକ୍ତ ମହିଳା କର୍ମଚାରୀଙ୍କ ପ୍ରତି ହୋଇଥିବା ଦୁଷ୍କର୍ମ ମାମଲାର ସବିଶେଷ ତଦନ୍ତ ଦିଗରେ ମଧ୍ୟ ପଦକ୍ଷେପ ନେବେ ବୋଲି କହିଛନ୍ତି। ବ୍ରିଟାନି ହିଗିନ୍ସ ନାମ୍ନୀ ଉକ୍ତ ମହିଳା କର୍ମଚାରୀ ଜଣକ ତାଙ୍କ ଅଭିଯୋଗରେ ଦର୍ଶାଇଥିଲେ ଯେ ଗତ ୨୦୧୯ ମାର୍ଚ୍ଚରେ ପ୍ରତିରକ୍ଷା ମନ୍ତ୍ରୀ ଲିଣ୍ଡା ରିନୋଲ୍ଡସଙ୍କ କାର୍ଯ୍ୟାଳୟରେ ତାଙ୍କ ପ୍ରତି ଜନୈକ କର୍ମଚାରୀ ଦୁଷ୍କର୍ମ କରିଥିଲେ। ଉକ୍ତ ଅଭିଯୁକ୍ତ ଜଣକ ମୋରିସନଙ୍କ କ୍ଷମତାସୀନ ଲିବେରାଲ୍ ପାର୍ଟିର ସଦସ୍ୟ ବୋଲି ହିଗିନ୍ସ ତାଙ୍କ ଅଭିଯୋଗରେ ଦର୍ଶାଇଥିଲେ। ନିଜ ଦଳର ଜନୈକ କର୍ମଚାରୀଙ୍କ ବିରୋଧରେ ଏପରି ସଙ୍ଗୀନ ଅଭିଯୋଗ ଆସିଥିବାରୁ ମୋରିସନ୍ ଦୁଷ୍କର୍ମ ପୀଡ଼ିତା ମହିଳାଙ୍କୁ କ୍ଷମା ମାଗିଛନ୍ତି।

ପାକିସ୍ତାନରେ ମନ୍ତ୍ରୀଙ୍କ ବୟାନକୁ ନେଇ ଲୋକେ ଖପ୍ପା

ପୁଣି ଚର୍ଚ୍ଚାରେ ବିବାଦୀୟ ବୟାନ ଦେଉଥିବା ପାକିସ୍ତାନର ଗ୍‌ହମନ୍ତ୍ରୀ ଶେଖ ରସିଦ ଅହମ୍ମଦ। ଏଥର ସେ ଆନ୍ଦୋଳନରତ କର୍ମଚାରୀଙ୍କ ଉପରେ ପ୍ରୟୋଗ ହୋଇଥିବା ଲୁହବୁହା ଗ୍ୟାସ ଉପରେ ଟିପ୍ପଣୀ କରିଛନ୍ତି, ଯାହା ପୁଣି ବିବାଦର ଖୋରୋକ ଯୋଗାଇଛି। ଉଲ୍ଲେଖନୀୟ, ଦେଶରେ ଦରମା ବୃଦ୍ଧିକୁ ନେଇ କର୍ମଚାରୀମାନେ ବିରୋଧ ପ୍ରଦର୍ଶନ କରୁଥିବା ବେଳେ ସେମାନଙ୍କ ଉପରକୁ ଲୁହବୁହା ଗ୍ୟାସ ଛାଡିଥିଲା ପୋଲିସ। ଏବେ ଏହାକୁ ନେଇ ରସିଦ କହିଛନ୍ତି ବେଶ୍ କିଛିଦିନ ହେବ ଲୁହବୁହା ଗ୍ୟାସ ରଖାଯାଇଥିଲା। ସେଥିପାଇଁ ଏହାର ପରୀକ୍ଷା କରିବା ଜରୁରୀ ଥିଲା। ରାୱଲପିଣ୍ଡିରେ ଏକ କାର୍ଯ୍ୟକ୍ରମରେ ଯୋଗ ଦେଇ ରସିଦ କହିଛନ୍ତି ଯେ ଇସଲାମାବାଦ ପୋଲିସ ଅଳ୍ପ ଲୁହବୁହା ଗ୍ୟାସ ପ୍ରୟୋଗ କରିଛି ଯାହା ନିହାତି ଜରୁରୀ ଥିଲା। କାରଣ ଏହା ବେଶୀଦିନ ହେବ ପଡ଼ିରହିଥିଲା ଏହାର ବ୍ୟବହାର ହେଉ ନ ଥିଲା।

