ଅପରାଧ

ବାଟଲା ହାଉସ୍ ଏନକାଉଣ୍ଟର ମାମଲାରେ ଅରିଜ ଖାନକୁ ମୃତ୍ୟୁ ଦଣ୍ଡାଦେଶ

ବହୁଚର୍ଚ୍ଚିତ ବାଟଲା ହାଉସ୍ ଏନକାଉଣ୍ଟର ମାମଲାରେ ଦିଲ୍ଲୀର ସାକେତ କୋର୍ଟ ସୋମବାର ଚୂଡାନ୍ତ ରାୟ ଶୁଣାଇଛନ୍ତି। ଏହି ଘଟଣାରେ ପୂର୍ବରୁ ଦୋଷୀ ସାବ୍ୟସ୍ତ ହୋଇଥିବା ଭାରତୀୟ ମୁଜାହିଦ୍ଦିନର ଆତଙ୍କୀ ଅରିଜ୍ ଖାନକୁ ମୃତ୍ୟୁ ଦଣ୍ଡାଦେଶ ଦିଆଯାଇଛି। ଏଥିସହ ତା’ ଉପରେ ୧୧ ଲକ୍ଷ ଟଙ୍କାର ଜରିମାନା ମଧ୍ୟ କଷିଛନ୍ତି ଆଡିସନାଲ୍ ସେସନ୍ସ ଜଜ୍ ସନ୍ଦୀପ ଯାଦବ। ଗତ ୨୦୦୮ ସେପ୍ଟେମ୍ବର ୧୯ ତାରିଖରେ ଦିଲ୍ଲୀର ଜାମିୟା ନଗରରେ ଏହି ଘଟଣା ଘଟିଥିଲା। ପୋଲିସ ଇନସ୍ପେକ୍ଟର ମୋହନ ଚାନ୍ଦ ଶର୍ମାଙ୍କୁ ହତ୍ୟା କରାଯାଇଥିଲା। ଏଥିରେ ସମ୍ପୃକ୍ତ ଅରିଜ୍ ଖାନକୁ ମୃତ୍ୟୁଦଣ୍ଡ ଦେବା ସକାଶେ ଦାବି କରିବା ସହ ଏହା କେବଳ ଏକ ହତ୍ୟାକାଣ୍ଡ ନୁହେଁ, ଜଣେ ଆଇନ ପ୍ରବର୍ତ୍ତନକାରୀ ଅଧିକାରୀଙ୍କ ହତ୍ୟା ଘଟଣା ହୋଇଥିବାରୁ ଦୋଷୀଙ୍କ ପ୍ରତି କଠୋର ଦଣ୍ଡବିଧାନ କରାଯିବାକୁ ମଧ୍ୟ ପୋଲିସ୍ ପକ୍ଷରୁ ଦାବି କରାଯାଇଥିଲା।

ଜଙ୍ଗଲରେ ନିଆଁ ଲଗାଇ ବାପ-ପୁଅ ଗିରଫ

ଓଡ଼ିଶାର ବିଭିନ୍ନ ଜଙ୍ଗଲରେ ବିଭିନ୍ନ ସ୍ଥାନରେ ଲାଗିଥିବା ଜଙ୍ଗଲ ନିଆଁ ସରକାର ସମେତ ସ୍ଥାନୀୟ ଅଧିବାସୀଙ୍କୁ ଆକ୍ତାମାକ୍ତା କରି ସାରିଲାଣି। ଜଙ୍ଗଲରେ ଲାଗିଥିବା ନିଆଁକୁ ଲିଭାଇବା ପାଇଁ ସରକାର ବିଭିନ୍ନ ପଦକ୍ଷେପମାନ ଗ୍ରହଣ କରୁଥିବା ବେଳେ ସଚେତନତା ସୃଷ୍ଟି କରାଯାଉଛି। ଲୋକମାନଙ୍କୁ ନିଆଁ ନ ଲଗାଇବା ପାଇଁ ଅନୁରୋଧ କରାଯାଉଛି। ଏହାସତ୍ତ୍ବେ କେତେକ ଲୋକେ ନିଜର ସ୍ବାର୍ଥ ପାଇଁ ପ୍ରକୃତିକୁ ବିପଦ ମୁହଁକୁ ଠେଲି ଦେଉଛନ୍ତି। ବନ୍ୟଜନ୍ତୁ ଶିକାର ଓ କାଠ କୋଇଲା ସଂଗ୍ରହ ପାଇଁ ଜଙ୍ଗଲ ନିଆଁ ଲଗାଉଥିଛନ୍ତି। ଏହି କ୍ରମରେ ବୌଦ୍ଧ ଜିଲ୍ଲା ମାଧପୁର ରେଞ୍ଜ ମୁଣ୍ଡେଶ୍ବର ସଂରକ୍ଷିତ ଜଙ୍ଗଲରେ ନିଆଁ ଲଗାଇବା ଅଭିଯୋଗାରେ ବାପ-ପୁଅଙ୍କୁ ଗିରଫ କରିଛି ବନ ବିଭାଗ। ସେମାନଙ୍କଠାରୁ ବନ ବିଭାଗ ଗୋଟିଏ ଦିଆସିଲ୍‌ ଓ ୨ଟି ଟାଙ୍ଗିଆ ଜବତ କରିଛି।

