Pratinidhi Odia

ବାଦ ବିବାଦ

ଆୟୁଷ୍ମାନ ଭାରତ ବନାମ ବିଜୁ ସ୍ବାସ୍ଥ୍ୟ କଲ୍ୟାଣ

କେନ୍ଦ୍ର ସରକାରଙ୍କ ଆୟୁଷ୍ମାନ ଭାରତ ଯୋଜନାକୁ ଓଡ଼ିଶା ସରକାର ରାଜ୍ୟରେ ଲାଗୁ କରିବେ ନାହିଁ। ସ୍ବାସ୍ଥ୍ୟ ମନ୍ତ୍ରୀ ପ୍ରତାପ ଜେନା ଏ ନେଇ ରୋକ୍‌ଠୋକ୍‌ ମନା କରିଦେଇଛନ୍ତି। କହିଛନ୍ତି ଯେ କେନ୍ଦ୍ର ସରକାରଙ୍କ ଆୟୁଷ୍ମାନ ଭାରତ ଯୋଜନାରେ ଓଡ଼ିଶାବାସୀ ଉପକୃତ ହେବେ ନାହିଁ। ଓଡ଼ିଶାବାସୀଙ୍କ ସ୍ବାସ୍ଥ୍ୟ ସୁରକ୍ଷା ପାଇଁ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ଅଧିକ ଫଳପ୍ରଦ ହେବ। ଏପଟେ କିନ୍ତୁ ବିଜେପି ରାଜ୍ୟ ସରକାରଙ୍କୁ ଏ ପ୍ରସଙ୍ଗ ନେଇ ଘେରିଛି। ଦଳ ଆରୋପ କରି କହିଛି ଯେ ଆୟୁଷ୍ମାନ ଭାରତ ଯୋଜନାରେ ଯାହା ସୁବିଧା ଓ ନିୟମାବଳୀ ରହିଛି, ସେହି ସମାନ ସୁବିଧା ଓ ନିୟମାବଳୀ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ରହିଛି। ତେଣୁ ଏହି ଯୋଜନା କେବଳ ରାଜ୍ୟବାସୀଙ୍କୁ ବିଭ୍ରାନ୍ତ କରାଇବା ପାଇଁ ଉଦ୍ଦିଷ୍ଟ।