ବନ୍ଦ ବେଳେ ଅରାଜକତା: କେଉଁଠି ଭାଙ୍ଗିଲେ, କେଉଁଠି ପିଟିଲେ

ପେଟ୍ରୋଲ ଓ ଡିଜେଲ୍ ଦର ବୃଦ୍ଧି ସହିତ ବେକାରୀ ସମସ୍ୟା, ରାଜ୍ୟରେ ନାରୀ ଓ ଶିଶୁ ନିର୍ଯାତନା ବୃଦ୍ଧି, ବିଗିଡ଼ିଥିବା ଆଇନ ଶୃଙ୍ଖଳା ପରିସ୍ଥିତି ଭଳି ଏକାଧିକ ପ୍ରସଙ୍ଗ ନେଇ ବନ୍ଦ ପାଳନ କରିଛି କଂଗ୍ରେସ। ମାହାଙ୍ଗା ହତ୍ୟାକାଣ୍ଡ, କୋଟିଆରେ ଆନ୍ଧ୍ର ପ୍ରଦେଶର ନିର୍ବାଚନ ଓ ମହାନଦୀ ପ୍ରସଙ୍ଗରେ ବି ବନ୍ଦ ପାଳନ କରାଯାଇଛି। ଏହି ବନ୍ଦରୁ ଆମ୍ବୁଲାନ୍ସ, ଜରୁରୀ ସେବାରେ ନିୟୋଜିତ ଥିବା ଯାନବାହାନ, ଔଷଧ ଦୋକାନ ଓ ଅତ୍ୟାବଶ୍ୟକ ସେବାରେ ଥିବା ଗାଡ଼ିକୁ ବାଦ୍ ଦିଆଯାଇଛି। ଏପରିକି ବନ୍ଦକୁ ଶାନ୍ତିପୂର୍ଣ୍ଣ ଭାବେ ପାଳନ କରିବା ପାଇଁ ପୂର୍ବରୁ ପିସିସି ସଭାପତି ନିରଞ୍ଜନ ପଟ୍ଟନାୟକ କର୍ମୀମାନଙ୍କୁ ଅପିଲ୍‌ କରିଥିବା ବେଳେ ଆଜି ବନ୍ଦ ବେଳେ ବିଭିନ୍ନ ସ୍ଥାନରେ ଦେଖିବାକୁ ମିଳିଛି ଅରାଜକତା। କଂଗ୍ରେସକର୍ମୀମାନେ ବିଭିନ୍ନ ସ୍ଥାନରେ ଅପ୍ରିତିକର ପରିସ୍ଥିତି ସୃଷ୍ଟି କରିଛନ୍ତି। କେଉଁଠି ପୋଡ଼ାଜଳା କରିଛନ୍ତି ତ ଆଉ କେଉଁଠି ଯାତ୍ରୀଙ୍କୁ ମାଡ଼ ମଧ୍ୟ ମାରିଛନ୍ତି। ଏପରିକି ଅଫିସ୍‌ରେ ପଶି ଭଙ୍ଗାରୁଜା ମଧ୍ୟ କରିଛନ୍ତି। ରାଜଧାନୀରେ ପୋଲିସ୍‌ ସହ ଧସ୍ତାଧସ୍ତି ହୋଇଥିବା ଖବର ମଧ୍ୟ ଆସିଛି। ମହିଳା ଯାତ୍ରୀଙ୍କୁ ମଧ୍ୟ ଅସଦ୍‌ ବ୍ୟବହାର କରିଥିବା ଅଭିଯୋଗ ହୋଇଛି।

