Pratinidhi Odia

ଶିକ୍ଷା ଓ କ୍ୟାରିଅର

ମଧ୍ୟପ୍ରଦେଶ ମାଟ୍ରିକ ଫଳ: ଦୁଗ୍ଧ ବିକ୍ରେତାଙ୍କ ପୁଅ ହେଲେ ରାଜ୍ୟ

ମଧ୍ୟପ୍ରଦେଶ ମାଟ୍ରିକ ପରୀକ୍ଷା ଫଳ ସୋମବାର ପ୍ରକାଶ ପାଇଛି। ଏଥିରେ ହର୍ଷବର୍ଦ୍ଧନ ପରମାର ନାମକ ଜଣେ ପରୀକ୍ଷାର୍ଥୀ ରାଜ୍ୟ ଟପ୍ପର ହୋଇଛନ୍ତି। ସାଜାପୁର ବାସିନ୍ଦା ହର୍ଷବର୍ଦ୍ଧନ ଭଲ ଫଳ ପାଇବା ପାଇଁ କଠିନ ପରିଶ୍ରମ କରୁଥିଲେ। ଦିନରାତି ଏକ କରି ସେ ପଢ଼ୁଥିବା ତାଙ୍କ ମା’ କହନ୍ତି। ତାଙ୍କ ପିତା ଜଣେ ଦୁଗ୍ଧ ବିକ୍ରେତା। ଘର ଘର ବୁଲି ଦୁଗ୍ଧ ବିକ୍ରି କରିବା ତାଙ୍କର ପେସା। ହର୍ଷ ଭଲ ପାଠ ପଢ଼ି ବଡ଼ ଅଫିସର ହେଉ ଏହା ଚାହିଁଥିଲେ ହର୍ଷଙ୍କ ବାପା। ହର୍ଷବର୍ଦ୍ଧନ ଆର୍ମିରେ ଯିବାକୁ ଚାହାନ୍ତି। ଏନ୍‌ଡିଏର ପ୍ରବେଶିକା ପାଇ ସେନାରେ କାମ କରିବା ପାଇଁ ଯେତେ ଯାହା କଷ୍ଟ କରିବାକୁ ପଡ଼ିଲେ ସେ କରିବେ ବୋଲି କହନ୍ତି। ନିଜ ମା’ ବାପାଙ୍କ ସ୍ବପ୍ନ ପୂରା କରିବାକୁ ସେ ନିଶ୍ଚିତ ଉଦ୍ୟମ କରିବେ ବୋଲି ହର୍ଷ କହିଛନ୍ତି।

