ଅପରାଧ

ଇନ୍ସପେକ୍ଟରଙ୍କ ୯ଏମ୍ଏମ୍ ପିସ୍ତଲ ଛଡ଼ାଇ ଗୁଳି କରିଥିଲା ଦୁବେ: ଆଇଜିପି

ବୁଧବାର ପୂର୍ବାହ୍ନରେ ଉଜ୍ଜୟିନୀର ମହାକାଳ ମନ୍ଦିର ନିକଟରୁ ଗିରଫ ହୋଇଥିବା କୁଖ୍ୟାତ ଗ୍ୟାଙ୍ଗଷ୍ଟର୍ ବିକାଶ ଦୁବେ ଶୁକ୍ରବାର ଭୋର୍ ସମୟରେ ସେଠାରୁ କାନପୁର ଆସୁଥିବା ବେଳେ ଏନକାଉଣ୍ଟରରେ ନିହତ ହୋଇଛି। ତେବେ ଏହି ଗ୍ୟାଙ୍ଗଷ୍ଟରର ଏନକାଉଣ୍ଟର୍ ଉପରେ ନାନାଦି ପ୍ରଶ୍ନବାଚୀ ସୃଷ୍ଟି ହୋଇଥିଲେ ହେଁ କାନପୁର ପୋଲିସ୍ ଆଇଜି ମୋହିତ ଅଗରୱାଲ୍ ଦେଇଥିବା ସୂଚନାନୁସାରେ, ଗତ ସପ୍ତାହରେ ୮ ଜଣ ପୋଲିସ୍ କର୍ମଚାରୀଙ୍କ ଜୀବନ ନେଇଥିବା ଗ୍ୟାଙ୍ଗଷ୍ଟର୍ ଶୁକ୍ରବାର ସକାଳ ପ୍ରାୟ ସାଢ଼େ ୭ଟା ବେଳେ କାନପୁରର ବାରା ନିକଟରେ ପୋଲିସ୍ ଗାଡ଼ିଟି ଓଲଟିପଡ଼ିବା ପରେ ଦୁବେ ଏହାର ଫାଇଦା ଉଠାଇବାକୁ ଉଦ୍ୟମ କରିଥିଲା। ସେ ଏସଟିଏଫର ଜଣେ ଇନ୍ସପେକ୍ଟର ରମାକାନ୍ତ ପଚୌରିଙ୍କଠାରୁ ୯ଏମ୍ଏମ୍ ପିସ୍ତଲ ଛଡ଼ାଇ ନେଇ ଗୁଳି ଚଳାଇଥିଲା। ତେବେ ପୋଲିସ୍ ପକ୍ଷରୁ ପାଲଟା ଗୁଳି ଚାଳନାରେ ଦୁବେ ଗୁରୁତର ଭାବେ ଆହତ ହୋଇଥିଲା। ତା’ର ଗୋଡ଼ ଓ ଛାତିରେ ଗୁଳି ବାଜିଥିଲା। ତାକୁ ତୁରନ୍ତ ହାଲେତ୍ ହସ୍ପିଟାଲରେ ଭର୍ତ୍ତି କରାଯାଇଥିଲେ ହେଁ ସେଠାରେ ଡାକ୍ତର ତାକୁ ମୃତ ଘୋଷଣା କରିଥିଲେ ବୋଲି ଆଇଜିପି ଅଗରୱାଲ୍ କହିଛନ୍ତି।

ଏନ୍‌କାଉଣ୍ଟରରେ ଦୁର୍ଦ୍ଦାନ୍ତ ଗ୍ୟାଙ୍ଗଷ୍ଟର ବିକାଶ ଦୁବେ ନିହତ, ଖସିଯିବାକୁ କରୁଥିଲା ଉଦ୍ୟମ
ୟେସ୍ ବ୍ୟାଙ୍କ୍ ଦୁର୍ନୀତି ମାମଲା: ୨୫୦୦ କୋଟି ଟଙ୍କାର ସମ୍ପତ୍ତି ଆଟାଚ୍ କଲା ଇଡି

