ଅପରାଧ

ବାଟଲା ହାଉସ୍ ଏନକାଉଣ୍ଟର ମାମଲାରେ ଅରିଜ ଖାନ୍ ଦୋଷୀ ସାବ୍ୟସ୍ତ

ବହୁଚର୍ଚ୍ଚିତ ବାଟଲା ହାଉସ୍ ଏନକାଉଣ୍ଟର ମାମଲାରେ ଦିଲ୍ଲୀ ପୋଲିସର ସ୍ବତନ୍ତ୍ର ସେଲ୍ ଇନସ୍ପେକ୍ଟର ମୋହନ ଚାନ୍ଦ ଶର୍ମାଙ୍କ ହତ୍ୟା ଘଟଣାରେ ସମ୍ପୃକ୍ତ ଅଭିଯୁକ୍ତ ଅରିଜ ଖାନଙ୍କୁ ସୋମବାର ଦିଲ୍ଲୀର ଏକ ଅଦାଲତ ଦୋଷୀ ସାବ୍ୟସ୍ତ କରିଛନ୍ତି। ଗତ ୨୦୦୮ ସେପ୍ଟେମ୍ବରରେ ଘଟିଥିବା ଏହି ଏନକାଉଣ୍ଟର ସମୟରେ ଅରିଜ୍ ହତ୍ୟାକାଣ୍ଡ ଘଟାଇ ଘଟଣାସ୍ଥଳରୁ ଫେରାର୍ ହୋଇଯାଇଥିଲେ। ପରେ ତାଙ୍କୁ ଗତ ୨୦୧୮ ଫେବୃଆରୀରେ ନେପାଳରୁ ଗିରଫ କରାଯାଇଥିଲା। ଦିଲ୍ଲୀର ଅତିରିକ୍ତ ସେସନ୍ସ ଜଜ୍ ସନ୍ଦୀପ ଯାଦବ ଅରିଜଙ୍କୁ ଦୋଷୀ ସାବ୍ୟସ୍ତ କରି ପରବର୍ତ୍ତୀ ଶୁଣାଣି ସମୟରେ ସେ ଓ ତାଙ୍କ ପରିବାରର ଆର୍ଥିକ ସ୍ଥିତି ସମ୍ପର୍କରେ କୋର୍ଟଙ୍କୁ ଅବଗତ କରାଇବାକୁ ତଦନ୍ତକାରୀ ଅଧିକାରୀଙ୍କୁ ନିର୍ଦେଶ ଦେଇଛନ୍ତି। ଅରିଜଙ୍କ ସମ୍ପନ୍ନିର ସୂଚନା ମିଳିବା ପରେ ତାଙ୍କ ଠାରୁ କେତେ ପରିମାଣରେ ଜରିମାନା ଆଦାୟ କରାଯିବ, ସେ ନେଇ କୋର୍ଟ ନିଷ୍ପତ୍ତି ନେବେ।