ବନ୍ଦ ପାଇଁ ସବୁ ଠପ୍‌: ରେଳରୋକ, ରାସ୍ତା ଅବରୋଧ

ପେଟ୍ରୋଲ୍‌, ଡିଜେଲ୍‌ର ଅହେତୁକ ମୂଲ୍ୟ ବୃଦ୍ଧି ଓ ଅନ୍ୟାନ୍ୟ ପ୍ରସଙ୍ଗ ନେଇ ୬ ଘଣ୍ଟିଆ ବନ୍ଦ ପାଳନ କରିଛି କଂଗ୍ରେସ। ସକାଳ ୭ଟାରୁ ଦିନ ୧ଟା ପର୍ଯ୍ୟନ୍ତ ଏହି ବନ୍ଦ ପାଳନ କରାଯାଉଛି। ବନ୍ଦର ପ୍ରଭାବ ସାରା ରାଜ୍ୟରେ ପଡ଼ିଥିବା ବେଳେ ଜୀବନଯାତ୍ରା ଠପ୍‌ ହୋଇଯାଇଛି। ବିଭିନ୍ନ ସ୍ଥାନରେ ଦୋକାନ ବଜାର ବନ୍ଦ ରହିଥିବା ବେଳେ ଗାଡ଼ି ଚଳାଚଳ ମଧ୍ୟ ବନ୍ଦ ରହିଛି। କଂଗ୍ରେସ କର୍ମୀମାନେ ବିଭିନ୍ନ ସ୍ଥାନରେ ପିକେଟିଂ କରି ଦୋକାନ ବଜାର ଓ ଗାଡ଼ି ଚଳାଚଳକୁ ବନ୍ଦ ରଖିଛନ୍ତି। ଭୁବନେଶ୍ବର, କଟକ, ପୁରୀ, ବାଲେଶ୍ବର, ସମ୍ବଲପୁର ଆଦି ସ୍ଥାନରେ କଂଗ୍ରେସ କର୍ମୀମାନେ ରାସ୍ତା ଉପରେ ଟାୟାର ଜାଳି ରାସ୍ତା ଅବରୋଧ କରିଛନ୍ତି। ଫଳରେ ରାଜରାସ୍ତାରେ ଗାଡ଼ି ଚଳାଚଳ ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଛି। ଏହାକୁ ଦୃଷ୍ଟିରେ ରଖି ଟ୍ୱିନ୍‌ସିଟିର ପ୍ରମୁଖ ଛକମାନଙ୍କରେ ବ୍ୟାପକ ପୋଲିସ୍‌ ମୁତୟନ ହୋଇଛନ୍ତି।