ବହୁଚର୍ଚ୍ଚିତ ୟେସ୍ ବ୍ୟାଙ୍କ୍ ଦୁର୍ନୀତି ମାମଲାରେ ଗୁରୁବାର ପ୍ରବର୍ତ୍ତନ ନିର୍ଦେଶାଳୟ ୨୫ ଶହ କୋଟି ଟଙ୍କାର ସମ୍ପତ୍ତି ଆଟାଚ୍ କରିଛି। ଏହା ୟେସ୍ ବ୍ୟାଙ୍କ୍ ଦୁର୍ନୀତି ମାମଲାରେ ତିନି ମୁଖ୍ୟ ଅଭିଯୁକ୍ତ ବ୍ୟାଙ୍କ୍‌ର ପ୍ରତିଷ୍ଠାତା ସଦସ୍ୟ ରାଣା କପୁର ଓ ଦିଓ୍ୱାନ୍ ହାଉସିଂ ଫାଇନାନ୍ସ ଲିମିଟେଡ୍ (ଡିଏଚ୍ଏଫ୍ଏଲ୍) ପ୍ରମୋଟର୍ କପିଲ ଓ ଧୀରଜ୍ ଓ୍ୱଧାଓ୍ୱନ୍‌ଙ୍କ ସମ୍ପତ୍ତି ବୋଲି ଜଣାପଡ଼ିଛି। ଏହା ମଧ୍ୟରେ ମୁମ୍ବାଇ, ଦିଲ୍ଲୀ, ଲଣ୍ଡନ ଓ ନ୍ୟୁୟର୍କରେ ରାଣା କପୁର ଓ ତାଙ୍କ ପରିବାର ସଦସ୍ୟଙ୍କ ନାମରେ ଥିବା ୧୧ ଶହ କୋଟି ଟଙ୍କାର ସମ୍ପତ୍ତି ରହିଛି। ସେହିପରି ଏହି ଅର୍ଥନୈତିକ ଅନିୟମିତତା ମାମଲାର ତଦନ୍ତକାରୀ ସଂସ୍ଥା ଓ୍ୱଧାଓ୍ୱନ୍ ଭ୍ରାତାଙ୍କ ମୁମ୍ବାଇ, ଅଷ୍ଟ୍ରେଲିଆ, ଲଣ୍ଡନ ଓ ପୁଣେଠାରେ ଥିବା ୧୪୧୨ କୋଟି ଟଙ୍କା ମୂଲ୍ୟର ସମ୍ପତ୍ତିକୁ ମଧ୍ୟ ଆଟାଚ୍ କରିଛି।

୮ ପୋଲିସ୍ କର୍ମଚାରୀଙ୍କ ଶବକୁ କୂଅରେ ପକାଇଥିଲା ଦୁବେ, ଇସାରାରେ ନାଚୁଥିଲା ପୋଲିସ୍

ପାଖାପାଖି ସପ୍ତାହେ ଧରି ଉତ୍ତର ପ୍ରଦେଶ ପୋଲିସ୍ ତଲାସୀ ଅଭିଯାନ ଚଳାଇଥିବା ବେଳେ ଶେଷରେ ଗୁରୁବାର ମଧ୍ୟପ୍ରଦେଶ ପୋଲିସ୍‌କୁ ସଫଳତା ମିଳିଛି। କୁଖ୍ୟାତ ଗ୍ୟାଙ୍ଗଷ୍ଟର୍ ବିକାଶ ଦୁବେକୁ ଉଜ୍ଜୟିନୀର ମହାକାଳ ମନ୍ଦିରରେ ଗୁରୁବାର ପୂର୍ବାହ୍ନରେ ଗିରଫ କରାଯାଇଛି। ତେବେ ଉଜ୍ଜୟିନୀ ପୋଲିସ୍ ଦୁବେକୁ ପଚରାଉଚରା କରିଥିବା ବେଳେ ସେ ଅନେକ ତଥ୍ୟ ଦେଇଛି। ବିଶେଷକରି ଗତ ସପ୍ତାହରେ ବିକ୍ରୁ ଗ୍ରାମରେ ଚଢ଼ାଉ କରିବାକୁ ଯାଉଥିବା ବେଳେ କାନପୁର ପୋଲିସ୍‌ର ୮ ଜଣ କର୍ମଚାରୀଙ୍କୁ ଦୁବେର ସହଯୋଗୀମାନେ ହତ୍ୟା କରିଥିବା ବେଳେ ସେମାନଙ୍କ ଶବକୁ ଘର ନିକଟସ୍ଥ ଏକ କୂଅ ଭିତରେ ପକାଇ ଦେଇଥିବା ସ୍ବୀକାର କରିଛି। ତେବେ ପ୍ରମାଣ ନଷ୍ଟ କରିବା ସକାଶେ ସେ ଉକ୍ତ ଶବଗୁଡ଼ିକୁ ନିଆଁ ଲଗାଇ ପୋଡ଼ିଦେବାକୁ ଚାହୁଁଥିଲା କିନ୍ତୁ ସମୟ ଅଭାବରୁ ସେ ଏହା କରିପାରି ନ ଥିଲା, ବରଂ ନିଜକୁ ପୋଲିସଠାରୁ ଦୂରେଇ ରଖିବା ସକାଶେ ଦୁବେକୁ ଏଠିସେଠି ବୁଲିବାକୁ ପଡ଼ିଥିଲା ବୋଲି ୬୦ଟି ମାମଲାରେ ଓ୍ୱାଣ୍ଟେ୍‌ଡ୍ ଥିବା ଦୁବେ ପଚରାଉଚରା ବେଳେ କହିଥିବା ଜଣାପଡ଼ିଛି।

