ବାଦ ବିବାଦ

ଖାପ୍ ପଞ୍ଚାୟତର ତାଲିବାନୀ ଫରମାନ୍: ଜିନ୍ସ ଓ ଶର୍ଟ୍ସ ପିନ୍ଧିପାରିବେନି ମହିଳା

ଉତ୍ତର ପ୍ରଦେଶର ମୁଜାଫରନଗର ଜିଲ୍ଲାରେ ଖାପ୍ ପଞ୍ଚାୟତ ତାଲିବାନୀ ଫରମାନ୍ ଜାରି କରିଛି। ଏହି ଫରମାନ୍ ଅନୁସାରେ, ଉକ୍ତ ଜିଲ୍ଲାର କୌଣସି ମହିଳା କିମ୍ବା ଯୁବତୀ ଜିନ୍ସ ଓ ଶର୍ଟ୍ସ ପିନ୍ଧିପାରିବେ ନାହିଁ। ନିଜର ଫରମାନ୍‌କୁ ସଠିକ୍ ସାବ୍ୟସ୍ତ କରିବା ସକାଶେ ଖାପ୍ ପଞ୍ଚାୟତ ପକ୍ଷରୁ କୁହାଯାଇଛି ଯେ ଜିନ୍ସ ପାଶ୍ଚାତ୍ୟ ସଂସ୍କୃତିର ଅଂଶବିଶେଷ ହୋଇଥିବା ବେଳେ ଏହା ଭାରତୀୟ ସଂସ୍କୃତିର ପରିପନ୍ଥୀ। ତେଣୁ ମହିଳାମାନେ ସବୁବେଳେ ଭାରତୀୟ ସଂସ୍କୃତି ଅନୁସରଣ କରିବା ସହ ପାରମ୍ପରିକ ଭାରତୀୟ ପୋଷାକ ପରିଧାନ କରିବା ଉଚିତ ବୋଲି ପଞ୍ଚାୟତ ପକ୍ଷରୁ କୁହାଯାଇଛି। ସେହିପରି ଏହି ରାଜପୁତ ସମ୍ପ୍ରଦାୟ ପଞ୍ଚାୟତ ପକ୍ଷରୁ କେହି ବି ଏହି ଫରମାନର ଅବଜ୍ଞା କଲେ ସେମାନଙ୍କୁ କଠୋର ଦଣ୍ଡ ବିଧାନ କରାଯିବ ଓ ଆବଶ୍ୟକ ପଡ଼ିଲେ ସେମାନେ ସମାଜରୁ ବାସନ୍ଦ ମଧ୍ୟ ହେବେ। ଗତ ମାର୍ଚ୍ଚ ୨ ତାରିଖରେ ଚରଥୱଲ୍ ଥାନା ଅଧୀନସ୍ଥ ପିପଲଶାହ ଗ୍ରାମରେ ଅନୁଷ୍ଠିତ ଖାପ୍ ପଞ୍ଚାୟତ ବୈଠକରେ ଏପରି ଫରମାନ୍ ଜାରି ପାଇଁ ନିଷ୍ପତ୍ତି ହୋଇଛି।