ତେଜୁଛି ରତ୍ନଭଣ୍ଡାର ଚାବି ଗାଏବ ବିବାଦ

ବିଜେପିର ବରିଷ୍ଠ ନେତା ତଥା ସାଂସଦ ସୁବ୍ରମଣ୍ୟମ ସ୍ବାମୀ ଗୁରୁବାର ପୁରୀ ଶ୍ରୀମନ୍ଦିରକୁ ନେଇ ରଖିଥିବା ମନ୍ତବ୍ୟ ସୋସାଲ ମିଡିଆରେ ହଇଚଇ ସୃଷ୍ଟି କରିଛି। ସୁବ୍ରମଣ୍ୟମ ଗୁରୁବାର ଜଗଦ୍‌ଗୁରୁ ଶଙ୍କରାଚାର୍ଯ୍ୟଙ୍କୁ ସାକ୍ଷାତ କରିବା ପରେ ଶ୍ରୀଜଗନ୍ନାଥ ମନ୍ଦିରକୁ ରାଜ୍ୟ ସରକାରଙ୍କ ନିୟନ୍ତ୍ରଣରୁ ମୁକ୍ତ କରାଇବେ ବୋଲି କଥା ଦେଇଛନ୍ତି ବୋଲି ନିଜେ ଟ୍ବିଟରରେ ଉଲ୍ଲେଖ କରିଛନ୍ତି। ଜୁନ ୭ ତାରିଖ ରାତି ୯ଟା ୫୪ ମିନିଟରେ ସ୍ବାମୀ ତାଙ୍କ ଟ୍ବିଟରରେ ଲେଖିଛନ୍ତି ଯେ ସେ ପ୍ରାୟ ଏକ ଘଣ୍ଟା କାଳ ଜଗଦ୍‌ଗୁରୁ ଶଙ୍କରାଚାର୍ଯ୍ୟଙ୍କ ସହ ସାକ୍ଷାତ କରି ଏ ବିଷୟରେ ଆଲୋଚନା କରିଛନ୍ତି। ଆସନ୍ତା ଦୀପାବଳି ପୂର୍ବରୁ ଅଯୋଧ୍ୟା ରାମମନ୍ଦିର ମାମଲା ସାରିବା ଦିଗରେ ତାଙ୍କଠୁ ଆଶୀର୍ବାଦ ନେବା ସହ ତିରୁମାଲା ବାଲାଜୀ ମନ୍ଦିରକୁ ଆନ୍ଧ୍ର ପ୍ରଦେଶ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁଙ୍କ ନିୟନ୍ତ୍ରଣରୁ ମୁକ୍ତ କରିବା ପରେ ଏବେ ପୁରୀ ଶ୍ରୀଜଗନ୍ନାଥ ମନ୍ଦିରକୁ ଓଡ଼ିଶା ସରକାରଙ୍କ ନିୟନ୍ତ୍ରଣରୁ ମୁକ୍ତ କରାଇବେ ବୋଲି ଶଙ୍କରାଚାର୍ଯ୍ୟଙ୍କୁ କଥା ଦେଇଥିବା ସେ ଲେଖିଛନ୍ତି। ସୁବ୍ରମଣ୍ୟମଙ୍କ ଟ୍ବିଟ ଓଡ଼ିଶାର ସୋସାଲ ମିଡିଆରେ ଛାଇ ହୋଇଯାଇଛି। ସୋସାଲ ମିଡିଆ ବ୍ୟବହାରକାରୀମାନେ ସୁବ୍ରମଣ୍ୟମଙ୍କ ଏଭଳି ପଦକ୍ଷେପକୁ ସ୍ବାଗତ କରିଛନ୍ତି।