ନିଜାମୁଦ୍ଦିନ୍ ମର୍କଜ ମାମଲାରେ ୬୦ ମାଲେସୀୟଙ୍କୁ ଜାମିନ୍

ଗତ ମାର୍ଚ୍ଚରେ ଦକ୍ଷିଣ ଦିଲ୍ଲୀର ନିଜାମୁଦ୍ଦିନ୍‌ ମରକଜରେ ଆୟୋଜିତ ଧର୍ମସଭାରେ ମାଲେସିଆ ପରି ଏକାଧିକ ବିଦେଶୀ ମୁସଲିମ୍ ଧର୍ମାବଲମ୍ବୀ ଯୋଗଦେଇଥିଲେ। ଏହି ମରକଜ ଆୟୋଜନ କାରଣରୁ ଦେଶରେ କୋରୋନା ସଂକ୍ରମିତଙ୍କ ସଂଖ୍ୟା ଉଦ୍‌ବେଗଜନକ ଭାବେ ବଢ଼ିଥିବା ଅଭିଯୋଗ ହୋଇଥିଲା। କଟକଣା ସତ୍ତ୍ବେ ଧର୍ମସଭା ଆୟୋଜନ କରିଥିବାରୁ ମରକଜ୍ ମୁଖ୍ୟ ମୌଲାନା ସାଦ୍‌ଙ୍କ ବିରୋଧରେ ଦେଶଦ୍ରୋହ ମାମଲା ମଧ୍ୟ ରୁଜୁ କରାଯାଇଛି। ତେବେ ଏହି ମରକଜରେ ଯୋଗଦେଇଥିବା ମାଲେସୀୟମାନଙ୍କ ବିରୋଧରେ ଭିସା ଓ ସରକାରୀ ନିୟମ ଉଲ୍ଲଙ୍ଘନ ନେଇ ମାମଲା ରୁଜୁ ହୋଇଥିବା ବେଳେ ଗୁରୁବାର ୬୦ ଜଣ ମାଲେସୀୟଙ୍କୁ ଦିଲ୍ଲୀ ହାଇକୋର୍ଟ ପକ୍ଷରୁ ଜାମିନ୍ ପ୍ରଦାନ କରାଯାଇଛି। ତେବେ ଏହି ଜାମିନ୍ ପାଇଁ ଜଣପିଛା ମାତ୍ର ୭ ହଜାର ଟଙ୍କା ଲେଖାଏଁ ପଇଠ କରିବାକୁ କୁହାଯାଇଥିବା ଜଣାପଡ଼ିଛି।