କେରଳରେ ସିପିଏମ ପକ୍ଷରୁ ୮୩ ଜଣିଆ ପ୍ରାର୍ଥୀ ତାଲିକା, ୪ ପିଢ଼ିକୁ ସୁଯୋଗ

କେରଳ ବିଧାନସଭା ନିର୍ବାଚନ ପାଇଁ ଶାସନ କ୍ଷମତାରେ ଥିବା ଏଲଡିଏଫ ପକ୍ଷରୁ ପ୍ରାର୍ଥୀ ଚୟନ ଜାରି ରହିଛି। ଏଲଡିଏଫର ପ୍ରମୁଖ ଅଂଶୀଦାର ସିପିଏମକୁ ୮୫ ଆସନରେ ଲଢ଼ିବା ନେଇ ଭାଗ ଛିଣ୍ଡିଥିଲା ବେଳେ ଦଳ ପକ୍ଷରୁ ୮୩ ଜଣ ପ୍ରାର୍ଥୀଙ୍କ ନାମ ଘୋଷଣା ହୋଇଛି। ଆଉ ଏହି ତାଲିକାରେ ୪ ପିଢ଼ିର ରାଜନେତାଙ୍କୁ ନିର୍ବାଚନ ଲଢ଼ିବା ନେଇ ସୁଯୋଗ ଦିଆଯାଇଛି। ବରିଷ୍ଠ ନେତା ଭାବେ ମୁଖ୍ୟମନ୍ତ୍ରୀ ପିନାରାଇ ବିଜୟନ ୭୫ ବର୍ଷ ବୟସହରେ ପୁଣି ଥରେ ନିର୍ବାଚନ ମୈଦାନରେ ଅବତୀର୍ଣ୍ଣ ହୋଇଛନ୍ତି। ସେହିପରି ୨୭ ବର୍ଷୀୟ ସଚିନ ଦେବଙ୍କୁ ମଧ୍ୟ ଦଳ ପକ୍ଷରୁ ପ୍ରାର୍ଥୀ କରାଯାଇଛି। ୧୪୦ ଆସନ ବିଶିଷ୍ଟ ବିଧାନସଭାରେ ଏଲଡିଏଫ ପୁଣି ଥରେ କ୍ଷମତାକୁ ଫେରିବ ବୋଲି ଟାଇମ୍ସ ନାଓ, ସି-ଭୋଟର ସର୍ଭେ ପକ୍ଷରୁ ପୂର୍ବାନୁମାନ କରାଯାଇଛି।

ମାର୍ଚ୍ଚ ୨୬ରେ ଭାରତ ବନ୍ଦ ଡାକରା ଦେଲା ଚାଷୀ ସଂଗଠନ

ପ୍ରଣୟନ ହୋଇଥିବା ୩ କୃଷି ଆଇନକୁ ସମ୍ପୂର୍ଣ୍ଣ ପ୍ରତ୍ୟାହାର ଦାବିରେ ଆନ୍ଦୋଳନ ଚଳାଇ ଆସିଥିବା ମିଳିତ ଚାଷୀ ସଂଗଠନ ଆସନ୍ତା ୨୬ ତାରିଖରେ ଭାରତ ବନ୍ଦ ଡାକରା ଦେଇଛି। ମାର୍ଚ୍ଚ ୨୬କୁ ଆନ୍ଦୋଳନକୁ ୪ ମାସ ପୂରଣ ହେଉଥିବାରୁ ଚାଷୀ ସଂଗଠନ ଭାରତ ବନ୍ଦ ଡାକରା ଦେଇ ଏହାକୁ ପାଳନ କରିବାକୁ ଘୋଷଣା କରିଛି। ସେହିପରି ଆସନ୍ତା ୧୫ ତାରିଖରେ ତୈଳ ଦାମ ବୃଦ୍ଧିର ପ୍ରତିବାଦ ନେଇ ଟ୍ରେଡ ୟୁନିୟନଗୁଡ଼ିକ ପକ୍ଷରୁ ଯେଉଁ ଡାକରା ଦିଆଯାଇଛି ତାହାକୁ ମଧ୍ୟ ଚାଷୀ ସଂଗଠନ ସମର୍ଥନ ଜଣାଇ ପ୍ରତିବାଦରେ ସାମିଲ ହେବ ବୋଲି କହିଛି। ନିକଟରେ ଚାଷୀ ସଂଗଠନ ପକ୍ଷରୁ ଆନ୍ଦୋଳନକୁ ୧୦୦ ଦିନ ପୂରଣ ହେବା ଅବସରରେ ଦେଶବ୍ୟାପୀ ପ୍ରତିବାଦ କରାଯାଇଥିଲା। ଏବେ ପୁଣି ଥରେ ଅନୁରୂପ ପ୍ରତିବାଦ ନେଇ ଘୋଷଣା କରିବା ଚିନ୍ତାର କାରଣ ହୋଇଛି।