ନିରାମିଷାଶୀଙ୍କୁ ଆମିଷ ପରିବେଷଣ: ଷ୍ଟାର୍ଟଅପକୁ ୧୦ ହଜାର ତଣ୍ଡ

ସାମ୍ପ୍ରତିକ ସମୟରେ ଅନଲାଇନ୍‌ରେ ଖାଦ୍ୟଦ୍ରବ୍ୟ ଅର୍ଡର କରିବା ଏକ ସାଧାରଣ ଘଟଣାରେ ପରିଣତ ହୋଇଛି। ବିଶେଷକରି ଗତ ବର୍ଷ ମାର୍ଚ୍ଚରୁ ଆରମ୍ଭ ହୋଇଥିବା କୋଭିଡ୍ ସଂକ୍ରମଣ ଜନିତ ସ୍ଥିତିରେ ଅନଲାଇନ୍ କାରବାର ବହୁଗୁଣିତ ହୋଇଛି। ଏଥିରେ ଖାଦ୍ୟଦ୍ରବ୍ୟ ସହ ଜଡ଼ିତ ଷ୍ଟାର୍ଟଅପମାନେ ମଧ୍ୟ ଉଲ୍ଲେଖନୀୟ ସଫଳତା ହାସଲ କରିଛନ୍ତି। ତେବେ ବେଙ୍ଗାଲୁରୁର ଏକ ଷ୍ଟାର୍ଟଅପ୍ ସାମାନ୍ୟ ତ୍ରୁଟି ଯୋଗୁଁ ୧୦ ହଜାର ଟଙ୍କା ପର୍ଯ୍ୟନ୍ତ ତଣ୍ଡ ଗଣିବାକୁ ପଡ଼ିବ ବୋଲି ଆଦୌ ଚିନ୍ତା ବି କରି ନ ଥିଲା। କିନ୍ତୁ ଜନୈକ ୨୩ ବର୍ଷୀୟ ଯୁବକ ଉକ୍ତ ଷ୍ଟାର୍ଟଅପର ତ୍ରୁଟି ପାଇଁ ଖାଉଟି ଅଦାଲତରେ ପହଞ୍ଚିବା ଫଳରେ ଅଦାଲତ ଉକ୍ତ ଷ୍ଟାର୍ଟଅପକୁ ୧୦ ହଜାର ଟଙ୍କା ଜୋରିମାନା ଦେବାକୁ ନିର୍ଦେଶ ଦେଇଛନ୍ତି। ଏହାଛଡ଼ା ଉକ୍ତ ଖାଦ୍ୟ ପାଇଁ ଯୁବକ ଜଣକ ଖର୍ଚ୍ଚ କରିଥିବା ୨୧୦ ଟଙ୍କା ମଧ୍ୟ ଫେରସ୍ତ କରିବାକୁ ଖାଉଟି ଅଦାଲତ ନିର୍ଦେଶ ଦେଇଥିବା ଜଣାପଡ଼ିଛି। ଏପରି ଏକ ଘଟଣା ବେଙ୍ଗାଲୁରୁରେ ଗତ ୨୦୧୮ ଏପ୍ରିଲ୍ ୨୩ ତାରିଖରେ ଘଟିଥିବା ବେଳେ ଏନେଇ ନିକଟରେ ଖାଉଟି ଅଦାଲତଙ୍କ ନିର୍ଦେଶନାମା ଆସିଛି।

୫ ଦିନିଆ ପୋଲିସ ହେପାଜତରେ ଦିଶା ରବି, ବିଭିନ୍ନ ମହଲରେ ପ୍ରତିକ୍ରିୟା

ଟୁଲକିଟ ମାମଲାରେ ଦିଲ୍ଲୀ ପୋଲିସ ସାମାଜିକ କର୍ମୀ ଦିଶା ରବିକୁ ପୋଲିସ ଗିରଫ କରି କୋର୍ଟଙ୍କ ଅନୁମତି କ୍ରମେ ୫ ଦିନ ପାଇଁ ହେପାଜତକୁ ନେଇଛି। ଯୁବ ପରିବେଶବିତ ସ୍ବିଡେନର ଗ୍ରେଟା ଥନବର୍ଗ ଭାରତରେ ଚାଷୀ ଆନ୍ଦୋଳନ ନେଇ ଯେଉଁ ଟ୍ବିଟ କରିଥିଲେ ଓ ପରବର୍ତ୍ତୀ ଅବସ୍ଥାରେ ଏହାକୁ ଡିଲିଟ କରିଥିଲେ ଏହା ପଛରେ ଦିଶା ରବିଙ୍କ ଭୂମିକା ରହିଛି ବୋଲି ଦିଲ୍ଲୀ ପୋଲିସ କହିଛି। ଏହି ସମଗ୍ର ଘଟଣା ପଛରେ ଦିଶା ରବି ହିଁ ମୁଖ୍ୟ ଭୂମିକା ଗ୍ରହଣ କରିଥିଲେ ବୋଲି ଦିଲ୍ଲୀ ପୋଲିସ କୋର୍ଟ ହାଜିରା ବେଳେ କହିଛନ୍ତି। ଅନ୍ୟପକ୍ଷରେ ଦିଲ୍ଲୀ ପୋଲିସର ଅଭିଯୋଗକୁ ଖଣ୍ଡନ କରି ଦିଶା କହିଛନ୍ତି ଯେ ସେ ଥନବର୍ଗଙ୍କ ଟ୍ବିଟର ଦୁଇ ଧାଡ଼ି ଏଡିଟ କରିବା ବ୍ୟତୀତ ଆଉ କିଛି କରି ନାହାନ୍ତି। ଏହା କହିବା ବେଳେ ଦିଶା କୋର୍ଟରେ କାନ୍ଦି ପକାଇଥିବା ଦେଖିବାକୁ ମିଳିଥିଲା।

