Pratinidhi Odia

ଅପରାଧ

ଭୁବନେଶ୍ବର ପାଲଟିଛି ସୁନା ଚୋରା ଚାଲାଣର ହବ୍‌

ଚୋରା ସୁନା ଚାଲାଣର ହବ୍‌ ପାଲଟିଛି ଭୁବନେଶ୍ବର। ବିଗତ ୨ ମାସ ମଧ୍ୟରେ ଅନ୍ୟୁନ ୧୪ ଥର ଜବତ ହେଲାଣି ଚୋରା ସୁନା। କିଏ ସମ୍ବେଦନଶୀଳ ଅଙ୍ଗରେ ତ କିଏ ବ୍ୟାଗ୍‌ର ହ୍ବିଲ୍‌ରେ କିଏ ପ୍ରେସରକୁକର ଭିତରେ ତ ଆଉ କିଏ ନିଜ ଜୋତାରେ ଅତ୍ୟନ୍ତ ଚତୁର ଓ ସତର୍କତାର ସହ ନେଇ ଆସୁଛନ୍ତି ସୁନା। ବିଗତ ୩ ଦିନ ତଳେ ଏକ ବ୍ୟାଗ୍‌ର ଚକା ତଳୁ ଲକ୍ଷାଧିକ ଟଙ୍କାର ସୁନା ଜବତ ହୋଇଥିବା ବେଳେ ସୋମବାର ପୁଣି ଘଟିଛି ସମାନ ଘଟଣା। ବିମାନ ବନ୍ଦରରୁ ୫ କେଜିରୁ ଊର୍ଦ୍ଧ୍ବ ସୁନା ବିସ୍କୁଟ ଜବତ କରିଛି ରାଜସ୍ବ ଗୁଇନ୍ଦା ବିଭାଗ। ବ୍ୟାଙ୍କକରୁ ଭୁବନେଶ୍ବର ଚୋରା ଚାଲାଣ କରାଯାଉଥିବା ବେଳେ ଏସବୁ ସୁନାକୁ ଜବତ କରାଯାଇଛି। ଅନ୍ତର୍ଜାତୀୟ ବଜାରରେ ଏହିସବୁ ଜବତ ସୁନାର ମୂଲ୍ୟ ପାଖାପାଖି ୧ କୋଟି ୮୯ ଲକ୍ଷ ଟଙ୍କା ହେବ ବୋଲି କୁହାଯାଉଛି।