ଦାବି ପୂରଣ ନ ହେବାରୁ ନୀତିକାନ୍ତି ବନ୍ଦ କଲେ ସେବାୟତ

ରାତି ପାହିଲେ ମହାଶିବରାତ୍ରି ବା ଜାଗର। କିନ୍ତୁ ଏ ବର୍ଷ ମହାମାରୀ କୋରୋନା ଭୟ ଟଳି ନଥିବାରୁ ଜାଗର ପାଇଁ କଟକଣା ଜାରି ହୋଇଛି। ତଥାପି ଜାଗର ପାଇଁ ପ୍ରମୁଖ ଶୈବପୀଠ ଚଳଚଞ୍ଚଳ ହୋଇପଡ଼ିଥିବା ବେଳେ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି। କିନ୍ତୁ ପ୍ରସିଦ୍ଧ ଲିଙ୍ଗରାଜ ମନ୍ଦିରରରେ ଦେଖିବାକୁ ମିଳିଛି ଅବ୍ୟବସ୍ଥା। ଦାବି ପୂରଣ ନେଇ ମନ୍ଦିରର ୨ ନିଯୋଗ ସେବାୟତ ଜିଦ୍‌ ଧରି ବସିଛନ୍ତି। ଫଳରେ ମହାପ୍ରଭୁ ଲିଙ୍ଗରାଜଙ୍କର ନୀତିକାନ୍ତିରେ ବିଭ୍ରାଟ ସୃଷ୍ଟି ହୋଇଛି। ଆଜି ରୋଷହୋମ ପରଠୁ ମହାପ୍ରଭୁ ଲିଙ୍ଗରାଜଙ୍କ ନୀତିକାନ୍ତି ବନ୍ଦ କରିଛନ୍ତି ସେବାୟତ। ମନ୍ଦିରର ବଡ଼ୁ ନିଯୋଗ ଓ ବ୍ରାହ୍ମଣ ନିଯୋଗର ୨ ପ୍ରମୁଖ ଦାବି ପୂରଣ ନେଇ ପ୍ରଶାସନ ତରଫରୁ କୌଣସି ଲିଖିତ ପ୍ରତିଶ୍ରୁତି ମିଳି ନ ଥିବାରୁ ଏପରି ଅସହଯୋଗ କରାଯାଇଛି।

ବ୍ରିଟେନ ରାଜପରିବାର ବିରୋଧରେ ମେଗନଙ୍କ ବିଷୋଦଗାର

ପ୍ରିନ୍ସ ହ୍ୟାରିଙ୍କୁ ବିବାହ କରି ବ୍ରିଟେନ ରାଜ ପରିବାରର ସଦସ୍ୟ ହେବା ପରେ ମେଗନ ମର୍କେଲଙ୍କୁ ବହୁ ସଂଘର୍ଷ କରିବାକୁ ପଡ଼ିଥିଲା। ଏପରିକି ଅନେକ ଥର ସେ ଆତ୍ମହତ୍ୟା କରିବାକୁ ଇଚ୍ଛା କରିଥିଲେ ବୋଲି ଆମେରିକାର ଏକ ନ୍ୟୁଜ୍‌ ଚ୍ୟାନେଲରେ ପ୍ରସାରିତ ସାକ୍ଷାତକାରରେ କହିଛନ୍ତି। ରାଜ ପରିବାରରେ ବର୍ଣ୍ଣବୈଷମ୍ୟ ଭେଦଭାବ ଥିବା ସେ ପ୍ରକାଶ କରିଛନ୍ତି। ସେ ଗର୍ଭବତୀ ଥିବାବେଳେ ତାଙ୍କ ଶିଶୁଙ୍କ ରଙ୍ଗ କିପରି ହେବ ସେ ନେଇ ପ୍ରଶ୍ନ କରାଯାଉଥିଲା। ଶୋ' ଉପସ୍ଥାପକ ଓପ୍ରା ଓ୍ବିନଫ୍ରିଙ୍କୁ ପ୍ରିନ୍ସ ହ୍ୟାରି ଓ ମେଗନ ଦେଇଥିବା ସାକ୍ଷାତକାରରେ ଅନେକ କଥା ସାମ୍‌ନାକୁ ଆସିଛି। ମେଗନ କହିଛନ୍ତି, ତାଙ୍କୁ ରାଜ ପରିବାର ବିଷୟରେ ସେତିକି ଜଣାଥିଲା ଯେତିକି ହ୍ୟାରି ତାଙ୍କୁ ଜଣାଇଥିଲେ। ଲୋକଙ୍କ ଜାଣତରେ ଏହା ପରୀମାନଙ୍କ ଦୁନିଆ। କିନ୍ତୁ ସତ ଏହାଠାରୁ ବହୁ ଦୂରରେ। ମହାରାଣୀଙ୍କୁ ବ୍ୟକ୍ତିଗତ ଭାବେ ଦେଖା କରିବାକୁ ହେଲେ ମଧ୍ୟ ଔପଚାରିକତା ମାନିବାକୁ ପଡ଼ୁଥିଲା।