ଜର୍ଜ ଫ୍ଲଏଡଙ୍କ ପରିବାରକୁ ୨୭ ନିୟୁତ ଡଲାର୍ କ୍ଷତିପୂରଣ ଦେବେ ମିନିଆପୋଲିସ୍ ସରକାର

ଗତ ବର୍ଷ ମେ’ରେ ଆମେରିକାର ମିନିଆପୋଲିସ୍ ସହରରେ ୪୬ ବର୍ଷୀୟ ଅଣଶ୍ବେତାଙ୍ଗ ଜର୍ଜ ଫ୍ଲଏଡଙ୍କର ପୋଲିସ୍ ନିର୍ଯାତନା କାରଣରୁ ମୃତ୍ୟୁ ହୋଇଥିଲା। ଜଣେ ଶ୍ବେତାଙ୍ଗ ପୋଲିସ୍ ଜର୍ଜଙ୍କ ବେକକୁ ଚାପି ଧରିବା ଫଳରେ ସେ ଅଣନିଃଶ୍ବାସୀ ହୋଇ ମୃତ୍ୟୁବରଣ କରିଥିଲେ। ଏହି ଘଟଣାରେ ଆମେରିକାବାସୀ ଏତେ ମାତ୍ରାରେ ପ୍ରତିକ୍ରିୟାଶୀଳ ହୋଇଉଠିଥିଲେ ଯେ ସମଗ୍ର ଦେଶରେ ଅଶାନ୍ତିର ବହ୍ନି ଜଳିଉଠିଥିଲା। ବିଦେଶରେ ଏହି ଆନ୍ଦୋଳନକୁ ବ୍ୟାପକ ସମର୍ଥନ ମିଳିଥିଲା। ଅଣଶ୍ବେତାଙ୍ଗମାନେ ଏବେ ବି ଶ୍ବେତାଙ୍ଗମାନଙ୍କଠାରୁ ନିର୍ଯାତନା ପାଉଛନ୍ତି, ଏପରି ଏକ ଧାରଣା କ୍ରମଶଃ ବଦ୍ଧମୂଳ ହୋଇଥିଲା। ତେବେ ଏହି ମାମଲାରେ ଫ୍ଲଏଡଙ୍କ ପରିବାର ପକ୍ଷରୁ ଏକ ମାମଲା ଦାଏର କରାଯାଇଥିଲା। ଏହି ମାମଲାକୁ ରଫାଦଫା କରିବା ସକାଶେ ମିନିଆପୋଲିସ୍ ସରକାର ୨୭ ନିୟୁତ ଡଲାରର ଆର୍ଥିକ କ୍ଷତିପୂରଣ ଦେବା ସକାଶେ ରାଜି ହୋଇଛନ୍ତି। ଫ୍ଲଏଡ୍ ପରିବାର ପକ୍ଷରୁ ମାମଲା ପରିଚାଳନା କରୁଥିବା ବେଞ୍ଜାମିନ୍ କ୍ରମ୍ପ୍ କହିଛନ୍ତି ଯେ ଏହି ମାମଲାର ବିଚାର ପୂର୍ବରୁ ଆଉଟ୍ ଅଫ୍ କୋର୍ଟ ସେଟଲମେଣ୍ଟ୍ ସକାଶେ ଏପରି ଏକ ଚୁକ୍ତିନାମା କରାଯାଇଛି। ଏହା ଆମେରିକା ଇତିହାସରେ ସବୁଠାରୁ ବଡ଼ ଘଟଣା ବୋଲି କ୍ରମ୍ପ୍ କହିଛନ୍ତି।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