ଗଞ୍ଜାମ ପୋଲିସର ଏନ୍‌କାଉଣ୍ଟର ଜାରି

ଏପ୍ରିଲ ୬ ତାରିଖ ଦିନ ଗଞ୍ଜାମ ପୋଲିସ ରମ୍ଭାର ଗୋଲା ଶଙ୍ଖଠାରେ ଦୁର୍ଦ୍ଦାନ୍ତ ଅପରାଧୀ ୨୮ ବର୍ଷୀୟ ସନ୍ତୋଷ ବେହେରାଙ୍କୁ ଏନକାଉଣ୍ଟର କରିଥିଲା। ଠିକ୍‌ ତା’ର ମାସେ ପୂର୍ବରୁ ମାର୍ଚ୍ଚ ୫ ତାରିଖରେ ଗୋସାଣୀ ନୂଆଗାଁ ମେନ୍‌ରୋଡ ଆଇସ ଫ୍ୟାକ୍‌ଟ୍ରୀ ନିକଟରେ ବଡ଼ସାହିର ବାସିନ୍ଦା ଆଉଜଣେ ଅପରାଧୀ ମଙ୍ଗୁକୁ ଏନ୍‌କାଉଣ୍ଟର କରିଥିଲା ପୋଲିସ। ମେ ୬ ତାରିଖ ରବିବାର ସକାଳୁ ମଧ୍ୟ ଗଞ୍ଜାମବାସୀ ଅନୁରୂପ ଏକ ଖବର ପାଇଛନ୍ତି। ଗତ ରାତିରେ ପୋଲିସ ଓ ଅପରାଧୀମାନଙ୍କ ମଧ୍ୟରେ ଗୁଳି ବିନିମୟ ହେବାଦ୍ବାରା ଜଣେ ମୃତ୍ୟୁବରଣ କରିଛି ଏବଂ ଆଉ ଜଣେ ଗୁରୁତର ଆହତ ହୋଇ ଚିକିତ୍ସା ପାଇଁ ଭର୍ତ୍ତି ହୋଇଛନ୍ତି। ଏ ଘଟଣା ଘଟିଛି ଗଞ୍ଜାମ ଜିଲା ବୁଗୁଡ଼ା ଥାନା ବାଘୁଆ ଜଙ୍ଗଲରେ। ଶନିବାର ରାତି ୧୧ଟାରେ ପୋଲିସ ଏନକାଉଣ୍ଟରରେ ଆଖି ବୁଜିଛନ୍ତି ଦୁର୍ଦ୍ଦାନ୍ତ ଅପରାଧୀ ଶ୍ରୀକାନ୍ତ ରଣା। ଶ୍ରୀକାନ୍ତଙ୍କ ଘର ବେଲଗୁଣ୍ଠା ଫାଣ୍ଡି ଅନ୍ତର୍ଗତ ଆମ୍ବପୁଆ। ଏନକାଉଣ୍ଟରରେ ଶ୍ରୀକାନ୍ତଙ୍କ ସହଯୋଗୀ ଭଞ୍ଜନଗର ଥାନା ମୁଦୁଲୀପଲୀର ଗୌରୀ ସ୍ବାଇଁ ଆହତ ହୋଇଛନ୍ତି। ଅଭିଯୁକ୍ତଙ୍କ ବୋମା ମାଡ଼ରେ ବୁଗୁଡ଼ା ଥାନାର ୩ ପୋଲିସ କର୍ମଚାରୀ ଆହତ ହୋଇଛନ୍ତି। ଭଞ୍ଜନଗର ଏସ୍‌ଡିପିଓ ଉତ୍କଳ କେଶରୀ ଦାସ ବୁଗୁଡ଼ା ଥାନାରେ ରହି ପରିସ୍ଥିତି ଉପରେ ନଜର ରଖିଛନ୍ତି।

ଡିଲିଙ୍କ୍‌ରେ ଆଉ ଏକ ବିଜେଡି ବିଧାୟକ

ଧର୍ମଶାଳା ବିଧାୟକ ପ୍ରଣବ ବଳବନ୍ତରାୟଙ୍କୁ ଆସନ୍ତା ୭ ତାରିଖରେ ହାଜର ହେବା ପାଇଁ ପ୍ରବର୍ତ୍ତନ ନିର୍ଦେଶାଳୟ (ଇଡି) ସମନ ଜାରି କରିଛନ୍ତି। ଧଳ ସାମନ୍ତ ବ୍ରଦର୍ସଙ୍କ ବ୍ୟବସାୟିକ କାରବାର ସହିତ ପ୍ରଣବଙ୍କ ଟ୍ରାନ୍ସପୋର୍ଟ କମ୍ପାନୀର ସମ୍ପର୍କ ଥିବା ଇଡି ଜାଣିବାକୁ ପାଇଛନ୍ତି। ୨୦୦୫ରୁ ୨୦୧୦ ପର୍ଯ୍ୟନ୍ତ ୫ ବର୍ଷର କାରବାର ସମ୍ପର୍କିତ ସମସ୍ତ କାଗଜପତ୍ର ସହିତ ହାଜର ହେବା ପାଇଁ ପ୍ରଣବଙ୍କୁ ଇଡି ପକ୍ଷରୁ ସମନ ଜାରି ହୋଇଛି। ଡି ବ୍ରଦର୍ସଙ୍କ ସହିତ ସମ୍ପର୍କ ରକ୍ଷା କରି ଶାସକ ଦଳର ଏହି ବିଧାୟକ ବେଶ୍‌ ଆର୍ଥିକ ଲାଭବାନ ହୋଇପାରିଥିବା ଇଡି ଜାଣିବାକୁ ପାଇଛି। ପ୍ରଣବ ମେ ୭ ତାରିଖ ଦିନ ହାଜର ହେଉଥିବା ଜଣାଯାଇଛି। ୨୦୦୫ରୁ ୨୦୧୦ ମଧ୍ୟରେ ପ୍ରଣବଙ୍କ ପରିବହନ ସଂସ୍ଥାର ଆବଶ୍ୟକୀୟ ଦଲିଲ ସହିତ ଅଡିଟ ରିପୋର୍ଟ ନେଇ ହାଜର ହେବାକୁ କୁହାଯାଇଛି।