କଂଗ୍ରେସ ହାତରେ କର୍ଣ୍ଣାଟକ ଏଟିଏମ୍‌
ମହାନଦୀ: କେବେ ଖାଉଥିଲା କୂଳ, ଏବେ ଲଗାଉଛି କନ୍ଦଳ

ଝାରସୁଗୁଡ଼ା ଶୁଖାସୋଡ଼ା ଏବଂ ବରଗଡ଼ ଚିଖଲିରୁ ଆରମ୍ଭ ହୋଇଥିବା ମହାନଦୀ ସୁରକ୍ଷା ସଚେତନତା ଅଭିଯାନ ଶୁକ୍ରବାର ପାରାଦୀପ ସମୁଦ୍ର ବେଳାଭୂମିରେ ଉଦ୍‌ଯାପିତ ହୋଇଯାଇଛି। ଏହି କାର୍ଯ୍ୟକ୍ରମରେ ଉପସ୍ଥିତ ରହି ବିଜେଡି ସୁପ୍ରିମୋ ନବୀନ ପଟ୍ଟନାୟକ କେନ୍ଦ୍ରର ବିଜେପି ସରକାର ଏବଂ ଓଡ଼ିଶାର ବିଜେପି ନେତାଙ୍କ ଉପରେ ବର୍ଷିଛନ୍ତି। ଓଡ଼ିଶାର ଜୀବନରେଖା ମହାନଦୀର ଜଳ ଓ ଜୀବନ ପ୍ରବାହକୁ ଅବ୍ୟାହତ ରଖିବାକୁ ଏହାର ସୁରକ୍ଷା ଜରୁରୀ ବୋଲି କହିଛନ୍ତି ନବୀନ। ମହାନଦୀ ଭଳି ଗୁରୁତ୍ବପୂର୍ଣ୍ଣ ଓ ସମ୍ବେଦନଶୀଳ ପ୍ରସଙ୍ଗରେ କେନ୍ଦ୍ରର ବିଜେପି ସରକାର ଚୁପ ରହିଛନ୍ତି। ଓଡ଼ିଶାର ବିଜେପି ଦଳୀୟ ନେତାମାନେ ଛତିଶଗଡ଼ ସରକାରଙ୍କୁ ସମର୍ଥନ କରୁଛନ୍ତି। କିନ୍ତୁ ଓଡ଼ିଶାରେ କୁମ୍ଭୀର କାନ୍ଦଣା କାନ୍ଦୁଛନ୍ତି। ଏଭଳି ଦୋମୁହାଁ ନୀତି ଗ୍ରହଣ କରୁଥିବା ନେତାମାନଙ୍କର ଯଦି ଦରଦ ଅଛି ତେବେ ସେମାନେ ଛତିଶଗଡ଼ ପ୍ରକଳ୍ପକୁ ବିରୋଧ କରନ୍ତୁ। ଏସବୁର ନିର୍ମାଣ କାର୍ଯ୍ୟ ତୁରନ୍ତ ବନ୍ଦ କରିବା ପାଇଁ ଚାପ ପକାନ୍ତୁ ବୋଲି ନବୀନ କହିଥିଲେ। ଓଡ଼ିଶା ସରକାର ଏହି ପ୍ରସଙ୍ଗକୁ ନେଇ ସୁପ୍ରିମକୋର୍ଟ ଯିବା ପରେ କୋର୍ଟଙ୍କ ନିର୍ଦେଶମତେ ଟ୍ରିବ୍ୟୁନାଲ ଗଠନ ହୋଇଛି। ଓଡ଼ିଶାବାସୀ ଏହି ସଚେତନତା ଯାତ୍ରା ବେଳେ ଏକାଠି ହୋଇ ପୂର୍ଣ୍ଣ ସମର୍ଥନ ଜଣାଇଛନ୍ତି। ସେଥିପାଇଁ ନବୀନ ସମସ୍ତଙ୍କୁ ଧନ୍ୟବାଦ ଜଣାଇବା ସହ ଆଗାମୀ ଦିନରେ ଏହି ଲଢ଼େଇ ଆହୁରି ଜୋରଦାର ହେବ ବୋଲି ଚେତାବନୀ ଶୁଣାଇଥିଲେ। ମୁଖ୍ୟମନ୍ତ୍ରୀଙ୍କ ସଭା ପୂର୍ବରୁ ୨୦ରୁ ଊର୍ଦ୍ଧ୍ବ ବିଧାୟକ, ସାଂସଦ ଓ ମନ୍ତ୍ରୀ କେନ୍ଦ୍ର ସରକାରଙ୍କ ଉପରେ ପ୍ରଚଣ୍ଡ ପ୍ରହାର କରିଥିଲେ।

ତୁତିକୋରିନ ବିବାଦ ତେଜୁଛି

ତାମିଲନାଡ଼ୁର ତୁତିକୋରିନରେ ବେଦାନ୍ତ ଷ୍ଟରଲାଇଟ୍‌ କପର ପ୍ଲାଣ୍ଟର ପ୍ରଦୂଷିତ ଜଳ ସ୍ଥାନୀୟ ଅଞ୍ଚଳରେ କର୍କଟ ରୋଗ ସୃଷ୍ଟି କରୁଥିବା ଅଭିଯୋଗ ଦେଇ ଜନସାଧାରଣ ସଡ଼କ ଉପରକୁ ଓହ୍ଲାଇଥିଲେ। ପ୍ରଦର୍ଶନକାରୀ ଓ ପୋଲିସ ମଧ୍ୟରେ ଖଣ୍ଡଯୁଦ୍ଧ ହେବା ପରେ ପୋଲିସ ଗୁଳିଚାଳନା କରିଥିଲା। ଏଥିରେ ୧୩ ଜଣ ସାଧାରଣ ଲୋକଙ୍କ ମୃତ୍ୟୁ ହୋଇଥିବା ବେଳେ ୭୦ରୁ ଊର୍ଦ୍ଧ୍ବ ଲୋକ ଆହତ ହୋଇ ଚିକିତ୍ସାଳୟମାନଙ୍କରେ ଭର୍ତ୍ତି ହୋଇଛନ୍ତି। ଘଟଣାକୁ ନେଇ ଉତ୍ତେଜନା ଲାଗିରହିଛି। ତାମିଲନାଡ଼ୁ ସରକାର ସୋସାଲ ମିଡିଆରେ ଗୁଜବ ରୋକିବା ସହିତ ଶାନ୍ତି ପ୍ରତିଷ୍ଠା ଲକ୍ଷ୍ୟରେ ତିର୍ଣ୍ଣେଲବେଲି ଓ କନ୍ୟାକୁମାରୀ ଜିଲାରେ ଇଣ୍ଟରନେଟ ସେବା ଉପରେ ରୋକ ଲଗାଇଦେଇଛନ୍ତି। ସମ୍ବେଦନଶୀଳ ଅଞ୍ଚଳରେ ବ୍ୟାପକ ପୋଲିସ ଓ ସୁରକ୍ଷାକର୍ମୀ ନିୟୋଜିତ କରାଯାଇଛି।