ମହାରାଷ୍ଟ୍ର ସରକାର ଓ ରାଜ୍ୟପାଳଙ୍କ ମଧ୍ୟରେ ଚାଲିଛି ଓପନ ୱାର: ସଞ୍ଜୟ ରାଉତ

ଶିବସେନା ମୁଖପାତ୍ର ସଞ୍ଜୟ ରାଉତ କହିଛନ୍ତି ଯେ ମହାରାଷ୍ଟ୍ର ସରକାର ଓ ରାଜ୍ୟପାଳଙ୍କ ମଧ୍ୟରେ ଓପନ ୱାର ଚାଲିଛି। ବିଜେପି ରାଜ୍ୟପାଳଙ୍କ ଜରିଆରେ ମହାରାଷ୍ଟ୍ର ସରକାରରେ ଅସ୍ଥିରତା ସୃଷ୍ଟି କରିବାକୁ ଚେଷ୍ଟା କରୁଛି। ରାଜ୍ୟପାଳ ରାଜ୍ୟ ମନ୍ତ୍ରିପରିଷଦର ନିର୍ଦେଶକୁ କାର୍ଯ୍ୟକାରୀ କରିବା ନେଇ ସାମ୍ବାଧାନିକ ବାଧ୍ୟବାଧକତା ରହିଛି। ମାତ୍ର ରାଜ୍ୟପାଳ ତାହାକୁ ଉଲ୍ଲଙ୍ଘନ କରି ସମ୍ବିଧାନର ଅବମାନନା କରୁଛନ୍ତି। ସେ ଆହୁରି କହିଛନ୍ତି ଯେ ରାଜ୍ୟ ସରକାରଙ୍କର ଅନେକ ନିଷ୍ପତ୍ତି ରହିଛି, ଯାହା ସାମ୍ବିଧାନିକ ବ୍ୟବସ୍ଥାରେ ରାଜ୍ୟପାଳଙ୍କ ଅନୁମୋଦନ ମିଳିବା ଦରକାର। ମାତ୍ର ମହାରାଷ୍ଟ୍ରରେ ରାଜ୍ୟପାଳ ରାଜ୍ୟ ସରକାରଙ୍କ ଅନେକ ନିଷ୍ପତ୍ତିକୁ ଅନୁମୋଦନ ନ କରି ପକାଇ ରଖୁଛନ୍ତି। ବିଜେପି ପ୍ରରୋଚନାରେ ସେ କାର୍ଯ୍ୟ କରୁଛନ୍ତି। ତାହେଲେ ଏହା କ’ଣ କୋଲ୍ଡ ୱାର କି ବୋଲି ପ୍ରଶ୍ନର ଉତ୍ତରରେ ରାଉତ କହିଛନ୍ତି ଏହା କୋଲ୍ଡ ୱାର ନୁହେଁ, ଏହା ଓପନ ୱାର।