କାଳ ରାତିର କଳା କାହାଣୀ କହିଲା ବିବନ
ମୁକ୍ତ ହେବାର ୨୪ ଘଣ୍ଟା ଭିତରେ ପୁଣି ମୀରୱେଜ୍ ନଜରବନ୍ଦୀ

ହୁରିୟତ୍ କନଫରେନ୍ସ (ଏମ୍) ଅଧ୍ୟକ୍ଷ ମୀରୱେଜ୍ ଉମର୍ ଫାରୁକ୍ ପାଖାପାଖି ୨୦ ମାସ ଧରି ତାଙ୍କ ବାସଭବନରେ ନଜରବନ୍ଦୀ ରହିଥିଲେ। ଗତ ଗୁରୁବାର ତାଙ୍କ ଉପରୁ ଏହି ନଜରବନ୍ଦୀ କଟକଣା ହଟିଥିଲା। କିନ୍ତୁ ନଜରବନ୍ଦୀରୁ ମୁକ୍ତ ହେବାର ଦିନକ ପରେ ଅର୍ଥାତ୍ ଶୁକ୍ରବାର ପୁଣିଥରେ ମୀରୱେଜ୍‌ଙ୍କୁ ନଜରବନ୍ଦୀ ରଖାଯାଇଛି ବୋଲି ହୁରିୟତ୍ ପକ୍ଷରୁ ଦାବି କରାଯାଇଛି। ଗତ ୨୦୧୯ ଅଗଷ୍ଟରେ କେନ୍ଦ୍ର ସରକାର ସମ୍ବିଧାନରୁ ଧାରା ୩୭୦ ଉଚ୍ଛେଦ ପରିପ୍ରେକ୍ଷୀରେ ଜମ୍ମୁ-କଶ୍ମୀରର ପ୍ରମୁଖ ନେତାମାନଙ୍କୁ ନଜରବନ୍ଦୀ ରଖିଥିଲେ। ସେମାନଙ୍କ ମଧ୍ୟରେ ମୀରୱେଜ୍ କଶ୍ମୀର ଉପତ୍ୟକାର ପ୍ରଥମ ମୌଲବୀ ଭାବେ ନଜରବନ୍ଦୀ ରହିଥିଲେ। ତେବେ ଗତ ଗୁରୁବାର ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପାଇଥିଲା ଯେ ଏବେ ମୀରୱେଜ୍ ତାଙ୍କ ଇଚ୍ଛାନୁସାରେ ବାସଭବନରୁ ବାହାରିପାରିବେ। କାରଣ ତାଙ୍କ ଉପରୁ ନଜରବନ୍ଦୀ କଟକଣା ହଟାଇ ଦିଆଯାଇଛି ବୋଲି ବିଭିନ୍ନ ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଥିଲା। କିନ୍ତୁ ଶୁକ୍ରବାର ଭୋର୍ ସମୟରେ ସ୍ଥାନୀୟ ପୋଲିସ୍ ଅଧିକାରୀ ମୀରୱେଜଙ୍କ ବାସଭବନରେ ପହଞ୍ଚି ତାଙ୍କୁ ପୁଣିଥରେ ନଜରବନ୍ଦୀ କଟକଣା ମଧ୍ୟରେ ରହିବାକୁ ପଡ଼ିବ ବୋଲି କହିଥିଲେ। ଏପରିକି ସେ ଶୁକ୍ରବାର ପ୍ରାର୍ଥନା ସକାଶେ ଜାମା ମସଜିଦ୍‌କୁ ଯାଇପାରିବେ ନାହିଁ ବୋଲି ପୋଲିସ୍ ଅଧିକାରୀମାନେ କହିଥିଲେ ବୋଲି ଅଲ୍ ପାର୍ଟିଜ୍ ହୁରିୟତ୍ କନଫରେନ୍ସ (ଏପିଏଚସି) ପକ୍ଷରୁ ଜାରି ଏକ ବିବୃତିରେ କୁହାଯାଇଛି।