ମହାଭିଯୋଗ ପ୍ରସଙ୍ଗ: ପଛକୁ ଫେରିଲା କଂଗ୍ରେସ ପାଦ

ସୁପ୍ରିମକୋର୍ଟର ମୁଖ୍ୟ ବିଚାରପତି ଦୀପକ ମିଶ୍ରଙ୍କ ବିରୋଧରେ କଂଗ୍ରେସ ସମେତ ଅନ୍ୟ ୬ଟି ରାଜନୈତିକ ଦଳ ଆଣିଥିବା ମହାଭିଯୋଗ ପ୍ରସ୍ତାବକୁ ଖାରଜ କରିଥିଲେ ଉପରାଷ୍ଟ୍ରପତି ଭେଙ୍କୈୟା ନାଇଡୁ। ଉପରାଷ୍ଟ୍ରପତିଙ୍କ ଏହି ନିଷ୍ପତ୍ତିକୁ ଚ୍ୟାଲେଞ୍ଜ କରିଥିଲା କଂଗ୍ରେସ। କଂଗ୍ରେସର ଦୁଇଜଣ ସାଂସଦ ପ୍ରତାପ ସିଂହ ବାଦବା ଏବଂ ଅମି ହର୍ଷାଦ୍ରୟ ଉପରାଷ୍ଟ୍ରପତିଙ୍କ ନିଷ୍ପତ୍ତି ବିରୋଧରେ ସୁପ୍ରିମକୋର୍ଟ ଯାଇଥିଲେ। ସୁପ୍ରିମକୋର୍ଟରେ ମଙ୍ଗଳବାର ଏକ ପାଞ୍ଚଜଣିଆ ଖଣ୍ଡପୀଠଙ୍କ ନିକଟରେ ମାମଲାଟି ଶୁଣାଣି ହେବାକୁ ଥିବାବେଳେ ହଠାତ୍‌ କଂଗ୍ରେସ ଏହି ମହାଭିଯୋଗ ପ୍ରସ୍ତାବକୁ ଫେରାଇ ନେଇଥିଲା। ପ୍ରସ୍ତାବ ଫେରାଇ ନିଆଯିବା ପ୍ରସଙ୍ଗକୁ ନେଇ କଂଗ୍ରେସର ବରିଷ୍ଠ ନେତା ତଥା ଆଇନଜୀବୀ କପିଲ ସିବଲ ସାମ୍ବାଦିକମାନଙ୍କୁ ଯେଉଁ ସୂଚନା ଦେଇଛନ୍ତି, ତାହା ବିବାଦ ସୃଷ୍ଟି କରିଛି।