ପାର୍ସଲ ବୋମା ବିସ୍ଫୋରଣ ଘଟଣା: କ୍ରାଇମବ୍ରାଞ୍ଚ ନେବ

ପାଟଣାଗଡ଼ ପାର୍ସଲ ବୋମା ବିସ୍ଫୋରଣ ଘଟଣାରେ କ୍ରାଇମବ୍ରାଞ୍ଚଙ୍କୁ ବହୁ ଚାଞ୍ଚଲ୍ୟକର ତଥ୍ୟ ମିଳିଛି। ମୁଖ୍ୟ ଅଭିଯୁକ୍ତ ଅଧ୍ୟାପକ ପୁଞ୍ଜିଲାଲ ମେହେରଙ୍କୁ ରିମାଣ୍ଡରେ ଆଣି ଚତୁର୍ଥ ଦିନରେ ଜେରା ଚଳାଇଛି କ୍ରାଇମବ୍ରାଞ୍ଚ। ପୁଞ୍ଜିଲାଲଙ୍କ ବିରୋଧରେ ପ୍ରମାଣ ଯୋଗାଡ଼ ପାଇଁ କ୍ରାଇମବ୍ରାଞ୍ଚ ଅତ୍ୟାଧୁନିକ ଞାନକୌଶଳର ସହାୟତା ନେବ। ଏପରିକି ନନ୍‌ ହାଇଡ୍ରିନ ଟେକ୍ନୋଲୋଜିର ସହାୟତା ନେବ। ପୁଞ୍ଜିଲାଲଠାରୁ ଜବତ ସାମଗ୍ରୀ ଗୁଡ଼ିକୁ ବିଭିନ୍ନ ଜାତୀୟ ଓ ଅନ୍ତର୍ଜାତୀୟ ପରୀକ୍ଷାଗାରକୁ ପଠାଇବା ପାଇଁ କ୍ରାଇମବ୍ରାଞ୍ଚ ସ୍ଥିର କରିଛି। ବଲାଙ୍ଗିର ଏସ୍‌ପିଙ୍କ ନିକଟକୁ ପୁଞ୍ଜିଲାଲ ପଠାଇଥିବା ଚିଠିର ପ୍ରିଣ୍ଟ ଜାଣିବାକୁ କ୍ରାଇମବ୍ରାଞ୍ଚ ପ୍ରୟାସ କରିଛି। ଏହି ଚିଠିକୁ ଗାନ୍ଧିନଗରସ୍ଥିତ ସାଇଣ୍ଟିଫିକ ଲାବ୍‌କୁ ପଠାଯିବ। କୋରିଅର ସଂସ୍ଥାର ସିସିଟିଭି ଫୁଟେଜ ଇସ୍ରାଏଲର ଏକ ଲାବ୍‌କୁ ପଠାଯିବ। ଏତଦ୍‌ବ୍ୟତୀତ ପୁଞ୍ଜିଲାଲ ଏସ୍‌ପିଙ୍କୁ ଦେଇଥିବା ଚିଠିକୁ ଏକ ଲଫାପାରେ ଭର୍ତ୍ତି କରିଥିଲେ। ଲଫାପାଟିକୁ ବନ୍ଦ କରିବା ପାଇଁ ପାଟିରୁ ଲାଳ ସଂଗ୍ରହ କରି ବ୍ୟବହାର କରିଥିଲେ। ଏହି ଲାଳର ଡିଏନ୍‌ଏ ପରୀକ୍ଷା କରାଯିବ ବୋଲି କ୍ରାଇମବ୍ରାଞ୍ଚ ପକ୍ଷରୁ ସୂଚନା ଦିଆଯାଇଛି।