ବାଇ-ଲ ପ୍ରତ୍ୟାହାର ଦାବିରେ କଂଗ୍ରେସର ଦସ୍ତଖତ ଅଭିଯାନ

ଏକାମ୍ରକ୍ଷେତ୍ର ପାଇଁ ଏନ୍‌ଏମ୍‌ଏ ଚିଠା ବାଇ-ଲ ପ୍ରତ୍ୟାହାର କରିବାକୁ ଜାରି ରହିଛି ପ୍ରତିବାଦ। ବିବାଦୀୟ ବାଇ-ଲ କୁ ପ୍ରତ୍ୟାହାର କରିବାକୁ ଦାବି କରିଛି କଂଗ୍ରେସ। ଶ୍ରୀମନ୍ଦିରରୁ ଯେପରି ଏନ୍ଏମ୍‌ଏ ବାଇ-ଲ ପ୍ରତ୍ୟାହାର ହେଲା ସେହିପରି ଲିଙ୍ଗରାଜ ମନ୍ଦିର, ଅନନ୍ତ ବାସୁଦେବ ମନ୍ଦିର ଓ ବ୍ରହ୍ମେଶ୍ୱର ମନ୍ଦିରକୁ ଏହି ବାଇ-ଲ କଟକଣାରୁ ମୁକ୍ତ କରାଯିବା ଦାବିରେ କଂଗ୍ରେସ ପକ୍ଷରୁ ଦସ୍ତଖତ ଅଭିଯାନ କରାଯାଇଛି। ଏକାମ୍ର କ୍ଷେତ୍ରର ସ୍ୱାର୍ଥ ଓ ସ୍ୱାଭିମାନ ପାଇଁ କଂଗ୍ରେସର ଲଢ଼େଇରେ ଜନସାଧାରଣ ସାମିଲ୍‌ ହୋଇ ଏଥିରେ ନିଜର ସ୍ୱାକ୍ଷର କରିବାକୁ ଅନୁରୋଧ କରାଯାଇଛି। କେନ୍ଦ୍ର ସରକାରଙ୍କ ଉଦ୍ଦେଶ୍ୟରେ ସ୍ୱାକ୍ଷର ସମ୍ଭଳିତ ଦାବିପତ୍ର ରାଜ୍ୟପାଳଙ୍କୁ ପ୍ରଦାନ କରାଯିବ ବୋଲି କଂଗ୍ରେସ ପକ୍ଷରୁ କୁହାଯାଇଛି। ଏହି କାର୍ଯ୍ୟକ୍ରମରେ ସୁରେଶ କୁମାର ରାଉତରାୟ, ଶିବାନନ୍ଦ ରାୟ, ରଶ୍ମି ମହାପାତ୍ର, ବିଶ୍ୱଜିତ ଦାଶ, କୁସୁମ ପ୍ରଧାନ, ସିପ୍ରା ସେନାପତି, କ୍ଷୀରୋଦ ବେହେରା, ଜୟକୃଷ୍ଣ ମଲିଆ, ମନୋରଞ୍ଜନ ବଟୁ, ସୁବତ୍ର ମହାପାତ୍ର, ରୀନା ସାହୁ, ରବିନ୍ଦ୍ର କାଣ୍ଡି, ମହମ୍ମଦ ତକୱିନ, ବରଞ୍ଚି ପତି, ବ୍ରାହ୍ମଣ ନିଯୋଗ ସଂପାଦକ ଉପସ୍ଥିତ ଥିଲେ।

‘ବାଇ-ଲ’କୁ ନେଇ ବଢୁଛି ବିବାଦ, ତେଜୁଛି ରାଜନୀତି

ଏକାମ୍ର କ୍ଷେତ୍ର ପାଇଁ କେନ୍ଦ୍ର ସରକାର ଜାରି କରିଥିବା ଚିଠା ଅଧିନିୟମ ‘ବାଇ-ଲ’କୁ ନେଇ ବଢ଼ିବାରେ ଲାଗିଛି ବିବାଦ, ଆଉ ତେଜିବାରେ ଲାଗିଛି ରାଜନୀତି। ମୁହାଁମୁହିଁ ହୋଇଛନ୍ତି ବିଜେଡି, ବିଜେପି ଓ କଂଗ୍ରେସ। ବାଇ-ଲ୍‌କୁ ନେଇ କେନ୍ଦ୍ର ସରକାରଙ୍କୁ ବିଜେଡି ଓ କଂଗ୍ରେସ ଟାର୍ଗେଟ୍‌ କରିଥିବା ବେଳେ ଏହାର ଜବାବ ରଖିଛି ବିଜେପି। ‘ବାଇ-ଲ’ ପ୍ରତ୍ୟାହର ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଟ୍ବିଟ୍‌ ପରେ ଜବାବ୍ ରଖିଥିଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ଏହାପରେ ଶନିବାର ବିଜେଡି ସାଂସଦମାନେ କେନ୍ଦ୍ରମନ୍ତ୍ରୀଙ୍କୁ ଭେଟି ‘ବାଇ-ଲ’ ପ୍ରତ୍ୟାହାର ଦାବି କରିଥିବା ବେଳେ ବିଜେପି ସାଂସଦ ଅନୁପସ୍ଥିତ ରହିବାକୁ ନେଇ ମଧ୍ୟ ବିବାଦ ଦେଖାଦେଇଛି। ଏକ ଅଣ ରାଜନୈତିକ ପ୍ରସଙ୍ଗରେ ବିଜେପିର ସହଯୋଗ ମିଳୁ ନ ଥିବା ବିଜେଡି କହିଥିବା ବେଳେ ସମୟ ଆସିଲେ ଉତ୍ତର ଦିଆଯିବ ବୋଲି ବିଜେପି କହିଛି।