ବିବାଦରେ କଳିଙ୍ଗ ଷ୍ଟୁଡିଓରେ ସ୍ପୋର୍ଟସ କମ୍ପ୍ଲେକ୍ସ ପ୍ରସ୍ତାବ

କ୍ରୀଡ଼ା ସଚିବ ବିଶାଳ ଦେବ କଳିଙ୍ଗ ଷ୍ଟୁଡିଓ ସଂଲଗ୍ନ ବଳକା ଜମିରେ ସ୍ପୋର୍ଟସ କମ୍ପ୍ଲେକ୍ସ ନିର୍ମାଣ ନେଇ ସାଧାରଣ ପ୍ରଶାସନ ବିଭାଗକୁ ଚିଠି ଲେଖିବା ପରେ ବିବାଦ ତୀବ୍ର ରୂପ ଧାରଣ କରିଛି। କଳାକାରମାନେ ଆନ୍ଦୋଳନକୁ ଓହ୍ଲାଇଛନ୍ତି। ଓଡ଼ିଶା ଚଳଚ୍ଚିତ୍ର ଉନ୍ନୟନ ନିଗମ ମଧ୍ୟ ନିଜ ଅସନ୍ତୋଷ ଜାହିର କରିଛି। ଓଡ଼ିଶା ଚଳଚ୍ଚିତ୍ର ଉନ୍ନୟନ ନିଗମର ଅଧ୍ୟକ୍ଷ ମୁନ୍ନା ଖାଁ ତୀବ୍ର ପ୍ରତିକ୍ରିୟା ପ୍ରକାଶ କରି ଷ୍ଟୁଡିଓର ଇଞ୍ଚେ ବି ଜମି ଅନ୍ୟ କେଉଁ ଉଦ୍ଦେଶ୍ୟ ପାଇଁ ଦିଆଯିବ ନାହିଁ ବୋଲି ସ୍ପଷ୍ଟ କରିଛନ୍ତି। ଯାହାର ଜମି ଦରକାର ସେ ଅନ୍ୟତ୍ର ଦେଖନ୍ତୁ, ଷ୍ଟୁଡିଓ ଭିତରେ ନୁହେଁ ବୋଲି ସଫା ସଫା କହିଛନ୍ତି ମୁନ୍ନା ଖାଁ। କଳିଙ୍ଗ ଷ୍ଟୁଡିଓର ଜମି କେବଳ କଳିଙ୍ଗ ଷ୍ଟୁଡିଓର। ସେଠି ଯାହା କିଛି ହେବ ଷ୍ଟୁଡିଓର ଉନ୍ନତି ଏବଂ ସିନେମା ଶିଳ୍ପର ଭିତ୍ତିଭୂମି ପାଇଁ। ସେ ଜମିରେ ଅନ୍ୟ କାହାର ଅଧିକାର ନାହିଁ ବୋଲି ସେ ସ୍ପଷ୍ଟ କରିଦେଇଛନ୍ତି।

ବିଚାରପତି ପଦ ବିବାଦ

ସୁପ୍ରିମକୋର୍ଟରେ ପୁଣି ସୃଷ୍ଟି ହୋଇଛି ବିବାଦ। ଏ ବିବାଦ କାହାରି ମନ୍ତବ୍ୟକୁ ବା ରାୟକୁ ନେଇ ନୁହେଁ। ନିଯୁକ୍ତିକୁ ନେଇ ହୋଇଛି ବିବାଦ। କଲେଜିଅମ ସୁପାରିସକୁ ଗ୍ରହଣ କରି କେନ୍ଦ୍ର ସରକାର ବରିଷ୍ଠ ଆଇନଜୀବୀ ଇନ୍ଦୁ ମାଲହୋତ୍ରାଙ୍କୁ ସୁପ୍ରିମକୋର୍ଟ ବିଚାରପତି ଭାବେ ନିଯୁକ୍ତି ଦେଇଥିବା ବେଳେ ଉତ୍ତରାଖଣ୍ଡ ହାଇକୋର୍ଟର ମୁଖ୍ୟ ବିଚାରପତି କେ.ଏମ.ଯୋଶେଫଙ୍କ ନିଯୁକ୍ତିକୁ କେନ୍ଦ୍ର ସରକାର ଅଗ୍ରାହ୍ୟ କରିଦେଇଛନ୍ତି। ଯୋଶେଫଙ୍କ ଭଳି ବିଭିନ୍ନ ହାଇକୋର୍ଟରେ ବହୁ ବରିଷ୍ଠ ବିଚାରପତି ଥିବା ବେଳେ ଯୋଶେଫଙ୍କୁ ନିଯୁକ୍ତି ଦେଲେ ଅନ୍ୟମାନଙ୍କ ପ୍ରତି ଅନ୍ୟାୟ ହେବ ବୋଲି କେନ୍ଦ୍ର ସରକାରଙ୍କ ପକ୍ଷରୁ ଦର୍ଶାଯାଇଛି। ସୁପ୍ରିମକୋର୍ଟ ଏହି ପ୍ରସଙ୍ଗରେ ଆଉଥରେ ବିଚାର କରନ୍ତୁ ବୋଲି କେନ୍ଦ୍ର ସରକାର କହିଛନ୍ତି। କେନ୍ଦ୍ର ସରକାରଙ୍କ ଏହି ନିଷ୍ପତ୍ତିକୁ କଂଗ୍ରେସ ଏବଂ ସୁ୍ପ୍ରିମକୋର୍ଟ ବାର ଆସୋସିଏସନ ବିରୋଧ କରିଥିବା ବେଳେ ସୁପ୍ରିମକୋର୍ଟ ପ୍ରଧାନ ବିଚାରପତି ଜଷ୍ଟିସ ଦୀପକ ମିଶ୍ର କେନ୍ଦ୍ର ସରକାରଙ୍କୁ ସମର୍ଥନ କରିଛନ୍ତି। ଜଷ୍ଟିସ ମିଶ୍ର କହିଛନ୍ତି ଯେ ଏଭଳି ସୁପାରିସ ଫେରାଇବାକୁ କେନ୍ଦ୍ରର ଅଧିକାର ରହିଛି।