ମାଟ୍ରିକ ପରୀକ୍ଷା ଫଳ ପ୍ରକାଶିତ: ୩୬ ସ୍କୁଲରେ ଫଳ ଶୂନ
ରବିବାର ହେବ ଏନ୍‌ଇଇଟି ୨୦୧୮

ଦେଶରେ ମେଡିକାଲ ପାଠ୍ୟକ୍ରମରେ ନାମ ଲେଖାଇବା ପାଇଁ ନ୍ୟାସନାଲ ଏଲିଜିବିଲିଟି କମ୍‌ ଏଣ୍ଟ୍ରାନ୍ସ ଟେଷ୍ଟର ଆୟୋଜନ କରାଯାଇଥାଏ। ଚଳିତ ଥର ନିଟ୍‌ ପରୀକ୍ଷାର ଆୟୋଜନ ୬ ମେ ୨୦୧୮ରେ ହେବ। ନିଟ୍‌ ପରୀକ୍ଷା ସମ୍ପର୍କରେ ଦିଲ୍ଲୀ ହାଇକୋର୍ଟଙ୍କ ନିଷ୍ପତ୍ତି ପରେ କୃପାଣଧାରୀ ଶିଖ ଛାତ୍ରଛାତ୍ରୀଙ୍କୁ ପରୀକ୍ଷା ଆୟୋଜନ ହେବାର ଘଣ୍ଟାଏ ପୂର୍ବରୁ ପହଞ୍ଚିବା ପାଇଁ କୁହାଯାଇଛି। ଅଦାଲତ ପକ୍ଷରୁ ସ୍ପଷ୍ଟ କୁହାଯାଇଛି ଯେ ଶିଖ ସମ୍ପ୍ରଦାୟ ସହିତ କଡ଼ା ଏବଂ କୃପାଣକୁ ପରୀକ୍ଷା କେନ୍ଦ୍ର ଭିତରକୁ ନିଆଯିବା ଦିଗରେ ରୋକ୍‌ ଲାଗିପାରିବ ନାହିଁ। ବିମାନରେ ଏହି ଦ୍ରବ୍ୟଗୁଡ଼ିକ ନିଆଯାଇ ପାରୁଥିବା ବେଳେ ପରୀକ୍ଷା କେନ୍ଦ୍ର ଗୁଡ଼ିକରେ ଏହାକୁ ଅଟକାଇ ହେବନି। ଜଷ୍ଟିସ ଏସ. ରବୀନ୍ଦ୍ର ଭଟ୍ଟ ଓ ଜଷ୍ଟିସ ଏ.କେ.ଚାୱଲାଙ୍କ ଖଣ୍ଡପୀଠ ସିବିଏସ୍‌ଇଙ୍କ ଆବେଦନକୁ ରଦ୍ଦ କରିବା ସହିତ ଏହି ବସ୍ତୁଗୁଡ଼ିକ ପରୀକ୍ଷା କେନ୍ଦ୍ର ଭିତରକୁ ନିଆଯିବା ପାଇଁ ଅନୁମତି ଦେଇଛନ୍ତି। ଅଦାଲତ ସିବିଏସ୍‌ଇକୁ ସୂଚିତ କରାଇଛନ୍ତି ଯେ ଅସ୍ପଷ୍ଟ ଆଶଙ୍କା ଆଧାରରେ ଆପଣ ପ୍ରତିବନ୍ଧକ ଲଗାଇପାରିବେ ନାହିଁ। କୃପାଣ ଓ ଏପରି ବସ୍ତୁ ଧରି ପରୀକ୍ଷା ହଲରେ ପ୍ରବେଶ କରୁଥିବା ବିଦ୍ୟାର୍ଥୀମାନେ ଯେ କପି କରିବେ ଏହା କୁହାଯାଇପାରିବ ନାହିଁ ବୋଲି ଅଦାଲତ କହିଛନ୍ତି।