ଏମପି ପୋଲିସକୁ ଚୌହାନଙ୍କ ଶୁଭେଚ୍ଛା, ଶଶୁରଘର ଆସି ଫସିଲା ଦୁବେ

ଗତ ସପ୍ତାହରେ କାନପୁରର ବିକ୍ରୁ ଗ୍ରାମରେ ସ୍ଥାନୀୟ ପୋଲିସ୍ ଚଢ଼ାଉ କରିବାକୁ ଯାଉଥିବା ବେଳେ କୁଖ୍ୟାତ ଅପରାଧୀ ବିକାଶ ଦୁବେ ଓ ତା’ର ସହଯୋଗୀମାନେ ୮ ଜଣ ପୋଲିସ୍ କର୍ମଚାରୀଙ୍କୁ ହତ୍ୟା କରିଥିଲେ। ଏହି ଘଟଣାରେ ବ୍ୟାପକ ପଦକ୍ଷେପ ନିଆଯିବା ସହ ଉତ୍ତର ପ୍ରଦେଶ ପୋଲିସ୍ ପକ୍ଷରୁ ଦୁବେ ଗିରଫଦାରୀ ପାଇଁ ୨ ଶହ ପୋଲିସ୍ କର୍ମଚାରୀଙ୍କୁ ନିୟୋଜିତ କରାଯାଇଥିଲା। ୨୦ଟି ଟିମ୍ ଦୁବେକୁ ଠାବ କରିବା ସକାଶେ ଦିନରାତି ଏକ କରିଦେଇଥିଲେ। ଶେଷରେ ଗୁରୁବାର ଏହି ୬୦ଟି ଅପରାଧର ମୋଷ୍ଟ୍ ଓ୍ବାଣ୍ଟେଡ୍‌କୁ ମଧ୍ୟ ପ୍ରଦେଶ ପୋଲିସ୍ ଗିରଫ କରିଛି। ସେ ଉଜ୍ଜୟିନୀର ମହାକାଳ ମନ୍ଦିରରେ ଦର୍ଶନ ପାଇଁ ଯାଉଥିବା ବେଳେ ସୁରକ୍ଷାକର୍ମୀଙ୍କ ନିକଟରେ ନିଜର ପରିଚୟ ଦେଇଥିଲା। ତେବେ ଏପରି ଜଣେ କୁଖ୍ୟାତ ଗ୍ୟାଙ୍ଗଷ୍ଟରକୁ ଗିରଫ କରିବାରେ ସକ୍ଷମ ହୋଇଥିବାରୁ ମଧ୍ୟ ପ୍ରଦେଶ ପୋଲିସକୁ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ୍ ଶୁଭେଚ୍ଛା ଜଣାଇଛନ୍ତି। ଏନେଇ ଟ୍ବିଟ୍ କରି ଚୌହାନ୍ କହିଛନ୍ତି ଯେ ମଧ୍ୟ ପ୍ରଦେଶ ପୋଲିସ୍ ପ୍ରଶଂସନୀ କାର୍ଯ୍ୟ କରିଛି, ଏଥିପାଇଁ ସେମାନେ ଧନ୍ୟବାଦର ପାତ୍ର। ଉତ୍ତର ପ୍ରଦେଶ କର୍ତ୍ତ୍‌ପକ୍ଷ ଓ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସହ ମୁଁ ନିରନ୍ତର ସମ୍ପର୍କରେ ରହିଛି। ଅଧିକ ତଦନ୍ତ ପାଇଁ ଖୁବ୍ ଶୀଘ୍ର ଦୁବେକୁ ଉତ୍ତର ପ୍ରଦେଶ ପୋଲିସକୁ ହସ୍ତାନ୍ତର କରାଯିବ ଏବଂ ତଦନ୍ତରେ ଉଭୟ ରାଜ୍ୟର ପୋଲିସ୍ ମିଳିତ ଭାବେ କାର୍ଯ୍ୟ କରିବେ ବୋଲି ଚୌହାନ୍ କହିଛନ୍ତି।