ଅଲଗା ହେବେ ଟ୍ରମ୍ପ ଦମ୍ପତି! ଇନଷ୍ଟାଗ୍ରାମରୁ ପୋଷ୍ଟ ହଟାଇଲେ ମେଲାନିଆ
ସୁପ୍ରିମ୍‌କୋର୍ଟଙ୍କ ନୋଟିସ୍‌ ସତ୍ତ୍ବେ କୋଟିଆରେ ‘ଆନ୍ଧ୍ର’ ନିର୍ବାଚନ

ଓଡ଼ିଶା ଆନ୍ଧ୍ର ମଧ୍ୟରେ କୋଟିଆ ପଞ୍ଚାୟତକୁ ନେଇ ସୀମା ବିବାଦ ଏବେ ଚରମ ସ୍ଥିତିରେ ପହଞ୍ଚିଛି। ଶନିବାର କୋଟିଆରେ ପଞ୍ଚାୟତ ନିର୍ବାଚନ କରୁଛି ଆନ୍ଧ୍ର। କୋଟିଆକୁ ଓଡ଼ିଶା ସରକାର ସୁପ୍ରିମ୍‌କୋର୍ଟଙ୍କ ଦ୍ୱାରସ୍ଥ ହୋଇଥିଲେ ମଧ୍ୟ ଏହାର କୌଣସି ପ୍ରଭାବ ଆନ୍ଧ୍ର ସରକାରଙ୍କ ଉପରେ ପଡ଼ିନାହିଁ। ପଟ୍ଟାଙ୍ଗୀ ବ୍ଲକ୍‌ ଅନ୍ତର୍ଗତ କୋଟିଆ ପଞ୍ଚାୟତର ୨୮ଟି ଗ୍ରାମ ମଧ୍ୟରୁ ୨୧ଟି ଗ୍ରାମ ବିବାଦରେ ରହିଛି। ଏହି ବିବାଦ ଆନ୍ଧ୍ର ସରକାରଙ୍କ ସହ ଚାଲିଛି। ବିବାଦୀୟ ଗ୍ରାମଗୁଡ଼ିକ ମଧ୍ୟରୁ ତଳଗଞ୍ଜେଇପଦର, ଫଗୁଣସିନେରି ଓ ପଟୁସିନେରି ଆଦି ୩ ଗ୍ରାମକୁ ଆନ୍ଧ୍ର ସରକାର ପଞ୍ଚାୟତର ମାନ୍ୟତା ଦେଇ ଏବେ ସେଠାରେ ନିର୍ବାଚନ କରୁଛନ୍ତି। ଆନ୍ଧ୍ର ବିଜିୟନଗରମ ଜିଲ୍ଲା ପ୍ରଶାସନ ପଟୁସିନେରିକୁ ପଟୁଚେନୁରୁ ବୋଲି ଦର୍ଶାଇ ନିର୍ବାଚନ କରୁଛି। ଏହି ଗାଁରେ ୧୦୨୫ ଜଣ ଭୋଟର୍‌ଙ୍କ ପାଇଁ ବିଜୟନଗରମ ଜିଲ୍ଲା ପ୍ରଶାସନ ବୁଥ୍ ବ୍ୟବସ୍ଥା କରିଛି। ଏଠାରୁ ୨ ଜଣ ପ୍ରାର୍ଥୀ ମଧ୍ୟ ରହିଛନ୍ତି।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