ଚୀନ୍ ଓ ଦକ୍ଷିଣ ଆଫ୍ରିକାରୁ ନକଲି କୋଭିଡ୍ ଟିକା ଜବତ, ୪ ଗିରଫ

ଅନ୍ତର୍ଜାତୀୟ ପୋଲିସ୍ ସଂଗଠନ ଇଣ୍ଟରପୋଲ୍ ପକ୍ଷରୁ ଦକ୍ଷିଣ ଆଫ୍ରିକା ଓ ଚୀନରେ ଜାଲ୍ କୋଭିଡ୍ ଟିକା ଜବତ କରାଯାଇଥିବା ସୂଚନା ଦିଆଯାଇଛି। ଏହି ମାମଲାରେ ମଧ୍ୟ ୩ ଜଣଙ୍କୁ ଗିରଫ କରାଯାଇଛି। ସେମାନଙ୍କ ମଧ୍ୟରେ ୩ ଜଣ ଚୀନୀ ନାଗରିକ ରହିଥିବା ବେଳେ ଅନ୍ୟ ଜଣେ ଜାମ୍ବିଆ ନାଗରିକ ବୋଲି ଜଣାପଡ଼ିଛି। ତେବେ ଏହା ଚୀନ୍ ଓ ଦକ୍ଷିଣ ଆଫ୍ରିକାରେ ଚାଲିଥିବା କୋଭିଡ୍ ଟିକାର ନକଲ୍ ପ୍ରସ୍ତୁତି କ୍ଷେତ୍ରରେ ଏକ ଛୋଟ ଉଦାହରଣ ବୋଲି ଇଣ୍ଟରପୋଲ୍ ଆଶଙ୍କା ବ୍ୟକ୍ତ କରିଛି। ଆଗାମୀ ଦିନରେ ବଡ଼ ଧରଣର ରାକେଟ୍ ଏହି ମାମଲାରେ ସାମ୍ନାକୁ ଆସିପାରେ ବୋଲି ମଧ୍ୟ ଇଣ୍ଟରପୋଲ୍ ମହାସଚିବ ଜର୍ଗେନ୍ ଷ୍ଟୋକ୍ ଆଶଙ୍କା ପ୍ରକାଶ କରିଛନ୍ତି। ଇଣ୍ଟରପୋଲ୍ ପକ୍ଷରୁ ଦିଆଯାଇଥିବା ସୂଚନାନୁସାରେ, ଦକ୍ଷିଣ ଆଫ୍ରିକାର ପ୍ରମୁଖ ସହର ଜୋହାନ୍ସବର୍ଗ ଉପକଣ୍ଠସ୍ଥ ଜର୍ମିଷ୍ଟୋନ୍‌ସ୍ଥିତ ଏକ ୱେୟାରହାଉସ୍‌ରୁ ପାଖାପାଖି ୪୦୦ ଶିଶି ଅର୍ଥାତ୍ ୨୪୦୦ ଡୋଜ୍ ନକଲି କୋଭିଡ୍ ଟିକା ଜବତ କରାଯାଇଛି। ସେଠାରୁ ମଧ୍ୟ କେତେକ ନକଲି ମାସ୍କ ଜବତ କରାଯାଇଥିବା ସୂଚନା ଦିଆଯାଇଛି। ସେହିପରି ତଦନ୍ତ ସମୟରେ ଚୀନ୍‌ରେ ନକଲି ଟିକାର ବ୍ୟବସାୟ କରାଯାଉଥିବା ଖବର ମିଳିବା ପରେ ସେଠାକାର ପୋଲିସ୍ ଏପରି ଏକ ନେଟୱର୍କକୁ ଠାବ କରିଥିବା ମଧ୍ୟ ଜଣାପଡ଼ିଛି।

ଅଲୀଗଡ଼ରେ ହାଥରସ ଘଟଣାର ପୁନରାବୃତ୍ତି: ୧୨ ଅଟକ

ଉତ୍ତର ପ୍ରଦେଶ ଅଲୀଗଡ଼ରେ ହାଥରସ୍ ଘଟଣାର ପୁନରାବୃତ୍ତି ଘଟିଛି। ଜଣେ ୧୭ ବର୍ଷୀୟା ଦଳିତ ନାବାଳିକାକୁ ଦୁଷ୍କର୍ମ ପରେ ବୀଭତ୍ସ ଭାବେ ହତ୍ୟା କରାଯାଇଛି। ପୋଲିସ ସନ୍ଦେହରେ ୧୨ ଜଣଙ୍କୁ ଅଟକ ରଖି ପଚରାଉଚରା ଆରମ୍ଭ କରିଛି। ଗତ ରବିବାର ରାତିରେ ନାବାଳିକା ଜଣଙ୍କର ଅର୍ଦ୍ଧ ଉଲଗ୍ନ କ୍ଷତବିକ୍ଷତ ମୃତଦେହ ଏକ ଗହମ ବିଲରୁ ଉଦ୍ଧାର ହେବା ପରେ ପରିପାର୍ଶିକ ଅବସ୍ଥାରେ ଏହା ଏକ ଗଣଦୁଷ୍କର୍ମ ହୋଇଥାଇପାରେ ବୋଲି ଆଶଙ୍କା ପ୍ରକାଶ ପାଇଛି। ପୋଲିସ ତ୍ବରିତ ପଦକ୍ଷେପ ସ୍ବରୂପ ଦୁଷ୍କର୍ମ ଓ ହତ୍ୟା ମାମଲା ସହ ପକ୍ସୋ ଆକ୍ଟ ଲଗାଇ ତଦନ୍ତ ଆରମ୍ଭ କରିଛି। କାଳେ ଏହା ହାଥରସ ଘଟଣା ପରି ରାଜନୈତିକ ରୂପ ନେବ ତାହା ଉପରେ ସ୍ଥାନୀୟ ପ୍ରଶାସନ ନଜର ରଖିଛି। ଆଲିଗଡ଼ ଏସଏସପିଙ୍କ କହିବା ଅନୁସାରେ ପୋଷ୍ଟମର୍ଟମ ରିପୋର୍ଟରୁ ସ୍ପଷ୍ଟ ହୋଇଛି ଯେ ଦଳିତ ନାବାଳିକାଙ୍କର ତଣ୍ଟି ଚିପି ହତ୍ୟା କରାଯାଇଛି।