ପୋଲିସ୍ ପଞ୍ଝାରେ ଦୁବେ: ଗିରଫଦାରୀ ପୂର୍ବରୁ ହାଇ ଡ୍ରାମା, ଦୁଇ ସହଯୋଗୀଙ୍କ ଏନକାଉଣ୍ଟର୍

ପାଖାପାଖି ସପ୍ତାହେ ଧରି ପୋଲିସକୁ ଚକମା ଦେଇ ଘୂରି ବୁଲୁଥିବା କୁଖ୍ୟାତ ଗ୍ୟାଙ୍ଗଷ୍ଟର୍ ବିକାଶ ଦୁବେ ଶେଷରେ ଧରାପଡ଼ିଛି। ମଧ୍ୟପ୍ରଦେଶର ଉଜ୍ଜୟିନୀସ୍ଥିତ ମହାକାଳ ମନ୍ଦିରରୁ ସ୍ଥାନୀୟ ପୋଲିସ୍ ଏହି ଗ୍ୟାଙ୍ଗଷ୍ଟରକୁ ଗିରଫ କରିବାରେ ସକ୍ଷମ ହୋଇଛି। ତେବେ ୮ ଜଣ ପୋଲିସ୍ କର୍ମଚାରୀଙ୍କୁ ହତ୍ୟା କରି ୬୦ଟି ମାମଲାରେ ଫେରାର୍ ଥିବା ଏହି ଅପରାଧୀ ଜଣକ ଗିରଫ ହେବା ପୂର୍ବରୁ ଯାବତୀୟ ହାଇଡ୍ରାମା ଦେଖିବାକୁ ମିଳିଛି। ଏପରିକି ପୂର୍ବରୁ ଗିରଫ ହୋଇଥିବା ତା’ର ଦୁଇ ସାଥୀ ପୋଲିସ୍ କବଳରୁ ଖସିଯିବାକୁ ଉଦ୍ୟମ କରିବା ବେଳେ ଏନକାଉଣ୍ଟରରେ ନିହତ ହୋଇଥିବା ଜଣାପଡ଼ିଛି। ଗିରଫ ବେଳେ ଦୁବେ କରିଥିବା ହାଇଡ୍ରାମା ପୋଲିସ୍ ସହ ସ୍ଥାନୀୟ ଜନସାଧାରଣଙ୍କ ପାଇଁ ଚର୍ଚ୍ଚାର ବିଷୟ ହୋଇଛି। ‘ମୁଁ ବିକାଶ ଦୁବେ, କାନପୁର ନିବାସୀ’ ବୋଲି ଦୁବେ ବାରମ୍ବାର ଉଚ୍ଚାରଣ କରିବା ସହ ପୋଲିସ୍ ଏନକାଉଣ୍ଟର୍ ଏଡ଼ାଇବା ସକାଶେ ଏପରି ହାଇଡ୍ରାମା କରିଥିବା ଚର୍ଚ୍ଚା ହେଉଛି। ମଧ୍ୟ ପ୍ରଦେଶ ପୋଲିସ୍ ଦୁବେକୁ ଗିରଫ କରିଥିବା ବେଳେ କୋର୍ଟରେ ହାଜର କରିବା ପରେ ଉତ୍ତର ପ୍ରଦେଶ ପୋଲିସକୁ ହସ୍ତାନ୍ତର କରିବ। ମଧ୍ୟପ୍ରଦେଶ ଗ୍‌ହ ମନ୍ତ୍ରୀ ନରୋତ୍ତମ ମିଶ୍ରା ଏହି ଗିରଫଦାରୀର ପୁଷ୍ଟି କରିଛନ୍ତି।