କେଉଁ ସହର ଦେବ ବଡ଼ ଚାକିରି, ଜାଣନ୍ତୁ

ଦେଶରେ ସବୁଠୁ ଅଧିକ ଦରମା ଦେଉଥିବା ବଡ଼ ସହରମାନଙ୍କ ମଧ୍ୟରେ ଟପ୍‌ ୱାନରେ ରହିଛି କର୍ଣ୍ଣାଟକର ରାଜଧାନୀ ବେଙ୍ଗାଳୁରୁ। ଏଠାରେ ପେସାଦାରମାନଙ୍କ ହାରାହାରି ବାର୍ଷିକ ଦରମା ୧୦.୮ ଲକ୍ଷ ଟଙ୍କା। ଏହା ସହିତ ମେଡିସିନ ଏବଂ ହେଲ୍‌ଥ ସର୍ଭିସ କମ୍ପାନୀଗୁଡ଼ିକରେ ଅନ୍ୟ ସେକ୍ଟର ତୁଳନାରେ ସବୁଠୁ ଅଧିକ ଦରମା ମିଳିଥାଏ । ରେଡଷ୍ଟାଣ୍ଡ ଇଣ୍ଡିଆର ରିସର୍ଚ୍ଚ ଏବଂ ଆନାଲିସିସ ଡିପାର୍ଟମେଣ୍ଟର ସୂଚନା ଅନୁଯାୟୀ ବିଭିନ୍ନ ସହରରେ ପେସାଦାରମାନଙ୍କ ହାରାହାରି ବାର୍ଷିକ ଦରମା ସମ୍ପର୍କିତ ତଥ୍ୟ ଦିଆଯାଇଛି। ଏହିକ୍ରମରେ ବେଙ୍ଗାଳୁରୁରେ ବାର୍ଷିକ ୧୦.୮ ଲକ୍ଷ ଟଙ୍କାର ଦରମା ପାଉଥିବା କର୍ମଚାରୀଙ୍କ ସଂଖ୍ୟା ଦେଶର ଅନ୍ୟ ସହର ତୁଳନାରେ ଆଗରେ ଓ ପ୍ରଥମ ସ୍ଥାନରେ ରହିଛି। ବେଙ୍ଗାଳୁରୁ ପରେ ରୋଜଗାର ପରିମାଣ ଦୃଷ୍ଟିରୁ ଦ୍ବିତୀୟ ସ୍ଥାନରେ ରହିଛି ପୁଣେ (୧୦.୩ ଲକ୍ଷ)। ତୃତୀୟ ସ୍ଥାନରେ ଏନ୍‌ସିଆର (୯.୯ ଲକ୍ଷ) ଏବଂ ମୁମ୍ବାଇ ଚତୁର୍ଥ ସ୍ଥାନରେ (୯.୨ ଲକ୍ଷ) ରହିଛି। ବେଙ୍ଗାଳୁରୁରେ ପେସାଦାରମାନେ ବାର୍ଷିକ ହାରାହାରି ୧୦.୮ ଲକ୍ଷ ଦରମା ପାଉଥିବା ବେଳେ ଚେନ୍ନାଇର ପେସାଦାରମାନେ ବାର୍ଷିକ ୮ ଲକ୍ଷ ରୋଜଗାର କରିଥାନ୍ତି। ହାଇଦ୍ରାବାଦରେ ପେସାଦାରମାନଙ୍କ ବାର୍ଷିକ ରୋଜଗାର ୭ ଲକ୍ଷରୁ ଅଧିକ ଥିବା ବେଳେ କୋଲକାତାରେ ଏହି ପରିମାଣ ୭.୨ ଲକ୍ଷ ରହିଛି। ଦେଶର ସବୁଠୁ ଅଧିକ ଦରମା ପାଉଥିବା ପେସାଦାରଙ୍କ ସଂଖ୍ୟା ଦୃଷ୍ଟିରୁ ଓଡ଼ିଶାର ଭୁବନେଶ୍ବର ୨୫ଟି ସହର ତଳକୁ ଖସିଆସିଥିବା ଜଣାଯାଇଛି।