କନିଷ୍ଠ ଯନ୍ତ୍ରୀଙ୍କ ଘରେ ଭିଜିଲାନ୍ସ ଚଢ଼ାଉ

ଆୟ ବହିର୍ଭୁତ ସମ୍ପତ୍ତି ଠୁଳ ଅଭିଯୋଗରେ କନିଷ୍ଠ ଯନ୍ତ୍ରୀଙ୍କ ଘରେ ଚଢ଼ାଉ କରିଛି ଭିଜିଲାନ୍ସ। ଗଜପତି ଜିଲ୍ଲା ରାୟଗଡ଼ ବ୍ଲକ୍‌ରେ କାର୍ଯ୍ୟରତ କନିଷ୍ଠ ଯନ୍ତ୍ରୀ କେ. ନାଗେଶ୍ବର ସେନାପତିଙ୍କ ଘରେ ମଙ୍ଗଳବାର ସକାଳେ ଭିଜିଲାନ୍ସ ପକ୍ଷରୁ ଚଢ଼ାଉ କରାଯାଇଥିବା ସୂଚନା ମିଳିଛି। ପାରଳାଖେମୁଣ୍ଡି ଓ ବ୍ରହ୍ମପୁର ଭିଜିଲାନ୍ସ ଟିମ୍‌ ପୃଥକ୍‌ ପୃଥକ୍‌ ୬ଟି ସ୍ଥାନରେ ଚଢ଼ାଉ କରିଥିବା ଜଣାପଡ଼ିଛି। ଜଗନ୍ନାଥ ବିହାର ଲେନ୍ ୩ରେ ଥିବା ନାଗେଶ୍ବରଙ୍କ ବାସଭବନ ସମେତ ବ୍ରହ୍ମପୁରସ୍ଥିତ ତାଙ୍କ ଶାଳକଙ୍କ ଘର, ଆସିକାସ୍ଥିତ ପୈତୃକ ବାସଭବନ, ରାୟଗଡ଼ା ଅଫିସ୍‌ ଓ ଛଅ ମାଇଲଠାରେ ପାର୍ଟନରସିପରେ ଚାଲିଥିବା ଇଟା ଫ୍ୟାକ୍ଟ୍ରି ଉପରେ ଚଢ଼ାଉ କରିଛି ଭିଜିଲାନ୍ସ। ଚଢ଼ାଉ ଜାରି ରହିଥିବାରୁ ଆୟ ବହିର୍ଭୂତ ସମ୍ପତ୍ତିର ଆକଳନ କରାଯାଇ ପାରିନାହିଁ।

ଅଞ୍ଜନା ମିଶ୍ର ଗଣଦୁଷ୍କର୍ମ ମାମଲାର ପରିସମାପ୍ତି କଲେ ହାଇକୋର୍ଟ
ମେଡିକାଲ୍‌ କଲେଜରେ ନାମ ଲେଖାଇବା କହି ଠକିନେଲେ ୧୩.୨ ଲକ୍ଷ