ବ୍ରିଟେନ ପାର୍ଲାମେଣ୍ଟରେ ଭାରତର ଚାଷୀ ଆନ୍ଦୋଳନ ଆଲୋଚନା: ରାଷ୍ଟ୍ରଦୂତଙ୍କ ପ୍ରତିବାଦ

ବ୍ରିଟେନ ପାର୍ଲାମେଣ୍ଟରେ ଭାରତୀୟ ଚାଷୀ ଆନ୍ଦୋଳନ ସମ୍ପର୍କିତ ଆଲୋଚନାକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି ଲଣ୍ଡନରେ ଅବସ୍ଥାପିତ ଭାରତୀୟ ରାଷ୍ଟ୍ରଦୂତ। ଏପରି ଆଲୋଚନା କୌଣସି ତଥ୍ୟ ଆଧାର ଉପରେ ନଥିଲା। ଏହା ପୁଣି କୌଣସି ଏକ ଦେଶର ଆଭ୍ୟନ୍ତରୀଣ ବ୍ୟାପାର ହୋଇଥିଲା ବେଳେ ଏପରି ଆଲୋଚନା ବିଧିସମ୍ମତ ନୁହେଁ ବୋଲି ରାଷ୍ଟ୍ରଦୂତଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି। ସେହିପରି ବ୍ରିଟେନ ପାର୍ଲାମେଣ୍ଟରେ ଆଲୋଚନା ବେଳେ ଭାରତର ଚାଷୀ ଆନ୍ଦୋଳନ ସ୍ଥଳରେ ଗଣମାଧ୍ୟମକୁ କାର୍ଯ୍ୟ କରିବାକୁ ସୁଯୋଗ ଦିଆଯାଉ ନାହିଁ ବୋଲି ଯେଉଁ ଅଭିଯେରାଗ ହୋଇଛି, ତାହାକୁ ରାଷ୍ଟ୍ରଦୂତ ଖଣ୍ଡନ କରିଛନ୍ତି। ରାଷ୍ଟ୍ରଦୂତଙ୍କ କାର୍ଯ୍ୟାଳୟ ସୂତ୍ରରୁ କୁହାଯାଇଛି ଯେ ବ୍ରିଟେନ ଗଣମାଧ୍ୟମ ସମେତ ବିଶ୍ବର ସମସ୍ତ ଗଣମାଧ୍ୟମ ପ୍ରତିନିଧିଙ୍କୁ ସେଠାରେ ରିପୋର୍ଟ କରିବା ପାଇଁ ସୁଯୋଗ ଦିଆଯାଇଛି। ତେଣୁ କୌଣସି ସତ୍ୟତା ନ ଥିବା ବିଷୟକୁ ନେଇ ଅଳ୍ପ କେତେଜଣ ଲୋକ ପ୍ରତିନିଧି ଯେପରି ଭାବେ ଆଲୋଚନା କଲେ, ତାହାକୁ ଆମେ ନିନ୍ଦା କରୁଛୁ ବୋଲି ରାଷ୍ଟ୍ରଦୂତଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି।