ସ୍ବାଧୀନତା ପରଠାରୁ ୪୭ ଗୁଣା ବଢ଼ିଛି କଲେଜ ସଂଖ୍ୟା

ବଦଳୁଛି ସମୟ। ତାଳ ଦେଇ ବଦଳୁଛି ବିକାଶର ଚିତ୍ର। ବିଗତ କିଛି ବର୍ଷ ମଧ୍ୟରେ ଦେଶର ଶିକ୍ଷା, ସ୍ବାସ୍ଥ୍ୟ, ପରିବହନ ଓ ଯୋଗାଯୋଗ କ୍ଷେତ୍ରରେ ଯଥେଷ୍ଟ ପରିବର୍ତ୍ତନ ଘଟିଛି। ଦେଶ ସ୍ବାଧୀନତା ପରଠାରୁ ଉଚ୍ଚଶିକ୍ଷା କ୍ଷେତ୍ରରେ ଅନେକ ବିକାଶ ହେବା ସହିତ କଲେଜ ସଂଖ୍ୟା ୪୭ ଗୁଣା ବୃଦ୍ଧି ପାଇଛି। ଦେଶରେ ସମ୍ପ୍ରତି ୩୯,୩୩୫ଟି କଲେଜ ରହିଛି। ମୋଟ କଲେଜ ସଂଖ୍ୟା ମଧ୍ୟରୁ ୬୦ ପ୍ରତିଶତ କଲେଜ ଗ୍ରାମାଞ୍ଚଳରେ ରହିଥିବା ଜଣାପଡ଼ିଛି। ଉତ୍ତର ପ୍ରଦେଶରେ ଦେଶର ସର୍ବାଧିକ କଲେଜ ରହିଛି। ଉତ୍ତର ପ୍ରଦେଶରେ ୬,୩୪୯ଟି କଲେଜ ଥିବା ବେଳେ ମହାରାଷ୍ଟ୍ରରେ ୪,୪୩୧ଟି କଲେଜ ରହିଛି। ସେହିପରି କର୍ଣ୍ଣାଟକରେ ୩,୭୯୧ କଲେଜ ଥିବା ବେଳେ ଆନ୍ଧ୍ରପ୍ରଦେଶରେ ୩,୨୬୦ଟି କଲେଜ ରହିଛି। ସେଥିମଧ୍ୟରୁ ୫୯ ପ୍ରତିଶତ କଲେଜ ଗ୍ରାମାଞ୍ଚଳରେ ଏବଂ ୪୧ ପ୍ରତିଶତ କଲେଜ ସହରାଞ୍ଚଳରେ ରହିଛି। ୨୦୧୦ ରୁ ୨୦୧୮ ମଧ୍ୟରେ ଦେଶରେ ୭୦ ପ୍ରତିଶତ ନୂଆ କଲେଜ ସ୍ଥାପିତ ହୋଇଛି। ୧୯୪୭ ମସିହା ପରଠାରୁ ଦୀର୍ଘ ଅର୍ଦ୍ଧଶତାବ୍ଦୀ ବ୍ୟାପୀ ଦେଶରେ ମାତ୍ର ୩୦ ପ୍ରତିଶତ କଲେଜ ପ୍ରତିଷ୍ଠା ହୋଇଥିବା ବେଳେ ଗତ ୧୦ ବର୍ଷରେ ୭୦ ପ୍ରତିଶତ କଲେଜ ପ୍ରତିଷ୍ଠା ହେବା ନିଶ୍ଚିତ ଭାବେ ଏକ ଉଲ୍ଲେଖନୀୟ ପ୍ରସଙ୍ଗ।

୧୦ ଲକ୍ଷ ବିଦ୍ୟାର୍ଥୀଙ୍କୁ ମିଳିବ ୬,୬୦୦ କୋଟି

କେନ୍ଦ୍ର ମାନବ ସମ୍ବଳ ବିକାଶ ମନ୍ତ୍ରୀ ପ୍ରକାଶ ଜାଭଡେକର ଆବଶ୍ୟକତା ଲୋଡ଼ୁଥିବା ବିଦ୍ୟାର୍ଥୀଙ୍କୁ ସହାୟତା ଦେବା ପାଇଁ କେନ୍ଦ୍ର ସରକାର ଆଗାମୀ ତିନିବର୍ଷରେ ୬,୬୦୦ କୋଟି ଟଙ୍କାର ୠଣ ଅନୁଦାନ ଯୋଗାଇ ଦେବେ ବୋଲି ସୂଚନା ଦେଇଛନ୍ତି। ବାର୍ଷିକ ୪.୫ ଲକ୍ଷ ରୋଜଗାର କରୁଥିବା ପରିବାର ଗୁଡ଼ିକର ୧୦ ଲକ୍ଷ ଛାତ୍ରଛାତ୍ରୀଙ୍କ ପାଇଁ କମ୍‌ ସୁଧରେ ଶିକ୍ଷା ୠଣ ପ୍ରଦାନର ଅବଧିକୁ ଆଉ ତିନିବର୍ଷ ଯାଏ ବଢ଼ାଯାଇଛି। ଏହି ଯୋଜନା ପାଇଁ ଯୋଗ୍ୟ ଛାତ୍ରଙ୍କୁ ବିନା ବନ୍ଧକ ଓ ଗ୍ୟାରେଣ୍ଟିରେ ୠଣ ପ୍ରଦାନ କରାଯିବ। ପାଠ୍ୟକ୍ରମ ସରିବା ପର୍ଯ୍ୟନ୍ତ କିମ୍ବା ଚାକିରି ମିଳିଯିବା ପର୍ଯ୍ୟନ୍ତ ସୁଧରାଶି ସରକାର ବହନ କରିବେ। ଏହି ଯୋଜନା ଅନୁଯାୟୀ ବିଦ୍ୟାର୍ଥୀଙ୍କୁ ୭.୫ ଲକ୍ଷ ଟଙ୍କା ପର୍ଯ୍ୟନ୍ତ ଶିକ୍ଷା ୠଣ ଉପଲବ୍ଧ କରାଯିବ।