ଜମ୍ମୁ-କଶ୍ମୀରରେ ବିଜେପି ନେତାଙ୍କୁ ହତ୍ୟା ଘଟଣା: ଲସ୍କର୍ ଆତଙ୍କୀ ସାମିଲ

ଜମ୍ମୁ-କଶ୍ମୀରରେ ଜଣେ ବିଜେପି ନେତାଙ୍କୁ ଗୁଳି କରି ଆତଙ୍କୀମାନେ ହତ୍ୟା କରିଥିବା ବେଳେ ଏହା ପଛରେ ଲସ୍କର-ଏ-ତୋଇବା ସଂଗଠନର ହାତ ରହିଛି ବୋଲି ସ୍ଥାନୀୟ ପୋଲିସ୍ ଜାଣିବାକୁ ପାଇଛି। ବିଜେପି ନେତା ଶେଖ୍ ୱାସୀମ୍ ବାରି ଓ ତାଙ୍କ ପରିବାରର ଦୁଇ ଜଣ ସଦସ୍ୟଙ୍କୁ ଆତଙ୍କୀମାନେ ଗୁଳି କରି ହତ୍ୟା କରିବାର କେଇ ଘଣ୍ଟା ପରେ ପୋଲିସ୍ ସିସିଟିଭିରୁ ଗୁରୁତ୍ବପୂର୍ଣ୍ଣ ପ୍ରମାଣ ହାସଲ କରିଛି। ବାରି, ତାଙ୍କ ଭାଇ ଉମର୍ ସୁଲତାନ୍ ଓ ପିତା ବଶୀର ଅହମଦ ଶେଖଙ୍କୁ ହତ୍ୟା କରାଯିବାର କେଇ ମିନିଟ୍ ପୂର୍ବରୁ ଉକ୍ତ ସ୍ଥାନରେ ଜଣେ ଆତଙ୍କୀ ଚଳପ୍ରଚଳ କରୁଥିବାର ଚିତ୍ର ଉକ୍ତ ସିସିଟିଭି ଫୁଟେଜରେ ରହିଛି। ଉକ୍ତ ଆତଙ୍କୀର ମୁଣ୍ଡରେ ଚୁଟି ନ ଥିବା ବେଳେ ସେ ବେଶ୍ ନିର୍ଦ୍ବନ୍ଦ୍ବରେ ଉକ୍ତ ସ୍ଥାନ ଚଲାବୁଲା କରୁଥିବା ଦେଖିବାକୁ ମିଳିଛି। ଏହି ଘଟଣାରେ ସମୁଦାୟ ଦୁଇ ଜଣ ଆତଙ୍କୀ ସାମିଲ୍ ଥିବା ବେଳେ ସେମାନଙ୍କ ମଧ୍ୟରୁ ଜଣେ ପାକିସ୍ତାନୀ ଓ ଅନ୍ୟ ଜଣେ ସ୍ଥାନୀୟ ଆତଙ୍କୀ ବୋଲି ପୋଲିସ୍ ଜାଣିବାକୁ ପାଇଛି। ଏହାଛଡ଼ା ସିସିଟିଭି ଫୁଟେଜ୍ ଆଧାରରେ ଏହି ଆତଙ୍କୀମାନଙ୍କୁ ଠାବ କରିବା ସକାଶେ ବ୍ୟାପକ ଖାନତଲାସୀ ଜାରି କରାଯାଇଥିବା ଜଣାପଡ଼ିଛି।

କାନପୁର ଏନକାଉଣ୍ଟର୍ ମାମଲା: ଦୁଇ ପୋଲିସ୍ ଅଧିକାରୀ ଗିରଫ, ଦିଲ୍ଲୀ ପୋଲିସ୍ ଆଲର୍ଟ

୬୦ଟି ମାମଲାରେ ଅଭିଯୁକ୍ତ ଥିବା ହିଷ୍ଟ୍ରି ଶିଟର୍ ବିକାଶ ଦୁବେ ପୋଲିସ୍ ସହ ଆଖିମିଟିକା ଖେଳୁଥିବା ବେଳେ ତା’ର ଜଣେ ପରେ ଜଣେ ସହଯୋଗୀଙ୍କୁ ଗିରଫ ଜାରି ରହିଛି। ବୁଧବାର ପୂର୍ବାହ୍ନରେ ସେ ଫରିଦାବାଦର ଏକ ହୋଟେଲରେ ରହିଥିବା ନେଇ ପୋଲିସ୍ ସୂଚନା ପାଇଥିଲେ ହେଁ ସେଠାରେ ପହଞ୍ଚିବା ବେଳକୁ ସେ ଗାଏବ ହୋଇଯାଇଥିଲା। ବୁଧବାର ଅପରାହ୍ନରେ ସେ ଦିଲ୍ଲୀରେ ରହିଥିବା ନେଇ ମଧ୍ୟ ସୂଚନା ମିଳିଛି। ତେଣୁ ସ୍ଥାନୀୟ ପୋଲିସ୍ ଆଲର୍ଟ ହୋଇଥିବା ଜଣାପଡ଼ିଛି। ଦକ୍ଷିଣ ଦିଲ୍ଲୀର ନଜଫଗଡ଼ ଅଞ୍ଚଳର ଏକାଧିକ ସ୍ଥାନରେ ମଧ୍ୟ ଚଢ଼ାଉ କରାଯାଇଛି। ପୋଲିସର ଏକ ସ୍ବତନ୍ତ୍ର ୟୁନିଟ୍ ଦୁବେ ଦିଲ୍ଲୀରେ କେଉଁଠି ଲୁଚିଥିବା ନେଇ ଗୁଇନ୍ଦା ସୂତ୍ରରୁ ସୂଚନା ପାଇବା ପରେ ସମଗ୍ର ଦିଲ୍ଲୀରେ ପୋଲିସ୍ ତନ୍ନ ତନ୍ନ କରି ଏହି ଗ୍ୟାଙ୍ଗଷ୍ଟରକୁ ଖୋଜିବାରେ ଲାଗିଛି। କିନ୍ତୁ ରିପୋର୍ଟ ଲେଖାଯିବା ପର୍ଯ୍ୟନ୍ତ ପୋଲିସକୁ ସଫଳତା ମିଳିପାରିନାହିଁ। ଅନ୍ୟପକ୍ଷରେ ଚୌବେପୁର ପୋଲିସ ପକ୍ଷରୁ ଦୁବେକୁ ଚଢ଼ାଉ ନେଇ ପୂର୍ବ ସୂଚନା ଦିଆଯିବା ପ୍ରସଙ୍ଗରେ ଦୁଇ ଜଣ ପୋଲିସ୍ ଅଧିକାରୀଙ୍କୁ ଗିରଫ କରାଯାଇଥିବା ଜଣାପଡ଼ିଛି।

