Pratinidhi Odia

ଏମ୍‌ସରେ କନ୍ଧମାଳର ଯୋଡ଼ାମୁଣ୍ଡ ଶିଶୁ ଜଗା-କାଳିଆ : ଛୁଟୁଛି ସହାନୁଭୂତିର ସୁଅ


ଭୁବନେଶ୍ୱର: ନୂଆଦିଲ୍ଲୀ ଏମ୍‌ସରେ ଅସ୍ତ୍ରୋପଚାର ପୂର୍ବରୁ ଅବଜରଭେସନ୍‌ରେ ରହିଥିବା କନ୍ଧମାଳର ଯୋଡ଼ାମୁଣ୍ଡ ଶିଶୁଙ୍କୁ ନେଇ ସାରା ରାଜ୍ୟରେ ସୃଷ୍ଟି ହୋଇଛି ସମବେଦନାର ସୁଅ । ଶହ ଶହ ଲୋକ ପିଲାଦୁହିଁଙ୍କ ଦ୍ରୁତ ଆରୋଗ୍ୟ କାମନା କରି ସୋସିଆଲ ମିଡ଼ିଆରେ ବାର୍ତ୍ତାମାନ ପଠାଉଛନ୍ତି । ମନେ ହେଉଛି ଯେପରିକି ସାରା ଓଡ଼ିଶା ଏହି ଜୀବନ ସଂଘର୍ଷ କରୁଥିବା କନ୍ଧମାଳର ଦୁଇଭାଇଙ୍କ ସହିତ ଯୋଡ଼ି ହୋଇଯାଇଛି । ସେପଟେ ଏମ୍‌ସ ପକ୍ଷରୁ ପିଲାଦୁହିଁଙ୍କର ସଫଳ ଅସ୍ତ୍ରୋପଚାର ପାଇଁ ବ୍ୟାପକ ବିଚାରବିମର୍ଶ ଆରମ୍ଭ ହୋଇଯାଇଛି ।

ଜଗା-କାଳିଆଙ୍କ ଓଜନ ୨୦ କିଲୋଗ୍ରାମ ରହିଛି । ସେମାନେ ଅପପୃଷ୍ଟିର ଶିକାର ହୋଇଥିବା ଦୃଷ୍ଟିରୁ ଏବେ ସେମାନଙ୍କୁ ନିଶ୍ଚେତକ ଦିଆଯାଇପାରିବ ନାହିଁ । ପୁଣି ଜଣକର ଛାତିରେ ସଂକ୍ରମଣ ଥିବା ଜଣାଯାଇଛି । ଉଭୟଙ୍କ ଦେହରେ ଜ୍ୱର ଥିବା ନେଇ ସୂଚନା ଦେଇଛନ୍ତି ଡାକ୍ତରମାନେ । ତେଣେ ଜଗା-କାଳିଆ ହାତ ଧରାଧରି ହୋଇ ଚକାଚକା ଭଉଁରୀ ଖେଳୁଛନ୍ତି। ଉଭୟଙ୍କ ମୁହଁରେ ହସ ଥିବାବେଳେ ଦେଖଣାହାରୀଙ୍କ ମୁହଁରେ ସୃଷ୍ଟି ହେଉଛି ଲୁହ । ଉଠିବାକୁ ଯାଇ ବାରମ୍ବାର ସେମାନେ ତଳେ ପଡ଼ୁଛନ୍ତି କିନ୍ତୁ ଠିଆ ହେବା ପାଇଁ ସେମାନଙ୍କ ସଂଘର୍ଷ ଦେଖି ବାପା ମା’ଙ୍କ ମନରେ ଆଶା ସୃଷ୍ଟି ହୋଇଛି ।

ଡାକ୍ତର କହୁଛନ୍ତି ପିଲା ଦୁହିଁଙ୍କ ମୁଣ୍ଡକୁ ପୃଥକ କରିବା ଏକ ଜଟିଳ ବ୍ୟପାର । ସାରା ବିଶ୍ୱରେ ଏଭଳି ମାତ୍ର ୫୦ଟି କେସ୍ ସାମ୍ନାକୁ ଆସିଛି । ସେଥିରୁ ସଫଳତା ମାତ୍ର ୨୦ ପ୍ରତିଶତ । ଜଗା-କାଳିଆ ସାରା ରାଜ୍ୟର ଭାବାବେଗକୁ ବାନ୍ଧି ରଖିଥିବାରୁ ଆମେ ଏହାକୁ ଚ୍ୟାଲେଞ୍ଜ ଭାବେ ଗ୍ରହଣ କରିଛୁ । ପିଲା ଦୁହିଁଙ୍କର ଅପରେସନ୍ ପାଇଁ ନ୍ୟୁରୋସର୍ଜରୀ, ପ୍ଲାଷ୍ଟିକ ସର୍ଜରୀ, ନିଶ୍ଚେତକ, ଭାସ୍କୁଲାର ସର୍ଜରୀର ଡାକ୍ତରମାନଙ୍କୁ ନେଇ ଏକ ଟିମ୍ ଗଠନ କରାଯାଇପାରେ ବୋଲି ଏମ୍‌ସ ଏକ ପ୍ରେସ୍ ଇସ୍ତାହାରରେ ଶନିବାର ସୂଚନା ଦେଇଛି ।

Post Comment




  
Captcha
Cannot Read? Click Here to generate a new one.


ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ

କରେନ୍ସି କନଭର୍ଟର


ଜନମତ

ଚଳିତ ପଞ୍ଚାୟତ ନିବର୍ବାଚନରେ ରାଜନୈତିକ ଦଳଗୁଡ଼ିକର ବେଲଗାମ ଖର୍ଚ୍ଚ ଉପରେ ବିମୁଦ୍ରାୟନ ଅଙ୍କୁଶ ଲଗାଇ ପାରିଛି କି?