ଚାକିରି କରାଇ ଦେବା ଓ ମେଡିକାଲ୍‌ ସିଟ୍‌ରେ ନାମ ଲେଖାଇ ଦେବା ଭଳି ଠକ ଏବେ ରାଜଧାନୀରେ ସକ୍ରିୟ। ଗତ କିଛି ମାସ ମଧ୍ୟରେ ଏକାଧିକ ଘଟଣାରୁ ଏହା ସ୍ପଷ୍ଟ ହୋଇଛି। ଚଳିତ ମାସରେ ରାଜଧାନୀରେ ଚାକିରି, ମେଡିକାଲ୍‌ କଲେଜରେ ନାମ ଲେଖାଇବା ଭଳି ୩ଟି ରାକେଟ୍‌ ସମ୍ପର୍କରେ ଅଭିଯୋଗ ହୋଇଛି। ଦୁଇ ସପ୍ତାହ ତଳେ ଏମ୍‌କେସିଜିରେ ନାମ ଲେଖାଇ ଦେବା କହି ଜଣଙ୍କଠାରୁ ୧୫ ଲକ୍ଷ ଟଙ୍କା ଠକେଇ ଅଭିଯୋଗ ହୋଇଥିଲା। ଏହି ଘଟଣାରେ ନୂଆପଲ୍ଲୀ ଥାନା ପୋଲିସ ୱେବ୍‌ପୋର୍ଟାଲ୍‌ର ସ୍ବତନ୍ତ୍ର ପ୍ରତିନିଧି ଭାବେ କାର୍ଯ୍ୟ କରୁଥିବା ଜଣେ ଯୁବକକୁ ଗିରଫ କରି କୋର୍ଟ ଚାଲାଣ କରିଥିଲା। ସେହିପରି ଗତ ସପ୍ତାହରେ ରେଳବାଇ ଏବଂ ପୋଲିସରେ ଚାକରି କରାଇଦେବା ଲାଗି ଏକ ରାକେଟ୍‌ ଚଳାଉଥିବା ସରୋଜ କୁମାର ଜେନା ନାମକ ଜଣେ ଯୁବକକୁ ଧଉଳି ଥାନା ପୋଲିସ ଗିରଫ କରିଥିଲା। ଏବେ ସରୋଜକୁ ହେପାଜତରେ ଆଣି ପଚରାଉଚରା ଚଳାଇଛି। ସରୋଜ ତାହାର ବାନ୍ଧବୀ ସହିତ ମିଶି ଦୀର୍ଘ ଦିନ ହେବ ଏହି ରାକେଟ୍‌ ଚଳାଇଥିବା ପୋଲିସ ତଦନ୍ତ ବେଳେ ଜାଣିବାକୁ ପାଇଛି। ରାଜଧାନୀରେ ଆଉ ଏକ ମେଡିକାଲ୍‌ ସିଟ୍‌ ନାମ ଲେଖା ରାକେଟ୍‌ ଘଟଣା ପଦାକୁ ଆସିଛି। ଭୁବନେଶ୍ବରରେ ଥିବା ଏକ ଘରୋଇ ମେଡିକାଲ୍‌ କ‌େ‌ଲଜରେ ନାମ ଲେଖାଇ ଦେବା ଲାଗି କହି ଏହି ରାକେଟ୍‌ ଜଣେ ବ୍ୟକ୍ତିଙ୍କଠାରୁ ୧୩ ଲକ୍ଷ ୨୦ ହଜାର ଟଙ୍କା ଠକି ନେଇଥିବା ନେଇ ସହିଦନଗର ଥାନାରେ ଅଭିଯୋଗ ହୋଇଛି। ବୌଦ୍ଧ ଜିଲାର ବୁଦ୍ଧଦେବ ସିଂହ ନାମକ ବ୍ୟକ୍ତିଙ୍କର ପୁଅକୁ ମେଡିକାଲ୍‌ ସିଟ୍‌ରେ ନାମ ଲେଖାଇ ଦେବା ଲାଗି ପ୍ରଲୋଭିତ କରି ଏହି ୫ ଜଣିଆ ରାକେଟ୍‌ ୧୩.୨ ଲକ୍ଷ ଟଙ୍କା ପର୍ଯ୍ୟାୟକ୍ରମେ ଠକେଇ ନେଇଥିବା ସେ ଅଭିଯୋଗ କରିଛନ୍ତି।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