ଏନକାଉଣ୍ଟରରେ ଦୁବେ ସହଯୋଗୀ ମୃତ, ପୁଣି ଖସିଗଲା ୬୦ ମାମଲାର ଅପରାଧୀ

କାନପୁର ଗ୍ୟାଙ୍ଗଷ୍ଟର୍ ବିକାଶ ଦୁବେକୁ ଧରିବା ସକାଶେ କାନପୁର ପୋଲିସ୍ ଏକାଧିକ ଟିମ୍ ଗଠନ କରି ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି। ତେବେ ବୁଧବାର ଭୋର୍ ସମୟରେ ସ୍ପେଶାଲ୍ ଟାସ୍କ ଫୋର୍ସ (ଏସଟିଏଫ୍) ହାତରେ ଦୁବେର ଜଣେ ଘନିଷ୍ଠ ସହଯୋଗୀ ଅମର ଦୁବେ ମୃତ୍ୟୁବରଣ କରିଥିବା ଜଣାପଡ଼ିଛି। ଏନେଇ ଏସଟିଏଫ୍ ଆଇଜି ଅମିତାଭ ୟଶ ହମିରପୁରର ମୌଦାହାଠାରେ ଏହି ଏନକାଉଣ୍ଟର୍ ହୋଇଥିବା କହିଛନ୍ତି। କିନ୍ତୁ ୬୦ଟି ଅପରାଧିକ ମାମଲା ରହିଥିବା ଦୁବେ ପୁଣିଥରେ ଖସିଯିବାରେ ସକ୍ଷମ ହୋଇଥିବା ଜଣାପଡ଼ିଛି। ଅନ୍ୟପକ୍ଷରେ ଗ୍ୟାଙ୍ଗଷ୍ଟର୍ ଅମର ଦୁବେ ସମ୍ପର୍କରେ ସୂଚନା ଦେଲେ, ସୂଚନାଦାତାଙ୍କୁ ୨୫ ହଜାର ଟଙ୍କାର ପୁରସ୍କାର ଦିଆଯିବା ସକାଶେ ମଧ୍ୟ ଘୋଷଣା ହୋଇଥିଲା। ଗତ ସପ୍ତାହରେ କାନପୁର ପୋଲିସର ୮ ଜଣ କର୍ମଚାରୀଙ୍କୁ ହତ୍ୟା କରିବା ଘଟଣା ସହ ଅମର ମଧ୍ୟ ସଂଶ୍ଳିଷ୍ଟ ଥିବା ଜଣାପଡ଼ିଛି। ଅନ୍ୟପକ୍ଷରେ ବିକାଶ ଦିଲ୍ଲୀ-ମଥୁରା ହାଇୱେରେ ଫରିଦାବାଦର ମଢ଼କାଲ୍ ଚୌକ ଅଞ୍ଚଳରେ ଏକ ହୋଟେଲରେ ଲୁଚିଥିବା ନେଇ ପୋଲିସ୍ ସୂଚନା ପାଇ ଚଢ଼ାଉ କରିଥିଲେ ହେଁ ଗ୍ୟାଙ୍ଗଷ୍ଟର୍ ପୁଣିଥରେ ଖସିଯିବାରେ ସକ୍ଷମ ହୋଇଛି।

ରେଳଧାରଣାରୁ ସମାଜସେବୀ ଆଦିତ୍ୟ ଦାଶଙ୍କ ମୃତଦେହ


ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