ପଶ୍ଚିମବଙ୍ଗରେ ରାଜେନୈତିକ ହିଂସା: ବୋମା ବିସ୍ଫୋରଣରେ ୬ ବିଜେପି କର୍ମୀ ଆହତ

ପଶ୍ଚିମବଙ୍ଗର ଦକ୍ଷିଣ ୨୪ ପରଗଣାସ୍ ଜିଲ୍ଲାରେ ଶୁକ୍ରବାର ରାତିରେ ବୋମା ବିସ୍ଫୋରଣ ହେବା ଫଳରେ ୬ ଜଣ ବିଜେପି କର୍ମୀ ଆହତ ହୋଇଥିବା ଜଣାପଡ଼ିଛି। ବିଜେପି କର୍ମୀମାନେ ଏକ ବିବାହ ଭୋଜିରେ ଯୋଗ ଦେଇ ଫେରୁଥିବା ସମୟରେ ଏପରି ଅଘଟଣର ଶିକାର ହୋଇଛନ୍ତି। ଆହତମାନଙ୍କୁ ନିକଟସ୍ଥ କ୍ୟାନିଙ୍ଗ୍ ସବଡିଭିଜନ୍ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଥିବା ବେଳେ ଏହାକୁ ରାଜନୈତିକ ବିଦ୍ରୋହ ଭାବ ବୋଲି କୁହାଯାଉଛି। ଆଗକୁ ରାଜ୍ୟରେ ବିଧାନସଭା ନିର୍ବାଚନ ହେବାକୁ ଥିବା ବେଳେ ଏହି ବୋମାମାଡ଼କୁ ରାଜନୈତିକ ହିଂସାକାଣ୍ଡ ବୋଲି କୁହାଯାଉଛି। ବିଜେପି କର୍ମୀମାନେ ସେମାନଙ୍କ ଉପରକୁ ବିରୋଧୀ ଟିଏମସି କର୍ମୀମାନେ ବୋମା ନିକ୍ଷେପ କରିଥିବା ଅଭିଯୋଗ କରିଛନ୍ତି। ଏନେଇ ସ୍ଥାନୀୟ ପୋଲିସ୍ ଏକ ମାମଲା ରୁତୁ କରି ତଦନ୍ତ ଆରମ୍ଭ କରିଛି। ଅବଶ୍ୟ ନିର୍ବାଚନ ପାଖେଇଲେ, ପଶ୍ଚିମବଙ୍ଗରେ ନିୟମିତ ଭାବେ ରାଜନୈତିକ ହିଂସାକାଣ୍ଡ ଖବରକାଗଜ ପୃଷ୍ଠା ମଣ୍ଡନ କରିଆସିଛି।

ଭାରତରେ ଆଶ୍ରୟ ଲୋଡି ମିଜୋରାମରେ ୩ ମିଆଁମାର ପୋଲିସ
ଆନ୍ଦୋଳନ ବେଳେ ମିଆଁମାର ସୁରକ୍ଷାକର୍ମୀଙ୍କ ଗୁଳିରେ ୧୭ ମୃତ

ମିଆଁମାରର ଗଣତାନ୍ତ୍ରିକ ସରକାରକୁ ବରଖାସ୍ତ କରି ଦେଶର ଶାସନ କ୍ଷମତା ଦାୟିତ୍ବ ସେନା ନିଜକୁ ହାତକୁ ନେଇଥିବା ବେଳେ ଏହା ବିରୋଧରେ ଦେଶବାସୀ ଆନ୍ଦୋଳନକୁ ଓହ୍ଲାଇଛନ୍ତି। ଏହି ଆନ୍ଦୋଳନକାରୀମାନଙ୍କ ମଧ୍ୟରୁ ୧୭ ଜଣ ମିଆଁମାର ସେନା ଗୁଳିରେ ମୃତ୍ୟୁବରଣ କରିଥିବା ଜଣାପଡ଼ିଛି। ଏମାନଙ୍କ ମଧ୍ୟରୁ ୨ ଜଣ ଦେଶର ଦ୍ବିତୀୟ ସର୍ବବୃହତ୍ ସହର ମାଣ୍ଡାଲେଠାରେ ନିହତ ହୋଇଥିବା ବେଳେ ୮ ଜଣ ୟାଙ୍ଗୁନ ସହରରେ ପୋଲିସ୍ ଗୁଳିରେ ନିହତ ହୋଇଛନ୍ତି। ସେହିପରି ମୋନିୱା ଗେଜେଟ୍‌ରେ ପ୍ରକାଶିତ ରିପୋର୍ଟ ଅନୁସାରେ ୟାଙ୍ଗୁନରେ ପୋଲିସ୍ ଗୁଳିରେ ମୋନିୱାରେ ୬ ଜଣ ଆନ୍ଦୋଳନକାରୀଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ମିନଗ୍ୟାନ୍ ସହରରେ ନିହତ ହୋଇଥିବା ଆନ୍ଦୋଳନକାରୀଙ୍କ ମଧ୍ୟରେ ସାମିଲ୍ ଥିବା ଜଣେ ୨୫ ବର୍ଷୀୟ ଛାତ୍ର ମୋଏ ମିଣ୍ଟ୍ ହିନ୍ ସୂଚନା ଦେଇଛନ୍ତି। ସେ କହିଛନ୍ତି ଯେ ପୋଲିସ୍ ଆମ ଉପରକୁ ଗୁଳି ଚଳାଇଥିଲା। ଏହି ଗୁଳିରେ ଜଣେ ଯୁବକ ପ୍ରାଣ ହରାଇଛନ୍ତି। ତାଙ୍କ ମୁଣ୍ଡରେ ପୋଲିସ୍ ଗୁଳି ବାଜିବାରୁ ସେ ଘଟଣାସ୍ଥଳରେ ହିଁ ଟଳିପଡ଼ିଥିଲେ ବୋଲି ହିନ୍ କହିଛନ୍ତି। ହିନଙ୍କ ଗୋଡ଼ରେ ମଧ୍ୟ ଗୁଳି ବାଜିଥିବା ସେ ଟେଲିଫୋନ୍ ଯୋଗେ ସୂଚନା ଦେଇଛନ୍ତି।