କମ୍‌ ଖର୍ଚ୍ଚରେ ବିଦେଶରେ ଉଚ୍ଚଶିକ୍ଷା

ବିଶ୍ବର କିଛି ଦେଶ ଅଛି ଯେଉଁଠି ଆପଣ ବହୁତ କମ୍‌ ଖର୍ଚ୍ଚରେ ତଥା ବିନା ମୂଲ୍ୟରେ ଉଚ୍ଚଶିକ୍ଷା ପାଇପାରିବେ। ଏମିତି ଦେଶଗୁଡ଼ିକ ମଧ୍ୟରୁ ଗୋଟିଏ ହେଉଛି ସ୍ପେନ। ସ୍ପେନ ୟୁରୋପୀୟ ସଂଘର ନାଗରିକମାନଙ୍କୁ ମାଗଣାରେ ବିଶ୍ବବିଦ୍ୟାଳୟ ଶିକ୍ଷା ଉପଲବ୍ଧ କରାଇଥାଏ। ୟୁରୋପୀୟ ସଂଘ ବାହାରର ଛାତ୍ରଛାତ୍ରୀମାନଙ୍କ ଠାରୁ ମାମୁଲି ଅର୍ଥ ବିନିମୟରେ ଶିକ୍ଷାର ସୁଯୋଗ ପ୍ରଦାନ କରିଥାଏ। ସେହିପରି ଗ୍ରୀସରେ ବିଦେଶୀ ଛାତ୍ରଛାତ୍ରୀମାନଙ୍କୁ ବହୁତ କମ୍‌ ମୂଲ୍ୟରେ ଶିକ୍ଷାଦାନ ସୁବିଧା ଯୋଗାଇ ଦିଆଯାଉଥିବା ବେଳେ ସେଠାରେ ଖାଇବା ଓ ରହିବା ଖର୍ଚ୍ଚରେ ମଧ୍ୟ ରିହାତି ପ୍ରଦାନ କରାଯାଇଥାଏ। ବେଲଜିଅମରେ ବିଦେଶୀ ଛାତ୍ରଛାତ୍ରୀମାନଙ୍କୁ ନାମମାତ୍ର ଫିସ ଦେବାକୁ ପଡ଼ିଥାଏ ଯାହା ଛାତ୍ରଙ୍କ ପକେଟକୁ ବାଧେ ନାହିଁ।



ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ


କରେନ୍ସି କନଭର୍ଟର

ଜନମତ

କୁଳଭୂଷଣ ଯାଦବଙ୍କୁ ନିର୍ଯାତନା ଦେବା ସହ ପାକିସ୍ତାନ ଅମାନବୀୟ ଆଚରଣ ପ୍ରଦର୍ଶନ କରୁଛି ଏବଂ ଏହାକୁ ଘୋଡ଼ାଇବା ପାଇଁ କୁଟନୈତିକ ଚାଲ୍‌ ଖେଳି ଚାଲିଛି। ଏଥିରେ ଆପଣ ଏକ ମତ ତ!