ଥାନାକୁ ଆସୁଛି ଦିନକୁ ୬ ଦୁଷ୍କର୍ମ ମାମଲା

ସପ୍ତାହକ ଭିତରେ ତୃତୀୟ ଘଟଣା। ପୁଣି ଜଣେ ଶିଶୁକନ୍ୟା ଦୁଷ୍କର୍ମର ଶିକାର ହୋଇଛି। ମୟୁରଭଞ୍ଜ, ସମ୍ବଲପୁର ପରେ ଏବେ ଜଗତସିଂହପୁରରେ ଘଟିଛି ନାବାଳିକା ବଳାତ୍କାର। ସାଲେପୁରର ଦୁଷ୍କର୍ମ ପୀଡ଼ିତା ନାବାଳିକା କଟକ ଆଇସିୟୁରେ ଅତ୍ୟନ୍ତ ସଙ୍କଟଜନକ ସ୍ଥିତିରେ ଥିବା ଡାକ୍ତରୀ ଦଳ କହିଛନ୍ତି। ତେଣେ ଜଗତସିଂହପୁରରେ ଦୁଇ ନାବାଳକଙ୍କ ଦ୍ବାରା ଗଣଦୁଷ୍କର୍ମର ଶିକାର ପୀଡ଼ିତା ନାବାଳିକାଙ୍କ ଡାକ୍ତରୀ ପରୀକ୍ଷା କରାଯାଇଛି। ଜିଲାର କଣ୍ଟାବଲ୍ଲଭପୁରରେ ଜଣେ ୬ ବର୍ଷୀୟା ଶିଶୁକନ୍ୟାକୁ ବିଳମ୍ବିତ ରାତିରେ ୨ ଜଣ ପଡ଼ୋଶୀଘରର ନାବାଳକ ଦୁଷ୍କର୍ମ କରିଛନ୍ତି। ସେମାନଙ୍କ ମଧ୍ୟରୁ ଜଣକର ବୟସ ୧୪ବର୍ଷ ହୋଇଥିବାବେଳେ ଅନ୍ୟଜଣଙ୍କ ବୟସ ୯ ବର୍ଷ। ଅଭିଯୁକ୍ତଦ୍ବୟଙ୍କୁ ଥାନାରେ ଅଟକ ରଖାଯାଇଛି। ଅନୁରୂପ ଘଟଣା ଗତ ୨୪ ତାରିଖରେ ସମ୍ବଲପୁରଠାରେ ଦେଖିବାକୁ ମିଳିଥିଲା। ଜଣେ ୫ ବର୍ଷର ଶିଶୁକନ୍ୟାକୁ ତାଙ୍କ ପଡ଼ୋଶୀ ଘରର ଦୁଇ ନାବାଳକ ମିଶି ଦୁଷ୍କର୍ମ କରିଥିଲେ। ଏପ୍ରିଲ ୧୯ରେ ମୟୁରଭଞ୍ଜ ଜିଲା ଠାକୁରମୁଣ୍ଡାଠାରେ ଜଣେ ଅଟୋଚାଳକ ଦ୍ବାରା ଜଣେ ନାବାଳିକା ଦୁଷ୍କର୍ମର ଶିକାର ହୋଇଥିଲା। ଏହି ଘଟଣାକୁ ନେଇ ସାରା ରାଜ୍ୟରେ ଆଲୋଡ଼ନ ସୃଷ୍ଟି ହୋଇଥିବା ବେଳେ ଗୃହ ବିଭାଗ ପକ୍ଷରୁ ପ୍ରକାଶିତ ୨୦୧୭ ବର୍ଷର ଶ୍ବେତପତ୍ର ରାଜ୍ୟରେ ଦୁଷ୍କର୍ମ ସମେତ ଅନ୍ୟାନ୍ୟ ଅପରାଧର ସ୍ପଷ୍ଟ ଚିତ୍ର ସାମ୍ନାକୁ ଆଣିଛି।