ଆଇଏସ୍ଏଫ୍ ସହ ମେଣ୍ଟ ନେଇ ଅଧୀର-ଆନନ୍ଦ ମୁହାଁମୁହିଁ

ପଶ୍ଚିମବଙ୍ଗରେ ଆଗାମୀ ବିଧାନସଭା ନିର୍ବାଚନ ସକାଶେ ଇଣ୍ଡିଆନ୍ ସିକ୍ୟୁଲାର ଫୋର୍ସ (ଆଇଏସ୍ଏଫ୍) ସହ କଂଗ୍ରେସ ମେଣ୍ଟ କରିବା ନିଷ୍ପତ୍ତି ନେଇ ଦଳର ଦୁଇ ଜଣ ବରିଷ୍ଠ ନେତା ମୁହାଁମୁହିଁ ହୋଇଛନ୍ତି। ଦଳର ଏପରି ମେଣ୍ଟ ଉପରେ ପ୍ରଶ୍ନ ଉଠାଇଛନ୍ତି ଦଳର ବରିଷ୍ଠ ନେତା ତଥା ପୂର୍ବତନ କେନ୍ଦ୍ର ମନ୍ତ୍ରୀ ଆନନ୍ଦ ଶର୍ମା। ସେ କହିଛନ୍ତି ଯେ ଏହା କଂଗ୍ରେସର ମୂଳ ବିଚାର ଧାରାର ପରିପନ୍ଥୀ। ତେବେ ଶର୍ମାଙ୍କ ଏଭଳି ମନ୍ତବ୍ୟରେ ପ୍ରତିକ୍ରିୟା ପ୍ରକାଶ କରି କଂଗ୍ରେସ ସାଂସଦ ତଥା ପଶ୍ଚିମବଙ୍ଗ ପିସିସି ମୁଖ୍ୟ ଅଧୀର ରଞ୍ଜନ ଚୌଧୁରୀ ସେ କହିଛନ୍ତି ଯେ ଶର୍ମା ବିଜେପିର ସାମ୍ପ୍ରଦାୟିକତାବାଦୀ ଭାଷା କହୁଛନ୍ତି। ଦଳର ହାଇକମାଣ୍ଡଙ୍କ ସହମତିରେ ସମସ୍ତ ନିଷ୍ପତ୍ତି ନିଆଯାଇଆସିଥିବା ବେଳେ ଏ କ୍ଷେତ୍ରରେ ମଧ୍ୟ ତାହା ଅନୁସରଣ କରାଯାଇଛି ବୋଲି ଚୌଧୁରୀ କହିଛନ୍ତି।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