ମହାଭିଯୋଗ ଖାରଜ ପରେ ଟଣାଓଟରା

ସୁପ୍ରିମକୋର୍ଟର ମୁଖ୍ୟ ବିଚାରପତି ଜଷ୍ଟିସ ଦୀପକ ମିଶ୍ରଙ୍କୁ ପଦରୁ ହଟାଇବା ପାଇଁ ଅଣ୍ଟା ଭିଡ଼ିଥିବା କଂଗ୍ରେସକୁ ସୋମବାର ଏକ ବଡ଼ ଝଟ୍‌କା ମିଳିଛି। କଂଗ୍ରେସ ଏବଂ ଅନ୍ୟାନ୍ୟ ୬ଟି ବିରୋଧୀଦଳ ଗୁଡ଼ିକ ପକ୍ଷରୁ ଅଣାଯାଇଥିବା ମହାଭିଯୋଗ ପ୍ରସ୍ତାବକୁ ରାଜ୍ୟସଭା ଅଧ୍ୟକ୍ଷ ତଥା ଉପରାଷ୍ଟ୍ରପତି ଭେଙ୍କୈୟା ନାଇଡୁ ଖାରଜ କରିଦେଇଛନ୍ତି। ସୁପ୍ରିମକୋର୍ଟ ମୁଖ୍ୟ ବିଚାରପତି ପଦରୁ ଦୀପକ ମିଶ୍ରଙ୍କୁ ହଟାଇବା ପାଇଁ କଂଗ୍ରେସର ପ୍ରସ୍ତାବକୁ ଖାରଜ କରାଯିବା ପରେ ଏହାକୁ ନେଇ ବିବାଦ ତେଜିବାରେ ଲାଗିଛି। କଂଗ୍ରେସ ରାହୁଲ ଗାନ୍ଧିଙ୍କ ନେତୃତ୍ବରେ ସମ୍ବିଧାନ ବଞ୍ଚାଅ ଅଭିଯାନ ଆରମ୍ଭ କରିଥିବା ବେଳେ ବିଜେଡି ଏହାର ଦୃଢ଼ ନିନ୍ଦା କରିଛି। ମୁଖ୍ୟ ବିଚାରପତିଙ୍କ ମନମାନୀ ଓ ମୋଦିଙ୍କ ସମ୍ବିଧାନ ଉପରେ ହସ୍ତକ୍ଷେପକୁ ନେଇ ବର୍ଷିଛନ୍ତି ରାହୁଲ।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ


କରେନ୍ସି କନଭର୍ଟର

ଜନମତ

କୁଳଭୂଷଣ ଯାଦବଙ୍କୁ ନିର୍ଯାତନା ଦେବା ସହ ପାକିସ୍ତାନ ଅମାନବୀୟ ଆଚରଣ ପ୍ରଦର୍ଶନ କରୁଛି ଏବଂ ଏହାକୁ ଘୋଡ଼ାଇବା ପାଇଁ କୁଟନୈତିକ ଚାଲ୍‌ ଖେଳି ଚାଲିଛି। ଏଥିରେ ଆପଣ ଏକ ମତ ତ!