ପାର୍ସଲ ବୋମା ବିସ୍ଫୋରଣ ମାମଲା: ବଦଳିଲା ତଦନ୍ତର ମୋଡ଼,

ବହୁଚର୍ଚ୍ଚିତ ପାଟଣାଗଡ଼ ପାର୍ସଲ ବୋମା ବିସ୍ଫୋରକ ମାମଲାର ତଦନ୍ତ ଭିନ୍ନ ମୋଡ଼ ଦେଇଛି। ପ୍ରଥମେ ପୋଲିସ୍‌ ଏହାକୁ ପ୍ରେମଜନିତ ପ୍ରତିଶୋଧ ବୋଲି ବିଚାର କରି ସେ ଦିଗଗୁଡ଼ିକ ଉପରେ ତଦନ୍ତକୁ କେନ୍ଦ୍ରିତ କରିଥିବା ବେଳେ ଏବେ ଏହା ପଛରେ ଅନ୍ୟ କିଛି କାରଣ ଥିବା ସନ୍ଦେହ କରୁଛି। ରବିବାର କ୍ରାଇମ୍‌ବ୍ରାଞ୍ଚର ସ୍ବତନ୍ତ୍ର ତଦନ୍ତକାରୀ ଦଳ ଭଇଁସାଠାରେ ଥିବା ଜ୍ୟୋତି ବିକାଶ ମହାବିଦ୍ୟାଳୟର ଇଂରାଜୀ ଅଧ୍ୟାପକ ପୁଞ୍ଜିଲାଲ ମେହେରଙ୍କୁ ଉଠାଇ ନେଇଛି। ସେହି ମହାବିଦ୍ୟାଳୟର ଜଣେ ପୂର୍ବତନ ଓଡ଼ିଆ ଅଧ୍ୟାପକ ତଥା ବର୍ତ୍ତମାନର ନୂଆପଡ଼ା ନ୍ୟାସ୍‌ନାଲ କଲେଜର ଓଡ଼ିଆ ଅଧ୍ୟାପକ ଶିବ ପ୍ରସାଦ ସାଙ୍କ ସମେତ ଭଇଁସାର ମୋତିଲାଲ ମେହେର ଓ ଉମେଶ ପଟାରୀଙ୍କୁ ମଧ୍ୟ ଉଠାଇ ନେଇଛି। ଓଡ଼ିଆ ଅଧ୍ୟାପକ ଶିବ ପ୍ରସାଦ ସା ମର୍ଣ୍ଣିଂୱାକ୍‌ରେ ଯାଉଥିବା ବେଳେ କ୍ରାଇମ୍‌ବ୍ରାଞ୍ଚ ତାଙ୍କୁ ଉଠାଇ ନେଇଥିବା ବେଳେ ପୁଞ୍ଜିଲାଲଙ୍କୁ ତାଙ୍କ ଘରୁ ଉଠାଇ ନେଇଥିଲା କ୍ରାଇମ୍‌ବ୍ରାଞ୍ଚ। ପୁଞ୍ଜିଲାଲଙ୍କ ଘରୁ ପୋଲିସ୍‌ ଏକ ମୋବାଇଲ୍‌, ଲାପଟପ୍‌ ଓ ଅନ୍ୟାନ୍ୟ କେତେକ କାଗଜପତ୍ର ସାଥିରେ ନେଇ ଯାଇଛି।

ଦେଶର ଚର୍ଚ୍ଚିତ ଦେହ ବଜାର


ଶ୍ରୀଜଗନ୍ନାଥଙ୍କ ପହଡ଼ ଖୋଲା ଦର୍ଶନ


କରେନ୍ସି କନଭର୍ଟର

ଜନମତ

କୁଳଭୂଷଣ ଯାଦବଙ୍କୁ ନିର୍ଯାତନା ଦେବା ସହ ପାକିସ୍ତାନ ଅମାନବୀୟ ଆଚରଣ ପ୍ରଦର୍ଶନ କରୁଛି ଏବଂ ଏହାକୁ ଘୋଡ଼ାଇବା ପାଇଁ କୁଟନୈତିକ ଚାଲ୍‌ ଖେଳି ଚାଲିଛି। ଏଥିରେ ଆପଣ ଏକ ମତ ତ!